ការប្រើប្រាស់កង្ហារទទួលបានការពេញនិយមយ៉ាងខ្លាំង និងពុំអាចខ្វះបានពេលមេឃក្តៅ ប៉ុន្តែតើយើងប្រាកដចិត្តទេថា បានប្រើប្រាស់កង្ហារយ៉ាងត្រឹមត្រូវ? វេជ្ជបណ្ឌិតអាមេរិកឈ្មោះ Naheed Ali ដាស់តឿនថា ការប្រើប្រាស់កង្ហារពុំត្រឹមត្រូវ ប្រឈមនឹងផលប៉ះពាល់សុខភាព ។

ក្នុងបទសម្ភាសន៍ជាមួយគេហទំព័រ Daily Mail លោកវេជ្ជបណ្ឌិត Ali និយាយថា មនុស្សភាគច្រើនមានទម្លាប់បើកកង្ហារបែរមុខមករកខ្លួនពេញមួយយប់ ប៉ុន្តែទម្លាប់បែបនេះនឹងបង្កើតភាពតានតឹង និងប្រឈមជាមួយផលប៉ះពាល់សុខភាពរាងកាយជាច្រើន ដូចជា ៖

១-ឈឺដើមទ្រូងសម្រាប់អ្នកជំងឺហឺត ៖ ការបើកកង្ហារបែរមកមុខមករកខ្លួនពេញមួយយប់ធ្វើឱ្យប៉ះពាល់អ្នកជំងឺហឺត ឬអ្នកមានសុខភាពល្អធម្មតា ដូចជា ៖ ខ្យល់ចេញពីកង្ហារបានបក់កំទេចធូលី, អង្គែចេញពីសត្វចិញ្ចឹម និងកំទេចក្រណាត់ចូលក្នុងប្រព័ន្ធដកដង្ហើម ។ បន្ទាប់មក វានឹងចូលក្នុងសួតធ្វើឱ្យយើងណែនដើមទ្រូងពេលក្រោកពីដំណេក ។

២-ស្ងួតច្រមុះ និងបំពង់ក ៖ ការស្រាវជ្រាវបញ្ជាក់ថា សីតុណ្ហភាពសមស្របសម្រាប់ការសម្រាក គឺចាប់ពី១៦ ទៅ១៨អង្សាសេ ទើបធ្វើឱ្យយើងចូលចិត្តប្រើប្រាស់កង្ហារដើម្បីឱ្យសម្រាកលក់ស្រួលពេលមេឃក្តៅ ។ ប៉ុន្តែការបើកកង្ហារបក់មកចំរាងកាយពេញមួយយប់នឹងធ្វើឱ្យស្ងួតច្រមុះ និងបំពង់ក ជាពិសេស ពេលក្រោកពីសម្រាក ។

លោកវេជ្ជបណ្ឌិត Ali និយាយថា ៖ «ការស្ងួតច្រមុះ និងបំពង់ក មិនត្រឹមតែធ្វើឱ្យរលាកផ្លូវដង្ហើមប៉ុណ្ណោះទេ ប៉ុន្តែវាបង្កើនការចេញសំបោរតាមច្រមុះផងដែរ ព្រមទាំងបង្កើតស្មេស្មក្នុងបំពង់ក ។ វាបណ្តាលឱ្យក្អក ឬតឹងច្រមុះពេញមួយថ្ងៃ» ។

៣-ឈឺសាច់ដុំ ៖ ការបែរមុខកង្ហារមកចំរាងកាយពេលសម្រាកលក់នឹងធ្វើឱ្យឈឺចាប់សាច់ដុំ ដោយសារខ្យល់ត្រជាក់ចេញពីកង្ហារប៉ះជាមួយសាច់ដុំ និងសន្លាក់រយៈពេលយូរ ចាប់ពី៧ម៉ោង ទៅ៨ម៉ោង ។

វេជ្ជបណ្ឌិតអាមេរិកបានណែនាំពីវិធីប្រើប្រាស់កង្ហារពេលយប់ឱ្យមានសុវត្ថិភាពតាម២វិធីងាយៗ ដូចជា ៖

១-ប្រើកង្ហារដោយកំណត់ម៉ោង ៖ គួរកំណត់ម៉ោងឱ្យកង្ហារបិទដោយស្វ័យប្រវត្តិ ក្រោយពីប្រើប្រាស់បានរយៈពេល៩០នាទី
២-កុំឱ្យកង្ហារបក់មកចំរាងកាយ ៖ ត្រូវដាក់កង្ហារឱ្យឆ្ងាយពីគ្រែសម្រាក និងចុចឱ្យវាវិលចុះ-ឡើងដើម្បីបញ្ចេញខ្យល់ពេញបន្ទប់ ។

