ប្រទេសអូស្ត្រាលី ៖ កាលពីថ្ងៃទី២១ ខែមេសា ឆ្នាំ២០២៥ សារព័ត៌មានបរទេសរាយការណ៍ថា នាយករដ្ឋមន្ត្រីអូស្ត្រាលីប្រាប់ពលរដ្ឋប្រយ័ត្នគ្រោះថ្នា.ក់ ដោយសារអាកាសធាតុមិនល្អបណ្តាលឱ្យមានរលកយក្សនៅតាមឆ្នេរសមុទ្រ ក្រោយរលកយក្សបានបោកបក់ខ្លាំងមកលើឆ្នេរសម្លា.ប់ ពលរដ្ឋអូស្ត្រាលី រហូតដល់៧នាក់ ។ ក្រៅពីនេះ មានពលរដ្ឋខ្លះទៀតបាត់ខ្លួនក្នុងសមុទ្រ ដែលធ្វើឱ្យភ្នាក់ងារសង្គ្រោះប្រើប្រាស់ឧទ្ធម្ភាគចក្រតាមស្វែងរក ។

ទឹករលកយក្សបានបោកកុមារអាយុ៩ឆ្នាំ មកជាប់នៅចន្លោះថ្មលើឆ្នេរសមុទ្ររដ្ឋ New South Wales ហើយកុមាររូបនេះក្លាយជាមនុស្សស្លា.ប់ ទី៧ ដោយសាររលកសមុទ្រធំៗ ។ នៅសប្តាហ៍ទី៣ ខែមេសា ទឹករលកខ្ពស់ៗបានបោកបក់មកលើឆ្នេរសមុទ្រនៅរដ្ឋ New South Wales បណ្តាលឱ្យពលរដ្ឋអូស្ត្រាលីដែលមកកម្សាន្តនៅឆ្នេរធ្លាក់ចូលសមុទ្រជាបន្តបន្ទាប់ ។ អាជ្ញាធរបានព្យាយាមស្វែងរកសាកសពពលរដ្ឋក្នុងសមុទ្រ ខណៈពលរដ្ឋ២នាក់ទៀតបាត់ខ្លួនរកពុំឃើញ ។

នាយកអង្គការ Surf Live Saving នៅរដ្ឋ New South Wales ដែលមានពលរដ្ឋស្លាប់ច្រើនដោយសាររលកសមុទ្រ បាននិយាយមកកាន់ស្ថានីយទូរទស្សន៍ ABC ថា វាជាហេតុការណ៍លង់ទឹកដ៏អាក្រក់បំផុត ដែលអូស្ត្រាលីធ្លាប់បានកត់ត្រាកាលពីចុងសប្តាហ៍ថ្ងៃបុណ្យ Easter ។ កាលពីចុងសប្តាហ៍កន្លងមក គួរតែជាសប្តាហ៍ពោរពេញទៅដោយភាពសប្បាយរីករាយ និងមានកម្មវិធីសាសនាផ្សេងៗ ប៉ុន្តែបែរជាកើតហេតុការណ៍ដ៏សោកសៅបំផុត ។

ភ្នាក់ងារសង្គ្រោះបន្ទាន់បានយកសាកសពក្មេងប្រុសម្នាក់ពីឆ្នេរសមុទ្រទីក្រុង New South Wales ដែលឆ្ងាយពីទីក្រុង Sydney ប្រមាណ៤០០គីឡូម៉ែត្រ ។ កាលពីថ្ងៃទី២០ ខែមេសា ឧទ្ធម្ភាគចក្រភ្នាក់ងារសង្គ្រោះបានប្រទះឃើញឪពុក និងកូនប្រុស អណ្តែតទឹកសមុទ្រក្បែរឆ្នេរវ៉ាត់តាម៉ូឡា ភាគខាងត្បូងទីក្រុង Sydney ដោយកូនប្រុស អាយុ១៤ឆ្នាំ ត្រូវបានជួយសង្គ្រោះ ប៉ុន្តែឪពុកក្មេងប្រុស បានស្លាប់ ។ ក្រៅពីនេះ សមត្ថកិច្ចនៅរដ្ឋ Victoria បានស្វែងរកបុរសម្នាក់ អាយុ៤១ឆ្នាំ ដែលបានបាត់ខ្លួនកាលពីថ្ងៃទី១៨ ខែមេសា ។

