បច្ចុប្បន្ន កម្មវិធី AI ទទួលបានការពេញនិយមយ៉ាងខ្លាំង ដូចជា ChatGPT ដែលមនុស្សភាគច្រើនចាប់ផ្តើមប្រើប្រាស់វាឱ្យជួយបំពេញការងារ ឆ្លើយសំណួរ និងរៀបរាប់ព័ត៌មានផ្ទាល់ខ្លួនឱ្យកម្មវិធីនេះស្តាប់ទៀតផង ។ ប៉ុន្តែតើជ្រាបទេថា ការប្រាប់ព័ត៌មានផ្ទាល់ខ្លួន ឬព័ត៌មានក្រុមហ៊ុនទៅកាន់កម្មវិធី AI អាចធ្វើឱ្យបែកធ្លាយព័ត៌មានសម្ងាត់ទៅខាងក្រៅបាន ។

Jennifer King ជាអ្នកស្រាវជ្រាវនៅមជ្ឈមណ្ឌល HAI របស់សាកលវិទ្យាល័យ Stanford សហរដ្ឋអាមេរិក និយាយថា ពេលយើងប្រាប់ព័ត៌មានទៅកម្មវិធី AI គឺស្មើនឹងយើងបាត់បង់ការគ្រប់គ្រងព័ត៌មាននេះ ។ បើចង់ប្រើប្រាស់កម្មវិធី AI ប្រកបដោយទំនុកចិត្ត យើងពុំគួរប្រាប់ព័ត៌មានផ្ទាល់ខ្លួនទៅ AI ដាច់ខាត រួមមាន ៖

១-ព័ត៌មានក្រុមហ៊ុន ឬព័ត៌មានអតិថិជន ៖ ការប្រើប្រាស់កម្មវិធី Chatbot ឱ្យជួយសរសេរអ៊ីម៉ែល ឬសរសេរឯកសារពាក់ព័ន្ធនឹងការងារ គឺអាចធ្វើឱ្យព័ត៌មានសម្ងាត់របស់ក្រុមហ៊ុនធ្លាក់ទៅក្នុងដៃបុគ្គលខាងក្រៅដែលមានបំណងមិនល្អ ។ បើចាំបាច់ គួរតែប្រើប្រាស់កម្មវិធី AI ណាដែលមានសុវត្ថិភាពខ្ពស់ ។

២-ព័ត៌មានលម្អិតផ្នែកពេទ្យ ៖ យើងគួរលាក់បាំងព័ត៌មានសុខភាពរបស់ខ្លួន ហើយកុំសរសេរព័ត៌មានសុខភាព ឬរៀបរាប់ពីជំងឺនានាក្នុងកម្មវិធី AI ។ ប៉ុន្តែបើត្រូវការប្រើប្រាស់ AI ឱ្យជួយបកស្រាយលទ្ធផលត្រួតពិនិត្យសុខភាព គួរលុបចោលព័ត៌មានផ្ទាល់ខ្លួនចេញ ហើយទុកតែខ្លឹមសារផ្នែកពេទ្យប៉ុណ្ណោះ ។

៣-ឈ្មោះអ្នកប្រើប្រាស់ និងលេខសម្ងាត់ ៖ ពុំគួរប្រាប់ឈ្មោះរបស់យើង ឬលេខសម្ងាត់ទៅក្នុង Chatbot ទេ ពីព្រោះវាពុំមែនជាកន្លែងលាក់បាំងលេខសម្ងាត់ដ៏មានសុវត្ថិភាពឡើយ ។ យើងអាចប្រើប្រាស់កម្មវិធីគ្រប់គ្រងលេខសម្ងាត់ពិសេសជំនួសវិញ ។

