ល្បីថារបស់ដែលផលិតនៅជប៉ុនមានគុណភាពខ្ពស់ អូស្រ្តាលីមិនស្ទាក់ស្ទើក្នុងការចំណាយលុយជាង ៧ ពាន់លានដុល្លារ ដើម្បីចុះហត្ថលេខាលើកិច្ចព្រមព្រៀងកងទ័ពជើងទឹក ដោយកក់ទុកនូវនាវាចម្បាំងបំបាំងកាយជំនាន់ថ្មីចុងក្រោយបង្អស់ចំនួន ១១គ្រឿង ពីជប៉ុន ដែលបង្កើតបានជាកិច្ចសន្យាប្រវត្តិសាស្រ្តថ្មីលើកដំបូងក្នុងរយៈពេល 80 ឆ្នាំ ចាប់តាំងពីជប៉ុនត្រូវបានដកចេញពីបម្រាមនាំចេញអាវុធទៅលក់នៅក្រៅប្រទេស។

យោងតាមការចុះផ្សាយរបស់កាសែត Reuters រដ្ឋាភិបាលអូស្ត្រាលី កាលពីសប្ដាហ៍មុន បានចុះហត្ថលេខាជាផ្លូវការលើកិច្ចសន្យាដែលមានតម្លៃប្រហែល ៧ ពាន់លានដុល្លារ ដោយការបញ្ជាទិញនាវាចម្បាំងពហុបំណងថ្នាក់ NewFFM ចំនួន ១១ គ្រឿង ពីក្រុមហ៊ុន Mitsubishi Heavy Industries (MHI) របស់ប្រទេសជប៉ុន។ នេះគឺជាផ្នែកមួយនៃយុទ្ធសាស្ត្រទំនើបកម្មកងទ័ពជើងទឹកដែលមានគោលបំណងបង្កើនទំហំកងនាវារបស់ប្រទេសឲ្យមានឥទ្ធិពលជាងមុនទ្វេដង។

ក្រោមកិច្ចព្រមព្រៀងនេះ ក្រុមហ៊ុន Mitsubishi Heavy Industries នឹងសាងសង់នាវាចម្បាំង NewFFM (ថ្នាក់ Mogami) ចំនួនបីគ្រឿងដំបូងដែលបានធ្វើបច្ចុប្បន្នភាពនៅក្នុងប្រទេសជប៉ុន ហើយការដឹកជញ្ជូនត្រូវបានគេរំពឹងថានឹងចាប់ផ្តើមនៅឆ្នាំ ២០២៩។ ដោយឡែក នាវាចំនួនប្រាំបីគ្រឿងដែលនៅសល់ត្រូវបានគ្រោងនឹងសាងសង់នៅអូស្ត្រាលីខាងលិច ដែលជួយពង្រីកសមត្ថភាពសាងសង់នាវាក្នុងស្រុក និងការងារការពារជាតិ។

កិច្ចព្រមព្រៀងនេះបានគូសបញ្ជាក់ពីព្រឹត្តិការណ៍ដ៏សំខាន់មួយនៅក្នុងប្រវត្តិសាស្រ្ត ព្រោះវាជាការលក់នាវាចម្បាំងថ្មីលើកដំបូងបង្អស់របស់ជប៉ុនទៅក្រៅប្រទេស ចាប់តាំងពីការលើកលែងការហាមឃាត់ការនាំចេញអាវុធរយៈពេល 80 ឆ្នាំ។

គួរជម្រាបថា នាវាចម្បាំងថ្នាក់ NewFFM គឺជាទំនើបកម្មនៃនាវាចម្បាំងថ្នាក់ Mogami ដែលកំពុងបម្រើការយ៉ាងសកម្មនៅក្នុងវិស័យការពារជាតិរបស់កងទ័ពជើងទឹកខ្លួនជប៉ុន។ វាត្រូវបានសាងសង់ឡើងសម្រាប់ការប្រតិបត្តិការល្បឿនលឿន ស្វ័យប្រវត្តិកម្ម និងការប្រយុទ្ធពហុតួនាទី ជាពិសេសវាអាចផ្ទុកឧទ្ធម្ភាគចក្រកងទ័ពជើងទឹកសម្រាប់ការឃ្លាំមើលថែមទៀតផង។

