សហរដ្ឋអាមេរិក ៖ អ្នកវិទ្យាសាស្រ្តមួយក្រុមរបស់សហរដ្ឋអាមេរិក បានរកឃើញនូវម៉ូលេគុលតូចមួយប្រភេទ ដែលអាចជំរុញដល់កោសិការសក់ដែលខ្សោយ ឬងា.ប់ស្ងៀមឈប់ដំណើរការកន្លងមក ឲ្យមានសកម្មភាពដោយជួយឲ្យសក់ថ្មីអាចដុះឡើងវិញបាន។

យោងតាមគេហទំព័រផ្លូវរបស់សកលវិទ្យាល័យស្រាវជ្រាវវិទ្យាសាស្រ្ត UCLA កាលពីដើមឆ្នាំ២០២៥ បានឲ្យដឹងថា ៖ ពួកគេបានរកឃើញនូវម៉ូលេគុល PP405 ជាភាគល្អិតម្យ៉ាង អាចទប់ស្កាត់ប្រូតែអ៊ីនមួយប្រភេទដែលរារាំងកោសិកាដុះសក់ឲ្យនៅស្ងៀម និងជំរុញឲ្យកោសិការដុះសក់រីកលូតលាស់បានធម្មតា។

តាមរបាយការណ៍របស់ UCLA បានបង្ហាញថា ការសាកល្បងលើមនុស្សជាលើកដំបូងបានធ្វើឡើងក្នុងឆ្នាំ ២០២៣ ហើយលទ្ធផលដែលទទួលបានគឺវិជ្ជមាន។ ក្នុងការសាកល្បងនោះ គេបានលាបសារធាតុ PP405 នេះនៅលើស្បែកក្បាលនៅពេលយប់រយៈពេល១សប្ដាហ៍ និងក្រោយមកគេសង្កេតឃើញថាសក់នៅចំណុចដែលបានលាបនោះបានដុះឡើងវិញក្នុងរយៈពេលត្រឹមតែប៉ុន្មានថ្ងៃប៉ុណ្ណោះ។

បច្ចុប្បន្នសារធាតុម៉ូលេគុលដែលជំរុញឲ្យសក់ដុះ PP405 នេះកំពុងតែស្ថិតនៅក្នុងដំណាក់កាលសាកល្បង មិនទាន់អាចកែច្នៃឲ្យទៅជាផលិតផលសម្រេចដែលអាចដាក់លក់នៅលើទីផ្សាបាននៅឡើយទេ។ ប៉ុន្តែប្រសិនបើការសាកល្បងនៅដំណាក់កាលបន្ទាប់ទទួលបានលទ្ធផលវិជ្ជមានទៀតនោះ ថ្នាំនេះអាចនឹងទទួលបានការអនុម័តឲ្យចេញលក់ជាផ្លូវការក្នុងឆ្នាំ២០២៧ខាងមុខ។

នេះគឺជាក្ដីសង្ឃឹមថ្មីសម្រាប់មនុស្សដែលកំពុងជួបប្រទះនឹងបញ្ហាសក់ជ្រុះជាច្រើន មិនថាការជ្រុះដោយអម៉ូន ឬជាតំណរពូជដែលបច្ចុប្បន្នកំពុងមានការព្រួយបារម្ភ និងតែងស្វែងរកវិធីទប់ស្កាត់ ឬព្យាបាលវាកន្លងមក៕

ប្រទេសជប៉ុន ៖ ជប៉ុនបានក្លាយជាប្រទេសមួយមានបរិស្ថានស្អាត មានអនាម័យ និងគ្មានសំរាមនៅតាមផ្លូវ ពីព្រោះពលរដ្ឋជប៉ុនមានទម្លាប់បោះចោលសំរាមយ៉ាងមានសណ្តាប់ធ្នាប់បំផុត ហើយពួកគេបានអនុវត្តទម្លាប់ល្អនេះតាំងពីជំនាន់ដូនតាមកម៉្លេះ ។ ហេតុនេះ ទើបពេលភ្ញៀវទេសចរបរទេសទៅកម្សាន្តនៅជប៉ុន កម្រឃើញការចោលសំរាមផ្តេសផ្តាសនៅទីនេះណាស់ ។

