វប្បធម៌ប្រមូលផលផ្ដា.ច់ពូជ! ដើមសំរ៉ង អាចនឹងផុតពូជឆាប់ៗ បើសកម្មភាពនេះនៅតែបន្ត

April 10, 2025

ពីមួយឆ្នាំទៅមួយឆ្នាំ ការកាប់បំផ្លា..ញដើមសំរ៉ង ដើម្បីយកផ្លែនៅតែបន្តមានឡើងឥតឈប់ឈរ ហើយចំនួននៃដើមនេះបានថយចុះកាន់តែខ្លាំងឡើងៗ ដោយក្រសួងបរិស្ថានបានសម្ដែងក្ដីបារម្ភចំពោះរុក្ខជាតិមួយប្រភេទនេះ ថាអាចនឹងផុតពូជក្នុងពេលឆាប់ៗប្រសិនបើសកម្មភាពនេះនៅតែបន្ត។

ដើមសំរ៉ងធំៗ និងមានអាយុកាលរាប់សិបឆ្នាំជាច្រើនដើម ត្រូវបានជនមួយចំនួនចូលទៅកាប់ផ្ដួលរំលំដើម្បីបេះផ្លែរបស់វា ដោយមិនគិតពីការបាត់បង់ដើមឈើធំៗទាំងនោះឡើយ។ កន្លងមកក្រសួងបរិស្ថាន និងសមត្ថកិច្ចតាមតំបន់មួយចំនួន ធ្លាប់បានចុះទៅអប់រំណែនាំរួចហើយ ប៉ុន្តែសង្កេតឃើញថាច្រើនឆ្នាំមកនេះ ចំនួនដើមសំរ៉ងដែលត្រូវគេកាប់ផ្ដួលនៅតែមានជាបន្តបន្ទាប់ដដែល។

គួរជម្រាបថា រុក្ខជាតិសំរ៉ង ប្រើរយៈពេលរាប់សិបឆ្នាំទម្រាំមានដើមធំខ្ពស់ ហើយអាចចេញផ្លែបានម្ដងៗ។ មានមនុស្សភាគតិចណាស់ ដើររើសផ្លែរបស់វាដែលជ្រុះនៅលើដី ឬរកវិធីសាស្រ្តដើម្បីឡើងទៅបេះណាស់ ដោយភាគច្រើនពួកគេត្រូវតែមកកាប់ដើមទាំងនោះចោលតែម្ដងដើម្បីប្រមូលបានផ្លែច្រើន។

យោងតាមសេចក្ដីជូនព័ត៌មានរបស់ក្រសួងបរិស្ថាន កាលពីថ្ងៃទី៧ ខែមេសា បានឲ្យដឹងថា៖ ក្រសួងចាត់ទុកសកម្មភាពនេះគឺជាការបំផ្លិចបំផ្លាញធនធានធម្មជាតិមានសភាពធ្ងន់ធ្ងរបំផុត ដែលឈានទៅរកការផ្ដាច់ពូជរុក្ខជាតិសំរ៉ងរបស់ជាតិទាំងស្រុង នឹងជាសកម្មភាពល្មើសនឹងច្បាប់ដែលមានចែងក្នុងមាត្រា៣៨៤ និងមាត្រា ៣៨៦ នៃក្រមបរិស្ថាននិងធនធានធម្មជាតិ។

លើសពីនេះ ក្រសួងបរិស្ថាន បានអំពាវនាវដល់បងប្អូនប្រជាពលរដ្ឋទាំងអស់ មេត្តារួមគ្នាថែររក្សា ការពារដើមសំរ៉ង ដែលជាធនធានធម្មជាតិឲ្យគង់វង្ស និងដើម្បីជាផលប្រយោជន័បច្ចុប្បន្ន និងតទៅអនាគត សម្រាប់កូនចៅជំនាន់ក្រោយ។

ដោយឡែក សម្រាប់អ្នកប្រើប្រាស់បណ្ដាញទំនាក់ទំនងសង្គមជាច្រើននៅក្នុងការបញ្ចេញមតិ បានលើកឡើងថា៖ ស្នើសុំឲ្យក្រសួងឈប់ធ្វើការអំពាវនាវតទៅទៀត ផ្ទុយទៅវិញស្នើឲ្យមានការចាត់វិធានការតឹងរឹងវិញម្ដង ចំពោះអ្នកដែលប្រព្រឹត្តិសកម្មភាពនេះ ព្រោះមិនមែនទើបតែមានការណែនាំកុំអោយធ្វើនាពេលថ្មីៗនេះទេ ប៉ុន្តែសមត្ថកិច្ច និងមន្ត្រីជំនាញធ្លាប់បានធ្វើការពន្យល់ជាច្រើនលើកច្រើនសារ និងតាំងពី២០ ៣០ឆ្នាំមុនមកហើយ៕

ផ្អាករឿងពន្ធកម្ពុជា និងប្រទេសផ្សេងៗ90ថ្ងៃសិន! ប៉ុន្តែសម្រាប់ចិន Trumpបែរជាតម្លើងដល់ ១២៥% ទៅវិញ

Lee Ek

April 10, 2025

មិនព្រមដកថយរៀងខ្លួន! ចិនក្ដៅត្រចៀកក្រោយអាមេរិកប្រកាសតម្លើងពន្ធឲ្យប្រទេសខ្លួនដល់ទៅ 104% ដូចនេះចិនសងសឹកវិញដោយបន្ថែម50%ទៀតលើពន្ធអាមេរិក ឲ្យស្មើនឹង84% ប៉ុន្តែអាមេរិកមិនខ្វល់ ថែមទាំងបន្តតម្លើងពន្ធឲ្យចិនរហូតដល់ 125% និងប្រកាសថាផ្អាកការយកពន្ធពីបណ្ដារប្រទេសផ្សេងៗរួមទាំងកម្ពុជារយៈពេល90ថ្ងៃសិន។

ត្រឹមរយៈពេលមិនដល់20ម៉ោងផង ការកំណត់ពន្ធនៅក្នុងទីផ្សារពាណិជ្ជកម្មពិភពលោកមានការប្រែប្រួលខ្លាំងនឹកស្មានមិនដល់។ នៅក្នុងនោះផងដែរ សង្រ្គាមពាណិជ្ជកម្មនឹងកើតមានឡើងយ៉ាងពិតប្រាកដ ប្រសិនបើប្រទេសសេដ្ឋកិច្ចធំៗទាំង2ខាងលើ មិនព្រមមានការចរចាដោយសន្តិវិធី។

