ពិធីមង្គលការរបស់តារាចម្រៀង រ៉ាប៊ី និងកីឡាករបាល់ទាត់កូនខ្មែរកាត់អាម៉េរិក Nick Taylor បានបញ្ចប់រួចរាល់ហើយនិងទទួលបានការចាប់អារម្មណ៍ខ្លាំងពីសំណាកទស្សនិកជន។ យ៉ាងណាបន្ទាប់ពីកម្មវិធីរបស់ខ្លួនបានបញ្ចប់ម្ចាស់បទ «មាន់ស្រែ» បានចេញមកថ្លែងអំណរគុណភ្ញៀវកិត្តិយសដែលបានចូលរួមនិងសូមខន្តីអភ័យទោសចំណុចខ្វះខាតដោយសារភ្ញៀវចូលរួមលើសកំណត់។ ជាមួយគ្នានេះភរិយាតារាចម្រៀង កែវ វាសនា បានចែករំលែកថាពិធីមង្គលការរបស់ រ៉ាប៊ី ពិតជាគ្មានអ្វីញុំាមែនហើយបានកម្ម៉ង់ម្ហូបពីក្រៅមកញុំាខ្លួនឯង។
នៅព្រឹកថ្ងៃអាទិត្យ ទី១១ ឧសភា តារាចម្រៀង រ៉ាប៊ី បានចេញមកបង្ហោះសំណេរថា «
នាងខ្ញុំសូមអរគុណទៅដល់ញាតិមិត្តពួកម៉ាក បងអូនសិល្បៈដែលបានមានវត្តមានក្នុងថ្ងៃមង្គលការពួកយើង។ ក៏សូមអភ័យទោសរាល់ចំណុចខ្វះខាតដោយសារភ្ញៀវយើងអញ្ជើញ ២០០នាក់តែចំនួនអ្នកមករហូតដល់ ៥០០នាក់ធ្វើឱ្យមានភាពរអាក់រអួលសូមអភ័យទោសនិងអរគុណមែនទែនសម្រាប់ការផ្ដល់វត្តមានដ៏មានតម្លៃ»។
ការបញ្ចេញនូវសំណេរនេះបានធ្វើឱ្យអ្នកលេងបណ្តាញសង្គមមួយចំនួនបញ្ចេញមតិចម្រុះជាច្រើនព្រមទាំងមានការងឿងឆ្ងល់ថាចំនួន៣០០នាក់ទៀតជានរណាដែលទៅទាំងម្ចាស់កម្មវិធីមិនបានអញ្ជើញ ខណៈមានមតិមួយចំនួនទៀតថា អាចថាដៃគូ ប្តីឬប្រពន្ធ ទៅចូលរួមទាំងពីរនាក់ទើបធ្វើឱ្យលើសចំនួន និងមានមតិយោបល់ផ្សេងៗនេះ។
ជុំវិញការបង្ហោះរបស់ រ៉ាប៊ី ថ្លែងអំណរគុណភ្ញៀវនិងសូមខន្តីអភ័យទោសភាពរអាក់រអួលនៅក្នុងកម្មវិធីប្រាប់ពីចំនួនលើស៣០០នាក់នេះ អ្នកនាង លឹម លីសុគន្ធារី ភរិយាតារាចម្រៀង កែវ វាសនា បានចែករំលែកបន្តនិងទទួលស្គាល់ថាថ្ងៃមង្គលការ រ៉ាប៊ី និង Nick ពិតជាអត់មានអ្វីញុំាមែន។
អ្នកនាងបានសរសេរយ៉ាងដូច្នេះថា «បើខ្ញុំវិញទៅចូលរួមកម្មវិធីទាល់តែម្ចាស់គេបញ្ជាក់ថាទៅទាំងប្តីប្រពន្ធបានខ្ញុំទៅ បើគេមិនបញ្ជាក់ខ្ញុំមិនងាយទៅទេ ឱ្យតែប្តីចូលរួម បើឱ្យយកគ្នាទៅគឺ No ហើយកម្មវិធីបើខ្ញុំធ្វើខ្ញុំហៅ១០០នាក់គឺត្រូវសាគួរតុនិងម្ហូបសម្រាប់២០០នាក់ហើយព្រោះសម័យនេះ80%គេទៅទាំងប្តីទាំងប្រពន្ធ តែបើមកលើសនឹងគឺកំហុសអ្នកចូលរួមមួយចំនួនគាត់យកគ្នីគ្នាទៅលើសពេក ខ្ញុំទទួលស្គាល់ថ្ងៃកម្មវិធីគាត់អត់អីញុំាមែន ខ្ញុំកម្ម៉ងម្ហូបក្រៅញុំាខ្លួនឯង»។
គួរបញ្ជាក់ផងដែរថា តារាចម្រៀង រ៉ាប៊ី និង Nick បានដឹកដៃគ្នាចូលរោងការតាមប្រពៃណីខ្មែរកាលពីថ្ងៃទី៩ ឧសភា។ រៀបការរួចនៅថ្ងៃទី១០ ឧសភា Nick គឺបានចូលរួមការប្រកួតបាល់ទាត់ទទួលបានជ័យលាភីជើងឯករង នៃពានរង្វាន់ AFC Challenge League ២០២៤/២៥ រវាងក្លិបព្រះខ័ន្តរាជស្វាយរៀង ទល់នឹង អេហ្វខេ អារកាដាហ្ក (តួកម៉េនីស្ថាន)។ នៅថ្ងៃទី១១ រ៉ាប៊ី និង Nick បានចុះកុងត្រាធ្វើជា BA ឱ្យក្រុមហ៊ុនមួយផងដែរ៕