ប្រទេសជប៉ុនមានទីធ្លាសាធារណៈ និងបរិស្ថានស្អាតដូចសព្វថ្ងៃនេះ គឺដោយសារការអប់រំពលរដ្ឋតាំងពីកុមារឡើងទៅ មិនមែនពឹងផ្អែកលើបុគ្គលិកប្រមូលសំរាមទេ ។ កុមារជប៉ុនភាគច្រើនទទួលបានការអប់រំពីការបែងចែកប្រភេទសំរាមទាំងក្នុងលំនៅឋាន និងសាលារៀន គឺការចោលសំរាមមានសណ្តាប់ធ្នាប់ជាតួនាទីរបស់មនុស្សម្នាក់ៗ មិនមែនជាតួនាទីរបស់អ្នកដទៃទេ ។

ជាតិសាសន៍ផ្សេងបានកោតសរសើរពលរដ្ឋជប៉ុនខ្លាំងណាស់ដែលប្រកាន់ភ្ជាប់នូវវិន័យ និងទម្លាប់ដ៏ល្អនេះ ខណៈជប៉ុនបានបង្កើតច្បាប់ដាក់ទោសពលរដ្ឋ ប្រសិនបើមិនអនុវត្តតាម ឬចោលសំរាមផ្តេសផ្តាស ។

ក្រៅពីនេះ គម្រោងថែរក្សាបរិស្ថានជាច្រើនត្រូវបានបង្កើតឡើង ដូចជា ៖ ក្រុមកីឡាករបាល់ទាត់ Cerezo Osaka បានបង្កើតគម្រោងមួយឈ្មោះ «Bottle to Bottle» ដើម្បីលើកទឹកចិត្តដល់អ្នកមកទស្សនាការប្រកួតបាល់ទាត់នៅពហុកីឡដ្ឋាន Yodoko Sakura Stadium ទីក្រុងអូសាកា ចេះបែងចែកប្រភេទសំរាមយកទៅកែច្នៃឡើងវិញ និងជួយកាត់បន្ថយការបំភាយកាបូនឌីអុកស៊ីត ។

ពេលពលរដ្ឋជប៉ុនគ្រប់រូបគោរពច្បាប់ និងបែងចែកសំរាមតាមប្រភេទយ៉ាងត្រឹមត្រូវ បានធ្វើឱ្យបរិវេណពហុកីឡដ្ឋាន និងទីសាធារណៈផ្សេងៗស្អាត គ្មានថង់ផ្លាស្ទិក និងកាកសំណល់ផ្សេងៗ ដូចជា ៖ កំប៉ុងភេសជ្ជៈ កែវផ្លាស្ទិក កំប៉ុងអាលុយមីញ៉ូម និងឡាំងក្រដាស ។

នេះជាភាពជោគជ័យមួយរបស់ក្រុមកីឡាករបាល់ទាត់ Cerezo Osaka ដែលពុំគ្រាន់តែជាក្រុមបាល់ទាត់អាជីពប៉ុណ្ណោះទេ ប៉ុន្តែពួកគេបានជួយថែរក្សាវប្បធម៌ការចោលសំរាម ព្រមទាំងបង្កើតយុទ្ធនាការថែរក្សាបរិស្ថាន ។ ពួកគេចង់ដាស់តឿនពលរដ្ឋឱ្យភ្ញាក់រលឹកចោលសំរាមយ៉ាងត្រឹមត្រូវ និងចាត់ទុកថា នេះជាការទទួលខុសត្រូវថែរក្សាបរិស្ថានសង្គមរួមគ្នា ។