យោងតាមសារព័ត៌CNN បានឲ្យដឹងថា៖ សេចក្ដីប្រកាសចេញពីទីក្រុងប៉េកាំង ស្ដីពីការសងសឹកទៅលើអាមេរិក ដោយចិននឹងតម្លើងពន្ធគយដល់ 84% សម្រាប់អាមេរិក។ បន្ថែមពីនេះ គណៈកម្មការពន្ធរបស់ក្រុមប្រឹក្សារដ្ឋាភិបាលចិន បាននិយាយនៅក្នុងសេចក្តីថ្លែងការណ៍មួយថា “ការដំឡើងពន្ធរបស់សហរដ្ឋអាមេរិកលើប្រទេសចិនគឺជាកំហុសឆ្គងដោយបំពានយ៉ាងធ្ងន់ធ្ងរទៅលើសិទ្ធិ និងផលប្រយោជន៍ស្របច្បាប់របស់ប្រទេសចិន និងធ្វើឱ្យខូចខាតយ៉ាងធ្ងន់ធ្ងរដល់ប្រព័ន្ធពាណិជ្ជកម្មពហុភាគីដោយផ្អែកលើច្បាប់” ។

ការសងសឹកនេះ គឺធ្វើទៅតាមការសន្យារបស់ចិនថាខ្លួននឹង “ប្រយុទ្ធដល់ទីបញ្ចប់” ហើយចិនបានធ្វើវាឡើងប៉ុន្មានម៉ោង ក្រោយពេលអាមេរិកតម្លើងពន្ធគយចិនឲ្យឡើងដល់ 104% និងសម្រេចចូលជាធរមានកាលពីរសៀលថ្ងៃពុធ ទី9 ខែមេសានេះ។

ដោយឡែកងាកមកមើលខាងសហរដ្ឋអាមេរិកវិញ លោកប្រធានាធិបតី Donald Trump បាននិយាយថា៖ លោកកំពុងអនុវត្តការផ្អាករយៈពេល 90 ថ្ងៃលើពន្ធថ្មីៗ ដែលមានអាត្រាពន្ធចាប់ពី 10% ដល់ 49% ដោយទម្លាក់មកត្រឹម 10% គ្រប់ប្រទេសជាបណ្ដោះអាសន្នសិន ហើយក្នុងនោះប្រទេសចិនមិនបានរាប់បញ្ចូលឡើយ។

ស្របពេលជាមួយគ្នានេះ លោកបានប្រកាសថា លោកកំពុងតម្លើងអត្រាពន្ធលើប្រទេសចិនរហូតដល់ទៅ 125% ដែលជាការជំរុញឱ្យមានការតម្លើងពន្ធគយជាមួយទីក្រុងប៉េកាំង។

លោក Trump បានលើកឡើងពីការសម្រេចដូចខាងលើថា ៖ “ដោយផ្អែកលើការខ្វះការគោរពដែលប្រទេសចិនបានបង្ហាញដល់ទីផ្សារពិភពលោក ខ្ញុំសូមតម្លើងពន្ធដែលសហរដ្ឋអាមេរិកដាក់ទៅលើប្រទេសចិនដល់ 125% ឲ្យមានប្រសិទ្ធភាពភ្លាមៗ។ ត្រង់ចំណុចនេះ ខ្ញុំសង្ឃឹមថានៅពេលអនាគតដ៏ខ្លីខាងមុខនេះ ប្រទេសចិននឹងដឹងខ្លួនថា ថ្ងៃដែលដកសហរដ្ឋអាមេរិក និងប្រទេសដទៃទៀតចេញ ចិននឹងលែងមាននិរន្តរភាពតទៅទៀតហើយ” ៕

បទ «ស្រណោះ» របស់ វណ្ណដា កំពុងល្បីកក្រើកនៅថៃខណៈតារាល្បីៗនាំគ្នាលេងព្រាត

Lee Ek

April 10, 2025

បន្ទាប់ពីបទ «សង្រ្កាន្តស្គាល់ស្នេហ៍» ដែលល្បីយ៉ាងខ្លាំងនៅប្រទេសថៃថ្មីៗនេះបទ ស្រណោះ វណ្ណដា ដែលបានចេញនៅក្នុងឆ្នាំ២០២០ កំពុងតែទទួលបាននូវការគាំទ្រឡើងវិញជាមួយនឹងការ Mix ភ្លេងបន្ថែម។ តារាល្បីៗជាច្រើនបានលេងនៅលើបណ្តាញសង្គមទិកតុកទៅលើបទ ស្រណោះ របស់ វណ្ណដា មានដូចជា Engfa Waraha Miss Grand Thailand 2022 ,តារាចម្រៀង SPRITE និងតារាសម្តែង Pinky Savika ជាដើម។

ដូចប្រិយមិត្តមួយចំនួនធំជ្រាបមកហើយថាតារារ៉េប ម៉ាន់ វណ្ណដា គឺជាតារាចម្រៀងកម្ពុជាម្នាក់ដែលមានអ្នកគាំទ្រនៅប្រទេសថៃច្រើនស្រលាញ់ចូលចិត្តសូម្បីតែតារាល្បីៗប្រចាំប្រទេសថៃជាច្រើនស្គាល់តារាចម្រៀងរូបនេះហើយបានសារភាពត្រង់ៗតែម្តងថាគឺជាហ្វេនរបស់ វណ្ណដា។ ជាក់ស្តែងកន្លងមកនេះបទសម្រាប់អបអរពិធីបុណ្យចូលឆ្នាំខ្មែររបស់ វណ្ណដា មានចំណងជើងថា «សង្ក្រាន្តស្គាល់ស្នេហ៍» គឺទទួលបាននូវការគាំទ្រយ៉ាងខ្លាំងពីទស្សនិកជនថៃដែលមានតារាល្បីៗជាច្រើននាំគ្នាលេងបទចម្រៀងនេះ។

