បន្ទាប់ពីបញ្ចប់ការប្រកាសជាផ្លូវការនៃផលិតកម្មបារមីសហការជាមួយនឹងក្រុមហ៊ុនអន្តរជាតិ Empire សិល្បករក៏នាំគ្នាជប់លៀងកម្សាន្តសប្បាយហើយមានការចែករំលែកនៅលើបណ្តាញសង្គម វណ្ណដា គឺមានភាពរីករាយច្រៀងនិងរាំបទ «បើកលុយ» របស់រៀមច្បងឧកញ៉ា ខេមរៈ សិរីមន្ត និង ឌីជេ ក្តិប។
កន្លងមកនេះប្រិយមិត្តមួយចំនួនជ្រាបមកហើយថាតារាចម្រៀងឧកញ៉ា ខេមរៈ សិរីមន្ត បានបង្ហាញថាលោកក៏បានស្តាប់បទចម្រៀងរបស់ វណ្ណដា ទៅលើបទចម្រៀង អាមុំបង«អើយ» បន្ទាប់ពីបង្ហាញថាបទរបស់លោកបានជាប់ចំណាត់ថ្នាក់លេខ១លើតារាងយូធូប។ លើសពីនេះទៅទៀតកាលពីខែមករា ក្នុងកម្មវិធីរបស់ វណ្ណដា ទស្សនិកជនក៏បានជ្រាបមកហើយថា ឌីជេ ក្តិប បានបង្ហាញការគាំទ្រដល់សិល្បករជំនាន់ក្រោយដោយលោកក៏បានចូលរួមកម្មវិធីតារារ៉េបរូបនេះដូចគ្នា។
នាយប់ថ្ងៃទី៣១ មីនា បន្ទាប់ពីបញ្ចប់ការប្រកាសជាផ្លូវការនៃផលិតកម្មបារមីសហការជាមួយនឹងក្រុមហ៊ុនអន្តរជាតិ Empire គេបានឃើញមានការចែករំលែកវីដេអូខ្លីៗជាច្រើននៅលើបណ្តាញសង្គមដោយឃើញថាសិល្បករ សិល្បការិនី និងអ្នកចូលរួមដទៃទៀតបង្ហាញពីការជួបជុំរាំលេងកម្សាន្ត។ អ្វីដែលកាន់តែចាប់អារម្មណ៍អ្នកគាំទ្រក៏បានឃើញ វណ្ណដា ឡើងចាក់ DJ ខ្លួនឯងតែម្តង ធ្វើឱ្យអ្នកគាំទ្រចំអន់ថា DJ Da។
ក្នុងវីដេអូផ្សេងទៀតគឺនៅក្នុងកម្មវិធីជប់លៀងនេះ បានចាក់បទ បើកលុយ ដែលជាបទល្បីល្បាញមួយរបស់រៀមច្បង ឧកញ៉ា ខេមរៈ សិរីមន្ត និង ឌីជេ ក្តិប។ វណ្ណដា បានបង្ហាញពីភាពសប្បាយរីករាយជាមួយនឹងបទរៀមច្បងថែមទាំងច្រៀងតាមយ៉ាងសប្បាយរីករាយ។
មែនទែនទៅទំនាក់ទំនងរវាងសិល្បករនិងសិល្បករមិនមានបញ្ហាចោទនោះទេ ប៉ុន្តែកត្តាមួយក្នុងចំណោមនោះគឺអ្នកគាំទ្រខ្លះបានទាញឈ្មោះអាយដលចូលទៅទើបធ្វើឱ្យមានបញ្ហា។ ជាក់ស្តែងនៅលើបណ្តាញសង្គមឧកញ៉ា ខេមរៈ សិរីមន្ត បានតបតរបស់ខ្លួនទៅកាន់អ្នកមួយចំនួនដែលប្រៀបធៀបខ្លួននឹងតារាចម្រៀងរ៉េបរូបនេះជាពិសេសពាក្យ wo eh eh eh ដែលមានការខម្មិនផ្សេងៗរហូតធ្វើឱ្យតារាចម្រៀងមានងារជាឧកញ៉ារូបនេះបង្ហាញពីអ្នកដែលនិយាយពាក្យនេះដំបូងគេមុន វណ្ណដា និយាយ៕
