តារារ៉េប King Chi ប្រកាសលក់ផ្ទះបន្ទាន់តម្លៃក្រោមទីផ្សារដើម្បីយកលុយព្យាបាលភរិយាវះ.កាត់ប្តូរក្រលៀន

តារាចម្រៀងរ៉េប King Chi បានប្រកាសលក់ផ្ទះនៅខេត្តបាត់ដំបងជាបន្ទាន់តម្លៃនៅក្រោមទីផ្សារ។ តារាចម្រៀងរូបនេះបានបញ្ជាក់ថាលោកត្រូវការលុយវះកាត់ប្តូរក្រលៀនឱ្យភរិយារបស់លោកដែលកំពុងសម្រាកព្យាបាលនៅមន្ទីរពេទ្យ។ អ្វីដែលអត់សរសើរមិនបានចំពោះតារារ៉េបរូបនេះគឺលោកបានពោលថាលោកនឹងប្រើគ្រប់វិធីរកលុយមកព្យាបាលឱ្យប្រពន្ធខ្លួន។

នៅថ្ងៃទី៦ ឧសភា តារារ៉េប King Chi បានបង្ហោះនៅលើគណនីហ្វេកប៊ុកផ្ទាល់ខ្លួនមានឈ្មោះថា Daddyy Chi ដោយប្រកាសលក់ផ្ទះបន្ទាន់តម្លៃក្រោមទីផ្សារ ដែលមានទីតាំងនៅបុរីត្នោតជួរ អន្លង់វិលបាត់ដំបង។ ក្នុងការប្រកាសដំណឹងនេះម្ចាស់បទ «៥ដុល្លារ» បានបញ្ជាក់យ៉ាងច្បាស់លាស់ថាត្រូវការលុយវះកាត់ប្តូរក្រលៀនឱ្យភរិយារបស់ខ្លួន។ បើតាមការបង្ហោះរបស់ភរិយាតារារ៉េបរូបនេះគឺបានចូលសម្រាកព្យាបាលនៅមន្ទីរពេទ្យកាលពីថ្ងៃទី៤ ឧសភា ។

នៅថ្ងៃទី៥ ឧសភា King Chi បានបញ្ជាក់យ៉ាងម៉ឺងម៉ាត់ថាលោកនឹងរកគ្រប់វិធីដើម្បីបានលុយមកព្យាបាលប្រពន្ធរបស់ខ្លួន។ លោកបានសរសេរថា «សូមព្រះប្រទានពរអូនឆាប់បានធូរស្បើយណាប្រពន្ធសម្លាញ់បងនឹងប្រើគ្រប់វិធីរកលុយដើម្បីឱ្យអូនបានវះកាត់ប្តូរក្រលៀន»។

គួរបញ្ជាក់ផងដែរថាចុងក្រោយនេះតារារ៉េប King Chi រួមទាំង ហ្សេដេស បានធ្វើឱ្យទស្សនិកជនមានការកោតសរសើរទៅកាន់អ្នកទាំងពីរដែលបានចូលរួមក្នុងអំពើសប្បុរសធម៌ដែលបានមកពីការរៀបចំកម្មវិធីសង្រ្កាន្តចំនួន ២០លានរៀលជូនដល់មូលនិធិមន្ទីពេទ្យគន្ធបុប្ផាកម្ពុជា។

ក្នុងអាជីពជាតារាចម្រៀងរ៉េប King Chi បានធ្វើឱ្យទស្សនិកជនមានការកោតសរសើរដែលតារារ៉េបរូបនេះផលិតចម្រៀងរ៉េបបែបលក្ខណៈអប់រំនៅក្នុងសង្គមជាពិសេសគឺពាក្យពេចន៍ជួនរបស់លោក។ មិនត្រឹមតែប៉ុណ្ណោះតារារ៉េបរូបនេះក៏បានក្តោបឱកាសធ្វើជាគ្រូបង្វឹកការប្រកួតចម្រៀងរ៉េបផងដែរ៕