បន្ទាប់ពីបទ «សង្រ្កាន្តស្គាល់ស្នេហ៍» វណ្ណដា កំពុងតែធ្វើឱ្យអ្នកគាំទ្រថៃផ្ទុះកក្រើកម្តងទៀតជាមួយនឹងបទរបស់លោកមួយបទទៀតគឺមានចំណងជើងថា «ស្រណោះ» ដែលបទនេះគឺបានទម្លាក់តាំងពីខែមេសា ឆ្នាំ២០២០ ដែលមកទល់ពេលនេះមានអ្នកស្តាប់លើសពី៣៨លានដងហើយ។ នៅលើបណ្តាញសង្គមទិកតុកនាពេលថ្មីៗនេះគេបានឃើញតារាល្បីៗជាច្រើនដូចជា Engfa Waraha បានលេងបទចម្រៀងមួយបទនេះ។

ក្រៅពីបវរកញ្ញាប្រចាំប្រទេសថៃដ៏ល្បីល្បាញនេះគេក៏បានឃើញតារាសម្តែង Pinky Savika តួស្រីនាងថងឌី ឆ្នាំ២០១២ ក៏បានលេងបទនេះខណៈកាលពីមុនតារាស្រីរូបនេះក៏ធ្លាប់លេងបទចម្រៀង វណ្ណដា ផងដែរ។

ងាកមកកាន់តារាចម្រៀងវ័យក្មេង SPRITE វិញដែលជាអ្នកគាំទ្រម្នាក់របស់ វណ្ណដា និងធ្លាប់បានសហការគ្នាជាមួយនឹង វណ្ណដា ក្នុងបទចម្រៀង Run The Town ក៏បានចូលរួមលេងផងដែរ ខណៈអ្នកគាំទ្រមានបំណងចង់ឱ្យ SPRITE សហការជាមួយនឹង វណ្ណដា ម្តងទៀត។

គួរបញ្ជាក់ផងដែរថា ការសហការរវាង វណ្ណដា និងតារាចម្រៀងថៃចុងក្រោយនេះគឺជាមួយនឹងតារារ៉េបដ៏ល្បីគឺ YOUNGOHM ទៅលើបទ «SMOKE UP» ខណៈតារាចម្រៀងថៃរូបនេះនឹងមានវត្តមានក្នុងការប្រគំតន្រ្តីរបស់ វណ្ណដា នាពេលខាងមុខនេះផងដែរ៕

រំភើបចិត្តណាស់! ម្ចាស់គណនី Travel with Chris ថាប្រទេសកម្ពុជាគឺអស្ចារ្យកុំយល់ច្រឡំនិងគិតអវិជ្ជមាន

Lee Ek

April 10, 2025

អ្នកបង្កើតមាតិកាល្បីល្បាញដែលបានធ្វើដំណើរទេសចរណ៍ជាច្រើនប្រទេស Travel with Chris បានចូលរួមក្នុងកម្មវិធីរបស់លោក រៀនថត ជាមួយនឹងគូស្នេហ៍ដោយបាននិយាយថាប្រទេសកម្ពុជាគឺអស្ចារ្យប៉ុន្តែត្រូវបានគេយល់ច្រឡំហើយនេះជាហើយផលដែលលោកបានវិលត្រឡប់មកវិញម្តងហើយម្តងទៀត។

នៅថ្ងៃទី៨ មេសា លោក ឆេង សុភ័ក្រ្ត ហៅ រៀនថត បានចេញវីដេអូខ្លីមួយអំពីអ្នកបង្កើតមាតិកាល្បីឈ្មោះដែលជាម្ចាស់គណនី Travel with Chris និងគូស្នេហ៍របស់លោកស្វាគមន៍នៅក្នុងរដូវកាលទី៥របស់ខ្លួនហើយកម្មវិធីផតខាស់មួយនេះគឺទទួលបាននូវការគាំទ្រយ៉ាងខ្លាំងពីសំណាកទស្សនិកជនផងដែរ។

នៅក្នុងវីដអូខ្លីនេះ Travel with Chris បាននិយាយពីប្រទេសកម្ពុជាឆ្លងកាត់ទុក្ខលំបាកជាប្រទេសជួបនូវសង្គ្រាម ទើបធ្វើឱ្យមានការយល់ច្រឡំនិងគិតអវិជ្ជមានមកលើកម្ពុជា។ Chris បាននិយាយថា «កម្ពុជាគឺជាប្រទេសអស្ចារ្យតែត្រូវបានគេយល់ច្រឡំមែនទែន នេះជាហេតុផលលោកតែងតែត្រឡប់មកជាច្រើនលើក»។ មុននឹងហ៊ាននិយាយពាក្យនេះ Chris ថាដំបូងឡើងដែលលោកបានមកដល់ខ្មែរដំបូងក៏មានការព្រួយបារម្ភដូចគ្នា។ លោកបានថ្លែងយ៉ាងដូច្នេះថា «លើកទី១ ដែលលោកមកលោករាងភ័យបន្តិចដែរដោយសារតែពេលដែលយើងឆ្លងព្រំដែនមានហេតុការណ៍មួយកើតឡើងជានិច្ចកាល ជារឿងកើតឡើងគ្រប់ទីកន្លែងដែលយើងទៅ វាកើតឡើងចំពោះលោកកាលនៅវៀតណាមមិនមែនតែខ្មែរទេសូមកុំគិតអវិជ្ជមានវាកើតឡើងនៅគ្រប់ប្រទេសនៅលើពិភពលោកចំពោះការទៅដល់ថ្ងៃដំបូង អារម្មណ៍ដំបូង ពេលខ្លះអាចធ្វើឱ្យប៉ះពាល់អារម្មណ៍ពេលយើងធ្វើដំណើរ ខណៈប្រទេសតួកគីក៏កើតឡើងដូចគ្នាដែរ »។

ធ្វើដំណើរច្រើននិងបានយល់ដឹងពីជម្រៅចិត្តប្រជាជនខ្មែរ Chris ក៏បានបន្ថែមដែរថា «នៅជុំវិញអាស៊ីលោកដឹងថាប្រទេសផ្សេងៗមិនបានឆ្លងកាត់ដូចប្រជាជនខ្មែរឆ្លងកាត់នោះទេពួកគេមិនបានបាត់បង់គ្រួសារបងប្អូននិងឆ្លងកាត់សង្គ្រាមនោះទេដែលប៉ះពាល់យ៉ាងខ្លាំងដល់ប្រទេសខ្មែរ»។

