ប្រទេសថៃ ៖ អ្នកគ្រប់គ្រងអគារ Baiyoke Sky Hotel បានប្រកាសទៅកាន់សាធារណជនថា អគារនេះគ្មានស្នាមប្រេះ ឬផ្អៀង ដោយសារគ្រោះរញ្ជួយដីនៅទីក្រុងបាងកក កាលពីរសៀលថ្ងៃទី២៨ ខែមីនា ឆ្នាំ២០២៥ ទេ ពីព្រោះអគារនេះត្រូវបានបានសាងសង់ឡើងដើម្បីទប់ទល់នឹងការរញ្ជួយដីកម្រិតខ្លាំងបំផុត បើធៀបនឹងអគារផ្សេងៗ ។ ការប្រកាសបែបនេះក្រោយពីមានការចែកចាយរូបភាពអគារ Baiyoke Sky Hotel ក្នុងបណ្តាញសង្គមថា មានស្នាមប្រេះក្រោយរញ្ជួយដី ។

កាលពីរសៀលថ្ងៃទី២៨ ខែមីនា កន្លងមក មានគ្រោះរញ្ជួយដីកម្រិត៧.៧រិចទ័រ កើតឡើងនៅកណ្តាលប្រទេសមីយ៉ាន់ម៉ា និងបណ្តាលឱ្យកម្លាំងរំញ័រមានឥទ្ធិពលមកដល់តំបន់ភាគខាងជើង ភាគកណ្តាលប្រទេសថៃ រួមទាំងទីក្រុងបាងកក ។ ហេតុការណ៍នេះធ្វើឱ្យអគារនានាក្នុងទីក្រុងបាងកក បាក់រំលំជាបន្តបន្ទាប់ ដូចជា ៖ អគារកំពុងសាងសង់ក្នុងតំបន់ចាក់តុចាក់ ជាដើម ។ ក្រោយមក ក្នុងបណ្តាញសង្គមមានការបង្ហោះរូបភាពអគារ Baiyoke Sky Hotel មានស្នាមប្រេះ និងផ្អៀងអគារ ក្រោយកើតរញ្ជួយដី ។

ក្រោយមានការចែកចាយរូបភាពអគារ Baiyoke Sky Hotel មានស្នាមប្រេះ អ្នកគ្រប់គ្រងសណ្ឋាគារនេះបានសរសេរក្នុងហ្វេសប៊ុកផេកឈ្មោះ «Beerbaiyoke» ថា ៖ មនុស្សភាគច្រើនអាចរង់ចាំការបង្ហោះរបស់យើង ការបង្ហោះយឺតយ៉ាវ ដោយសារយើងជាប់រវល់ជាមួយភ្ញៀវ និងពិនិត្យសណ្តាប់ធ្នាប់ជាមួយវិស្វករក្នុងអគារ ។ មានការផ្ញើសារជាច្រើនមកយើង សូមអរគុណចំពោះការបារម្ភ នេះពុំមែនជារញ្ជួយដីលើកទី១ ទេ ។ យើងមានជំនាញលើការផ្តល់សុវត្ថិភាព និងទទួលខុសត្រូវភ្ញៀវ ។

យើងទទួលដំណឹងថា អគារ Baiyoke Sky Hotel មានស្នាមប្រេះ និងផ្អៀង គឺពុំមែនជាការពិតទេ វាគ្រាន់តែរបកថ្នាំប៉ុណ្ណោះ កន្លងមក ក៏របកថ្នាំដែរ ។ អគារនេះមានបិទស្លាកផ្សព្វផ្សាយពាណិជ្ជកម្ម ពេលខ្លះ វារបកថ្នាំ ប៉ុន្តែយើងនឹងរៀបចំឱ្យស្អាតឡើងវិញ ។ រីឯអគារផ្សេងៗនៅក្បែរនេះពុំខូចខាតទេ យើងពុំបារម្ភឡើយ ពីព្រោះយើងមានទំនុកចិត្ត ប៉ុន្តែយើងបារម្ភពីអារម្មណ៍ភ្ញៀវមកស្នាក់នៅ ។ អគារត្រូវបានសាងសង់ឡើងដើម្បីទប់ទល់នឹងការរញ្ជួយដីខ្លាំងបំផុត បើធៀបនឹងអគារផ្សេង ។ Baiyoke Sky Hotel នៅតែជាអគារមានកម្ពស់ខ្ពស់បំផុតនៅទីក្រុងបាងកក ។

