ប្រធានាធិបតីអាម៉េរិកលោក Donald Trump បាននិយាយថា តារាចម្រៀង Taylor Swift លែងល្បីដូចពីមុនទៀតហើយបន្ទាប់ពីលោកបានប្រកាសថាលោកស្អប់នាងកាលពីឆ្នាំ២០២៤។

នៅលើ Truth Social នៅថ្ងៃទី ១៦ ខែឧសភា លោក Donald Trump បានសរសេរថា «តើមាននរណាម្នាក់កត់សម្គាល់ទេថាចាប់តាំងពីខ្ញុំបង្ហោះថា ខ្ញុំស្អប់ Taylor Swift នាងលែងជាល្បីល្បាញទៀតហើយ»? គួរឱ្យដឹងថា ជាលើកដំបូងដែលប្រធានាធិបតី អាម៉េរិកបង្ហាញអាកប្បកិរិយារបស់ខ្លួនចំពោះតារាចម្រៀងរូបនេះគឺនៅក្នុងខែកញ្ញា ឆ្នាំ២០២៤ បន្ទាប់ពីការបង្ហោះរបស់ Taylor Swift នៅលើ Instagram ។ នៅពេលនោះ តារាចម្រៀងវ័យ៣៦ឆ្នាំ រូបនេះបានជំទាស់នឹងការចែករំលែករូបថត AI របស់អ្នកគាំទ្ររបស់នាងដែលធ្វើយុទ្ធនាការក្នុងការប្រកួតប្រជែងសន្លឹកឆ្នោតតាមរយៈបណ្តាញសង្គម Truth Social ។

ទន្ទឹមនឹងនេះ Taylor Swift បានគាំទ្រជាសាធារណៈចំពោះបេក្ខជនប្រជាធិបតេយ្យ លោកស្រី Kamala Harris ដែលជាគូប្រជែងរបស់លោក Donald Trump នៅពេល នោះ។ មួយថ្ងៃក្រោយមកនៅលើកម្មវិធី Fox & Friends ប្រធានាធិបតី រូបនេះបាន និយាយថា «ខ្ញុំមិនមែនជាអ្នកគាំទ្រ Taylor Swift ទេ។ វាគ្រាន់តែជាបញ្ហានៃពេលវេលា។ ប៉ុន្តែនាងជាមនុស្សប្រជាធិបតេយ្យខ្លាំងណាស់។ នាងតែងតែគាំទ្រអ្នកប្រជាធិបតេយ្យ។ នាងអាចចំណាយលើការសម្រេចចិត្តនោះនៅក្នុងទីផ្សារតន្ត្រី»។ ប៉ុន្មានថ្ងៃបន្ទាប់ពី ការសម្ភាសន៍ លោកបានធ្វើល្បីសុះសាយដោយប្រកាសថា Donald Trump ស្អប់ Taylor Swift ដោយប្រើ គណនី Truth Social របស់លោកដោយមិនមានការពន្យល់បន្ថែម ឬអត្ថាធិប្បាយបន្ថែម។

ទោះបីជាប្រធានាធិបតីអាម៉េរិករូបនេះនិយាយថា Taylor Swift លែងល្បីដូចពីមុនក្តី ប៉ុន្តែថ្មីៗនេះនាងត្រូវបានគេដាក់ឈ្មោះថា Global Recording Artist of the Year 2024 ដោយសារការលក់តន្ត្រីឈានមុខគេនៅលើពិភពលោកសម្រាប់ឆ្នាំនេះ។ នៅថ្ងៃទី ១៧ ខែមីនា ការប្រគំតន្រ្តី The Eras Tour បានទទួល ពានរង្វាន់ Tour of the Century នៅកម្មវិធី iHeart Radio Music Awards ៕

យើងតែងតែចាប់អារម្មណ៍នឹងការទស្សន៍ទាយថា តើថ្ងៃអវសានពិភពលោកនឹងមកដល់ពេលណា? តើពេលណាមនុស្សនឹងពុំអាចរស់នៅលើផែនដីបន្តទៀតបាន? ហើយមនុស្សភាគច្រើនបានសន្និដ្ឋានទៅលើកត្តាផ្សេងៗដែលបណ្តាលឱ្យផែនដីឈានដល់ទីបញ្ចប់ ដូចជា ៖ សង្គ្រាមនុយក្លេអ៊ែរ, អាចម៍ផ្កាយមិនអាចគ្រប់គ្រងបាន និងបម្រែបម្រួលអាកាសធាតុ ។

