សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែល មិនងាយបញ្ចប់នាពេលឆាប់ៗឡើយ ពីព្រោះអ៊ីរ៉ង់បានតែងតាំងលោក Mojtaba Khamenei ជាមេដឹកនាំថ្មីដែលមានឥទ្ធិពលខ្លាំងជាងឪពុក ដោយប្តេជ្ញាសងសឹ.កអាមេរិក និងអ៊ីស្រាអែលឱ្យបាន ដែលបើកការវាយប្រ.ហារធ្វើឱ្យឪពុក និងសាច់ញាតិរបស់ខ្លួនបាត់បង់ជីវិ.តក្នុងថ្ងៃតែមួយ ។ មេដឹកនាំអ៊ីរ៉ង់ថ្មីប្រកាន់ជំហរដូចឪពុក ដោយផ្តោតតែលើសង្គ្រា.មប៉ុណ្ណោះ ទាត់ចោលការចរចា ហើយការជ្រើសរើសកូនឱ្យស្នងតំណែង គឺជាសញ្ញាបង្ហាញពីភាពរឹងរូសរបស់រដ្ឋាភិបាលអ៊ីរ៉ង់ទៅកាន់លោកខាងលិច ។

បើតាមការ​អ្នកវិភាគដែល​ត្រូវ​បានសារព័ត៌មានបរទេសដកស្រង់ពាក្យសម្តីយកមកចុះផ្សាយនៅថ្ងៃទី៩ ខែមីនា ឆ្នាំ២០២៦​ គឺការឡើងកាន់តំណែងរបស់មេដឹកនាំថ្មីរូបនេះជាសញ្ញាបង្ហាញពីរបបគ្រប់គ្រងអ៊ីរ៉ង់នៅតែបន្ត និងរដ្ឋាភិបាលអ៊ីរ៉ង់ទាត់ចោលការចរចា ឬមិនធ្វើកិច្ចព្រមព្រៀងនានារយៈពេលខ្លីជាមួយអាមេរិកឡើយ ស្របពេលសង្គ្រាមអូសបន្លាយឈានចូលសប្តាហ៍ទី២ ។

លោក Ali Hashem អ្នកសារព័ត៌មានមកពី Al Jazeera នៅទីក្រុង Doha ប្រទេសកាតា និយាយថា មេដឹកនាំអ៊ីរ៉ង់ថ្មីនឹងបំពេញតួនាទីជាអ្នកយាមទ្វារឱ្យឪពុក ពីព្រោះប្រកាន់គោលជំហរដូចឪពុក គឺប្រឆាំងអាមេរិក និងអ៊ីស្រាអែល ព្រមទាំងផ្តោតតែលើសង្គ្រាមប៉ុណ្ណោះ គ្មានការចរចា ។ ប្រសិនបើសង្គ្រាមនេះបញ្ចប់ ហើយលោក Mojtaba មិនស្លាប់ និងដឹកនាំប្រទេសបន្តនោះ គឺអ៊ីរ៉ង់ត្រូវស្វែងរកផ្លូវថ្មីមួយដើម្បីកំណត់ទិសដៅប្រទេស ។

ចំណែកអ្នកវិភាគគោលនយោបាយសាធារណៈនៅសាកលវិទ្យាល័យ American University of Beirut យល់ថា ការតែងតាំងមេដឹកនាំអ៊ីរ៉ង់ថ្មី គឺឆ្លុះបញ្ចាំងពីការបន្តអំណាច ហើយត្រូវតាមដានថា តើមេដឹកនាំថ្មីនឹងសម្រេចចិត្តចរចាបញ្ចប់សង្គ្រាមដែរឬទេ? នេះបង្ហាញពីអាកប្បកិរិយារឹងរូសយ៉ាងខ្លាំងទៅកាន់លោកខាងលិច គឺអ៊ីរ៉ង់កំពុងប្រាប់អាមេរិក និងអ៊ីស្រាអែល ថាមិនអាចផ្តួលរំលំរបបដឹកនាំអ៊ីរ៉ង់បានទេ ពីព្រោះមេដឹកនាំថ្មីខ្លាំងជាងមេដឹកនាំចាស់ ។