ខាងសណ្ឋាគារបានត្រួតពិនិត្យរួចហើយ គ្មានអ្វីខូចខាតសូម្បីតែបន្តិច ។ រីឯនៅចំណុចងាយរងផលប៉ះពាល់ដោយសាររញ្ជួយដី គឺកញ្ចក់របស់សណ្ឋាគារ ហើយបើតាមការពិនិត្យឃើញថា គ្មានស្នាមប្រេះកញ្ចក់ទេ ។ អ្នកសាងសង់សណ្ឋាគារបានសាងសង់ឱ្យវាអាចទប់ទល់នឹងគ្រោះរញ្ជូយដីខ្លាំងជាងអគារផ្សេងៗ ដើម្បីបង្ការការខូចខាច ឬបាក់រលំអគារ ។ នេះបើតាមការលើកឡើងរបស់អ្នកគ្រប់គ្រងអគារ Baiyoke Sky Hotel ៕

ប្រទេសថៃ ៖ ក្រោយពីទីក្រុងបាងកក កើតគ្រោះរញ្ជួយដីធ្ងន់ធ្ងរកាលពីរសៀលថ្ងៃទី២៨ ខែមីនា ឆ្នាំ២០២៥ ដោយសារទទួលកម្លាំងរំញ័រពីរញ្ជួយដីនៅទីក្រុង Mandalay ប្រទេសមីយ៉ាន់ម៉ា ដែលធ្វើឱ្យអគារកំពុងសាងសង់ជាច្រើនកន្លែងនៅទីក្រុងបាងកក បាក់រលំជាបន្តបន្ទាប់ ដូចជា ៖ អគារនៅតំបន់ចាក់តុចាក់ បានធ្វើឱ្យពលរដ្ឋថៃចែកចាយការទស្សន៍ទាយពីគ្រោះរញ្ជួយដីនៅថៃរបស់គ្រូទាយដ៏ល្បីល្បាញម្នាក់ក្នុងបណ្តាញសង្គម ។ ការទស្សន៍ទាយនេះ គឺតាំងពីខែធ្នូ ឆ្នាំ២០២៤ គឺត្រឹមត្រូវ១០០% ស្តាប់ហើយគួរឱ្យព្រឺសម្បុរខ្លាំងណាស់ ។

ពលរដ្ឋថៃនៅតែតក់ស្លុតចំពោះហេតុការណ៍រញ្ជួយដី កាលពីរសៀលថ្ងៃទី២៨ ខែមីនា កន្លងមក ដែលមានចំណុចកណ្តាលនៅប្រទេសមីយ៉ាន់ម៉ា និងមានកម្លាំងរំញ័រឆ្ងាយមកដល់ទីក្រុងបាងកក និងបណ្តាខេត្តមួយចំនួនរបស់ថៃ ។ ក្រោយរញ្ជួយដី អ្នកលេងបណ្តាញសង្គមថៃបានចែកចាយការទស្សន៍ទាយពីគ្រោះរញ្ជួយដីនៅថៃរបស់អ្នកស្រី ប្រាយ ក្រាស៊ិប ដោយសារការទាយរបស់អ្នកស្រីពីហេតុការណ៍កើតឡើង គឺត្រឹមត្រូវគ្មានខុស ។

