ដើម្បីផលប្រយោជន៍រួម! ប្រធានាធិបតីអាមេរិក លោកដូណាល់ ត្រាំ បានជំរុញឱ្យមហាអំណាចពិភពលោក ដែលមានទាំងចិន បារាំង ជប៉ុន កូរ៉េខាងត្បូង និងចក្រភពអង់គ្លេស ជួយបញ្ជូននាវាចម្បាំងរបស់ពួកគេទៅកាន់តំបន់មជ្ឈិមបូព៌ា ដើម្បីធានាការដឹកជញ្ជូនទំនិញសំខាន់ៗតាមផ្លូវទឹកដែលត្រូវបានបិទដោយសារសង្គ្រាមជាមួយអ៊ីរ៉ង់។

តាមរយៈសេចក្តីថ្លែងការណ៍ដែលបានបង្ហោះនៅលើបណ្តាញសង្គម លោក ដូណាល់ ត្រាំ បានអំពាវនាវចំៗទៅកាន់មហាអំណាចពិភពលោក រួមមាន ចិន បារាំង ជប៉ុន កូរ៉េខាងត្បូង និងចក្រភពអង់គ្លេស ឱ្យបញ្ជូននាវាចម្បាំងរបស់ពួកគេទៅកាន់តំបន់មជ្ឈិមបូព៌ា។ ការអំពាវនាវនេះធ្វើឡើងក្នុងគោលបំណងឱប្រទេសដែលរងផលប៉ះពាល់រួមដៃគ្នាជាមួយសហរដ្ឋអាម៉េរិក ដើម្បីធានាសន្តិសុខ និងសេរីភាពនៃការធ្វើនាវាចរណ៍តាមច្រកសមុទ្រ Hormuz ដែលជាសរសៃឈាមសេដ្ឋកិច្ចដ៏សំខាន់សម្រាប់ថាមពលសកល។

ទន្ទឹមនឹងការអំពាវនាវនេះ លោក ត្រាំ បានគូសបញ្ជាក់ឡើងវិញថា «ទោះបីជាសហរដ្ឋអាមេរិកបានយកឈ្នះអ៊ីរ៉ង់ក៏ដោយ ប៉ុន្តែប្រទេសដែលទទួលបានប្រេងតាមរយៈច្រកសមុទ្រ ក៏នៅតែត្រូវតែថែរក្សាផ្លូវដឹកជញ្ជូននោះដូចគ្នា ហើយយើងនឹងជួយ»។ លោកបានព្រមានថា កងកម្លាំងអាម៉េរិកនឹងមិនដកថយឡើយ ហើយនឹងបន្តយុទ្ធនាការ «ទម្លាក់គ្រាប់បែកទ្រង់ទ្រាយធំ» លើតំបន់ឆ្នេរ និងកម្ទេចរាល់នាវាអ៊ីរ៉ង់ណាដែលបង្កការរំខាន រហូតទាល់តែច្រកសមុទ្រ Hormuz ត្រឡប់មកមានសុវត្ថិភាព និងសេរីភាព ១០០% ឡើងវិញ។

គួរជម្រាបថា បើទោះជាមានការប្រកាសរបស់ប្រធានាធិបតីអាមេរិក ដូចខាងលើនេះក៏ដោយ ប៉ុន្តែនៅមិនទាន់មានភាគីណាមួយបានបញ្ជាក់ថា ពួកគេនឹងបញ្ជូននាវាចម្បាំងទៅកាន់ច្រកសមុទ្រនេះឬអត់នោះទេ។ តួយ៉ាង អ្នកនាំពាក្យរបស់ស្ថានទូតចិនប្រចាំទីក្រុងវ៉ាស៊ីនតោន មិនបាននិយាយថា តើប្រទេសនេះមានគម្រោងដាក់ពង្រាយសម្ភារៈកងទ័ពជើងទឹក ទៅកាន់តំបន់នេះឬអត់នោះឡើយ ដោយចិនបានត្រឹមតែអំពាវនាវឱ្យបញ្ឈប់ជាបន្ទាន់ ចំពោះអរិភាព ហើយថា គ្រប់ភាគីទាំងអស់មានការទទួលខុសត្រូវ ក្នុងការធានាការផ្គត់ផ្គង់ថាមពលដែលមានស្ថិរភាព និងមិនមានឧបសគ្គ។

