អ្នកជំនាញផ្នែកចំណីអាហារបានណែនាំឱ្យបរិភោគអាហារ និងផឹកភេសជ្ជៈ៥ប្រភេទនេះ ដើម្បីកុំឱ្យងងុយគេងពេលរសៀល ដោយពុំចាំបាច់ផឹកកាហ្វេដែលប្រឈមនឹងការញៀនកាហ្វេអ៊ីន ។ អាហារ និងភេសជ្ជៈទាំងនេះថែមទាំងផ្តល់នូវថាមពលដល់រាងកាយ និងល្អសម្រាប់សុខភាព ។

ការងងុយគេងពេលរសៀលជាបញ្ហាមួយដែលកើតឡើងលើមនុស្សភាគច្រើន មិនថាបណ្តាលមកពីការសម្រាកពុំគ្រប់គ្រាន់ ការបរិភោគអាហារ អាកាសធាតុ ផ្លូវចិត្ត ឬកត្តាផ្សេងៗ ទើបធ្វើឱ្យមនុស្សមួយចំនួនផឹកកាហ្វេកុំឱ្យងងុយគេង ។ ប៉ុន្តែបើចង់ចៀសវាងកាហ្វេអ៊ីន ឬចង់ទទួលបានថាមពលដល់រាងកាយ គួរតែបរិភោគអាហារ និងផឹកភេសជ្ជៈទាំងនេះ ។

១-ស៊ុត ៖ ស៊ុតផ្តល់នូវប្រូតេអ៊ីនខ្ពស់ដែលជួយឱ្យឆ្អែតបានយូរ និងរក្សាកម្រិតថាមពលថេរពេលរសៀល ។ ប្រូតេអ៊ីនក្នុងស៊ុតនឹងធ្វើឱ្យកម្រិតស្ករធ្លាក់ចុះ ក្រោយពេលផឹកកាហ្វេដាក់ស្ករច្រើន ។

២-ចេកអំបូង ៖ ចេកអំបូងសម្បូរកាបូអ៊ីដ្រាតធម្មជាតិ វីតាមីន និងសារធាតុរ៉ែ ជាពិសេស វាមានប៉ូតាស្យូមជួយដល់សាច់ដុំ និងប្រព័ន្ធប្រសាទ ។ រីឯស្ករក្នុងចេកអំបូងជាប្រភេទស្ករតែមួយដែលរាងកាយប្រើប្រាស់សម្រាប់ថាមពលយ៉ាងឆាប់រហ័ស ហើយវាស័ក្តិសមនៅពេលត្រូវការបង្កើនថាមពលបន្ទាន់ ថែមទាំងងាយដាក់តាមខ្លួន ។

៣-យ៉ៅអ៊ួគ្មានជាតិផ្អែម និងគ្រាប់សណ្តែក ៖ ប្រូតេអ៊ីនខ្ពស់ក្នុងយ៉ៅអ៊ួ និងកាបូអ៊ីដ្រាតមានជាតិសរសៃបានពីគ្រាប់សណ្តែកនឹងជួយឱ្យឆ្អែតបានយូរ មានកម្លាំងថាមពល រួមទាំងទទួលជាតិខ្លាញ់ល្អពីគ្រាប់សណ្តែកបានក្លាយជាជម្រើសល្អសម្រាប់សុខភាពពោះវៀន ។

៤-ទឹកធម្មតា ៖ ការខ្វះខាតជាតិទឹកតែបន្តិចបន្តួច គឺជាមូលហេតុចម្បងដែលបណ្តាលឱ្យនឿយហត់ និងខួរក្បាលមិនដំណើរការ ។ ការផឹកទឹកជាបន្តបន្ទាប់ពេញមួយថ្ងៃអាចជួយឱ្យរាងកាយស្រស់ថ្លា ខណៈសរីរាង្គផ្សេងៗដំណើរការបានល្អ ។