អ្នកស្រី ប្រាយ ក្រាស៊ិប ធ្លាប់បានទស្សន៍ទាយពីគ្រោះរញ្ជួយដីក្នុងយូធូប (YouTube) ថា ក្នុងចន្លោះចាប់ពីខែមករា ដល់ខែមិថុនា ឆ្នាំ២០២៥ គឺនឹងមានគ្រោះរញ្ជួយដីខ្លាំងក្លាកើតឡើងនៅប្រទេសមីយ៉ាន់ម៉ា ហេតុនេះ ខេត្តរបស់ថៃដែលនៅជាប់ព្រំដែនមីយ៉ាន់ម៉ា សូមត្រៀមខ្លួន ។ រីឯទីក្រុងបាងកក នឹងមានកម្លាំងរំញ័រខ្លាំង ដោយសាររញ្ជួយដីនៅមីយ៉ាន់ម៉ា ។ លោកស្រីបានមើលឃើញហេតុការណ៍បម្រុងនឹងកើតឡើងយូរមកហើយ គ្រាន់តែអ្នកស្រីពុំហ៊ាននិយាយ ។

អ្នកស្រី ប្រាយ ក្រាស៊ិប បានដឹងពីហេតុការណ៍រញ្ជួយដីនៅប្រទេសថៃ តាំងពី២ខែ ទៅ៣ខែមុនមកម៉្លេះ ហើយអ្នកស្រីលើកយកមកនិយាយ ដើម្បីចង់ឱ្យមានការការពារគ្រោះថ្នាក់យ៉ាងល្អបំផុត ។ អ្នកស្រីចង់ឱ្យពលរដ្ឋថៃទុកដាក់ប្រាក់កាសនៅកន្លែងខ្ពស់ ឬដាក់ក្នុងធនាគារ ពីព្រោះមិនចង់ឱ្យប្រាក់ពលរដ្ឋអណ្តែតតាមទឹក អ្នកស្រីពុំចង់ឃើញវាខូចខាត ។ អ្នកស្រីទាយថា គ្រោះរញ្ជួយដីក្នុងប្រទេសថៃ នឹងកើតឡើងនៅពាក់កណ្តាលឆ្នាំ២០២៥ គឺនៅខែមីនា ឬខែមេសា ។

គួរបញ្ជាក់ថា លោកស្រីបានទស្សន៍ទាយពីគ្រោះរញ្ជួយដីធ្ងន់ធ្ងរកើតឡើងនៅថៃ កាលពីថ្ងៃទី២៧ ខែធ្នូ ឆ្នាំ២០២៤ ហើយអ្នកស្រីសូមកុំឱ្យវាកើតឡើងពិតប្រាកដ ពីព្រោះពុំចង់ឃើញពលរដ្ឋថៃបាត់បង់ទ្រព្យសម្បត្តិដោយសាររញ្ជួយដី ។ ក្រោយពីអ្នកស្រីបានទស្សន៍ទាយបែបនេះ ស្រាប់តែប្រទេសថៃកើតរញ្ជួយដីពិតមែន ហើយទីក្រុងបាងកក រងគ្រោះធ្ងន់ធ្ងរជាងគេ ។ ពលរដ្ឋនៅបាងកក ពុំបានត្រៀមខ្លួនមុនទេ ហេតុការណ៍នេះកើតឡើងឆាប់រហ័សខ្លាំងពេកធ្វើឱ្យចលាចល និងស្ទះចរាចរណ៍ ។

នេះគ្រាន់តែជាការទស្សន៍ទាយប៉ុណ្ណោះ ហើយការជឿ ឬមិនជឿ គឺជាជំនឿរបស់បុគ្គលម្នាក់ៗ ។ ប៉ុន្តែសម្រាប់ពលរដ្ឋថៃភាគច្រើនមានជំនឿលើការទស្សន៍ទាយរបស់អ្នកស្រី ប្រាយ ក្រាស៊ិប ពីព្រោះអ្នកស្រីធ្លាប់បានទាយពីហេតុការណ៍កើតឡើងជាច្រើនទៀត ឃើញថា ការទាយរបស់អ្នកស្រីត្រឹមត្រូវស្ទើរទាំងអស់ ៕