ហេតុនេះ ដល់ពេលមនុស្សម្នាក់ៗភ្ញាក់ខ្លួនហើយ ដោយចោលសំរាមនៅតាមធុងសំរាមសាធារណៈឱ្យបានត្រឹមត្រូវពេលទៅកម្សាន្តនៅទីសាធារណៈ ឬតំបន់ទេសចរណ៍ ។ បើគ្មានធុងសំរាម គួរខ្ចប់សំរាមទាំងនេះដាក់រថយន្តមកចោលក្នុងធុងសំរាមនៅផ្ទះរបស់ខ្លួន ចៀសវាងគប់គ្រវែងសំរាមតាមផ្លូវ ឬចោលក្នុងទឹកបណ្តាលឱ្យខូចប្រភពទឹក ។ ប្រទេសយើងមានបរិស្ថានស្អាត គឺចាប់ផ្តើមពីពលរដ្ឋគ្រប់រូបជួយគ្នាប្រមូលសំរាម និងកុំទុកតួនាទីនេះឱ្យបុគ្គលិកប្រមូលសំរាម ៕

បរទេស ៖ ដោយសារតែមានតម្លៃប្រហាក់ប្រហែលគ្នា បច្ចុប្បន្នមានប្រទេសរីកចម្រើនជាច្រើន បាននិងកំពុងប្រើប្រាស់បន្ទះសូឡារមកតំរៀបព័ទ្ធជុំវិញផ្ទះធ្វើជារបង ជំនួសឲ្យរបងដែលធ្វើពីថ្មឥដ្ឋ ដែក ឬស៊ីម៉ងត៏វិញម្ដង។ ការធ្វើបែបនេះ ព្រោះគេយល់ថាវិធីសាស្រ្តនេះផ្ដល់នូវផលចំណេញជាច្រើនដល់ការរស់នៅរបស់ពួកគេ។

បើតាមរបាយការណ៍ដែលគេប្រមូលបានកន្លងមក ទាក់ទងនឹងការផ្គត់ផ្គង់ថាមពលពីផ្ទាំងសូឡារបានឲ្យដឹងថា ៖ បច្ចុប្បន្នមានប្រទេសធំៗចំនួន ៤ ដែលប្រជាជនរបស់គេពេញនិយមខ្លាំងក្នុងជ្រើសទិញបន្ទះសូឡារយកទៅតម្លើងជុំវិញផ្ទះរបស់ពួកគេជំនួសឲ្យរបងរួមមាន ៖
១. សហរដ្ឋអាមេរិក ៖ ប្រជាជននៅភាគពាយ័ព្យ និងភាគនារតីរបស់អាមេរិកជាច្រើន កំពុងពេញនិយមខ្លាំងក្នុងប្រើប្រាស់ថាមពលដែលដំណើរការដោយរបង (Solar-powered gate openers) របស់ពួកគេ។ ពួកកែបានភ្ជាប់ថាមពលដែលបន្ទះសូឡារទាំងនោះប្រមូលបានទៅនឹងទ្វាផ្ទះរបស់ពួកគេ បន្ទាប់មកវាក៏បញ្ជូនថាមពលបន្តទៅក្នុងផ្ទះទាំងមូលដើម្បីប្រើប្រាស់។
២. ប្រទេសអូស្រ្តាលី ៖ ដោយសារប្រទេសអូស្រ្តាលីសម្បូរទៅដោយពន្លឺព្រះអាទិត្យនៅគ្រប់តំបន់ ជាពិសេសនៅតំបន់ជនបទនោះ ដូចនេះមធ្យោបាយកាត់បន្ថយចំណាយដ៏ានប្រសិទ្ធភាពបុះផុតរបស់ពលរដ្ឋ គឺការប្រើប្រាស់ផ្ទាំងសូឡារ។
៣. ប្រទេសអាឡឺម៉ង់ ៖ របងដែលធ្វើមកពីផ្ទាំងសូឡារមិនត្រឹមតែជាផ្នែកមួយនៃរចនាសម្ព័ន្ធប៉ុណ្ណោះទេ ប៉ុន្តែវាក៏ជារោងចក្រផលិតថាមពលអគ្គិសនីសម្រាប់ប្រើប្រាស់ក្នុងគេហដ្ឋានបានយ៉ាងល្អផងដែរ។
៤. ប្រទេសហូឡង់ ៖ មិនត្រឹមតែយកមកធ្វើជារបងផ្ទះប៉ូណ្ណោះទេ ប៉ុន្តែអាជ្ញាធរក្នុងតំបន់ថែមទាំងបានតម្លើងវាធ្វើជាជញ្ជាំង ឬរបងសម្រាប់សួនច្បារសារធារណៈនៅតាមកន្លែងមួយចំនួនផងដែរ។