ជាមួយនឹងមុខងារកាត់បន្ថយការរកឃើញពីរ៉ាដា នាវានេះស័ក្តិសមបំផុតសម្រាប់ការបំពេញបេសកកម្មល្បាត និងការវា.យប្រហារដោយសម្ងាត់។ ក្រៅពីលក្ខណៈពិសេសទាំងនេះ វាក៏មានបំពាក់ទៅដោយប្រព័ន្ធមីស៊ីលទំនើបៗ ដែលមានសមត្ថភាពប្រយុទ្ធប្រឆាំងនឹងនាវាមុជទឹក កប៉ាល់ យន្តហោះ និងមីស៊ីលកំណត់គោលដៅផងដែរ។ តាមការប៉ាន់ស្មានជាមធ្យម នាវានេះអាចមានតម្លៃប្រហែលពី ៦០០ ទៅ ៦៥០ លានដុល្លារ/គ្រឿង នាពេលបច្ចុប្បន្ន ដែលនាំឲ្យវាក្លាយជាជម្រើសដ៏ល្អមួយក្នុងការការពារផ្លូវសមុទ្រនៅក្នុងតំបន់ឥណ្ឌូ-ប៉ាស៊ីហ្វិក៕

ជប៉ុនកំពុងប្រុងជើងការខ្ពស់ និងត្រៀមការពារខ្លួនដោយប្រុងប្រយ័ត្ន ក្រោយព្រះធរណីបានបញ្ជូនសារតាមរយៈការរញ្ជួយដីកម្រិត ៧.៤ រិកទ័រ ដែលបង្ករឱ្យមានការព្រមា.នថា «រលកយក្សស៊ូណាមិ» អាចនឹងវា.យលុកលើខេត្តចំនួន ៣ រួមមាន ខេត្តអ៊ីវ៉ាតេ ខេត្តអាអូម៉ូរី និងហុកកៃដូ។ នេះបើយោងតាមការចុះផ្សាយរបស់សារព័ត៌មាន The Japan Times នៅរសៀលថ្ងៃចន្ទ ទី២០ មេសា នេះ។

យោងតាមទីភ្នាក់ងារឧតុនិយមជប៉ុន ការរញ្ជួយដីនេះដែលមានកម្រិត 7.5 រ៉ិចទ័រ បានវាយប្រហារនៅមហាសមុទ្រប៉ាស៊ីហ្វិកក្នុងជម្រៅប្រហែល 10 គីឡូម៉ែត្រ។ ជាមួយនឹងការរញ្ជួយនេះ មន្ត្រីជំនាញបានព្រមានថា រលកយក្សស៊ូណាមិ កម្ពស់រហូតដល់ 10 ហ្វីត (ប្រហែល 3 ម៉ែត្រ) អាចនឹងវា.យប្រហារលើតំបន់ដែលរងផលប៉ះពាល់។

តាមរយៈរបាយការណ៍នេះ បច្ចុប្បន្ន រលកយក្សស៊ូណាមិ ត្រូវបានគេសង្កេតឃើញនៅចម្ងាយ 60 គីឡូម៉ែត្រពីឆ្នេរសមុទ្រខេត្ត Iwate និង Aomori ដែលនេះមានន័យថារលកយក្សទាំងនេះនឹងមកដល់ឆ្នេរសមុទ្រក្នុងពេលឆាប់ៗខាងមុខ ខណៈវីដេអូផ្សាយផ្ទាល់ពីកំពង់ផែមួយនៅស្រុក Kuji ខេត្ត Iwate បានបង្ហាញរលកយក្សស៊ូណាមិតូចៗកំពុងធ្វើដំណើរមកកៀកនឹងច្រាំងបន្តិចម្ដងៗហើយ។

ថ្លែងទៅកាន់អ្នកយកព័ត៌មាននៅទីក្រុងតូក្យូនៅថ្ងៃចន្ទនេះ លោកស្រីនាយករដ្ឋមន្ត្រី Sanae Takaichi បានជំរុញឱ្យប្រជាជនជម្លៀសទៅកាន់កន្លែងសុវត្ថិភាពជាបន្ទាន់ប្រសិនបើស្ថានការណ៍ចាំបាច់។ ជាមួយគ្នានោះ លោកស្រីបានបញ្ជាក់ថា កងកម្លាំងការពារតាមសមុទ្របានបញ្ជូនឧទ្ធម្ភាគចក្រជាច្រើនគ្រឿង ទៅកាន់តំបន់រងផលប៉ះពាល់ដើម្បីប្រមូលព័ត៌មានអំពីការខូចខាតដែលអាចកើតមាន និងជួយក្នុងកិច្ចខិតខំប្រឹងប្រែងជួយសង្គ្រោះបន្ទាន់ណាមួយ។

