ប្រទេសថៃ ៖ រាជធានីបាងកកនៃប្រទេសថៃទំនងជាជួបប្រទះការក្លែងបន្លំបើប្រៀបធៀបទៅនឹងទីក្រុងធំៗដូចជា San Francisco, Dublin, Seoul, Budapest និង Edinburgh ដែលទទួលបានការរាយការណ៍ពីអត្រាក្លែងបន្លំទាបគួរឱ្យកត់សម្គាល់ ។ នេះបើយោងតាមការចុះផ្សាយរបស់សារព័ត៌មានថៃ The Nation ផ្អែកលើរបាយការណ៍ដែលទទួលបានពី Mastercard Economics ។

បើតាមរបាយការណ៍ដែលគ្របដណ្តប់ទូទៅដោយ CNBC បានគូសបញ្ជាក់ថា ៖ ឧស្សាហកម្មទេសចរណ៍ជាវិស័យមួយដែលងាយរងគ្រោះបំផុតចំពោះសកម្មភាពក្លែងបន្លំ និងបោ.កប្រាស់។ បញ្ហាជាមួយសេវាកម្មតាក់ស៊ី ការជួលយានជំនិះ ការទិញទំនិញ និងការក្លែងបន្លំតម្លៃ គឺមានច្រើនបំផុតនៅប្រទេសថៃ។ គេបានបន្ថែមទៀតថា ការក្លែងបន្លំភ្ញៀវទេសចរ បានកើនឡើងច្រើនជាង 18% នៅរដូវក្តៅដ៏ពេញនិយម និង 28% ក្នុងអំឡុងពេលរដូវត្រជាក់ដែលមានទេសចរមកកម្សាន្តច្រើន ជាពិសេសនៅក្នុងទីក្រុងបាងកក។

នៅក្នុងរបាយការណ៍ខាងលើបានបង្ហាញថា “គោលដៅមួយចំនួន ដែលអ្នកអាចជួបប្រទះនឹងការក្លែងបន្លំភាគច្រើនមានប្រភពចេញពីវិស័យទេសចរណ៍ និងក្រុមហ៊ុនទេសចរណ៍ ខណៈពេលដែលនៅក្នុងទីក្រុងផ្សេងទៀត ការក្លែងបន្លំអាចកើតឡើងនៅក្នុងអាជីវកម្មដទៃទៀតរួមទាំងសេវាកម្មម្ហូបអាហារជាដើម។ ឧទាហរណ៍ជាក់ស្ដែង នៅទីក្រុង Los Angeles ដែលយើងបានរកឃើញថា អាជីវកម្មម្ហូបអាហារគឺជាប្រភពដ៏ធំបំផុតនៃការក្លែងបន្លំ។” របាយការណ៍នេះក៏បានលើកឡើងជាពិសេសថា Phuket (ប្រទេសថៃ) និង Antalya (ប្រទេសតួគី) សម្បូរដោយសកម្មភាពក្លែងបន្លំទាក់ទងនឹងការកក់សណ្ឋាគារ។

ទិន្នន័យរបស់ Mastercard ដដែលនេះបានបង្ហាញដែរថា មានអ្នកធ្វើដំណើរដែលបានរាយការណ៍អំពី ការក្លែងបន្លំតម្លៃនៅ San Francisco (សហរដ្ឋអាមេរិក), Dublin (អៀរឡង់), សេអ៊ូល (កូរ៉េខាងត្បូង), Budapest (សាធារណរដ្ឋឆេក) និង Edinburgh (ស្កុតឡែន) គឺមានកម្រិតទាបជាងគេ បើប្រៀបធៀបទៅនឹងទីក្រុងផ្សេងធំៗទៀត។