៤-ព័ត៌មានផ្ទាល់ខ្លួន ៖ ថ្ងៃខែឆ្នាំកំណើត លេខទូរស័ព្ទ អាសយដ្ឋាន និងលេខអត្តសញ្ញាណប័ណ្ណ គឺជាព័ត៌មានផ្ទាល់ខ្លួនដែលមិនគួរប្រាប់ AI ដោយសារវានឹងយកព័ត៌មាននេះទៅប្រើប្រាស់ក្នុងផ្លូវខុស បើទោះជាមានប្រព័ន្ធលុបព័ត៌មានក្រោយប្រើប្រាស់ក្តី ។ ការការពារជាមុន គឺល្អប្រសើរបំផុតដើម្បីកុំឱ្យបែកធ្លាយព័ត៌មាន ។

៥-ព័ត៌មានគណនីធនាគារ ៖ ហាមសរសេរលេខគណនីធនាគារ ឬព័ត៌មានពាក់ព័ន្ធនឹងគណនីធនាគារក្នុងកម្មវិធី AI ដាច់ខាត បើបែកធ្លាយព័ត៌មាននេះ យើងអាចត្រូវជនខិលខូចលួចដកប្រាក់ពីធនាគារ ។

ក្រុមហ៊ុន Google និង OpenAI ក៏ធ្លាប់ណែនាំយ៉ាងច្បាស់ថា កុំចែករំលែកព័ត៌មានលម្អិតក្នុង Chatbot ប៉ុន្តែបើចាំបាច់ត្រូវប្រើប្រាស់ព័ត៌មានផ្ទាល់ខ្លួន គួរដាក់លេខសម្ងាត់ពិបាកៗ, បង្កើតប្រព័ន្ធបញ្ជាក់អត្តសញ្ញាណជាច្រើនដំណាក់កាល និងលុបប្រវត្តិការសន្ទនាជាមួយ AI ពេលឈប់ប្រើប្រាស់ដើម្បីសុវត្ថិភាព ។ ការប្រើប្រាស់ AI ឱ្យក្លាយជាប្រយោជន៍ខ្លាំងបំផុត គួរប្រុងប្រយ័ត្នរក្សាព័ត៌មានសម្ងាត់ ពីព្រោះបើព័ត៌មានបែកធ្លាយទៅក្រៅ យើងពិបាកប្រមូលព័ត៌មានត្រឡប់មកវិញណាស់ ៕

កាលពីថ្ងៃទី១៩ ខែមេសា ឆ្នាំ២០២៥ ប្រទេសម៉ិកស៊ិកមានអាកាសធាតុក្តៅស្ងួត និងខ្យល់បក់ខ្លាំងស្មើល្បឿន៨២គីឡូម៉ែត្រក្នុង១ម៉ោង ដែលធ្វើឱ្យមានព្យុះខ្សាច់យក្សវាយប្រ.ហារមកលើតំបន់ភាគខាងជើងម៉ិកស៊ិក នាំមកទាំងធូលីខ្សាច់គ្របដណ្តប់អគារនានា ដូចជា ៖ អាកាសយានដ្ឋានឈីវ៉ាវ៉ា (Chihuahua Airport) ពោរពេញដោយធូលីខ្សាច់យ៉ាងក្រាស់ ។ មន្ត្រីឧតុនិយមបានសំណូមពរទៅកាន់ពលរដ្ឋផ្អាកចេញក្រៅអគារ ដោយសារអាចកើតគ្រោះថ្នា.ក់ ដោយសារព្យុះខ្សាច់ ។

ព្យុះខ្សាច់យក្សបានកើតឡើងដោយសារប្រទេសម៉ិកស៊ិកមានអាកាសធាតុក្តៅស្ងួតជាច្រើនថ្ងៃ និងខ្យល់បក់ខ្លាំង ទើបធ្វើឱ្យធូលីដី និងខ្សាច់ត្រូវបានខ្យល់បក់ឡើងលើមេឃយ៉ាងខ្លាំង ។ ព្យុះខ្សាច់បានគ្របដណ្តប់លើតំបន់ជាច្រើនធ្វើឱ្យពលរដ្ឋពុំអាចធ្វើដំណើរតាមផ្លូវ រីឯយន្តហោះមួយចំនួនក្នុងអាកាសយានដ្ឋានឈីវ៉ាវ៉ា បានពន្យារពេលហោះហើរ និងផ្លាស់ប្តូរគោលដៅដើម្បីសុវត្ថិភាព ។