ទន្ទឹមនឹងនោះ ខ្សែរថភ្លើងសាធារណៈរវាងស្ថានីយ៍ទីក្រុងតូក្យូ និងស្ថានីយ៍ Shin-Aomori ក៏ត្រូវបានប្រកាសឲ្យផ្អាកដំណើរការជាបណ្ដោះអាសន្នផងដែរ ដោយអាជ្ញាធរព្រួយបារម្ភពីស្ថានភាព និងដើម្បីទប់ស្កាត់គ្រោះធម្មជាតិណាមួយដែលអាចកើនឡើងភ្លាមៗដោយមិននឹកស្មានដល់៕

ការកើនឡើងយ៉ាងគំហុកនៃអ្នកវិនិយោគទុនបរទេសក្នុងប្រទេសវៀតណាមដូចទឹកបាក់ទំនប់នេះ បណ្តាលមកពីកត្តាសំខាន់ៗជាច្រើន ដែលរដ្ឋាភិបាលវៀតណាមបានបង្កើតឡើងដើម្បីទាក់ទាញវិនិយោគទុន ស្របពេលដែលវិបត្តិសេដ្ឋកិច្ចសកលកំពុងតែប្រឈម និងបញ្ហាស្ទើរពេញសកលលោក តែវៀតណាមសម្ងំកើបលុយយ៉ាងស្ងៀមស្ងាត់ ។

វៀតណាមបានក្លាយជាប្រទេសលេចធ្លោក្នុងតំបន់អាស៊ានដែលវិនិយោគិនបរទេសសម្រុកមកវិនិយោគក្នុងគម្រោងជាច្រើននៅត្រីមាសទី១ ឆ្នាំ២០២៦ ដូចជា ៖ ផ្នែកឧស្សាហកម្មផលិតទំនិញ និងកែច្នៃ, ផ្នែកផលិត និងចែកចាយអគ្គិសនី ឧស្ម័ន (ឬហ្គាស) ទឹកស្អាត និងម៉ាស៊ីនត្រជាក់ ក្នុងនោះឧស្សាហកម្មផលិតទំនិញ និងកែច្នៃ បានទាក់ទាញការវិនិយោគពីបរទេសច្រើនបំផុត ។ សិង្ហបុរី បណ្តាក់ទុនវិនិយោគច្រើននៅវៀតណាមស្ថិតក្នុងលំដាប់ទី១ បន្ទាប់មក គឺកូរ៉េខាងត្បូង និងចិន ដោយសារវៀតណាមសម្បូរកម្លាំងពលកម្ម កំណើនសេដ្ឋកិច្ច និងគោលនយោបាយទាក់ទាញវិនិយោគិន ។

ការវិនិយោគផ្ទាល់ពីបរទេស (FDI) ដែលបានចុះបញ្ជីនៅប្រទេសវៀតណាមទាំងអស់ក្នុងត្រីមាសទី១ ឆ្នាំ២០២៦ ស្មើរហូតដល់ជាង១៥ពាន់លានដុល្លារ កើនឡើង៤២.៩% បើធៀបនឹងត្រីមាសទី១ ឆ្នាំ២០២៥ ដែលកំណើន FDI នេះ ដោយសារការជំរុញពីផ្នែកឧស្សាហកម្មផលិតទំនិញ និងកែច្នៃ ។

តាមទិន្នន័យរបស់ការិយាល័យស្ថិតិជាតិវៀតណាមស្ថិតក្រោមក្រសួងហិរញ្ញវត្ថុ គឺកំណើនការវិនិយោគផ្ទាល់ពីបរទេស (FDI) របស់វៀតណាមមានគម្រោងវិនិយោគថ្មីទទួលបានការអនុញ្ញាត ចំនួន៩០៤គម្រោង និងមានទឹកប្រាក់វិនិយោគសរុបដែលបានចុះបញ្ជីស្មើជាង១០ពាន់លានដុល្លារ ដែលចំនួនគម្រោងវិនិយោគកើនឡើង៦.៤% និងប្រាក់វិនិយោគកើនឡើងជាង២ដង បើធៀបនឹងរយៈពេលដូចគ្នាកាលពីឆ្នាំ២០២៥ ។

ផ្នែកទាក់ទាញការវិនិយោគផ្ទាល់ពីបរទេស (FDI) ច្រើនបំផុត គឺផ្នែកឧស្សាហកម្មផលិតទំនិញ និងកែច្នៃ ដែលមានទឹកប្រាក់វិនិយោគស្មើជាង៧ពាន់លានដុល្លារ ឬស្មើ៦៩% នៃទឹកប្រាក់វិនិយោគដែលបានចុះបញ្ជីថ្មីទាំងអស់ បន្ទាប់មក គឺផ្នែកផលិត និងចែកចាយអគ្គិសនី ឧស្ម័ន (ឬហ្គាស) ទឹកស្អាត និងម៉ាស៊ីនត្រជាក់ មានទឹកប្រាក់វិនិយោគផ្ទាល់ពីបរទេស ស្មើជាង២ពាន់លានដុល្លារ ឬស្មើ២២.៣% ។ រីឯផ្នែកផ្សេងទៀតមានទឹកប្រាក់វិនិយោគផ្ទាល់ពីបរទេស ស្មើជាង៨៨៤លានដុល្លារ ឬស្មើ៨.៧% ។

