តារាសម្តែងចិន Zhan Xuan និយាយប្រាប់ហ្វេនត្រង់ៗកុំឱ្យទៅប្រទេសថៃព្រោះជាកន្លែងគ្រោះថ្នាក់

Zhan Xuan តួសម្តែងក្នុងរឿង BL «Revenged Love» បានធ្វើឱ្យមានប្រធានបទក្តៅគគុកបន្ទាប់ពីតារាសម្តែងចិនរូបនេះបាននិយាយប្រាប់ហ្វេនៗរបស់ខ្លួនកុំឱ្យទៅប្រទេសថៃព្រោះទីនោះគ្រោះថ្នាក់។ យ៉ាងណាពាក្យសម្តីនេះបានធ្វើឱ្យអ្នកគាំទ្រថៃឡាំបាខឹងតារាសម្តែងរូបនេះយ៉ាងខ្លាំងរហូតដល់ក្រុមហ៊ុនគ្រប់គ្រងចេញមកបញ្ជាក់។

កាលពីពេលថ្មីៗនេះមានវីដេអូមួយបានចែករំលែកនៅលើប្រព័ន្ធផ្សព្វផ្សាយសង្គមអំពីតារាសម្តែង Zhan Xuan ដែលចុងក្រោយនេះទទួលបានប្រជាប្រិយភាពក្នុងរឿង BL «Revenged Love» ខណៈតារាប្រុសរូបនេះកំពុងតែមានគម្រោងភាពយន្តបន្តទៀត។ ក្នុងវីដេអូបានបង្ហាញថាតារាប្រុសរូបនេះត្រូវបានហ្វេនៗចោមរោមជាច្រើននិងកំពុងទទួលអំណោយជាសំបុត្រពីហ្វេនៗយ៉ាងញាប់ដៃ។

ទោះយ៉ាងណា មានហ្វេនម្នាក់បាននិយាយដាក់ Zhan Xuan ថាជួបគ្នានៅប្រទេសថៃ ដោយសារតែតារាប្រុសរូបនឹងទៅចូលរួមកម្មវីធីមួយ។ ប៉ុន្តែ Zhan Xuan បានឆ្លើយតបទៅកាន់ហ្វេនរូបនោះវិញថា ទីនោះ(ប្រទេសថៃ) គ្រោះថ្នាក់ណាស់ សូមកុំទៅអី។ សម្តីរបស់តារាសម្តែងវ័យ២៨ឆ្នាំរូបនេះបានបង្កឱ្យមានភាពចម្រូងចម្រាស។ អ្នកគាំទ្រជនជាតិថៃបានប្រតិកម្មនិងខឹងសម្បារយ៉ាងខ្លាំងទៅកាន់តារាប្រុសរូបនេះ។

បន្ទាប់ពីទស្សនិកជនថៃ រិះគន់ចំពោះ Zhan Xuan ក្រុមហ៊ុនរបស់លោកបានចេញមកសូមទោសដោយបញ្ជាក់ថានេះគ្រាន់តែជាការយល់ច្រឡំប៉ុណ្ណោះ តារាប្រុសរូបនេះនិយាយទៅកាន់ហ្វេននារីៗកុំឱ្យទៅម្នាក់ឯងអីវាមានគ្រោះថ្នាក់។

គួរបញ្ជាក់ផងដែរថា កន្លងមកនេះមានតារាសម្តែង តារាម៉ូដែលចិន មួយចំនួនត្រូវបានចាញ់បោកគេតាមរយៈរូបភាពមកថតនៅប្រទេសថៃប៉ុន្តែត្រូវបានគេយកទៅជួរដូរនៅព្រំដែនថៃ-មីយ៉ាន់ម៉ា។ នេះអាចជាមូលហេតុដែលប្រជាជនចិននិងតារាសម្តែងចិនខ្លាចរអារពីប្រទេសថៃ៕