សហរដ្ឋអាមេរិក និងរដ្ឋាភិបាលបណ្តោះអាសន្នរបស់ប្រទេសវេណេស៊ុយអេឡា បានព្រមព្រៀងគ្នាកាលពីថ្ងៃទី៥ ខែមីនា ឆ្នាំ២០២៦ ដើម្បីស្តារទំនាក់ទំនងការទូត និងកុងស៊ុលឡើងវិញយ៉ាងពេញលេញដើម្បីស្តារសេដ្ឋកិច្ច និងលើកកម្ពស់ស្ថិរភាព បន្ទាប់ពីប្រទេសទាំងពីរមានភាពតានតឹងនយោបាយអស់រយៈពេលជាច្រើនឆ្នាំ ដោយសារការផ្តាច់ទំនាក់ទំនងការទូតតាំងពីឆ្នាំ២០១៩ ។

កាលពីថ្ងៃទី៥ ខែមីនា ក្រសួងការបរទេសអាមេរិកប្រកាសថា អាមេរិក និងរដ្ឋាភិបាលបណ្តោះអាសន្នវេណេស៊ុយអេឡា បានព្រមព្រៀងគ្នាស្តារទំនាក់ទំនងការទូត និងកុងស៊ុលឡើងវិញ ។ វេណេស៊ុយអេឡាបានផ្តាច់ទំនាក់ទំនងការទូតជាមួយអាមេរិកតាំងពីខែមករា ឆ្នាំ២០១៩ មកម៉្លេះ ក្រោមហេតុផលអាមេរិកជ្រៀតជ្រៀតកិច្ចការផ្ទៃក្នុងរបស់វេណេស៊ុយអេឡាជាបន្តបន្ទាប់ ជាហេតុធ្វើឱ្យឈានទៅដកមន្ត្រីទូតទាំងអស់ចេញពីស្ថានទូតអាមេរិកនៅវេណេស៊ុយអេឡា នាខែមីនា ឆ្នាំ២០១៩ ។

នៅក្នុងសេចក្តីថ្លែងការណ៍ផ្លូវការរបស់ក្រសួងការបរទេសអាមេរិកបញ្ជាក់ថា ការស្តារទំនាក់ទំនងឡើងវិញនេះ នឹងជួយសម្របសម្រួលកិច្ចខិតខំប្រឹងប្រែងរួមគ្នាដើម្បីស្តារសេដ្ឋកិច្ច លើកកម្ពស់ស្ថិរភាព និងជំរុញការផ្សះផ្សានយោបាយនៅក្នុងប្រទេសវេណេស៊ុយអេឡា ។

កងកម្លាំងអាមេរិកបានបើកការវាយប្រហារវេណេស៊ុយអេឡាទ្រង់ទ្រាយធំ ព្រមទាំងចាប់ខ្លួនអតីតប្រធានាធិបតីវេណេស៊ុយអេឡា លោក Nicolas Maduro និងភរិយា បញ្ជូនទៅអាមេរិកកាលពីថ្ងៃទី៣ ខែមករា ឆ្នាំ២០២៦ ។ បន្ទាប់មក នៅថ្ងៃទី៣១ ខែមករា គណៈប្រតិភូការទូតអាមេរិកក៏បានធ្វើដំណើរទៅទីក្រុង Caracas របស់វេណេស៊ុយអេឡា ដើម្បីស្តារឡើងវិញនូវទំនាក់ទំនងការទូតរវាងប្រទេសទាំងពីរ ។

ចំណែករដ្ឋាភិបាលវេណេស៊ុយអេឡាបញ្ជាក់ថា បានសម្រេចស្តារទំនាក់ទំនងការទូត និងកុងស៊ុលជាមួយអាមេរិកម្តងទៀត បន្ទាប់ពីប្រទេសទាំងពីរបានចរចាការទូតជាបន្តបន្ទាប់ ហើយក៏ឯកភាពគ្នាស្តារទំនាក់ទំនងការទូត ។ យើងនឹងឈានទៅទំនាក់ទំនងទ្វេភាគីក្រោមគោលការណ៍គោរពគ្នាទៅវិញទៅមក, គោរពអធិបតេយ្យ និងកិច្ចសហការរវាងពលរដ្ឋ ។