សេចក្តីថ្លែងការណ៍នេះក៏បានគូសបញ្ជាក់ផងដែរថា «ក្នុងនាមជាមិត្តស្មោះត្រង់ និងជាដៃគូយុទ្ធសាស្ត្ររបស់ប្រទេសនៅមជ្ឈិមបូព៌ា ប្រទេសចិននឹងបន្តពង្រឹងទំនាក់ទំនងជាមួយភាគីពាក់ព័ន្ធ រួមទាំងភាគីនៃជម្លោះ និងដើរតួនាទីស្ថាបនាសម្រាប់ការបន្ធូរបន្ថយភាពតានតឹង និងការស្តារសន្តិភាពឡើងវិញ»៕

ចិត្តសឿងមិនធម្មតា! បើទោះជាបានដឹងហើយលឺហើយថាការធ្វើនាវាចរណ៍តាមផ្លូវទឹកនៅតំបន់មជ្ឈិមបូព៌ាប្រឈមនឹងហានិភ័យខ្លាំងយ៉ាងណា ក៏ប្រទេសថៃ នៅតែអនុញ្ញាតឲ្យកប៉ាល់ខ្លួនធ្វើដំណើរឆ្លងកាត់តាមតំបន់នោះដើម្បីដឹកជញ្ជូនទំនិញដដែរ ដោយគ្រាន់តែព្រ.មានឲ្យក្រុមហ៊ុននាវាចរណ៍ថៃទាំងអស់មានការប្រុងប្រយ័ត្នខ្ពស់តែប៉ុណ្ណោះ។

យោងតាមការចុះផ្សាយរបស់សារព័ត៌មាន Bangkok Post កាលពីថ្ងៃទី ១៤ ខែមីនា បានឲ្យដឹងថា អាជ្ញាធរនៅក្នុងប្រទេសថៃបានចេញការព្រ.មានដល់នាវាថៃដែលកំពុងប្រតិបត្តិការនៅមជ្ឈិមបូព៌ា ជាពិសេសនៅជុំវិញច្រកសមុទ្រហ័រមូស ដោយសារតែហានិភ័យនៃ «មីនបណ្ដែតទឹក» របស់កងទ័ពជើងទឹកអ៊ីរ៉ង់ត្រូវបានដាក់ពង្រាយកាន់តែច្រើនឡើង ហើយគ្រាប់ទាំងនេះអាចធ្វើឱ្យប៉ះពាល់ដល់ការដឹកជញ្ជូនពាណិជ្ជកម្ម ជាពិសេសនៅជិតច្រករបៀងដឹកជញ្ជូនប្រេងយុទ្ធសាស្ត្រ។

ការជូនដំណឹងនេះធ្វើឡើងនៅពេលដែលជម្លោះដែលរវាងអ៊ីរ៉ង់ អ៊ីស្រាអែល និងសហរដ្ឋអាមេរិកបានគំរាមកំហែងដល់ផ្លូវពាណិជ្ជកម្មផ្លូវសមុទ្រដ៏សំខាន់បំផុតមួយរបស់ពិភពលោក ខណៈដែលសកម្មភាពយោធាបានកើនឡើងកាន់តែខ្លាំង និងរីករាលដាលនៅទូទាំងតំបន់។

ស្របពេលដែលការធ្វើនាវាចរណ៍មានឆ្លងកាត់ផ្លូវទឹកនៅមជ្ឈិមបូព៌ាមានសភាពគ្រោះថ្នាក់ លោក Paraj Ratanajaipan អ្នកនាំពាក្យកងទ័ពជើងទឹកថៃ បានជំរុញឲ្យប្រតិបត្តិករកប៉ាល់ទាំងអស់ បន្តការដឹកជញ្ជូនទំនិញតាមនាវាដោយអនុវត្តតាមពិធីសារសន្តិសុខឲ្យបានម៉ឺងម៉ាត់បំផុត ហើយថែមទាំងអះអាងថា កងទ័ពជើងទឹកនឹងបន្តតាមដាននិងវាយតម្លៃស្ថានភាព ហើយនឹងចេញសេចក្តីព្រមានបន្ថែមជាបន្ទាន់ ប្រសិនបើចាំបាច់។