អាជ្ញាធរមូលដ្ឋាន និងមន្ត្រីឧតុនិយមបានសំណូមពរឱ្យពលរដ្ឋផ្អាកចេញក្រៅអគារ ព្រមទាំងត្រៀមខ្លួនទប់ទល់អាកាសធាតុកាន់តែអាក្រក់នាថ្ងៃបន្ទាប់ ។ តំបន់ជាច្រើនរបស់ម៉ិកស៊ិក ជាពិសេសតំបន់ភាគខាងជើង តែងតែមានព្យុះខ្សាច់កើតឡើងក្នុងរដូវក្តៅ ប៉ុន្តែព្យុះខ្សាច់លើកចុងក្រោយនេះ គឺជាព្យុះមានកម្លាំងខ្លាំងបំផុតក្នុងរយៈពេលជាច្រើនឆ្នាំ ដែលធ្វើឱ្យមហាជន និងអ្នកជំនាញបរិស្ថានលើពិភពលោក ចាប់អារម្មណ៍យ៉ាងខ្លាំង ។

ដោយឡែក នៅប្រទេសចិនវិញក៏មានខ្យល់កន្ត្រាក់ខ្លាំងដែរ កាលពីថ្ងៃទី១២ ខែមេសា កន្លងមក សារព័ត៌មាន BBC រាយការណ៍ថា អាជ្ញាធរចិនបានដាស់តឿនពីខ្យល់បក់ខ្លាំងកម្រិតពណ៌ទឹកក្រូច ដែលជាកម្រិតគ្រោះថ្នាក់ទី២ ។ អាជ្ញាធរសន្និដ្ឋានថា កម្លាំងខ្យល់នឹងមានល្បឿន១៥០គីឡូម៉ែត្រក្នុង១ម៉ោង នៅទីក្រុងប៉េកាំង, ធានជីង និងទីក្រុងជាច្រើនក្នុងខេត្តហឺប៉ី ។

ក្រៅពីនេះ អាជ្ញាធរចិនបានស្នើឱ្យសាលារៀននានាផ្អាកការបង្រៀនសិស្ស និងហាមពលរដ្ឋចេញពីលំនៅឋាន ឬកុំធ្វើការក្រោមកំដៅថ្ងៃ ។ សារព័ត៌មានរដ្ឋាភិបាលដាស់តឿនថា អ្នកមានទម្ងន់ក្រោម៥០គីឡូក្រាម អាចប្រឈមនឹងខ្យល់បក់ប៉ើងឡើងលើ ហើយសីតុណ្ហភាពនៅទីក្រុងប៉េកាំង នឹងធ្លាក់ចុះមកត្រឹម១៣អង្សាសេ និងមានខ្យល់កន្ត្រាក់ខ្លាំងជាច្រើនថ្ងៃបណ្តាលឱ្យខូចខាតទ្រព្យសម្បត្តិយ៉ាងច្រើន ។

បើតាមមន្ត្រីឧតុនិយមទីក្រុងប៉េកាំង គឺខ្យល់បក់ខ្លាំងនៅចុងសប្តាហ៍ទី៣ ខែមេសា អាចបង្កមហន្តរាយធ្ងន់ធ្ងរ ហើយចិនបានផ្អាកការប្រកួតកីឡាជាច្រើន ខណៈសួនច្បារសាធារណៈ និងកន្លែងនានាបិទទ្វារ ។ រីឯការងារក្នុងការដ្ឋានសំណង់ និងរថភ្លើងដឹកអ្នកដំណើរ ក៏ផ្អាកដំណើរការដែរ ៕