ចាប់ពីថ្ងៃទី១៨ ខែមេសា អង្គការ Surf Live Saving បានជួយសង្គ្រោះជនរងគ្រោះសរុបជាង១៥០នាក់ នៅតាមឆ្នេរសមុទ្រ ហើយអង្គការនេះបញ្ជាក់ថា កត្តាផ្សេងៗ ដូចជា ៖ សីតុណ្ហភាពខ្ពស់នាថ្ងៃសម្រាកចុងសប្តាហ៍ និងរលកធំៗនៅឆ្នេរសមុទ្ររដ្ឋ New South Wales និងរដ្ឋ Victoria ធ្វើឱ្យពលរដ្ឋអូស្ត្រាលីស្លាប់កាន់តែច្រើន ។ បើទោះជាអាកាសធាតុល្អប្រសើរឡើងនៅថ្ងៃទី២១ ខែមេសា ក្តី ប៉ុន្តែអាជ្ញាធរសំណូមពរឱ្យពលរដ្ឋធ្វើដំណើរមកឆ្នេរសមុទ្របង្កើនការប្រុងប្រយ័ត្ន ។

នាយករដ្ឋមន្ត្រីអូស្ត្រាលី លោក Anthony Albanese បានបង្ហាញការសោកស្តាយទៅកាន់ក្រុមគ្រួសារសាកសព និងថ្លែងថា ៖ «សូមពលរដ្ឋទាំងអស់ប្រុងប្រយ័ត្នគ្រោះថ្នាក់ ជាពិសេស ឪពុក-ម្តាយត្រូវថែទាំកូនៗរបស់ខ្លួន» ។

យោងតាមរបាយការណ៍របស់អង្គការ Royal Life Saving Australia គឺពលរដ្ឋអូស្ត្រាលីបានស្លាប់ដោយសារលង់ទឹកនៅទូទាំងប្រទេស ស្មើនឹង៣២៣នាក់ គិតត្រឹមខែមិថុនា ឆ្នាំ២០២៤ ។ ចំនួននេះរួមបញ្ចូលទាំងពលរដ្ឋស្លាប់នៅតាមដងទន្លេ អូរ និងឆ្នេរសមុទ្រ ស្មើជិត៤០% នៃការស្លាប់ក្នុងរដ្ឋ New South Wales ៕

សហរដ្ឋអាមេរិក ៖ កាលពីថ្ងៃចន្ទ ទី២១ ខែមេសា សកលវិទ្យាល័យ Harvard បានដាក់ពាក្យបណ្ដឹ..ងទៅកាន់តុលាការកំពូលក្នុងរដ្ឋ Massachusetts ដោយចោ..ទប្រកាន់សេតវិមាន និងលោក Donald Trump ពាក់ព័ន្ធនឹងការបង្កកជំនួយជាទឹកប្រាក់ចំនួន ២.២ពាន់លានដុល្លា និងការគំរា..មបញ្ឃប់ការទទួលចុះឈ្មោះនិសិសត្សបរទេស។

គួររំលឹកថា កាលពីសប្តាហ៍មុន រដ្ឋបាលលោក Trump បានប្រកាសថា ខ្លួននឹងបង្កកមូលនិធិសហព័ន្ធចំនួន 2.2 ពាន់លានដុល្លារ និងជំនួយចំនួន 1 ពាន់លានដុល្លារទៀត ហើយទាមទារសម្បទានជាច្រើន ដោយអះអាងថា វាជាវិធានការចាំបាច់ដើម្បីប្រយុទ្ធនឹងការប្រឆាំងសាសនា (antisemitism) នៅក្នុងបរិវេណសាលា។ ក្នុងលិខិតដែលសាកលវិទ្យាល័យ Harvard បានទទួលពីខាងសេតវិមាន គឺបានបញ្ជាក់ពីការទាមទារជាបន្តបន្ទាប់ទាក់ទងនឹងគោលការណ៍ការចូលរៀន ព័ត៌មានផ្ទាល់ខ្លួននិសិត្ស និងកម្មវិធីសិក្សារបស់សាលា ដែលទាំងអស់នេះគឺជាការរំលោ..ភលើគោលការណ៍របស់សាលា។ នេះបើកាសែត The New York Times បានរាយការណ៍កាលពីសប្តាហ៍មុន។

ដោយឡែក សម្រាប់ពាក្យបណ្ដឹង កាលពីថ្ងៃចន្ទនេះ សាកលវិទ្យាល័យ Harvard បានចោទប្រកាន់រដ្ឋបាលថាបានរំលោភលើសិទ្ធិធ្វើវិសោធនកម្មលើកទីមួយរបស់ខ្លួន ហើយបានអះអាងថាមន្ត្រីរបស់សេតវិមានមិនបានអនុវត្តតាមនីតិវិធី និងបទប្បញ្ញត្តិរដ្ឋបាលសហព័ន្ធនោះទេ នៅពេលដកហូតមូលនិធិពីពីស្ថាប័នរបស់ខ្លួន។

