សហរដ្ឋអាមេរិក ៖ មហាសេដ្ឋីអាមេរិក និងជាម្ចាស់ក្រុមហ៊ុន Tesla លោក Elon Musk បានសម្រេចចិត្តលាឈប់ពីការងារទាំងអស់ក្នុងរដ្ឋាភិបាលអាមេរិករបស់លោកប្រធានាធិបតី Donald Trump នៅថ្ងៃទី៣០ ខែឧសភា ក្រោយពីលោកបានបានគ្រប់គ្រងក្រសួងប្រសិទ្ធភាពរដ្ឋាភិបាល (DOGE) រហូតបង្កបញ្ហាដល់ពលរដ្ឋអាមេរិក ប៉ុន្តែលោកនៅតែពុំអាចកាត់បន្ថយការចំណាយរបស់រដ្ឋាភិបាលតាមគោលដៅ ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី២៩ ខែឧសភា ឆ្នាំ២០២៥ ។

មន្ត្រីសេតវិមានម្នាក់បាននិយាយមកកាន់សារព័ត៌មាន Reuters កាលពីថ្ងៃទី២៨ ខែឧសភា ថា លោក Elon Musk នឹងដកខ្លួនចេញពីការងារទាំងអស់ក្នុងរដ្ឋាភិបាលអាមេរិក នៅចុងខែឧសភានេះ ។ លោក Elon Musk បានសរសេរក្នុងបណ្តាញសង្គម X នាពេលកន្លងមក ដោយលោកបានអរគុណលោកប្រធានាធិបតី Donald Trump ដែលឱ្យលោកបំពេញតួនាទីជាមន្ត្រីពិសេសរបស់រដ្ឋាភិបាល ដើម្បីគ្រប់គ្រងក្រសួងប្រសិទ្ធភាពរដ្ឋាភិបាល (DOGE) ។

លោក Elon Musk បានលាឈប់ពីការងារក្នុងរដ្ឋាភិបាលយ៉ាងឆាប់រហ័ស ដោយគ្មានការរៀបចំពិធីអ្វីទាំងអស់ ហើយលោកបានពុំជជែកជាផ្លូវការជាមួយលោក Trump មុនពេលលាឈប់ពីការងារទេ ដែលនេះគ្រាន់តែជាការសម្រេចចិត្តរួមគ្នារវាងលោក Elon Musk និងមន្ត្រីជាន់ខ្ពស់ប៉ុណ្ណោះ ។ ទោះជាការលាឈប់ពីនេះគ្មានភាពច្បាស់លាស់ ប៉ុន្តែលោកបានលាឈប់១ថ្ងៃ ក្រោយលោករិះគន់ច្បាប់ថវិកា «One Big Beautiful Bill» របស់លោក Trump ថា ចំណាយថវិកាច្រើនពេក ហើយច្បាប់នេះជាឧបសគ្គដល់ការធ្វើការរបស់លោកនៅក្រសួង DOGE ។

ពេលរកសំឡេងឆ្នោត លោក Elon Musk និយាយថា ក្រសួង DOGE នឹងអាចកាត់បន្ថយការចំណាយរបស់រដ្ឋាភិបាល យ៉ាងហោចណាស់ ២លានលានដុល្លារ និងអាចលុបចោលសិទ្ធិពិសេសការធ្វើការពីផ្ទះ (Work From Home) ក្នុងអំឡុងពេលជំងឺកូវីដ-១៩ ឆ្លងរាលដាល ។ ក្រៅពីនេះ លោកនឹងធ្វើឱ្យមន្ត្រីរាជការអាមេរិកលាឈប់ពីការងារដោយខ្លួនឯង ។

