សារព័ត៌មានថៃរាយការណ៍ថា ក្រោយកើតរញ្ជួយដីយ៉ាងខ្លាំងក្លានៅមីយ៉ាន់ម៉ា ធ្វើឱ្យពលរដ្ឋថៃបារម្ភយ៉ាងខ្លាំងពេលទទួលបានព័ត៌មានរញ្ជួយដីកើតឡើងនៅប្រទេសជិតខាងថៃ ដោយសារមាន Aftershock កើតឡើងនៅថៃជាបន្តបន្ទាប់ ។ កាលពីថ្ងៃទី១១ ខែឧសភា ឆ្នាំ២០២៥ ភ្នាក់ងារតាមដានគ្រោះរញ្ជួយដីប្រទេសថៃរាយការណ៍ថា មានរញ្ជួយដីកើតឡើងនៅភាគខាងជើងកោះស៊ូម៉ាត្រា ប្រទេសឥណ្ឌូណេស៊ី ស្មើកម្រិត៦.៣រិចទ័រ ជម្រៅ៤៧គីឡូម៉ែត្រ ដែលមានចំណុចកណ្តាលស្ថិតនៅភាគនិរតីស្រុកមឿង ខេត្តសាទូន របស់ថៃ ប្រមាណ៤៩២គីឡូម៉ែត្រ ធ្វើឱ្យពលរដ្ឋថៃបារម្ភពីស៊ូណាមិ ។

តាមការវាយតម្លៃបឋម រញ្ជួយដីនេះពុំបានធ្វើឱ្យប៉ះពាល់ដល់ប្រទេសថៃទេ ប៉ុន្តែពលរដ្ឋរស់នៅខេត្តភាគខាងត្បូងជាច្រើនរបស់ថៃ ដូចជា ៖ ខេត្តសុងក្លា សាទូន ភូកេត និងត្រាំង បានទទួលកម្លាំងរំញ័រដូចៗគ្នា ។ ទោះយ៉ាងណា នៅពុំទាន់មានសេចក្តីរាយការណ៍ពីការខូចខាតទ្រព្យសម្បត្តិ និងមនុស្សស្លាប់ទេ ហើយភ្នាក់ងារតាមដានគ្រោះរញ្ជួយដីថៃ នឹងតាមដានស្ថានការណ៍ រួមទាំងពិនិត្យទិន្នន័យបន្ថែមទៀត ហើយបើទទួលបានព័ត៌មានបន្ថែម ភ្នាក់ងារនឹងជូនដំណឹងភ្លាមៗឱ្យពលរដ្ឋថៃបានជ្រាប ។

ពលរដ្ឋរស់នៅខេត្តភាគខាងត្បូងថៃ ដូចជា ៖ ភូកេត សុងក្លា និងត្រាំង រាយការណ៍ថា ពួកគេទទួលបានកម្លាំងរំញ័រដូចៗគ្នា ដោយសាររញ្ជួយដីកើតឡើងនៅភាគខាងជើងកោះស៊ូម៉ាត្រា ប្រទេសឥណ្ឌូណេស៊ី ៖