គួរបញ្ជាក់ផងដែរថា Chris ធ្លាប់បានធ្វើដំណើរនិងបានផ្សព្វផ្សាយពីប្រទេសកម្ពុជាជាច្រើនដង។ លើសពីនេះលោកក៏បានឧបត្ថម្ភកុំព្យូទ័រនិងម៉ាស៊ីនព្រីនឱ្យសិស្សានុសិស្សប្រើប្រាស់ផងដែរ៕

ទោះកំពុងជោគជ័យភាពយន្តនេះក្តីតែលោក លៀក លីដា នៅមានក្តីបារម្ភចំពោះលំហូររឿងបរទេស

Lee Ek

April 10, 2025

ចុងក្រោយនេះភាពយន្ត «ភ្លើងឆេះក្លឹបក្រោមដី» របស់ផលិតកម្មរបស់លោក លៀក លីដា ទទួលបាននូវការគាំទ្រយ៉ាងខ្លាំងពីប្រជាពលរដ្ឋខ្មែរ តែយ៉ាងណាលោកនៅតែបង្ហាញក្តីបារម្ភចំពោះកុនខ្មែរនឹងដើរថយក្រោយខណៈកុនបរទេសចូលទីផ្សារកម្ពុជាច្រើន។

ភាពយន្ត «ភ្លើងឆេះក្លឹបក្រោមដី» របស់ផលិតកម្ម LD ដែលដកស្រង់ពីហេតុការណ៍ពិតកាលពីចុងឆ្នាំ២០២១ ទទួលបាននូវការគាំទ្រយ៉ាងឃ្លេវក្លាខណៈកន្លងមកមានរូបភាពបង្ហាញថា១ថ្ងៃរឿងនេះទទួលបានចំណូលដល់២ម៉ឺនដុល្លារក្នុងថ្ងៃចាក់បញ្ចាំងដំបូង។ មិនត្រឹមតែប៉ុណោះភាពយន្តនេះបានក្លាយជាភាពយន្តខ្មែរទី១ដែលមានអ្នកទស្សនាច្រើនជាងគេបង្អង់នៅក្នុងរោងភាពយន្តលេជេន។ នេះបើតាមការបញ្ជាក់របស់រោងភាពយន្តនៅថ្ងៃទី៣១ ខែមីនា។

ទោះបីជាមានភាពជោគជ័យលើភាពយន្តខាងលើនេះក្តីលោក លៀក លីដា ប្រធានសមាគមផលិតករភាពយន្តខ្មែរ បានបង្ហាញក្តីបារម្ភចំពោះភាពយន្តខ្មែរនឹងដើរថយក្រោយ។ លោកបានសរសេរនៅលើបណ្តាញសង្គមនាថ្ងៃទី៧ មេសា ថា «បើទោះបីជារឿងភ្លើងឆេះក្លឹបក្រោមដីរបស់ផលិតកម្មអិលឌីទទួលបានជោគជ័យខ្លាំងក៏ដោយ ក៏ខ្ញុំនៅតែយល់ថាវិស័យភាពយន្តរបស់យើងក្នុងឆ្នាំ ២០២៥ និងដើរថយក្រោយ ពីព្រោះខ្ញុំមិនទាន់ឃើញសញ្ញានៃផលិតករ ណាមួយដែលគ្រោងនឹង វិនិយោគផលិតរឿងធំៗ និងគម្រោងចំណាយស្តង់ដាសម្រាប់ទីផ្សារក្រៅប្រទេសឡើយ។ តែខ្ញុំបែរជាឃើញកុនបរទេសយ៉ាងសម្បូរបែបបកប្រែយ៉ាងល្អចូលទីផ្សារយើងយ៉ាងច្រើនក្នុងឆ្នាំ ២០២៥ នេះ។

ជាមួយនឹងក្តីបារម្ភនេះ លោក លីដា បានលើកទឹកចិត្តផលិតករខ្មែររួមគ្នាផលិតកុនធំៗមានស្តង់ដារអាចជ្រែតចូលទីផ្សារបរទេសបាន។ លោកសរសេរថា «សូមបងប្អូនផលិតករយើងរួមគ្នាដើម្បីផលិតកុនធំៗដែលមានស្តង់ដារត្រឹមត្រូវដែលអាចចូលទីផ្សារបរទេសបានត្រឹមត្រូវដោយមិនអៀនខ្មាសសូមជូនពរ ផលិតករខ្មែរទាំងអស់ទទួលបានជោយជ័យ»។

គួរបញ្ជាក់ផងដែរថា ផលិតកម្ម LD របស់លោក លៀក លីដា បានផលិតភាពយន្តខ្មែរជាច្រើនដោយបានចំណាយដើមទុនយ៉ាងច្រើនជាក់ស្តែងដូចជា «ប្រវត្តិស្នេហ៍នាងនាថ» ដែលមានតួឯកស្រី មាលា កូនខ្មែរកាត់បារាំងនិងតួឯកប្រុសមីយ៉ាន់ម៉ា បៃតាកន ដើម្បីអាចឱ្យភាពយន្តខ្មែរឈរនៅលើទីផ្សារក្រៅស្រុក៕

មានដៃគូរៀងខ្លួនតែរឿង Justin និង Selena នៅតែបង្កើតភាពចម្រូ.ងចម្រា.សក្នុងចំណោមអ្នកគាំទ្រ

Lee Ek

April 10, 2025

ទោះបីជាមានដៃគូជីវិតរៀងៗខ្លួនក្តីប៉ុន្តែភាពចម្រូងចម្រាសរវាង Justin Bieber និង Selena Gomez នៅតែបន្តកើតមានក្នុងចំណោមអ្នកគាំទ្រ ខណៈកាលពីប៉ុន្មានថ្ងៃមុននេះ រឿងរបស់ពួកគេបានកើតឡើងម្តងទៀតរហូតឈានដល់ការឈ្លោះប្រកែកគ្នា រវាងអ្នកគាំទ្រទាំងពីរ។