គួរបញ្ជាក់ថា លោក Mojtaba អាយុ៥៦ឆ្នាំ បានក្លាយជាមេដឹកនាំកំពូលអ៊ីរ៉ង់ថ្មី បន្ទាប់ពីអាមេរិក និងអ៊ីស្រាអែលធ្វើប្រតិបត្តិការកងទ័ពវាយប្រហារប្រទេសអ៊ីរ៉ង់កាលពីថ្ងៃទី២៨ ខែកុម្ភៈ ឆ្នាំ២០២៦ ដែលបណ្តាលឱ្យឪពុករបស់លោក គឺលោក Ayatollah Ali Khamenei បាត់បង់ជីវិត ។ ការឡើងកាន់តំណែងនេះ ស្របពេលប្រទេសអ៊ីរ៉ង់កើតសង្គ្រាមធ្ងន់ធ្ងរបំផុតក្នុងរយៈពេល៤៧ឆ្នាំ និងធ្វើឱ្យមតិនានាមានចម្ងល់ថា តើមេដឹកនាំថ្មីនឹងដឹកនាំប្រទេសក្នុងទិសដៅបែបណា?

បណ្តាមេដឹកនាំកងកម្លាំងបដិវត្តន៍អ៊ីស្លាម (IRGC) និងកងកម្លាំងប្រដាប់អាវុធបានប្រកាសគាំទ្រមេដឹកនាំថ្មី ខណៈអគ្គលេខាធិការឧត្តមក្រុមប្រឹក្សាសន្តិសុខជាតិអ៊ីរ៉ង់ដែលបំពេញតួនាទីកំណត់យុទ្ធសាស្ត្រប្រទេសតាំងពីអាមេរិក និងអ៊ីស្រាអែលវាយប្រហារ ក៏គាំទ្រមេដឹកនាំថ្មីដែរ និងអំពាវនាវឱ្យសាមគ្គីគ្នាក្នុងប្រទេសអ៊ីរ៉ង់ ។ ដូចគ្នានេះ អ្នកនាំពាក្យរដ្ឋសភាអ៊ីរ៉ង់បានបង្ហាញក្តីរីករាយចំពោះការជ្រើសរើសលោក Mojtaba ជាមេដឹកនាំកំពូលអ៊ីរ៉ង់ និងចាត់ទុកការអនុវត្តតាមបញ្ជារបស់មេដឹកនាំថ្មី គឺជាកាតព្វកិច្ចជាតិ និងសាសនា ។

ទោះជាលោក Mojtaba មិនធ្លាប់ឈរឈ្មោះក្នុងការបោះឆ្នោត ឬត្រូវបានពលរដ្ឋបោះឆ្នោតគាំទ្រធ្វើជាមេដឹកនាំប្រទេសពីមុនមក ប៉ុន្តែរយៈពេលជាច្រើនឆ្នាំមកនេះ លោកជាបុគ្គលមានឥទ្ធិពលយ៉ាងខ្លាំងក្នុងចំណោមថ្នាក់ដឹកនាំកំពូលអ៊ីរ៉ង់ ហើយលោកមានទំនាក់ទំនងជិតស្និទ្ធជាមួយកងកម្លាំងបដិវត្តន៍អ៊ីស្លាម (IRGC) ។

សមាជិកក្រុមប្រឹក្សាអ្នកជំនាញអ៊ីរ៉ង់ដែលមានតួនាទីជ្រើសរើសមេដឹកនាំកំពូលថ្មី ថាការតាំងតែងលោក Mojtaba ឱ្យឡើងកាន់តំណែង គឺធ្វើឡើងតាមបណ្តាំរបស់លោក Ali Khamenei ដែលធ្លាប់និយាយថា មេដឹកនាំកំពូលអ៊ីរ៉ង់ថ្មី គួរតែជាបុគ្គលដែលសត្រូវស្អប់ខ្ពើ.ម មិនមែនបុគ្គលដែលសត្រូវសរសើរនោះទេ ខណៈលោកប្រធានាធិបតី Trump មិនទទួលស្គាល់លោក Mojtaba ៕