យើងបានឮការទស្សន៍ទាយជាច្រើនពីថ្ងៃអវសានពិភពលោក ក្នុងនោះលោក Elon Musk នាយកក្រុមហ៊ុនរថយន្ត Tesla, SpaceX និងជាមហាសេដ្ឋីលំដាប់ពិភពលោក ក៏ធ្លាប់បានទស្សន៍ទាយពីថ្ងៃអវសានពិភពលោកដែរ ។ លោក Elon Musk និយាយថា ពិភពលោកនឹងត្រូវដុតបំផ្លាញដោយកំដៅព្រះអាទិត្យ ហើយនេះជាមូលហេតុដែលលោកចង់ឱ្យមនុស្សរកវិធីទៅរស់នៅលើអវកាស ដោយលោកបានចូលរួមក្នុងគម្រោងអវកាសជាច្រើន រួមទាំងការបញ្ជូនរថយន្ត Tesla ទៅអវកាស ។

ក្នុងបទសម្ភាសន៍ជាមួយ Jesse Watters កាលពីថ្ងៃទី៥ ខែឧសភា ឆ្នាំ២០២៥ លោក Elon Musk និយាយថា ៖ «វាមិនមែនជាការឡើងទៅភពអង្គារតែមួយលើកទេ ប៉ុន្តែលោកចង់ឱ្យគ្រប់គ្នាយល់ដឹងពីចក្រវាឡច្រើនជាងនេះ និងអាចរស់នៅទីនោះយូរអង្វែង ករណីមានហេតុការណ៍អាក្រក់កើតឡើងលើផែនដី ។ យើងនឹងមានកន្លែងរស់នៅថ្មី គឺភពអង្គារ» ។

លោកបន្តថា ៖ «ផលប្រយោជន៍របស់ភពអង្គារ គឺដូចគ្នានឹងការធានារ៉ាប់រងអាយុជីវិតរួមគ្នា ពីព្រោះនៅទីបំផុត ជីវិតទាំងអស់លើផែនដីនឹងត្រូវបំផ្លាញដោយកំដៅព្រះអាទិត្យ ។ ព្រះអាទិត្យកំពុងតែពង្រីកខ្លួនបន្តិចម្តងៗកាន់តែធំ ហើយយើងនឹងរស់នៅភពផ្សេង ដោយសារផែនដីត្រូវដុតបំផ្លាញ» ។

អ្នកស្រាវជ្រាវនៅសាកលវិទ្យាល័យ Toho ប្រទេសជប៉ុន បានគណនាពីពេលវេលាថ្ងៃអវសានពិភពលោករបស់លោក Elon Musk ដោយប្រើប្រាស់កុំព្យូទ័រទំនើប និងគំរូបគណិតវិទ្យា ដើម្បីទស្សន៍ទាយពីការវិវឌ្ឍរបស់ព្រះអាទិត្យរយៈពេលយូរ ។ ការស្រាវជ្រាវនេះបានផ្សព្វផ្សាយក្នុងទស្សនាវដ្តី Nature Geoscience ដោយក្រុមអ្នកជំនាញសន្និដ្ឋានថា បើមនុស្សពុំអាចសម្របខ្លួនជាមួយបរិស្ថានថ្មីបាន គឺផែនដីនឹងក្លាយជាកន្លែងពុំអាចឱ្យមនុស្សរស់នៅរយៈពេល១ពាន់លានឆ្នាំខាងមុខ ។ អ្នកស្រាវជ្រាវជឿថា ព្រះអាទិត្យនឹងមានទំហំកាន់តែធំ និងក្តៅខ្លាំង ហើយធ្វើឱ្យសីតុណ្ហភាពផែនដីកើនឡើងខ្ពស់ និងកាត់បន្ថយកម្រិតអុកស៊ីសែន ។