ប្រទេសចំនួន៥២ ដែលទទួលបានអាជ្ញាប័ណ្ណវិនិយោគគម្រោងផ្សេងៗនៅវៀតណាម ក្នុងនោះសិង្ហបុរីបានវិនិយោគទុនច្រើនបំផុតស្ថិតក្នុងលំដាប់ទី១ ស្មើជាង៥ពាន់លានដុល្លារ (៥២%) នៃប្រាក់វិនិយោគសរុបនៅវៀតណាម បន្ទាប់មក គឺកូរ៉េខាងត្បូង វិនិយោគនៅវៀតណាម ស្មើជាង៣ពាន់លានដុល្លារ (៣៥.៩%), ចិនដីគោក ស្មើជាង៤១៧លានដុល្លារ (៤.១%), ហុងកុង ស្មើជាង២៥៦លានដុល្លារ (២.៥%), ជប៉ុន ស្មើជាង១៩១លានដុល្លារ (១.៩%) និងអាមេរិក ស្មើជាង៩១លានដុល្លារ (០.៩%) ។

ចំណែកគម្រោងចាស់ៗចំនួន២៥១គម្រោងដែលកំពុងតែវិនិយោគនៅវៀតណាម បានបង្កើនទឹកប្រាក់វិនិយោគបន្ថែមទៀតសរុបស្មើជាង២ពាន់លានដុល្លារ ធ្លាក់ចុះ៥៥.១% បើធៀបនឹងរយៈពេលដូចគ្នាកាលពីឆ្នាំ២០២៥ ។

បើរួមបញ្ចូលទឹកប្រាក់វិនិយោគដែលបានចុះបញ្ជីថ្មី និងទឹកប្រាក់វិនិយោគបន្ថែមរបស់គម្រោងចាស់ៗ គឺផ្នែកឧស្សាហកម្មផលិតទំនិញ និងកែច្នៃ បានទាក់ទាញការវិនិយោគផ្ទាល់ពីបរទេសស្ថិតក្នុងលំដាប់ទី១ ស្មើជាង៨ពាន់លានដុល្លារ (៧០.៦%) នៃទឹកប្រាក់វិនិយោគសរុប ។ រីឯវិស័យផលិត និងចែកចាយអគ្គិសនី ឧស្ម័ន ទឹកស្អាត និងម៉ាស៊ីនត្រជាក់ ស្ថិតក្នុងលំដាប់ទី២ ស្មើជាង២ពាន់លានដុល្លារ (១៨.២%) ខណៈវិស័យផ្សេងទៀតបានទាក់ទាញការវិនិយោគពីបរទេស ស្មើជា១ពាន់លានដុល្លារ (១១.២%) ។

គួរបញ្ជាក់ថា រដ្ឋាភិបាលវៀតណាមមានគោលនយោបាយទាក់ទាញវិនិយោគិនបរទេស ទើបធ្វើឱ្យប្រទេសវៀតណាមក្លាយជាទីតាំងផលិតទំនិញថ្មីជំនួសចិន ព្រមទាំងវៀតណាមមានថ្លៃឈ្នួលកម្លាំងពលកម្មសមរម្យ និងកិច្ចព្រមព្រៀងពាណិជ្ជកម្មសេរី (FTA) ជាមួយប្រទេសជាច្រើន ៕

ទីក្រុងបុរាណ Venice របស់អ៊ីតាលី ដែលជាគោលដៅទេសចរណ៍ដ៏ទាក់ទាញបំផុតលើពិភពលោក ដោយសារស្ថិតនៅលើកោះតូចៗជាច្រើន និងមានស្ពានរហូតដល់ជាង៤០០កន្លែងតភ្ជាប់តំបន់មួយៗ ពេលនេះ កំពុងរងផលប៉ះពាល់យ៉ាងខ្លាំងដោយសារទឹកសមុទ្រកើនឡើងខ្ពស់ និងការស្រុតដីបណ្តាលឱ្យទីក្រុងលិចទឹកញឹកញាប់ ។ អ្នកជំនាញព្រមានថា ទីក្រុងនេះមិនអាចរក្សារូបរាងដើមយូរអង្វែងទេ ដោយសារទឹកសមុទ្រកើនឡើងមិនឈប់ឈរ ហើយបង្ខំឱ្យផ្លាស់ប្តូរទីតាំងទីក្រុងទៅកន្លែងផ្សេងនាថ្ងៃអនាគត ។