ស្ថានភាពនៅទីក្រុងតេហេរ៉ង់របស់អ៊ីរ៉ង់ពេលនេះកាន់តែធ្ងន់ធ្ងរខ្លាំងហើយ ពីព្រោះមិនត្រឹមតែក្លាយជាតំបន់សមរភូមិដ៏ក្តៅគគុកប៉ុណ្ណោះទេ គឺពលរដ្ឋក្នុងទីក្រុងប្រឈមនឹងផលប៉ះពាល់សុខភាពធ្ងន់ធ្ងរដោយសារបរិយាកាសគ្របដណ្តប់ដោយសារធាតុគីមីពុល ដែលបណ្តាលមកពីកងទ័ពអាមេរិក និងអ៊ីស្រាអែលវាយប្រ.ហារលើឃ្លាំងស្តុកប្រេងជាច្រើនកន្លែង ។ អ៊ីរ៉ង់ប្រកាសឱ្យពលរដ្ឋពាស់ម៉ាស់ កុំចេញក្រៅផ្ទះ ពីព្រោះទឹកភ្លៀងពណ៌ខ្មៅដូចប្រេងម៉ាស៊ីនលាយឡំសារធាតុគីមីបណ្តាលឱ្យខូចផ្លូវដង្ហើម និងសួត ។

ហេតុការណ៍ផ្ទុះឃ្លាំងស្តុកប្រេងឥន្ធនៈយ៉ាងហោចណាស់៤កន្លែងនៅទីក្រុងតេហេរ៉ង់ ដែលបណ្តាលមកពីការវាយប្រហាររបស់អាមេរិក និងអ៊ីស្រាអែល បានធ្វើឱ្យឃ្លាំងទាំងនេះបញ្ចេញសារធាតុគីមីពុលយ៉ាងច្រើនទៅលើបរិយាកាស ។ អាជ្ញាធរអ៊ីរ៉ង់ព្រមានថា ប្រសិនបើមានភ្លៀងធ្លាក់ សារធាតុគីមីពុលទាំងនេះនឹងធ្វើឱ្យទឹកភ្លៀងពណ៌ខ្មៅដូចប្រេងម៉ាស៊ីនលាយឡំជាមួយអាស៊ីតយ៉ាងច្រើនដែលបង្កគ្រោះថ្នា.ក់ដល់សុខភាពពលរដ្ឋយ៉ាងធ្ងន់ធ្ងរ ជាពិសេស ផ្លូវដង្ហើម និងសួត ។

តាមការចុះផ្សាយរបស់សារព័ត៌មានបរទេសកាលពីថ្ងៃទី៨ ខែមីនា ឆ្នាំ២០២៦ អាមេរិក និងអ៊ីស្រាអែលបានវាយប្រហារលើឃ្លាំងស្តុកប្រេងអ៊ីរ៉ង់ចំនួន៤កន្លែងនៅទីក្រុងតេហេរ៉ង់ និងនៅតំបន់ក្បែរគ្នា បណ្តាលឱ្យបញ្ចេញសារធាតុអ៊ីដ្រូកាបូនពុល ស្ពាន់ធ័រ និងអាស៊ីតអាសូតក្នុងបរិមាណយ៉ាងច្រើនមហាសាលទៅលើបរិយាកាស ។ បើមានភ្លៀងធ្លាក់នឹងប៉ះពាល់សុខភាពពលរដ្ឋអ៊ីរ៉ង់យ៉ាងខ្លាំង ដោយសារទឹកភ្លៀងពណ៌ខ្មៅលាយឡំជាមួយអាស៊ីតខ្ពស់បណ្តាលឱ្យមានដំបៅលើស្បែក និងបំផ្លាញសួត ។

ការិយាល័យបរិស្ថានអ៊ីរ៉ង់បានប្រកាសទៅកាន់ពលរដ្ឋហាមចេញពីផ្ទះ ដើម្បីកុំឱ្យត្រូវទឹកភ្លៀងប៉ះពាល់សុខភាព ជាពិសេស ប្រព័ន្ធផ្លូវដង្ហើម, ហាមប្រើប្រាស់ម៉ាស៊ីនត្រជាក់ និងពាក់ម៉ាស់ជានិច្ច ព្រមទាំងហាមឈរនៅទីវាល បើត្រូវទឹកភ្លៀង ហាមជូតសម្អាតដាច់ខាត ត្រូវប្រញាប់លាងដោយទឹកត្រជាក់ និងផ្លាស់ប្តូរសម្លៀកបំពាក់ ។