ប្រទេសអូស្ត្រាលី ៖ កាលពីថ្ងៃទី២១ ខែមេសា ឆ្នាំ២០២៥ សារព័ត៌មានបរទេសរាយការណ៍ថា នាយករដ្ឋមន្ត្រីអូស្ត្រាលីប្រាប់ពលរដ្ឋប្រយ័ត្នគ្រោះថ្នា.ក់ ដោយសារអាកាសធាតុមិនល្អបណ្តាលឱ្យមានរលកយក្សនៅតាមឆ្នេរសមុទ្រ ក្រោយរលកយក្សបានបោកបក់ខ្លាំងមកលើឆ្នេរសម្លា.ប់ ពលរដ្ឋអូស្ត្រាលី រហូតដល់៧នាក់ ។ ក្រៅពីនេះ មានពលរដ្ឋខ្លះទៀតបាត់ខ្លួនក្នុងសមុទ្រ ដែលធ្វើឱ្យភ្នាក់ងារសង្គ្រោះប្រើប្រាស់ឧទ្ធម្ភាគចក្រតាមស្វែងរក ។

ទឹករលកយក្សបានបោកកុមារអាយុ៩ឆ្នាំ មកជាប់នៅចន្លោះថ្មលើឆ្នេរសមុទ្ររដ្ឋ New South Wales ហើយកុមាររូបនេះក្លាយជាមនុស្សស្លា.ប់ ទី៧ ដោយសាររលកសមុទ្រធំៗ ។ នៅសប្តាហ៍ទី៣ ខែមេសា ទឹករលកខ្ពស់ៗបានបោកបក់មកលើឆ្នេរសមុទ្រនៅរដ្ឋ New South Wales បណ្តាលឱ្យពលរដ្ឋអូស្ត្រាលីដែលមកកម្សាន្តនៅឆ្នេរធ្លាក់ចូលសមុទ្រជាបន្តបន្ទាប់ ។ អាជ្ញាធរបានព្យាយាមស្វែងរកសាកសពពលរដ្ឋក្នុងសមុទ្រ ខណៈពលរដ្ឋ២នាក់ទៀតបាត់ខ្លួនរកពុំឃើញ ។

នាយកអង្គការ Surf Live Saving នៅរដ្ឋ New South Wales ដែលមានពលរដ្ឋស្លាប់ច្រើនដោយសាររលកសមុទ្រ បាននិយាយមកកាន់ស្ថានីយទូរទស្សន៍ ABC ថា វាជាហេតុការណ៍លង់ទឹកដ៏អាក្រក់បំផុត ដែលអូស្ត្រាលីធ្លាប់បានកត់ត្រាកាលពីចុងសប្តាហ៍ថ្ងៃបុណ្យ Easter ។ កាលពីចុងសប្តាហ៍កន្លងមក គួរតែជាសប្តាហ៍ពោរពេញទៅដោយភាពសប្បាយរីករាយ និងមានកម្មវិធីសាសនាផ្សេងៗ ប៉ុន្តែបែរជាកើតហេតុការណ៍ដ៏សោកសៅបំផុត ។

ភ្នាក់ងារសង្គ្រោះបន្ទាន់បានយកសាកសពក្មេងប្រុសម្នាក់ពីឆ្នេរសមុទ្រទីក្រុង New South Wales ដែលឆ្ងាយពីទីក្រុង Sydney ប្រមាណ៤០០គីឡូម៉ែត្រ ។ កាលពីថ្ងៃទី២០ ខែមេសា ឧទ្ធម្ភាគចក្រភ្នាក់ងារសង្គ្រោះបានប្រទះឃើញឪពុក និងកូនប្រុស អណ្តែតទឹកសមុទ្រក្បែរឆ្នេរវ៉ាត់តាម៉ូឡា ភាគខាងត្បូងទីក្រុង Sydney ដោយកូនប្រុស អាយុ១៤ឆ្នាំ ត្រូវបានជួយសង្គ្រោះ ប៉ុន្តែឪពុកក្មេងប្រុស បានស្លាប់ ។ ក្រៅពីនេះ សមត្ថកិច្ចនៅរដ្ឋ Victoria បានស្វែងរកបុរសម្នាក់ អាយុ៤១ឆ្នាំ ដែលបានបាត់ខ្លួនកាលពីថ្ងៃទី១៨ ខែមេសា ។

