ឆ្លើយតបទៅកាន់ការរិះគន់ ពីសំណាកមហាជន និងលោក ផែង វណ្ណៈ ដែលថាកងកម្លាំងសមត្ថកិច្ចខេត្តឧត្តរមានជ័យ មិនចេះធ្វើការ ពាក់ព័ន្ធនឹងករណីឃាត់ខ្លួនបុរស២រូប ដែលប្រគល់គ្រាប់មីនឱ្យទៅសមត្ថកិច្ច ពេលនេះស្នងការខេត្តបានចេញមកបញ្ជាក់ច្បាស់ៗ ដើម្បីរក្សាកិត្តិយស សេចក្តីថ្លៃថ្នូររបស់ថ្នាក់ដឹកនាំ ក៏ដូចជាកងកម្លាំងនគរបាលជាតិ។

បើតាមស្នងការដ្ឋាននគរបាលខេត្តឧត្តរមានជ័យ បានបញ្ជាក់ថា៖” នៅក្នុងករណីនេះជនសង្ស័យទាំងពីរនាក់ខាងលើ មានចេតនាយ៉ាងពិតប្រាកដ ក្នុងការប្រព្រឹត្តបទល្មើសនាំយកគ្រាប់មីនតោនចេញពីទីតាំងតំបន់ស រវាងព្រំដែនប្រទេសទាំងពីរ ដោយហេតុថា កន្លងមក ជនសង្ស័ុម្នាក់ ក្នុងចំណោម២នាក់ ឈ្មោះ ទី ពិទូ ធ្លាប់បានដឹង និងបានចុះទៅថតផ្សព្វផ្សាយអំពីរឿងមីនតោននេះ ហើយត្រូវបានអាជ្ញាធរមានសមត្ថកិច្ច ពន្យល់បកស្រាយរួចហើយដែរ”។

តែផ្ទុយមកវិញ ជនសង្ស័យនៅតែគឃ្លីនពុំស្តាប់តាមការណែនាំរបស់អាជ្ញាធរមានសមត្ថកិច្ច និង ហ៊ានរហូតដល់ប្រព្រឹត្តបទល្មើសជាក់ស្តែង ទើបសមត្ថកិច្ចធ្វើការឃាត់ខ្លួន និងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់វិធានការបន្តតាមនីតិវិធីច្បាប់។

គួរបញ្ជាក់ថា សកម្មភាពល្មើសច្បាប់នេះ អាចបង្កផលប៉ះពាល់ដល់ការទំនាក់ទំនងព្រំដែនរវាងប្រទេសទាំងពីរ កម្ពុជា-ថៃ៕

បឹងយក្សអោម ឬ យក្សក្រា ដែលអ្នកស្រុកតែងហៅថា “បឹងភ្លោះ” មានទីតាំងស្ថិតនៅក្នុង ភូមិណងហៃ ឃុំសេដា ស្រុកលំផាត់ ខេត្តរតនគីរី។

បឹងនេះ មានចម្ងាយប្រមាណជា ៦៥ គីឡូម៉ែត្រពីវិមានឯករាជ្យក្រុងបានលុង។ ដើម្បីធ្វើដំណើរទៅកាន់ទីនោះភ្ញៀវទេសចរ ត្រូវធ្វើដំណើរដោយថ្មើរជើង ពីសហគមន៍ដែលនៅមិនឆ្ងាយពីបឹងនោះប៉ុន្មាននោះទេ។

បឹងភ្លោះកើតចេញពីភ្នំភ្លើងប្រមាណជា៤ពាន់ឆ្នាំមុន ដែលបច្ចុប្បន្នមិនសូវមានភ្ញៀវទេសចរទៅកម្សាន្ត ឬស្គាល់បឹងនេះនោះទេ ដោយស្ថានភាពផ្លូវមិនសូវអំណោយផល បូករួមជាមួយមិនសូវមានការផ្សព្វផ្សាយថែមទៀត។

ចំណុចទាក់ទាញនៃបឹងយក្សអោម ឬ យក្សក្រា គឺទីនេះ មានសម្រស់ធម្មជាតិដ៏ស្រស់បំព្រងនៃបឹង អមជាមួយទេសភាពស្រស់ត្រកាល ព្រៃព្រឹកក្សាធម្មជាតិពណ៍បៃតងសមស្របនឹងអាកាសធាតុអំណោយផលដ៏សែនត្រជាក់។