-នៅឃុំផៈវង់ ស្រុកមឿងសុងក្លា ខេត្តសុងក្លា ៖ ពលរដ្ឋរស់នៅអគារទី៤ មានអារម្មណ៍ថា ញ័រខ្លួន រីឯទឹកក្នុងធុងផ្អៀងទៅមក
-នៅឃុំហាតយ៉ៃ ស្រុកហាតយៃ ខេត្តសុងក្លា ៖ ពលរដ្ឋសម្រាកនៅមន្ទីរពេទ្យជាន់ទី៥ មានអារម្មណ៍ថា គ្រែរង្គើតិចៗ ។ រីឯពលរដ្ឋរស់នៅអគារជាន់ទី៦ មានអារម្មណ៍ស្រាលខ្លួន ហើយទឹកក្នុងធុងផ្អៀងទៅមក
-នៅឃុំកៈធូ ស្រុកកៈធូ ខេត្តភូកេត ៖ ពលរដ្ឋរស់នៅខុនដូជាន់ទី៤ រង្គើបន្ទប់ ចាប់ពី៣វិនាទី ទៅ៤វិនាទី និងរង្គើទូរសម្លៀកបំពាក់
-នៅឃុំតាឡាតយ៉ៃ ស្រុកមឿងភូកេត ខេត្តភូកេត ៖ ពលរដ្ឋរស់អគារជាន់ទី៣ ម្តុំស្ពានថ្ម ដែលសម្រាកលើសាឡុងមានអារម្មណ៍សាឡុងរង្គើ ខណៈភ្លើងនៅលើពិដានរំកិលតិចៗ
-នៅឃុំរ៉ាជឆាដា ស្រុកមឿងភូកេត ខេត្តភូកេត ៖ ពលរដ្ឋនៅអគារមន្ទីរពេទ្យខេត្តភូកេត មានអារម្មណ៍វិលមុខ ចង់សន្លប់
-នៅឃុំថាប់ថៀង ស្រុកមឿងត្រាំង ខេត្តត្រាំង ៖ ពលរដ្ឋនៅខុនដូជាន់ទី៩ រាយការណ៍ថា អំពូលភ្លើង វាំងនន និងសាឡុង រង្គើទាំងអស់ ។

ភ្នាក់ងារតាមដានគ្រោះរញ្ជួយដីប្រទេសថៃរាយការណ៍ថា ក្រៅពីប្រទេសឥណ្ឌូណេស៊ី រញ្ជួយដីបានកើតឡើងនៅថៃ និងប្រទេសជិតខាងជាញឹកញាប់ ។ ជាក់ស្តែង ចាប់ពីថ្ងៃទី១០ ដល់ថ្ងៃទី១១ ខែឧសភា ឆ្នាំ២០២៥ មានរញ្ជួយដីកើតឡើងមានចំណុចកណ្តាលនៅប្រទេសមីយ៉ាន់ម៉ា ចំនួន១៦លើក និងចំណុចកណ្តាលនៅប្រទេសថៃ ចំនួន១លើក ដែលមានកម្រិតស្រាល និងគ្មានផលប៉ះពាល់ប្រទេសថៃទេ ៕

ប្រទេសអាហ្វ្រិកខាងត្បូង ៖ កាលពីថ្ងៃទី៧ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា សត្វមាន់រាប់សែនក្បាលក្នុងកសិដ្ឋានមួយកន្លែងនៅប្រទេសអាហ្វ្រិកខាងត្បូង ឃ្លានចំណីយ៉ាងខ្លាំងដោយសារពុំបានស៊ីចំណីអស់ជាង១សប្តាហ៍ រហូតដល់ពួកវាចាប់ផ្តើមចឹកស៊ីគ្នាឯង ។ ហេតុនេះ បុគ្គលិកកសិដ្ឋានក៏សម្រេចចិត្តសម្លា.ប់ មាន់ទាំងអស់ចោលដើម្បីកម្ចា.ត់ មេរោគ ។

បើតាមការលើកឡើងរបស់បុគ្គលិកកសិដ្ឋាន គឺពួកគេត្រូវតែសម្លាប់មាន់ជាង៣សែន៥ម៉ឺនក្បាលដើម្បីសម្លាប់មេរោគ ក្រោយពួកវាចាប់ផ្តើមចឹកស៊ីគ្នាឯងដោយសារការស្រេកឃ្លានខ្លាំងពេក ។ ក្រុមហ៊ុនចិញ្ចឹមមាន់ Daybreak Foods ដែលគ្រប់គ្រងដោយរដ្ឋ ប្រឈមនឹងបញ្ហាខ្វះខាតប្រាក់ទិញចំណីមាន់ ទើបក្រុមហ៊ុនពុំបានផ្តល់ចំណីឱ្យមាន់ស៊ីអស់ជាង១សប្តាហ៍ ។