ចាប់ពីថ្ងៃទី១៨ ខែមេសា អង្គការ Surf Live Saving បានជួយសង្គ្រោះជនរងគ្រោះសរុបជាង១៥០នាក់ នៅតាមឆ្នេរសមុទ្រ ហើយអង្គការនេះបញ្ជាក់ថា កត្តាផ្សេងៗ ដូចជា ៖ សីតុណ្ហភាពខ្ពស់នាថ្ងៃសម្រាកចុងសប្តាហ៍ និងរលកធំៗនៅឆ្នេរសមុទ្ររដ្ឋ New South Wales និងរដ្ឋ Victoria ធ្វើឱ្យពលរដ្ឋអូស្ត្រាលីស្លាប់កាន់តែច្រើន ។ បើទោះជាអាកាសធាតុល្អប្រសើរឡើងនៅថ្ងៃទី២១ ខែមេសា ក្តី ប៉ុន្តែអាជ្ញាធរសំណូមពរឱ្យពលរដ្ឋធ្វើដំណើរមកឆ្នេរសមុទ្របង្កើនការប្រុងប្រយ័ត្ន ។

នាយករដ្ឋមន្ត្រីអូស្ត្រាលី លោក Anthony Albanese បានបង្ហាញការសោកស្តាយទៅកាន់ក្រុមគ្រួសារសាកសព និងថ្លែងថា ៖ «សូមពលរដ្ឋទាំងអស់ប្រុងប្រយ័ត្នគ្រោះថ្នាក់ ជាពិសេស ឪពុក-ម្តាយត្រូវថែទាំកូនៗរបស់ខ្លួន» ។

យោងតាមរបាយការណ៍របស់អង្គការ Royal Life Saving Australia គឺពលរដ្ឋអូស្ត្រាលីបានស្លាប់ដោយសារលង់ទឹកនៅទូទាំងប្រទេស ស្មើនឹង៣២៣នាក់ គិតត្រឹមខែមិថុនា ឆ្នាំ២០២៤ ។ ចំនួននេះរួមបញ្ចូលទាំងពលរដ្ឋស្លាប់នៅតាមដងទន្លេ អូរ និងឆ្នេរសមុទ្រ ស្មើជិត៤០% នៃការស្លាប់ក្នុងរដ្ឋ New South Wales ៕

សហរដ្ឋអាមេរិក ៖ កាលពីថ្ងៃចន្ទ ទី២១ ខែមេសា សកលវិទ្យាល័យ Harvard បានដាក់ពាក្យបណ្ដឹ..ងទៅកាន់តុលាការកំពូលក្នុងរដ្ឋ Massachusetts ដោយចោ..ទប្រកាន់សេតវិមាន និងលោក Donald Trump ពាក់ព័ន្ធនឹងការបង្កកជំនួយជាទឹកប្រាក់ចំនួន ២.២ពាន់លានដុល្លា និងការគំរា..មបញ្ឃប់ការទទួលចុះឈ្មោះនិសិសត្សបរទេស។

គួររំលឹកថា កាលពីសប្តាហ៍មុន រដ្ឋបាលលោក Trump បានប្រកាសថា ខ្លួននឹងបង្កកមូលនិធិសហព័ន្ធចំនួន 2.2 ពាន់លានដុល្លារ និងជំនួយចំនួន 1 ពាន់លានដុល្លារទៀត ហើយទាមទារសម្បទានជាច្រើន ដោយអះអាងថា វាជាវិធានការចាំបាច់ដើម្បីប្រយុទ្ធនឹងការប្រឆាំងសាសនា (antisemitism) នៅក្នុងបរិវេណសាលា។ ក្នុងលិខិតដែលសាកលវិទ្យាល័យ Harvard បានទទួលពីខាងសេតវិមាន គឺបានបញ្ជាក់ពីការទាមទារជាបន្តបន្ទាប់ទាក់ទងនឹងគោលការណ៍ការចូលរៀន ព័ត៌មានផ្ទាល់ខ្លួននិសិត្ស និងកម្មវិធីសិក្សារបស់សាលា ដែលទាំងអស់នេះគឺជាការរំលោ..ភលើគោលការណ៍របស់សាលា។ នេះបើកាសែត The New York Times បានរាយការណ៍កាលពីសប្តាហ៍មុន។