ប្រទេសជប៉ុន ៖ កាលពីថ្ងៃទី២៧ ខែមីនា ឆ្នាំ២០២៥ សារព័ត៌មានបរទេសរាយការណ៍ថា ក្រុមហ៊ុន Fukuyama Transporting នៅខេត្តហ៊ិរ៉ូស៊ីម៉ា ប្រទេសជប៉ុន បានចាប់ផ្តើមបណ្តុះបណ្តាល និងបង្រៀនភាសាជប៉ុនដល់បេក្ខជនដាក់ពាក្យធ្វើការជាអ្នកបើកបររថយន្តដឹកទំនិញនៅវៀតណាម ព្រមទាំងឱ្យបេក្ខជនសាកល្បងបើកបររថយន្តដឹកទំនិញ ។ ក្រុមហ៊ុននេះមានគោលដៅជួលបុគ្គលិកបរទេសចំនួន១៥នាក់ សម្រាប់បើកបររថយន្តដឹកទំនិញនៅជប៉ុន នារដូវក្តៅ ឆ្នាំ២០២៦ ។

ក្រុមហ៊ុនដឹកជញ្ជូននៅជប៉ុនចាប់ផ្តើមទទួលយកជនបរទេសមកធ្វើការជាអ្នកបើកបររថយន្តដឹកទំនិញកាន់តែច្រើន ហើយជនបរទេសដែលធ្វើការជាអ្នកបើករថយន្តដឹកទំនិញអាចស្នើសុំទិដ្ឋាការពិសេស ស្របពេលជប៉ុនខ្វះខាតកម្លាំងពលកម្មយ៉ាងខ្លាំង ។ ការដាក់ពាក្យសុំទិដ្ឋាការពិសេសក្នុងឧស្សាហកម្មដឹកទំនិញនៅជប៉ុន គឺបេក្ខជនត្រូវឆ្លងកាត់ការសាកល្បងពាក់ព័ន្ធនឹងចរាចរណ៍របស់ជប៉ុន និងវិធីផ្ទុកទំនិញ ដែលជប៉ុនបានធ្វើការប្រឡងលើកដំបូងនៅខែធ្នូ ឆ្នាំ២០២៤ និងធ្វើការសាកល្បងសមត្ថភាពបេក្ខជនជាង២០០នាក់ ។ នេះបើតាមសេចក្តីរាយការណ៍របស់ Nikkei Asia ។

ចំណែកក្រុមហ៊ុន Sakai Moving Service នៅទីក្រុងអូសាកា បានចាប់ផ្តើមស្វែងរកបុគ្គលិកបរទេស តាមរយៈក្រុមហ៊ុនស្វែងរកការងារនៅឥណ្ឌូណេស៊ី ។ ក្រោយការសម្ភាសន៍ និងវាយតម្លៃបេក្ខជន ក្រុមហ៊ុនមានគម្រោងជួលបុគ្គលិកបរទេស ចាប់ពីអាយុ២០ឆ្នាំ ទៅ៤០ឆ្នាំ ស្មើជាង១០នាក់ ដើម្បីធ្វើការផ្នែកបើកបររថយន្ត ។ ពេលបេក្ខជនធ្វើដំណើរមកដល់ជប៉ុន ក្រុមហ៊ុននឹងបង្រៀនភាសាជប៉ុន ព្រមទាំងជួយផ្លាស់ប្តូរប័ណ្ណបើកបរដើម្បីឱ្យមានសិទ្ធិបើកបរនៅជប៉ុន ហើយក្រុមហ៊ុនរំពឹងថា បុគ្គលិកបរទេសនឹងចាប់ធ្វើការជាអ្នកបើកបររថយន្ត នៅខែមីនា ឆ្នាំ២០២៦ ដែលជាអំឡុងពេលមានការដឹកជញ្ជូនទំនិញច្រើនបំផុត ។