គួរបញ្ជាក់ផងដែរថា រតនគិរីគឺជាខេត្តមួយនៅក្នុងប្រទេសកម្ពុជា ដែលសម្បូរទៅដោយភ្នំភ្លើងងាប់ និងបានបន្សល់ទុកបឹងជាច្រើនដូចជាបឹងយក្សឡោម បឹងលំកុដ និងបឹងយក្សម៉ាយជាដើម៕

រូបភាព៖ Every Thing

ស្រុកវាលវែង ក្នុងខេត្តពោធិ៍សាត់ ជាតំបន់ទេសចរណ៍ធម្មជាតិដ៏ល្បី និងទាក់ទាញបំផុតមួយនៅកម្ពុជា ដែលបាននឹងកំពុងអភិវឌ្ឍខ្លួន យ៉ាងឆាប់រហ័ស។

ភ្ញៀវទេសចរ ធ្វើដំណើរចេញពីខេត្តពោធិ៍សាត់ តាមបណ្ដោយផ្លូវជាតិលេខ៥៥ នឹងបានទៅដល់រង្វង់មូលប្រម៉ោយ ដែលជាទីរួមស្រុកវាលវែង។

បន្ទាប់មក ចេញពីរង្វង់មូលប្រមោយ ប្រមាណ៣០គីឡូម៉ែត្រ ភ្ញៀវទេសចរនឹងបានឆ្លងកាត់”ផ្លូវបុប្ផាលាក់ខ្លួន” នៅតំបន់ភ្នំ១៥០០។

នៅចន្លោះតំបន់ភ្នំ១៥០០ និងតំបន់ថ្មដា ភ្ញៀវទេសចរអាចគយគន់ ទេសភាពព្រៃភ្នំ វាលស្មៅលើខ្នងភ្នំ ទឹកអូរហូរតាមជ្រលងភ្នំ ដ៏ស្រស់ត្រកាលបានថែមទៀតផងដែរ។

លើសពីនេះ ភ្ញៀវទេសចរអាចបន្តដំណើរឆ្ពោះទៅច្រកថ្មដា ដែលជាច្រកព្រំដែនរកម្ពុជា-ថៃ រវាងខេត្តពោធិ៍សាត់ និងខេត្តត្រាត។

ក្នុងចំណោមតំបន់ទេសចរណ៍ជាច្រើនកន្លែង ក្នុងខេត្តពោធិ៍សាត់ តំបន់ទេសចរណ៍ដែលជាទីចាប់អារម្មណ៍ និងមានអ្នកទៅលេងកម្សាន្តច្រើនជាងគេ គឺស្រុកវាលវែង រង្វង់មូលដំរី ផ្លូវបុប្ផាលាក់ខ្លួន (ភ្នំ១៥០០) ឃុំថ្មដា និងឃុំអូរសោម។

គួរបញ្ជាក់ថា ស្រុកវាលវែង គឺជាទិសដៅទេសចរណ៍ដ៏មានសក្តានុពលខ្លាំងជាងគេ ក្នុងការលើកកម្ពស់សេដ្ឋកិច្ចប្រជាពលរដ្ឋនៅក្នុងខេត្តពោធិ៍សាត់៕

ថ្មីៗនេះ ក្រសួងមហាផ្ទៃ បានដាក់ជនបរទេសម្នាក់ចូលក្នុងបញ្ជីខ្មៅ និងហាមឃាត់មិនឱ្យចូលមកកម្ពុជាអស់មួយជីវិត។

បើអ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ បានមានលើកឡើងថា៖ “ជនមានឈ្មោះក្នុងបញ្ជីខ្មៅ លោក ជឺរល ហ្វីលីន (Gerald Flynn) ស្ថិតក្នុងចំណោមជនបរទេសរាប់សែននាក់ដែលធ្លាប់ចេញចូលប្រទេសកម្ពុជា។ នៅក្នុងឯកសារស្នើសុំទិដ្ឋការចូលទៅប្រទេសកម្ពុជា លោក ជឺរល ហ្វីលីន (Gerald Flynn) បានដាក់ស្នើទៅធ្វើជាងអគ្គិសនី ឬជាងភ្លើង តែធាតុពិតបែរជាលបលួចទៅធ្វើជាអ្នកយកព័ត៌មានវិញ។ នៅក្នុងករណីនេះ លោក ជឺរល ហ្វីលីន (Gerald Flynn) បានរំលោភច្បាប់រដ្ឋអធិបតេយ្យ និងច្បាប់អន្តរជាតិ”។