ប្រធានសាកលវិទ្យាល័យលោក Alan M. Garber បានថ្លែងនៅក្នុងលិខិតមួយទៅកាន់សហគមន៍ Harvard ថា ៖ សកម្មភាពថ្មីៗរបស់រដ្ឋបាល Trump រួមទាំងមូលនិធិសហព័ន្ធចំនួន ២.២ ពាន់លានដុល្លារដែលបានបង្កកនៅ Harvard បានផ្ដល់ផលវិបាកសម្រាប់ និស្សិត សាស្ត្រាចារ្យ បុគ្គលិក អ្នកស្រាវជ្រាវ និងជំហរនៃការអប់រំរបស់សកលវិទ្យាល័យ” ។ លើបានបន្តថា ៖ គាត់មានការព្រួយបារម្ភអំពីការរើសអើង និងការប្រឆាំងផ្នែកសាសនារបស់រដ្ឋបាលTrump។ ប៉ុន្តែសកលវិទ្យាល័យ Harvard នឹងតស៊ូប្រយុទ្ធជាមួយនឹងការទាមទារនេះ។

លោក Trump ក៏បានអំពាវនាវដល់សាកលវិទ្យាល័យនានា តាមរយៈប្រព័ន្ធ Truth Social ថា “Harvard ប្រហែលជាត្រូវអស់សិទ្ធិជាស្ថាប័នដែលរដ្ឋាភិបាលលើកលែងពន្ធហើយ ប្រសិនបើវានៅតែបន្តជំរុញផ្នែកនយោបាយ មនោគមវិជ្ជា និងភេរវករដោយការបំផុសគំនិត និងគាំទ្របែបនេះ វានឹងត្រូវបង់ពន្ធដូចស្ថាប័ននយោបាយទូទៅដែរហើយ”

ចំណែកមេធាវីពីរនាក់តំណាងសកលវិទ្យាក័យ Harvard បាននិយាយថា ៖ សាកលវិទ្យាល័យនឹងមិនធ្វើតាមការទាមទាររបស់រដ្ឋាភិបាលទេ ប៉ុន្តែសាលានៅតែបើកចំហសម្រាប់ទទួលការចចារគ្នាជានិច្ច ។ ខណៈពេលនេះ សាកលវិទ្យាល័យ Harvard បានទទួលការគាំទ្រពីសាកលវិទ្យាល័យផ្សេងទៀតជាច្រើន ក៏ដូចជានិស្សិតបញ្ចប់ការសិក្សានៅផ្នែកច្បាប់នៅ Harvard រួមទាំងអតីតប្រធានាធិបតីលោក Barack Obama ផងដែរ ៕

ទីក្រុងប៉េកាំង ៖ រដ្ឋអាជ្ញាកំពូលនៃប្រទេសចិន បានចេញសេចក្ដីប្រកាសឲ្យចាប់ខ្លួន អតីតមន្ត្រីជាន់ខ្ពស់ប្រឆាំងអំពើពុករលួយ លោក ពីបទសង្ស័យទទួលសំណូកសូកប៉ាន់។ នេះបើតាមសារព័ត៌មាន Reuters នៅថ្ងៃអង្គារ ទី២២ ខែមេសា ។

គួរជម្រាបថា មុនពេលត្រូវបានចាប់ខ្លួន លោកLi Gang មានតួនាទីជាប្រធានក្រុមអធិការកិច្ច និងត្រួតពិនិត្យវិន័យ ក្រោមនាយកដ្ឋានគ្រប់គ្រងធនធានមនុស្សនៃគណៈមជ្ឈិមបក្សកុម្មុយនីស្តចិន។ ប៉ុន្តែក្រោយមក លោកត្រូវបានបក្សកុម្មុយនិស្តចិនបណ្ដេញចេញ បន្ទាប់ពីគេបានរកឃើញថាគាត់មានជាប់ព័ន្ធនឹងការបំពានយ៉ាងធ្ងន់ធ្ងរលើវិន័យបក្ស និងច្បាប់។

យ៉ាងណាមិញ ការរកឃើញថាមានមន្រ្តីពុករ..លួយ នៅក្នុងប្រទេសចិនមិនមែនទើបតែមានលោក Li Gang តែម្នាក់ទេ កន្លងមកនៅឆ្នាំ ២០២៤ មន្ត្រីជាន់ខ្ពស់សរុបចំនួន ៥៦នាក់ បានចា..ប់ឃ..ត់ខ្លួន និងកំពុងស្ថិតនៅក្រោមការស៊ើបអង្កេតរបស់រដ្ឋអាជ្ញាកំពូល។