នៅក្នុងការថ្លែងសុន្ទរកថាមួយ លោក Paraj បាននិយាយថា អាទិភាពរបស់រដ្ឋាភិបាលគឺធានាសុវត្ថិភាពរបស់នាវិកថៃ និងកាត់បន្ថយការរំខានដល់ពាណិជ្ជកម្មអន្តរជាតិរបស់ប្រទេសថៃក្នុងអំឡុងពេលវិបត្តិមជ្ឈិមបូព៌ាដែលកំពុងកើនឡើង។

គួររម្លឹកផងដែរថា កាលពីថ្ងៃពុធទី១១ខែមីនា នាវាដឹកទំនិញ Mayuree Naree ដែលដោតទង់ជាតិថៃបានរងការវាយប្រហារ អំឡុងពេលធ្វើដំណើរចេញពីកំពង់ផែ ខាលីហ្វា នៃប្រទេសអារ៉ាប់រួម ឆ្ពោះទៅកាន់ប្រទេសឥណ្ឌា បណ្ដាលឲ្យនាវិកចំនួន ២០នាក់ ត្រូវបានជួយសង្រ្គោះ ខណៈ ៣នាក់ បាត់ខ្លួននៅក្នុងសមុទ្ររកមិនទាន់ឃើញ។

ក្រោយកើតមានហេតុការណ៍ដ៏រន្ធ.ត់នេះ ក្រសួងការបរទេសថៃបានទាមទារឲ្យអ៊ីរ៉ង់ធ្វើការសុំទោស ប៉ុន្តែត្រូវបានអ៊ីរ៉ង់ច្រានចោលដោយបញ្ជាក់វិញថា ការណ៍ដែលបា.ញ់នាវាថៃខាងលើនោះ គឺដោយសារតែនាវានោះមិនអើពើនឹងការព្រ.មានរបស់ខ្លួន ហើយបើកបរចូលតំបន់ហាមឃាត់ដោយខ្លួនឯង៕

ស្របពេលសង្គ្រា.មនៅតំបន់មជ្ឈិមបូព៌ាបន្តឆាបឆេះយ៉ាងខ្លាំងដែលបង្កឡើងដោយអាមេរិក និងអ៊ីស្រាអែល សារព័ត៌មានយ៉ាងច្រើនបានចុះផ្សាយពីការបាត់បង់ជីវិ.តរបស់នាយករដ្ឋមន្ត្រីអ៊ីស្រាអែលដោយសារការវាយប្រ.ហាររបស់អ៊ីរ៉ង់ ហើយអ្វីដែលកាន់តែសង្ស័យបំផុត គឺក្នុងវីដេអូ លោក Benjamin Netanyahu មានម្រាមដៃរហូតដល់៦ម្រាម ទើបមហាជនជឿថា លោកបាត់បង់ជីវិ.ត ហើយវីដេអូនេះបង្កើតដោយបច្ចេកវិទ្យា AI ។ បន្ទាប់មក នាយករដ្ឋមន្ត្រីអ៊ីស្រាអែលក៏បង្ហោះវីដេអូថ្មីមួយទៀតបង្ហាញម្រាមដៃតែ៥ម្រាម ដើម្បីច្រាលចោលព័ត៌មាននេះ ។

ការិយាល័យនាយករដ្ឋមន្ត្រីអ៊ីស្រាអែលបានច្រានចោលព័ត៌មានផ្សព្វផ្សាយកាលពីថ្ងៃទី១៤ ខែមីនា ឆ្នាំ២០២៦ ដែលថា នាយករដ្ឋមន្ត្រីអ៊ីស្រាអែលបាត់បង់ជីវិ.តក្នុងប្រតិបត្តិការរបស់អ៊ីរ៉ង់ដើម្បីសងសឹកចំពោះការវាយប្រហារតាមផ្លូវអាកាសរបស់អាមេរិក និងអ៊ីស្រាអែល ។ មន្ត្រីការិយាល័យនាយករដ្ឋមន្ត្រីអ៊ីស្រាអែលបញ្ជាក់ថា វាជាព័ត៌មានក្លែងក្លាយ លោក Benjamin Netanyahu នៅមានជីវិត ប៉ុន្តែមិនបានបញ្ជាក់លម្អិតបន្ថែមទេ ។