ការស្រាវជ្រាវថ្មីបានព្រមានពីទីក្រុង Venice ប្រទេសអ៊ីតាលី ដែលត្រូវបានអង្គការយូណេស្កូ (UNESCO) ចុះបញ្ជីជាបេតិកភណ្ឌពិភពលោក កំពុងប្រឈមនឹងហានិភ័យដោយសារអាកាសធាតុក្តៅខ្លាំង ទឹកកករលាយបណ្តាលឱ្យទឹកសមុទ្រកើនឡើងមិនឈប់ឈរ ខណៈវិធានការអាចមិនគ្រប់គ្រាន់សម្រាប់ការពារទីក្រុងរយៈពេលយូរទេ បើស្ថានការណ៍កាន់តែធ្ងន់ធ្ងរអាចត្រូវផ្លាស់ប្តូរទីតាំងទីក្រុងបុរាណនេះ ។

បើតាមអ្នកជំនាញ គឺគ្មានវិធានការណាមួយអាចការពារទីក្រុងបុរាណឡើយ ដោយសារទឹកសមុទ្រកើនឡើងខ្ពស់បានគំរាមកំហែងឱ្យទីក្រុងទាំងមូលលិចទឹកសមុទ្របាត់រូបរាងដើម ។ ថ្ងៃអនាគត ទីក្រុងនេះអាចត្រូវបង្ខំឱ្យផ្លាស់ប្តូរទីតាំង ហើយអ្នកជំនាញកំពុងស្វែងរកវិធីការពារទីក្រុងឱ្យរួចផុតពីការគំរាមកំហែង ។

ការស្រាវជ្រាវថ្មីនេះចុះផ្សាយក្នុងទស្សនាវដ្តី Scientific Reports បានលើកឡើងពីយុទ្ធសាស្ត្រ និងវិធានការការពារទីក្រុងបុរាណរបស់អ៊ីតាលី ដោយពិចារណាពីកម្ពស់ទឹកសមុទ្រកើនឡើងខ្ពស់ដកស្រង់ពីរបាយការណ៍វាយតម្លៃលើកទី៦ នៃគណៈកម្មាធិការអន្តរជាតិ ស្តីពីបម្រែបម្រួលអាកាសធាតុរបស់អង្គការសហប្រជាជាតិ (IPCC) ។

ហេតុការណ៍ទឹកលិចខ្លាំងកាលពីឆ្នាំ២០១៩ បណ្តាលឱ្យមនុស្សស្លាប់២នាក់ និងខូចខាតទ្រព្យសម្បត្តិក្នុងទីក្រុង Venice ស្មើទឹកប្រាក់រាប់រយលានអឺរ៉ូ រួមទាំងខូចខាតសាកលវិទ្យាល័យ San Marco ដែលជាតំបន់ទេសចរណ៍សំខាន់ ។ បន្ទាប់មក នៅឆ្នាំ២០២៣ ក៏មានការដំឡើងជញ្ជាំងកញ្ចក់ និងបង្កើតគម្រោងស្មើទឹកប្រាក់ជាង៣លាន ៨សែនដុល្លារ ដើម្បីការពារទីក្រុងបុរាណអាយុ៩០០ឆ្នាំឱ្យមានសភាពរឹងមាំ ។

អ្នកជំនាញស្នើអនុវត្តវិធានការការពារទីក្រុងចំនួន៣ចំណុច ព្រមទាំងជំរុញឱ្យអនុវត្តវិធានការចាប់ពីពេលនេះ រួមមាន ៖ សាងសង់ទំនប់ការពារទីក្រុង បើកម្ពស់ទឹកសមុទ្រកើនឡើងជាងកន្លះម៉ែត្រ, បិទបឹង បើទីក្រុងរងផលប៉ះពាល់ធ្ងន់ធ្ងរ និងផ្លាស់ប្តូរទីតាំងទីក្រុង ជម្លៀសពលរដ្ឋ បើកម្ពស់ទឹកសមុទ្រកើនឡើងជាង៤ម៉ែត្រដែលអាចកើតឡើងបន្ទាប់ពីឆ្នាំ២៣០០ ។ ប៉ុន្តែការសាងសង់ជញ្ជាំងធំៗការពារទីក្រុងអាចត្រូវចំណាយពេលយូរ ចាប់ពី៣០ឆ្នាំ ទៅ៥០ឆ្នាំ ទើបចាំបាច់ត្រូវរៀបចំការផែនការជាមុន ។