ប៉ុន្តែថ្មីៗនេះ លោក Elon Musk និយាយថា តួនាទីរបស់លោកក្នុងរដ្ឋាភិបាលនឹងឈានដល់ទីបញ្ចប់ឆាប់ៗ ហើយលោកខកចិត្តជាច្រើនលើក ដោយសារពុំអាចកាត់បន្ថយការចំណាយរបស់រដ្ឋាភិបាលតាមគោលដៅ ។ ការប្រជុំរបស់ក្រុមហ៊ុន Tesla កាលពីថ្ងៃទី២២ ខែមេសា កន្លងមក លោក Elon Musk បញ្ជាក់ថា នឹងកាត់បន្ថយតួនាទីយ៉ាងច្រើនក្នុងរដ្ឋាភិបាលដើម្បីត្រឡប់មកគ្រប់គ្រងការងារ Tesla ។

លោក Elon Musk បានបំពេញតួនាទីជាមន្ត្រីពិសេសរបស់រដ្ឋាភិបាលមេរិករយៈពេល១៣០ថ្ងៃ ដោយលោកនឹងឈប់ពីការងារទាំងអស់នៅថ្ងៃទី៣០ ខែឧសភា ។ រីឯមន្ត្រីរដ្ឋាភិបាលអាមេរិកបញ្ជាក់ថា ក្រសួង DOGE នៅតែមានភារកិច្ចរៀបចំរចនាសម្ព័ន្ធឡើងវិញ និងកាត់បន្ថយការចំណាយរបស់រដ្ឋាភិបាល ៕

ប្រទេសថៃ ៖ សារព័ត៌មាន Thairath រាយការណ៍ថា កងទ័ពថៃបានពង្រឹងកម្លាំងនៅបរិវេណព្រំដែនជាប់ប្រទេសកម្ពុជា ក្រោយពីមានការប៉ះទង្គិចដោយគ្រាប់កាំភ្លើ.ង ប្រមាណជាង១០នាទី រវាងកងទ័ពកម្ពុជា និងកងទ័ពថៃ កាលពីព្រឹកថ្ងៃទី២៨ ខែឧសភា ឆ្នាំ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ជាប់ខេត្តឧប៊ុនរ៉ាជធានី ប្រទេសថៃ ។ ការប៉ះទង្គិចនេះពុំបណ្តាលឱ្យកងទ័ពថៃណាម្នាក់រងរបួស និងស្លា.ប់ទេ បច្ចុប្បន្ន ស្ថានការណ៍ធូរស្រាលហើយ ដោយភាគីទាំងពីរនឹងចរចាគ្នា ។

លោកឧត្តមសេនីយ៍ទោ Winthai Suvaree អ្នកនាំពាក្យកងទ័ពជើងគោកថៃនិយាយថា បានទទួលសេចក្តីរាយការណ៍ពីកងទ័ពថៃ អំពីស្ថានការណ៍ប៉ះទង្គិចនៅបរិវេណព្រំដែនកម្ពុជា-ថៃ ក្នុងខេត្តឧប៊ុនរ៉ាជធានី កាលពីវេលាម៉ោង៥និង៣០នាទីព្រឹកថ្ងៃទី២៨ ខែឧសភា កន្លងមក ។

កងទ័ពថៃរាយការណ៍ថា កងទ័ពកម្ពុជាចូលមកពង្រាយកម្លាំងនៅតំបន់ដែលថៃអះអាងជាទឹកដីរបស់ខ្លួន ដោយពុំគោរពតាមកិច្ចព្រមព្រៀង ។ ដូច្នេះ ភាគីថៃក៏បញ្ជូនក្រុមសម្របសម្រួលដើម្បីចរចាជាមួយកម្ពុជាដូចដែលធ្លាប់អនុវត្តកន្លងមក ប៉ុន្តែពេលក្រុមសម្របសម្រួលថៃមកដល់តំបន់នោះ ស្រាប់តែកងទ័ពកម្ពុជាយល់ខុស ហើយចាប់ផ្តើមប្រើប្រាស់អាវុធមុន ទើបកងទ័ពថៃប្រើប្រាស់អាវុធវិញ ហើយការប៉ះទង្គិចនេះប្រព្រឹត្តទៅប្រមាណជាង១០នាទី ។

