ប្រធានាធិបតីចិនលោក ស៊ី ជី​ន​ពីង នឹង​មក​បំពេញ​ទស្សនកិច្ច​នៅបណ្តាប្រទេសតំបន់អាស៊ានចំនួន៣ នៅនៅខែមេសានេះ ក្នុងនោះក៏មានកម្ពុជាផងដែរ។

នៅក្នុងដំណើរទស្សនកិច្ចនេះ លោកស៊ី ជី​ន​ពីង នឹងទៅកាន់ប្រទេស​វៀតណាម ដើម្បីពិភាក្សា​ភាព​តានតឹង​ ជុំវិញបញ្ហាសមុទ្រ​ចិន​ខាងត្បូង។

បន្ទាប់មក លោកក៏បន្តទៅកាន់ប្រទេសម៉ាឡេសុី ដែលជាប្រធានប្តូរវេនអាស៊ាន មុននឹងធ្វើដំណើរ​ទស្សនៈកិច្ច​មក​កាន់​កម្ពុជា​។

ការ​បំពេញ​ទស្សនកិច្ច​របស់លោកស៊ី ជី​ន​ពីង  ត្រូវ​គេ​រំពឹង​ថា​នឹង​ផ្តល់​ផល​ប្រយោជន៍​ជា​ច្រើន​ដល់​ប្រទេស​កម្ពុជា ទាំង​សេដ្ឋកិច្ច នយោបាយ និង​ការ​អភិវឌ្ឍ​សង្គម​ផង​ដែរ។

តែយ៉ាងណាមិញ ក្នុងដំណើរទស្សនកិច្ចនេះ ភាគីកម្ពុជាមិន​ទាន់​បញ្ចេញព័ត៌មានផ្លូវការនៅឡើយនោះទេ​ ខណៈសារព័ត៌មានធំៗនៅប្រទេសចិនចេញផ្សាយព្រោងព្រៀត។

គួរបញ្ជាក់ថា លើកចុងក្រោយ ដែលលោក ស៊ី ជី​ន​ពីង មកបំពេញទស្សនកិច្ចនៅកម្ពុជា គឺនៅឆ្នាំ២០១៦ តាម​ការ​អញ្ជើញ​របស់​ព្រះ​មហាក្សត្រ​ខ្មែរ ព្រះបាទ​នរោត្តម សីហមុនី៕

ប្រទេសថៃ ៖ ក្រោយកើតគ្រោះរញ្ជួយដីខ្លាំងក្លានៅទីក្រុងបាងកក ដែលធ្វើឱ្យអគារជាច្រើនកន្លែងរងផលប៉ះពាល់ ដូចជា ៖ អគារកំពុងសាងសង់នៅតំបន់ចាក់តុចាក់ បានបាក់រលំទាំងស្រុងបណ្តាលឱ្យមនុស្សស្លា.ប់ រងរបួស និងបាត់ខ្លួនជាច្រើននាក់ ធ្វើឱ្យពលរដ្ឋថៃបារម្ភពីគ្រោះរញ្ជួយដីអាចនឹងកើតឡើងជាបន្តបន្ទាប់ ។ អ្វីដែលពួកគេកាន់តែបារម្ភខ្លាំង ក្រោយពីទឹកសមុទ្រនៅខេត្តភូកេតស្រកចុះ គឺអាចជាសញ្ញាកើតរលកយក្សស៊ូណាមិ ។ ហេតុនេះ មាត់សមុទ្រនានាមានសភាពស្ងប់ស្ងាត់ ក្រោយពីភ្ញៀវទេសចរលុបចោលដំណើរកម្សាន្ត ។

បច្ចុប្បន្ន មន្ត្រីធ្វើការពាក់ព័ន្ធនឹងវិស័យទេសចរណ៍បានបង្ហាញកី្តកង្វល់ពីការបាត់បង់ចំនួនភ្ញៀវទេសចរមកលេងមាត់សមុទ្រ ។ បើទោះជាអាជ្ញាធរខេត្តភូកេត និងបណ្តាខេត្តផ្សេងទៀតដែលមានសមុទ្រ អះអាងថា សូមភ្ញៀវទេសចរកុំបារម្ភពីរលកយក្សស៊ូណាមិ ពីព្រោះការចែកចាយព័ត៌មានក្នុងបណ្តាញសង្គមពីទឹកសមុទ្រស្រកចុះ គ្រាន់តែជាព័ត៌មានក្លែងក្លាយ និងយករូបភាពចាស់ៗមកបង្ហោះប៉ុណ្ណោះ ប៉ុន្តែវាពុំបានធ្វើឱ្យភ្ញៀវទេសចរឈប់ភ័យខ្លាចទេ ។

