បរទេស ៖ មនុស្សជាច្រើនបាននាំគ្នាងាកមកចាប់អារម្មណ៍នឹងអាជីពមួយដែលទទួលបានប្រាក់ចំណូលខ្ពស់ ថែមទាំងទទួលបានអាហារ និងទីកន្លែងស្នាក់នៅឥតគិតថ្លៃផងដែរ ការងារនោះគឺធ្វើជាម៉ែដោះរបស់សត្វខ្លាឃ្មុំនៅក្នុងសួនសត្វ។

ការងារជាម៉ែដោះរបស់ផេនដា កំពុងទាក់ទាញចំណាប់អារម្មណ៍របស់មនុស្សមនុស្សទូទៅជាខ្លាំង ព្រោះពួកគេនឹងអាចទទួលបានប្រាក់ចំណូលចាប់ពី 20,000 ដុល្លារ ទៅ70,000ដុល្លារឯណោះក្នុងមួយឆ្នាំ អាស្រ័យតាមបទពិសោធ និងជំនាញក្នុងការបំពេញតួនាទីរបស់បុគ្គលិកម្នាក់ៗ។ លើសពីនេះ វាមានការគួរឲ្យចាប់ខ្លាំងដោយសារ គេអាចស្និតស្នាលជាមួយសត្វខ្លាឃ្មុំផេនដាដ៏គួរឲ្យស្រលាញ់ផងដែរ។

ការងារនេះមានតែនៅតាមប្រទេសមួយចំនួនដែលមានសត្វខ្លាឃ្មុំផេនដាប៉ុណ្ណោះ។ ជាក់ស្ដែងវាមានច្រើននៅក្នុងប្រទេសចិន, សហរដ្ឋអាមេរិក, ជប៉ុន, អូស្រ្តាលី, និងអាល្លឺម៉ង់ជាដើម។ សម្រាប់ប្រទេសចិន មជ្ឈមណ្ឌលការពារ និងស្រាវជ្រាវសត្វខ្លាឃ្មុំផេនដា នឹងផ្ដល់ប្រាក់ថ្លៃកម្លាំងពលកម្មដល់បុគ្គលិកដែលមើលថែសត្វនេះប្រហែល 32,000ដុល្លារក្នុងមួយឆ្នាំ ឬស្មើ 2,600ដុល្លារជាងក្នុងមួយខែ។ ក្រៅពីនេះ ពួកគេក៏នឹងទទួលបានអាហារ ព្រមទាំងកន្លែងស្នាក់នៅដោយឥតគិតថ្លៃទៀតផង។

ដោយឡែកនៅក្នុងសហរដ្ឋអាមេរិកក៏មានសួនសត្វដែលមានខ្លាឃ្មុំផេនដានេះដែរ ហើយពួកគេផ្ដល់ប្រាក់បៀវត្សន៍ដល់អ្នកមើលថែផេនដាក្នុងម្នាក់ចាប់ពី 35,000ដុល្លារ ទៅ60,000ដុល្លារក្នុងមួយឆ្នាំ ឬស្មើជិត 3,000ដុល្លារក្នុងមួយខែ។ រីឯនៅសួនសត្វ San Francisco គេប្រទះឃើញមានស្លាកជ្រើសរើសបុគ្គលិកសម្រាប់មុខតំណែងជាជំនួយការអភិរក្សខ្លាឃ្មុំផេនដា ក្នុងអត្រាប្រាក់ខែចាប់ពី 67,000ដុល្លារ ទៅ 72,000ដុល្លារក្នុងមួយឆ្នាំ។

ក្រៅពីប្រទេសទាំង២ខាងលើ ប្រទេសផ្សេងៗទៀតក៏ផ្ដល់ប្រាក់ចំណូលខ្ពស់ដល់អ្នកថែផេនដាផងដែរ ដូចជាប្រទេសអូស្រ្តាលី ទទួលបាន 35,000ដុល្លារក្នុងមួយឆ្នាំ, ជប៉ុន ទទួលបាន38,000ដុល្លារក្នុងមួយឆ្នាំ, អាឡឺម៉ង់ ទទួលបាន33,000ដុល្លារក្នុងមួយឆ្នាំ និងប្រទេសឥណ្ឌា ទទួលបាន20,000ដុល្លារក្នុងមួយឆ្នាំ។

គួរជម្រាបថា បុគ្គលដែលអាចចូលធ្វើការងារផ្នែកនេះបានត្រូវទាមទារឲ្យមានការសិក្សាផ្នែកវិទ្យាសាស្រ្តសត្វ, ជីវវិទ្យា និងបរិស្ថាន មានបទពិសោធ៍មើលថៃសត្វកន្លងមក, មានសុខភាពមាំមួន, មានភាពបត់បែន និងជាពិសេសត្រូវមានក្ដីស្រលាញ់ចំពោះសត្វ។ ហើយការងារប្រចាំថ្ងៃនោះគឺ ការផ្ដល់ចំណីអោយពួកវា, ពិនិត្យសុខភាព និងសុវត្ថិភាព, ផ្ដល់អនាម័យ និងកំដរពួកវាលេងកម្សាន្តចៀសវាងភាពស្រ្តេស។