ប្រធានាធិបតីចិនលោក ស៊ី ជិនពីង បានរឹតបន្តឹងយ៉ាងម៉ឺងម៉ាត់ទៅលើមន្រ្តីគ្រប់ជាន់ថ្នាក់ និងបានលើកឡើងថា៖ អំពើពុករលួយជាការគំរាមកំហែងដ៏ធំបំផុតចំពោះបក្សកុម្មុយនិស្តចិន។ លោកថែមទាំងបានសង្កត់ធ្ងន់ថា “អំពើពុករលួយនៅតែបន្តរីករាលដាលនៅក្នុងសង្គមប្រទេសចិន” ដូចនេះលោកនឹងចាត់វិធានការក្ដៅចំពោះមន្រ្តីណា ដែលហ៊ានប្រព្រឹត្តិល្មើសនឹងច្បាប់។

ដោយឡែក កាលពីខែមិថុនា ឆ្នាំ២០២៤ គណៈកម្មាធិការមជ្ឈិមបក្សកុម្មុយនិស្តចិន បានសម្រេចបណ្តេញអតីតរដ្ឋមន្ត្រីការពារជាតិពីររូប គឺលោក Li Shangfu និង Wei Fenghe ចេញពីបក្ស។ បក្សកុម្មុយនីស្តចិនបានអះអាងថា អតីតរដ្ឋមន្ត្រីទាំងពីររូបបានបំពានលើវិន័យបក្ស និងច្បាប់។ ជាងនេះទៅទៀត អតីតមន្រ្តីធំៗ ដែលមានដូចជារដ្ឋមន្ត្រីយុត្តិធម៌លោក Tang Yijun, អតីតរដ្ឋមន្ត្រីកសិកម្មលោក Tang Renjian និងអតីតប្រធានរដ្ឋបាលទូទៅនៃកីឡា ចិន Gou Zhongwen ក៏កំពុងស្ថិតនៅក្នុងការស៊ើបអង្កេតផងដែរ៕

ប្រទេសថៃ ៖ កាលពីថ្ងៃទី២២ ខែមេសា ឆ្នាំ២០២៥ ភ្នាក់ងារឧតុនិយមថៃបានប្រកាសទៅកាន់ពលរដ្ឋនៅទូទាំងប្រទេស ជាពិសេស ភាគខាងជើង ភាគឦសាន និងភាគកណ្តាល ចូរថែទាំសុខភាពឱ្យបានល្អដើម្បីការពារការដាច់សរសៃឈាមខួរក្បាល ដោយសារសីតុណ្ហភាពនៅប្រទេសថៃនឹងកើនឡើងខ្ពស់ រហូតដល់៤២អង្សាសេ ចាប់ពី២ថ្ងៃ ទៅ៣ថ្ងៃខាងមុខ ។

តាមការប្រកាសរបស់ភ្នាក់ងារឧតុនិយម គឺកាលពីថ្ងៃទី២២ ខែមេសា កន្លងមក តំបន់ជាច្រើនរបស់ថៃមានសីតុណ្ហភាពកើនឡើងខ្ពស់រហូតដល់៤០អង្សាសេ និងគ្មានភ្លៀងធ្លាក់ ហើយសីតុណ្ហភាពនឹងកើនឡើងខ្ពស់ថែមទៀត ជាពិសេស ភាគខាងជើង អាចនឹងកើនឡើងចាប់ពី៤១អង្សាសេ ទៅ៤២អង្សាសេ នាពេលឆាប់ៗនេះ ។ វាអាចធ្វើឱ្យពលរដ្ឋអស់កម្លាំងដោយសារអាកាសធាតុក្តៅ (Heat Exhaustion) និងឈានទៅដាច់សរសៃឈាមខួរក្បាល (Heatstroke) ដែលត្រូវការសង្គ្រោះបន្ទាន់នៅមន្ទីរពេទ្យ ។

ការអស់កម្លាំងដោយសារអាកាសធាតុក្តៅ (Heat Exhaustion) ពុំចាំបាច់ទទួលការព្យាបាលបន្ទាន់ទេ បើអាចកាត់បន្ថយសីតុណ្ហភាពរាងកាយក្នុងរយៈពេល៣០នាទី ប៉ុន្តែបើបណ្តោយវារហូតឈានទៅដាច់សរសៃឈាមខួរក្បាល គឺត្រូវទទួលការព្យាបាលនៅមន្ទីរពេទ្យភ្លាមៗ ។ រោគសញ្ញាការអស់កម្លាំងដោយសារអាកាសធាតុក្តៅ រួមមាន ៖ វិលមុខ ឈឺក្បាល ក្អួតចង្អោរ បើកញើសច្រើនខុសធម្មតា ស្បែកត្រជាក់ស្លេកក្លាយជាកន្ទួល រមួលក្រពើដៃ-ជើង ដកដង្ហើមញាប់ បេះដូងលោតញាប់ សីតុណ្ហភាពរាងកាយកើនឡើងខ្ពស់ ស្រេកទឹក និងល្ហិតល្ហៃ ។