អ្វីគួរឱ្យបារម្ភ គឺផ្ទៃដីក្នុងទីក្រុងនេះបានស្រុតចុះជាបន្តបន្ទាប់ ស្មើប្រមាណ១មីល្លីម៉ែត្រក្នុង១ឆ្នាំ ដោយសារសកម្មភាពរបស់មនុស្ស ដូចជា ៖ ការបូមទឹកពីបាតបឹង បើទោះជាបច្ចុប្បន្ន សកម្មភាពនេះត្រូវបានហាមឃាត់ក្តី ៕

អ្នកជំនាញនៅប្រទេសអូស្ត្រាលីអះអាងថា ឧបករណ៍របស់បារីអេឡិចត្រូនិកបានបញ្ចេញសារធាតុលោហៈពុលដោយផ្ទាល់ទៅក្នុងសួត ប៉ុន្តែមនុស្សភាគច្រើនមើលរំលងពីគ្រោះថ្នា.ក់នេះ ពួកគេស្នើឱ្យប្រទេសនានាត្រួតពិនិត្យផលប៉ះពាល់សុខភាពដោយសារការប្រើប្រាស់បារីអេឡិចត្រូនិក ដោយសារបច្ចុប្បន្ន ការប្រើប្រាស់កើនឡើង ជាពិសេស ក្រុមយុវជន ។

ការស្រាវជ្រាវថ្មីរបស់សាកលវិទ្យាល័យ Technology Sydney ប្រទេសអូស្ត្រាលី ដែលផ្សព្វផ្សាយក្នុងទស្សនាវដ្តី Analytical and Bioanalytical Chemistry ឱ្យដឹងថា ឧបករណ៍របស់បារីអេឡិចត្រូនិកបានបញ្ចេញសារធាតុលោហៈពុលដោយផ្ទាល់ចូលសួត ដែលការស្រាវជ្រាវនេះផ្ទុយគ្នានឹងការយល់ឃើញថា ការប្រើប្រាស់បារីអេឡិចត្រូនិក គឺជាជម្រើសមានសុវត្ថិភាពជាងបារីធម្មតា ។

យោងតាមការស្រាវជ្រាវ ទោះជាការប្រើប្រាស់បារីអេឡិចត្រូនិករយៈពេលខ្លី និងប្រើប្រាស់តិចជាងអ្នកជក់បារីធម្មតាក្តី ប៉ុន្តែវានឹងប្រមូលផ្តុំសារធាតុលោហៈពុលចូលសួតក្នុងបរិមាណយ៉ាងច្រើន ព្រមទាំងប្រមូលផ្តុំសំណ ទង់ដែង និងនីកែល ។ ការស្រាវជ្រាវនេះជាភស្តុតាងដំបូងបង្ហាញឱ្យឃើញថា ភាគល្អិតចេញពីបារីអេឡិចត្រូនិកពីសារធាតុលោហៈ និងបារ៉ត គឺជ្រាបចូលក្នុងរាងកាយយ៉ាងងាយស្រួល ។

សាស្ត្រាចារ្យមុខវិជ្ជាគីមីនៅសាកលវិទ្យាល័យ Technology Sydney ដែលដឹកនាំការស្រាវជ្រាវនិយាយថា អ្នកប្រើប្រាស់បារីអេឡិចត្រូនិកមិនទាន់យល់ច្បាស់ពីគ្រោះថ្នាក់នេះទេ ខណៈអ្នកជំនាញបានត្រួតពិនិត្យឃើញសារធាតុលោហៈដែលបញ្ចេញដោយឧបករណ៍បារីអេឡិចត្រូនិក ។ អ្នកប្រើប្រាស់បារីអេឡិចត្រូនិកបច្ចុប្បន្នតែងតែមើលរំលងគ្រោះថ្នាក់ដែលបណ្តាលមកពីឧបករណ៍ក្តៅ ។

ការស្រាវជ្រាវបង្ហាញថា បារីអេឡិចត្រូនិកត្រូវបានផលិតឡើងជាមួយឧបករណ៍របស់វាជាច្រើនជម្រើស ច្រើនម៉ាក រួមទាំងគុណភាពនៃការផលិត ដែលបណ្តាលឱ្យអ្នកប្រើប្រាស់ទទួលបាននូវសារធាតុគ្រោះថ្នាក់ផ្សេងៗប៉ះពាល់សុខភាព ។

