តៃវ៉ាន់ ៖ រយៈពេលចុងក្រោយនេះ គ្រោះរញ្ជួយដីបានកើតឡើងជាញឹកញាប់នៅបណ្តាប្រទេសក្នុងតំបន់អាស៊ីអាគ្នេយ៍ ដូចជា ៖ មីយ៉ាន់ម៉ា, វៀតណាម និងថៃ ហើយធ្វើឱ្យរដ្ឋាភិបាលប្រទេសទាំងនេះប្រុងប្រយ័ត្ននឹងគ្រោះធម្មជាតិ និងកំណត់វិធានការផ្សេងៗសម្រាប់ជួយជនរងគ្រោះដោយសាររញ្ជួយដី ។ រីឯនៅតៃវ៉ាន់វិញ ក៏មានគ្រោះរញ្ជួយដីដែរ ដែលធ្វើឱ្យអគារមានកម្ពស់ខ្ពស់បំផុតនៅទីក្រុងតៃប៉ិ ទទួលកម្លាំងរំញ័រ ។

កាលពីថ្ងៃទី៩ ខែមេសា ឆ្នាំ២០២៥ មានគ្រោះរញ្ជួយដីកើតឡើងនៅភាគឦសានតៃវ៉ាន់ ស្មើ៥រិចទ័រ និងមានឥទ្ធិពលរហូតដល់ទីក្រុងតៃប៉ិ ។ គ្រោះរញ្ជួយដីនេះមានចំណុចកណ្តាលនៅខេត្តអ៊ីឡាន ក្បែរទីក្រុងតៃប៉ិ ដែលមានជម្រៅប្រមាណ ៧០គីឡូម៉ែត្រ ខណៈការិយាល័យពន្លត់អគ្គិភ័យខេត្តអ៊ីឡាន និងការិយាល័យពន្លត់អគ្គិភ័យជាតិតៃវ៉ាន់ បានផ្តល់ព័ត៌មានមកកាន់សារព័ត៌មាន AFP ថា ពុំទាន់មានសេចក្តីរាយការណ៍ពីការខូចខាត ឬមនុស្សរងរបួសទេ ។

ការដឹកជញ្ជូនសាធារណៈនៅតែផ្តល់សេវាកម្មតាមធម្មតា រួមទាំងរថភ្លើងល្បឿនលឿន ក៏គ្មានផលប៉ះពាល់ដោយសារគ្រោះរញ្ជួយដីទេ គឺមានតែរថភ្លើងក្រោមដីនៅទីក្រុងតៃប៉ិ បានផ្អាកបណ្តោះអាសន្នដើម្បីសុវត្ថិភាព ។ តៃវ៉ាន់ មានទីតាំងស្ថិតលើចំណុចតភ្ជាប់សំបកផែនដី ចំនួន២ និងនៅជិត Ring of Fire ប៉ាស៊ីហ្វិក ដែលជាចំណុចកើតរញ្ជួយដីញឹកញាប់បំផុតលើពិភពលោក ។

កាលពីខែមេសា ឆ្នាំ២០២៤ តៃវ៉ាន់ ធ្លាប់កើតគ្រោះរញ្ជួយដីមានកម្លាំងខ្លាំងបំផុតក្នុងរយៈពេល២៥ឆ្នាំ ស្មើ៧.៤រិចទ័រ ដែលបណ្តាលឱ្យពលរដ្ឋតៃវ៉ាន់ ស្លាប់យ៉ាងហោចណាស់ ១៧នាក់ ព្រមទាំងបង្កការខូចខាតយ៉ាងធ្ងន់ធ្ងរនៅទីក្រុងហួលៀន ។ មុននេះ នៅឆ្នាំ១៩៩៩ តៃវ៉ាន់ បានកើតរញ្ជួយដីខ្លាំងបំផុតក្នុងប្រវត្តិសាស្ត្រ គឺស្មើ៧.៦រិចទ័រ ដែលបានឆក់យកជីវិតពលរដ្ឋតៃវ៉ាន់ រហូតដល់ជាង២,៤០០នាក់ ។

