ប្រទេសថៃ ៖ សារព័ត៌មានថៃរាយការណ៍កាលពីថ្ងៃទី៤ ខែឧសភា ឆ្នាំ២០២៥ ថា ក្រសួងពាណិជ្ជកម្មថៃបានកំណត់ឱ្យបញ្ចុះតម្លៃជីកសិកម្ម ចំនួន១០លានការ៉ុង គឺបញ្ចុះតម្លៃឱ្យបានច្រើនបំផុតមកនៅត្រឹមតែ៥០បាតក្នុង១ការ៉ុង (ឬស្មើ៥ពាន់រៀល) ដើម្បីជួយសម្រាលបន្ទុកការចំណាយរបស់កសិករ ចាប់ពីរដូវកាលដាំដុះ គឺថ្ងៃទី៤ ខែឧសភា រហូតដល់ថ្ងៃទី៣០ ខែកញ្ញា ឆ្នាំ២០២៥ ។ ក្រៅពីនេះ ក្រសួងកសិកម្មនឹងផ្សព្វផ្សាយពីតម្លៃជីក្នុងគេហទំព័រស្ថាប័នពាក់ព័ន្ធដើម្បីឱ្យពលរដ្ឋទូទាំងប្រទេសជ្រាបច្បាស់ ។

រដ្ឋមន្ត្រីក្រសួងពាណិជ្ជកម្ម លោក Pichai Naripthaphan និយាយថា នាយកដ្ឋានពាណិជ្ជកម្មផ្ទៃក្នុងបានសហការជាមួយសមាគមធំ ចំនួន៣ រួមមាន ៖ សមាគមជី និងកសិកម្មថៃ, សមាគមផលិតជីកសិកម្មថៃ និងសមាគមធុរកិច្ចកសិកម្មថៃ រួមទាំងក្រសួងកសិកម្ម ក្នុងគោលបំណងបង្កើតគម្រោងបញ្ចុះតម្លៃជីគុណភាពល្អមកនៅត្រឹម៥០បាត ។ ជីគុណភាពល្អដែលបញ្ចុះតម្លៃនេះ ស្មើជាង១០លានការ៉ុង ទទួលពីក្រុមហ៊ុនថៃចំនួន២៦ អាចប្រើប្រាស់ជាមួយដំណាំគ្រប់ប្រភេទ ។ រីឯការបញ្ចុះតម្លៃជី គឺចាប់ពីថ្ងៃទី៤ ខែឧសភា ដល់ថ្ងៃទី៣០ ខែកញ្ញា ឆ្នាំ២០២៥ ។

លោក Pichai បន្តថា ក្រសួងកសិកម្មបានបង្កើតគម្រោងជីកសិកម្មតម្លៃថោក ពីព្រោះទុក្ខរបស់កសិករ គឺជាទុក្ខរបស់ជាតិ ។ យើងយល់ច្បាស់ពីបម្រែបម្រួលសេដ្ឋកិច្ចពិភពលោក ហើយយើងអាចគ្រប់គ្រងតម្លៃទំនិញកសិកម្មនៅថៃបាន ប៉ុន្តែពិបាកគ្រប់គ្រងតម្លៃទំនិញកសិកម្មកំណត់នៅក្រៅប្រទេស ។ ថ្មីៗនេះ តម្លៃអង្ករចុះថោក ដោយសារឥណ្ឌាលក់អង្ករថោកត្រឹមជាង៣០០ដុល្លារក្នុង១តោន ទើបធ្វើតម្លៃអង្ករពិភពលោកធ្លាក់ចុះ ។ យើងនឹងព្យាយាមជួយកសិករឱ្យបង្កើនទីផ្សារ ដោយថៃបានលក់អង្ករជាង៤សែនតោនឱ្យអាហ្វ្រិកខាងត្បូង និងបញ្ចុះតម្លៃជីកសិកម្មដើម្បីសម្រាលបន្ទុកកសិករ ។