បន្ទាប់មក នៅវេលាម៉ោង៥និង៥៥នាទីថ្ងៃដដែល មេបញ្ជាការកងទ័ពកម្ពុជាបានទូរស័ព្ទមកកាន់លោកវរសេនីយ៍ឯក ប៊ុនសើម ប៊ុនបំរ៉ុង មេបញ្ជាការរងកងកម្លាំងសុរ៉ាណារីថៃ ដើម្បីឱ្យកងទ័ពកម្ពុជា និងថៃឈប់ប៉ះទង្គិចគ្នា ។ ហេតុនេះ ភាគីទាំងពីរក៏បានព្រមព្រៀងឈប់បាញ់ និងរក្សាភាពស្ងៀមស្ងាត់ក្នុងតំបន់ ។

ភាគីទាំងពីរនឹងចរចារកដំណោះស្រាយបញ្ហានៅតំបន់នេះ និងកំណត់គោលការណ៍អនុវត្តដោយសន្តិវិធីយោងតាមកិច្ចព្រមព្រៀងដែលមានស្រាប់ ។ កងទ័ពជើងគោកថៃបញ្ជាក់ថា កងទ័ពថៃមានសុវត្ថិភាព គ្មានកងទ័ពថៃណាម្នាក់រងរបួស ឬស្លាប់ក្នុងហេតុការណ៍ប៉ះទង្គិចជាមួយកងទ័ពកម្ពុជាទេ ហើយកងទ័ពថៃនឹងរាយការណ៍ស្ថានការណ៍បន្ថែមដើម្បីឱ្យពលរដ្ឋជ្រាប ។

តាមការចុះផ្សាយរបស់សារព័ត៌មានថៃ គឺប្រទេសកម្ពុជា និងថៃ មានជម្លោះទឹកដីជាយូរមកហើយ ជាពិសេស នៅបរិវេណជុំវិញប្រាសាទព្រះវិហារ ដែលត្រូវបានចុះបញ្ជីជាបេតិកភណ្ឌពិភពលោកដោយអង្គការយូណេស្កូ កាលពីឆ្នាំ២០០៨ ហើយតុលាការយុត្តិធម៌អន្តរជាតិនៃអង្គការសហប្រជាជាតិបានប្រគល់អធិបតេយ្យភាពតំបន់នេះទៅឱ្យកម្ពុជា ៕

សហរដ្ឋអាមេរិក ៖ នៅក្នុងសំណើរសន្តិសុខសំខាន់មួយ ដែលប្រទេសកាណាដាចង់ចូលរួមជាផ្នែកមួយក្នុងគម្រោងខែលមេឃាដ៏អស្ចារ្យ «The Golden Dome»របស់សហរដ្ឋអាមេរិក លោកDonald Trump បានលើកសំណើរពីរឲ្យប្រទេសកាណាដើម្បីជ្រើស ដោយទី១ កាណាដាត្រូវបង់ប្រាក់ចំនួន ៦១ពាន់លានដុល្លា និងទី២ កាណាដាត្រូវប្រគល់ប្រទេសខ្លួនឲ្យស្ថិតនៅក្នុងចំណុះជារដ្ឋទី៥១ របស់អាមេរិក ទើបអាចចូលក្នុងគម្រោងខាងលើបាន។

យោងតាមសារព័ត៌មានបរទេស បានឲ្យដឹងថា កាលពីថ្ងៃទី២៧ខែឧសភាឆ្នាំ២០២៥ ប្រធានាធិបតីអាមេរិកលោក Donald Trump បានបង្ហាញចំណាប់របស់ខ្លួនសារជាថ្មីម្ដងទៀត អំពីការចង់ឲ្យប្រទេសកាណាដាព្រមចូលខ្លួនមកធ្វើជារដ្ឋទី៥១ របស់អាមេរិក ទាំងដែលកាលពីកន្លងទៅថ្មីៗនេះសំណើររបស់លោកត្រូវបានខាងកាណាដាច្រានចោលម្ដងរួចមកហើយ។ នៅពេលបំពេញទស្សនកិច្ចនៅសេតវិមានកាលពីដើមខែនេះ នាយករដ្ឋមន្ត្រីកាណាដា លោក Mark Carney បាននិយាយថា ប្រទេសកាណាដាមិនមែនសម្រាប់លក់ទេ។