ពលរដ្ឋទីក្រុងតេហេរ៉ង់បានធុំក្លិនឈ្ងៀមគ្រប់ទីកន្លែង ខណៈទីក្រុងទាំងមូលគ្របដណ្តប់ដោយពពកខ្មៅងងឹត បើទោះជាមិនមែនជាពេលយប់ក៏ដោយ ។ ភ្លៀងធ្លាក់នៅទីកន្លែងខ្លះ គឺដំណក់ទឹកភ្លៀងធ្លាក់ពីពពកខ្មៅមានសភាពដូចប្រេងម៉ាស៊ីន បន្ទាប់ពីផ្ទុះឃ្លាំងស្តុកប្រេងជាច្រើនកន្លែង ។ ពួកគេថា ស្ថានភាពទីក្រុងទាំងមូលដូចគ្នានឹងថ្ងៃអវសានពិភពលោក មេឃងងឹតឈឹងពោរពេញដោយផ្សែងខ្មៅ ពិបាកដកដង្ហើម ។

នាយកប្រតិបត្តិក្រុមហ៊ុនចែកចាយប្រេងឥន្ធនៈអ៊ីរ៉ង់ លោក ខេរ៉ាម៉ាត់ វ៉េសាការ៉ាមី និយាយថា ឃ្លាំងស្តុកប្រេង៤កន្លែង និងមជ្ឈមណ្ឌលដឹកជ្ជូនប្រេង១កន្លែងនៅទីក្រុងតេហេរ៉ង់ និងខេត្ត Alborz នៅភាគខាងជើងប្រទេស បានរងការវាយប្រហារដោយយន្តហោះចម្បាំងរបស់កងទ័ពអាមេរិក និងអ៊ីស្រាអែល ដែលបណ្តាលឱ្យមនុស្សស្លាប់៤នាក់ និងខូចខាតប្រព័ន្ធចែកចាយប្រេងទាំងអស់ ខណៈអភិបាលក្រុងតេហេរ៉ង់ លោក Sadegh Motamedian ថា ប្រព័ន្ធចែកចាយប្រេងក្នុងទីក្រុងត្រូវបានផ្អាកដំណើរការភ្លាមៗដោយសារការខូចខាតបណ្តាញផ្គត់ផ្គង់ប្រេង ។

ទីក្រុងតេហេរ៉ង់កំពុងប្រឈមនឹងផលប៉ះពាល់សុខភាពពលរដ្ឋយ៉ាងធ្ងន់ធ្ងរដោយសារបរិយាកាសគ្របដណ្តប់ដោយសារធាតុគីមីពុល និងមានសំឡេងផ្ទុះលាន់ជាបន្តបន្ទាប់ រីឯទីក្រុងការ៉ាជ ដែលនៅក្បែរនោះក៏ដូចគ្នា បន្ទាប់ពីការវាយប្រហារអគារឃ្លាំងស្តុកប្រេងជាច្រើនកន្លែងកាលពីយប់ថ្ងៃទី៧ ខែមីនា បណ្តាលឱ្យមានពន្លឺភ្លើង និងផ្សែង ។ នេះជាការកំទេចឃ្លាំងស្តុកប្រេងអ៊ីរ៉ង់លើកដំបូង តាំងពីអាមេរិក និងអ៊ីស្រាអែលធ្វើប្រតិបត្តិការកងទ័ពកាលពីថ្ងៃទី២៨ ខែកុម្ភៈ ។

គួរបញ្ជាក់ថា ការវាយប្រហាររបស់អាមេរិក និងអ៊ីស្រាអែលបណ្តាលឱ្យខូចខាតអគារស៊ីវិលនៅប្រទេសអ៊ីរ៉ង់ ប្រមាណ១ម៉ឺនកន្លែង ក្នុងនោះមានអគារស្នាក់នៅ ចំនួន៧,៩៤៣កន្លែង, អគារពាណិជ្ជកម្ម ១,៦១៧កន្លែង ព្រមទាំងមន្ទីរពេទ្យ និងសាលារៀនជាច្រើនកន្លែង ៕