ការស្រាវជ្រាវរបស់អ្នកជំនាញជប៉ុនបង្ហាញទៀតថា រយៈពេល៥ពាន់លានឆ្នាំខាងមុខ ព្រះអាទិត្យនឹងក្លាយជាព្រះអាទិត្យយក្សពណ៌ក្រហម ហើយវានឹងលេបភពនៅក្បែរៗ រួមទាំងលេបភពពុធ ភពសុក្រ ហើយអាចលេបផែនដី ។ យើងបានឃើញផលប៉ះពាល់ដោយសារសីតុណ្ហភាពផែនដីកើនឡើង ហើយវានឹងកាន់តែធ្ងន់ធ្ងរ ប្រសិនបើផ្ទាំងទឹកកកធំៗមួយចំនួនរលាយនៅថ្ងៃខាងមុខ ប៉ុន្តែត្រូវរង់ចាំមួយរយៈធំទៀត មុនពេលយើងពុំអាចរស់នៅលើផែនដីបន្តទៀត ៕

ប្រទេសអេមីរ៉ាតអារ៉ាប់ ៖ ភ្ញាក់ផ្អើលពេញពិភពលោក ក្រោយពីប្រទេសអេមីរ៉ាតអារ៉ាប់រួម (UAE) ទទួលស្វាគមន៍ដំណើរទស្សនកិច្ចរបស់ប្រធានាធិបតីអាមេរិក លោក Donald Trump កាលពីថ្ងៃទី១៥ ខែឧសភា ឆ្នាំ២០២៥ ខុសប្លែកពីប្រទេសនានា គឺធ្វើតាមវប្បធម៌បុរាណដោយយកក្រុមនារីសក់វែង ស្លៀកពាក់ឈុតពណ៌ស មកឈរសងខាងផ្លូវ គ្រវីសក់ទៅមក ។ ការទទួលស្វាគមន៍បែបនេះធ្វើឱ្យប្រធានាធិបតីអាមេរិកពេញចិត្តណាស់ និងសរសើរផងដែរ ប៉ុន្តែវាធ្វើឱ្យមហាជនឆ្ងល់យ៉ាងខ្លាំងថា នេះជាពិធីអ្វី និងជាការស្វាគមន៍ភ្ញៀវបែបណា?

ការទទួលស្វាគមន៍ដំណើរទស្សនកិច្ចប្រធានាធិបតីអាមេរិក លោក Trump របស់អេមីរ៉ាតអារ៉ាប់រួម បានធ្វើឡើងយ៉ាងអធិកអធម និងខុសប្លែកពីប្រទេសនានា ។ ពេល ធ្វើដំណើរមកដល់ព្រះរាជវាំង Qasr Al Watan នៅទីក្រុង Abu Dhabi លោក Trump បានឃើញនារីស្លៀកពាក់ឈុតពណ៌ស មួយក្រុមឈរជាជួរគ្រវីសក់វែងទៅមក ។ នេះជាវប្បធម៌របស់បណ្តាប្រទេសនៅឈូងសមុទ្រពែក្ស (ឬឈូងសមុទ្រអារ៉ាប់) រួមមាន ៖ អេមីរ៉ាតអារ៉ាប់រួម អារ៉ាប៊ីសាអូឌីត គុយវ៉ែត អូម៉ង់ កាតា និងបារ៉ែន សម្រាប់ទទួលភ្ញៀវ ឬប្រើប្រាស់ក្នុងពិធីមង្គល ដូចជា ៖ ពិធីរៀបការ ។

អ្នកឃើញវីដេអូនឹងឆ្ងល់ថា ហេតុអ្វីអេមីរ៉ាតអារ៉ាប់រួម យកនារីក្មេងជាច្រើននាក់មកឈរគ្រវីសក់បែបនេះឱ្យលោក Trump មើល? ការគ្រវីសក់នេះហៅថា «ខាលិជិ» ដែលតម្រូវឱ្យនារីសក់វែងទាំងអស់ស្លៀកឈុតពណ៌ស និងគ្រវីសក់តាមចង្វាក់តន្ត្រី ។ តាមធម្មតា ការរាំ «ខាលិជិ» គឺនារីៗនឹងឈ្លៀតឈុតវែងពណ៌ស្រស់ឆើតឆាយ ប៉ុន្តែការទទួលស្វាគមន៍ប្រធានាធិបតីអាមេរិក នារីគ្រប់រូបត្រូវស្លៀកឈុតពណ៌ស ដើម្បីបង្ហាញពីសណ្តាប់ធ្នាប់ក្នុងពិធីផ្លូវការ ហើយមើលទៅលោក Trump ហាក់ពេញចិត្តនឹងការស្វាគមន៍របស់អេមីរ៉ាតអារ៉ាប់រួម ថែមទាំងសរសើរទៀតផង ។