ដូចគ្នានេះ ក្រុមហ៊ុន Senko Group Holdings បានកំណត់គោលដៅជួលបុគ្គលិកបើករថយន្តដឹកទំនិញឱ្យបាន១០០នាក់ ស្ថិតក្រោមគម្រោងទិដ្ឋាការពិសេស ។ ក្រុមហ៊ុននេះនឹងរត់ការស្នើសុំប័ណ្ណបើកបរ និងបង្រៀនភាសាជប៉ុនដល់បុគ្គលិកបរទេស ។

មន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ឱ្យដឹងថា បុគ្គលិកបើកបររថយន្តដឹកទំនិញធ្វើការច្រើនជាងបុគ្គលិកទូទៅ ប្រមាណ២០% ក្នុង១ឆ្នាំ ប៉ុន្តែពួកគេទទួលបានប្រាក់ចំណូលប្រចាំឆ្នាំ តិចជាងបុគ្គលិកទូទៅ ប្រមាណ១០% ។

គួរបញ្ជាក់ថា ក្រុមហ៊ុនដឹកជញ្ជូនជប៉ុនជាច្រើនបានជួលបុគ្គលិកបរទេសមកធ្វើការជាអ្នកបើកបររថយន្ត ដោយសារនៅជប៉ុនខ្វះខាតកម្លាំងពលកម្មយ៉ាងខ្លាំង ជាពិសេស បុគ្គលិកថែទាំមនុស្សចាស់ ។ ជប៉ុនរំពឹងថា នឹងអាចជួលជនបរទេសមកធ្វើការរហូតដល់២៤,៥០០នាក់ ចាប់ពីឆ្នាំ២០២៤ ដល់ឆ្នាំ២០២៨ ៕

នាវាសម្រាប់ជិះមុជទឹកកម្សាន្តមួយគ្រឿងត្រូវបានលិច ខណៈកំពុងដឹកភ្ញៀវទេសចរមើលទេសភាពក្រោមបាតសមុទ្រ ដែលបណ្ដាលបា..ត់ខ្លួនអ្នកដំណើរទាំងនោះ និងក្រោយមកបានរកឃើញសា..កស..ពមនុស្សចំនួន ៦នាក់ នៅចំណុចសមុទ្រមរ..ណៈ (Red Sea) ប្រទេសអេហ្ស៊ីប កាលពីថ្ងៃទី ២៧ ខែមីនា ឆ្នាំ២០២៥។

តាមប្រភព BBC បានអោយដឹងថា នាវាមួយគ្រឿងនោះមានឈ្មោះថា Sindbad ជានាវាមុជទឹករបស់ក្រុមហ៊ុនឯកជនមួយ ដែលបម្រើសេវាកម្មជូនភ្ញៀវទេសចរចុះទៅមើលទេសភាពក្រោមបាតសមុទ្រក្រហម នៅប្រទេសអេហ្ស៊ីប។ នាវានេះមានទំហំធំជាងយានមុជទឹកធម្មតា ដែលផ្ទុកអ្នកដំណើរចំនួន ៤៥នាក់ ជាមួយនឹងក្រុមនាវិកបញ្ជារនាវាចំនួន ៥នាក់ ដូចនេះសរុបមនុស្សនៅលើនាវានោះ គឺមានចំនួន ៥០នាក់។

យោងតាមក្រុមហ៊ុនដែលដំណើរការដំណើរទេសចរណ៍បាននិយាយថា៖ មុនពេលកើតហេតុ នាវាមុជទឹក Sindbad របស់ពួកគេ កំពុងនាំអ្នកដំណើរធ្វើដំណើរដើម្បីរុករកផ្កាថ្មនៅជិតឆ្នេរ Hurghada ដែលជាទីកន្លែងដ៏ពេញនិយម ប៉ុន្តែស្រាប់តែក្រោយមកក៏ជួបប្រទះនឹងហេតុការណ៍ដ៏រ..ន្ធត់ខាងលើនេះ។ អភិបាលតំបន់សមុទ្រក្រហម លោក Amr Hanafy បាននិយាយថា៖ អ្នកទេសចរ 6 នាក់បានស្លា..ប់ និង 39 នាក់ទៀតត្រូវបានជួយសង្គ្រោះ បន្ទាប់ពីនាវាមុជទឹកបានលិច ហើយគ្មាននរណាម្នាក់បាត់ខ្លួនទេ។