ផ្ទុយទៅវិញ នៅទីក្រុង Cancun (ម៉ិកស៊ិក) ហាណូយ (វៀតណាម) ដាកា (បង់ក្លាដែស) និងបាងកក (ថៃ) ទំនងជាជួបប្រទះនឹងសកម្មភាពក្លែងបន្លំ និងការឆបោ.កខ្ពស់។ និន្នាការគួរឱ្យព្រួយបារម្ភនេះត្រូវបានធ្វើឱ្យកាន់តែធ្ងន់ធ្ងរឡើង ដែលធ្វើឲ្យវិស័យទេសចរណ៍នៅក្នុងប្រទេសថៃ ជួបប្រទះនឹងបញ្ហាកក្លែងបន្លំខ្ពស់ជាងវិស័យផ្សេងរហូតដល់ទៅ ៤ដង គិតត្រឹមឆ្នាំ២០២៤។

ធម្មជាតិនៃការបោកប្រាស់ក៏ខុសគ្នាទៅតាមទីតាំងផងដែរ។ ជាក់ស្ដែង បញ្ហាជាមួយតាក់ស៊ី និងការជួលរថយន្តមានត្រឹមតែ 2% នៃករណីក្លែងបន្លំដែលបានរាយការណ៍នៅក្នុងទីក្រុងហុងកុង និងបាសេឡូណា។

ទោះជាយ៉ាងណាក៏ដោយ តួលេខនេះបានកើនឡើងដល់ 66% នៅទីក្រុងហ្សាកាតា ប្រទេសឥណ្ឌូនេស៊ី ហើយដូចដែលបានកត់សម្គាល់ 48% នៅទីក្រុងបាងកក ដែលបង្ហាញពីបញ្ហាប្រឈមជាក់លាក់ចំពោះភ្ញៀវទេសចរទៅលេងប្រទេសថៃ៕

ប្រទេសថៃ ៖ កាលពីថ្ងៃទី២៧ ខែឧសភា ឆ្នាំ២០២៥ សមត្ថកិច្ចថៃបានចុះឆែកឆេរទីតាំងផលិតស្ករសក្លែងក្លាយ ចំនួន២កន្លែង ដែលបានផលិតស្ករសរុបស្មើ៤តោន បិទស្លាកសញ្ញា «Cristalla» ហើយក្រោយការពិនិត្យឃើញថា ស្ករសក្លែងក្លាយទាំងនេះបានចែកចាយលក់ទៅកាន់ទីផ្សារជាច្រើនកន្លែង ។ សមត្ថកិច្ចបារម្ភពីផលប៉ះពាល់សុខភាពពលរដ្ឋ ពីព្រោះអ្នកផលិតបានយកស្ករសម្រាប់ប្រើប្រាស់ផលិតចំណីសត្វ មកលក់ឱ្យអតិថិជន និងច្រកក្នុងការ៉ុងគ្មានអនាម័យ ។

ជំហ៊ានដំបូង សមត្ថកិច្ចបានឆែកឆេរទីតាំងផលិតស្ករសក្លែងក្លាយនៅខេត្តណាខនប៉ាធុម និងរឹបអូសស្ករស បិទស្លាកសញ្ញា «Cristalla» ចំនួន៨០ការ៉ុង ដែល១ការ៉ុងស្មើ៥០គីឡូក្រាម សរុបស្មើ៤,០០០គីឡូក្រាម ។ ក្រៅពីនេះ សមត្ថកិច្ចរកឃើញថា ការ៉ុងច្រកស្ករសក្លែងក្លាយមានសភាពកខ្វក់ គ្មានអនាម័យ និងគ្មានផ្លាស្ទិកការពារសំណើម ហើយសមត្ថកិច្ចបានប្រមូលសម្ភារៈផ្សេងៗក្នុងទីតាំងផលិតស្ករទាំងអស់សម្រាប់ធ្វើជាវត្ថុតាង ។

សមត្ថកិច្ចក៏បានចុះឆែកឆេរទីតាំងផលិតស្ករសក្លែងក្លាយមួយកន្លែងទៀតនៅស្រុកមឿងរ៉ាជបុរី ខេត្តរ៉ាជបុរី ដែលមានលោក ណាតាវុធ អាយុ៤៣ឆ្នាំ ជាម្ចាស់ទីតាំង ។ ក្រោយត្រួតពិនិត្យរួច សមត្ថកិច្ចបានរឹបអូសការ៉ុងស្ករស បិទស្លាកសញ្ញា «Cristalla» ដែលសល់ពីការផលិតចំនួន១៨ការ៉ុង ហើយការ៉ុងទាំងនេះ គឺដូចគ្នានឹងការ៉ុងច្រកស្ករសក្លែងក្លាយដែលសមត្ថកិច្ចរឹបអូសនៅខេត្តណាខនប៉ាធុម ។