រោគសញ្ញាការអស់កម្លាំងដោយសារអាកាសធាតុក្តៅ មានលក្ខណៈស្រដៀងគ្នាមិនថាមនុស្សចាស់ ឬកុមារ ប៉ុន្តែកុមារអាចមានអាការៈឆាប់ខឹងផងដែរ ។ បើឃើញអ្នកណាមានរោគសញ្ញាទាំងនេះ គួរប្រញាប់កាត់បន្ថយសីតុណ្ហភាពរាងកាយ និងឱ្យផឹកទឹក ។

ការជួយសង្គ្រោះបឋមសម្រាប់ការអស់កម្លាំងដោយសារអាកាសធាតុក្តៅ អាចធ្វើតាមវិធីខាងក្រោម ៖
១-នាំអ្នកជំងឺទៅកន្លែងម្លប់
២-ដោះសម្លៀកបំពាក់មិនចាំបាច់ចេញពីខ្លួនអ្នកជំងឺ ដូចជា ៖ អាវធំពាក់ខាងក្រៅ និងស្រោមជើង
៣-ផឹកទឹកត្រជាក់
៤-កាត់បន្ថយសីតុណ្ហភាពរាងកាយ ដោយការប្រោះទឹកត្រជាក់ ឬយកកន្សែងជ្រលក់ទឹកជូតខ្លួន ឬយកកន្សែងត្រជាក់ដាក់នៅក្លៀក-ក និងប្រើប្រាស់កង្ហារជួយបញ្ចេញកំដៅ ។ គួរថែទាំអ្នកជំងឺឱ្យបានដិតដល់រហូតដល់សុខភាពល្អប្រសើរឡើងវិញ បើអនុវត្តតាមវិធីទាំងនេះ សុខភាពនឹងល្អឡើងវិញរយៈពេល៣០នាទី ។

ភ្នាក់ងារឧតុនិយមសូមឱ្យពលរដ្ឋរស់នៅតំបន់ក្តៅប្រុងប្រយ័ត្ន និងការពារខ្លួនពីការដាច់សរសៃឈាមខួរក្បាល ព្រមទាំងសង្កេតរោគសញ្ញាខុសប្រក្រតីក្នុងរាងកាយ ។ បើឃើញរោគសញ្ញាសង្ស័យថា ជាការដាច់សរសៃឈាមខួរក្បាល គួររកន្លែងម្លប់ ឬសុំជួយសង្គ្រោះពីគ្រូពេទ្យជាបន្ទាន់ ៕

ប្រទេសថៃ ៖ កាលពីវេលាម៉ោង២ភ្លឺ ថ្ងៃទី២៣ ខែមេសា ឆ្នាំ២០២៥ ភ្នាក់ងារពន្លត់ភ្លើងខេត្តឈៀងម៉ៃ ប្រទេសថៃ បានទទួលសេចក្តីរាយការណ៍ថា មានភ្លើងឆេះសណ្ឋាគារផ្កាយ៥ ឈ្មោះ «តារាថេវី» ជាសណ្ឋាគារដ៏ល្បីរបស់ខេត្តឈៀងម៉ៃ ហើយក៏បញ្ជូនកម្លាំង និងរថយន្តពន្លត់ភ្លើងមកកាន់កន្លែងកើតហេតុជាបន្ទាន់ ។ ប៉ុន្តែដោយសារផ្នែកខ្លះនៃអគារសណ្ឋាគារបានសាងសង់ពីស៊ីម៉ងត៍ និងឈើ ទើបធ្វើឱ្យភ្លើងកាន់តែឆេះរាលដាលខ្លាំងឡើង ពិបាកគ្រប់គ្រងស្ថានការណ៍ ។

នៅព្រឹកថ្ងៃទី២៣ ខែមេសានេះ គ្មានការបញ្ជាក់ពីមូលហេតុច្បាស់លាស់ដែលបណ្តាលឱ្យភ្លើងឆេះសណ្ឋាគារ និងទំហំការខូចខាតទេ ។ ភ្នាក់ងារពន្លត់ភ្លើងបានចំណាយពេលប្រមាណ៣ម៉ោង ទើបអាចពន្លត់ភ្លើង និងត្រួតពិនិត្យបរិវេណជុំវិញសណ្ឋាគារដើម្បីកុំឱ្យភ្លើងឆេះរាលដាលទៅកន្លែងផ្សេងៗ ។ ហេតុការណ៍នេះពុំបណ្តាលឱ្យមានមនុស្សរងបួស ឬស្លាប់ទេ ។

សារព័ត៌មានថៃនឹងអេបឌេតព័ត៌មានភ្លើងឆេះជាបន្តបន្ទាប់ពីមន្ត្រីពាក់ព័ន្ធ ។ រីឯមូលហេតុភ្លើងឆេះសណ្ឋាគារ គឺត្រូវរង់ចាំសមត្ថកិច្ចចុះមកត្រួតពិនិត្យទីតាំងកើតហេតុម្តងទៀត ដើម្បីឱ្យច្បាស់ថា តើវាបណ្តាលមកពីអ្វី?