ក្រៅពីម៉ែដោះរបស់ខ្លាឃ្មុំផេនដា ក៏មានការងារមើលថែទាំសត្វប្រភេទដទៃផ្សេងទៀតដែលទទួលបានប្រាក់ចំណូលខ្ពស់ដូចគ្នា ដូចជាការមើលថែសត្វដែលជិតផុតពូជ, អ្នកបង្វឹកសត្វ, អ្នកជួយសង្រ្គោះសត្វព្រៃ និងអ្នកគ្រប់គ្រងសួនសត្វជាដើម។ ដោយឡែក បើទោះជាទទួលបានប្រាក់ខែខ្ពស់ពិតមែន ប៉ុន្តែភាគច្រើនបុគ្គលទាំងនោះគឺពេញចិត្តក្នុងបំពេញការងារនោះដោយស្ម័គ្រចិត្ត និងក្ដីស្រលាញ់ច្រើនជាង៕

ប្រទេសថៃ ៖ ចៅអធិការវត្តមួយអង្គដែលគង់នៅវត្តល្បីឈ្មោះមួយនៅប្រទេសថៃ ត្រូវបានសមត្ថកិច្ចចា.ប់ឃា.ត់ខ្លួន បន្ទាប់ពីសង្ស័យថាមានជាប់ពាក់ព័ន្ធនឹងករណីលួ.ចបច្ច័យរបស់វត្ត ទៅលេងល្បែ.ងអនឡាញ អស់ចំនួនជាង ៣០០លានបាត ឬប្រហែល 9.05លានដុល្លារ ។

យោងតាមសារព័ត៌មានក្នុងប្រទេសថៃកាលពីថ្ងៃទី ១៥ ខែឧសភា ឆ្នាំ ២០២៥ ព្រះសង្ឃអង្គនេះមានឈ្មោះថា Yaem Kittintharo ជាចៅអធិការវត្ត Rai Khing ក្នុងខេត្ត Nakhon Pathom ត្រូវអាជ្ញាធរពាក់ព័ន្ធចុះទៅចា.ប់ខ្លួន ដែលបង្ករឲ្យមានភាពភ្ញាក់ផ្អើលយ៉ាងខ្លាំងនៅប្រទេសថៃ ដោយសារវត្តខាងលើគឺជាវត្តល្បីឈ្មោះមួយនៅក្នុងប្រទេស។

យោងតាមលោកឧត្តមសេនីយទោ Jirapop Phuridet អគ្គមេបញ្ជាការរងនៃនាយកដ្ឋានប្រឆាំងបទល្មើសសេដ្ឋកិច្ច (CSD) ដែលបានប្រកាសលទ្ធផលស៊ើបអង្កេតកាលពីថ្ងៃទី 15 ខែឧសភា បានឱ្យដឹងថា ក្រុមប៉ូលីសសម្ងាត់បានចូលមកស៊ើបពីវត្ត Rai Khing អស់រយៈពេលជិត 7 ខែ បន្ទាប់មកក៏មានសេចក្តីរាយការណ៍ថា ព្រះធម្មវិបស្សនា ហៅកាត់ថា “ចៅឃុនយ៉ាម” ដែលជាព្រះចៅអធិការវត្តបានកេងយកថវិកាវត្តយ៉ាងច្រើន។

ប្រភពដដែលបានឲ្យដឹងទៀតថា ព្រះសង្ឃខាងលើនេះបានប្រើប្រាស់លុយដែលជាបច្ច័យរបស់វត្តទទួលបានពីពុទ្ធបរិស័ទ្ទ ទៅភ្នាល់ល្បែ.ងស៊ីសងតាមអនឡាញ។ បន្ថែមពីនេះ លទ្ធផលនៃការត្រួតពិនិត្យទូស័ព្ទដៃប៉ូលីសបានរកឃើញថា ព្រះសង្ឃខាងលើក៏បានយកលុយទៅឲ្យស្រ្តីម្នាក់ឈ្មោះថា Aranyawan Wangthapan ប្រហែលជាង ៤០លានបាត ឬស្មើ ១.២លានដុល្លាដើម្បីខ្ចីផងដែរ។ អ្នកទាំងពីរត្រូវបានគេអះអាងថាជាគូស្នេហ៍នឹងគ្នា ហើយបច្ចុប្បន្នត្រូវបានសមត្ថកិច្ចថៃឃា.ត់ខ្លួនទាំងពីរនាក់ ។