ក្រៅពីប្រទេសទាំងនេះ ក៏មានប្រទេសនៅក្នុងតំបន់អ៊ឺរ៉ុបជាច្រើនផ្សេងទៀត ក៏ជ្រើសរើសប្រើប្រាស់បន្ទះសូឡារ ក្នុងវិធីស្រដៀងៗគ្នានេះផងដែរ។

គួរបញ្ជាក់ថា បច្ចុប្បន្នបច្ចេកវិទ្យានេះកំពុងតែក្លាយជាប្រព័ន្ធថ្មី ដែលបង្រួមរចនាបថរស់នៅបែបសាមញ្ញឲ្យក្លាយជាការផលិតថាមពលសម្រាប់ប្រើប្រាស់យ៉ាងទូលំទូលាយ ព្រមទាំងជាចំណែកក្នុងការកាត់បន្ថយចំណាយយ៉ាងានប្រសិទ្ធភាព ព្រោះវាមិនមានការបង់សេវាប្រចាំខែច្រើនដូចមុន ងាយស្រួលតម្លើង ងាយស្រួលប្រើប្រាស់ និងថែមទាំងជាជម្រើសល្អសម្រាប់ប្រជាជនដែលរស់នៅទីជនបទដាច់ស្រយាល អាចប្រើប្រាស់អគ្គិសនីបានដោយមិនមានខ្សែតភ្ជាប់ដែលមានលក្ខណៈស្មុគស្មាញឡើយ៕

ប្រធានាធិបតីអាម៉េរិកលោក Donald Trump បាននិយាយថា តារាចម្រៀង Taylor Swift លែងល្បីដូចពីមុនទៀតហើយបន្ទាប់ពីលោកបានប្រកាសថាលោកស្អប់នាងកាលពីឆ្នាំ២០២៤។

នៅលើ Truth Social នៅថ្ងៃទី ១៦ ខែឧសភា លោក Donald Trump បានសរសេរថា «តើមាននរណាម្នាក់កត់សម្គាល់ទេថាចាប់តាំងពីខ្ញុំបង្ហោះថា ខ្ញុំស្អប់ Taylor Swift នាងលែងជាល្បីល្បាញទៀតហើយ»? គួរឱ្យដឹងថា ជាលើកដំបូងដែលប្រធានាធិបតី អាម៉េរិកបង្ហាញអាកប្បកិរិយារបស់ខ្លួនចំពោះតារាចម្រៀងរូបនេះគឺនៅក្នុងខែកញ្ញា ឆ្នាំ២០២៤ បន្ទាប់ពីការបង្ហោះរបស់ Taylor Swift នៅលើ Instagram ។ នៅពេលនោះ តារាចម្រៀងវ័យ៣៦ឆ្នាំ រូបនេះបានជំទាស់នឹងការចែករំលែករូបថត AI របស់អ្នកគាំទ្ររបស់នាងដែលធ្វើយុទ្ធនាការក្នុងការប្រកួតប្រជែងសន្លឹកឆ្នោតតាមរយៈបណ្តាញសង្គម Truth Social ។

ទន្ទឹមនឹងនេះ Taylor Swift បានគាំទ្រជាសាធារណៈចំពោះបេក្ខជនប្រជាធិបតេយ្យ លោកស្រី Kamala Harris ដែលជាគូប្រជែងរបស់លោក Donald Trump នៅពេល នោះ។ មួយថ្ងៃក្រោយមកនៅលើកម្មវិធី Fox & Friends ប្រធានាធិបតី រូបនេះបាន និយាយថា «ខ្ញុំមិនមែនជាអ្នកគាំទ្រ Taylor Swift ទេ។ វាគ្រាន់តែជាបញ្ហានៃពេលវេលា។ ប៉ុន្តែនាងជាមនុស្សប្រជាធិបតេយ្យខ្លាំងណាស់។ នាងតែងតែគាំទ្រអ្នកប្រជាធិបតេយ្យ។ នាងអាចចំណាយលើការសម្រេចចិត្តនោះនៅក្នុងទីផ្សារតន្ត្រី»។ ប៉ុន្មានថ្ងៃបន្ទាប់ពី ការសម្ភាសន៍ លោកបានធ្វើល្បីសុះសាយដោយប្រកាសថា Donald Trump ស្អប់ Taylor Swift ដោយប្រើ គណនី Truth Social របស់លោកដោយមិនមានការពន្យល់បន្ថែម ឬអត្ថាធិប្បាយបន្ថែម។