នៅថ្ងៃទី៩ ខែមីនា ឆ្នាំ២០២៦ លោក Mojtaba Khamenei ត្រូវបានតែងតាំងជាមេដឹកនាំកំពូលអ៊ីរ៉ង់ថ្មីបន្តតំណែងពីឪពុករបស់ខ្លួន ដែលលោកជាបុគ្គលមានឥទ្ធិពលខ្លាំងនៅពីក្រោយខ្នងឪពុក និងធ្លាប់ប្រកាសសងសឹ.កអាមេរិក និងអ៊ីស្រាអែលឱ្យបាន ដោយសារការបាត់បង់ជីវិ.តឪពុក និងសាច់ញាតិក្នុងថ្ងៃតែមួយបន្ទាប់ពីការវាយប្រ.ហាររបស់អាមេរិក និងអ៊ីស្រាអែល ។ ពេលនេះ ពលរដ្ឋអ៊ីរ៉ង់បារម្ភពីសុវត្ថិភាពរបស់លោក ដោយសារអាមេរិកមិនគាំទ្រ ខណៈអ៊ីស្រាអែលគំ.រាមចាត់ការមេដឹកនាំអ៊ីរ៉ង់ថ្មី ។

ប្រព័ន្ធផ្សព្វផ្សាយរបស់រដ្ឋាភិបាលអ៊ីរ៉ង់បានរាយការណ៍នៅព្រឹកថ្ងៃទី៩ ខែមីនា ថា លោក Mojtaba Khamenei គឺជាកូនប្រុសទី២ របស់លោក Ayatollah Ali Khamenei មេដឹកនាំកំពូលអ៊ីរ៉ង់ចាស់ ត្រូវបានតែងតាំងជាមេដឹកនាំកំពូលអ៊ីរ៉ង់ថ្មីបន្តតំណែងពីឪពុក ខណៈប្រធានាធិបតីអាមេរិក លោក Donald Trump ប្រកាសថា មេដឹកនាំកំពូលអ៊ីរ៉ង់ថ្មីនឹងកាន់តំណែងមិនបានយូរទេ ប្រសិនបើគ្មានការគាំទ្រពីអាមេរិក ។

តាមការចុះផ្សាយរបស់ប្រព័ន្ធផ្សព្វផ្សាយរដ្ឋាភិបាលអ៊ីរ៉ង់ លោក Mojtaba នឹងឡើងកាន់តំណែងបន្តពីឪពុក គឺលោក Ayatollah Ali Khamenei ដែលបានបាត់បង់ជីវិតដោយសារការវាយប្រហារពីសំណាក់អាមេរិក និងអ៊ីស្រាអែល កាលពីថ្ងៃទី២៨ ខែកុម្ភៈ ។ លោក Mojtaba ត្រូវបានតែងតាំងដោយក្រុមប្រឹក្សាអ្នកជំនាញ (Assembly of Experts) ដែលមានសមាជិកជាមន្ត្រីសង្ឃជាន់ខ្ពស់ចំនួន៨៨រូប និងមានតួនាទីទទួលខុសត្រូវក្នុងការជ្រើសរើសមេដឹកនាំកំពូល ។

តាំងពីការបង្កើតសាធារណរដ្ឋអ៊ីស្លាមអ៊ីរ៉ង់កាលពីឆ្នាំ១៩៧៩ ក្រុមប្រឹក្សាអ្នកជំនាញធ្លាប់តែងតាំងមេដឹកនាំថ្មីអ៊ីរ៉ង់បានតែ១លើកប៉ុណ្ណោះ គឺតែងតាំងលោក Ayatollah Ali Khamenei ជាមេដឹកនាំកំពូលអ៊ីរ៉ង់ឱ្យដឹកនាំប្រទេសភ្លាមៗ បន្ទាប់ពីលោក Ayatollah Ruhollah Khomeini បាត់បង់ជីវិតកាលពីជាង៣០ឆ្នាំមុន ។

លោក Mojtaba គឺជាបុគ្គលមានឥទ្ធិពលបំផុតនៅពីក្រោយខ្នងឪពុក និងមានទំនាក់ទំនងយ៉ាងជិតស្និទ្ធជាមួយកងកម្លាំងបដិវត្តអ៊ីស្លាម (IRGC) ដែលជាកងកម្លាំងកងទ័ពដ៏មានអំណាចបំផុតនៅប្រទេសអ៊ីរ៉ង់ ហើយលោកក៏មានទំនាក់ទំនងជិតស្និទ្ធជាមួយកងកម្លាំងកងទ័ពស្ម័គ្រចិត្ត Basij ផងដែរ ។