ការស្តារទំនាក់ទំនងការទូតឡើងវិញនេះ ត្រូវបានគេមើលឃើញថា គឺជាចំណុចរបត់សំខាន់មួយនៃទំនាក់ទំនងរវាងអាមេរិក និងវេណេស៊ុយអេឡា ចាប់តាំងពីប្រទេសទាំងពីរបានផ្តាច់ទំនាក់ទំនងជាមួយគ្នាចាប់តាំងពីឆ្នាំ២០១៩ ។

គួរបញ្ជាក់ថា ក្រោយពីកងកម្លាំងអាមេរិកចាប់ខ្លួនអតីតប្រធានាធិបតីវេណេស៊ុយអេឡា តុលាការកំពូលវេណេស៊ុយអេឡាបានសម្រេចតែងតាំងលោកស្រី Delcy Rodríguez ឱ្យកាន់តំណែងជាប្រធានាធិបតីស្តីទី ។ បន្ទាប់មក លោកស្រីក៏ចាប់ផ្តើមបើកការចរចាជាមួយរដ្ឋាភិបាលអាមេរិកដើម្បីស្តារទំនាក់ទំនង ខណៈស្ថានទូតអាមេរិកនៅទីក្រុង Caracas ដែលបានបិទទ្វារតាំងពីឆ្នាំ២០១៩ ក៏បានបើកដំណើរការឡើងវិញ ៕

ខ្សែធំមិនធម្មតា! ខណៈដែលភាពតានតឹងនៅមជ្ឈិមបូព៌ាកាន់ឡើងកាន់តែខ្លាំងធ្វើឲ្យការដឹកជញ្ជូនរបស់ប្រទេសជាច្រើនត្រូវបានកាត់ផ្ដាច់ ចិនគឺជាប្រទេសតែមួយគត់ដែលទទួលបានការអនុញ្ញាតពីអ៊ីរ៉ង់ក្នុងការដឹកជញ្ជូនប្រេងឆ្លងកាត់តាមច្រកសមុទ្រ ហ័រមូស យ៉ាងសុវត្ថិភាពដោយគ្មានការបារម្ភ។ នេះបើតាមរបាយការណ៍ដែលចុះផ្សាយដោយ Bloomberg ។

ស្របពេលដែលកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បាននិយាយថា ពួកគេបានគ្រប់គ្រងផ្លូវទឹក ហើយបានព្រមានបា.ញ់កម្ទេចនាវានាប្រទេសណាក៏ដោយដែលព្យាយាមឆ្លងកាត់ច្រកសមុទ្រដោយមីស៊ីល មានរបាយការណ៍ផ្សេងទៀតបានបង្ហាញថា នាវាដឹកប្រេងរបស់ប្រទេសចិននៅតែអាចឆ្លងកាត់តំបន់នេះជាធម្មតា។ នេះបានបង្ហាញពីទំនាក់ទំនងជិតស្និទ្ធរបស់ទីក្រុងប៉េកាំងជាមួយទីក្រុងតេអេរ៉ង់ក្នុងអំឡុងពេលវិបត្តិក្នុងតំបន់ដែលកំពុងកើនឡើង។