អ្នកស្រី Nokwazi Ngcongo អ្នកតំណាងក្រុមហ៊ុន Daybreak Foods បានផ្តល់សម្ភាសន៍ជាមួយសារព័ត៌មានថា ៖ «មាន់រាប់សែនក្បាលគ្មានចំណីស៊ីជាច្រើនថ្ងៃ ដោយសារបញ្ហាហិរញ្ញវត្ថុបណ្តាលឱ្យប៉ះពាល់ដល់ការបញ្ជូនចំណីមាន់ ហើយក្រុមហ៊ុនព្យាយាមយ៉ាងខ្លាំងដើម្បីដោះស្រាយបញ្ហានេះ» ។

ដោយឡែក មន្ត្រីអង្គការជាតិការពារសត្វនៅអាហ្វ្រិកខាងត្បូង (NSPCA) ពុំអាចបញ្ជាក់ពីចំនួនមាន់ងាប់ក្នុងកសិដ្ឋានទេ ពីព្រោះមាន់ជាច្រើនក្បាលឃ្លានចំណីខ្លាំងពេក ក៏ចឹកស៊ីគ្នាឯងគួរឱ្យសង្វេក ។ អង្គការនេះនឹងប្តឹងក្រុមហ៊ុនចិញ្ចឹមមាន់ ករណីពុំបានបំពេញតួនាទីថែទាំមាន់ឱ្យបានល្អ ដែលទង្វើនេះផ្ទុយនឹងច្បាប់ការពារសត្វ ។

កាលពីថ្ងៃទី៣០ ខែមេសា មន្ត្រីអង្គការ NSPCA ទទួលបានសេចក្តីរាយការណ៍ឱ្យទៅត្រួតពិនិត្យកសិដ្ឋានមួយកន្លែង ហើយបន្ទាប់ពីការត្រួតពិនិត្យរួចមក ឃើញថា កសិដ្ឋាន៥កន្លែងទៀតនៅភាគខាងជើងអាហ្វ្រិកខាងត្បូង ក៏ទុកឱ្យមាន់ងាប់ដោយសារគ្មានចំណីដែរ ។

អង្គការ NSPCA បានជួយសង្គ្រោះមាន់ចេញពីកសិដ្ឋានរបស់ក្រុមហ៊ុន Daybreak Foods ជាង៥សែនក្បាល ប៉ុន្តែមាន់ទាំងនេះស្គមនៅសល់តែឆ្អឹង ។ ក្រុមហ៊ុន Daybreak Foods ដែលផលិត និងចែកចាយមាន់ដ៏ធំបំផុតនៅអាហ្វ្រិកខាងត្បូង គឺគ្រប់គ្រងដោយរដ្ឋក្រោមគម្រោងឈ្មោះ «Public Investment Corporation (PIC)» ។

លោក Nazareth Appalsamy នាយកអង្គការ NSPCA និយាយថា មាន់ជាច្រើនក្បាលត្រូវបានកំទេចចោល ចាប់ពីថ្ងៃទី៣០ ខែមេសា រហូតដល់ថ្ងៃទី៥ ខែឧសភា ។ បច្ចុប្បន្ន រដ្ឋាភិបាលអាហ្វ្រិកខាងត្បូងបានចរចាជាមួយនាយកក្រុមហ៊ុន Daybreak Foods អំពីបញ្ហាហិរញ្ញវត្ថុដែលក្រុមហ៊ុនកំពុងខ្វះខាត ៕