៥-តៃបៃតង ៖ តែបៃតងមានជាតិកាហ្វេអ៊ីនខ្លះ ប៉ុន្តែក្នុងបរិមាណតិចជាងកាហ្វេ រួមទាំងមាន L-Theanine គឺជាអាស៊ីតអាមីណូជួយឱ្យមានអារម្មណ៍ធូរស្រាល មានសមាធិ និងមិនធ្វើឱ្យញ័រខ្លួនដូចកាហ្វេ ។ ក្រៅពីនេះ តែបៃតងថែមទាំងមានសារធាតុប្រឆាំងនឹងអុកស៊ីតកម្មខ្ពស់ដែលល្អសម្រាប់សុខភាពទូទៅ ៕

ការឈ្លោះប្រកែកគ្នានៅពេលយប់មុនពេលចូលគេងតែងកើតមានជាញឹកញាប់ មិនថាសម្រាប់គូស្វាមីភរិយា ឬគូរស្នេហ៍ដែលជាសង្សានឹងគ្នាមួយចំនួនដោយជាធម្មតា វាធ្វើឲ្យយើងមានអារម្មណ៍ថាចង់សម្រេចចិត្តធ្វើអ្វីមួយជាបន្ទាន់ ទោះជាក្រោយមកមានរឿងអ្វីកើតឡើងក៏ដោយ។ អ្នកជំនាញយល់ថាវាជារឿងមិនត្រឹមត្រូវប៉ុន្មានឡើយ ព្រោះការសម្រេចចិត្តទាំងកំពុងខឹ.ងអាចធ្វើឲ្យយើងមានការសោ.កស្ដាយនៅពេលក្រោយ។

វេជ្ជបណ្ឌិត Samantha Rodman Whiten ដែលជាអ្នកចិត្តសាស្រ្តព្យាបាលនៅ Potomac រដ្ឋ Maryland សហរដ្ឋអាមេរិក បាននិយាយថា ៖ អារម្មណ៍ដែលចង់ដោះស្រាយជម្លោះមុនពេលចូលគេង គឺជារឿងធម្មតាជាពិសេសសម្រាប់មនុស្សដែលធំឡើងនៅក្នុងគ្រួសារមួយដែលតែងមានទំនាស់មិនឈប់ឈរ។ ចំណែក វេជ្ជបណ្ឌិត Sabrina Romanoff ដែលជាចិត្តវិទូនៅទីក្រុងញូវយ៉កបាននិយាយថា ៖ សម្រាប់អ្នកផ្សេងទៀត ទំនោរនេះគឺដោយសារតែសុភាសិតបុរាណមួយដែលលើកឡើងថា «អ្នកមិនគួរចូលគេងដោយកំហឹងនោះទេ ប្រសិនបើមានបញ្ហាចូរដោះស្រាយឲ្យហើយ» ប៉ុន្តែការធ្វើបែបនេះមិនទំនងជាទទួលបានផលគ្រប់ពេលនោះទេ។ ដូចនេះ អ្នកជំនាញផ្នែកចិត្តវិទ្យាមួយចំនួនបានបង្ហាញពីអត្ថប្រយោជន៍ចំនួន៥យ៉ាងដែលអ្នកនឹងទទួលបាន ប្រសិនបើអ្នកសម្រេចចិត្តចូលគេងទាំងខឹងដៃគូ។