កាលពីថ្ងៃទី ២ ខែមេសា Justin Bieber បានបង្ហោះរូបតួអង្គពីខ្សែភាពយន្តមួយជាមួយនឹងអត្ថន័យថា «មនុស្សស្រីនៅលើប្រព័ន្ធផ្សព្វផ្សាយសង្គមនៅពេលពួកគេភ្ជាប់ពាក្យ»។ សកម្មភាពនេះត្រូវបានគេជឿថាជាការឌឺដងទៅកាន់ Selena Gomez ដែលបានភ្ជាប់ពាក្យជាមួយ Benny Blanco ។ មនុស្សជាច្រើនរិះគន់ Justin Bieber ថាចរិតនៅក្មេង រៀបការបាន៨ឆ្នាំហើយ ហើយក៏ក្លាយជាឪពុកដែរ ប៉ុន្តែនៅតែសើចចំអកឌឺដងទៅកាន់អតីតគូស្នេហ៍របស់ខ្លួន។

មិនយូរប៉ុន្មាន Benny Blanco បានបង្ហោះរូបភាពសត្វលាពីខ្សែភាពយន្តនៅលើ Instagram។ អ្នកនិយមលេងអ៊ីនធឺណិតគិតថានេះជាវិធីឆ្លើយតបរបស់ Benny ក្នុងនាម Selena ដែលបង្ហាញពីអត្ថន័យក្នុងសាច់រឿងថាជាមិត្តល្អប៉ុន្តែរំខានមិត្តភក្តិនៅពេលមិត្តភក្តិបានរៀបការជាមួយ Princess Fiona ។ ពាក្យ «លា» ជាភាសាអង់គ្លេសក៏ត្រូវបានគេប្រើដើម្បីសំដៅទៅលើមនុស្សឆោតល្ងង់ និងរំខាន។

សូម្បីតែឆាណែល Disney ក៏ត្រូវបានគេនិយាយថាកំពុង «ចូលរួមការប្រយុទ្ធ» ដើម្បីការពារ Selena របស់ពួកគេ។ ឆាណែលនេះស្រាប់តែបង្ហោះពីនាងនៅក្នុងរឿងមួយដែលនិយាយថា ខ្ញុំធុញទ្រាន់នឹងអាកប្បកិរិយារបស់ Justin ។ Justin នៅក្នុងការសន្ទនាគឺ Justin Russo ដែលជាតួអង្គបងប្រុសរបស់ Alex Russo ។ យ៉ាងណាមិញ អ្នកលេងអ៊ីនធឺណិតជឿថា នេះមិនមែនជារឿងចៃដន្យទេ។

រឿងរ៉ាវរកាំរកូសរវាង តារាចម្រៀង Justin Bieber និង Selena Gomez រួមទាំង Hailey ជាប្រពន្ធរបស់ Justin បង្កើតជារឿង Drama មិនចេះចប់ក្នុងចំណោមអ្នកគាំទ្ររបស់ពួកគេ បើទោះបីជា Selena និង Hailey ធ្លាប់ចូលរួមកម្មវិធីថតរូបជាមួយគ្នាក្តី ប៉ុន្តែភាពចម្រូងចម្រាសនៅតែកើតមាន។ ប៉ុន្មានឆ្នាំមកនេះ Hailey Bieber បានព្យាយាមដោះស្រាយពាក្យចចាមអារ៉ាមអំពីការបែកបាក់ស្វាមីរបស់នាងជាមួយនឹងអតីតគូស្នេហ៍ Selena ។ Hailey ក៏បានបដិសេធថាមិនមែនជាមនុស្សទី ៣ ដែលបានជ្រៀតជ្រែកក្នុងទំនាក់ទំនងរយៈពេល ៩ ឆ្នាំរបស់ Justin ជាមួយ Selena ឡើយ៕

សូម្បីមនុស្សជិតស្និទ្ធក៏លែងគាំទ្រ! Elon Musk ស្នើឱ្យ Trump លុបចោលការដំឡើងពន្ធទំនិញនាំចូល

Lee Ek

April 10, 2025

សហរដ្ឋអាមេរិក ៖ មហាសេដ្ឋីពិភពលោក និងជានាយកក្រុមហ៊ុន Tesla លោក Elon Musk ធ្លាប់បាននិយាយត្រង់ៗទៅកាន់ប្រធានាធិបតីអាមេរិក លោក Donald Trump កាលពីសប្តាហ៍ទី១ ខែមេសា ឆ្នាំ២០២៥ ឱ្យលុបចោលការដំឡើងពន្ធទំនិញពីបណ្តាប្រទេសដៃគូពាណិជ្ជកម្ម ប៉ុន្តែត្រូវបានប្រធានាធិបតីអាមេរិកបដិសេធ ហើយនៅតែប្រកាន់ជំហរដំឡើងពន្ធទំនិញនាំចូលពីក្រៅប្រទេស ។ នេះបើតាមការចុះផ្សាយរបស់កាសែត Washington Post ដែលទទួលបានព័ត៌មានពីមនុស្សជិតស្និទ្ធ ។

ប្រភពច្បាស់ការណ៍បន្តទៀតថា នេះជាគំនិតផ្ទុយគ្នាយ៉ាងខ្លាំងរវាងលោក Elon Musk និងលោក Trump ពាក់ព័ន្ធនឹងបញ្ហាការដំឡើងពន្ធទំនិញ ក្រោយពីលោក Trump ដាក់ពន្ធអប្បបរមាស្មើ១០% សម្រាប់ទំនិញគ្រប់ប្រភេទនាំចូលអាមេរិក ហើយមានប្រទេសជាច្រើនទៀតត្រូវបានអាមេរិកដំឡើងពន្ធទំនិញខ្ពស់ជាងគេ ។ ប៉ុន្តែមន្ត្រីសេតវិមាន និងលោក Elon Musk ពុំបានបកស្រាយអ្វីទេ ក្រោយការចុះផ្សាយព័ត៌មាននេះ ។