ទោះបីជាប្រធានាធិបតីអាម៉េរិករូបនេះនិយាយថា Taylor Swift លែងល្បីដូចពីមុនក្តី ប៉ុន្តែថ្មីៗនេះនាងត្រូវបានគេដាក់ឈ្មោះថា Global Recording Artist of the Year 2024 ដោយសារការលក់តន្ត្រីឈានមុខគេនៅលើពិភពលោកសម្រាប់ឆ្នាំនេះ។ នៅថ្ងៃទី ១៧ ខែមីនា ការប្រគំតន្រ្តី The Eras Tour បានទទួល ពានរង្វាន់ Tour of the Century នៅកម្មវិធី iHeart Radio Music Awards ៕

យើងតែងតែចាប់អារម្មណ៍នឹងការទស្សន៍ទាយថា តើថ្ងៃអវសានពិភពលោកនឹងមកដល់ពេលណា? តើពេលណាមនុស្សនឹងពុំអាចរស់នៅលើផែនដីបន្តទៀតបាន? ហើយមនុស្សភាគច្រើនបានសន្និដ្ឋានទៅលើកត្តាផ្សេងៗដែលបណ្តាលឱ្យផែនដីឈានដល់ទីបញ្ចប់ ដូចជា ៖ សង្គ្រាមនុយក្លេអ៊ែរ, អាចម៍ផ្កាយមិនអាចគ្រប់គ្រងបាន និងបម្រែបម្រួលអាកាសធាតុ ។

យើងបានឮការទស្សន៍ទាយជាច្រើនពីថ្ងៃអវសានពិភពលោក ក្នុងនោះលោក Elon Musk នាយកក្រុមហ៊ុនរថយន្ត Tesla, SpaceX និងជាមហាសេដ្ឋីលំដាប់ពិភពលោក ក៏ធ្លាប់បានទស្សន៍ទាយពីថ្ងៃអវសានពិភពលោកដែរ ។ លោក Elon Musk និយាយថា ពិភពលោកនឹងត្រូវដុតបំផ្លាញដោយកំដៅព្រះអាទិត្យ ហើយនេះជាមូលហេតុដែលលោកចង់ឱ្យមនុស្សរកវិធីទៅរស់នៅលើអវកាស ដោយលោកបានចូលរួមក្នុងគម្រោងអវកាសជាច្រើន រួមទាំងការបញ្ជូនរថយន្ត Tesla ទៅអវកាស ។

ក្នុងបទសម្ភាសន៍ជាមួយ Jesse Watters កាលពីថ្ងៃទី៥ ខែឧសភា ឆ្នាំ២០២៥ លោក Elon Musk និយាយថា ៖ «វាមិនមែនជាការឡើងទៅភពអង្គារតែមួយលើកទេ ប៉ុន្តែលោកចង់ឱ្យគ្រប់គ្នាយល់ដឹងពីចក្រវាឡច្រើនជាងនេះ និងអាចរស់នៅទីនោះយូរអង្វែង ករណីមានហេតុការណ៍អាក្រក់កើតឡើងលើផែនដី ។ យើងនឹងមានកន្លែងរស់នៅថ្មី គឺភពអង្គារ» ។

លោកបន្តថា ៖ «ផលប្រយោជន៍របស់ភពអង្គារ គឺដូចគ្នានឹងការធានារ៉ាប់រងអាយុជីវិតរួមគ្នា ពីព្រោះនៅទីបំផុត ជីវិតទាំងអស់លើផែនដីនឹងត្រូវបំផ្លាញដោយកំដៅព្រះអាទិត្យ ។ ព្រះអាទិត្យកំពុងតែពង្រីកខ្លួនបន្តិចម្តងៗកាន់តែធំ ហើយយើងនឹងរស់នៅភពផ្សេង ដោយសារផែនដីត្រូវដុតបំផ្លាញ» ។