សារព័ត៌មាន Thairath រាយការណ៍ថា ភ្នាក់ងារពន្លត់ភ្លើងបានបញ្ជូនកម្លាំង និងរថយន្តពន្លត់ភ្លើងជាច្រើនគ្រឿងទៅកន្លែងកើតហេតុនៅម៉ោង២ភ្លឺថ្ងៃទី២៣ ខែមេសា ប៉ុន្តែផ្នែកខ្លះនៃអគារសណ្ឋាគារបានសាងសង់ពីស៊ីម៉ងត៍ និងឈើ ទើបធ្វើឱ្យភ្លើងកាន់តែឆេះខ្លាំងឡើង ។ រហូតមកដល់ម៉ោង៣និង៥០នាទីភ្លឺ (ថ្ងៃដដែល) ទើបភ្នាក់ងារពន្លត់ភ្លើងអាចគ្រប់គ្រងស្ថានការណ៍បានខ្លះៗ ប៉ុន្តែនៅមានផ្កាភ្លើងឆេះនៅកន្លែងមួយចំនួនទៀត ដែលតម្រូវឱ្យបាញ់ទឹកជាបន្តបន្ទាប់ ។ នៅព្រឹកថ្ងៃទី២៣ ខែមេសា មន្ត្រីជំនាញពុំទាន់អាចវាយតម្លៃទំហំការខូចខាតរបស់សណ្ឋាគារទេ ។

សណ្ឋាគារនេះមានទីតាំងស្ថិតនៅឃុំថាសាឡា ស្រុកមឿងឈៀងម៉ៃ ខេត្តឈៀងម៉ៃ បានសាងសង់កាលពីឆ្នាំ២០០២ និងចំណាយប្រាក់សាងសង់អស់រាប់លានបាត ។ សណ្ឋាគារសាងសង់តាមបែបបុរាណយ៉ាងស្រស់ស្អាត ដែលលាតសន្ធឹងលើផ្ទៃដីយ៉ាងធំទូលាយ មាន១២៣បន្ទប់ ព្រមទាំងតុបតែងលម្អដោយក្បូរក្បាច់រចនាយ៉ាងច្រើន ។

កាលពីដើមឆ្នាំ២០២០ សណ្ឋាគារនេះបានបិទដំណើរការមួយរយៈ ដោយសារជំងឺកូវីដ-១៩ ឆ្លងរាតត្បាត ។ នៅខែមិថុនា ឆ្នាំ២០២០ សណ្ឋាគារបានប្រកាសកាត់បន្ថយបុគ្គលិក និងបិទទ្វារ ហើយក្រោយមក សណ្ឋាគារត្រូវបានគ្រប់គ្រងដោយ Nikki Beach Worldwide និងប្តូរឈ្មោះជា «Nikki Dhara Dhevi Chiang Mai» ។

បើតាមសេចក្តីរាយការណ៍ចុងក្រោយ គឺនៅវេលាម៉ោង៦និង៣០នាទីព្រឹកថ្ងៃទី២៣ ខែមេសា ភ្នាក់ងារពន្លត់ភ្លើងអាចពន្លត់ភ្លើងបានទាំងស្រុង ហើយនៅវេលាម៉ោង៨និង៣០នាទីថ្ងៃដដែល មន្ត្រីផ្នែកពិសោធន៍ភស្តុតាងបានចុះមកត្រួតពិនិត្យនៅទីតាំងកើតហេតុ ៕

សហរដ្ឋអាមេរិក ៖ លោក Elon Musk មហាសេដ្ឋីពិភពលោក និងជានាយកក្រុមហ៊ុនផលិតរថយន្តអគ្គិសនី Tesla បាននិយាយកាលពីថ្ងៃទី២២ ខែមេសា ឆ្នាំ២០២៥ ថា ប្រទេសចិនរឹតបន្តឹងការនាំចេញរ៉ែកម្រ Rare Earth សម្រាប់ផលិតឧបករណ៍បច្ចេកវិទ្យា ដូចជា ៖ មនុស្សយន្ត និងទូរស័ព្ទ iPhone គឺធ្វើឱ្យប៉ះពាល់ដល់ការផលិតមនុស្សយន្ត Optimus របស់ក្រុមហ៊ុនលោក ខណៈកន្លងមក លោកធ្លាប់កំណត់គោលដៅផលិតមនុស្សយន្ត Optimus ឱ្យបានរាប់ពាន់គ្រឿងក្នុងឆ្នាំ២០២៥ ។