លទ្ធផលការស្រាវជ្រាវត្រូវបានផ្សព្វផ្សាយស្របពេលការប្រើប្រាស់បារីអេឡិចត្រូនិកកើនឡើងលើពិភពលោក ជាពិសេស ក្នុងចំណោមក្រុមយុវជន ។ នៅប្រទេសអូស្ត្រាលី ការប្រើប្រាស់បារីអេឡិចត្រូនិករបស់មនុស្សពេញវ័យ កើនឡើងពី៥.៣% កាលពីឆ្នាំ២០១៩ មកស្មើនឹង២១% នៅឆ្នាំ២០២៣ ហើយការប្រើប្រាស់បារីអេឡិចត្រូនិករបស់យុវជនអូស្ត្រាលីបានកើនឡើងប្រហាក់ប្រហែលគ្នានេះ ។e c

ក្រុមអ្នកស្រាវជ្រាវបានស្នើឱ្យប្រទេសនានាត្រួតពិនិត្យឡើងវិញនូវបទប្បញ្ញត្តិពាក់ព័ន្ធនឹងការប្រើប្រាស់បារីអេឡិចត្រូនិក ដូចជា ៖ ត្រួតពិនិត្យការបញ្ចេញសារធាតុពុលពីឧបករណ៍បារីអេឡិចត្រូនិក ព្រមទាំងត្រួតពិនិត្យគោលការណ៍ណែនាំអំពីសុខភាពទាក់ទងនឹងការប្រមូលផ្តុំសារធាតុលោហៈក្នុងរាងកាយ ៕

ការទម្លាក់គ្រា.ប់បែកចូលដីថៃពីសំណាក់កងទ័ពអាកាសមីយ៉ាន់ម៉ាបានកើតឡើងជាបន្តបន្ទាប់ ហើយក្រុមទាហានឈុតខ្មៅថៃមិនអាចហាមឃាត់ ឬថ្កោលទោសឡើយ គឺបានត្រឹមតែជម្លៀសពលរដ្ឋថៃទៅកាន់កន្លែងសុវត្ថិភាព ។ កាលពីវេលាម៉ោង១១ព្រឹក ថ្ងៃទី២០ ខែមេសា ឆ្នាំ២០២៦ កងទ័ពអាកាសមីយ៉ាន់ម៉ាបានទម្លាក់គ្រា.ប់បែកជាច្រើនគ្រាប់លើមន្ទីរពេទ្យរបស់កងទ័ពសម្ព័ន្ធជាតិការ៉ែន (KNU) និងបណ្តាលឱ្យគ្រា.ប់បែក១គ្រាប់ធ្លាក់ចូលដីថៃ បង្កឱ្យពលរដ្ឋថៃភ័យរត់គេចពីសេចក្តីស្លា.ប់ ។

នាវេលាម៉ោង១១ព្រឹក ថ្ងៃទី២០ ខែមេសា កងទ័ពអាកាសមីយ៉ាន់ម៉ាបានប្រើប្រាស់យន្តហោះចម្បាំង Yak-130 និង Mig-29 ទម្លាក់គ្រាប់បែកចំនួន៩គ្រាប់លើមន្ទីរពេទ្យកងទ័ពសម្ព័ន្ធជាតិការ៉ែន (KNU) និងផ្ទះក្រុមការ៉ែននៅស្រុកប៊ឺសុ ខេត្តផាពូន រដ្ឋការ៉ែន ដែលឆ្ងាយពីព្រំដែនមីយ៉ាន់ម៉ា-ថៃប្រមាណ៥០០ម៉ែត្រ និងនៅទល់មុខស្រុកសបមេ ខេត្តមេហុងស៊ន ប្រទេសថៃ ។ គ្រាប់បែក១គ្រាប់ធ្លាក់ចូលដីថៃក្នុងភូមិមេសាមសែប បណ្តាលឱ្យពលរដ្ឋរត់គេចខ្លួនដោយការភ័យស្លន់ស្លោ បន្ទាប់មក ក្រុមទាហានឈុតខ្មៅថៃប្រចាំការនៅព្រំដែន និងអាជ្ញាធរ ក៏ជម្លៀសពលរដ្ឋភ្លាមៗដើម្បីសុវត្ថិភាព ។

ពលរដ្ឋថៃរស់នៅក្បែរព្រំដែនមីយ៉ាន់ម៉ា ភ័យខ្លាចព្រោះមិនដឹងថា តើកងទ័ពអាកាសមីយ៉ាន់ម៉ានឹងទម្លាក់គ្រាប់បែកលើក្រុមការ៉ែនម្តងទៀតពេលណា ហើយមិនដឹងថា តើគ្រាប់បែកនឹងធ្លាក់ចូលដីថៃទៀតឬអត់ ពួកគេថា កងទ័ពអាកាសមីយ៉ាន់ម៉ាអាចនឹងទម្លាក់គ្រាប់បែកចូលដីថៃទៀតនាថ្ងៃអនាគត ។