ថ្មីៗនេះ សារព័ត៌មានជាច្រើនបានផ្សព្វផ្សាយវីដេអូនាយករដ្ឋមន្ត្រីអ៊ីស្រាអែល លោក Netanyahu និយាយសុន្ទរកថា ដែលមហាជនសន្និដ្ឋានថា លោកបាត់បង់ជីវិត ហើយវីដេអូនេះបង្កើតឡើងដោយបច្ចេកវិទ្យា AI ពីព្រោះនាយករដ្ឋមន្ត្រីអ៊ីស្រាអែលមានម្រាមដៃរហូតដល់៦ម្រាម ។

បន្ទាប់ពីមហាជនដាក់ការសង្ស័យ កាលពីថ្ងៃទី១៥ ខែមីនា លោក Netanyahu ក៏បង្ហោះវីដេអូថ្មីមួយទៀតក្នុង Instagram ដើម្បីបដិសេធពាក្យចចាមអារ៉ាមថា លោកបាត់បង់ជីវិតដោយសារការវាយប្រហាររបស់អ៊ីរ៉ង់ ស្របពេលស្ថានការណ៍តានតឹងនៅតំបន់មជ្ឈិមបូព៌ា ហើយលោកថែមទាំងបង្ហាញម្រាមដៃតែ៥ម្រាម មិនមែន៦ម្រាមទេ ។

វីដេអូថ្មី គឺលោក Netanyahu ស្ថិតនៅហាងកាហ្វេមួយកន្លែងក្នុងទីក្រុងយេរូសាឡឹម និងនិយាយថា លោកសុខចិត្តស្លាប់ដើម្បីពលរដ្ឋអ៊ីស្រាអែល តើពួកអ្នកចង់រាប់ចំនួនម្រាមដៃរបស់ខ្ញុំមែនទេ? បន្ទាប់មក លោកក៏រាប់ម្រាមដៃខ្លួនឯងម្តង១ ដើម្បីបដិសេធពាក្យចចាមអារ៉ាមនេះ ។

គួរបញ្ជាក់ថា ព័ត៌មានការបាត់បង់ជីវិតរបស់នាយករដ្ឋមន្ត្រីអ៊ីស្រាអែលបានល្បីល្បាញយ៉ាងខ្លាំងលើពិភពលោក បន្ទាប់ពីសង្គ្រាមរវាងអ៊ីរ៉ង់ជាមួយអាមេរិក និងអ៊ីស្រាអែល ឡើងកំដៅកាន់តែខ្លាំង ដោយមហាជនសង្ស័យក្នុងវីដេអូ គឺនាយករដ្ឋមន្ត្រីអ៊ីស្រាអែលមានម្រាមដៃច្រើនខុសធម្មតា ។ មហាជនសន្និដ្ឋានថា លោកបាត់បង់ជីវិតដោយសារការវាយប្រហាររបស់អ៊ីរ៉ង់ បន្ទាប់ពីលោកគំរាមផ្តាច់ជីវិតមេដឹកនាំកំពូលថ្មីរបស់អ៊ីរ៉ង់ គឺលោក Mojtaba Khamenei ៕

កាលពីថ្ងៃទី១៣ ខែមីនា ឆ្នាំ២០២៦ រដ្ឋមន្ត្រីក្រសួងការពារជាតិអាមេរិកបានលើកឡើងពីមេដឹកនាំកំពូលថ្មីរបស់អ៊ីរ៉ង់ លោក Mojtaba Khamenei កំពុងតែរងរបួសរហូតដល់មានស្លាកស្នាមដោយសារការវាយប្រ.ហារថ្ងៃដំបូងរបស់អាមេរិក និងអ៊ីស្រាអែលមកលើអ៊ីរ៉ង់ ទើបមេដឹកនាំកំពូលរូបនេះមិនបង្ហាញមុខជាសាធារណៈតាំងពីត្រូវបានតែងតាំងឱ្យឡើងកាន់តំណែងស្នងពីឪពុក ខណៈមន្ត្រីអ៊ីរ៉ង់ថា លោក Mojtaba រងរបួសស្រាលប៉ុណ្ណោះ និងនៅតែបំពេញភារកិច្ច ។