គួរជម្រាបថា ច្រកសមុទ្រហ័រមូសគឺជាផ្លូវសមុទ្រដ៏សំខាន់បំផុតមួយរបស់ពិភពលោក ដែលដឹកជញ្ជូនប្រហែល 20% នៃការផ្គត់ផ្គង់ប្រេងជាសកលពីប្រទេសផលិតប្រេងសំខាន់ៗនៅឈូងសមុទ្រដូចជា អារ៉ាប៊ីសាអូឌីត អារ៉ាប់រួម គុយវ៉ែត អ៊ីរ៉ាក់ និងកាតាទៅកាន់ទីផ្សារអន្តរជាតិ។ ហេតុដូចនេះ ការរំខានណាមួយចំពោះការដឹកជញ្ជូននៅក្នុងផ្លូវដ៏សំខាន់នេះអាចបង្កឱ្យមានផលប៉ះពាល់យ៉ាងខ្លាំងចំពោះការផ្គត់ផ្គង់ថាមពល និងជំរុញឱ្យតម្លៃប្រេងសកលកើនឡើងកាន់តែខ្ពស់ប្រសិនបើការបង្អាក់អូសបន្លាយពេលកាន់តែយូរ។

ដោយសារមូលហេតុទាំងនេះហើយ ទើបប្រទេសចិនបានអំពាវនាវឱ្យមានភាពស្ងប់ស្ងាត់ និងជំរុញឱ្យគ្រប់ភាគីទាំងអស់ធានានូវការធ្វើនាវាចរណ៍ដោយសុវត្ថិភាពតាមផ្លូវទឹកជាចាំបាច់ ដោយសង្កត់ធ្ងន់ថា ស្ថិរភាពនៃការផ្គត់ផ្គង់ថាមពលសកលពឹងផ្អែកយ៉ាងខ្លាំងទៅលើលំហូរប្រេង និងឧស្ម័នដែលគ្មានការរំខានតាមរយៈច្រកសមុទ្រ។ ស្ថានភាពនៅតែបន្តត្រូវបានតាមដានយ៉ាងដិតដល់ ខណៈដែលភាពតានតឹងផ្នែកយោធានៅទូទាំងមជ្ឈិមបូព៌ាមិនត្រូវបានគេរំពឹងថានឹងធូរស្បើយក្នុងពេលឆាប់ៗនេះឡើយ៕

នៅខណៈដែលភាពតានតឹងផ្នែកភូមិសាស្ត្រនយោបាយកំពុងកើនឡើងកម្ដៅ ហើយតំបន់មជ្ឈិមបូព៌ាកំពុងជួបប្រទះនឹងអំពើហិង្សាយ៉ាងធ្ងន់ធ្ងរ រដ្ឋាភិបាលចិនបានប្រកាសពីការបង្កើនថវិកាសម្រាប់វិស័យការពារជាតិចំនួន 7% បន្ថែមទៀតនៅក្នុងឆ្នាំ 2026 ដើម្បីបន្តពង្រីកវិស័យយោធារបស់ខ្លួនជាលំដាប់ នៅក្នុងកាលៈទេសៈដែលពិភពលោកកំពុងស្ថិតក្នុងភាពមិនប្រាកដប្រជា។ នេះបើយោងតាមរបាយការណ៍ដែលចេញផ្សាយដោយ Reuters។

ថ្លែងនៅក្នុងអំឡុងពេលបើកកិច្ចប្រជុំសភាប្រចាំឆ្នាំ ដែលគេស្គាល់ថាជា “សម័យប្រជុំពីរ” របស់ប្រទេសចិន នៅថ្ងៃទី5 ខែមីនា លោក លី ឈៀង នាយករដ្ឋមន្រ្តីចិនបានបង្ហាញពីរបាយការណ៍របស់រដ្ឋាភិបាលថា នៅឆ្នាំ 2026 នេះ ប្រទេសចិននឹងបង្កើនការចំណាយចំនួន 7% ឬស្មើប្រហែល 276-277 ពាន់លានដុល្លារទៅលើវិស័យការពារជាតិ ដែលធ្វើឱ្យប្រទេសនេះក្លាយជាប្រទេសដែលចំណាយថវិការជាតិលើយោធាច្រើនជាងគេទីពីររបស់ពិភពលោកបន្ទាប់ពីសហរដ្ឋអាមេរិក។