ក្រៅពីនេះ គេហទំព័រ Sleep Foundation បានណែនាំឱ្យសម្អាតកង្ហារឱ្យបានញឹកញាប់ ជាពិសេស សម្អាតស្លាបកង្ហារ ដើម្បីកុំឱ្យវាបក់ធូលី និងសារធាតុផ្សេងៗប៉ះពាល់សុខភាព ។ គួរបោកគក់កម្រាលពូក និងភួយយ៉ាងទៀងទាត់ដើម្បីកាត់បន្ថយធូលី និងកំទេចក្រណាត់ ព្រមទាំងដាក់កែវទឹកក្បែរគ្រែសម្រាកសម្រាប់ផឹកពេលយប់ ករណីបំពង់កស្ងួត ៕

មនុស្សមួយចំនួនពុំសូវយកចិត្តទុកដាក់នឹងការទុកដាក់របស់របរឱ្យត្រូវកន្លែងទេ ហើយពួកគេតែងតែយករបស់៣យ៉ាងនេះមកដាក់ក្បែរចង្ក្រានហ្គាស ។ ប៉ុន្តែអ្នកជំនាញហាមដាច់ខាតដាក់របស់៣យ៉ាងនេះក្បែរចង្ក្រានហ្គាសក្នុងផ្ទះបាយ ពីព្រោះវាជាកន្លែងប្រមូលផ្តុំមេរោគ និងអាចបង្កឱ្យមានភ្លើងឆេះផ្ទះ ។

យើងតែងតែចូលផ្ទះបាយជារៀងរាល់ថ្ងៃ ប៉ុន្តែផ្ទះបាយក៏ជាកន្លែងបង្កគ្រោះថ្នាក់យ៉ាងច្រើនដែរ ដូចជា ៖ សុវត្ថិភាពចំណីអាហារ, ប្រឈមនឹងភ្លើងឆេះផ្ទះ ឬការផ្ទុះ និងមុតដៃជាមួយកាំបិត ។ ប៉ុន្តែក្រៅពីការចម្អិនអាហារក្នុងផ្ទះបាយ ការទុកដាក់របស់របរផ្សេងៗពិតជាចាំបាច់ ដែលតម្រូវឱ្យយកចិត្តទុកដាក់យ៉ាងខ្លាំង ។

ពុំគួរដាក់អាហារខ្លះជិតចង្ក្រានហ្គាស ឬចង្ក្រានធ្យូងទេ ទោះជាផ្ទះបាយតូចចង្អៀតយ៉ាងណាក៏ដោយ ពីព្រោះវានឹងក្លាយជាកន្លែងធំធាត់របស់មេរោគ ។ ហេតុនេះ ដើម្បីការពារខ្លួន និងក្រុមគ្រួសារ គួរប្រមូលរបស់៣យ៉ាងនេះចេញឆ្ងាយពីចង្ក្រាន ដូចជា ៖

១-ប្រេងសណ្តែក ៖ ប្រេងសណ្តែក គឺសំខាន់ណាស់សម្រាប់ចម្អិនអាហារ ប៉ុន្តែបើដាក់ជិតចង្ក្រាន វានឹងបង្កគ្រោះថ្នាក់ដល់សុខភាពយ៉ាងខ្លាំង ដោយសារនៅជិតកំដៅភ្លើងរយៈពេលយូរ ។ ប្រេងសណ្តែកនឹងឆាប់រលាយបង្កើតជាសារធាតុផ្សេងៗ ហើយពេលបរិភោគអាហារលាយឡំជាមួយប្រេងសណ្តែកផ្ទុកសារធាតុទាំងនេះ យើងនឹងកើតជំងឺសរសៃឈាមបេះដូង រលាករ៉ាំរ៉ៃ និងមហារីក ។

លើសពីនេះ ប្រេងសណ្តែកច្រកក្នុងដបផ្លាស្ទិក គឺកំដៅក្នុងចង្ក្រាននឹងធ្វើឱ្យផ្លាស្ទិកខូចទ្រង់ទ្រាយបង្កើតជាសារធាតុពុល ដូចជា ៖ សារធាតុ BPA ។ ពេលបរិភោគអាហារផ្ទុកសារធាតុនេះយូរៗទៅ វានឹងប៉ះពាល់ថ្លើម និងតម្រងនោមដោយពុំដឹងខ្លួន ។