លោក ណាតាវុធ ម្ចាស់ទីតាំងផលិតស្ករសក្លែងក្លាយនៅខេត្តរ៉ាជបុរី សារភាពថា បានផលិតស្ករសក្លែងក្លាយបិទស្លាក «Cristalla» និងលក់ចែកចាយទៅកាន់ទីផ្សារនានា ។ ស្ករស ដែលយកមកលក់ គឺលោកបានទៅសុំដេញថ្លៃស្ករសពណ៌ក្រហមគ្មានគុណភាព (សម្រាប់ប្រើប្រាស់ក្នុងការផលិតចំណីសត្វ) ចំនួន៣ម៉ឺនគីឡូក្រាម ហើយស្ករ១គីឡូក្រាម តម្លៃត្រឹមតែ៨.៥០បាត ។ រីឯការ៉ុងសម្រាប់ច្រកស្ករស គឺលោកបានទៅទិញការ៉ុងគ្មានស្តង់ដារពីរោងចក្រ ហើយឱ្យកម្មករច្រកស្ករសក្នុងការ៉ុងដោយដៃ ។ បន្ទាប់មក លក់ចេញស្ករនេះក្នុង១គីឡូក្រាម តម្លៃ១២បាត ឬ១ការ៉ុង តម្លៃ៦០០បាត ដោយមានឈ្មួញកណ្តាលមកទទួលទិញយកទៅលក់បន្ត ។

ក្រោយមក សមត្ថកិច្ចក៏ចាប់ខ្លួនលោក ណាតាវុធ បញ្ជូនទៅការិយាល័យស៊ើបអង្កេតដើម្បីចាត់វិធានការបន្តពីបទល្មើសនឹងច្បាប់ស្តីពីការផលិត និងចែកចាយអាហារក្លែងក្លាយ ដែលជនល្មើសអាចជាប់ពន្ធនាគារ ចាប់ពី៦ខែ រហូតដល់១០ឆ្នាំ និងត្រូវបង់ប្រាក់ពិន័យ ចាប់ពី៥ពាន់បាត រហូតដល់១សែនបាត ៕

សហរដ្ឋអាមេរិក ៖ តាមការចេញផ្សាយរបស់សារព័ត៌មានបរទេស កាលពីថ្ងៃទី២៨ ខែឧសភា ឆ្នាំ២០២៥ ឱ្យដឹងថា រដ្ឋាភិបាលរបស់លោកប្រធានាធិបតី Donald Trump បានកំណត់ឱ្យស្ថានទូតអាមេរិកនៅទូទាំងពិភពលោក ផ្អាកការណាត់ជួបនិស្សិតបរទេសមកស្នើសុំទិដ្ឋាការជាបណ្តោះអាសន្ន រួមទាំងមានវិធានការត្រួតពិនិត្យការប្រើប្រាស់បណ្តាញសង្គមរបស់និស្សិតបរទេសដែលសុំទិដ្ឋាការមករៀននៅអាមេរិកផងដែរ ។

ក្នុងខ្លឹមសារសេចក្តីប្រកាសផ្ញើទៅកាន់ស្ថានទូតអាមេរិកជុំវិញពិភពលោក រដ្ឋមន្ត្រីក្រសួងការបរទេស លោក Marco Rubio បញ្ជាក់ថា ការផ្អាកណាត់ជួបជាមួយនិស្សិតបរទេសដែលស្នើសុំទិដ្ឋាការនៅស្ថានទូតអាមេរិក នឹងអនុវត្តរហូតដល់មានសេចក្តីប្រកាសបន្ថែម ។ សេចក្តីប្រកាសសរសេរថា ការពិនិត្យមើលទិន្នន័យការប្រើប្រាស់បណ្តាញសង្គមរបស់និស្សិតបរទេសដែលសុំទិដ្ឋាការមករៀននៅអាមេរិកនឹងកាន់តែតឹងរ៉ឹង ។