វីដេអូក្រុមនារីសក់វែងគ្រវីសក់ឈរទទួលស្វាគមន៍លោក Trump នៅអេមីរ៉ាតអារ៉ាប់រួម បានល្បីល្បាញយ៉ាងខ្លាំងក្នុងបណ្តាញសង្គម ពីព្រោះជាការស្វាគមន៍មិនដូចប្រទេសនានា និងកម្រឃើញណាស់ ។ ប៉ុន្តែពលរដ្ឋរស់នៅបណ្តាប្រទេសឈូងសមុទ្រពែក្ស យល់ឃើញថា ការគ្រវីសក់បែបនេះមានភាពស្រស់ស្អាត ស្រដៀងនឹងរលកសមុទ្រ ហើយវាបង្ហាញពីការគោរពដល់ភ្ញៀវដែលមកបំពេញទស្សនកិច្ចនៅប្រទេសពួកគេ ។

វាជាការសម្តែងសិល្បៈរបស់អេមីរ៉ាតអារ៉ាប់រួម ដែលនារីៗនឹងស្លៀកសម្លៀកបំពាក់ប្រពៃណីឈរជាជួរ និងគ្រវីសក់វែងទៅមក ខណៈក្រុមបុរសសូត្រកំណាព្យជាចង្វាក់តន្ត្រី ។ រីឯអ្នកចូលរួមសម្តែងក្នុងពិធី គឺមិនប្រកាន់ភេទ វ័យ និងវណ្ណៈក្នុងសង្គមទេ ៕

ប្រទេសជប៉ុន ៖ អាកាសយានដ្ឋានមួយរបស់ជប៉ុនសម្រេចបានរយៈពេលជាង៣០ឆ្នាំយ៉ាងគួរឲ្យស្ញើចសរសើ ដោយមិនឲ្យបាត់បងវ៉ាលី កាបូប ឬកាតាបដាក់សម្ភារៈរបស់អ្នកដំណើរសូម្បីតែមួយ គិតចាប់តាំងពីឆ្នាំ១៩៩៤មក រហូតទទួលបានពានរង្វាន់ជាអាកាសយានដ្ឋានឆ្នើមមួយនៅលើពិភពលោក។

អាកាសយានដ្ឋានខាងលើនេះមានឈ្មោះថា Kansai មានទីតាំងនៅទីក្រុង Osaka ប្រទេសជប៉ុន បានបំបែកកំណត់ត្រាដ៏អស្ចារ្យមួយ គឺមិនដែលធ្វើឲ្យបាត់ឥវ៉ាន់ ឬវ៉ាលី របស់អ្នកដំណើរណាមួយឡើយក្នុងរយៈពេលជាង ៣ទសវត្សន៍ ចាប់តាំងពីបើដំណើរការដំបូងនៅក្នុងឆ្នាំ ១៩៩៤មក។

មូលហេតុដែលអាកាសយានដ្ឋាននេះអាចសម្រេចការងាររបស់ខ្លួនបានដោយមិនធ្វើឲ្យបាត់បង់របស់របររបស់ភ្ញៀវបែបនេះ គឺដោយសារប្រព័ន្ធគ្រប់គ្រងពីផ្នែកមួយទៅផ្នែកមួយដំណើរការយ៉ាងស៊ីចង្វាក់គ្នា ក្រោមការត្រួតពិនិត្យយ៉ាងហ្មត់ចត់ដូចជា ៖ មានបុគ្គលិកច្រើនចាំរាប់ និងត្រួតពិនិត្យសម្ភារៈជាច្រើនដងមុននឹងទទួល ឬប្រគល់ឲ្យភ្ញៀវ , កំណត់ពេលវេលាត្រឹមតែ ១៥នាទី ប៉ុណ្ណោះបន្ទាប់ពីយន្តហោះចុះចត ត្រូវប្រមូលឥវ៉ាន់ទាំងអស់មកត្រួតពិនិត្យ, បុគ្គលិកមានការយកចិត្តទុកដាក់ខ្ពស់ក្នុងការរៀបចំឥវ៉ាន់ទាំងអស់នោះ, មានសៀវភៅណែនាំ និងតែងធ្វើបច្ចុប្បន្នភាពជារឿយៗទៅតាមការលើកឡើងរបស់ភ្ញៀវ ឬបុគ្គលិក។