២-របស់ស្ងួតប្រភេទម្សៅ ៖ ម្សៅស្រូវសាឡី ម្សៅអង្ករខ្សាយ ម្រេច ម្ទេចហ្មត់ និងម្សៅការី គឺមានកំទេចតូចៗអាចសាយភាយពេញផ្ទះបាយនៅពេលបើកគំរបរបស់វា ឬកូរ ។ បើដាក់របស់ទាំងនេះក្បែរចង្ក្រាម គឺកំទេចតូចៗនឹងលាយឡំជាមួយកំដៅភ្លើងខ្ពស់ ហើយវាអាចឆេះក្រោយប៉ះផ្កាភ្លើង ដែលប្រឈមនឹងភ្លើងឆេះផ្ទះ ឬផ្ទុះក្នុងផ្ទះបាយ ។

លើសពីនេះ ក្នុងផ្ទះបាយសម្បូរចំហាយទឹក ខ្លាញ់ និងសីតុណ្ហភាពប្រែប្រួលខ្លាំង ដែលធ្វើឱ្យកំទេចម្សៅស្រូបសំណើមក្លាយជាដុំផ្សិតតូចៗ ឬឆាប់ខូចគុណភាព ។ ការប្រើប្រាស់ម្សៅស្រូវសំឡី ឬម្សៅអង្ករខ្សោយមានសំណើម ឬផ្សិត គឺមិនត្រឹមតែធ្វើឱ្យខូចរសជាតិអាហារប៉ុណ្ណោះទេ ប៉ុន្តែវានឹងប៉ះពាល់ប្រព័ន្ធរំលាយអាហារ ឬប្រមូលផ្តុំសារធាតុពុលប៉ះពាល់សុខភាពរយៈពេលយូរ ។

៣-អាហារកំប៉ុង ៖ អាហារកំប៉ុងត្រូវបានដាក់ក្បែរចង្ក្រានដោយសារផ្ទះបាយតូចចង្អៀត ប៉ុន្តែពេលវាត្រូវកំដៅខ្លាំងយូរ គឺនាងធ្វើឱ្យលោហៈ ឬផ្លាស្ទិកនៅក្រៅកំប៉ុងខូចទ្រង់ទ្រាយបង្កជាសារធាតុពុលជាច្រើន ។ សារធាតុពុលទាំងនេះនឹងហូរចូលអាហារក្នុងកំប៉ុង ហើយវាមិនត្រឹមតែបាត់បង់រសជាតិអាហារប៉ុណ្ណោះទេ ប៉ុន្តែការបរិភោគអាហារលាយឡំជាមួយសារធាតុពុលយូរៗទៅធ្វើឱ្យប៉ះពាល់ថ្លើម តម្រងនោម ប្រព័ន្ធប្រសាទ ព្រមទាំងកើតជំងឺរ៉ាំរ៉ៃ ឬមហារីក ។

ក្រៅពីនេះ បើអាហារកំប៉ុងបិទគំរបជិតខ្លាំងពេក ហើយពេលវាត្រូវកំដៅភ្លើងខ្លាំងធ្វើឱ្យសម្ពាធខាងក្នុងកើនឡើងយ៉ាងឆាប់រហ័សបង្កឱ្យផ្ទុះកំប៉ុង និងបណ្តាលឱ្យមានភ្លើងឆេះផ្ទះបាយ ៕

នៅរដូវក្តៅ បាយឆាប់ផ្អូមណាស់ បើទោះជាទើបតែចម្អិនរយៈពេលខ្លីក៏ដោយ ហើយយើងពុំដឹងថា តើគួរធ្វើដូចម្តេចដើម្បីកុំឱ្យបាយឆាប់ផ្អូម ។ សារព័ត៌មាន KBN សូមណែនាំ១០វិធីងាយៗដូចខាងក្រោមនេះ ដើម្បីការពារកុំឱ្យបាយឆាប់ផ្អូម រួមមាន ៖

១-លាងឆ្អាងបាយដោយទឹកក្តៅជាមួយអំបិល ៖ ដួសអំបិលបន្តិចដាក់ក្នុងឆ្នាំងបាយ រួចហើយ ចាក់ទឹកក្តៅចូល និងលាងសម្អាតឆ្នាំងបាយឱ្យសព្វកន្លែង ។ វិធីនេះអាចកម្ចាត់មេរោគបានយ៉ាងល្អ និងជួយកាត់បន្ថយការប្រមូលផ្តុំមេរោគធ្វើឱ្យបាយឆាប់ផ្អូម ។