ប្រទេសថៃនឹងបញ្ចុះតម្លៃជីកសិកម្មមានគុណភាពល្អអាចប្រើប្រាស់ជាមួយដំណាំគ្រប់ប្រភេទ ដូចជា ៖ ស្រូវ បន្លែបង្ការ ឈើហូបផ្លែ និងរុក្ខជាតិសម្រាប់លម្អ ។ កន្លងមក ក្រសួងពាណិជ្ជកម្មបានប្រជុំជាមួយសមាជិកសភាគណបក្សភឿថៃ ដើម្បីដោះស្រាយបញ្ហាតម្លៃទំនិញកសិកម្មធ្លាក់ចុះ ហើយយើងក៏បានឯកភាពបញ្ចុះតម្លៃជីជួយកាត់បន្ថយការចំណាយកសិករ ។ ក្រោយការសាកល្បងគម្រោងឃើញថា ទទួលបានការគាំទ្រ ទើបយើងព្យាយាមពង្រីកគម្រោង ។ បើពលរដ្ឋត្រូវការជីបន្ថែម យើងនឹងស្វែងរកជីមកឱ្យពួកគេ ហើយបើតម្លៃជីលើទីផ្សារពិភពលោកធ្លាក់ចុះ ថៃនឹងបញ្ចុះតម្លៃដែរ ។ ក្រសួងពាណិជ្ជកម្មមិនព្រងើយកន្តើយទេ យើងនឹងជួយកសិករឱ្យអស់លទ្ធភាព ។

ចំណែកការទិញជីតម្លៃថោកពីគម្រោងរបស់ក្រសួងកសិកម្ម គឺកសិករអាចកុម្ម៉ង់ទិញតាមរយៈក្រុមកសិករ សហករណ៍ សហគ្រាសសហគមន៍ មជ្ឈមណ្ឌលគ្រប់គ្រងដី និងជីសហគមន៍ ព្រមទាំងសហករណ៍កសិកម្មសម្រាប់អតិថិជនរបស់ធនាគារ BAAC ។ ក្រសួងកសិកម្មនឹងប្រមូលចំនួនការកុម្ម៉ង់ទិញជី និងទំនាក់ទំនងជាមួយនាយកដ្ឋានលើកកម្ពស់កសិកម្ម និងនាយកដ្ឋានសហករណ៍ ដើម្បីចែកចាយជីតម្លៃពិសេសឱ្យដល់ដៃកសិករដោយផ្ទាល់ ហើយក្រសួងក៏សូមអរគុណសមាគមទាំងអស់ដែលបានចូលរួមក្នុងគម្រោងបញ្ចុះតម្លៃជី ។

ក្រៅពីនេះ កសិករក៏អាចកុម្ម៉ង់ទិញជីពីរោងចក្រផលិតជីដែលចូលរួមក្នុងគម្រោង ហើយតម្លៃជីនឹងផ្សព្វផ្សាយក្នុងគេហទំព័ររបស់នាយកដ្ឋានពាណិជ្ជកម្មផ្ទៃក្នុង រួមទាំងគេហទំព័រមន្ទីរពាណិជ្ជកម្មខេត្ត កសិករខេត្តនៅទូទាំងប្រទេស ព្រមទាំងផ្សព្វផ្សាយក្នុងវិទ្យុសហគមន៍ក្នុងតំបន់នីមួយៗ ដើម្បីឱ្យកសិករនៅទូទាំងប្រទេសជ្រាបពីតម្លៃជី ៕

ប្រទេសព័រទុយហ្គាល់ ៖ អាកាសយានដ្ឋានអន្តរជាតិ Cristiano Ronaldo នៅលើកោះម៉ាឌេរ៉ា (Madeira) ប្រទេសព័រទុយហ្គាល់ គឺជាអាកាសយានដ្ឋានដ៏ប្លែកភ្នែក និងស្ថិតក្នុងចំណោមអាកាសយានដ្ឋានគ្រោះថ្នា.ក់បំផុតលើពិភពលោក ដោយសារការសាងសង់ Runway នៅលើសសរ ។ អាកាសយានដ្ឋាននេះធ្លាប់មានឈ្មោះថា អាកាសយានដ្ឋាន Madeira ប៉ុន្តែបានផ្លាស់ប្តូរឈ្មោះថ្មីនៅឆ្នាំ២០១៧ ដើម្បីផ្តល់កិត្តិយសដល់កីឡាករបាល់ទាត់ លោក Cristiano Ronaldo ក្រោយពីក្រុមជម្រើសជាតិព័រទុយហ្គាល់ ដណ្តើមបានពានរង្វាន់បាល់ទាត់អឺរ៉ុប នៅឆ្នាំ២០១៦ ។