ជាក់ស្តែង ចំនួនភ្ញៀវទេសចរមកកម្សាន្តនៅសមុទ្រអាន់ដាម៉ាន់ ក្នុងខេត្តត្រាំង គឺបាត់អស់ជាងពាក់កណ្តាល ខណៈភ្ញៀវទេសចរខ្លះបានលុបចោលដំណើរកម្សាន្ត ក្រោយកើតគ្រោះរញ្ជួយដីនៅប្រទេសថៃ ។ ភ្ញៀវទេសចរពុំហ៊ានមកកម្សាន្តនៅមាត់សមុទ្រដូចមុន ដោយសារបារម្ភពីរលកយក្សស៊ូណាមិ ក្រោយពីមានការចែកចាយព័ត៌មានពីទឹកសមុទ្រស្រកក្នុងបណ្តាញសង្គម ប៉ុន្តែវាជាព័ត៌មានមិនពិត ។ នេះបើតាមការលើកឡើងរបស់អភិបាលរងខេត្តត្រាំង លោក អាណាន់ ប៊ុនសាំរ៉ាន ។

កាលពីថ្ងៃទី២៩ ខែមីនា ឆ្នាំ២០២៥ អភិបាលរងខេត្តត្រាំង លោក អាណាន់ ប៊ុនសាំរ៉ាន បានធ្វើជាប្រធានបើកកម្មវិធីតន្ត្រីតូចមួយនៅឆ្នេរខ្សាច់រ៉ាជមង្គល ស្ថិតក្នុងស្រុកសិកៅ ខេត្តត្រាំង ហើយលោកក៏បានលើកឡើងពីស្ថានការណ៍ក្រោយគ្រោះរញ្ជួយដីកើតឡើងនៅប្រទេសថៃថា វាធ្វើឱ្យភ្ញៀវទេសចរមកលេងនៅសមុទ្រអាន់ដាម៉ាន់ លែងមានទំនុកចិត្តក្នុងការដើរកម្សាន្ត ដោយសារបារម្ភពីរលកយក្សស៊ូណាមិ ក្រោយរញ្ជួយដី ។ លោកបានផ្តាំផ្ញើទៅអ្នកលេងបណ្តាញសង្គមថា សូមកុំបង្កការភ្ញាក់ផ្អើល ឬផ្សព្វផ្សាយព័ត៌មានមិនពិត ។

ក្រោយពីតំបន់ជាច្រើនរបស់ថៃរងឥទ្ធិពលដោយសាររញ្ជួយដី កាលពីថ្ងៃទី២៨ ខែមីនា ឆ្នាំ២០២៥ បានធ្វើឱ្យភ្ញៀវទេសចរដែលមកកម្សាន្តនៅសមុទ្រអាន់ដាម៉ាន់ បាត់អស់ជាងពាក់កណ្តាល ។ ការបាត់បង់ចំនួនភ្ញៀវទេសចរនេះ ដោយសារពួកគេពុំជ្រាបព័ត៌មានច្បាស់លាស់ ហើយក៏មានការបារម្ភ បើភ្ញៀវទេសចរទទួលបានព័ត៌មានពិតប្រាកដ គឺពួកគេពុំបារម្ភរហូតដល់លុបចោលដំណើរកម្សាន្តទេ ។ ការផ្សព្វផ្សាយព័ត៌មានក្លែងក្លាយក្នុងបណ្តាញសង្គមពីទឹកសមុទ្រស្រកនេះ គឺអាចជារូបភាពចាស់ៗ ។

