លទ្ធភាពនៃការវិលត្រឡប់មកវិញរបស់ Kim Soo Hyun បន្ទាប់ពីមានរឿងអា.ស្រូវធ្ងន់ធ្ងរ

នៅក្នុងកម្មវិធីវិទ្យុមួយដែលបានចាក់ផ្សាយនៅថ្ងៃទី១ ខែមិថុនា មេធាវី Kho Sang Rock បានឆ្លើយសំណួរទាក់ទងនឹងលទ្ធភាពនៃ ការវិលត្រឡប់មកវិញរបស់តារាសម្តែង Kim Soo Hyun បន្ទាប់ពីមានភាពចម្រូងចម្រាស និងការតស៊ូផ្នែកច្បាប់អស់រយៈពេលជាច្រើនខែ។

លោកបាននិយាយថា «នៅពេលនេះ វាពិបាកក្នុងការធ្វើអត្ថាធិប្បាយជាក់លាក់លើផែនការវិលត្រឡប់របស់ Kim Soo Hyun ណាស់។ ទោះជាយ៉ាងណាក៏ដោយ ក្នុងនាមជាអ្នកតំណាងផ្នែកច្បាប់របស់គាត់ ខ្ញុំនឹងបន្តគាំទ្រគាត់ ដើម្បីឱ្យថ្ងៃណាមួយគាត់អាចត្រឡប់មករកសាធារណជនវិញតាមរយៈស្នាដៃរបស់គាត់»។ មេធាវីរូបនេះបានពិពណ៌នាអំពី Kim Soo Hyun ថាកំពុងស្តារកេរ្តិ៍ឈ្មោះរបស់លោកឡើងវិញបន្តិចម្តងៗ បន្ទាប់ពីរងការខូចខាតយ៉ាងធ្ងន់ធ្ងរដល់រូបភាពរបស់ខ្លួនដោយសារតែការវាយប្រហារតាមអ៊ីនធឺណិត និងការចោទប្រកាន់ជាសាធារណៈ។

មេធាវី Kho បាននិយាយថា « Kim Soo Hyun បានធ្លាក់ចូលក្នុងស្ថានភាពមួយដែលកេរ្តិ៍ឈ្មោះ និងសេចក្តីថ្លៃថ្នូរផ្ទាល់ខ្លួនរបស់គាត់ស្ទើរតែត្រូវបានបំផ្លាញទាំងស្រុង។ ឥឡូវនេះ រឿងសំខាន់បំផុតសម្រាប់គាត់គឺត្រូវត្រឡប់ទៅរកជីវិតធម្មតារបស់គាត់វិញ ហើយមានអារម្មណ៍ធម្មតាវិញ»។ មេធាវីរូបនេះក៏បានលើកឡើងពីការចាប់អារម្មណ៍ពីសាធារណជនជុំវិញបណ្តឹងនេះ ដែលត្រូវបានគេរាយការណ៍ថាមានតម្លៃប្រហែល ៣០ពាន់លានវ៉ុន ជិត ២០ លានដុល្លារអាម៉េរិក។ លោកបានអះអាងថា រឿងសំខាន់មិនមែនជាចំនួនសំណងនោះទេ ប៉ុន្តែជាការលាតត្រដាងការពិត។

មេធាវីរូបនេះបាននិយាយថា «ជំនួសឱ្យការផ្តោតអារម្មណ៍ខ្លាំងពេកលើចំនួនជាក់លាក់ណាមួយ វាសំខាន់ជាងដែលការពិតត្រូវបានបង្ហាញ ហើយសង្គមបង្កើតបរិយាកាសមួយដែលតារាសម្តែងអាចត្រឡប់ទៅកន្លែងត្រឹមត្រូវរបស់គាត់វិញ»។ លោកក៏បានធ្វើអត្ថាធិប្បាយលើការវិវត្តចុងក្រោយបំផុតទាក់ទងនឹង Kim Se Ui ប្រធានឆាណែលយូធូប Garosero Research Institute (Garo Sero) បន្ទាប់ពីផ្សាយព័ត៌មានអំពីពាក្យសុំដីកាចាប់ខ្លួនប្រឆាំងនឹង Kim Se Ui ។ លោកបានអត្ថាធិប្បាយថា «វាកម្រណាស់ដែលពាក្យសុំដីកាចាប់ខ្លួនមានប្រវែងលើសពី ៣០ទំព័រ។ នេះបង្ហាញថាភ្នាក់ងារស៊ើបអង្កេតមានទំនុកចិត្តខ្ពស់ក្នុងការបង្ហាញភស្តុតាងប្រឆាំងនឹង Kim Se Ui និងអ្នកពាក់ព័ន្ធ»។

គួរបញ្ជាក់ផងដែរថា បន្ទាប់ពីប៉ូលិសចេញមកបញ្ជាក់ក្រោយពីការស៊ើបអង្កេតនិងឈានទៅដល់ការចាប់ខ្លួន Kim Se Ui នៅលើបណ្តាញសង្គមរបស់ Kim Soo Hyun ជន់លិចទៅដោយមតិយោបល់អ្នកគាំទ្រជាច្រើនដែលបានលើកទឹកចិត្តនិងជំរុញឱ្យតារាសម្តែងរូបនេះវិលមកកាន់អាជីពវិញ៕