លោក Mojtaba មិនមែនជាមន្ត្រីសង្ឃជាន់ខ្ពស់ និងមិនបានកាន់តំណែងជាផ្លូវការក្នុងតំណែងរដ្ឋាភិបាលអ៊ីរ៉ង់ទេ ហើយធ្លាប់ត្រូវអាមេរិកដាក់ទណ្ឌកម្មកាលពីឆ្នាំ២០១៩ ដោយក្រសួងហិរញ្ញវត្ថុអាមេរិកចោទប្រកាន់ថា លោកសហការស្អិតរមួតជាមួយមេបញ្ជាការកងកម្លាំង Quds និងកងកម្លាំង Basij ដើម្បីគាំទ្រឪពុកធ្វើឱ្យមានអស្ថិរភាពក្នុងតំបន់ និងកៀបសង្កត់ផ្ទៃក្នុងប្រទេស ។

ចំណែកលោកប្រធានាធិបតី Trump បានប្រកាសតាំងពីថ្ងៃទី៥ ខែមីនា ថា មិនទទួលស្គាល់ការតែងតាំងលោក Mojtaba ឱ្យដឹកនាំប្រទេសបន្តពីឪពុកទេ បន្ទាប់មក លោកក៏ផ្តល់សម្ភាសន៍ជាមួយសារព័ត៌មាន ABC News កាលពីថ្ងៃទី៨ ខែមីនា ថា មេដឹកនាំកំពូលថ្មីអ៊ីរ៉ង់នឹងមិនអាចកាន់តំណែងយូរឡើយ ប្រសិនបើអាមេរិកមិនគាំទ្រ ។

កន្លងមក លោកប្រធានាធិបតី Trump បានប្រកាសយ៉ាងម៉ឺងម៉ាត់ថា អាមេរិកត្រូវតែចូលរួមជ្រើសរើសមេដឹកនាំកំពូលអ៊ីរ៉ង់ថ្មី ពីព្រោះអាមេរិកមិនចង់ចាត់ការរឿងដដែលរៀងរាល់១០ឆ្នាំទេ អាមេរិកចង់បានមេដឹកនាំអ៊ីរ៉ង់ថ្មីដែលមិនដឹកនាំប្រទេសធ្លាក់ក្នុងសង្គ្រាម ។ មេដឹកនាំថ្មីគួរតែមកពីមេដឹកនាំសាសនារបស់អ៊ីរ៉ង់ ដោយសារមេដឹកនាំសាសនាបានបំពេញការងារល្អៗជាច្រើន ពួកគេមានគុណសម្បត្តិអាចដឹកនាំប្រទេសបាន ៕

សមនឹងរហ័សនាមថាជា «ប្រធានាធិបតីនៃសង្រ្គាម» លោក Donald Trump កាលពីពេលថ្មីៗនេះបាននិយាយដោយបើកចំហរបញ្ជាក់ប្រាប់ប្រព័ន្ធផ្សព្វផ្សាយថា សង្គ្រាមរវាងសហរដ្ឋអាមេរិកនិងអ៊ីរ៉ង់ នឹងអាចបញ្ចប់ទៅបានលុះត្រាតែភាពជាអ្នកដឹកនាំផ្ដាច់ការបានដួលរលំ ហើយកម្លាំងយោធារបស់អ៊ីរ៉ង់ត្រូវបានបំផ្លា.ញទាំងស្រុង។

ថ្លែងទៅកាន់អ្នកយកព័ត៌មាននៅលើយន្តហោះ Air Force One កាលពីថ្ងៃសៅរិ៍ ទី៧ ខែមីនា លោក Trump បាននិយាយថា លោកមិនចាប់អារម្មណ៍ក្នុងការចរចាជាមួយទីក្រុងតេអេរ៉ង់នៅដំណាក់កាលនេះទេ។ ផ្ទុយទៅវិញ លោកបានណែនាំថា ជម្លោះនេះអាចនឹងបន្តរហូតដល់អ៊ីរ៉ង់លែងមានរចនាសម្ព័ន្ធយោធា ឬភាពជាអ្នកដឹកនាំដែលដំណើរការបាន ឬលែងមានសមត្ថភាពប្រយុទ្ធបន្តទៅទៀត។