ពលរដ្ឋថៃភ្ញាក់ផ្អើលយ៉ាងខ្លាំង ក្រោយមានគ្រោះរញ្ជួយដីកើតឡើងកាលពីរសៀលថ្ងៃទី២៨ ខែមីនា កន្លងមក ស្មើកម្រិត៧.៧រិចទ័រ នៅកណ្តាលប្រទេសមីយ៉ាន់ម៉ា និងបណ្តាលឱ្យមានឥទ្ធិពលមកដល់តំបន់ភាគខាងជើង ភាគកណ្តាលប្រទេសថៃ រួមទាំងទីក្រុងបាងកក ។ ហេតុការណ៍នេះធ្វើឱ្យសមុទ្រអាន់ដាម៉ាន់ បាត់បង់ភ្ញៀវទេសចរយ៉ាងច្រើន ដោយសារការបារម្ភពីរលកយក្សស៊ូណាមិនៅសមុទ្រនេះ ។ វាជាផលប៉ះពាល់មកលើវិស័យទេសចរណ៍ថៃ ក្រោយការចែកចាយព័ត៌មានពីរលកយក្សស៊ូណាមិក្នុងបណ្តាញសង្គម ។ នេះជាការលើកឡើងរបស់អភិបាលរងខេត្តត្រាំង ។

គួរបញ្ជាក់ថា ក្រោយពីមានតំបន់ជាច្រើនរបស់ប្រទេសថៃ ជាពិសេស អគារជាច្រើនទីក្រុងបាងកក រងផលប៉ះពាល់ខ្លាំង ដូចជា ៖ អគារកំពុងសាងសង់នៅតំបន់ចាក់តុចាក់ បានបាក់រលំទាំងស្រុងដោយសារឥទ្ធិពលរញ្ជួយដីដែលកើតឡើងនៅប្រទេសមីយ៉ាន់ម៉ា បានធ្វើឱ្យបារម្ភថៃបារម្ភយ៉ាងខ្លាំងពីការស្នាក់នៅអគារខុនដូក្នុងទីក្រុងបាងកក ។ លើសពីនេះ ថែមទាំងមានការចែកចាយក្នុងបណ្តាញសង្គមពីទឹកសមុទ្រនៅខេត្តភូកេតស្រេកចុះ ទើបធ្វើឱ្យដំណើរកម្សាន្តនៅតាមមាត់សមុទ្រនានាមានសភាពស្ងប់ស្ងាត់ ព្រោះបារម្ភពីរលកយក្សស៊ូណាមិ ៕

ប្រទេសម៉ាឡេស៊ី ៖ សារព័ត៌មានបរទេសរាយការណ៍ថា កាលពីវេលាម៉ោង៨និង១០នាទីព្រឹកថ្ងៃទី១ ខែមេសា ឆ្នាំ២០២៥ មានហេតុការណ៍គួរឱ្យតក់ស្លុតមួយបានកើតឡើងនៅទីក្រុង Putra Heights ប្រទេសម៉ាឡេស៊ី គឺបំពង់បង្ហូរឧស្ម័នបានផ្ទុះយ៉ាងខ្លាំងបណ្តាលឱ្យភ្លើងឆាបឆេះស្ថានីយចាក់ប្រេង Petronas ក្លាយជាអណ្តាតភ្លើងយក្សខ្ពស់ដល់អាកាស ។ អណ្តាតភ្លើងបានឆាបឆេះលំនៅឋានជាច្រើនខ្នង និងបណ្តាលឱ្យមនុស្សរងរបួសចំនួន៣៣នាក់ ខណៈអ្នកឃើញហេតុការណ៍ភ័យខ្លា.ច យ៉ាងខ្លាំង ដោយសារអាចមើលឃើញអណ្តាតភ្លើងពីចម្ងាយរាប់សិបគីឡូម៉ែត្រ ។

ភ្នាក់ងារពន្លត់ភ្លើងនៅទីក្រុងសុបាំងចាវ៉ា តំបន់ពេតាលីង ខេត្តសាឡាំងង៉ ឱ្យដឹងថា ក្រោយពីទទួលសេចក្តីរាយការណ៍បន្ទាន់ នៅព្រឹកថ្ងៃទី១ ខែមេសា នេះ មានភ្លើងឆេះយ៉ាងសន្ធោសន្ធៅតាមផ្លូវពុតត្រាហានម៉ូនី ភ្នាក់ងារពន្លត់ភ្លើងក៏ប្រញាប់បញ្ជូនកម្លាំងទៅពន្លត់ភ្លើងនៅកន្លែងកើតហេតុជាបន្ទាន់ ។ មូលហេតុបណ្តាលឱ្យភ្លើងឆេះយ៉ាងខ្លាំងនេះ គឺអាចបណ្តាលមកពីផ្ទុះបំពង់បង្ហូរឧស្ម័ន ។