ដោយឡែក សម្រាប់ពាក្យបណ្ដឹង កាលពីថ្ងៃចន្ទនេះ សាកលវិទ្យាល័យ Harvard បានចោទប្រកាន់រដ្ឋបាលថាបានរំលោភលើសិទ្ធិធ្វើវិសោធនកម្មលើកទីមួយរបស់ខ្លួន ហើយបានអះអាងថាមន្ត្រីរបស់សេតវិមានមិនបានអនុវត្តតាមនីតិវិធី និងបទប្បញ្ញត្តិរដ្ឋបាលសហព័ន្ធនោះទេ នៅពេលដកហូតមូលនិធិពីពីស្ថាប័នរបស់ខ្លួន។

ប្រធានសាកលវិទ្យាល័យលោក Alan M. Garber បានថ្លែងនៅក្នុងលិខិតមួយទៅកាន់សហគមន៍ Harvard ថា ៖ សកម្មភាពថ្មីៗរបស់រដ្ឋបាល Trump រួមទាំងមូលនិធិសហព័ន្ធចំនួន ២.២ ពាន់លានដុល្លារដែលបានបង្កកនៅ Harvard បានផ្ដល់ផលវិបាកសម្រាប់ និស្សិត សាស្ត្រាចារ្យ បុគ្គលិក អ្នកស្រាវជ្រាវ និងជំហរនៃការអប់រំរបស់សកលវិទ្យាល័យ” ។ លើបានបន្តថា ៖ គាត់មានការព្រួយបារម្ភអំពីការរើសអើង និងការប្រឆាំងផ្នែកសាសនារបស់រដ្ឋបាលTrump។ ប៉ុន្តែសកលវិទ្យាល័យ Harvard នឹងតស៊ូប្រយុទ្ធជាមួយនឹងការទាមទារនេះ។

លោក Trump ក៏បានអំពាវនាវដល់សាកលវិទ្យាល័យនានា តាមរយៈប្រព័ន្ធ Truth Social ថា “Harvard ប្រហែលជាត្រូវអស់សិទ្ធិជាស្ថាប័នដែលរដ្ឋាភិបាលលើកលែងពន្ធហើយ ប្រសិនបើវានៅតែបន្តជំរុញផ្នែកនយោបាយ មនោគមវិជ្ជា និងភេរវករដោយការបំផុសគំនិត និងគាំទ្របែបនេះ វានឹងត្រូវបង់ពន្ធដូចស្ថាប័ននយោបាយទូទៅដែរហើយ”

ចំណែកមេធាវីពីរនាក់តំណាងសកលវិទ្យាក័យ Harvard បាននិយាយថា ៖ សាកលវិទ្យាល័យនឹងមិនធ្វើតាមការទាមទាររបស់រដ្ឋាភិបាលទេ ប៉ុន្តែសាលានៅតែបើកចំហសម្រាប់ទទួលការចចារគ្នាជានិច្ច ។ ខណៈពេលនេះ សាកលវិទ្យាល័យ Harvard បានទទួលការគាំទ្រពីសាកលវិទ្យាល័យផ្សេងទៀតជាច្រើន ក៏ដូចជានិស្សិតបញ្ចប់ការសិក្សានៅផ្នែកច្បាប់នៅ Harvard រួមទាំងអតីតប្រធានាធិបតីលោក Barack Obama ផងដែរ ៕