១. ជួយរក្សាលំនឹងអារម្មណ៍ ៖ ការគេងអាចជួយឲ្យខួរក្បាលទទួលបានភាពស្ងប់ស្ងាត់ និងបំភ្លេចអារម្មតានតឹង។ ក្រោយភ្ញាក់ពីគេង មនុស្សដែលខឹងភាគច្រើននឹងត្រជាក់ចិត្ត និងអារម្មណ៍នឹងថឹងជាងមុន។
២. អាចផ្ដល់ការសម្រេចចិត្តល្អៗ ៖ ពេលវាលានឹងជួយឲ្យមនុស្សយល់កាន់តែច្បាស់ បន្ទាប់ពីការគេងអ្នកនឹងមានអារម្មណ៍ធូរស្បើយ ហើយធ្វើឲ្យយល់ថាបញ្ហាដែលកំពុងជួបប្រទះវាមិនធ្ងន់ធ្ងររហូតដល់គ្មានវិធីដោះស្រាយឡើយ ដូច្នេះអ្នកនឹងអាចរកដំណោះស្រាយបានល្អជាងមុន។
៣. ជួយបញ្ចៀសការប៉ះទង្គិចធ្ងន់ធ្ងរ ៖ ភាពនឿយហត់ និងអារម្មណ៍ដែលកំពុងខឹងនឹងធ្វើឲ្យជម្លោះកាន់តែបន្តវែងឆ្ងាយ ដូចនេះជម្រើសដ៏ល្អបំផុត គឹផ្អាកវាមួយឡែក និងចូលគេងសិន ស្អែកឡើងអាចធ្វើការជជែកជាថ្មីជាមួយនឹងគំនិតល្អ និងច្បាស់លាស់។
៤. ផ្ដល់ចន្លោះពេលវេលាឲ្យគ្នាទៅវិញទៅមក ៖ ការផ្អាកជម្លោះដោយការចូលគេង មិនមែនសុទ្ធតែជាការគេចវេសពីបញ្ហាឡើយ។ ផ្ទុយទៅវិញ វាបង្ហាញពីចំណងទំនាក់ទំនងរវាងដៃគូរថាមានភាពរឹងមាំ និងចាស់ទុំ នៅពេលភាគីទាំងពីរត្រឡប់មកដោះស្រាយវិញដោយចិត្តត្រជាក់។
៥. អាចដោះស្រាយបញ្ហាបានល្អ ៖ តាមបទពិសោធគូស្វាមីភរិយាវ័យចំណាស់ដែលរស់នៅជាមួយគ្នារាប់សិបឆ្នាំបានបង្ហើបថា អារម្មណ៍ធូរស្បើយបន្ទាប់ពីផ្ដល់ចន្លោះពេលវេលាឲ្យគ្នារួចនឹងនាំឲ្យខួរក្បាលគិតឃើញនូវរឿងរ៉ាវល្អៗ ហើយអាចត្រឡប់មកនិយាយគ្នាវិញ និងផ្អែមល្ហែមដូចដើម។

គួរបញ្ជាក់ថា ការចូលគេងទាំងកំពុងខឹ.ងគ្នា គួរតែជាការគេងដោយអារម្មណ៍បរិសុទ្ធ ដាក់ចុះកំហឹង នោះទើបអាចភ្ញាក់ឡើងមកជាមួយនឹងដំណោះស្រាយសមស្រប មិនមែនជាការគេចពីបញ្ហា ហើយយកវាទៅចងជាកំហឹងគុំគួន និងទុកសងសឹកដាក់គ្នាឡើយ។ ចំណេកចំណុចដែលបានរៀបរាប់ខាងលើសុទ្ធតែជាអត្ថប្រយោជន៍ដែលល្អសម្រាប់ទាំងសុខភាពផ្លូវកាយ និងផ្លូវចិត្ត ព្រមទាំងផ្សារភ្ជាប់ចំណងក្ដីស្រលាញ់ឲ្យកាន់តែមានភាពយូរអង្វែង ជាមួយសេចក្ដីថ្លៃថ្នូ និងការផ្ដល់តម្លៃឲ្យគ្នាទៅវិញទៅមក៕

រាជធានីភ្នំពេញ ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ ក.ក.ប នៃក្រសួងពាណិជ្ជកម្ម បានធ្វើការបញ្ជាក់ថា ឧបករណ៍ធ្វើតេស្តរហ័សដែលកំពុងមានការពេញល្បីមួយប្រភេទ ហើយមានពលរដ្ឋមួយចំនួននិយមប្រើតេស្តសារធាតុគីមីក្នុងបន្លែ និងផ្លែឈើនោះ មិនមានមុខងារស្វែងរកសារធាតុគីមី ហាមឃាត់ ឬអាចប្រើប្រាស់សម្រាប់វិភាគថ្នាំពុលកសិកម្ម សារធាតុពណ៌ហាមឃាត់ និងសារធាតុគីមីផ្សេងទៀតដូចដែលអ្នកលក់មួយចំនួនបានផ្សព្វផ្សាយនោះទេ។