អណ្តាតភ្លើងបានឆាបឆេះលំនៅឋានពលរដ្ឋជាច្រើនខ្នងដែលស្ថិតនៅក្បែរកន្លែងកើតហេតុ ហើយអាជ្ញាធររាយការណ៍ថា មានពលរដ្ឋមួយចំនួនជាប់នៅក្នុងលំនៅឋានជាច្រើនខ្នង ។ ហេតុការណ៍នេះបណ្តាលឱ្យមនុស្សរងរបួសចំនួន៣៣នាក់ ក្នុងនោះមនុស្ស៦នាក់ ត្រូវបានបញ្ជូនទៅសង្គ្រោះនៅមន្ទីរពេទ្យ ។

រូបភាព និងវីដេអូហេតុការណ៍ភ្លើងឆេះស្ថានីយចាក់ប្រេង ត្រូវបានចែកចាយក្នុងបណ្តាញសង្គមធ្វើឱ្យពលរដ្ឋភ័យខ្លាចយ៉ាងខ្លាំង ពីព្រោះពួកគេមើលឃើញអណ្តាតភ្លើងយក្សពីចម្ងាយរាប់សិបគីឡូម៉ែត្រ ។

លោក វង់ ឈឺន សមាជិកសភាតំណាងរាស្ត្រនៅទីក្រុងសុបាំងចាវ៉ា និយាយថា ភ្លើងបានឆាបឆេះស្ថានីយចាក់ប្រេងមួយកន្លែងតាមផ្លូវពុតត្រាហានម៉ូនី សូមពលរដ្ឋគ្រប់រូបប្រុងប្រយ័ត្នឱ្យបានខ្ពស់ ។ យើងនឹងផ្តល់ដំណឹងទៅពលរដ្ឋពេលទទួលបានព័ត៌មានបន្ថែម ហើយនៅព្រឹកថ្ងៃទី១ ខែមេសានេះ អាជ្ញាធរបានបញ្ជូនឧទ្ធម្ភាគចក្រមកកាន់កន្លែងកើតហេតុហើយ ។

បើតាមសេចក្តីរាយការណ៍ដំបូង គឺអណ្តាតភ្លើងយក្សនេះកើតឡើងដោយសារផ្ទុះបំពង់បង្ហូរឧស្ម័នរបស់ក្រុមហ៊ុន Petronas ស្ថិតនៅក្បែរស្ថានីយចាក់ប្រេង Petronas Putra Heights នៅទីក្រុងសុបាំងចាវ៉ា ។ ភ្នាក់ងារសង្គ្រោះនៅប្រចាំការកន្លែងកើតហេតុ រីឯមូលហេតុការផ្ទុះបំពង់បង្ហូរឧស្ម័នកំពុងស្ថិតក្នុងដំណាក់កាលស៊ើបអង្កេត ៕

ប្រទេសមីយ៉ាន់ម៉ា ៖ តាមការប្រកាសរបស់រដ្ឋាភិបាលមីយ៉ាន់ម៉ានៅថ្ងៃទី៣១ ខែមីនា ឆ្នាំ២០២៥ គឺគ្រោះរញ្ជួយដីកាលពីថ្ងៃទី២៨ ខែមីនា បានធ្វើឱ្យពលរដ្ឋមីយ៉ាន់ម៉ា ស្លា.ប់ រហូតដល់២,០៥៦នាក់, រងរបួសជាង៣,៩០០នាក់ និងបាត់ខ្លួន២៧០នាក់ ហើយរដ្ឋាភិបាលពិបាកនឹងបញ្ជាក់ចំនួនពលរដ្ឋស្លា.ប់ ដោយសាររញ្ជួយដី ពីព្រោះពលរដ្ឋស្លា.ប់ ចេះតែកើនឡើងបន្តបន្ទាប់ ខណៈការិយាល័យត្រួតពិនិត្យភូមិសាស្ត្រអាមេរិកសន្និដ្ឋានថា ចំនួនពលរដ្ឋមីយ៉ាន់ម៉ាស្លា.ប់ អាចកើនឡើងដល់ជាង១ម៉ឺននាក់ ។ រដ្ឋាភិបាលយោធាមីយ៉ាន់ម៉ាបានប្រកាសកាន់ទុក្ខពលរដ្ឋស្លា.ប់ រយៈពេល១សប្តាហ៍ គឺចាប់ពីថ្ងៃទី៣១ ខែមីនា តទៅ ។