ក្រោយហេតុការណ៍រញ្ជួយដីខ្លាំងនៅឆ្នាំ១៩៩៩ រដ្ឋាភិបាលតៃវ៉ាន់ ក៏បានកែលម្អបទប្បញ្ញត្តិការសាងសង់ ដោយផ្តោតលើការសាងសង់អគារឱ្យរឹងមាអាចទប់ទល់ជាមួយរញ្ជួយដី ដូចជា ៖ ការប្រើប្រាស់ដែកដើទប់ទល់នឹងកម្លាំងរំញ័រ ។ ក្រៅពីនេះ តៃវ៉ាន់ បានបង្កើតប្រព័ន្ធទំនើបផ្តល់ដំណឹងជាមុន ដែលអាចប្រាប់ពលរដ្ឋពីរញ្ជួយដីយ៉ាងឆាប់រហ័ស មិនដល់១នាទី ព្រមទាំងអភិវឌ្ឍន៍បច្ចេកវិទ្យាប្រព័ន្ធទំនើបជាបន្តបន្ទាប់ ។ វាអាចផ្តល់ដំណឹងរញ្ជួយដីទៅដល់ពលរដ្ឋរស់នៅតំបន់ដាច់ស្រយាល តាមរយៈទូរស័ព្ទស្មាតហ្វូន និងបណ្តាញអ៊ីនធើរណេតល្បឿនលឿន ៕

សហរដ្ឋអាមេរិក ៖ ប្រទេសមហាអំណាចសេដ្ឋកិច្ចលើពិភពលោក គឺអាមេរិក និងចិន បានត្រឡប់មកតានតឹងជាមួយគ្នាម្តងទៀត ក្រោយមានសេចក្តីរាយការណ៍ថា រដ្ឋាភិបាលចិនរបស់លោក ស៊ី ជិនពីង បានបង្ហាញជំហរយ៉ាងច្បាស់ថា ចិនពុំព្រមទន់ភ្លន់នឹងការប្រកាសពន្ធទំនិញលើកចុងក្រោយរបស់ប្រធានាធិបតីអាមេរិក លោក Donald Trump ទេ គឺចិននឹងដាក់ពន្ធទំនិញអាមេរិកវិញ ៣៤% ។ ហេតុនេះ ប្រធានាធិបតីអាមេរិកស្នើឱ្យចិនលុបចោលការដាក់ពន្ធរបស់ខ្លួនជាបន្ទាន់ បើមិនដូច្នោះទេ អាមេរិកនឹងដាក់ពន្ធទំនិញចិន ៥០% ទៀត ។

ប្រធានាធិបតីអាមេរិក លោក Donald Trump បានថ្លែងកាលពីថ្ងៃទី៧ ខែមេសា ឆ្នាំ២០២៥ ថា លោកនឹងដំឡើងពន្ធទំនិញចិន ស្មើ៥០% បន្ថែមទៀត ចាប់ពីសប្តាហ៍ទី២ ខែមេសា ប្រសិនបើរដ្ឋាភិបាលក្រុងប៉េកាំង ពុំលុបចោលវិធានការដាក់ពន្ធទំនិញអាមេរិក ស្មើ៣៤% ។ នៅថ្ងៃទី២ ខែមេសា កន្លងមក លោក Trump បានដាក់ពន្ធអប្បបរមា (Baseline Tariff) ស្មើ១០% សម្រាប់ទំនិញនាំចូលពីក្រៅប្រទេសគ្រប់ប្រភេទ និងដាក់ពន្ធខ្ពស់ (Reciprocal Tariff) លើទំនិញនាំចូលពីប្រទេសជាច្រើនដែលអាមេរិកមើលឃើញថា មានឱនភាពពាណិជ្ជកម្មខ្លាំងបំផុត ។