នារីគ្រប់ជាតិសាសន៍តែងតែមានមន្តស្នេហ៍រៀងៗខ្លួន ហើយភាពស្រស់ស្អាតរបស់នារីបានឆ្លុះបញ្ចាំងពីភាពខុសប្លែកគ្នារបស់វប្បធម៌ប្រទេសនីមួយៗ មិនថារូបរាងខាងក្រៅ ពណ៌សម្បុរ កម្ពស់ និងអត្តចរិត ។ កត្តាទាំងនេះកើតឡើងដោយសារទីតាំងភូមិសាស្ត្រប្រទេស របៀបរបបរស់នៅ និងវប្បធម៌ក្នុងតំបន់ ទើបធ្វើឱ្យភាពស្រស់ស្អាតរបស់នារីក្នុងតំបន់មានភាពចម្រុះ និងគួរឱ្យឈ្លក់វង្វេង ។

កាលពីថ្ងៃទី៣០ ខែមេសា ឆ្នាំ២០២៥ គេហទំព័រអាមេរិកឈ្មោះ «Insider Monkey» បានផ្សព្វផ្សាយពីប្រទេសចំនួន២០ ដែលមានស្រីស្អាតបំផុតនៅលើពិភពលោក ប្រចាំឆ្នាំ២០២៥ ហើយការចាត់ចំណាត់ថ្នាក់នេះ គឺយោងតាមលទ្ធផលការបោះឆ្នោតក្នុងគេហទំព័រ Reddit ។

លទ្ធផលការចាត់ចំណាត់ថ្នាក់បង្ហាញថា ប្រទេសកូឡុំប៊ី ជាប់ចំណាត់ថ្នាក់ទី១ មានស្រីស្អាតបំផុតនៅលើពិភពលោក ដែលទទួលបានពិន្ទុខ្ពស់ជាងគេពីការបោះឆ្នោត គឺ៣៤៥ពិន្ទុ បន្ទាប់មក ប្រទេសប៉ូឡូញ ជាប់ចំណាត់ថ្នាក់ទី២ ទទួលបាន ៣២៤ពិន្ទុ និងប្រទេសក្រិក ជាប់ចំណាត់ថ្នាក់ទី៣ ទទួលបាន ៣១១ពិន្ទុ ។

ចំណែកសហរដ្ឋអាមេរិក ជាប់ចំណាត់ថ្នាក់ទី៨ ទទួលបាន ២៨១ពិន្ទុ ខណៈប្រទេសជប៉ុន ជាប់ចំណាត់ថ្នាក់ទី១០ ទទួលបាន ២៦៩ពិន្ទុ ។ រីឯប្រទេសថៃ ជាប់ចំណាត់ថ្នាក់ទី១៥ ទទួលបាន ២៣៤ពិន្ទុ និងវេណេស៊ុយអេឡា ជាប់ចំណាត់ថ្នាក់ទី២០ ទទួលបាន ១៨៦ពិន្ទុ ។

ខាងក្រោមនេះ គឺជាឈ្មោះ២០ប្រទេសដែលមានស្រីស្អាតបំផុតនៅលើពិភពលោក រួមមាន ៖

១-កូឡុំប៊ី ទទួលបាន ៣៤៥ពិន្ទុ
២-ប៉ូឡូញ ទទួលបាន ៣២៤ពិន្ទុ
៣-ក្រិក ទទួលបាន ៣១១ពិន្ទុ
៤-រុស្ស៊ី ទទួលបាន ៣០៨ពិន្ទុ
៥-សាធារណរដ្ឋឆេក ទទួលបាន ៣០១ពិន្ទុ

៦-ស៊ុយអែត ទទួលបាន ២៩៦ពិន្ទុ
៧-អ៊ីស្លង់ ទទួលបាន ២៨៤ពិន្ទុ
៨-សហរដ្ឋអាមេរិក ទទួលបាន ២៨១ពិន្ទុ
៩-ប្រេស៊ីល ទទួលបាន ២៧៦ពិន្ទុ
១០-ជប៉ុន ទទួលបាន ២៦៩ពិន្ទុ