ក្រៅពីនេះលោក Trump បានបន្ថែមថា ប្រសិនបើអ៊ីរ៉ង់អូសបន្លាយពេល បណ្ដោយឲ្យយុទ្ធនាការផ្លូវអាកាសរវាងសហរដ្ឋអាមេរិក និងអ៊ីស្រាអែលនៅតែបន្តដំណើរការនោះការចរចាសន្តិភាពនឹងមិនធ្វើឡើងបានឡើយ ដ្បិតមេដឹកនាំ និងមេបញ្ជាការអ៊ីរ៉ង់ធំៗត្រូវបានសម្លា.ប់អស់ទៅហើយនៅក្នុងការវាយប្រហារនោះ។ លោកបានកត់សម្គាល់ថា “ប្រហែលជាគ្មាននរណាម្នាក់នៅសល់ដើម្បីនិយាយថាយើងចុះចាញ់ទេមើលទៅ” ដែលនេះបង្ហាញថាសង្គ្រាមអាចនឹងបញ្ចប់ដោយមានប្រសិទ្ធភាពលុះត្រាតែរចនាសម្ព័ន្ធបញ្ជាការរបស់អ៊ីរ៉ង់ដួលរលំ។

គួរជម្រាបថា ការអត្ថាធិប្បាយទាំងនេះធ្វើឡើងនៅពេលដែលជម្លោះរវាងអ៊ីរ៉ង់ និងសម្ព័ន្ធមិត្តសហរដ្ឋអាមេរិក-អ៊ីស្រាអែលបានឈានដល់សប្តាហ៍ទីពីរ ហើយភាគីទាំងពីរបានផ្លាស់ប្តូរការវាយប្រហារនៅទូទាំងតំបន់។ អ្នកវិភាគនិយាយថា ពាក្យសម្ដីរបស់លោក Trump បានបង្ហាញពីយុទ្ធសាស្ត្រមួយដែលសហរដ្ឋអាមេរិកមានគោលបំណងវាយកម្ទេចភាពជាអ្នកដឹកនាំ និងសមត្ថភាពយោធារបស់អ៊ីរ៉ង់ ជាជាងការស្វែងរកបទឈប់បាញ់ដោយសន្តិវិធី។

ជាមួយគ្នានេះដែរ អ្នកជំនា.ញខាងភូមិសាស្រ្តនយោបាយអន្តរជាតិបានព្រមានថា គោលដៅបែបនេះអាចអូសបន្លាយសង្គ្រាម និងធ្វើឱ្យមជ្ឈិមបូព៌ាកាន់តែធ្លាក់ក្នុងអស្ថិរភាព ខណៈដែលអ៊ីរ៉ង់ និងសម្ព័ន្ធមិត្តរបស់ពួកគេបានប្ដេជ្ញាចិត្តយ៉ាងមុះមត់ថា នឹងបន្តទប់ទល់នឹងប្រតិបត្តិការយោធារបស់សហរដ្ឋអាមេរិក និងអ៊ីស្រាអែលឲ្យដល់ទីបញ្ចប់៕

សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែលនៅតែក្តៅគគុកមិនទាន់រលត់ឡើយ ដែលជំរុញឱ្យអង្គការសហប្រជាជាតិព្រួយបារម្ភយ៉ាងខ្លាំងកាលពីថ្ងៃទី៦ ខែមីនា ឆ្នាំ២០២៦ ហើយអំពាវនាវឱ្យគ្រប់ភាគីជម្លោះបញ្ចប់សង្គ្រា.មត្រឹមនេះ ស្វែងរកដំណោះស្រាយដោយការចរចាគ្នា បើមិនដូច្នោះទេ វានឹងរីករាលដាលកាន់តែខ្លាំងឡើងទប់ស្កាត់លែងបាន ។