លោក Trump បានដាក់ពន្ធលើទំនិញចិនបន្ថែមទៀតស្មើ៣៤% ខណៈកន្លងមក អាមេរិកទើបតែដាក់ពន្ធទំនិញចិន ស្មើ២០% ដែលធ្វើឱ្យពន្ធសរុបដែលអាមេរិកដាក់លើទំនិញចិន ស្មើរហូតដល់៥៤% ។ ការដាក់ពន្ធខ្ពស់នេះធ្វើឱ្យចិនពុំពេញចិត្តយ៉ាងខ្លាំង និងដាក់ពន្ធទំនិញនាំចូលពីអាមេរិកវិញ ស្មើ៣៤% អនុវត្តចាប់ពីថ្ងៃទី១០ ខែមេសា តទៅ ។ ប៉ុន្តែលោក Trump ស្នើឱ្យចិនលុបចោលពន្ធទំនិញអាមេរិក ៣៤%នេះ បើមិនដូច្នោះទេ អាមេរិកនឹងដំឡើងពន្ធទំនិញចិន៥០% ទៀត ដែលធ្វើឱ្យពន្ធសរុបសម្រាប់ទំនិញចិន នឹងស្មើរហូតដល់១០៤%។https://blogger.googleusercontent.com/img/b/R29vZ2xl/AVvXsEganOK9wnmdKIZlMT4tkIyy954Warynlq38Z33n9j3nr_zd5ZFJZHw6vbU2YqssLmkPNDGHRCvBjvzIPIRwR-8-xYEoHH3oIRbqyGkrEtK8fadDOGqGH65QczfZEkLRovSbVmrY3qiKw3-Upm41hA-_6EryOxTG3jfKz0a4l2Ou5CaArNWveytdcbHYTaCc/s3000/image_2025-04-09_14-13-23.png

លោក Trump បានសរសេរក្នុងបណ្តាញសង្គម Truth Social ថា ៖ «កាលពីថ្ងៃទី៦ ខែមេសា ចិនបានប្រកាសដាក់ពន្ធទំនិញអាមេរិក ស្មើ៣៤% បន្ថែមលើពន្ធគយយ៉ាងខុសច្បាប់ ។ ខ្ញុំបានដាស់តឿនហើយថា ប្រទេសនានាដែលដាក់ពន្ធទំនិញអាមេរិកវិញ ប្រទេសនោះនឹងប្រឈមជាមួយការដាក់ពន្ធទំនិញខ្ពស់ជាងមុន ។ ហេតុនេះ បើចិនពុំព្រមដកថយការដាក់ពន្ធទំនិញអាមេរិក ស្មើ៣៤% ទេ អាមេរិកនឹងដាក់ពន្ធលើទំនិញចិន ៥០% បន្ថែមទៀត ដោយអនុវត្តចាប់ពីថ្ងៃទី៩ ខែមេសា» ។

លោកបន្តថា ក្រៅពីចិនប្រឈមនឹងការដំឡើងពន្ធទំនិញខ្ពស់ជាងមុនហើយ អាមេរិកនឹងលុបចោលការសុំជួបចរចាពាណិជ្ជកម្មរបស់ចិនទាំងអស់ ។ រីឯប្រទេសផ្សេងៗដែលសុំចរចាពាណិជ្ជកម្មជាមួយអាមេរិក គឺយើងនឹងចាប់ផ្តើមចរចាភ្លាមៗ ។

គួរបញ្ជាក់ថា ការប្រកាសដាក់ពន្ធទំនិញចិន ៥០% លើកចុងក្រោយនេះ គឺជាការឈានទៅរកសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចទាំងពីរលើពិភពលោក ដោយសាររដ្ឋាភិបាលចិននៅតែប្រកាន់ជំហរតឹងរ៉ឹងពុំទទួលយកការដាក់សម្ពាធពីអាមេរិក ។ សង្គ្រាមពាណិជ្ជកម្មរវាងអាមេរិក និងចិន នឹងប៉ះពាល់ដល់សេដ្ឋកិច្ចពិភពលោក នាថ្ងៃអនាគតដ៏ខ្លី ៕

ប្រទេសថៃ ៖ កាលពីថ្ងៃទី២៨ ខែមីនា ឆ្នាំ២០២៥ នៅភាគកណ្តាលប្រទេសមីយ៉ាន់ម៉ាបានកើតគ្រោះរញ្ជួយដី ស្មើកម្រិត៧.៧រិចទ័រ ដែលមានឥទ្ធិពលដល់ប្រទេសជាច្រើន រួមទាំងថៃ បានខូចខាតអគារជាច្រើនកន្លែង ជាពិសេស អគារក្នុងទីក្រុងបាងកក រងផលប៉ះពាល់ខ្លាំងបំផុត ។ ធនាគារ Siam Commercial បានបង្ហាញរបាយការណ៍វាយតម្លៃផលប៉ះពាល់ជំហ៊ានដំបូងដោយសាររញ្ជួយដីនៅថៃ គឺថៃបាត់បង់ប្រាក់ស្មើប្រមាណ៣ម៉ឺនលានបាត ហើយវិស័យទេសចរណ៍ និងអចលនទ្រព្យប៉ះពាល់ខ្លាំងជាងគេ ។