រដ្ឋមន្ត្រីក្រសួងការពារជាតិអាមេរិក លោក Pete Hegseth និយាយកាលពីថ្ងៃទី១៣ ខែមីនា ថា លោក Mojtaba មេដឹកនាំកំពូលថ្មីរបស់អ៊ីរ៉ង់រងរបួសដោយសារការវាយប្រហារ ហើយលោកក៏បានចោទសួរពីសមត្ថភាពដឹកនាំប្រទេសរបស់លោក Mojtaba ផងដែរ បន្ទាប់ពីអាមេរិក និងអ៊ីស្រាអែលវាយប្រហារអ៊ីរ៉ង់រយៈពេលជាង១០ថ្ងៃ ។

រហូតមកដល់ថ្ងៃទី១៣ ខែមីនា គ្មានការផ្សព្វផ្សាយរូបភាពថ្មីៗរបស់មេដឹកនាំកំពូលថ្មីរបស់អ៊ីរ៉ង់តែ តាំងពីអ៊ីស្រាអែលបើកការវាយប្រហារអ៊ីរ៉ង់កាលពីថ្ងៃទី២៨ ខែកុម្ភៈ ដែលបណ្តាលឱ្យសមាជិកក្រុមគ្រួសាររបស់លោក Mojtaba បាត់បង់ជីវិតជាច្រើននាក់ រួមទាំងឪពុក និងភរិយាផងដែរ ។

សេចក្តីថ្លែងការណ៍ដំបូងរបស់លោក Mojtaba ត្រូវបានអានដោយអ្នករាយការណ៍ព័ត៌មានរបស់ទូរទស្សន៍ជាតិអ៊ីរ៉ង់កាលពីថ្ងៃទី១២ ខែមីនា គឺលោកមិនបង្ហាញមុខជាសាធារណៈទេ ។ ក្នុងសេចក្តីថ្លែងការណ៍នេះ លោកបញ្ជាក់ថា នឹងបិទច្រកសមុទ្រ Hormuz បន្តទៀត និងអំពាវនាវឱ្យប្រទេសជិតខាងរបស់អ៊ីរ៉ង់ បិទមូលដ្ឋានកងទ័ពអាមេរិកក្នុងទឹកដីរបស់ខ្លួន បើមិនដូច្នោះទេ នឹងរងការវាយប្រហារពីអ៊ីរ៉ង់ ។

លោក Pete Hegseth រដ្ឋមន្ត្រីក្រសួងការពារជាតិអាមេរិកថា ៖ «មេដឹកនាំកំពូលថ្មីរបស់អ៊ីរ៉ង់រងរបួសមានស្លាកស្នាម ទើបចេញសេចក្តីថ្លែងការណ៍លាក់មុខ ថែមទាំងគ្មានសំឡេង គ្មានវីដេអូ សេចក្តីថ្លែងការណ៍នេះជាលាយលក្ខណ៍អក្សរប៉ុណ្ណោះ ។ អ៊ីរ៉ង់មានកាមេរ៉ា និងឧបករណ៍ថតសំឡេងជាច្រើន ហេតុអ្វីមេដឹកនាំកំពូលអ៊ីរ៉ង់ចេញសេចក្តីថ្លែងការណ៍ជាលាយលក្ខណ៍អក្សរ? ដោយសារឪពុកបាត់បង់ជីវិត ទើបលោក Mojtaba លាក់ខ្លួន» ។