លោកបន្តថា រដ្ឋាភិបាលចិនត្រូវការភាពប្រាកដចិត្តថា រ៉ែកម្រ Rare Earth ដែលចិននាំចេញទៅក្រៅប្រទេស នឹងពុំយកទៅប្រើប្រាស់ធ្វើជាប្រយោជន៍ផ្នែកកងទ័ពទេ ។ ក្រុមហ៊ុន Tesla នៅតែសហការជាមួយរដ្ឋាភិបាលក្រុងប៉េកាំង ដើម្បីសុំលិខិតអនុញ្ញាតនាំចេញរ៉ែកម្រនេះមកអាមេរិក ។ លោកថា ៖ «ចិនសុំការធានាថា យើងនឹងពុំប្រើប្រាស់វាក្នុងផ្នែកកងទ័ព ។ យើងគ្រាន់តែប្រើប្រាស់វាសម្រាប់ផលិតមនុស្សយន្ត Humanoid ប៉ុណ្ណោះ មនុស្សយន្ត Optimus របស់យើងមិនមែនជាអាវុធទេ» ។

ប្រទេសចិនបានចាប់ផ្តើមរឹតបន្តឹងការនាំចេញរ៉ែកម្រ Rare Earth នៅខែមេសា ឆ្នាំ២០២៥ ដែលការរឹតបន្តឹងនេះជាផ្នែកមួយនៃវិធានការឆ្លើយតបទៅអាមេរិកវិញ ក្រោយពីលោកប្រធានាធិបតី Donald Trump បង្កើតសង្គ្រាមពាណិជ្ជកម្មដំឡើងពន្ធខ្ពស់លើទំនិញចិន ។ រ៉ែ Rare Earth គឺជាវត្ថុធាតុដើមដ៏សំខាន់សម្រាប់ផលិតអាវុធ និងឧបករណ៍បច្ចេកវិទ្យាជាច្រើន ដូចជា ៖ មនុស្សយន្ត, ទូរស័ព្ទ iPhone និងឧបករណ៍ប្រើប្រាស់ ។

ការរឹតបន្តឹងការនាំចេញរបស់ចិន មិនមែនមានតែរ៉ែកម្រប៉ុណ្ណោះទេ ប៉ុន្តែចិនបានរឹតបន្តឹងការនាំចេញមេដែក និងទំនិញជាច្រើនទៀត ដែលប្រទេសនានាពិបាករកទិញនៅប្រទេសផ្សេង ក្រៅពីចិន ។ ក្រុមហ៊ុនបរទេសដែលនាំចេញរ៉ែកម្ររបស់ចិន ត្រូវតែសុំលិខិតអនុញ្ញាតពីក្រសួងពាណិជ្ជកម្មចិន ហើយត្រូវចំណាយពេល ចាប់ពី៦សប្តាហ៍ ទៅ៧សប្តាហ៍ ឬរង់ចាំជាច្រើនខែ ទើបទទួលបានលិខិតអនុញ្ញាត ។ នេះបើតាមការលើកឡើងរបស់អ្នកវិភាគ ។

កន្លងមក លោក Elon Musk ធ្លាប់ប្រកាសថា ក្រុមហ៊ុន Tesla បានកំណត់គោលដៅផលិតមនុស្សយន្ត Optimus ឱ្យបានរាប់ពាន់គ្រឿងក្នុងឆ្នាំ២០២៥នេះ ប៉ុន្តែពេលលោក Trump ដំឡើងពន្ធទំនិញចិនខ្ពស់ ចិនក៏រឹតបន្តឹងការនាំចេញរ៉ែកម្រ Rare Earth ដែលជាវត្ថុធាតុដើមសំខាន់សម្រាប់ផលិតមនុស្សយន្ត ។ ដូច្នេះ វាអាចធ្វើឱ្យក្រុមហ៊ុន Tesla ពុំសម្រេចគោលដៅផលិតមនុស្សយន្តជាច្រើនគ្រឿង ៕

សហរដ្ឋអាមេរិក ៖ តាមការចេញផ្សាយរបស់សារព័ត៌មានបរទេសកាលពីថ្ងៃទី១៨ ខែមេសា ឆ្នាំ២០២៥ ឱ្យដឹងថា ប្រធានាធិបតីអាមេរិក លោក Donald Trump មិនចង់ដំឡើងពន្ធទំនិញចិនទៀតទេ ពីព្រោះវានឹងធ្វើឱ្យប៉ះពាល់ពាណិជ្ជកម្មរវាងប្រទេសទាំងពីរ ឬជាប់គាំងពាណិជ្ជកម្ម ។ លោកនឹងកាត់បន្ថយពន្ធទំនិញចិន ក្រោយពីចិនទាក់ទងសុំចរចាជាមួយអាមេរិកជាច្រើនលើកតាមរយៈមន្ត្រីជាន់ខ្ពស់ ។