លើសពីនេះ កោះម៉ាឌេរ៉ា គឺជាស្រុកកំណើតរបស់លោក Cristiano Ronaldo ។ កាលពីមុន អាកាសយានដ្ឋាន Madeira ធ្លាប់ល្បីល្បាញថា គឺជាអាកាសយានដ្ឋានមាន Runway ខ្លីបំផុត ដែលមានចម្ងាយត្រឹមតែ១,៦០០ម៉ែត្រប៉ុណ្ណោះ ព្រមទាំងហ៊ុព័ទ្ធទៅដោយភ្នំខ្ពស់ៗ និងមហាសមុទ្រ ។ ដូច្នេះ ធ្វើឱ្យយន្តហោះនានាពិបាកចុះចតនៅអាកាសយានដ្ឋាននេះ ហើយអាកាសយានិកត្រូវមានជំនាញ ឬប្រើប្រាស់បច្ចេកទេសខ្ពស់ ទើបអាចចុះចតយន្តហោះបាន ។

កាលពីឆ្នាំ១៩៧៧ គឺមានយន្តហោះ១គ្រឿង របស់ក្រុមហ៊ុនអាកាសចរណ៍ព័រទុយហ្គាល់ បានធ្លាក់ចេញពី Runway របស់អាកាសយានដ្ឋាន ហើយនេះជាមូលហេតុធ្វើឱ្យអាកាសយានដ្ឋាន Madeira ពង្រីក Runway ចំនួន២០០ម៉ែត្របន្ថែមទៀត ដែលធ្វើឱ្យ Runway សរុបមានចម្ងាយ១,៨០០ម៉ែត្រ ។ ក្រោយមក នៅឆ្នាំ២០០០ អាកាសយានដ្ឋានក៏បានពង្រីក Runway ឱ្យមានប្រវែងរហូតដល់២,៧៨១ម៉ែត្រ ។ រីឯភាពលេចធ្លោបំផុតរបស់អាកាសយានដ្ឋាន គឺមានសសរសម្រាប់ទ្រ Runway ចំនួន១៨០សសរ ត្រូវបានសាងសង់លើមហាសមុទ្រ ហើយសសរនីមួយៗមានកម្ពស់ប្រមាណ៧០ម៉ែត្រ ។

បច្ចុប្បន្ន អាកាសយានដ្ឋានអន្តរជាតិ Cristiano Ronaldo ត្រូវគេចាត់ទុកថា បានសាងសង់នៅកន្លែងពិបាកបំផុត និងជាអាកាសយានដ្ឋានគ្រោះថ្នាក់បំផុតលើពិភពលោក ។ History Channel បានចាត់ចំណាត់ថ្នាក់ Cristiano Ronaldo គឺជាអាកាសយានដ្ឋានគ្រោះថ្នាក់បំផុត លំដាប់ទី៩ លើពិភពលោក និងគ្រោះថ្នាក់បំផុត លំដាប់ទី៣ នៅតំបន់អឺរ៉ុប ដោយសារអាកាសយានិកត្រូវតែទទួលការហ្វឹកហាត់ពិសេសបន្ថែម ទើបអាចចុះចតយន្តហោះនៅអាកាសយានដ្ឋាននេះបាន ៕

នៅថ្ងៃទី៧ ខែឧសភា ឆ្នាំ២០២៥នេះ ប្រទេសឥណ្ឌា បានបើកការវាយប្រហារ ដោយគ្រាប់មីសុីលចូលទៅតំបន់កាស្មៀរ ខាងប្រទេសប៉ាគីស្ថាន ចំនួន៩កន្លែង បានធ្វើឱ្យមនុស្ស៧នាក់បាត់បង់ជីវិត។