តាមលោក លី ឈៀង ការចំណាយបន្ថែមនេះនឹងគាំទ្រដល់ការហ្វឹកហ្វឺនយោធា ការអភិវឌ្ឍអាវុធទំនើបៗ និងការកែលម្អការត្រៀមខ្លួនប្រយុទ្ធ ខណៈដែលប្រទេសចិនបន្តធ្វើទំនើបកម្មកងទ័ពរំដោះប្រជាជន។ កន្លងមកនេះប្រទេសចិនធ្លាប់បាននិយាយថា ការអភិវឌ្ឍវិស័យយោធារបស់ខ្លួនមានគោលបំណងដើម្បីតែការពារអធិបតេយ្យភាព និងសន្តិសុខជាតិប៉ុណ្ណោះ។

អ្នកវិភាគមួយចំនួនបាននិយាយថា ការបង្កើនការចំណាយនេះឆ្លុះបញ្ចាំងពីកិច្ចខិតខំប្រឹងប្រែងរបស់ប្រទេសចិនក្នុងការពង្រឹងសមត្ថភាពយោធារបស់ខ្លួន ខណៈពេលដែលកំពុងដោះស្រាយភាពតានតឹងកាន់តែខ្លាំងឡើងជាមួយសហរដ្ឋអាមេរិក និងជម្លោះនៅក្នុងតំបន់ដូចជាសមុទ្រចិនខាងត្បូង និងច្រកសមុទ្រតៃវ៉ាន់។

ទោះជាយ៉ាងណាក៏ដោយ ការកើនឡើងជាបន្តបន្ទាប់នៃការចំណាយលើវិស័យការពារជាតិរបស់ចិនដូចខាងលើនេះ កំពុងត្រូវបានតាមដានយ៉ាងដិតដល់ដោយប្រទេសជិតខាង និងមហាអំណាចពិភពលោក ដែលប្រទេសជាច្រើនមើលឃើញថាសមត្ថភាពយោធាដែលកំពុងពង្រីករបស់ទីក្រុងប៉េកាំងជាកត្តាមួយដែលកំណត់តុល្យភាពអំណាចនៅអាស៊ី៕

ផ្ទុះការចាប់អារម្មណ៍យ៉ាងខ្លាំងនៅលើអិនធើណេត! អតីតយុទ្ធជនកងម៉ារីនអាមេរិកម្នាក់ ត្រូវបានកម្លាំងសន្តិសុខច្រើននាក់នាំគ្នាអូសចេញពីបន្ទប់ប្រជុំភ្លាមៗ ក្រោយចិត្តធំហ៊ានក្រោកឈរស្រែកនៅកណ្ដាលហ្វូងមនុស្សដើម្បីបង្ហាញការតវ៉ារបស់ខ្លួនថា «អ៊ីស្រាអែលជាអ្នកបង្កសង្រ្គា.ម ហើយគ្មានទាហានអាមេរិកណាម្នាក់ចង់ប្រយុទ្ធដើម្បីអ៊ីស្រាអែលទេ»។ ការណ៍នេះកើតឡើងស្របពេលដែលសហរដ្ឋអាមេរិកកំពុងពួតដៃគ្នាជាមួយអ៊ីស្រាអែល ធ្វើសង្រ្គា.មកាច់បំបា.ក់កម្លាំងយោធាអ៊ីរ៉ង់យ៉ាងសា.ហាវព្រៃផ្សៃ។

យោងតាមវីដេអូដែលត្រូវគេបង្ហោះនៅលើបណ្ដាញសង្គមកាលពីថ្ងៃព្រហស្បត្តិ៍ ទី៥ ម្សិលមិញបានឲ្យដឹងថា លោក Brian McGinnis អតីតទាហានម៉ារីនអាមេរិក និងជាបេក្ខជននយោបាយមួយរូប បានក្រោកឈរឡើងក្នុងអំឡុងពេលស្តាប់សវនាការ ហើយរិះគន់ចំពោះសង្គ្រាមដែលកំពុងកើតមាននៅតំបន់មជ្ឈិមបូព៌ា ដោយស្រែកយ៉ាងខ្លាំងៗថាពលរដ្ឋអាមេរិកមិនចង់បញ្ជូនកូនៗដែលជាទាហានរបស់ពួកគេទៅប្រយុទ្ធក្នុងជម្លោះជំនួសប្រទេសផ្សេងទៀតទេ។