លោក Elon Musk បាននិយាយក្នុងកិច្ចប្រជុំ «The League Congress» ដែលរៀបចំឡើងដោយលោក Matteo Salvini នាយករដ្ឋមន្ត្រីអ៊ីតាលី កាលពីថ្ងៃទី៦ ខែមេសា កន្លងមកថា ៖ «ខ្ញុំសង្ឃឹមថា ភាគីទាំងអស់នឹងយល់ស្របទាំងអឺរ៉ុប និងអាមេរិក គួរអនុវត្តគោលនយោបាយពន្ធស្មើសូន្យ ។ បើអាចបង្កើតតំបន់ពាណិជ្ជកម្មសេរីរវាងអឺរ៉ុប និងអាមេរិកខាងជើង គឺពិតជាល្អណាស់សម្រាប់គំនិតខ្ញុំ ។ ខ្ញុំចង់ឱ្យមានការធ្វើដំណើរដោយសេរីរវាងអឺរ៉ុប និងអាមេរិកខាងជើង បើមនុស្សម្នាចង់មកធ្វើការនៅអឺរ៉ុប ឬអាមេរិក ពួកគេគួរតែធ្វើបាន ។ នេះជាការណែនាំ ដែលខ្ញុំចង់ប្រាប់ទៅលោកប្រធានាធិបតីអាមេរិក» ។

កាលពីថ្ងៃទី៧ ខែមេសា កន្លងមក លោល Peter Navarro ទីប្រឹក្សាពាណិជ្ជកម្មរបស់លោក Trump បានបដិសេធនឹងគំនិតរបស់លោក Elon Musk ដោយលោកប្រាប់ថា វាពុំចម្លែកទេ ដែលបានឮការស្នើបែបនេះពីម្ចាស់រោងចក្រដំឡើងរថយន្ត ។

ចំនួនការលក់រថយន្តអគ្គិសនី Tesla នៅត្រីមាសកន្លងមកបានធ្លាក់ចុះយ៉ាងខ្លាំង ដោយសារពលរដ្ឋអាមេរិកប្រឆាំងលោក Elon Musk ចូលទៅពាក់ព័ន្ធនឹងការងារក្នុងក្រសួងប្រសិទ្ធភាពរដ្ឋាភិបាល (DOGE) ហើយលោក Elon Musk បានស្នើឱ្យបញ្ឈប់មន្ត្រីរាជការ និងកាត់បន្ថយការចំណាយយ៉ាងច្រើនរបស់រដ្ឋាភិបាលអាមេរិក ។ លោក Elon Musk ក៏ធ្លាប់ទទួលស្គាល់ថា គោលនយោបាយដំឡើងពន្ធរថយន្តនាំចូលរបស់លោក Trump ធ្វើឱ្យប៉ះពាល់រថយន្ត Tesla យ៉ាងខ្លាំង ។

សេដ្ឋវិទូជាច្រើនដាស់តឿនថា ការដំឡើងពន្ធទំនិញនាំចូលនឹងឈានទៅវិបត្តិអតិផរណា, បង្កើនហានិភ័យសេដ្ឋកិច្ចអាមេរិក និងធ្វើឱ្យការចាយវាយរបស់ពលរដ្ឋអាមេរិកកើនឡើងរាប់ពាន់ដុល្លារ ។ វានឹងធ្វើឱ្យប្រជាប្រិយភាពលោក Trump ធ្លាក់ចុះ ដោយសារលោកធ្លាប់សន្យាពេលរកសំឡេងឆ្នោតថា នឹងជួយកាត់បន្ថយការចំណាយពលរដ្ឋ ៕

អ្នកណាខ្លះហ្វេនរបស់ iPhone! ក្រោយការដំឡើងពន្ធរបស់ Trump ទូរស័ព្ទ iPhone នេះឡើងថ្លៃជិត៣០% នៅអាមេរិក

Lee Ek

April 10, 2025

សហរដ្ឋអាមេរិក ៖ ពលរដ្ឋអាមេរិកនឹងទិញទូរស័ព្ទ iPhone 16 Pro Max ថ្លៃជាងប្រទេសផ្សេងៗរាប់រយដុល្លារ ដោយសារទូរស័ព្ទនេះនឹងឡើងថ្លៃជិត៣០% ក្រោយពីប្រធានាធិបតីអាមេរិក លោក Donald Trump ដំឡើងពន្ធទំនិញនាំចូលពីក្រៅប្រទេស ជាពិសេស ទំនិញចិន ។ អ្នកវិភាគនានាបានលើកឡើងពីផលប៉ះពាល់អាចកើតឡើង ប្រសិនបើអាមេរិកដំឡើងពន្ធទំនិញនាំចូលប្រភេទអេឡិចត្រូនិក ជាពិសេស ទូរស័ព្ទ iPhone ។

តាមការចុះផ្សាយរបស់ The Wall Street Journal បញ្ជាក់ថា ការចំណាយដើមទុនសម្រាប់ឧបករណ៍របស់ទូរស័ព្ទ iPhone 16 Pro ទំហំ 256GB អាចកើនឡើងរហូតដល់៣០០ដុល្លារ ហើយវានឹងធ្វើឱ្យតម្លៃលក់រាយទូរស័ព្ទ iPhone 16 Pro Max កើនឡើងខ្ពស់គួរឱ្យភ្ញាក់ផ្អើលសម្រាប់ពលរដ្ឋអាមេរិក ។

បច្ចុប្បន្ន តម្លៃទូរស័ព្ទ iPhone 16 Pro Max នៅអាមេរិក ស្មើ១,៦០០ដុល្លារ ប៉ុន្តែបើក្រុមហ៊ុន Apple នៅតែផលិតទូរស័ព្ទក្នុងប្រទេសចិន គឺក្រុមហ៊ុននេះនឹងប្រឈមជាមួយអត្រាពន្ធ ស្មើ៥៤% ។ វានឹងធ្វើឱ្យតម្លៃលក់រាយទូរស័ព្ទ iPhone 16 Pro Max កើនឡើងជិត៣០% គឺស្មើ២,០៦២ដុល្លារ ។ អ្វីគួរឱ្យភ្ញាក់ផ្អើល ទូរស័ព្ទនេះនឹងឡើងថ្លៃកាន់តែខ្ពស់ បើលោក Trump ដំឡើងពន្ធទំនិញចិន រហូតដល់១០៤% ។

ក្រុមហ៊ុន Apple ពុំបានផលិតទូរស័ព្ទនៅប្រទេសចិនតែមួយទេ ប៉ុន្តែ Apple ក៏បានផលិតទូរស័ព្ទនៅឥណ្ឌា ផងដែរ ។ ហេតុនេះ បើទូរស័ព្ទ iPhone នាំចូលពីឥណ្ឌាមកកាន់អាមេរិក គឺត្រូវប្រឈមនឹងអត្រាពន្ធ ២៦% ។