វាជាគ្រោះរញ្ជួយដីខ្លាំងក្លាបំផុតក្នុងរយៈពេល១០០ឆ្នាំ ស្មើកម្រិត៧.៧រិចទ័រ ដែលបានកើតឡើងនៅមីយ៉ាន់ម៉ា កាលពីវេលាម៉ោង១២និង៥០នាទីថ្ងៃទី២៨ ខែមីនា កន្លងមក ដែលមានចំណុចកណ្តាលនៅក្បែរទីក្រុងធំទី២ របស់មីយ៉ាន់ម៉ា គឺទីក្រុងម៉ាន់ដាឡៃ ។ វាបានរញ្ជួយនៅទូទាំងប្រទេសមីយ៉ាន់ម៉ា និងមានឥទ្ធិពលដល់ប្រទេសក្បែរខាង ដូចជា ៖ ថៃ ឥណ្ឌា និងចិន ។

រញ្ជួយដីលើកនេះធ្វើឱ្យទីក្រុងសាកាយ រងការខូចខាតយ៉ាងធ្ងន់ធ្ងរ ដោយលំនៅឋានពលរដ្ឋបានបាក់រលំបន្សល់ត្រឹមតែគំនរថ្មនៅសងខាងផ្លូវ ខណៈលំនៅឋានខ្លះទៀតបាក់ខ្ទេចទាំងស្រុងសល់តែដំបូលប៉ុណ្ណោះ ។ ដូចគ្នានេះ អគារខ្ពស់ៗជាច្រើនកន្លែងនៅទីក្រុងម៉ាន់ដាឡៃ បានបាក់រលំអស់ធ្វើឱ្យការជួយសង្គ្រោះជីវិតមនុស្សកប់នៅក្រោមគំនរអគារកាន់តែលំបាក ។ ក្រោយរដ្ឋាភិបាលមីយ៉ាន់អំពាវនាវសុំជំនួយមនុស្សធម៌ពីអន្តរជាតិ ប្រទេសនានាបានបញ្ជូនភ្នាក់ងារសង្គ្រោះ និងឧបករណ៍ផ្សេងៗមកជួយសង្គ្រោះមីយ៉ាន់ម៉ា ដែលរងផលប៉ះពាល់ខ្លាំងដោយសាររញ្ជួយដី ។ នេះបើតាមការចុះផ្សាយរបស់សារព័ត៌មាន China Media Group ។

ចំណែកអង្គការសុខភាពពិភពលោក (WHO) បានអំពាវនាវទទួលការបរិច្ចាគប្រាក់ជាបន្ទាន់ ចំនួន៨លានដុល្លារ ដើម្បីជួយសង្គ្រោះជនរងគ្រោះដោយសាររញ្ជួយដីនៅមីយ៉ាន់ម៉ា ក្រោយពីមន្ទីរពេទ្យជាច្រើនកន្លែងត្រូវបំផ្លាញ ។ មន្ទីរពេទ្យជាច្រើនគ្មានឧបករណ៍គ្រប់គ្រាន់សម្រាប់ព្យាបាលអ្នករងរបួសទេ ទើបធ្វើឱ្យអ្នករងរបួសសម្រាកពេញមន្ទីរពេទ្យ រង់ចាំការព្យាបាល ។

អ្នកស្រី Margaret Harris មន្ត្រីអង្គការ WHO ឱ្យដឹងថា រញ្ជួយដីបានធ្វើឱ្យមន្ទីរពេទ្យជាច្រើននៅមីយ៉ាន់ម៉ាខូចខាតទាំងស្រុង យ៉ាងហោចណាស់ មន្ទីរពេទ្យចំនួន៣កន្លែង ពុំអាចព្យាបាលអ្នករបួស១០០% ទេ ខណៈមន្ទីរពេទ្យ២២កន្លែងទៀតខូចខាតផ្នែកខ្លះ ។

ដោយឡែក ពលរដ្ឋរស់នៅក្បែរអគារបាក់បែកឱ្យដឹងថា ពួកគេចាប់ផ្តើមធុំក្លិនសាកសពចេញពីគំនរអគារបាក់បែក ខណៈពលរដ្ឋខ្លះទៀតបានបោះតង់សម្រាកនៅតាមដងផ្លូវក្នុងទីក្រុងម៉ាន់ដាឡៃ ។ ពលរដ្ឋទាំងនេះពុំហ៊ានត្រឡប់ទៅលំនៅឋានរបស់ខ្លួនវិញទេ ដោយសារបារម្ភពី Aftershocks កើតឡើងជាច្រើនកន្លែងកាលពីចុងខែមីនា ៕