ការផ្អាកណាត់ជួបជាមួយនិស្សិតបរទេស គឺស្របពេលមានភាពតានតឹងរវាងលោក Trump ជាមួយសាកលវិទ្យាល័យឈានមុខជាច្រើននៅអាមេរិក ដោយលោក Trump ចោទប្រកាន់ថា សាកលវិទ្យាល័យឈានមុខមានគំនិតឆ្វេងជ្រុល និងមានគោលការណ៍ទទួលយកនិស្សិតចូលរៀនដោយគ្មានភាពយុត្តិធម៌ ។ កាលពីថ្ងៃទី២៧ ខែឧសភា ស្ថានទូតអាមេរិកនៅទូទាំងពិភពលោក ត្រូវបានកំណត់ឱ្យលុបការណាត់ជួបនិស្សិតបរទេសដែលមកសុំទិដ្ឋាការ លើកលែងតែនិស្សិតដែលទទួលបានការបញ្ជាក់រួចហើយ ។

ក្រៅពីនេះ ក្រសួងការបរទេសអាមេរិកនឹងពិនិត្យមើលបណ្តាញសង្គមរបស់និស្សិតបរទេសដែលសុំទិដ្ឋាការទាំងអស់ ប៉ុន្តែពុំបានបញ្ជាក់ច្បាស់លាស់ថា តើនឹងពិនិត្យមើលខ្លឹមសារ និងការបង្ហោះប្រភេទណាខ្លះ? ជាទូទៅ និស្សិតបរទេសដែលមានគោលបំណងបន្តការសិក្សានៅអាមេរិក ចាំបាច់ត្រូវណាត់ជួបសម្ភាសន៍ជាមួយមន្ត្រីស្ថានទូតអាមេរិកក្នុងប្រទេសរបស់ខ្លួន មុនពេលស្ថានទូតអនុម័តទិដ្ឋាការ ។ រីឯសាកលវិទ្យាល័យជាច្រើននៅអាមេរិកទទួលបានចំណូលពីនិស្សិតបរទេស ដែលត្រូវបង់ថ្លៃសាលាខ្ពស់ជាងនិស្សិតអាមេរិក ។

រដ្ឋាភិបាលរបស់លោក Trump ធ្លាប់ឱ្យផ្អាកថវិការាប់លានដុល្លារដែលបែងចែកទៅឱ្យសាកលវិទ្យាល័យ និងព្យាយាមបណ្តេញនិស្សិតបរទេស រួមទាំងលុបចោលទិដ្ឋាការសិក្សារបស់និស្សិតបរទេសរាប់ពាន់នាក់ ។ កន្លងមក រដ្ឋាភិបាលអាមេរិកបានដកហូតសិទ្ធិរបស់សាកលវិទ្យាល័យ Harvard ដោយពុំអនុញ្ញាតឱ្យទទួលនិស្សិត និងអ្នកស្រាវជ្រាវបរទេស ប៉ុន្តែតុលាការអាមេរិកបានរារាំងការដកហូតសិទ្ធិនេះ ។ បើតុលាការអាមេរិកពុំរារាំងទេ វាអាចប៉ះពាល់ដល់សាកលវិទ្យាល័យ Harvard ដែលមាននិស្សិតបរទេសកំពុងសិក្សាជាង២៥% ក្នុងចំណោមនិស្សិតបរទេសសរុប ៕

សហរដ្ឋអាមេរិក ៖ បច្ចុប្បន្ន អាមេរិកមានបញ្ហាសេដ្ឋកិច្ច នយោបាយ និងសង្គម ធ្វើឱ្យពលរដ្ឋអាមេរិកកាន់តែច្រើនស្វែងរកទីលំនៅថ្មីនៅក្រៅប្រទេស ក្នុងនោះព័រទុយហ្គាល់ បានក្លាយជាប្រទេសមួយទទួលបានការចាប់អារម្មណ៍យ៉ាងខ្លាំងពីពលរដ្ឋអាមេរិកដែលចង់ផ្លាស់ប្តូរទីលំនៅ ដោយសារការចំណាយក្នុងជីវភាពប្រចាំថ្ងៃនៅព័រទុយហ្គាល់ ថោកជាងអាមេរិក រហូតដល់៤០% និងជាប្រទេសមានសុវត្ថិភាពបំផុត ។ រីឯការចំណាយប្រចាំថ្ងៃនៅអាមេរិកខ្ពស់ បើទោះជាអត្រាអតិផរណាអាមេរិកចាប់ផ្តើមធ្លាក់ចុះ ប៉ុន្តែតម្លៃទំនិញ និងសេវាកម្មកើនឡើងជាបន្តបន្ទាប់ ។