ការអនុវត្តការងារប្រកបដោយស្មារតីប្រុងប្រយ័ត្នខ្ពស់របស់អាកាសយានដ្ឋានខាងលើ បាននាំឲ្យពួកគេទទួលបានពានរង្វាន់ Skyrax សម្រាប់ «អាកាសយានដ្ឋានដែលមានប្រព័ន្ធគ្រប់គ្រងឥវ៉ាន់ល្អបំផុតក្នុងពិភពលោក» ចំនួន៨លើក។

លោក Tsuyoshi Habuta អ្នកគ្រប់គ្រងទូទៅប្រព័ន្ធដឹកឥវ៉ាន់ចេញចូលបាននិយាយថា ៖ «វាត្រូវតែជាការទទួលខុសត្រូវ និងការសហការជាក្រុម។ នៅពេលយន្តហោះបានចាកចេញបានទាន់ពេលវេលា និងមិនមានបញ្ហា ពួកយើងមានអារម្មណ៍ថាជោកជ័យបំផុត»។

បើតាមការសង្កេតរបស់មនុស្សជាច្រើនគេបានសន្និដ្ឋានថា ទាំងនេះគឺជាផ្នែកមួយនៃ Omotenashi ដែលជាវប្បធម៌របស់ជនជាតិជប៉ុន ក្នុងការផ្ដល់សេវាកម្មឲ្យបានលឿនរហ័ស និងបំពេញបំណងរបស់អតិថិជនមិនឲ្យខ្វះចន្លោះ។ ហើយនេះគឺជាគំរូដ៏ល្អមួយសម្រាប់ក្រុមហ៊ុន ឬស្ថាប័នផ្ដល់សេវាកម្មដទៃទៀតឲ្យយកតម្រាប់តាមអាកាសយានដ្ឋានមួយនេះ៕

បរទេស ៖ មនុស្សជាច្រើនបាននាំគ្នាងាកមកចាប់អារម្មណ៍នឹងអាជីពមួយដែលទទួលបានប្រាក់ចំណូលខ្ពស់ ថែមទាំងទទួលបានអាហារ និងទីកន្លែងស្នាក់នៅឥតគិតថ្លៃផងដែរ ការងារនោះគឺធ្វើជាម៉ែដោះរបស់សត្វខ្លាឃ្មុំនៅក្នុងសួនសត្វ។

ការងារជាម៉ែដោះរបស់ផេនដា កំពុងទាក់ទាញចំណាប់អារម្មណ៍របស់មនុស្សមនុស្សទូទៅជាខ្លាំង ព្រោះពួកគេនឹងអាចទទួលបានប្រាក់ចំណូលចាប់ពី 20,000 ដុល្លារ ទៅ70,000ដុល្លារឯណោះក្នុងមួយឆ្នាំ អាស្រ័យតាមបទពិសោធ និងជំនាញក្នុងការបំពេញតួនាទីរបស់បុគ្គលិកម្នាក់ៗ។ លើសពីនេះ វាមានការគួរឲ្យចាប់ខ្លាំងដោយសារ គេអាចស្និតស្នាលជាមួយសត្វខ្លាឃ្មុំផេនដាដ៏គួរឲ្យស្រលាញ់ផងដែរ។