រដ្ឋាភិបាលថៃមិនទាន់ថ្កោលទោសការវាយប្រហាររបស់កងទ័ពអាកាសមីយ៉ាន់ម៉ាទេ បើទោះជាមានគ្រាប់បែក១គ្រាប់ធ្លាក់ចូលដីថៃក្តី ខណៈក្រុមទាហានឈុតខ្មៅថៃបានត្រឹមតែជម្លៀសពលរដ្ឋចេញ ហើយហេតុការណ៍វាយប្រហារតាមផ្លូវអាកាសនេះមិនមែនទើបតែកើតឡើងទេ ។ កន្លងមក មានហេតុការណ៍កងទ័ពអាកាសមីយ៉ាន់ម៉ាវាយប្រហារតាមអាកាសនៅក្បែរព្រំដែនជាប់ថៃ ដែលធ្វើឱ្យអាជ្ញាធរថៃសំណូមពរមកកាន់រដ្ឋាភិបាលឱ្យប្រញាប់ចរចាជាមួយមីយ៉ាន់ម៉ា និងបង្កើតតំបន់សុវត្ថិភាពសម្រាប់ពលរដ្ឋរស់នៅក្បែរព្រំដែន ។

តាមការចុះផ្សាយរបស់សារព័ត៌មានថៃ គឺកន្លងមក មានការប្រយុទ្ធគ្នាយ៉ាងខ្លាំងនៅប្រទេសមីយ៉ាន់ម៉ា ហើយកងទ័ពអាកាសមីយ៉ាន់ម៉ាបានបើកយន្តហោះចម្បាំងទម្លាក់គ្រាប់បែកមកលើទីលំនៅរបស់ក្រុមសម្ព័ន្ធជាតិការ៉ែន (KNU) ដែលស្ថិតនៅទល់មុខឃុំមេយួម ស្រុកមេសារៀង ខេត្តមេហុងស៊ន បណ្តាលឱ្យក្រុមការ៉ែនរងរបួសដោយសារគ្រាប់បែកផ្ទុះ ហើយបញ្ជូនមកព្យាបាលនៅមន្ទីរពេទ្យស្រុកសបមេ ខេត្តមេហុងស៊ន ។

គួរបញ្ជាក់ថា កាលពីថ្ងៃទី១១ ខែមេសា កងទ័ពមីយ៉ាន់ម៉ាបានបើកយន្តហោះចម្បាំងទម្លាក់គ្រាប់បែក២គ្រាប់លើមន្ទីរពេទ្យក្រុមការ៉ែននៅក្បែរព្រំដែនមីយ៉ាន់ម៉ា-ថៃ នៅទល់មុខស្រុកសបមេ ខេត្តមេហុងស៊ន ដែលណ្តាលឱ្យខូចខាតមន្ទីរពេទ្យក្រុមការ៉ែន និងគ្រាប់បែកខ្លះធ្លាក់ខុសគោលដៅ ។ ពេលនោះ អាជ្ញាធរស្រុកសបមេ ខេត្តមេហុងស៊ន ជំរុញឱ្យរដ្ឋាភិបាលថៃថ្កោលទោសកងទ័ពអាកាសមីយ៉ាន់ម៉ាដែលទម្លាក់គ្រាប់បែកលើមន្ទីរពេទ្យក្បែរព្រំដែនថៃ ពីព្រោះគ្មានប្រទេសណាធ្វើបែបនេះទេ ។

អាជ្ញាធរស្រុកសបមេ បានបង្ហាញក្តីបារម្ភពីគ្រាប់បែកបន្តធ្លាក់ចូលដីថៃ ពីព្រោះទីតាំងដែលទម្លាក់គ្រាប់បែកស្ថិតនៅក្បែរព្រំដែន ដោយអាជ្ញាធរថៃសំណូមពរឱ្យរដ្ឋាភិបាលរបស់ខ្លួនដាស់តឿនទៅកងទ័ពអាកាសមីយ៉ាន់ម៉ាឱ្យបញ្ឈប់សកម្មភាពនេះ ពីព្រោះគ្មានប្រទេសណាមួយទម្លាក់គ្រាប់បែកលើមន្ទីរពេទ្យ ទីប្រជុំជន វត្តអារ៉ាម និងសាលារៀនទេ ប៉ុន្តែកងទ័ពអាកាសមីយ៉ាន់ម៉ាទម្លាក់គ្រាប់បែកពាសពេញទាំងអស់ ៕