ទីក្រុងប៉េកាំង ៖ រដ្ឋអាជ្ញាកំពូលនៃប្រទេសចិន បានចេញសេចក្ដីប្រកាសឲ្យចាប់ខ្លួន អតីតមន្ត្រីជាន់ខ្ពស់ប្រឆាំងអំពើពុករលួយ លោក ពីបទសង្ស័យទទួលសំណូកសូកប៉ាន់។ នេះបើតាមសារព័ត៌មាន Reuters នៅថ្ងៃអង្គារ ទី២២ ខែមេសា ។

គួរជម្រាបថា មុនពេលត្រូវបានចាប់ខ្លួន លោកLi Gang មានតួនាទីជាប្រធានក្រុមអធិការកិច្ច និងត្រួតពិនិត្យវិន័យ ក្រោមនាយកដ្ឋានគ្រប់គ្រងធនធានមនុស្សនៃគណៈមជ្ឈិមបក្សកុម្មុយនីស្តចិន។ ប៉ុន្តែក្រោយមក លោកត្រូវបានបក្សកុម្មុយនិស្តចិនបណ្ដេញចេញ បន្ទាប់ពីគេបានរកឃើញថាគាត់មានជាប់ព័ន្ធនឹងការបំពានយ៉ាងធ្ងន់ធ្ងរលើវិន័យបក្ស និងច្បាប់។

យ៉ាងណាមិញ ការរកឃើញថាមានមន្រ្តីពុករ..លួយ នៅក្នុងប្រទេសចិនមិនមែនទើបតែមានលោក Li Gang តែម្នាក់ទេ កន្លងមកនៅឆ្នាំ ២០២៤ មន្ត្រីជាន់ខ្ពស់សរុបចំនួន ៥៦នាក់ បានចា..ប់ឃ..ត់ខ្លួន និងកំពុងស្ថិតនៅក្រោមការស៊ើបអង្កេតរបស់រដ្ឋអាជ្ញាកំពូល។

ប្រធានាធិបតីចិនលោក ស៊ី ជិនពីង បានរឹតបន្តឹងយ៉ាងម៉ឺងម៉ាត់ទៅលើមន្រ្តីគ្រប់ជាន់ថ្នាក់ និងបានលើកឡើងថា៖ អំពើពុករលួយជាការគំរាមកំហែងដ៏ធំបំផុតចំពោះបក្សកុម្មុយនិស្តចិន។ លោកថែមទាំងបានសង្កត់ធ្ងន់ថា “អំពើពុករលួយនៅតែបន្តរីករាលដាលនៅក្នុងសង្គមប្រទេសចិន” ដូចនេះលោកនឹងចាត់វិធានការក្ដៅចំពោះមន្រ្តីណា ដែលហ៊ានប្រព្រឹត្តិល្មើសនឹងច្បាប់។

ដោយឡែក កាលពីខែមិថុនា ឆ្នាំ២០២៤ គណៈកម្មាធិការមជ្ឈិមបក្សកុម្មុយនិស្តចិន បានសម្រេចបណ្តេញអតីតរដ្ឋមន្ត្រីការពារជាតិពីររូប គឺលោក Li Shangfu និង Wei Fenghe ចេញពីបក្ស។ បក្សកុម្មុយនីស្តចិនបានអះអាងថា អតីតរដ្ឋមន្ត្រីទាំងពីររូបបានបំពានលើវិន័យបក្ស និងច្បាប់។ ជាងនេះទៅទៀត អតីតមន្រ្តីធំៗ ដែលមានដូចជារដ្ឋមន្ត្រីយុត្តិធម៌លោក Tang Yijun, អតីតរដ្ឋមន្ត្រីកសិកម្មលោក Tang Renjian និងអតីតប្រធានរដ្ឋបាលទូទៅនៃកីឡា ចិន Gou Zhongwen ក៏កំពុងស្ថិតនៅក្នុងការស៊ើបអង្កេតផងដែរ៕