ជីវិតពេលខ្លះដូចជាខ្យល់ដែលបោកបក់ទាំងការប្តេជ្ញាចិត្ត ទំនួលខុសត្រូវ និងពេលវេលារបស់យើងផងដែរ។ នៅក្នុងពិភពលោកដែលជឿនលឿនដើរទៅមុខមិនឈប់ឈរនេះ វាងាយស្រួលនឹងធ្វើឲ្យអ្នកច្របូកច្របល់ មិនដឹងថាខ្លួនអ្នកចង់បានអ្វីឲ្យប្រាកដនោះទេ។ វាពិតជាចាំបាច់ណាស់ដែលអ្នកត្រូវតែដឹងអំពីតម្រូវការ ព្រមទាំងថែរក្សាសុខមាលភាពរបស់អ្នកទាំងផ្លូវកាយ និងផ្លូវចិត្ត ដូចនេះសញ្ញាខាងក្រោមនេះប្រហែលកំពុងប្រាប់អ្នកថា ដល់ពេលរៀបចំខ្លួនសាកថ្មជីវិតហើយ៖
១ ចេះតែអស់កម្លាំង៖ ទោះបីជាគេងបានគ្រប់គ្រាន់ក៏ដោយ ក៏អ្នកនៅមានអារម្មណ៍ថាខ្លួនឯងអស់កម្លាំង និងគ្មានថាមពលដដែល។ នេះអាចជាវិធីដែលរាងកាយរបស់អ្នកកំពុងប្រាប់អ្នកថាវាដល់ពេលត្រូវចាប់ផ្ដើមធ្វើអ្វីមួយឡើងវិញហើយ។
២ ឆាប់ខឹង និងផ្លាស់ប្តូរអារម្មណ៍៖ ភាពរអាក់រអួលបន្តិចបន្តួចដែលពីមុនមិនរំខានអ្នកនោះ តែឥឡូវបែរជាធ្វើឱ្យអ្នកមានអារម្មណ៍ធុញថប់ ឬតប់ប្រមល់ អាចបង្ហាញថាកម្លាំងចិត្តរបស់អ្នកចាប់ផ្ដើមអស់ហើយ។
៣ ខ្វះការផ្តោតអារម្មណ៍៖ អ្នកពិបាកក្នុងការផ្តោតអារម្មណ៍ ភ្លេចព័ត៌មានលម្អិតសំខាន់ៗ ឬធ្វើអ្វីខុសជាញឹកញាប់ គឺជាសញ្ញានៃភាពអស់កម្លាំងផ្លូវចិត្ត ដែលច្រើនតែជាលទ្ធផលនៃភាពតានតឹងយូរ និងកង្វះពេលវេលាសម្រាក។
៤ គ្មានចំណាប់អារម្មណ៍លើចំណូលចិត្តដូចមុន៖ សកម្មភាពដែលអ្នកធ្លាប់រីករាយ តែឥឡូវនេះបែរជាមានអារម្មណ៍ថាដូចជាកាតព្វកិច្ច ជាសញ្ញាមួយបង្ហាញថាអ្នកកំពុងបាត់បង់អារម្មណ៍រំភើប ព្រមទាំងការធ្វើដំណើរកម្សាន្តក្នុងជីវិតរបស់អ្នក។
៥ ចេះតែមិនស្រណុកខាងរាងកាយ៖ ការឈឺក្បាលញឹកញាប់ ឈឺសាច់ដុំ ឬសូម្បីតែបញ្ហាក្រពះ អាចជាភាពតានតឹងដែលបង្ហាញឱ្យឃើញពីរាងកាយរបស់អ្នក។ តែដំណើរកម្សាន្តអាចជួយបន្ថយរោគសញ្ញាទាំងនេះបាន។
៦ ចង់រត់គេចពីស្ថានភាពដែលអ្នកកំពុងនៅ៖ ប្រសិនបើអ្នកតែងតែស្រមើស្រមៃអំពីការចាកចេញពីការងារ ឬឃើញខ្លួនឯងនៅលើឆ្នេរ នោះដល់ពេលដែលត្រូវប្រែក្លាយសុបិននោះឱ្យក្លាយជាការពិតហើយ។.png)
ដំណើរកម្សាន្តមិនមានន័យថាទាល់តែជិះយន្តហោះទៅប្រទេសក្រៅ ឬចំណាយពេលច្រើនសប្ដាហ៍នោះទេ សូម្បីតែការធ្វើអ្វីមួយតូចតាច ដូចជាការធ្វើដំណើររហ័សនៅជិតៗ ការសម្រាកលំហែនៅផ្ទះ(staycation) ឬទុកពេលមួយថ្ងៃដើម្បីសម្រាក និងបញ្ចូលថាមពលក៏អាចមានឥទ្ធិពលវិជ្ជមានទៅលើសុខភាព និងសុខុមាលភាពរបស់អ្នកបានដែរ។ កុំទុកឲ្យភាពស្មុកស្មាញមកគ្រប់គ្រងអ្នកអី។ ចូរស្តាប់គំនិតនិងរាងកាយរបស់អ្នកហើយផ្តល់អាទិភាពដល់ការមើលថែខ្លួនឯង។
