ខេត្តព្រះសីហនុ មានកោះដ៏ស្រស់ស្អាតចំនួន៣២ ក្នុងនោះកោះពស់ គឺជាកោះដែលនៅជិតជាង ពោលមានមានចម្ងាយប្រហែល៨គីឡូម៉ែត្រពីរង្វង់មូលតោពីរ។
ការចូលទស្សនានៅលើកោះនេះ ហាក់មានការរឹតត្បិត ដោយមានពាក្យចចាមអារ៉ាមជាច្រើនលើកឡើងថា៖”កោះពស់ ត្រូវបានលក់ឱ្យមហាសេដ្ឋីរុស្សុីជាយូរណាស់មកហើយ”។
ដោយឡែកចំពោះ ស្ពានឆ្លងទៅលើកោះនេះ ធ្លាប់បានបិទច្រកទ្វារ មិនអនុញ្ញាតឱ្យប្រជាពលរដ្ឋធ្វើដំណើរឆ្លងកាត់អស់រយៈពេលជាច្រើនឆ្នាំមកហើយ ដែលធ្វើឱ្យសាធារណជន មានការថ្នាំងថ្នាក់ និងមិនពេញចិត្តមកលើរដ្ឋបាលខេត្ត។
លុះដល់ឆ្នាំ២០២០ រដ្ឋបាលបាលខេត្តព្រះសីហនុ បានសហការជាមួយក្រុមហ៊ុនកោះពស់ ខេមបូឌា អុីនវេសមិនគ្រុប អិលធីឌី បើកចរាចរណ៍ និងអនុញ្ញាតជូនពលរដ្ឋបានធ្វើដំណើរកម្សាន្តលើស្ពាននេះ។
មកទល់បច្ចុប្បន្ន នៅតែមានពាក្យចចាមអារ៉ាម លើកឡើងថា៖” ការធ្វើដំណើរទៅកម្សាន្តកោះពស់ នៅតែមិនអនុញ្ញាតឱ្យចូលទស្សនា ខណៈមូលហេតុនៅពីក្រោយបញ្ហានេះ មិនមាននរណាបញ្ជាក់ឱ្យច្បាស់នៅឡើយនោះទេ”៕