ហេតុការណ៍នេះបានកើតឡើងក្នុងអំឡុងពេលស្តាប់សវនាការរបស់ព្រឹទ្ធសភាអាមេរិកដែលបើកការពិភាក្សាអំពីការត្រៀមខ្លួនរបស់យោធា និងសង្គ្រាមដែលកំពុងបន្តដែលពាក់ព័ន្ធនឹងសហរដ្ឋអាមេរិក អ៊ីស្រាអែល ជាមួយនឹងអ៊ីរ៉ង់។ វីដេអូនៃហេតុការណ៍នេះបានបង្ហាញពីការប្រតាយប្រតប់គ្នាយ៉ាងរញ៉េរញ៉ៃ រហូតធ្វើឲ្យលោក McGinnis បា.ក់ថៃ ខណៈដែលមន្ត្រី និងប៉ូលីសជាច្រើននាក់បានព្យាយាមអូសគាត់ចេញពីបន្ទប់ប្រជុំ។

ហេតុការណ៍នេះបានបង្កឱ្យមានការជជែកវែកញែកនៅទូទាំងសហរដ្ឋអាមេរិកអំពីការប្រើប្រាស់កម្លាំងប្រឆាំងនឹងអ្នកតវ៉ានៅខាងក្នុងអគាររដ្ឋាភិបាល។ ទោះជាយ៉ាងណា ក្រុមអ្នកគាំទ្ររដ្ឋបាលលោក Donald Trump បាននិយាយថា ការដែលក្រុមប៉ូលីសចាប់បញ្ជូនលោក McGinnis ចេញពីអង្គប្រជុំបែបនេះ គឺដើម្បីស្តារសណ្តាប់ធ្នាប់ឡើងវិញតែប៉ុណ្ណោះ ព្រោះការក្រោកឈរនិងស្រែកតវ៉ារបស់គាត់បានធ្វើឲ្យប៉ះពាល់ដល់របៀបវិរៈដែលមានស្រាប់។

ទោះជាមានការបកស្រាយបែបនេះក្ដី ប៉ុន្តែក្រុមអ្នករិះគន់នៅតែអះអាងថា ការប្រឈមមុខដាក់គ្នានេះបង្ហាញពីភាពតានតឹងផ្នែកនយោបាយផ្ទៃក្នុងដែលកំពុងកើនឡើងជុំវិញរឿសង្គ្រាម និងការប្រឆាំងជាសាធារណៈចំពោះការចូលរួមរបស់សហរដ្ឋអាមេរិកនៅមជ្ឈិមបូព៌ា ជាពិសេសពាក់ព័ន្ធនឹងការគាំទ្រចំពោះអ៊ីស្រាអែលក្នុងការដាក់សម្ពាធលើអ៊ីរ៉ង់៕

ដ្រូនអត្តឃា.តរបស់អ៊ីរ៉ង់ចំនួន២គ្រឿងបានវាយប្រ.ហារអាកាសយានដ្ឋានអន្តរជាតិ Nakhchivan នៅទីក្រុង Nakhchivan ប្រទេសអាស៊ែបៃហ្សង់ដែលមានព្រំដែនជាប់អ៊ីរ៉ង់ កាលពីថ្ងៃទី៥ ខែមីនា ឆ្នាំ២០២៦ បណ្តាលឱ្យខូចខាតអគារអ្នកដំណើរ និងមនុស្សរងរបួស២នាក់ ។ នេះជាការកើនឡើងភាពតានតឹងក្នុងតំបន់ ដែលធ្វើឱ្យអាស៊ែបៃហ្សង់ថ្កោលទោ.សអ៊ីរ៉ង់បំពានច្បាប់អន្តរជាតិ និងប្រកាសរក្សាសិទ្ធិវាយប្រ.ហារតបតរវិញ ។