បច្ចុប្បន្ន អាមេរិកបានដំឡើងពន្ធទំនិញចិនរហូតដល់១៤៥% ហើយចិនបានដំឡើងពន្ធទំនិញអាមេរិកវិញ ស្មើ១២៥% ដែលធ្វើឱ្យប្រទេសមហាអំណាចសេដ្ឋកិច្ចធំលើពិភពលោកទាំងពីរមានភាពតានតឹងផ្នែកពាណិជ្ជកម្មយ៉ាងខ្លាំង ។ លោក Trump ថា លោកមានទំនាក់ទំនងល្អជាមួយប្រធានាធិបតីចិន លោក ស៊ី ជិនពីង ហើយលោកជឿថា ការចរចាទិញកម្មវិធី TikTok នឹងជាផ្នែកមួយដ៏សំខាន់ដើម្បីឈានដល់កិច្ចព្រមព្រៀងពាណិជ្ជកម្មរវាងប្រទេសទាំងពីរ ។

លោក Trump ថ្លែងថា លោក ស៊ី ជិនពីង ពុំបានទាក់ទងសុំចរចាមកលោកផ្ទាល់ទេ ប៉ុន្តែតាមរយៈមន្ត្រីចិនជាន់ខ្ពស់ ។ លោក ស៊ី ដឹងច្បាស់ណាស់ពីអាមេរិកដំឡើងពន្ធទំនិញចិន និងចាត់វិធានការយ៉ាងតឹងរ៉ឹង លោក ស៊ី ជាមនុស្សឆ្លាតណាស់ ។ កាលពីថ្ងៃទី១៧ ខែមេសា លោក Trump ថា ៖ «ខ្ញុំមិនដំឡើងពន្ធទំនិញចិនទៀតទេ ព្រោះវានឹងធ្វើឱ្យគ្មានការទិញទំនិញ ទើបខ្ញុំមិនដំឡើងពន្ធខ្ពស់ជាងនេះ ខ្ញុំអាចកាត់បន្ថយពន្ធ» ។

លោក Trump បានបង្ហាញទំនុកចិត្តលើការធ្វើកិច្ចព្រមព្រៀងជាមួយចិន រួមទាំងការបន្ធូរបន្ថយពាណិជ្ជកម្ម ក៏ដូចជាលក់កម្មវិធី TikTok ឱ្យអាមេរិក ។ ចិនចេញមុខប្រឆាំងជាមួយអាមេរិកលើការដំឡើងពន្ធទំនិញបានធ្វើឱ្យកិច្ចព្រមព្រៀងលក់ TikTok និងការប្រើប្រាស់ TikTok នៅអាមេរិកត្រូវផ្អាក ។ វាជាកិច្ចព្រមព្រៀងដ៏ល្អសម្រាប់ចិន ហើយចិនចង់ឱ្យអាមេរិកធ្វើកិច្ចព្រមព្រៀង ជាពិសេស កិច្ចព្រមព្រៀងដែលអាមេរិកបានធ្វើជាមួយក្រុមហ៊ុនឈានមុខមួយចំនួនលើពិភពលោក ។

បើរដ្ឋាភិបាលចិនយល់ព្រមឱ្យក្រុមហ៊ុន ByteDance លក់ TikTok ឱ្យអាមេរិក គឺលោក Trump នឹងពិភាក្សាជាមួយពីការកំណត់អត្រាពន្ធទំនិញជាមួយចិន ហើយអាចចំណាយពេលត្រឹមតែ៥នាទីប៉ុណ្ណោះ ក្នុងការជជែកពី TikTok ។

បើតាមមន្ត្រីចិន គឺរដ្ឋាភិបាលចិនពុំព្រមចុះចាញ់ជាមួយការដំឡើងពន្ធទំនិញរបស់លោក Trump ទេ ដោយសារវាគ្មានភាពចាំបាច់ដែលរដ្ឋាភិបាលចិនត្រូវយល់ព្រមធ្វើបែបនេះ ។ រដ្ឋាភិបាលចិនបានប្រាប់ពលរដ្ឋថា ចិននៅតែប្រកាន់ជំហររឹងមាំ និងអាចទប់ទល់ការវាយប្រហារពីអាមេរិក ។ វិធានការពន្ធរបស់ចិនបានធ្វើឱ្យប៉ះពាល់ដល់ការនាំចេញទំនិញរបស់អាមេរិកដូចគ្នា ៕