លោក Trump បានបង្ហោះនៅលើបណ្តាញសង្គម Truth Social ថា ៖ លោកបានប្រាប់កាណាដារួចហើយ បើចង់ក្លាយជាផ្នែកមួយនៃប្រព័ន្ធ Golden Dome ដ៏អស្ចារ្យរបស់អាមេរិក ប៉ុន្តែពួកគេចង់នៅជាប្រទេសដាច់ដោយឡែក នោះពួកនឹងត្រូវចំណាយអស់ប្រាក់ចំនួន ៦១ ពាន់លានដុល្លារមកឲ្យអាមេរិក ។ ប៉ុន្តែអាមេរិកនឹងមិនយកប្រាក់ពីកាណាដាទេ ប្រសិនបើកាណាដាព្រមក្លាយខ្លួនជារដ្ឋទី ៥១ របស់អាមេរិក។

ទោះជាយ៉ាងណា មិនមានការឆ្លើយតបពីកាណាដា ចំពោះការអះអាងរបស់លោកTrumpនោះទេ។ ប៉ុន្តែលោក Trump បានគូសបញ្ជាក់ថា កាណាដាកំពុងពិចារណាលើការផ្តល់ជូននេះ។

គួរជម្រាបជូនថា លោកត្រាំបានប្រកាសពីផែនការកសាងខែលមេឃា ដែលជាប្រព័ន្ធការពារមីស៊ីល Golden Dome ដ៏ធំសម្បើមកាលពីមួយសប្តាហ៍មុន។ គម្រោងនេះត្រូវបានគេរំពឹងថានឹងចំណាយទឹកប្រាក់ប្រហែល ១៧៥ ពាន់លានដុល្លារ និងបញ្ចប់ការសាងសង់និងអាចប្រើប្រាស់បាន នៅចុងអាណត្តិរបស់លោកត្រាំនាឆ្នាំ២០២៩ខាងមុខ។ តែអ្នកជំនាញនិយាយថា គ្រោងការណ៍នេះ ប្រឈមមុខនឹងបញ្ហាបច្ចេកទេស និងនយោបាយដ៏ធំ ច្រើនជាងអ្វីដែលលោក Trump បានគិតទុក។

ចំណែកឯកាលពីប្រកាសនូវគម្រោងនេះ ប្រទេសកាណាដា បានបង្ហាញចំណាប់អារម្មណ៍របស់ខ្លួនក្នុងការចូលរួមជាមួយប្រព័ន្ធការពារមីស៊ីលនេះដែរ។ នាយករដ្ឋមន្ត្រីកាណាដា លោក Mark Carney បានបញ្ជាក់ថា ប្រទេសរបស់លោកបានជួបពិភាក្សាកម្រិតខ្ពស់ លើបញ្ហានេះជាមួយអាមេរិក។ ប៉ុន្តែលោកបានជំទាស់ ចំពោះការអំពាវនាវរបស់លោកត្រាំ ដែលចង់ឱ្យប្រទេសកាណាដាប្រែទៅជាផ្នែកមួយរបស់សហរដ្ឋអាមេរិក៕

ប្រទេសថៃ ៖ កាលពីវេលាម៉ោង៥និង៣០នាទីព្រឹកថ្ងៃទី២៩ ខែឧសភា ឆ្នាំ២០២៥ ភ្លើងបានឆាបឆេះទូកប្រណីតសម្រាប់ដឹកភ្ញៀវទេសចរ ចំនួន២គ្រឿង ដែលកំពុងចតស្ងៀមនៅបរិវេណមុខសណ្ឋាគារ Anantara Riverside តាមដងទន្លេចៅប្រាយ៉ា ក្នុងតំបន់ថាន់បុរី ទីក្រុងបាងកក ។ បន្តិចក្រោយមក ភ្នាក់ងារសង្គ្រោះក៏បានធ្វើដំណើរមកដល់កន្លែងកើតហេតុ និងជួយគ្នាបា.ញ់ទឹកពន្លត់ភ្លើង ។