២-ប្រើប្រាស់ម្សៅ Baking Soda ជាមួយទឹកខ្មេះ ៖ យកម្សៅ Baking Soda ចំនួន១ស្លាបព្រាបាយ ផ្សំជាមួយទឹកខ្មេះ ២ស្លាបព្រាបាយ បន្ទាប់មក លាបឆ្នាំងបាយឱ្យសព្វកន្លែង ។ ទុកវាចោលរយៈពេល១០នាទី រួចលាងទឹកដើម្បីកម្ចាត់មេរោគធ្វើឱ្យបាយឆាប់ផ្អូម ។

៣-ដាក់ស្លឹកតើយពេលដាំបាយ ៖ ក្លិនក្រអូបចេញពីស្លឹកតើយអាចជួយកម្ចាត់មេរោគ ព្រមទាំងធ្វើឱ្យបាយមានក្លិនក្រអូបគួរឱ្យចង់បរិភោគ និងមិនងាយផ្អូម ។

៤-ពេលបាយឆ្អិន ចូរប្រញាប់បើកគំរបឆ្នាំងបាយបញ្ចេញចំហាយក្តៅ ៖ មិនគួរបិទគំរបឆ្នាំងបាយពេលបាយឆ្អិនទេ ពីព្រោះចំហាយក្តៅនឹងធ្វើឱ្យបាយជ្រាយ និងជាកន្លែងប្រមូលផ្តុំមេរោគ ។

៥-ហាលឆ្នាំងដាំបាយឱ្យស្ងួតល្អមុនប្រើប្រាស់ ៖ ពេលលាងឆ្អាំងបាយរួច សូមកុំប្រញាប់យកវាទៅដាំបាយភ្លាម គួរតែជូត ឬហាលថ្ងៃឱ្យស្ងួតល្អមុនប្រើប្រាស់ ដើម្បីកាត់បន្ថយសំណើមធ្វើឱ្យបាយផ្អូម ។

៦-ដាក់ទឹកក្រូចឆ្មារ ឬទឹកខ្មេះ ចាប់ពី១ ទៅ២ដំណក់ ពេលដាំបាយ ៖ ទឹកក្រូចឆ្មារ ឬទឹកខ្មេះអាចជួយការពារកុំឱ្យបាយឆាប់ផ្អូម ថែមទាំងគ្មានរសជាតិជូរក្នុងបាយ ។

៧-យកអង្ករថ្មីមកដាំបាយ កុំដាំអង្ករចាស់ ៖ អង្ករចាស់យូរឆ្នាំនឹងប្រមូលផ្តុំសំណើមធ្វើឱ្យបាយឆាប់ផ្អូម យើងគួរយកអង្ករថ្មីៗមកដាំបាយជានិច្ច ។

៨-កុំយកវែកសើម ឬកខ្វក់មកដួសបាយ ៖ វែកដួសបាយសើម គឺប្រមូលផ្តុំទៅដោយមេរោគ និងធ្វើឱ្យបាយឆាប់ផ្អូម ។

៩-យកបាយនៅសល់ពេលល្ងាចដាក់ក្នុងទូរទឹកកក ៖ ហាមដាក់បាយបរិភោគពុំអស់ពីល្ងាចនៅក្រៅទូរទឹកកកដាច់ខាត ពីព្រោះអាកាសធាតុក្តៅធ្វើឱ្យបាយឆាប់ផ្អូម ។

១០-លាងឆ្នាំងបាយដោយសាប៊ូលាងចាន ផ្សំទឹកផ្លែក្រូចសើច ៖ ទឹកផ្លែក្រូចសើច លាយជាមួយសាប៊ូលាងចាន អាចជួយកម្ចាត់មេរោគ និងបំបាត់ក្លិនជូរយ៉ាងល្អ ។ វាថែមទាំងធ្វើឱ្យឆ្នាំងដាំបាយស្អាត និងរក្សាកំដៅបាយ ។ បើជួបបញ្ហាបាយឆាប់ផ្អូម ជាពិសេស ក្នុងរដូវក្តៅ លោកអ្នកអាចអនុវត្តតាមវិធីទាំងនេះបាន ធានាថា នឹងអស់បញ្ហាបាយផ្អូម ៕