ក្រៅពីនេះ រដ្ឋមន្ត្រីក្រសួងការពារជាតិអាមេរិកបានលើកឡើងពីប្រតិបត្តិការកងទ័ពអាមេរិក គឺដើម្បីបំផ្លាញសមត្ថភាពមីស៊ីល និងដ្រូនរបស់អ៊ីរ៉ង់ រួមទាំងកំទេចកងទ័ពជើងទឹកអ៊ីរ៉ង់ ដោយលោកថា អាមេរិកនឹងមិនបង្ហាញក្តីមេត្តាក្នុងសង្គ្រាមឡើយ យើងនឹងបន្តដាក់សម្ពាធ បន្តវាយប្រហារ មិនអាណិតអាសូរសត្រូវដាច់ខាត ។

តាមការអះអាងរបស់មន្ត្រីអ៊ីរ៉ង់ម្នាក់មកកាន់សារព័ត៌មាន Reuters កាលពីថ្ងៃទី១១ ខែមីនា គឺលោក Mojtaba ដែលទើបឡើងកាន់តំណែងរងរបួសស្រាលដោយសារការវាយប្រហារក្នុងសង្គ្រាមថ្ងៃដំបូង លោកនៅតែបំពេញភារកិច្ច ប៉ុន្តែមន្ត្រីអ៊ីរ៉ង់មិនបាននិយាយលម្អិតពីស្ថានភាពរបួសទេ ។

គួរបញ្ជាក់ថា ក្នុងរយៈពេល១៤ថ្ងៃមកនេះ អាមេរិកបានវាយប្រហារគោលដៅរហូតដល់ជាង៦,០០០កន្លែងនៅទូទាំងប្រទេសអ៊ីរ៉ង់ ហើយការទម្លាក់គ្រាប់បែករួមគ្នារវាងអាមេរិក និងអ៊ីស្រាអែលរយៈពេលជិត២សប្តាហ៍ បណ្តាលឱ្យបាត់បង់ជីវិតមនុស្សនៅអ៊ីរ៉ង់ប្រមាណ២,០០០នាក់ ៕

កាលពីខែធ្នូ ឆ្នាំ២០២៥ ចិនមានប្រតិកម្មម្តងហើយ រហូតបើកសមយុទ្ធកងទ័ពដ៏ធំសម្បើមឡោមព័ទ្ធកោះតៃវ៉ាន់ បន្ទាប់ពីអាមេរិកសម្រេចលក់សព្វាវុ.ធឱ្យតៃវ៉ាន់ ហើយលើកនេះ អាមេរិកត្រៀមលក់សព្វាវុ.ធដ៏ច្រើនឱ្យតៃវ៉ាន់ទៀត រង់ចាំតែលោកប្រធានាធិបតី Donald Trump ចុះហត្ថលេខា ទោះជាមានការប្រឆាំងពីចិនក៏ដោយ ។

ប្រភពព័ត៌មានពីមន្ត្រីរដ្ឋាភិបាលអាមេរិកកាលពីថ្ងៃទី១២ ខែមីនា ឆ្នាំ២០២៦ អាមេរិកនឹងលក់សព្វាវុធដ៏ច្រើនបំផុតទៅឱ្យតៃវ៉ាន់ ស្មើទឹកប្រាក់១ម៉ឺន ៤ពាន់លានដុល្លារ ហើយប្រធានាធិបតីអាមេរិក លោក Donald Trump នឹងចុះហត្ថលេខាអនុម័តការលក់សព្វាវុធបន្ទាប់ពីបញ្ចប់ដំណើរទស្សនកិច្ចទៅប្រទេសចិននៅខែមេសា រីឯសព្វាវុធដែលនឹងលក់ឱ្យតៃវ៉ាន់ មានដូចជា ៖ មីស៊ីលការពារដែនអាកាសប្រភេទ PAC-3 និង NASAMS ។

កិច្ចព្រមព្រៀងលក់អាវុធឱ្យតៃវ៉ាន់នឹងធ្វើរួចរាល់នៅមុនពេលលោកប្រធានាធិបតី Trump ធ្វើដំណើរទស្សនកិច្ចទៅប្រទេសចិនចាប់ពីថ្ងៃទី៣១ ខែមីនា ដល់ថ្ងៃទី២ ខែមេសា ដើម្បីជួបពិភាក្សាជាមួយប្រធានាធិបតីចិន លោក Xi Jinping ។ បន្ទាប់មក ពេលលោកប្រធានាធិបតី Trump ត្រឡប់មកពីចិនវិញ អាមេរិកនឹងប្រកាសពីការលក់សព្វាវុធឱ្យតៃវ៉ាន់ជាផ្លូវការ ។