អ្នកស្រាវជ្រាវនៅសាកលវិទ្យាល័យ Toho ប្រទេសជប៉ុន បានគណនាពីពេលវេលាថ្ងៃអវសានពិភពលោករបស់លោក Elon Musk ដោយប្រើប្រាស់កុំព្យូទ័រទំនើប និងគំរូបគណិតវិទ្យា ដើម្បីទស្សន៍ទាយពីការវិវឌ្ឍរបស់ព្រះអាទិត្យរយៈពេលយូរ ។ ការស្រាវជ្រាវនេះបានផ្សព្វផ្សាយក្នុងទស្សនាវដ្តី Nature Geoscience ដោយក្រុមអ្នកជំនាញសន្និដ្ឋានថា បើមនុស្សពុំអាចសម្របខ្លួនជាមួយបរិស្ថានថ្មីបាន គឺផែនដីនឹងក្លាយជាកន្លែងពុំអាចឱ្យមនុស្សរស់នៅរយៈពេល១ពាន់លានឆ្នាំខាងមុខ ។ អ្នកស្រាវជ្រាវជឿថា ព្រះអាទិត្យនឹងមានទំហំកាន់តែធំ និងក្តៅខ្លាំង ហើយធ្វើឱ្យសីតុណ្ហភាពផែនដីកើនឡើងខ្ពស់ និងកាត់បន្ថយកម្រិតអុកស៊ីសែន ។

ការស្រាវជ្រាវរបស់អ្នកជំនាញជប៉ុនបង្ហាញទៀតថា រយៈពេល៥ពាន់លានឆ្នាំខាងមុខ ព្រះអាទិត្យនឹងក្លាយជាព្រះអាទិត្យយក្សពណ៌ក្រហម ហើយវានឹងលេបភពនៅក្បែរៗ រួមទាំងលេបភពពុធ ភពសុក្រ ហើយអាចលេបផែនដី ។ យើងបានឃើញផលប៉ះពាល់ដោយសារសីតុណ្ហភាពផែនដីកើនឡើង ហើយវានឹងកាន់តែធ្ងន់ធ្ងរ ប្រសិនបើផ្ទាំងទឹកកកធំៗមួយចំនួនរលាយនៅថ្ងៃខាងមុខ ប៉ុន្តែត្រូវរង់ចាំមួយរយៈធំទៀត មុនពេលយើងពុំអាចរស់នៅលើផែនដីបន្តទៀត ៕

ប្រទេសអេមីរ៉ាតអារ៉ាប់ ៖ ភ្ញាក់ផ្អើលពេញពិភពលោក ក្រោយពីប្រទេសអេមីរ៉ាតអារ៉ាប់រួម (UAE) ទទួលស្វាគមន៍ដំណើរទស្សនកិច្ចរបស់ប្រធានាធិបតីអាមេរិក លោក Donald Trump កាលពីថ្ងៃទី១៥ ខែឧសភា ឆ្នាំ២០២៥ ខុសប្លែកពីប្រទេសនានា គឺធ្វើតាមវប្បធម៌បុរាណដោយយកក្រុមនារីសក់វែង ស្លៀកពាក់ឈុតពណ៌ស មកឈរសងខាងផ្លូវ គ្រវីសក់ទៅមក ។ ការទទួលស្វាគមន៍បែបនេះធ្វើឱ្យប្រធានាធិបតីអាមេរិកពេញចិត្តណាស់ និងសរសើរផងដែរ ប៉ុន្តែវាធ្វើឱ្យមហាជនឆ្ងល់យ៉ាងខ្លាំងថា នេះជាពិធីអ្វី និងជាការស្វាគមន៍ភ្ញៀវបែបណា?