បន្ទាប់ពីអាមេរិក និងអ៊ីស្រាអែលរួមដៃគ្នាបើកការវាយប្រហារអ៊ីរ៉ង់កាលពីថ្ងៃទី២៨ ខែកុម្ភៈ ឆ្នាំ២០២៦ ធ្វើឱ្យអ៊ីរ៉ង់សងសឹកដោយកំណត់គោលដៅវាយប្រហារទៅកាន់ប្រទេសផ្សេងៗក្នុងតំបន់មជ្ឈិមបូព៌ាដែលមានមូលដ្ឋានកងទ័ពអាមេរិក រួមទាំងរាលដាលដល់ប្រទេសតួកគី ហើយចុងក្រោយ ក៏រាលដាលដល់ប្រទេសអាស៊ែបៃហ្សង់ ។

តាមការចុះផ្សាយរបស់សារព័ត៌មានបរទេស កាលពីវេលាម៉ោង១១ព្រឹក ថ្ងៃទី៥ ខែមីនា ដ្រូនអ៊ីរ៉ង់១គ្រឿងបានវាយប្រហារអាកាសយានដ្ឋានអន្តរជាតិ Nakhchivan នៅទីក្រុង Nakhchivan ប្រទេសអាស៊ែបៃហ្សង់ បណ្តាលឱ្យមនុស្ស២នាក់រងរបួស រីឯដ្រូន១គ្រឿងវាយប្រហារចម្ងាយប្រមាណ១គីឡូម៉ែត្រពីអាកាសយានដ្ឋាន ។ ក្រោយកើតហេតុ អាជ្ញាធរបានជម្លៀសគ្រូបង្រៀន និងកូនសិស្សចេញពីសាលារៀនជាច្រើនដែលមានទីតាំងនៅក្បែរអាកាសយានដ្ឋានអន្តរជាតិ Nakhchivan ដែលធ្វើឱ្យអាស៊ែបៃហ្សង់ព្រមានសងសឹក និងកោះហៅមន្ត្រីស្ថានទូតអ៊ីរ៉ង់មកស្រាយបំភ្លឺ ។

ចំណែកអ៊ីរ៉ង់បដិសេធថា ខ្លួនមិនបានវាយប្រហារចូលទឹកដីប្រទេសអាស៊ែបៃហ្សង់ទេ ខណៈការវាយប្រហារផ្សេងទៀតរបស់អ៊ីរ៉ង់រាលដាលទៅកាន់ប្រទេសផ្សេងៗក្នុងតំបន់ ដើម្បីសងសឹកប្រតិបត្តិការវាយប្រហារផ្លូវអាកាសរួមគ្នារបស់អាមេរិក និងអ៊ីស្រាអែល ដែលចាប់ផ្តើមកាលពីចុងខែកុម្ភៈ ។

តាមសេចក្តីថ្លែងការណ៍របស់ក្រសួងការបរទេសអាស៊ែបៃហ្សង់ ដ្រូនទាំង២គ្រឿងនេះត្រូវបានបញ្ជូនពីអ៊ីរ៉ង់មកកាន់ទីក្រុង Nakhchivan ប្រទេសអាស៊ែបៃហ្សង់ ។ ដ្រូន១គ្រឿងសំដៅមកកាន់អគារអ្នកដំណើរក្នុងអាកាសយានដ្ឋានអន្តរជាតិ Nakhchivan បណ្តាលឱ្យខូចខាតអគារ រីឯដ្រូន១គ្រឿងទៀតសំដៅមកកាន់សាលារៀននានាក្នុងភូមិឆេខារ៉ាបាត និងមានមនុស្សរងរបួស២នាក់ ។