១១-អាល្លឺម៉ង់ ទទួលបាន ២៦៣ពិន្ទុ
១២-បារាំង ទទួលបាន ២៥៧ពិន្ទុ
១៣-អ៊ីតាលី ទទួលបាន ២៥១ពិន្ទុ
១៤-ន័រវេស ទទួលបាន ២៤៦ពិន្ទុ
១៥-ថៃ ទទួលបាន ២៣៤ពិន្ទុ

១៦-តួកគី ទទួលបាន ២២៧ពិន្ទុ
១៧-កូរ៉េខាងត្បូង ទទួលបាន ២១៥ពិន្ទុ
១៨-អេស្ប៉ាញ ទទួលបាន ២០៣ពិន្ទុ
១៩-អាល់បានី ទទួលបាន ១៩៧ពិន្ទុ
២០-វេណេស៊ុយអេឡា ទទួលបាន ១៨៦ពិន្ទុ ៕

ប្រទេសថៃ ៖ សារព័ត៌មាន Thairath រាយការណ៍ថា អគ្គិភ័យបានឆាបឆេះរោងចក្រផលិតគ្រឿងសង្ហារិម ឈ្មោះ «KING» នៅផ្លូវឆាឡងគ្រុង តំបន់ឡាតក្រាបាំង ទីក្រុងបាងកក យ៉ាងសន្ធោសន្ធៅគួរឱ្យភ័យខ្លា.ច ចាប់ពីល្ងាចថ្ងៃទី១០ ឈានចូលរំលងអធ្រាតថ្ងៃទី១២ ខែឧសភា ឆ្នាំ២០២៥ ។ រថយន្តពន្លត់អគ្គិភ័យត្រូវបានបញ្ជូនមកកាន់កន្លែងកើតជាបន្តបន្ទាប់រហូតដល់៣០គ្រឿង ប៉ុន្តែពិបាកគ្រប់គ្រងស្ថានការណ៍ ដោយសារអគ្គិភ័យឆាបឆេះខ្លាំងពេក ហើយភ្នាក់ងារពន្លត់អគ្គិភ័យបានឃើញស្នាមប្រេះលើឥដ្ឋ និងឮសំឡេងខ្លាំង ទើបសម្រេចចិត្តដកថយកម្លាំងមកគ្រប់គ្រងស្ថានការណ៍នៅបរិវេណជុំវិញ ។

កាលពីថ្ងៃទី១១ ខែឧសភា ឆ្នាំ២០២៥ ហ្វេសប៊ុកផេកឈ្មោះ «Fire & Rescue Thailand» បានបង្ហោះហេតុការណ៍អគ្គិភ័យឆាបឆេះរោងចក្រផលិតគ្រឿងសង្ហារិម «KING» នៅផ្លូវឆាឡងគ្រុង តំបន់ឡាតក្រាបាំង ទីក្រុងបាងកក ហើយក្រោយពីទទួលដំណឹងនេះ ស្ថានីយវិទ្យុព្រះរ៉ាម និងស្ថានីយវិទ្យុអ៊ុរុផុង ក៏បានទំនាក់ទំនងទៅកាន់ភ្នាក់ងារពន្លត់ភ្លើងតំបន់ឡាតក្រាបាំង មកជួយអន្តរាគមន៍នៅកន្លែងកើតហេតុ ។

ការត្រួតពិនិត្យជំហ៊ានដំបូង គឺរោងចក្រផលិតគ្រឿងសង្ហារិមនេះមានឃ្លាំងទុកគ្រឿងសង្ហារិម សម្ភារៈផ្ទះបាយ និងផ្លាស្ទិកយ៉ាងច្រើន ហើយអគ្គិភ័យបានឆេះខ្លាំងបណ្តាលឱ្យមានផ្សែងពណ៌ខ្មៅឡើងទៅលើ ដែលធ្វើឱ្យភ្នាក់ងារពន្លត់អគ្គិភ័យព្យាយាយមគ្រប់គ្រងស្ថានការណ៍ ។ បន្ទាប់មក ភ្នាក់ងារពន្លត់អគ្គិភ័យរាយការណ៍ថា អគ្គិភ័យបានឆេះរោងចក្រយ៉ាងខ្លាំង ទើបពួកគេដកថយកម្លាំងមកគ្រប់គ្រងនៅបរិវេណជុំវិញដើម្បីសុវត្ថិភាព ដោយសារមានស្នាមប្រេះលើឥដ្ឋ និងឮសំឡេងខ្លាំង ហើយពួកគេក៏សុំរថយន្តបាញ់ទឹកបន្ថែមទៀត សរុបចំនួន៣០គ្រឿង ។