នៅក្នុងការវាយប្រហារនេះ ឥណ្ឌា អះអាងថាពួកគេបាញ់មីសុីលកម្ទេចជម្រកក្រុមភេរវករតែប៉ុណ្ណោះ មិនមែនជាការឈ្លានពាន ឬធ្វើឱ្យប៉ះពាល់ដែនអធិបតេយ្យភាពរបស់ប៉ាគីស្ថាននោះទេ។

តែយ៉ាងណាមិញ បើតាមរដ្ឋមន្ត្រីក្រសួងការពារជាតិប៉ាគីស្ថានលោក Khawaja Asif បានចាត់ទុកថាការវាយប្រហារនេះជាសកម្មភាពសង្រ្គាម ដោយមីសុីលទាំងនោះ បានបាញ់ចេញពីទ័ពអាកាសឥណ្ឌា សំដៅមកទីប្រជុំជន ជនសុីវិលតែម្តង។

ក្រោយការវាយប្រហារ ប៉ាគីស្ថាន បានប្រកាសក្តែងៗ ដោយនឹងសងសឹកទៅកាន់ឥណ្ឌាវិញយ៉ាងចាស់ដៃ ឱ្យដូចឥណ្ឌាធ្វើដាក់ខ្លួន។

គួរបញ្ជាក់ថា តំបន់កាស្មៀរ គឺជាសមរភូមិដ៏តានតឹងបំផុត រវាងឥណ្ឌា និងប៉ាគីស្ថាន ដែលតែងផ្ទុះសង្គ្រាមដាក់គ្នា ជុំវិញការគ្រប់គ្រងតំបន់នេះ៕

សហរដ្ឋអាមេរិក ៖អ្នកជំនាញផ្នែកបច្ចេកវិទ្យាជាន់ខ្ពស់នៅសកលវិទ្យាល័យ Penn State University បានបង្កើតបាននូវឧបករណ៍សម្រាប់តាមដានសុខភាពប្រភេទថ្មីមួយ ដែលជាបន្ទះStickerតូច និងស្ដើង ប៉ុន្តែវាសមត្ថភាពខ្លាំងរហូតអាចវាស់ស្ទង់ដឹងថា មនុស្សមានអារម្មណ៍ដូចម្ដេចដោយគ្រាន់តែបិតវាលើស្បែកប៉ុណ្ណោះ។

ការស្រាវជ្រាវនេះ ត្រូវបានបោះពុម្ពផ្សាយដោយសារព័ត៌មានបរទេសជាច្រើន កាលពីថ្ងៃទី២១ ខែមេសា ឆ្នាំ២០២៥ បានបង្ហាញឲ្យឃើញនូវឧបករណ៍តាមដានសុខភាពថ្មីម្យ៉ាងដែលមានទម្រង់ដូចជាស្ទីកគ័រអាចបិតជាប់នៅលើស្បែក មានលក្ខណទន់អាចបត់បែនបាន, អាចដំណើរការបានយូរ និងបញ្ជូនទិន្នន័យដោយប្រព័ន្ធwireless ទៅកាន់ឧបករណ៌ប្រើប្រាស់ដូចជាទូរស័ព្ទដៃ ឬកុំព្យូទ័របាន។