គ្រោះរញ្ជួយដីចាប់ផ្តើមប៉ះពាល់ដល់វិស័យទេសចរណ៍ថៃ ដោយសារការលុបចោលការស្នាក់នៅបន្ទប់សណ្ឋាគារ ក្នុងរយៈពេល២ថ្ងៃក្រោយរញ្ជួយដី ស្មើប្រមាណ១,១០០បន្ទប់ នៅទូទាំងប្រទេស ។ តាមទិន្នន័យសណ្ឋាគារ គឺភ្ញៀវទេសចរបានលុបចោលការស្នាក់ក្នុងបន្ទប់សណ្ឋាគារភាគច្រើននៅទីក្រុងបាងកក ខណៈសមាគមអាកាសចរណ៍ថៃបញ្ជាក់ថា រយៈពេល២ថ្ងៃនេះ ចំនួនការទិញសំបុត្រយន្តហោះធ្លាក់ចុះជាមធ្យម ចាប់ពី៤០% ទៅ៦០% ។ ភ្ញៀវទេសចរបរទេសកំពុងតាមដានស្ថានការណ៍រញ្ជួយដីនៅថៃ ដោយសាររដ្ឋាភិបាលប្រទេសជាច្រើនដាស់តឿនពលរដ្ឋពីសុវត្ថិភាពធ្វើដំណើរមកថៃ ដូចជា ៖ រដ្ឋាភិបាលអង់គ្លេស សិង្ហបុរី និងកាណាដា ។

តាមរបាយការណ៍ធនាគារ Siam Commercial គឺរញ្ជួយដីនឹងប៉ះពាល់ដល់វិស័យទេសចរណ៍ថៃរយៈពេលខ្លី ហើយភ្ញៀវទេសចរបរទេសមកថៃនៅខែមេសា ឆ្នាំ២០២៥ នឹងធ្លាក់ចុះ១២% ដែលធ្វើឱ្យថៃបាត់បង់ប្រាក់ចំណូលពីការចំណាយរបស់ភ្ញៀវទេសចរបរទេស ស្មើ២ម៉ឺន១ពាន់លានបាត ។ ប៉ុន្តែវិស័យទេសចរណ៍ថៃនឹងងើបឡើងវិញឆាប់រហ័ស បើរដ្ឋាភិបាលកំណត់វិធានការផ្តល់ទំនុកចិត្តដល់ភ្ញៀវទេសចរឡើងវិញ ។

ដោយឡែក វិស័យអចលនទ្រព្យប៉ះពាល់ខ្លាំងជាងគេដោយសាររញ្ជួយដី ទោះជាអគារជាច្រើនកន្លែងពុំបានខូចខាតដោយសារការរលំ ប៉ុន្តែការងើបឡើងវិញនៃទីផ្សារអចលនទ្រព្យអាស្រ័យលើអតិថិជនមានទំនុកចិត្តដូចមុន ។ របាយការណ៍នេះបង្ហាញថា ការផ្ទេរកម្មសិទ្ធិអចលនទ្រព្យនៅទីក្រុងបាងកក និងតំបន់ជុំវិញក្នុងឆ្នាំ២០២៥ គឺស្មើ៨ម៉ឺន៥ពាន់ខ្នង ធ្លាក់ចុះ០.៨% ដោយសារអតិថិជនគ្មានទំនុកចិត្តលើសុវត្ថិភាព ។

ពលរដ្ឋរស់នៅក្នុងខុនដូ និងកំពុងបង់រំលស់ខុនដូ ជាពិសេស អ្នកមានចំណូលមធ្យម និងចំណូលតិច នឹងបន្តរស់នៅក្នុងខុនដូ ដោយសារពួកគេគ្មានប្រាក់គ្រប់គ្រាន់សម្រាប់ផ្លាស់ប្តូរទីលំនៅ ឬទិញផ្ទះថ្មី ។ ហេតុនេះ ម្ចាស់ខុនដូនឹងពន្លឿនការពិនិត្យសុវត្ថិភាពអគារ និងកំណត់វិធានការជួយទាន់ពេលវេលាដើម្បីឱ្យអ្នករស់នៅខុនដូអស់បារម្ភ ព្រមទាំងវិធានការជួយសង្គ្រោះពីស្ថាប័នហិរញ្ញវត្ថុ ដូចជា ៖ ការកាត់បន្ថយប្រាក់បង់រំលស់ ឬពន្យារពេលបង់រំលស់ខុនដូ ព្រមទាំងផ្តល់ប្រាក់កម្ចីសម្រាប់ជួសជុលលំនៅឋាន ។