កាលពីថ្ងៃទី៦ ខែមីនា អគ្គលេខាធិការអង្គការសហប្រជាជាតិ (UN) លោក Antonio Guterres បានដាស់តឿនពីសង្គ្រាមនៅមជ្ឈិមបូព៌ានឹងរាលដាលកាន់តែខ្លាំងរហូតដល់គ្មានប្រទេសណាមួយអាចទប់ស្កាត់បាន ព្រមទាំងអំពាវនាវឱ្យអាមេរិក និងអ៊ីរ៉ង់ ងាកមករកការចរចាគ្នាតាមមធ្យោបាយការទូតដើម្បីបញ្ចប់សង្គ្រាម ។ សង្គ្រាមបណ្តាលឱ្យមនុស្សភៀសខ្លួនកើនឡើងរហូតដល់ ៣សែន ៣ម៉ឺននាក់ ដោយសារអាមេរិករួមដៃគ្នាជាមួយអ៊ីស្រាអែលវាយប្រហារអ៊ីរ៉ង់ រីឯអ៊ីរ៉ង់សងសឹកដោយការបាញ់មីស៊ីល និងដ្រូនទៅកាន់មូលដ្ឋានកងទ័ពអាមេរិកនៅបណ្តាប្រទេសមជ្ឈិមបូព៌ា បង្កឱ្យភ្លើងសង្គ្រាមឆេះពេញតំបន់ ។

លោកបន្តថា ការវាយប្រហារខុសច្បាប់នៅតំបន់មជ្ឈិមបូព៌ា និងតំបន់ផ្សេងៗកំពុងតែធ្វើឱ្យជនស៊ីវិលរងទុក្ខវេទនាយ៉ាងខ្លាំង និងប៉ះពាល់ដល់សេដ្ឋកិច្ចពិភពលោកយ៉ាងធ្ងន់ធ្ងរ ជាពិសេស ក្រុមប្រទេសងាយរងផលប៉ះពាល់ ។

បើតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ពេលនេះ មានមនុស្សយ៉ាងតិច ចំនួន៣សែន ៣ម៉ឺននាក់ បានរត់គេចពីសង្គ្រាមនៅតំបន់មជ្ឈិមបូព៌ា ក្នុងនោះមនុស្សប្រមាណ១សែននាក់បានរត់ចេញពីទីក្រុងតេហេរ៉ង់ ។

ចំណែកឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ លោក Amir-Saeid Iravani ថា អាមេរិក និងអ៊ីស្រាអែលមិនគោរពបន្ទាត់ក្រហមណាមួយឡើយ និងប្រព្រឹត្តឧក្រិដ្ឋកម្មមកលើប្រទេសអ៊ីរ៉ង់ ខណៈតំបន់ជនស៊ីវិលរបស់អ៊ីរ៉ង់ដែលមានមនុស្សរស់នៅយ៉ាងច្រើនត្រូវបានអាមេរិក និងអ៊ីស្រាអែល ទម្លាក់គ្រាប់បែក ។ អ៊ីរ៉ង់ថ្កោលទោសអាមេរិក និងអ៊ីស្រាអែល ដែលវាយប្រហារលើកីឡដ្ឋាននៅទីក្រុងតេហេរ៉ង់ ដែលជាការល្មើសច្បាប់អន្តរជាតិ និងប្រឆាំងរដ្ឋធម្មនុញ្ញអូឡាំពិក ។

គួរបញ្ជាក់ថា ប្រធានាធិបតីអាមេរិក លោក Donald Trump កាលពីថ្ងៃទី៦ ខែមីនា បានជំរុញឱ្យអ៊ីរ៉ង់យល់ព្រមចុះចាញ់សង្គ្រាមដោយគ្មានលក្ខខណ្ឌអ្វីទាំងអស់ ដែលការកំណត់នេះត្រូវបានចាត់ទុកជាការដាក់សម្ពាធលើអ៊ីរ៉ង់យ៉ាងខ្លាំង បន្ទាប់ពីអាមេរិក និងអ៊ីស្រាអែលបើកការវាយប្រហារអ៊ីរ៉ង់កាលពីចុងខែកុម្ភៈ ដែលធ្វើឱ្យអ៊ីរ៉ង់បដិសេធការចរចាបញ្ចប់សង្គ្រាមនាពេលឆាប់ៗ ៕