បើតាមការរៀបរាប់បង្ហាញរបស់អ្នកជំនាញ វាមិនត្រឹមតែងាយស្រួលក្នុងការប្រើប្រាស់ប៉ុណ្ណោះទេ ប៉ុន្តែវាក៏មានអត្ថប្រយោជន៍ច្រើនផងដែរ។ តួនាទីសំខាន់របស់វាក្នុងពេលដំណើរការ គឺធ្វើការពិនិត្យទៅលើសញ្ញានៃរាងកាយដូចជា៖ ស្ទាបស្ទង់សីតុណ្ហភាពក្នុងខ្លួនមនុស្ស, វាស់ចង្វាក់បេះដូង, វាស់កម្រិតអុកស៊ីសែននៅក្នុងឈាម និងពិនិត្យជាតិសំណើមនៅលើស្បែក។ តាមស្ដាប់ទៅវាមានតួនាទីដូចទៅនឹងប្រភេទនាឡិការដៃតាមដានសុខភាពដែរ ប៉ុន្តែវាមានភាពទំនើបជាងត្រង់ថា ក្រៅពីអាចដឹងពីសុខភាពរាងកាយ វាថែមទាំងអាចបង្ហាញឲ្យដឹងផងដែរថាមនុស្សដែលវាកំពុងបិតវានោះមានអារម្មណ៍ដូចម្ដេចផងដែរ។

លើសពីនេះ ខាងអ្នកផលិតក៏បានបញ្ជាក់ផងដែរថា ៖ ឧបករណ៍នេះគឺវាស់ដឹងភាពពិតត្រឹមត្រូវតាមជាក់ស្ដែងរហូតដល់ 88.83% ដែលអ្នកប្រើប្រាស់អាចជឿទុកចិត្តវាបាន។ មួយវិញទៀត វាត្រូវបានផលិតឡើងដោយផ្អែកតាមគោលការណ៍គោរព និងការពារឯកជនភាព។ វាមិនកត់ត្រាព័ត៌មានផ្ទាល់ខ្លួនរបស់អ្នកប្រើប្រាស់ហើយបញ្ជូនចេញនោះទេ ដោយវាបង្ហាញតែសញ្ញានៃរាងកាយដើម្បីបង្ហាញពីស្ថានភាពសុខភាពប៉ុណ្ណោះ។

បច្ចុប្បន្ននេះ វាកំពុងត្រូវបានអភិវឌ្ឍបន្ថែមសម្រាប់ប្រើប្រាស់ក្នុងវិស័យសុខាភិបាល ផ្នែកចិត្តសាស្រ្ត និងចងភ្ជាប់រវាងមនុស្សជាមួយបច្ចេកវិទ្យា ដើម្បីឲ្យការរស់ក្នុងសង្គមកាន់តែមានភាពងាយស្រួល និងល្អប្រសើរ៕

សហរដ្ឋអាមេរិក ៖ កាលពីខែមីនា កន្លងទៅមានការភ្ញាក់ផ្អើលមួយបានកើតឡើង ដោយស្រ្តីម្នាក់ដែលគេដឹងតាមស្វែងរកបន្ទាប់ពីការបាត់ខ្លួនដោយគ្មានមូលហេតុអស់រយៈពេលជាង៦០ឆ្នាំត្រូវបានរកឃើញវិញ និងក្រោយសាកសួរទើបបានដឹងថាតាមពិតគឺជារត់ចេញពីផ្ទះ រីឯមូលហេតុបានធ្វើឲ្យគ្រប់គ្នាភ្ញាក់ផ្អើលជាខ្លាំង។

ស្រ្តីម្នាក់ដែលមានឈ្មោះថា Audrey Backeberg កាលនោះមានវ័យ២០ឆ្នាំ និងជាម្ដាយរបស់កូន២នាក់ បានបាត់ខ្លួនទៅយ៉ាងអាថ៍កំបាំង នៅក្នុងខែកក្កដា ឆ្នាំ១៩៦២ ក្នុងរដ្ឋ Wisconsin សហរដ្ឋអាមេរិក បន្ទាប់ពីនាងបានប្រាប់គ្រួសារនាងថា នាងត្រូវទៅយកប្រាក់ឈ្នួលពីកន្លែងធ្វើការរបស់នាង។ មនុស្សដែលប្រទះឃើញនាងលើកចុងក្រោយ គឺអ្នកមើលថែទាំកូនឲ្យនាង ដែលឃើញនាងឡើងជិះរថយន្តក្រុងនៅចំណត Wisconsin ក្នុងទិសដៅទៅរដ្ឋ Indiana ដែលមានចម្ងាយប្រហែល480 គីឡូម៉ែត្រពីទីនេះ ។