បន្ទាប់មក អាស៊ែបៃហ្សង់បានអញ្ជើញមន្ត្រីស្ថានទូតអ៊ីរ៉ង់នៅទីក្រុង Baku មកស្រាយបំភ្លឺ និងតវ៉ាប្រឆាំងការវាយប្រហារនេះជាការរំលោ.ភបំពានលើបទដ្ឋាន និងគោលការណ៍ច្បាប់អន្តរជាតិ ព្រមទាំងបង្កើនភាពតានតឹងក្នុងតំបន់ ។ អាស៊ែបៃហ្សង់ប្រកាសរក្សាសិទ្ធិវាយប្រហារតបតរវិញ និងអំពាវនាវឱ្យសាធារណរដ្ឋអ៊ីស្លាមអ៊ីរ៉ង់បញ្ជាក់ពីហេតុការណ៍នេះឱ្យបានឆាប់ ហើយអាស៊ែបៃហ្សង់នឹងចាត់វិធានការបន្ទាន់ដើម្បីកុំឱ្យកើតហេតុការណ៍បែបនេះទៀត ។

គួរបញ្ជាក់ថា អ៊ីរ៉ង់បានវាយប្រហារដោយមីស៊ីល និងដ្រូនទៅកាន់ប្រទេសផ្សេងៗដែលមិនជាប់ពាក់ព័ន្ធជាមួយសង្គ្រា.មអ៊ីរ៉ង់ អាមេរិក និងអ៊ីស្រាអែល ។ កងឆ្មាំបដិវត្តន៍អ៊ីស្លាមអ៊ីរ៉ង់ប្រកាសធ្វើប្រតិបត្តិការកងទ័ពវាយប្រហារសងសឹកលើទីតាំងនានានៅអ៊ីស្រាអែល ព្រមទាំងមូលដ្ឋានកងទ័ពអាមេរិកនៅប្រទេសបារ៉ែន ហ្ស៊កដានី កាតា គុយវ៉ែត អារ៉ាប់រួម និងអារ៉ាប៊ីសាអូឌីត ហើយការវាយប្រហាររាលដាលដល់តួកគី និងអាស៊ែបៃហ្សង់ ៕

សង្គ្រា.មជាមួយប្រទេសអ៊ីរ៉ង់មិនទាន់បញ្ចប់ផង ពេលនេះ ប្រធានាធិបតីអាមេរិក លោក Donald Trump ព្រមានវាយប្រ.ហារប្រទេសគុយបាមួយទៀតបន្ទាប់ពីបញ្ចប់សង្គ្រា.មនៅតំបន់មជ្ឈិមបូព៌ា ដើម្បីផ្លាស់ប្តូររបបដឹកនាំរបស់គុយបា ដោយគ្រាន់តែរង់ចាំពេលវេលាមកដល់ប៉ុណ្ណោះ ។ លោកថា អាមេរិកដាក់សម្ពាធសេដ្ឋកិច្ច និងត្រៀមប្រើប្រាស់កម្លាំងកងទ័ពដើម្បីផ្តួលរំលំរបបកុម្មុយនិស្តគុយបា ដែលធ្វើឱ្យពិភពលោករង់ចាំមើលថា តើគុយបានឹងក្លាយជាគោលដៅវាយប្រ.ហារបន្ទាប់ដែរឬទេ?

តាមការចុះផ្សាយរបស់សារព័ត៌មានបរទេសនៅថ្ងៃទី៦ ខែមីនា ឆ្នាំ២០២៦ លោកប្រធានាធិបតី Trump បានប្រកាសនៅសេតវិមានថា គុយបា គឺជាគោលដៅដែលអាមេរិកត្រូវវាយប្រហារបន្តទៀតដើម្បីផ្តួលរំលំរបបកុម្មុយនិស្តបន្ទាប់ពីបញ្ចប់សង្គ្រាមនៅអ៊ីរ៉ង់ ហើយលោកបានសរសើររដ្ឋមន្ត្រីក្រសួងការបរទេសអាមេរិក លោក Marco Rubio ដែលបានដាក់សម្ពាធសេដ្ឋកិច្ចគុយបាយ៉ាងខ្លាំង ។