ចំណែកទូរស័ព្ទ iPhone 16 Pro ទំហំ 128GB ដែលមានតម្លៃចាប់ពី១,០០០ដុល្លារ អាចឡើងថ្លៃរហូតដល់១,១២០ដុល្លារ កើនឡើង១២% ។ ក្រៅពីនេះ នាឡិកាដៃម៉ាក Apple Watch Ultra 2 ផលិតនៅវៀតណាម ដែលអាមេរិកបានដំឡើងពន្ធ ៤៦% គឺតម្លៃនឹងកើនឡើង១៩% គឺពី៨០០ដុល្លារ ឡើងដល់៩៥០ដុល្លារ ។ ប៉ុន្តែវាអាស្រ័យលើ Apple ជាអ្នកជ្រើសរើសថា តើពួកគេនឹងដំឡើងថ្លៃទំនិញសម្រាប់អតិថិជន ឬសុខចិត្តកាត់បន្ថយប្រាក់ចំណេញរបស់ខ្លួន?

ក្រៅពីនេះ ឧបករណ៍ Server AI ផលិតនៅតៃវ៉ាន់ នឹងឡើងថ្លៃ ២៧% ។ ទោះជាអតិថិជនពុំបានទិញ Server AI ដោយផ្ទាល់ក្តី ប៉ុន្តែវាជាឧបករណ៍សំខាន់ ដែល Apple ប្រើប្រាស់សម្រាប់ជំរុញមុខងារ AI ថ្មីៗនៅលើ iPhone, Mac និងឧបករណ៍ផ្សេងៗ នាថ្ងៃអនាគត ។ ហេតុនេះ ការដំឡើងពន្ធទំនិញរបស់លោក Trump នឹងធ្វើឱ្យប៉ះពាល់ដល់តម្លៃទូរស័ព្ទ iPhone និងឧបករណ៍បច្ចេកវិទ្យាយ៉ាងខ្លាំង ៕

Trump ជឿជាក់ថា ក្រុមហ៊ុន Apple អាចផ្លាស់ប្តូរទីតាំងផលិតទូរស័ព្ទ iPhone មកអាមេរិក

Lee Ek

April 10, 2025

សហរដ្ឋអាមេរិក ៖ ប្រធានាធិបតីអាមេរិក លោក Donald Trump ជឿជាក់ថា ក្រុមហ៊ុន Apple អាចផ្លាស់ប្តូរទីតាំងផលិតទូរស័ព្ទ iPhone ពីក្រៅប្រទេសមកអាមេរិកបាន ពីព្រោះនៅអាមេរិកមានកម្លាំងពលកម្ម និងធនធានលើសលប់ ប៉ុន្តែនាយកក្រុមហ៊ុន Apple លោក Tim Cook ធ្លាប់បានបដិសេធនាពេលកន្លងមកថា វាពុំអាចទៅរួចទេ ដែលឱ្យក្រុមហ៊ុន Apple ផលិតទូរស័ព្ទ iPhone នៅអាមេរិក ។

មុនពេលកំណត់អត្រាពន្ធថ្មីលើទំនិញនាំចូលពីក្រៅប្រទេសរបស់លោក Trump ចាប់អនុវត្តពីថ្ងៃទី៩ ខែមេសា ឆ្នាំ២០២៥ មន្ត្រីនាំពាក្យសេតវិមាន លោកស្រី Karoline Leavitt បញ្ជាក់ថា ក្រុមហ៊ុន Apple អាចផ្លាស់ប្តូរទីតាំងផលិតទូរស័ព្ទ iPhone មកកាន់អាមេរិកបាន ពីព្រោះ Apple មានគម្រោងវិនិយោគនៅអាមេរិកស្រាប់ហើយ ស្មើទឹកប្រាក់៥សែនលានដុល្លារ ។

លោក Trump ជឿជាក់លើកម្លាំងពលកម្ម និងធនធានគ្រប់គ្រាន់នៅអាមេរិក ហើយបើ Apple ពុំអាចសាងសង់រោងចក្រផលិតទូរស័ព្ទ iPhone នៅអាមេរិក មិនមែន Apple មានគម្រោងវិនិយោគនៅអាមេរិក ស្មើទឹកប្រាក់៥សែនលានដុល្លារទេ ។ ការវិនិយោគរបស់ Apple គឺជាការផ្លាស់ប្តូរដ៏ធំនៅអាមេរិក ។ នេះបើតាមការលើកឡើងរបស់លោកស្រី Karoline Leavitt ក្នុងសន្និសីទសារព័ត៌មាន ។

ប៉ុន្តែបើតាមអ្នកវិភាគជាច្រើន គឺគម្រោងវិនិយោគនៅអាមេរិក ជាអ្វីដែល Apple តាំងចិត្តធ្វើស្រាប់ហើយ វាពុំមែនជាការវិនិយោគថ្មី ដើម្បីឆ្លើយតបនឹងគោលនយោបាយពន្ធទេ ។ ជាមួយគ្នានេះ បញ្ហាផលិតឧបករណ៍ ឬទំនិញនៅអាមេរិក ពុំមែនជារឿងថ្មី ពីព្រោះនាយក Apple លោក Tim Cook និងអតីតនាយក Apple លោក Steve Jobs ធ្លាប់និយាយយ៉ាងច្បាស់ថា រោងចក្រអាមេរិកពុំអំណោយផលដល់ការផលិតឧបករណ៍ ។

ក្នុងសៀវភៅជីវប្រវត្តិរបស់លោក Steve Jobs ដែលសរសេរដោយអ្នកនិពន្ធឈ្មោះ Walter Isaacson បានរៀបរាប់ពីការសន្ទនារបស់លោក Steve Jobs ជាមួយអតីតប្រធានាធិបតីអាមេរិក លោក Barack Obama ចាប់ពីឆ្នាំ២០១០ ដល់ឆ្នាំ២០១១ ដោយលោក Steve Jobs និយាយថា Apple ត្រូវការកម្លាំងពលកម្មមានជំនាញ រហូតដល់៣ម៉ឺននាក់ និងកម្លាំងពលកម្មក្នុងរោងចក្រ ចំនួន៧សែននាក់ទៀត ប៉ុន្តែ Apple ពុំអាចរកកម្លាំងពលកម្មតាមចំនួននេះនៅអាមេរិកទេពេលនោះ ។