សមត្ថកិច្ចបានទំនាក់ទំនងទៅភ្នាក់ងារពន្លត់ភ្លើង ក្រុមប្រតិបត្តិការពិសេស និងភ្នាក់ងារសង្គ្រោះផ្លូវទឹក មកជួយបាញ់ទឹកពន្លត់រហូតដល់១ម៉ោង ដើម្បីការពារកុំឱ្យភ្លើងឆេះរាលដាលទៅកន្លែងក្បែរៗបង្កឱ្យខូចខាតកាន់តែខ្លាំង ។ ហេតុការណ៍នេះពុំបណ្តាលឱ្យភ្ញៀវទេសចរណាម្នាក់រងរបួស ឬស្លាប់ទេ រីឯមូលហេតុភ្លើងឆេះ គឺសមត្ថកិច្ចកំពុងស៊ើបអង្កេត ។

បន្ទាប់មក នៅវេលាម៉ោង៦និង៥៣នាទី ភ្នាក់ងារពន្លត់ភ្លើងអាចពន្លត់ភ្លើងឆេះទូកទេសចរណ៍ទាំង២គ្រឿងបានមួយភាគធំ ប៉ុន្តែទូក១គ្រឿងលិចទៅក្នុងទន្លេចៅប្រាយ៉ា ។ រីឯទូក១គឿងទៀត ភ្នាក់ងារបានបូមទឹកចេញដើម្បីកុំឱ្យលិច ប៉ុន្តែភ្នាក់ងារបារម្ភពីភ្លើងឆេះទូកឡើងវិញ ដោយសារនៅបរិវេណខាងចុងទូកមានប្រេងឥន្ធនៈ ។ នៅថ្ងៃដដែលនេះ ពុំទាន់មានសេចក្តីរាយការណ៍ពីការខូចខាតទ្រព្យសម្បត្តិទេ ហើយភ្នាក់ងារណែនាំឱ្យពលរដ្ឋដែលធ្វើដំណើរឆ្លងកាត់បរិវេណនេះប្រុងប្រយ័ត្ន ។

តាមការត្រួតពិនិត្យទូកទាំង២គ្រឿងនេះ គឺជាទូកទេសចរណ៍ដ៏ប្រណីតសម្រាប់ដឹកភ្ញៀវទេសចរ ដែលបានចតក្បែរគ្នានៅមាត់ទន្លេចៅប្រាយ៉ា ហើយនៅសុខៗ ស្រាប់តែមានភ្លើងឆេះទូក១គ្រឿង ហើយភ្លើងក៏ឆេះរាលដាលទៅទូក១គ្រឿងទៀត ។ នៅពេលកើតហេតុ គ្មានភ្ញៀវទេសចរណាម្នាក់នៅលើទូកទេ ទើបគ្មានអ្នករងរបួស ឬស្លាប់ ហើយសមត្ថកិច្ចបានទំនាក់ទំនងទៅកាន់សន្តិសុខយាមសណ្ឋាគារ ដើម្បីសាកសួរពីមូលហេតុភ្លើងឆេះទូក ។

គួរបញ្ជាក់ថា ទូកដែលឆេះនេះអាចដឹកភ្ញៀវទេសចរប្រមាណ១០នាក់ ដែលចង់អង្គុយបរិភោគអាហារលើទូក និងគយគន់ទិដ្ឋភាពសងខាងទន្លេចៅប្រាយ៉ា ។ សណ្ឋាគារល្បីៗនៅប្រទេសថៃនិយមទាក់ទងទូកទេសចរណ៍ប្រណីតៗសម្រាប់ដឹកភ្ញៀវទេសចរដែលសម្រាកក្នុងសណ្ឋាគារទៅលំហែលើផ្ទៃទឹក ៕