មូលហេតុមួយទៀតជំរុញឱ្យពលរដ្ឋអាមេរិកចាកចេញពីប្រទេសរបស់ខ្លួន ដោយសារការគ្រប់គ្រងប្រព័ន្ធសុខាភិបាលនៅអាមេរិកគ្មានប្រសិទ្ធភាព ទោះជារដ្ឋាភិបាលអាមេរិកបានចំណាយថវិកាលើកកម្ពស់ប្រព័ន្ធសុខាភិបាលច្រើនជាងប្រទេសនានា ប៉ុន្តែអាមេរិកបែរជាប្រឈមនឹងបញ្ហាការគ្រប់គ្រងសុខាភិបាល ។ ការស្រាវជ្រាវរបស់សាកលវិទ្យាល័យ Harvard បញ្ជាក់ថា អាមេរិកទទួលបានពិន្ទុទាបបំផុតផ្នែកការទទួលយកសេវាព្យាបាលសុខភាពរបស់ពលរដ្ឋ អត្រាធ្វើអត្តឃាត និងការស្លាប់របស់ស្ត្រីមានផ្ទៃពោះ ហើយចំណុចសំខាន់ គឺពលរដ្ឋអាមេរិកបានចំណាយប្រាក់ច្រើនក្នុងការថែទាំសុខភាព បែរជាទទួលបានសេវាថែទាំសុខភាពមិនល្អ ។

ការរកការងារធ្វើនៅអាមេរិកក៏ប្រឈមនឹងបញ្ហាដែរ ដោយសារពលរដ្ឋអាមេរិកស្មើ៥៤% ឬប្រមាណ១៣០លាននាក់ មានសមត្ថភាពអានអក្សរស្មើកូនសិស្សរៀនថ្នាក់បឋមសិក្សាទី៦ ។ លើសពីនេះ អាមេរិកគ្មានច្បាប់បង្ខំឱ្យនិយោជកផ្តល់ប្រាក់ឱ្យបុគ្គលិកពេលឈប់សម្រាកលំហែមាតុភាព និងឈប់សម្រាប់រដូវក្តៅ ដែលខុសគ្នាពីប្រទេសអភិវឌ្ឍន៍នានា ។

ចំណែកការចំណាយផ្សេងៗក្នុងជីវភាពប្រចាំថ្ងៃនៅព័រទុយហ្គាល់ ដែលជាប្រទេសស្ថិតនៅភាគខាងត្បូងតំបន់អឺរ៉ុប គឺទាបជាងអាមេរិករហូតដល់៤០% ទើបធ្វើឱ្យពលរដ្ឋមកប្រទេសនានា ក៏ដូចជាពលរដ្ឋអាមេរិកចង់មករស់នៅព័រទុយហ្គាល់ ។ ក្រៅពីនេះ ព័រទុយហ្គាល់ មានអាកាសធាតុល្អ ហើយស្ថិតក្នុងចំណោមប្រទេសមានសុវត្ថិភាពបំផុតក្នុងចំណោម១០ប្រទេសនៅលើពិភពលោក ដែលស្ត្រីអាចធ្វើដំណើរម្នាក់ឯងនៅទីសាធារណៈដោយគ្មានគ្រោះថ្នាក់ ។

