មានទំនាក់ទំនងជិតស្និទ្ធជាមួយនឹង អ៊ិន លក្ខិណា បវរកញ្ញាល្បីឈ្មោះប្រចាំប្រទេស Nguyen Huynh Kim Duyen បានចំណាយពេលយ៉ាងរីករាយក្នុងអំឡុងពេលចូលឆ្នាំខ្មែរ។ ក្រៅពីការកម្សាន្តសប្បាយបវរកញ្ញាវៀតណាមរូបនេះថែមទាំងបានរួមចំណែកផ្សព្វផ្សាយពីអប្សរានិងស្បៃខ្មែរទៀតផង។
ប្រិយមិត្តដែលតាមដានវិស័យបវរកញ្ញាជ្រាបមកហើយថាបវរកញ្ញា លក្ខិណា និង Kim Duyen គឺរាប់អានគ្នាយ៉ាងជិតសិទ្ធិបន្ទាប់ពីធ្លាប់ចូលរួមប្រកួតនៅលើឆាកអន្តរជាតិលើឆាក Miss Supranational 2022 ។ ទោះបីជារស់នៅមួយប្រទេសម្នាក់ប៉ុន្តែអ្នកទាំងពីរក៏តែងតែឆ្លៀតពេលមានដំណើរកម្សាន្តនិងកសាងមិត្តភាពជាមួយគ្នាមិនចេះដាច់។ បន្ទាប់ពី លក្ខិណា ទៅប្រទេសវៀតណាមជាញឹកញាប់ ពេលនេះបវរកញ្ញា Nguyen Huynh Kim Duyen ក៏បានមកកម្សាន្តនៅលើទឹកដីកម្ពុជាក្នុងអំឡុងពេលចូលឆ្នាំខ្មែរដូចគ្នា។
លើសពីការកម្សាន្តមហាជនបានឃើញបវរកញ្ញាវៀតណាមរូបនេះមិនខ្លាចប្រឈមមុខនឹងមតិវែកញែកពីអ្នកគាំទ្រផ្ទះលេខ២នោះទេដោយ Nguyen Huynh Kim Duyen រួមទាំងអ៊ិន លក្ខិណា និងបងស្រី បានចូលរួមផ្សព្វផ្សាយតំបន់ទេសចរណ៍និងវប្បធម៌ខ្មែរទៀតផង។ នៅក្នុងការបង្ហោះរបស់ Kim Duyen គឺបានបញ្ជាក់ច្បាស់ៗពីស្បៃខ្មែរ ដែលជនជាតិថៃតែងតែចិញ្ចឹមចិត្តថាជារបស់ខ្លួន។
ក្រៅពីគ្រងឈុតស្បៃខ្មែរយ៉ាងស្រស់ស្អាត លំដាប់រងទី២ Miss Supranational 2022 រូបនេះក៏បានឈុតអប្សរាខ្មែរយ៉ាងស្រស់ស្អាតបញ្ចេញសម្រស់យ៉ាងទាក់ភ្នែកនៅឯប្រាសាទអង្គរវត្តដែលជាសម្បត្តិបេតិកភណ្ឌរបស់ពិភពលោក។ ជាមួយនឹងសកម្មភាពបែបនេះគឺពិតជាធ្វើឱ្យអ្នកគាំទ្រកម្ពុជាសប្បាយរីករាយណាស់ពីព្រោះបានឃើញការផ្សព្វផ្សាយរបស់បវរកញ្ញាល្បីឈ្មោះប្រចាំប្រទេសរូបនេះបង្ហោះនៅលើបណ្តាញសង្គមដោយមិនមានការខ្លាចរអារ។
ជាមួយនឹងការជ្រួតជ្រាបនៃវប្បធម៌ខ្មែរ Kim Duyen ក៏បានចូលរួមសកម្មភាពជាមួយនឹង អ៊ិន លក្ខិណា នៅក្នុងឱកាសពិធីបុណ្យចូលឆ្នាំខ្មែរផងដែរ៕