ហេតុនេះ ផលប៉ះពាល់ដោយសាររញ្ជួយដីធ្វើឱ្យថៃបាត់បង់ប្រាក់ប្រមាណ៣ម៉ឺនលានបាត ប៉ុន្តែទឹកប្រាក់ជាក់ស្តែងអាស្រ័យលើការស្តារសេដ្ឋកិច្ចឡើងវិញរយៈពេលខ្លី ។ វាធ្វើឱ្យពលរដ្ឋថៃបារម្ភពីសុវត្ថិភាពអគារ រហូតដល់គម្រោងសាងសង់អគារនានាផ្អាកភ្លាមៗរង់ចាំការពិនិត្យសុវត្ថិភាពឡើងវិញ ។ ក្រៅពីនេះ ពលរដ្ឋថៃបានផ្អាកការចំណាយលើសេវាកម្មផ្សេងៗ, ទិញទំនិញ និងដើរលេងក្រោយរញ្ជួយដី ។ ផលប៉ះពាល់សេដ្ឋកិច្ចថៃពុំប្រាកដប្រជា ហើយអាស្រ័យលើទំនុកចិត្តរបស់ពលរដ្ឋ ភ្ញៀវទេសចរ និងវិនិយោគិនបរទេស ៕

មនុស្សម្នារនៅមកពីរដ្ឋទាំង៥០ របស់សហរដ្ឋអាមេរិកបានប្រមូលផ្ដុំគ្នាធ្វើការតវ៉ាប្រឆាំងការដឹកនាំលោកប្រធានាធិបតី Donald Trump កាលពីថ្ងៃសៅរ៍នេះ ដែលរៀបចំដោយចលនាគាំទ្រលទ្ធិប្រជាធិបតេយ្យដើម្បីឆ្លើយតបទៅនឹងអ្វីដែលពួកគេហៅថា “ការកាន់កាប់ដោយអរិភាព” និងវាយប្រហារលើសិទ្ធិនិងសេរីភាពរបស់អាមេរិក។

យោងតាមការចុះផ្សាយរបស់CNN កាលពីថ្ងៃទី៥ ខែមេសា ឆ្នាំ២០២៥ ចលនា <> រឺ <<លែងដៃ>> ត្រូវបានធ្វើឡើងជាង១,២០០កន្លែង ដែលមាននៅតាមសួនច្បារសាធារណៈ, មុខអគាររដ្ឋាភិបាល, មុខទីស្នាក់ការសន្តិសុខសង្គម, មុខសាលាក្រុងទូទាំងប្រទេស និងស្ទើរគ្រប់ទីកន្លែង។ ចំនួនមនុស្សដែលបានចូលរួមក្នុងការតវ៉ាខាងលើ ត្រូវបានគេប៉ាន់ប្រមាណថាមានរាប់លាននាក់ និងមានជាង១៥០ក្រុម ដែលមានដូចជា ក្រុមសហជីពការងារ, ក្រុមការពារសិទ្ធិ LGBTQ+, ក្រុមអ្នកប្រកាន់លទ្ធិប្រជាធិបតេយ្យ, ក្រុមអ្នកនយោបាយមួយចំនួន និងក្រុមជាច្រើនផ្សេងទៀត។

ការធ្វើបាតុកម្មនេះ គឺជាការទាមទារទៅលើចំណុចធំៗរួមមាន៖ ការប្រឆាំងការកាត់បន្ថយសេវាសាធារណៈ, បដិសេដរចនាសម្ព័ន្ធដឹកនាំ (DOGE) ដែលរៀបចំដោយលោក Elon Musk, បញ្ឈប់ការដាក់សម្ពាធលើជនអន្តោរប្រវេសន៍ ដោយលើកឡើងអំពីបញ្ហាសិទ្ធិមនុស្ស និង ការទាមទារសិទ្ធិសេរីភាពស៊ីវិលរបស់ពលរដ្ឋ។

