មុនពេលជួបគ្រោះថ្នាក់ AK-K ពោលពាក្យបែបនេះចំពោះម្តាយ

AK-K ម្ចាស់ពាន Cambo Rapper បានធ្វើឱ្យអ្នកលេងបណ្តាញសង្គមរន្ធត់ចិត្តយ៉ាងខ្លាំងបន្ទាប់ពីទទួលដំណឹងថាអ្នកចម្រៀងរ៉េបរូបនេះបានជួបគ្រោះថ្នាក់ចរាចរណ៍ហើយរងរបួសជើងធ្ងន់ធ្ងរ។ មុនពេលជួបគ្រោះថ្នាក់ AK-K បានបង្ហាញក្តីស្រលាញ់ចំពោះអ្នកមានគុណយ៉ាងខ្លាំងសូម្បីតែអំឡុងពេលគ្រោះថ្នាក់លោកនៅតែទន្ទេញពាក្យ «កូនសូមទោសប៉ា…»!។

នៅរសៀលថ្ងៃទី៣១ ខែឧសភា ផេកផ្លូវការ Cambo Rapper បានប្រកាសពីដំណឹងដែលម្ចាស់ពានរដូវកាលទី១បានជួបគ្រោះថ្នាក់ចរាចរណ៍។ ក្នុងសេចក្តីប្រកាសបានបញ្ជាក់ថា តារាចម្រៀងរ៉េប AK-K ម្ចាស់ពាន CAMBO RAPPER បានជួបគ្រោះថ្នាក់ចរាចរណ៍ធ្ងន់ធ្ងរ បណ្ដាលឱ្យរបួសជើងទាំងសងខាង នៅផ្លូវទំនប់កប់ស្រូវ កាលពីថ្ងៃទី៣០ ខែឧសភា ឆ្នាំ២០២៦។ ភ្លាមៗក្រុមគ្រូពេទ្យបានបញ្ជូនទៅសង្គ្រោះបន្ទាន់នៅមន្ទីរពេទ្យជាតិតេជោសន្តិភាព។ នៅយប់ថ្ងៃសៅរ៍ដោយសាររបួសធ្ងន់ធ្ងរ ក្រុមគ្រួសារបានបញ្ជូនលោកទៅសង្គ្រោះបន្ទាន់នៅប្រទេសវៀតណាម»។

ដំណឹងដ៏តក់ស្លុតនេះបានធ្វើឱ្យអ្នកលេងបណ្តាញសង្គមបង្ហាញការអាណិតអាសូរម្ចាស់ពានរូបនេះយ៉ាងខ្លាំងនិងបួងសួងកុំឱ្យជើងលោកមានបញ្ហាខ្លាំង។ King Chi ដែលជាគ្រូបង្វឹកនៅក្នុងកម្មវិធីចម្រៀងរ៉េបផ្សេងគ្នាក៏បានបង្ហាញការអាណិតអាសូរទៅកាន់ AK-K ផងដែរ ជាពិសេសគឺស្រែកទាមទាររកយុត្តិធម៌ជូនម្ចាស់ពានរូបនេះ។

មុននឹងជួបហេតុការណ៍គ្រោះថ្នាក់ចរាចរណ៍ នៅថ្ងៃទី២៧ ខែឧសភា AK-K បានបង្ហោះរូបភាពជាមួយនឹងម្តាយអមដោយការរៀបរាប់ពីជម្រៅចិត្តថា «១៨ឆ្នាំ កូនប្រាប់ម៉ាក់ថាមិនបាចខ្វល់រឿងលុយទេទុកឱ្យកូនអ្នករក ច្រើនឆ្នាំហើយដែលកូនមិនបាននិយាយរីករាយថ្ងៃកំណើតឱ្យខ្លួនឯងតែកូនតែងតែអគុណអ្នកម្តាយ និងលោកពុកដែលឱ្យកូនឃើញពន្លឺថ្ងៃដល់២៣ឆ្នាំ»។

លើសពីនេះទៅទៀតតាមរយៈវីដេអូដែលបានចែកចាយនៅលើបណ្តាញសង្គមនៅក្នុងពេលជួបគ្រោះថ្នាក់ AK-K បាននិយាយទាំងកំពុងមានរបួសធ្ងន់ធ្ងន់ជាមួយនឹងពាក្យសម្តីថា«កូនសូមទោសប៉ា»។

នៅល្ងាចថ្ងៃទី៣១ ខែឧសភា ផេក Cambo Rapper ក៏បានបញ្ជាក់ជូនសាធារណជនដែរថា ការវះកាត់ជើងរបស់ AK-K ទទួលបានជោគជ័យខណៈក្រុមគ្រូពេទ្យកំពុងតាមដានស្ថានភាពរបស់លោកបន្តទៀត៕