ការទទួលស្វាគមន៍ដំណើរទស្សនកិច្ចប្រធានាធិបតីអាមេរិក លោក Trump របស់អេមីរ៉ាតអារ៉ាប់រួម បានធ្វើឡើងយ៉ាងអធិកអធម និងខុសប្លែកពីប្រទេសនានា ។ ពេល ធ្វើដំណើរមកដល់ព្រះរាជវាំង Qasr Al Watan នៅទីក្រុង Abu Dhabi លោក Trump បានឃើញនារីស្លៀកពាក់ឈុតពណ៌ស មួយក្រុមឈរជាជួរគ្រវីសក់វែងទៅមក ។ នេះជាវប្បធម៌របស់បណ្តាប្រទេសនៅឈូងសមុទ្រពែក្ស (ឬឈូងសមុទ្រអារ៉ាប់) រួមមាន ៖ អេមីរ៉ាតអារ៉ាប់រួម អារ៉ាប៊ីសាអូឌីត គុយវ៉ែត អូម៉ង់ កាតា និងបារ៉ែន សម្រាប់ទទួលភ្ញៀវ ឬប្រើប្រាស់ក្នុងពិធីមង្គល ដូចជា ៖ ពិធីរៀបការ ។

អ្នកឃើញវីដេអូនឹងឆ្ងល់ថា ហេតុអ្វីអេមីរ៉ាតអារ៉ាប់រួម យកនារីក្មេងជាច្រើននាក់មកឈរគ្រវីសក់បែបនេះឱ្យលោក Trump មើល? ការគ្រវីសក់នេះហៅថា «ខាលិជិ» ដែលតម្រូវឱ្យនារីសក់វែងទាំងអស់ស្លៀកឈុតពណ៌ស និងគ្រវីសក់តាមចង្វាក់តន្ត្រី ។ តាមធម្មតា ការរាំ «ខាលិជិ» គឺនារីៗនឹងឈ្លៀតឈុតវែងពណ៌ស្រស់ឆើតឆាយ ប៉ុន្តែការទទួលស្វាគមន៍ប្រធានាធិបតីអាមេរិក នារីគ្រប់រូបត្រូវស្លៀកឈុតពណ៌ស ដើម្បីបង្ហាញពីសណ្តាប់ធ្នាប់ក្នុងពិធីផ្លូវការ ហើយមើលទៅលោក Trump ហាក់ពេញចិត្តនឹងការស្វាគមន៍របស់អេមីរ៉ាតអារ៉ាប់រួម ថែមទាំងសរសើរទៀតផង ។

វីដេអូក្រុមនារីសក់វែងគ្រវីសក់ឈរទទួលស្វាគមន៍លោក Trump នៅអេមីរ៉ាតអារ៉ាប់រួម បានល្បីល្បាញយ៉ាងខ្លាំងក្នុងបណ្តាញសង្គម ពីព្រោះជាការស្វាគមន៍មិនដូចប្រទេសនានា និងកម្រឃើញណាស់ ។ ប៉ុន្តែពលរដ្ឋរស់នៅបណ្តាប្រទេសឈូងសមុទ្រពែក្ស យល់ឃើញថា ការគ្រវីសក់បែបនេះមានភាពស្រស់ស្អាត ស្រដៀងនឹងរលកសមុទ្រ ហើយវាបង្ហាញពីការគោរពដល់ភ្ញៀវដែលមកបំពេញទស្សនកិច្ចនៅប្រទេសពួកគេ ។

វាជាការសម្តែងសិល្បៈរបស់អេមីរ៉ាតអារ៉ាប់រួម ដែលនារីៗនឹងស្លៀកសម្លៀកបំពាក់ប្រពៃណីឈរជាជួរ និងគ្រវីសក់វែងទៅមក ខណៈក្រុមបុរសសូត្រកំណាព្យជាចង្វាក់តន្ត្រី ។ រីឯអ្នកចូលរួមសម្តែងក្នុងពិធី គឺមិនប្រកាន់ភេទ វ័យ និងវណ្ណៈក្នុងសង្គមទេ ៕

ប្រទេសជប៉ុន ៖ អាកាសយានដ្ឋានមួយរបស់ជប៉ុនសម្រេចបានរយៈពេលជាង៣០ឆ្នាំយ៉ាងគួរឲ្យស្ញើចសរសើ ដោយមិនឲ្យបាត់បងវ៉ាលី កាបូប ឬកាតាបដាក់សម្ភារៈរបស់អ្នកដំណើរសូម្បីតែមួយ គិតចាប់តាំងពីឆ្នាំ១៩៩៤មក រហូតទទួលបានពានរង្វាន់ជាអាកាសយានដ្ឋានឆ្នើមមួយនៅលើពិភពលោក។