គួររំលឹកថា ចាប់តាំងពីលោកDonald Trumpឡើងកាន់ដំណែងជាប្រធានាធិបតីមក មនុស្សរាប់ម៉ឺននាក់ត្រូវបានបញ្ឈប់ពីការងារនៅតាមក្រសួង ឬស្ថាប័នការងាររបស់ពួកគេ ដែលការធ្វើបែបនេះគឺយើងតាមការលើកឡើងរបស់មហាសេដ្ឋីElon Muskក្នុងគម្រោងកាត់បន្ថយចំណាយរបស់សហរដ្ឋអាមេរិក។

សម្រាប់ការឆ្លើយតប របស់រដ្ឋភិបាលជុំវិញនឹងការតវ៉ានេះ គឺខាងសេតវិមានបានការពារគោលនយោបាយរបស់លោកTrump និងអះអាងពីការប្ដេជ្ញារចិត្ត។ សម្រាប់លោកElon Musk បានឆ្លើយតបដោយការច្រានចោលពីការលើកឡើងនៅលើបណ្ដាញប្រព័ន្ធសង្គមElon Musk និងបាននិយាយថា ក្រុមអ្នកតវ៉ាគឺកំពុងទម្លាក់កំហុសអោយរដ្ឋាភិបាល។

អ្នកតំណាងពលរដ្ឋនៅរដ្ឋផ្លរីដា លោកMaxwell Frost បាននិយាយថា៖ នៅក្នុងប្រវត្តិសាស្រ្តរបស់មនុស្សជាតិ ពួកអ្នកដឹកនាំផ្តាច់ការ គេមិនដែលស្កប់ស្កល់នឹងអំណាចដែលខ្លួនមាននោះទេ ដូច្នេះហើយពួកគេតែងតែព្យាយាមរុញដែនកំណត់នៃអំណាចរបស់គេអោយរីកធំឡើង ទាំងដែលបំពានច្បាប់ ហើយបន្ទាប់មកពួកគេចាំឲ្យសាធារណជនមើលមកកាន់ពួកគេ ថាតើពួកគេខ្សោយ ឬក៏ខ្លាំង”។

សរុបជារួមមក ការធ្វើបាតុកម្មប្រឆាំងនេះគឺជាការតវ៉ាដ៏ធំមួយក្នុងប្រវត្តិសាស្រ្តរបស់សហរដ្ឋអាមេរិកដើម្បីអោយមានការបញ្ឈប់ការជ្រើសតាំងមហាសេដ្ឋីElon Musk ឲ្យមកពាកព័ន្ធនឹងនយោបាយក្នុងប្រទេស ព្រមទាំងស្នើសុំអោយមានការផ្លាស់ប្ដូរច្បាប់មួយចំនួនដែលលោកDonald Trumpបានដាក់ចេញ៕

ប្រទេសបារាំង៖ អគ្គីភ័យដ៏ធំសម្បើមមួយបានកើតឡើងនៅមជ្ឍមណ្ឌលកែច្នៃសំរាម Syctom នៃទីក្រុងប៉ារីស កាលពីរសៀល ថ្ងៃចន្ទ ទី៧ ខែមេសានេះ បង្កើតបានជាផ្សែងខ្មៅដ៏ក្រាស់ខ្មឹក ដែលគេអាចមើលឃើញពីចម្ងាយរាប់សិបគីឡូម៉ែត្រ និងស្ថិតនៅមិនឆ្ងាយប៉ុន្មានពីទួលប៉មEiffel។

យោងតាមប្រភពសារព័ត៌មានបរទេសបានឲ្យដឹងថា មានឡានទឹកចំនួន ៦០គ្រឿង និងក្រុមអ្នកពន្លត់អគ្គីភ័យជាង ២០០នាក់ បានព្យាយាមជួយពន្លត់ភ្លើង..ឆេះដ៏កំណា..ចខាងលើ ព្រមទាំងជួយសង្រ្គោះបុគ្គលិកដែលជាប់នៅក្នុងរោងចក្រខាងលើអោយចេញមកក្រៅដោយសុវត្ថិភាពទាំងអស់គ្នា។