គួររំលឹកថា ហេតុការណ៍ស្រដៀងគ្នានេះដែរ កាលពីឆ្នាំ២០២៣ ដែលបានកើតឡើងលើយានមុជទឹកឈ្មោះទីតាន (Titan) ចុះទៅទស្សនាខ្មោចកប៉ាល់ថាយថានិច (Titanic) នៅបាតមហាសមុទ្រអាត្លង់ទិចជម្រៅជាង៤គីឡូម៉ែត្រ បានល្បីពេញពិភពលោក ព្រោះអ្នកស្លា..ប់សុទ្ធតែមហាសេដ្ឋី។ កាលនោះ មនុស្ស៥នាក់នាក់ជិះនាវាមុជទឹក ដោយម្នាក់ៗចំណាយ២៥ម៉ឺនដុល្លារសម្រាប់ដំណើរទេសចរណ៍មរ..ណៈនេះ។

យ៉ាងណាមិញសម្រាប់ ករណីលិចនាវាមុជទឹកនៅអេហ្ស៊ីបវិញ កំពុងត្រូវបានគេស៊ើបអង្កេតបន្ថែមដើម្បីស្វែងរកមូលហេតុពិតប្រាកដជុំវិញឧបទេវហេតុខាងលើនេះ៕

ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានថ្លែងពីស្ថានការណ៍ក្រោយគ្រោះរញ្ជួយដីថា ស្ថានការណ៍ធូរស្រាលហើយ គ្មានរលកយក្សស៊ូណាមិនៅប្រទេសថៃទេ ពីព្រោះរញ្ជួយដីកើតឡើងលើគោក ពុំមែនកើតនៅសមុទ្រ សូមពលរដ្ឋត្រឡប់មកលំនៅឋានវិញ ។ អគារការិយាល័យពិនិត្យប្រាក់គ្រោះរញ្ជួយដី ដែលសាងសង់លើផ្ទៃដីជាង១ហិកតា នៅតាមបណ្តោយផ្លូវកំផែងពេជ្រ២ បានបាក់រលំទាំងស្រុងដោយសារគ្រោះរញ្ជួយដីកាលពីរសៀលថ្ងៃទី២៨ ខែមីនា ឆ្នាំ២០២៥ គឺជាអគារកំពុងសាងសង់ រីឯអគារផ្សេងៗនៅទីក្រុងបាងកក មានសុវត្ថិភាព ។

កាលពីថ្ងៃទី២៨ ខែមីនា ឆ្នាំ២០២៥ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ និងមន្ត្រីពាក់ព័ន្ធបានធ្វើដំណើរពីខេត្តភូកេត មកដល់អាកាសយានដ្ឋានដនមឿង ទីក្រុងបាងកក ហើយលោកស្រីក៏បានប្រជុំតាមវីដេអូជាបន្ទាន់រយៈពេល១ម៉ោង ដើម្បីតាមដានស្ថានការណ៍ក្រោយគ្រោះរញ្ជួយដី ។ ការប្រជុំនេះមានលោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ, លោក Anutin Charnvirakul រដ្ឋមន្ត្រីក្រសួងមហាផ្ទៃ ព្រមទាំងមន្ត្រីពាក់ព័ន្ធជាច្រើនរូបចូលរួម ។