បន្ទាប់មានការចុះឃា.ត់ខ្លួន ព្រះសង្ឃខាងលើក៏ត្រូវបានសមត្ថកិច្ចចា.ប់ផ្សឹក និងបញ្ជូនទៅកាន់មន្ទីរឃុំឃាំ.ងជាបណ្ដោះអាសន្នសិន ដើម្បីរង់ចាំការកាត់ក្ដីជាបន្តទៀត។ អតីតសង្ឃរូបនេះកំពុងរងការចោ.ទប្រកាន់ចំពោះបទល្មើសធំៗរួមមាន បទក្លែងបន្លំ អំពើពុករលួយ និងល្មើសវិន័យព្រះសង្ឃ ដែលនឹងត្រូវទទួលការផ្តន្ទារទោសយ៉ាងធ្ងន់ធ្ងរ។ ចំពោះករណីនេះ ពលរដ្ឋថៃជាច្រើន ជាពិសេសអ្នកកាន់សាសនាព្រះពុទ្ធមានការអស់សង្ឃឹម និងពិបាកទទួលយកជាខ្លាំង៕

ក្រុមហ៊ុនស្ថាបត្យកម្ម Oiio Studio នៅទីក្រុងញូវយ៉ក បានបំផុសគម្រោងសាងសង់វែងជាងគេបំផុតលើពិភពលោក ដែលមានឈ្មោះថា “Big Bend” ។

អគារនេះ មានរៀងជាអក្សរ “U” បញ្ច្រាស់ ដែលមានប្រវែងសរុប១ ២២០ម៉ែត្រ ត្រូវបានបត់ជា ២ ចេញជាអគារភ្លោះ មានកម្ពស់ម្ខាង ៦១០ម៉ែត្រ។

Big Bend មានគម្រោងសាងសង់នៅភាគខាងត្បូង Central Park សង្កាត់ Manhattan នៅក្បែរនឹងអគារ One57 និងអគារ Steinway Tower។

ចំពោះគំនិតរចនាប្លង់អគារចេញជាអក្សរ U បញ្ជ្រាស់ចុះក្រោមនេះ គឺជាគំនិតរច្នៃប្រឌិតដ៏ឆ្លាតវៃ ក៏ព្រោះតែ ច្បាប់សាងសង់អគារនៅទីក្រុងញូវយ៉កមានភាពតឹងរឹង មិនអនុញ្ញាតឱ្យសាសង់នៅលើផ្ទៃដីធំពេកនោះទេ។

គួរបញ្ជាក់ថា អាគារនេះ ត្រូវបានក្រុមហ៊ុនស្ថាបត្យកម្ម Oiio Studio រចនាឡើងតាំងពីឆ្នាំ២០១៧ តែគិតមកទល់ពេលនេះ មិនទាន់ចេញជារូបរាងជាផ្លូវការនៅឡើយ ដោយមានតម្រូវការថវិកាច្រើនរួមជាមួយ បច្ចេកទេសសាងសង់ទំនើបបំផុត៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump បានអំពាវនាវឱ្យក្រុមហ៊ុន Apple បញ្ឈប់គម្រោងផ្លាស់ប្តូរទីតាំងផលិតទូរស័ព្ទ iPhone ពីចិនទៅឥណ្ឌា ហើយលោកជំរុញឱ្យក្រុមហ៊ុននេះផលិត iPhone នៅអាមេរិក ។ ការអំពាវនាវនេះកើតឡើងស្របពេលការស្តារឧស្សាហកម្មនៅអាមេរិកឱ្យងើបឡើងវិញ និងកាត់បន្ថយការពឹងផ្អែកលើចិន ។ នេះបើតាមការចុះផ្សាយរបស់សារព័ត៌មាន CNBC ។

• កាលពីថ្ងៃទី១៥ ខែឧសភា ឆ្នាំ២០២៥ លោក Trump ថ្លែងថា លោកបានជូនដំណឹងទៅលោក Tim Cook នាយក Apple គឺជាក្រុមហ៊ុនផលិតទូរស័ព្ទ iPhone ដ៏ធំរបស់អាមេរិក ថា មិនចង់ឱ្យ Apple ផលិត iPhone នៅឥណ្ឌាទេ ពីព្រោះឥណ្ឌាជាប្រទេសមួយដែលកំណត់ពន្ធនាំចូលទំនិញខ្ពស់លើពិភពលោក ។ លោកថា ៖ «ខ្ញុំមានបញ្ហាតិចតួចជាមួយលោក Tim Cook ប៉ុន្តែមិត្តភក្តិខ្ញុំនឹងគាំទ្រ Apple ។ ក្រុមហ៊ុននេះគួរវិនិយោគប្រាក់ចំនួន៥សែនលានដុល្លារនៅអាមេរិក ប៉ុន្តែខ្ញុំឮថា Apple ពង្រីកការផលិត iPhone ទៅទូទាំងប្រទេសឥណ្ឌា ខ្ញុំពុំត្រូវការបែបនេះ» ។