បើទោះជាប្រធានាធិបតីចិន លោក Xi បាននិយាយកាលពីខែកុម្ភៈ ឆ្នាំ២០២៦ ថា អាមេរិកត្រូវតែគិតឱ្យបានហ្មត់ចត់ពីការលក់សព្វាវុធឱ្យតៃវ៉ាន់ ហើយក្រសួងការបរទេសចិនថែមទាំងចេញសេចក្តីថ្លែងការណ៍បញ្ជាក់ពីរដ្ឋាភិបាលចិនប្រឆាំងការលក់សព្វាវុធ ប៉ុន្តែគេរំពឹងថា អាមេរិកនឹងមិនស្តាប់តាមការលើកឡើងរបស់ចិនទេ ។

តាមការអះអាងរបស់មន្ត្រីអាមេរិក គឺពេលលោកប្រធានាធិបតី Trump ចុះហត្ថលេខាអនុម័តការលក់សព្វាវុធរួចរាល់ អាមេរិកនឹងប្រកាសពីការលក់នេះភ្លាមៗ ។ ក្រៅពីនេះ អាមេរិកក៏ត្រៀមលក់សព្វាវុធការពារជាតិផ្សេងទៀតឱ្យតៃវ៉ាន់ផងដែរ ស្មើទឹកប្រាក់៦ពាន់លានដុល្លារ និងកំពុងរង់ចាំការចុះហត្ថលេខាពីលោកប្រធានាធិបតី Trump ដូចគ្នា ។

ការលក់សព្វាវុធឱ្យតៃវ៉ាន់ក្នុងអំឡុងពេលលោកប្រធានាធិបតី Trump ឡើងកាន់តំណែងអាណត្តិទី២ គឺមានចំនួនទឹកប្រាក់ច្រើនជាងអំឡុងពេលលោក Joe Biden កាន់តំណែងរយៈពេល៤ឆ្នាំទៅទៀត ។ រដ្ឋាភិបាលអាមេរិកទើបតែលក់សព្វាវុធឱ្យតៃវ៉ាន់ ស្មើទឹកប្រាក់១ម៉ឺន ១ពាន់លានដុល្លារកាលពីខែធ្នូ ឆ្នាំ២០២៥ ដូចជា ៖ កាំជ្រួច ដ្រូន និងកាំភ្លើងធំ ។

ចំណែករដ្ឋាភិបាលតៃវ៉ាន់ក្រោមការដឹកនាំរបស់លោក Lai Ching-te បានតាមដានពីដំណើរការលក់សព្វាវុធពីព្រោះបារម្ភថា ដំណើរទស្សនកិច្ចរបស់លោកប្រធានាធិបតី Trump ទៅចិនឆាប់ៗនេះ ចិនអាចបញ្ចុះបញ្ចូលឱ្យអាមេរិកពន្យារពេលលក់សព្វាវុធ និងបង្កើតបរិយាកាសស្និទ្ធស្នាលមុនដំណើរទស្សនកិច្ច ។

គួរបញ្ជាក់ថា ស្ថានការណ៍តានតឹងកាន់តែខ្លាំងឡើងរវាងតៃវ៉ាន់ និងចិនកាលពីខែធ្នូ ឆ្នាំ២០២៥ រហូតដល់ចិនបើកសមយុទ្ធកងទ័ពដ៏ធំសម្បើមឡោមព័ទ្ធកោះតៃវ៉ាន់ គឺបន្ទាប់ពីអាមេរិកសម្រេចកាលពីពាក់កណ្តាលខែធ្នូ យល់ព្រមលក់សព្វាវុធឱ្យតៃវ៉ាន់ ។ រីឯការសម្រេចចិត្តលើកនេះ តើនឹងធ្វើឱ្យចិនប្រតិកម្មដូចលើកមុនឬយ៉ាងណា ៕