គ្រោះរញ្ជួយដី និងរលកយក្សស៊ូណាមិ គឺជារឿងដែលអាចនឹងកើតឡើងភ្លាមៗមិនថាក្នុងប្រទេស រឺតំបន់ណានោះទេ។ ប៉ុន្តែទោះជាយ៉ាងនេះក្ដី នៅតាមបណ្ដារប្រទេស រឺតំបន់មួយចំនួននៅលើពិភពលោក តែងតែទទួលរងឥទ្ធិពលពីគ្រោះធម្មជាតិ ដូចជារញ្ជួយដី និងរលកស៊ូណាមិនេះជាញឹកញាប់ រីឯប្រទេសមួយចំនួនផ្សេងទៀតបែរជាមិនដែលជួបជាមួយនឹងគ្រោះធម្មជាតិធ្ងន់ធ្ងរឡើយ។

តើមានមូលហេតុអ្វីបានជានៅលើផែនដីតែមួយដូចគ្នា តែតំបន់ខ្លះងាយរងគ្រោះធម្មជាតិ ចំណែកតំបន់ខ្លះទៀតបែរជាមិនសូវជួបប្រទះនឹងគ្រោះធម្មជាតិដូចនេះ?

ជាការពិតណាស់ មូលហេតុដែលបណ្ដាលអោយតំបន់មួយចំនួនតែងតែជួបប្រទះការរញ្ជួយដី និង រលកយក្សស៊ូណាមិ ភាគច្រើនគឺដោយសារតែតំបន់ទាំងនោះមានទីតាំងដែលដីទើបតែកករឹងថ្មីៗនៃសំបកផែនដី មាននៅតាមតំបន់មានជួរភ្នំដែលមានអាយុកាលតិច តំបន់បំណាក់ស្រុតធំៗ ហើយតំបន់ទាំងនេះត្រូវបានចាត់ទុកជាតំបន់ព្រោះដែនផ្លាកតិចតូនិច ដែលសំបកផែនដីមិនមានភាពរឹងមាំ ទើបងាយនឹងកើតមានគ្រោះធម្មជាតិ ដូចជារញ្ជួយដី និង រលកយក្សស៊ូណាមិជាដើម។

ដូចនេះ យើងមកស្គាល់នូវតំបន់នៅតាមប្រទេសមួយចំនួន ដែលស្ថិតនៅចំទីតាំងដែលងាយនឹងទទួលរងឥទ្ធិពលនៃគ្រោះរញ្ជួយដី និងរលកយក្សស៊ូណាមិដូចជា៖

១. តំបន់ដែលមានហានិភ័យខ្ពស់បំផុត៖ មាននៅជុំវិញមហាសមុទ្រប៉ាស៊ីហ្វិក, ប្រទេសជប៉ុន, ប្រទេសឥណ្ដូនេស៊ី តំបន់សាន់មាដាហ្គាត្រាស, ប្រទេសហ្វីលីពីន, ប្រទេសឈីលី និងសហរដ្ឋអាមេរិក រដ្ឋអាឡាស្កា។

២. តំបន់ដែលមានហានិភ័យមធ្យមមាន៖ រដ្ឋកាលីហ្វ័រញ៉ា សហរដ្ឋអាមេរិក, ប្រទេសម៉ិកស៊ិក នៅតាមបណ្ដោយឆ្នេរប៉ាស៊ីហ្វិក, នូវែលសេឡង់, តំបន់ការីបៀន ព័រតូរីកូ ហៃទី និងដូមីនីកេន, ប្រទេសប៉េរូ, ប្រទេសអេក្វាទ័រ, ប្រទេសតួគី, ប្រទេសក្រិក និងប្រទេសអ៊ីតាលីជាដើម។

ក្រៅពីនេះ អ្នកវិទ្យាសាស្រ្តក៏បានរកឃើញតំបន់ផ្សេងទៀតដែលក៏មានភាពសកម្មផងដែរ នោះគឺតំបន់ខ្សែក្រវ៉ាតរញ្ជួយដីAlphine ដែលតំបន់នេះបានលាតសន្ធឹងចាប់ពីកោះជ្វា ទៅកាន់កោះស៊ូម៉ាត្រា ដោយឆ្លងកាត់តាមជួរភ្នំហិម៉ាល័យ, សមុទ្រមេឌីទែរ៉ានេ និងឆ្ពោះទៅដល់មហាសមុទ្រអាត្លង់តិច៕