• លោកសង្កត់ធ្ងន់ថា ឥណ្ឌា គឺជាប្រទេសមួយដែលកំណត់ពន្ធនាំចូលទំនិញខ្ពស់លើពិភពលោក ប៉ុន្តែឥណ្ឌាក៏បានស្នើកិច្ចព្រមព្រៀងមួយជាមួយអាមេរិក ដោយការលើកលែងពន្ធទំនិញនាំចូល ដែលបច្ចុប្បន្ន កំពុងពិចារណា ។

លោក Trump ដាក់សម្ពាធឱ្យក្រុមហ៊ុន Apple ផ្លាស់ប្តូរទីតាំងផលិតទូរស័ព្ទ iPhone ពីឥណ្ឌាមកអាមេរិក ហាក់ផ្ទុយនឹងគោលនយោបាយ ពីព្រោះកន្លងមក លោកធ្លាប់គាំទ្រការវិនិយោគនៅឥណ្ឌា ។ ការផ្លាស់ប្តូរទីតាំងផលិតត្រឹម១០% មកអាមេរិក អាចចំណាយពេលវេលាជាច្រើនឆ្នាំ និងត្រូវការប្រាក់វិនិយោគរាប់លានដុល្លារ ។ កាលពីអាណត្តិទី១ លោក Trump បានលើកកម្ពស់ទំនាក់ទំនងយុទ្ធសាស្ត្រជាមួយឥណ្ឌា ដោយគាំទ្រឱ្យក្រុមហ៊ុនអាមេរិកវិនិយោគនៅឥណ្ឌា ប៉ុន្តែករណី Apple លោកបែរជាពុំយល់ស្របឱ្យក្រុមហ៊ុននេះប្តូរទីតាំងផលិត iPhone ពីចិនទៅឥណ្ឌា ហើយអំពាវនាវឱ្យប្តូរទីតាំងផលិតមកអាមេរិក ។ នេះបើតាមការលើកឡើងរបស់អ្នកវិភាគសេដ្ឋកិច្ច ។

ដោយឡែក សារព័ត៌មាន CNBC-TV18 របស់ឥណ្ឌាបានរាយការណ៍ដោយយោងតាមប្រភពព័ត៌មានពីរដ្ឋាភិបាលឥណ្ឌាថា ក្រុមហ៊ុន Apple បានសន្យាជាមួយរដ្ឋាភិបាលឥណ្ឌា គឺនឹងយកប្រទេសឥណ្ឌាធ្វើជាទីតាំងផលិតទូរស័ព្ទ iPhone ដ៏សំខាន់ ។

ក្រោមគោលនយោបាយសង្គ្រាមពាណិជ្ជកម្មរវាងអាមេរិក និងចិន ក្រុមហ៊ុន Apple បានព្យាយាមពង្រីកទីតាំងផលិត iPhone និងផលិតផលផ្សេងៗចេញពីចិន ដែលជាទីតាំងផលិតដ៏សំខាន់ ដោយសារ Apple ប្រឈមនឹងភាពតានតឹងពាណិជ្ជកម្ម និងការដំឡើងពន្ធទំនិញរបស់អាមេរិក ។ ហេតុនេះ ការប្តូរទីតាំងផលិតទៅឥណ្ឌាបានក្លាយជាជម្រើសមួយដែលចំណាយដើមទុនទាបជាង និងកាត់បន្ថយផលប៉ះពាល់ពន្ធ ។

ការប្តូរទីតាំងផលិតមកអាមេរិកអាចផ្តល់ការងារដល់ពលរដ្ឋអាមេរិក ប៉ុន្តែ Apple ត្រូវចំណាយដើមទុនខ្ពស់ក្នុងការផលិត iPhone ដូចជា ៖ ចំណាយប្រាក់ជួលបុគ្គលិកអាមេរិកខ្ពស់ជាងបណ្តាប្រទេសអាស៊ី ព្រមទាំងការចំណាយលើស្តង់ដារសុវត្ថិភាព ការគ្រប់គ្រងបុគ្គលិក និងពន្ធ ។ ក្រៅពីនេះ បើ Apple ផលិត iPhone នៅអាមេរិក នឹងធ្វើឱ្យតម្លៃលក់រាយ iPhone កើនឡើងដល់៣,៥០០ដុល្លារ ដោយសារ Apple ចំណាយដើមទុនខ្ពស់នៅអាមេរិក ។ ដូច្នេះ Apple ពុំយល់ស្របតាមការអំពាវនាវឱ្យលោក Trump ទេ ៕