ការងារនេះមានតែនៅតាមប្រទេសមួយចំនួនដែលមានសត្វខ្លាឃ្មុំផេនដាប៉ុណ្ណោះ។ ជាក់ស្ដែងវាមានច្រើននៅក្នុងប្រទេសចិន, សហរដ្ឋអាមេរិក, ជប៉ុន, អូស្រ្តាលី, និងអាល្លឺម៉ង់ជាដើម។ សម្រាប់ប្រទេសចិន មជ្ឈមណ្ឌលការពារ និងស្រាវជ្រាវសត្វខ្លាឃ្មុំផេនដា នឹងផ្ដល់ប្រាក់ថ្លៃកម្លាំងពលកម្មដល់បុគ្គលិកដែលមើលថែសត្វនេះប្រហែល 32,000ដុល្លារក្នុងមួយឆ្នាំ ឬស្មើ 2,600ដុល្លារជាងក្នុងមួយខែ។ ក្រៅពីនេះ ពួកគេក៏នឹងទទួលបានអាហារ ព្រមទាំងកន្លែងស្នាក់នៅដោយឥតគិតថ្លៃទៀតផង។

ដោយឡែកនៅក្នុងសហរដ្ឋអាមេរិកក៏មានសួនសត្វដែលមានខ្លាឃ្មុំផេនដានេះដែរ ហើយពួកគេផ្ដល់ប្រាក់បៀវត្សន៍ដល់អ្នកមើលថែផេនដាក្នុងម្នាក់ចាប់ពី 35,000ដុល្លារ ទៅ60,000ដុល្លារក្នុងមួយឆ្នាំ ឬស្មើជិត 3,000ដុល្លារក្នុងមួយខែ។ រីឯនៅសួនសត្វ San Francisco គេប្រទះឃើញមានស្លាកជ្រើសរើសបុគ្គលិកសម្រាប់មុខតំណែងជាជំនួយការអភិរក្សខ្លាឃ្មុំផេនដា ក្នុងអត្រាប្រាក់ខែចាប់ពី 67,000ដុល្លារ ទៅ 72,000ដុល្លារក្នុងមួយឆ្នាំ។

ក្រៅពីប្រទេសទាំង២ខាងលើ ប្រទេសផ្សេងៗទៀតក៏ផ្ដល់ប្រាក់ចំណូលខ្ពស់ដល់អ្នកថែផេនដាផងដែរ ដូចជាប្រទេសអូស្រ្តាលី ទទួលបាន 35,000ដុល្លារក្នុងមួយឆ្នាំ, ជប៉ុន ទទួលបាន38,000ដុល្លារក្នុងមួយឆ្នាំ, អាឡឺម៉ង់ ទទួលបាន33,000ដុល្លារក្នុងមួយឆ្នាំ និងប្រទេសឥណ្ឌា ទទួលបាន20,000ដុល្លារក្នុងមួយឆ្នាំ។

គួរជម្រាបថា បុគ្គលដែលអាចចូលធ្វើការងារផ្នែកនេះបានត្រូវទាមទារឲ្យមានការសិក្សាផ្នែកវិទ្យាសាស្រ្តសត្វ, ជីវវិទ្យា និងបរិស្ថាន មានបទពិសោធ៍មើលថៃសត្វកន្លងមក, មានសុខភាពមាំមួន, មានភាពបត់បែន និងជាពិសេសត្រូវមានក្ដីស្រលាញ់ចំពោះសត្វ។ ហើយការងារប្រចាំថ្ងៃនោះគឺ ការផ្ដល់ចំណីអោយពួកវា, ពិនិត្យសុខភាព និងសុវត្ថិភាព, ផ្ដល់អនាម័យ និងកំដរពួកវាលេងកម្សាន្តចៀសវាងភាពស្រ្តេស។

ក្រៅពីម៉ែដោះរបស់ខ្លាឃ្មុំផេនដា ក៏មានការងារមើលថែទាំសត្វប្រភេទដទៃផ្សេងទៀតដែលទទួលបានប្រាក់ចំណូលខ្ពស់ដូចគ្នា ដូចជាការមើលថែសត្វដែលជិតផុតពូជ, អ្នកបង្វឹកសត្វ, អ្នកជួយសង្រ្គោះសត្វព្រៃ និងអ្នកគ្រប់គ្រងសួនសត្វជាដើម។ ដោយឡែក បើទោះជាទទួលបានប្រាក់ខែខ្ពស់ពិតមែន ប៉ុន្តែភាគច្រើនបុគ្គលទាំងនោះគឺពេញចិត្តក្នុងបំពេញការងារនោះដោយស្ម័គ្រចិត្ត និងក្ដីស្រលាញ់ច្រើនជាង៕