ចំណែកលោក Tim Cook ក៏ធ្លាប់និយាយពីបញ្ហានេះក្នុងការប្រជុំរបស់ទស្សនាវដ្តី Fortune កាលពីឆ្នាំ២០១៧ ថា មូលហេតុដែល Apple ផលិតទូរស័ព្ទនៅចិន មិនមែនមកពីកម្លាំងពលកម្មថោកទេ ប៉ុន្តែដោយសារចិនសម្បូរកម្លាំងពលកម្មជំនាញ និងមានកម្លាំងពលកម្មច្រើន ដែលអាមេរិកពុំអាចប្រៀបធៀបបាន ដូចជា ៖ ចិនសម្បូរអ្នកជំនាញបង្កើតម៉ាស៊ីនពុម្ព (Tooling) ដែលចាំបាច់សម្រាប់ការផលិតឧបករណ៍ ។ រីឯនៅអាមេរិកមានអ្នកជំនាញដែរ ប៉ុន្តែមិនច្រើន ៕

ជប៉ុន និងកូរ៉េ បង្ហាញភាពតានតឹងដាក់គ្នា ក្រោយចែកកោះមួយមិនដាច់

Lee Ek

April 9, 2025

រដ្ឋាភិបាលកូរ៉េខាងត្បូង បានសម្តែងការខឹងជាខ្លាំង ក្រោពីជប៉ុនបានបោះពុម្ពផ្សាយគោលនយោបាយការទូតប្រចាំឆ្នាំរបស់ខ្លួន ដែលអះអាងថាប្រជុំកោះ Dokdo គឺជាផ្នែកមួយនៃប្រទេសជប៉ុន។

ទីប្រជុំកោះ Liancourt Rocks ត្រូវកូរ៉េខាងត្បូងហៅថា Dokdo រីឯជប៉ុនហៅថា Takeshima បានក្លាយជាតំបន់តានតឹងរវាងប្រទេសទាំងពីរ ដោយអស់រយៈពេលរាប់ឆ្នាំហើយ នៅតែមិនអាចបែងចែកដាច់។

បើតាមប្រវត្តិសាស្ត្រ កូរ៉េខាងត្បូង បានគ្រប់គ្រងទីប្រជុំនេះ ចាប់ពីឆ្នាំ១៩៤៥មក គឺនៅពេលអាណានិគមជប៉ុន នៅឧបទ្វីបកូរ៉េដួលរលំ តែត្រូវបានជប៉ុនទាមទារថាវាជារបស់ខ្លួន និងបានចោទកូរ៉េខាងត្បូងដណ្តើមយកទៅដោយខុសច្បាប់។

ជប៉ុន ធ្លាប់បានប្តឹងឡើងទៅតុលាការអន្តរជាតិចំនួន៤ដង ក៏ប៉ុន្តែកូរ៉េខាងត្បូងមិនព្រមចូលខ្លួន ហេតុដូច្នេះតុលាការអន្តរជាតិ មិនមានសិទ្ធសម្រេចសេចក្តីនោះទេ។

បើក្រឡេកមកមើលពីទីតាំងភូមិសាស្ត្រ កោះនេះ ស្ថិតនៅចម្ងាយប្រមាណជា២១១គីឡូម៉ែត្រពីដែនទឹកជប៉ុន ធៀបនឹងកូរ៉េខាងត្បូងមានចម្ងាយដល់ទៅ២១៦គីឡូម៉ែត្រ។

គួរបញ្ជាក់ថា បច្ចុប្បន្នជប៉ុន មានជម្លោះដែនកោះជាមួយរុស្ស៊ី ចំនួន៤កោះ កូរ៉េ២កោះ និងចិនមួយកោះ ដែលមកទល់បច្ចុប្បន្នមិនទាន់ចែកដាច់៕

1...556557558...2,028 Page 557 of 2,028

Khmer Breaking News

វប្បធម៌ប្រមូលផលផ្ដា.ច់ពូជ! ដើមសំរ៉ង អាចនឹងផុតពូជឆាប់ៗ បើសកម្មភាពនេះនៅតែបន្ត

ផ្អាករឿងពន្ធកម្ពុជា និងប្រទេសផ្សេងៗ90ថ្ងៃសិន! ប៉ុន្តែសម្រាប់ចិន Trumpបែរជាតម្លើងដល់ ១២៥% ទៅវិញ

បទ «ស្រណោះ» របស់ វណ្ណដា កំពុងល្បីកក្រើកនៅថៃខណៈតារាល្បីៗនាំគ្នាលេងព្រាត

រំភើបចិត្តណាស់! ម្ចាស់គណនី Travel with Chris ថាប្រទេសកម្ពុជាគឺអស្ចារ្យកុំយល់ច្រឡំនិងគិតអវិជ្ជមាន

ទោះកំពុងជោគជ័យភាពយន្តនេះក្តីតែលោក លៀក លីដា នៅមានក្តីបារម្ភចំពោះលំហូររឿងបរទេស

មានដៃគូរៀងខ្លួនតែរឿង Justin និង Selena នៅតែបង្កើតភាពចម្រូ.ងចម្រា.សក្នុងចំណោមអ្នកគាំទ្រ

សូម្បីមនុស្សជិតស្និទ្ធក៏លែងគាំទ្រ! Elon Musk ស្នើឱ្យ Trump លុបចោលការដំឡើងពន្ធទំនិញនាំចូល

អ្នកណាខ្លះហ្វេនរបស់ iPhone! ក្រោយការដំឡើងពន្ធរបស់ Trump ទូរស័ព្ទ iPhone នេះឡើងថ្លៃជិត៣០% នៅអាមេរិក

Trump ជឿជាក់ថា ក្រុមហ៊ុន Apple អាចផ្លាស់ប្តូរទីតាំងផលិតទូរស័ព្ទ iPhone មកអាមេរិក

ជប៉ុន និងកូរ៉េ បង្ហាញភាពតានតឹងដាក់គ្នា ក្រោយចែកកោះមួយមិនដាច់

EVEN MORE NEWS

Shin Hyun Bin ដើរដួលលើកម្រាលព្រំក្រហមក្នុងកម្មវិធីប្រគល់ពានរង្វាន់ដ៏ធំ

POPULAR CATEGORY