បន្ទាប់ពីឃើញមានការចែករំលែកយ៉ាងទូលំទូលាយនៅលើបណ្ដាញសង្កមកាលពីថ្មីៗនេះ អំពីឧបករណ៍តេស្តរហ័សមួយប្រភេទ ថាអាចមានសមត្ថភាពវាស់ដឹងនូវសារធាតុគីមីហាមឃា.ត់ ឬសារធាតុពុលនានា ដែលមាននៅក្នុងបន្លែ សាច់ ផ្លែឈើ ក៏មានមនុស្សជាច្រើនបានចាប់អារម្មណ៍ទិញយកមកប្រើប្រាស់ ដើម្បីទុកពិនិត្យមើលពីកម្រិតសុវត្ថិភាពមុនពេលបរិភេទអាហារទាំងនោះ។

អគ្គនាយកដ្ឋាន ក.ក.ប បានធ្វើការបកស្រាយថា ឧបករណ៍តេស្តរហ័សនេះ គឺធ្វើការវាស់ដោយផ្ដោតតែលើកម្រិតសារធាតុគីមី «នីត្រាត» ដែលមាននៅក្នុង បន្លែ ផ្លែឈើ ត្រី និងសាច់ តែប៉ុណ្ណោះ។ មិនដូចអ្វីដែលបានលើកឡើងថា វាអាចវាស់ដឹងពីថ្នាំគីមីកសិកម្ម សារធាតុហាមឃា.ត់ ឬសារធាតុគីមីមួយចំនួនឡើយ។

ជាមួយគ្នាអគ្គនាយកដ្ឋាន ក.ក.ប. បានស្នើដល់អ្នកដែលចែកចាយ និងផ្សព្វផ្សាយពីការប្រើប្រាស់នៃឧបករណ៍មួយនេះ ត្រូវប្រកាន់ខ្ជាប់នូវការចែករំលែកព័ត៌មានពិត និងមុខងារប្រើប្រាស់របស់ឧបករណ៍នេះឲ្យបានត្រឹមត្រូវចៀសវាងមានការភាន់ច្រលំក្នុងប្រើប្រាស់។ ជាងនេះទៅទៀត អគ្គនាយកដ្ឋាន ក.ក.ប. ក៏នឹងចាត់វិធានការផ្លូវច្បាប់ ចំពោះការផ្សាយពាណិជ្ជកម្មគ្រប់ទម្រង់ ដែលមានលក្ខណៈជាការភូតកុហក បំភ្លៃការពិត ក្លែងបន្លំ ឬ ធ្វើឱ្យមានការភាន់ច្រឡំ ដល់សាធារណជន។

គួរជម្រាបផងដែរថា មួយរយៈចុងក្រោយដែលមានការលេចលឺអំពីព័ត៌ផ្លែឈើនាំចូលពីក្រៅស្រុកមួយចំនួនដែលមានផ្ទុកនៅវសារធាតុគីមី ក៏មាននូវការចេញលក់នូវឧបករណ៍ធ្វើតេស្តរហ័សមួយប្រភេទ ដែលគ្រាន់យកទៅដោតលើបន្លែ ផ្លែឈើនោះ វានឹងផ្ដល់សញ្ញាមកវិញថានៅលើបន្លែ ឬផ្លែឈើនោះមានផ្ទុកសារធាតុគីមីកម្រិតណាមកឲ្យយើងដឹងភ្លាមៗ។ ហើយបើឃើញលោតក្រហមមានន័យថាមានសារធាតុ«នីត្រាត» ដែលអាចបង្ករជំងឺមហារីកខ្ពស់ជាក់ជាមិនខាន៕