ប្រិយមិត្តមួយចំនួនជ្រាបមកហើយថាថ្មីៗមកនេះ អូនផ្កាយ អតីតតារាសម្តែងស៊ិ.ចស៊ីបាន បង្ហាញការខូចចិត្តមានជម្លោះជាមួយនឹងប្តីរហូតមហាជនជាច្រើនសង្ស័យថាអ្នកទាំងពីរឈានដល់ផ្លូវបែកគ្នា។ ទោះយ៉ាងណា បន្ទាប់ពីឈ្លោះទាស់ទែងគ្នាប៉ុន្មានថ្ងៃ ពេលនេះ អូនផ្កាយ និងប្តី បានចេញវីដេអូមួយជាមួយគ្នាដោយបញ្ជាក់ថាអ្នកទាំងពីរមិនបានធ្វើជា ឈ្លោះដើម្បីទីផ្សារហើយមុននឹងត្រូវគ្នាវិញគឺខ្ទេចទូរសព្ទអស់មួយគ្រឿង។
នៅយប់ថ្ងៃទី១៦ ខែឧសភា អូនផ្កាយ បានចេញវីដេអូមួយជាមួយនឹងចំណងជើងថា «សម្តីពិតពីខាងប្រុស»។ ក្នុងវីដេអូដែលមានរយៈពេល៣នាទី អូនផ្កាយ បានឱ្យប្តីរបស់ខ្លួន ស្រាយបញ្ជាក់ថារឿងថ្មីៗនេះជាការពិតឬសម្តែងខណៈអ្នកទាំងពីរបានប្រូម៉ូតពីការលក់របស់ខ្លួន។ ប្តីរបស់ អូនផ្កាយ ថាមិនមែនជាការធ្វើទីផ្សារនោះទេ តាមលួងជិតឡប់ ប្តីប្រពន្ធ ឈ្លោះ គ្នាធ្វើទីផ្សារមិនមែនជារឿងងាយស្រួលនោះទេហើយវគ្គចុងក្រោយនេះ ផុសរូបសុទ្ធ តែបិទមុខ ចិត្តដូច៣៦០ដឺក្រេដូចខ្សែភ្លើងជំពាក់។
បើតាមរូបភាពដែល អូនផ្កាយ បានបង្ហោះគឺមុននឹងត្រូវគ្នាត្រូវខ្ទេចទូរសព្ទអស់១គ្រឿង។ តារាសម្តែងស្រីដែលឃ្លាតពីអាជីពសិល្បៈរូបនេះបានបង្ហាញដែរថានាងមានគម្រោងបែកគ្នាជាមួយប្តីឱ្យបានច្រើនខែប៉ុន្តែបានត្រឹមតែ៤ថ្ងៃ។
វីដេអូដែល អូនផ្កាយ ចេញមកបញ្ជាក់ត្រូវរូវជាមួយប្តីវិញមានអ្នកលេងបណ្តាញសង្គមជា ច្រើនបានចូលទៅបញ្ចេញមតិយោបល់។ ប្រិយមិត្តខ្លះបានសម្តែងការអបអរដែលអ្នកទាំង ពីរត្រូវគ្នាវិញ ខណៈអ្នកខ្លះទៀតបញ្ចេញមតិផ្លែផ្កាថានេះគ្រាន់តែយុទ្ធសាស្រ្តទីផ្សាររបស់ អ្នកទាំងពីរបន្ទាប់ពីស្ងប់ស្ងាត់ធ្វើឱ្យផ្ទុះឡើងវិញ។
គួរឱ្យដឹងថា ចាប់តាំងពីឃ្លាតឆ្ងាយពីរង្វង់សិល្បៈ អូនផ្កាយ និងប្តីបានខិតខំរកស៊ីរួមទាំង បានប្រម៉ូតផលិតផលមួយចំនួន។ ប្តីប្រពន្ធមួយគូនេះបានធ្វើឱ្យទីផ្សារបាញ់ត្រាងផ្ទុះ កក្រើកពេញស្រុកខ្មែរបានមួយរយៈដែលមានមនុស្សម្នាផ្អើលទៅទិញភ្លូកទឹកភ្លូកដី។ គូសបញ្ជាក់ថាបច្ចុប្បន្ននេះអ្នកទាំងពីរមានកូនពីរនាក់ជាមួយគ្នាជាចំណងដៃ៕