អាកាសយានដ្ឋានខាងលើនេះមានឈ្មោះថា Kansai មានទីតាំងនៅទីក្រុង Osaka ប្រទេសជប៉ុន បានបំបែកកំណត់ត្រាដ៏អស្ចារ្យមួយ គឺមិនដែលធ្វើឲ្យបាត់ឥវ៉ាន់ ឬវ៉ាលី របស់អ្នកដំណើរណាមួយឡើយក្នុងរយៈពេលជាង ៣ទសវត្សន៍ ចាប់តាំងពីបើដំណើរការដំបូងនៅក្នុងឆ្នាំ ១៩៩៤មក។

មូលហេតុដែលអាកាសយានដ្ឋាននេះអាចសម្រេចការងាររបស់ខ្លួនបានដោយមិនធ្វើឲ្យបាត់បង់របស់របររបស់ភ្ញៀវបែបនេះ គឺដោយសារប្រព័ន្ធគ្រប់គ្រងពីផ្នែកមួយទៅផ្នែកមួយដំណើរការយ៉ាងស៊ីចង្វាក់គ្នា ក្រោមការត្រួតពិនិត្យយ៉ាងហ្មត់ចត់ដូចជា ៖ មានបុគ្គលិកច្រើនចាំរាប់ និងត្រួតពិនិត្យសម្ភារៈជាច្រើនដងមុននឹងទទួល ឬប្រគល់ឲ្យភ្ញៀវ , កំណត់ពេលវេលាត្រឹមតែ ១៥នាទី ប៉ុណ្ណោះបន្ទាប់ពីយន្តហោះចុះចត ត្រូវប្រមូលឥវ៉ាន់ទាំងអស់មកត្រួតពិនិត្យ, បុគ្គលិកមានការយកចិត្តទុកដាក់ខ្ពស់ក្នុងការរៀបចំឥវ៉ាន់ទាំងអស់នោះ, មានសៀវភៅណែនាំ និងតែងធ្វើបច្ចុប្បន្នភាពជារឿយៗទៅតាមការលើកឡើងរបស់ភ្ញៀវ ឬបុគ្គលិក។

ការអនុវត្តការងារប្រកបដោយស្មារតីប្រុងប្រយ័ត្នខ្ពស់របស់អាកាសយានដ្ឋានខាងលើ បាននាំឲ្យពួកគេទទួលបានពានរង្វាន់ Skyrax សម្រាប់ «អាកាសយានដ្ឋានដែលមានប្រព័ន្ធគ្រប់គ្រងឥវ៉ាន់ល្អបំផុតក្នុងពិភពលោក» ចំនួន៨លើក។

លោក Tsuyoshi Habuta អ្នកគ្រប់គ្រងទូទៅប្រព័ន្ធដឹកឥវ៉ាន់ចេញចូលបាននិយាយថា ៖ «វាត្រូវតែជាការទទួលខុសត្រូវ និងការសហការជាក្រុម។ នៅពេលយន្តហោះបានចាកចេញបានទាន់ពេលវេលា និងមិនមានបញ្ហា ពួកយើងមានអារម្មណ៍ថាជោកជ័យបំផុត»។

បើតាមការសង្កេតរបស់មនុស្សជាច្រើនគេបានសន្និដ្ឋានថា ទាំងនេះគឺជាផ្នែកមួយនៃ Omotenashi ដែលជាវប្បធម៌របស់ជនជាតិជប៉ុន ក្នុងការផ្ដល់សេវាកម្មឲ្យបានលឿនរហ័ស និងបំពេញបំណងរបស់អតិថិជនមិនឲ្យខ្វះចន្លោះ។ ហើយនេះគឺជាគំរូដ៏ល្អមួយសម្រាប់ក្រុមហ៊ុន ឬស្ថាប័នផ្ដល់សេវាកម្មដទៃទៀតឲ្យយកតម្រាប់តាមអាកាសយានដ្ឋានមួយនេះ៕