លោកប្រធានាធិបតី Trump បានប្រកាសយ៉ាងម៉ឺងម៉ាត់ថា ការផ្លាស់ប្តូរគ្រប់គ្រងនៅប្រទេសគុយបា គឺគ្រាន់តែរង់ចាំពេលវេលាប៉ុណ្ណោះ គឺការវាយប្រហារគុយបានឹងធ្វើឡើងភ្លាមៗបន្ទាប់ពីរដ្ឋាភិបាលអាមេរិកបញ្ចប់សង្គ្រាមជាមួយអ៊ីរ៉ង់ ។

ក្នុងពេលទទួលស្វាគមន៍ក្រុមបាល់ទាល់ Inter Miami នៅសេតវិមានកាលពីថ្ងៃទី៥ ខែមីនា កន្លងមក លោកប្រធានាធិបតី Trump បានអរគុណរដ្ឋមន្ត្រីក្រសួងការបរទេសអាមេរិក លោក Marco Rubio ដែលបំពេញតួនាទីយ៉ាងល្អក្នុងការដាក់ទណ្ឌកម្មសេដ្ឋកិច្ចគុយបា ដើម្បីដាក់សម្ពាធរដ្ឋាភិបាលកុម្មុយនិស្តឱ្យដួលរលំ ។

លោកថា ស្ថានការណ៍នៅប្រទេសគុយបាកំពុងតែដំណើរការតាមផែនការរបស់លោក ជាពិសេស បន្ទាប់ពីអាមេរិកបានឃុំខ្លួនលោក Nicolas Maduro ប្រធានាធិបតីវេណេស៊ុយអេឡា កាលពីថ្ងៃទី៣ ខែមករា ដែលធ្វើឱ្យប៉ះពាល់ដោយផ្ទាល់លើការនាំចេញប្រេងឥន្ធនៈពីវេណេស៊ុយអេឡា ដែលទ្រទ្រង់សេដ្ឋកិច្ចគុយបា ។ ការខ្វះខាតថាមពល និងធនធានយ៉ាងធ្ងន់ធ្ងរនេះធ្វើឱ្យលោកជឿថា គុយបាកំពុងជិតរលាយនាពេលឆាប់ៗ ដូច្នេះ អាមេរិកនឹងបញ្ចប់សង្គ្រាមជាមួយអ៊ីរ៉ង់សិន បន្ទាប់មក ដល់វេនគុយបា គ្រាន់តែរង់ចាំពេលវេលាប៉ុណ្ណោះ ។

មេដឹកនាំអាមេរិកក៏បានបង្ហាញពីទំនុកចិត្តលើសមត្ថភាពកងទ័ពអាមេរិកផងដែរ ព្រមទាំងលើកឡើងពីប្រតិបត្តិការ «Midnight Hammer» នៅអ៊ីរ៉ង់ថា កងកម្លាំងអាមេរិកអាចធ្វើប្រតិបត្តិការយ៉ាងមានប្រសិទ្ធភាព ហើយលោកមានផែនការប្រើប្រាស់ប្រតិបត្តិកងទ័ព «Midnight Hammer» នេះ ដើម្បីសម្រេចគោលដៅក្នុងការវាយប្រហារគុយបា ។

គួរបញ្ជាក់ថា គុយបា (Cuba) កំពុងតែប្រឈមនឹងការគ្មានអគ្គិសនីប្រើប្រាស់នៅទូទាំងប្រទេស ហើយប្រធានាធិបតីគុយបា លោក Miguel Díaz-Canel ត្រៀមខ្លួនចរចាជាមួយអាមេរិកគ្រប់ប្រធានបទ ប៉ុន្តែសំណូមពរអាមេរិកកុំដាក់សម្ពាធ ឬកំណត់លក្ខខណ្ឌ ៕