អ្នកនាំពាក្យរងរូបនេះ បានសង្កត់ធ្ងន់ទៀតថា៖”ករណីនេះ មន្ត្រីអន្តោប្រវេសន៍អនុវត្តត្រឹមត្រូវតាមជំនាញនិងច្បាប់។ ជារួមកម្ពុជាអនុវត្តស្របច្បាប់អន្តរជាតិដែលប្រទេសទាំងអស់ក៏ធ្វើបែបនេះដែរ ហើយមិនពាក់ពាក់ព័ន្ធនឹងការរឿងរើសអើងប្រកាន់ពូជសាសន៍ និងបញ្ហានយោបាយដូចការលាបពណ៌មួលបង្កាច់នោះទេ”។

សូមបញ្ជាក់ថា កាលពីថ្ងៃទី៥ ខែមករា ឆ្នាំ២០២៥ លោក ជឺរល ហ្វីលីន (Gerald Flynn) ត្រូវបានមន្ត្រីអន្តោប្រវេសន៍នៅអាកាសយានដ្ឋានអន្តរជាតិខេត្តសៀមរាប ហាមមិនឱ្យលោកចូលមកកម្ពុជាទេ ក្រោយពេលលោកវិលត្រឡប់មកពីវិស្សមកាលនៅប្រទេសថៃ៕

ប្រាសាទនគរបាជ័យ គឺជារមណីយដ្ឋានវប្បធម៌ប្រវត្តិសាស្ត្រមួយដែលស្ថិតនៅឃុំអំពិល ស្រុកកំពង់សៀម ខេត្តកំពង់ចាម មានចម្ងាយប្រមាណ ១២២ គីឡូម៉ែត្រពីរាជធានីភ្នំពេញ។ ប្រាសាទនេះត្រូវបានកសាងឡើងនៅចុងសតវត្សទី១២ និងដើមសតវត្សទី១៣ ដោយព្រះបាទជ័យវរ្ម័នទី៧ ក្នុងរចនាបថបាយ័ន ហើយឧទ្ទិសដល់ព្រះពុទ្ធសាសនាមហាយាន។

បច្ចុប្បន្នរមណីយដ្ឋានប្រាសាទនគរបាជ័យ គឺជាទឹកដីដ៏ពិសិដ្ឋ បានកំពុងទាក់ទាញភ្ញៀវទេសចរគ្រប់ជាតិសាសន៍ ឱ្យមកទស្សនាជាហូរហែរ និងជាប្រាសាទដ៏ល្អឯកមួយដែលតែងតែស្ថិតក្នុងដួងចិត្តរបស់ប្រជាជនខ្មែរគ្រប់ៗរូប។ ប្រាសាទនេះមានរាងជាចតុកោណកែង បែរមុខទៅទិសខាងកើត និងមានកំពែងថ្មបាយក្រៀមព័ទ្ធជុំវិញចំនួន ៤ ជាន់។ ដូច្នេះដើម្បីទៅដល់ទីតាំងដ៏អស្ចារ្យនេះលោកអ្នកអាចធ្វើដំណើរចេញពីរាជធានីភ្នំពេញ តាមផ្លូវជាតិលេខ ៦ និងបន្តតាមផ្លូវជាតិលេខ ៧ ពីស្គុនទៅកំពង់ចាមក្នុងចម្ងាយប្រមាណ ១១៩ គីឡូម៉ែត្រ។

នៅក្នុងបរិវេណប្រាសាទយើងនឹងឃើញមានសសរពេជ្រខ្ពស់ៗ ឈរទប់ទ្រផ្ដែរប្រាសាទយ៉ាងរឹងមាំ រីឯទ្វារទាំងបួនទិសរបស់ប្រាសាទដែលអមដោយជញ្ជាំងទាំងឡាយ ក៏រឹងមាំល្អឥតខ្ចោះគ្មានការរង្គោះរង្គើឡើយ។ បច្ចុប្បន្នស្ថានភាពប្រាសាទនេះគឺនៅរឹងមាំល្អណាស់ សម្រាប់ការទស្សនាកម្សាន្ត ហើយក៏បន្សល់ទុកនូវផ្ទាំងសិលាចារិកក៏ដូចជាចម្លាក់នានាស្ថិតនៅក្នុងលំនាំដើមទាំងអស់។ ចំណែកសំណង់ព្រះវិហារព្រះពុទ្ធសាសនា ដែលស្ថាបនាក្រោយសម័យអង្គរនោះវិញ ក៏ស្ថិតនៅល្អតាមលំនាំស្ថាបត្យកម្មដើមផងដែរ៕