ចំពោះមូលហេតុដែលនាំអោយកើតមានគ្រោះអគ្គីភ័យខាងលើនេះ មិនទាន់ត្រូវបានគេបញ្ជាក់ច្បាស់នៅឡើយទេ ប៉ុន្តែតាមជំហានដំបូងនៃការសន្និដ្ឋានរបស់ក្រុមបច្ចេកទេសត្រូវបានឲ្យដឹងថា វាអាចបណ្ដាលកពីកត្តាធំៗចំនួន៤ ដូចជា៖ ទី១ ការដាច់ខូចខាតផ្នែកណាមួយនៃខ្សែបណ្ដាញអគ្គីសនីនៅជាន់ដែលប្រមូលផ្តុំចរន្តខ្លាំងជាងគេ ទី២ ការឆាបឆេះនៃសម្ភារៈ ដោយសារទីនោះជារោងចក្រកែច្នៃសំរាម ដែលមានដចជា ក្រដាស ផ្លាស្ទិក និងវត្ថុផ្សេងៗដែលសុទ្ធតែជាវត្ថុងាយនឹងឆាបឆេះ ទី៣ កំហុសរបស់មនុស្ស ថ្វីត្បិតថាអគ្គីភ័យនេះអាចកើតមានដោយចៃដន្យ ប៉ុន្តែវាក៏មានការចូលរួមជាចំណែកខុសពីបុគ្គលិកផ្នែកខ្លះផងដែរ ដែលមិនមានការប្រុងប្រយ័ត្នគ្រប់ជ្រុងជ្រោយ និងទី៤ អាចបណ្ដាលមកពីឧបករណ៏ដែលគេប្រើប្រាស់ក្នុងការកែច្នៃសំរាម ព្រោះឧបករណ៍ខ្លះប្រើប្រាស់ដោយបង្កើតកម្ដៅ និងមានផ្កាភ្លើង ដើម្បីកែច្នៃសំរាមទើបនៅពេលដែលប្រើប្រាស់ ហើយវាអាចធ្លាក់មកប៉ះនឹងសម្ភារៈដែលងាយឆាបឆេះនៅផ្នែកខាងក្រោមនោះ។

ទាំងនេះសុទ្ធតែជាព័ត៌មានបឋមដែលទទួលបាន ចំពោះទ្រព្យសម្បត្តិដែលបាត់បង់អស់ប៉ុន្មាន និងមូលហេតុច្បាស់លាស់យ៉ាងណាគេកំពុងបើកការស៊ើបអង្កេតនៅឡើយ។ ទោះជាយ៉ាងណា វាជាសំណាងមួយដែរ ដែលនៅក្នងហេតុការណ៍ខាងលើមិនមាននរណាម្នាក់បា..ត់បង់ជី..វិត ប៉ុន្តែវាបានបង្ករភាពភ្ញាក់ផ្អើល និងតក់ស្លុតយ៉ាងខ្លាំង ព្រោះតំបន់នោះជាទីប្រជុំជនដ៏សំខាន់នៅទីក្រុងប៉ារីសដែលមានមនុស្សប្រមូលផ្ដុំគ្នាកុះករជាប្រចាំ៕

ប្រទេសថៃ ៖ ហេតុការណ៍គ្រោះរញ្ជួយដីនៅប្រទេសមីយ៉ាន់ម៉ា កាលពីថ្ងៃទី២៨ ខែមីនា ឆ្នាំ២០២៥ ដែលមានឥទ្ធិពលដល់បណ្តាខេត្តជាច្រើនរបស់ថៃ ជាពិសេស ទីក្រុងបាងកក ។ ក្រៅពីធ្វើឱ្យប៉ះពាល់ដល់ការរស់នៅក្នុងខុនដូគ្មានសុវត្ថិភាព វាក៏បានប៉ះពាល់ដល់ការសម្រេចចិត្តទិញខុនដូថ្មី និងការផ្ទេរកម្មសិទ្ធិខុនដូដែលបានកក់ប្រាក់មុនពេលរញ្ជួយដីផងដែរ ។ នាដើមខែមេសា ឆ្នាំ២០២៥ ខុនដូជាច្រើនកន្លែងត្រូវបានប្រកាសលក់ព្រៀងព្រាត ដោយសារម្ចាស់ខុនដូបារម្ភពីការរស់នៅគ្មានសុវត្ថិភាពក្រោយរញ្ជួយដី ។