កន្លងទៅអស់រយៈពេល៦៣ឆ្នាំ លោកIssac Hanson ដែលជាអ្នកស៊ើបក្ដីដ៏ជំនាញបានបើកដំណើរការការស្វែងរកអ្នកស្រី Audrey ឡើងវិញ។ គាត់បានស្វែងរកព័ត៌មានជាច្រើន និងធ្វើការស៊ើអង្កេតគណនី Ancestry.com របស់ប្អូនស្រីបង្កើតAudrey ព្រមទាំងបានរកឃើញនូវអាស័យដ្ឋានដ៏គួរឲ្យសង្ស័យមួយ។ គាត់បានទាក់ទងទៅតាមអាស័យដ្ឋាននោះ ហើយជាលទ្ធផលគាត់បានរកឃើញលោកស្រី Audrey ឃើញពិតមែន ដែលនៅរស់រានមានជីវិត និងក្នុងឆ្នាំ២០២៥នេះ គាត់មានអាយុ៨២ឆ្នាំទៅហើយ។

តាមរយៈការសាកសួរក្រោយរកឃើញវិញ លោកស្រី Audrey បាននិយាយថា ៖ ការបាត់ខ្លួនរបស់គាត់គឺជាជម្រើសផ្ទាល់ខ្លួន មិនពាក់ព័ន្ធនឹងបទឧក្រិ..ដ្ឋចា..ប់ជំរិតអ្វីឡើយ។ ហើយកាលដែលគាត់ជ្រើសរើសរត់ចេញពីផ្ទះបែបនេះ គឺដោយសារចង់គេចចេញពីប្ដីកំណា..ចដែលតែងប្រើអំពើហិ..ង្សា និងគំរា..មសម្លា..ប់ដល់គាត់។ គាត់បានបន្ថែមផងដែរថា ៖ កាលនោះគាត់ក៏ធ្លាប់ដាកើពាក្យបណ្ដឹងផងដែរប៉ុន្តែគ្មានទទួលបានលទ្ធផលអ្វីឡើយ ដូច្នេះហើយទើបគាត់សម្រេចចិត្តចាកចេញឲ្យឆ្ងាយតែម្ដង។

អ្នកស្រី Audrey បានបញ្ជាក់ថា ៖ ចាប់តាំងពីពេលនោះមកគាត់បានរស់នៅក្នុងនាមជាមួយថ្មីម្នាក់ទៀត ជាមួយអត្តសញ្ញាណថ្មី និងគ្រួសារថ្មីដែលមានសុភមង្គល។ លើសពីនេះ ដោយសារតែមានការស្នើសុំពីកូនៗ និងក្រុមគ្រួសាររបស់ Audrey សម្រាប់អត្តសញ្ញាណមុខមាត់ និងទីតាំងរបស់គាត់នាពេលបច្ចុប្បន្ន មិនត្រូវបានសមត្ថកិច្ច ឬអ្នកសារព័ត៌មានបង្ហាញជាសាធារណៈឡើយ។ រីឯអតីតប្ដីដែលបានធ្វើបា..បមកកាន់អ្នកស្រីនោះ គឺបានស្លា..ប់ទៅហើយកាលពីឆ្នាំ2006។

ទោះជាយ៉ាងណា ករណីនេះបានបង្ហាញពីភាពរីកចម្រើននៃបច្ចេកវិទ្យាក្នុងការស៊ើបក្ដីរបស់ប៉ូលីស ជាពិសេសទៅលើរឿងក្ដីត្រជាក់នៃការបាត់ខ្លួនយូរឆ្នាំដែលមិនអាចរកឃើញ។ ជាងនេះទៅទៀត នៅពេលរឿងរ៉ាវនេះត្រូវបានគេចែករំលែកសុះសាយពាសពេញអ៊ីនធើណេត បានធ្វើឲ្យមនុស្សជាច្រើនភ្ញាក់ផ្អើល និងបានបង្ហាញការគាំទ្រទៅកាន់អ្នកស្រី Audrey ក្នុងការចាប់ផ្ដើមជីវិតសារជាថ្មី៕