តាមការលើកឡើងរបស់អាជ្ញាធរទីក្រុងបាងកក គឺពុំទាន់ដឹងពីមូលហេតុបណ្តាលឱ្យអគ្គិភ័យឆាបរោងចក្រនេះទេ ប៉ុន្តែដោយសារមានផ្សែងខ្មៅខ្លាំងពេក អាជ្ញាធរត្រូវប្រើប្រាស់បន្ទះស្នោលាយជាមួយទឹកគ្រប់គ្រងស្ថានការណ៍ ។ សំណាងល្អ ដែលអគ្គិភ័យកើតឡើងនៅថ្ងៃឈប់សម្រាកចុងសប្តាហ៍ ទើបគ្មានមនុស្សជាប់នៅខាងក្នុង ឬមានមនុស្សរងរបួស ឬស្លាប់ ។ រោងចក្រនេះផលិតគ្រឿងសង្ហារិមសម្រាប់នាំចេញ ព្រមទាំងមានឧបករណ៍សម្រាប់ផលិត, ឈើ និងសម្ភារៈផ្លាស្ទិកជាច្រើនជាហេតុធ្វើឱ្យអគ្គិភ័យឆាបឆេះយ៉ាងរហ័ស ។

អគ្គិភ័យនៅតែបន្តឆាបឆេះអគាររបស់រោងចក្រយ៉ាងខ្លាំង ដែលធ្វើឱ្យភ្នាក់ងារពន្លត់អគ្គិភ័យបង្កើនកម្លាំងជាបន្តបន្ទាប់ដើម្បីគ្រប់គ្រងស្ថានការណ៍ ។ រោងចក្រនេះមានកម្ពស់២ជាន់ និងមានបន្ទប់ក្រោមដីសម្រាប់ទុកសម្ភារៈផ្សេងៗ ប៉ុន្តែភ្នាក់ងារពន្លត់ភ្លើងពុំអាចចុះទៅបន្ទប់ក្រោមដីបាន ដោយសារមានផ្សែង និងក្តៅខ្លាំងពេក ហើយត្រូវប្រើប្រាស់ឧបករណ៍ពិសេស និងពាក់ម៉ាស់អ៊ីស៊ីសែន ។

អភិបាលក្រុងបាងកក លោក ឆ័យឆាតិ សិទ្ធិផាន់ បានបញ្ជាឱ្យមន្ត្រីពាក់ព័ន្ធចុះពិនិត្យនៅកន្លែងកើតហេតុ ព្រមទាំងបង្កើតទីតាំងបញ្ជាទៅកន្លែងកើតហេតុ ។ រហូតមកដល់ព្រឹកថ្ងៃទី១២ ខែឧសភា អាជ្ញាធរពុំអាចវាយតម្លៃការខូចខាតនៅឡើយទេ ត្រូវរង់ចាំឱ្យហេតុការណ៍ធូរស្រាលសិន ។ បើតាមសេចក្តីរាយការណ៍ចុងក្រោយ ភ្នាក់ងារពន្លត់អគ្គិភ័យអាចគ្រប់គ្រងស្ថានការណ៍បានខ្លះហើយ ប៉ុន្តែនៅតែមានផ្សែងយ៉ាងច្រើន ៕