បច្ចុប្បន្ន ពលរដ្ឋថៃដែលចង់ទិញខុនដូក្នុងគម្រោងណាមួយនៅទីក្រុងបាងកក បានត្រួតពិនិត្យគម្រោងនោះថា តើមានប្រព័ន្ធការពាររញ្ជួយដី ឬសាងសង់ខុនដូអាចទប់ទល់នឹងកម្លាំងរំញ័រដោយសាររញ្ជួយដីកម្រិតណា? រីឯអ្នកបានទិញខុនដូ និងរស់នៅក្នុងខុនដូរួចហើយ ត្រូវត្រួតពិនិត្យលក្ខណៈបន្ទប់ និងរង់ចាំការជូនដំណឹងពីម្ចាស់គម្រោង និងស្ថាប័នរដ្ឋថា គម្រោងខុនដូ ឬអគារដែលខ្លួនកំពុងរស់នៅមានភាពរឹងមាំ ហើយអាចនៅបន្តទៀត ។

អភិបាលក្រុងបាងកក បានបញ្ជាឱ្យមានការពិនិត្យមើលអគារខ្ពស់ៗគ្រប់កន្លែង រួចហើយ រាយការណ៍លទ្ធផលការពិនិត្យអគារខ្ពស់ៗក្នុងទីក្រុងបាងកក ។ បញ្ហាចម្បង គឺម្ចាស់ខុនដូសំណូមពរឱ្យមានការពិនិត្យ តាមដានដើម្បីស្វែងរកវិធីដោះស្រាយបញ្ហានាថ្ងៃអនាគត ។ រញ្ជួយដីបានធ្វើឱ្យប៉ះពាល់ដល់ក្រុមហ៊ុនអចលនទ្រព្យយ៉ាងខ្លាំង ពីព្រោះចាប់ពីពេលនេះ អចលនទ្រព្យនៅទីក្រុងបាងកក នឹងរងផលប៉ះពាល់ដោយសារ Aftershock កើតឡើងជាបន្តបន្ទាប់ធ្វើឱ្យអតិថិជនគ្មានទំនុកចិត្ត ។

នាពេលដ៏ខ្លីខាងមុខ ការពន្យារពេលទិញខុនដូនៅទីក្រុងបាងកក នឹងកើនឡើងកាន់តែខ្លាំង ខណៈអ្នកទិញខុនដូរួចហើយ បែរជាសម្រុកដាក់ស្លាកលក់វិញ ។ ហេតុនេះ វានឹងធ្វើឱ្យការផ្ទេរកម្មសិទ្ធិខុនដូនៅឆ្នាំ២០២៥ ធ្លាក់ចុះខ្លាំងជាងការរំពឹងទុករហូតដល់៥% ហើយក្រុមហ៊ុនលក់ខុនដូនឹងផ្អាកលក់ខុនដូថ្មីៗ ដើម្បីការពារការប្រែប្រួលតម្លៃខុនដូ ។

ក្រុមហ៊ុននីមួយៗព្យាយាមលក់ខុនដូនៅសេសសល់ឱ្យអស់ ស្របពេលគ្មានអតិថិជនចាប់អារម្មណ៍ ។ នៅទីក្រុងបាងកក មានខុនដូចំនួន៦៣,៨០៥បន្ទប់ ស្មើទឹកប្រាក់៤៥៨,៣៩៤លានបាត លក់ពុំទាន់ដាច់ (ក្នុងនោះមានខុនដូតម្លៃក្រោម១០លានបាត ចំនួន៥៧,២៤៥បន្ទប់ និងខុនដូតម្លៃចាប់ពី១០លានបាតឡើង ស្មើ៦,៥៦០បន្ទប់) ។ ម្ចាស់ខុនដូជាច្រើនបារម្ភពីរញ្ជួយដីកើតឡើងម្តងទៀត ទើបសម្រេចចិត្តលក់ខុនដូ ដើម្បីយកប្រាក់ទិញលំនៅឋានទាបៗរស់នៅ ។

គួរបញ្ជាក់ថា ពលរដ្ឋថៃរស់នៅទីក្រុងបាងកកមួយចំនួនទៀតពុំហ៊ានរស់នៅទាំងខុនដូខ្ពស់ និងលំនៅឋានទាបផ្ទាល់ដី ពួកគេបានប្រកាសលក់លំនៅឋានផ្ទាល់ដី និងទិញលំនៅឋានតាមខេត្តភ្លាមៗ ។ ដូចគ្នានេះ អ្នកជួលខុនដូស្នាក់នៅក្នុងទីក្រុងបាងកក ក៏បារម្ភពីសុវត្ថិភាពដែរ និងខ្លាចកើតរញ្ជួយដីម្តងទៀត ៕