ក្រោយបញ្ចប់កិច្ចប្រជុំ លោកស្រី ផេថងថាន ថ្លែងថា លោកស្រីបានទទួលសេចក្តីរាយការណ៍ពីគ្រប់ផ្នែកទាំងអស់ គឺស្ថានការណ៍ធូរស្រាលហើយ ។ អគារនានានៅទីក្រុងបាងកក ដែលខូចខាត ឬបាក់រលំដោយសាររញ្ជួយដី គឺជាអគារកំពុងសាងសង់ ។ លោកស្រីបានជជែកជាមួយវិស្វករ គឺអគារនានានៅទីក្រុងបាងកក បានសាងសង់តាមលក្ខណៈស្តង់ដារ យបើកើតរញ្ជួយដីខ្លាំងជាងនេះ ថៃនឹងអាចទប់ស្កាត់បាន ដូច្នេះ ពលរដ្ឋអាចត្រឡប់ទៅលំនៅឋានរបស់ខ្លួនវិញ ។

អគារបាក់រលំ គឺជាអគារកំពុងសាងសង់ ហើយលោកស្រីបានទទួលដំណឹងពីភ្នាក់ងារឧតុនិយមកាលពីរសៀលថ្ងៃទី២៨ ខែមីនា ថា រញ្ជួយដីបានកើតឡើងនៅប្រទេសមីយ៉ាន់ម៉ា ស្មើនឹង៧.៧រិចទ័រ ហើយមានកម្លាំងរំញ័ររហូតដល់១២លើកក្រោយរញ្ជួយដី ។ វាមានកម្លាំងខ្លាំងក្លា ទើបធ្វើឱ្យមានកម្លាំងរំញ័រឆ្ងាយមកដល់ទីក្រុងបាងកក និងខេត្តភាគខាងជើងថៃ ។

ពលរដ្ឋនៅទីក្រុងបាងកក អាចត្រឡប់ទៅស្នាក់នៅអគារខ្ពស់ៗបាន ។ វាជាគ្រោះរញ្ជួយដីនៅលើគោក វាពុំបានកើតឡើងក្នុងសមុទ្រ ហេតុនេះ គ្មានរលកយក្សស៊ូណាមិកើតឡើងទេ ។ រីឯការធ្វើដំណើរតាមរថភ្លើងក្រោមដី និងរថភ្លើងអាកាស BTS គឺស្ថិតក្រោមការត្រួតពិនិត្យសុវត្ថិភាព ហើយសង្ឃឹមថា នឹងដំណើរការឡើងវិញនាពេលឆាប់ៗ ។

អភិបាលក្រុងបាងកក លោក ឆាត់ជាតិ សិទ្ធីផាន់ បានអនុញ្ញាតឱ្យពលរដ្ឋស្នាក់នៅបណ្តោះអាសន្នតាមសួនច្បារសាធារណៈ ប៉ុន្តែពលរដ្ឋមួយចំនួនពុំសប្បាយចិត្តរឿងការចែកចាយទឹកបរិសុទ្ធ និងអាហារ ។ សូមពលរដ្ឋតាមដានព័ត៌មានរញ្ជួយពីភ្នាក់ងារនានារបស់រដ្ឋាភិបាល អភិបាលក្រុងបាងកក នឹងពិនិត្យមើលខុនដូនានា ហើយថៃមានវិស្វករចំនួន២,០០០នាក់ អាចទទួលខុសត្រូវរឿងសុវត្ថិភាពអគារខុនដូ ។

បើពលរដ្ឋពុំចង់ត្រឡប់មកស្នាក់នៅខុនដូ គឺអាចស្នាក់នៅតាមសួនច្បារសាធារណៈបាន ដែលបើកទទួលពលរដ្ឋរយៈពេល២៤ម៉ោង ។ រីឯអគារការិយាល័យពិនិត្យប្រាក់គ្រោះរញ្ជួយដី ដែលបាក់រលំនៅតំបន់ចាក់តុចាក់ គឺភ្នាក់ងារសង្គ្រោះបាននាំជនរងគ្រោះចេញបណ្តើរៗហើយ ។ នេះបើតាមការលើកឡើងរបស់នាយករដ្ឋមន្ត្រីថៃ ៕