រដ្ឋាភិបាលព័រទុយហ្គាល់មានគោលនយោបាយទទួលជនបរទេសជាច្រើនមករស់នៅ តាមរយៈការផ្តល់ទិដ្ឋាការសម្រាប់ពលករប្រទេសជិតខាង និងផ្តល់ទិដ្ឋាការដល់ជនបរទេសដែលមានចំណូលទៀងទាត់អាចប្តូរទីលំនៅមករស់នៅព័រទុយហ្គាល់បាន ។ កត្តាទាំងនេះបានទាក់ទាញចំណាប់អារម្មណ៍ពលរដ្ឋអាមេរិកយ៉ាងខ្លាំង ដែលចង់គេចខ្លួនពីភាពពុំប្រាកដប្រជា និងបញ្ហាប្រឈមនានានៅអាមេរិក ៕

ប្រទេសបារាំង ៖ រដ្ឋាភិបាលបារាំងបានពិចារណាពីការបង្កើតច្បាប់ហាមរើសអើ.ងកុមារ ដោយសារសណ្ឋាគារ និងភោជនីយដ្ឋានជាច្រើនបានដាក់ស្លាកសញ្ញា «No Kids» ដើម្បីហាមឃាត់ការនាំកុមារចូលសណ្ឋាគារ និងភោជនីយដ្ឋាន ។ មន្ត្រីរដ្ឋាភិបាលជាន់ខ្ពស់និយាយថា ការរើសអើ.ងកុមារក្រោមស្លាកសញ្ញា «No Kids» អាចបង្កើតឱ្យមានភាពបែកបាក់ក្នុងសង្គម ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី២៨ ខែឧសភា ឆ្នាំ២០២៥ ។

ទោះជាគេស្គាល់ថា ប៉ារីស គឺជាទីក្រុងមិត្តភាពជាមួយកុមារក្តី ប៉ុន្តែបច្ចុប្បន្ន គេសង្កេតឃើញថា មានសណ្ឋាគារ និងភោជនីយដ្ឋានជាច្រើននៅប្រទេសបារាំង បែរជាពុំស្វាគមន៍កុមារ ពីព្រោះកុមារតែងតែធ្វើទង្វើ និងបង្កសំឡេងរំខានប៉ះពាល់ដល់បរិយាកាសរបស់អតិថិជនជាមនុស្សពេញវ័យ ។

អ្នកស្រី Sarah EI Hairy ទទួលខុសត្រូវការងារផ្នែកសិទ្ធិកុមារ បានស្នើឱ្យបញ្ឈប់ការរើសអើងកុមារជាបន្ទាន់ ដោយអ្នកស្រីយល់ឃើញថា ការហាមឃាត់កុមារចូលក្នុងទីកន្លែងនានា មិនត្រឹមតែរំលោភសិទ្ធិកុមារប៉ុណ្ណោះទេ ប៉ុន្តែវាបានដាក់សម្ពាធដល់ឪពុក-ម្តាយ និងបង្កការបែកបាក់ក្នុងសង្គម ។

ហេតុនេះ រដ្ឋាភិបាលបារាំងបានរៀបចំកិច្ចប្រជុំជាមួយអ្នកតំណាងក្រុមហ៊ុនអាជីវកម្មក្នុងវិស័យទេសចរណ៍ និងដឹកជញ្ជូន ដើម្បីពិភាក្សាពីការបញ្ឈប់រើសអើងកុមារ ។ សមាជិកព្រឹទ្ធសភាមកពីគណបក្សសង្គមនិយម លោកស្រី Laurence Rossignol បានធ្វើសេចក្តីព្រាងច្បាប់ហាមក្រុមហ៊ុនអាជីវកម្មបដិសេធកុមារ ដោយលោកស្រីបញ្ជាក់ថា កុមារពុំមែនជាបន្ទុកទេ ប៉ុន្តែកុមារជាមួយផ្នែកមួយរបស់សង្គម ដែលគួរតែព្រមទទួលស្គាល់ ។

លោកស្រី Laurence Rossignol បានអំពាវនាវឱ្យរដ្ឋាភិបាលជំរុញការបង្កើតវិធានការ និងយកប្រធានបទនេះទៅពិចារណាក្នុងរដ្ឋសភា ដើម្បីឱ្យទីកន្លែងនានាស្វាគមន៍កុមារដោយគ្មានការរើសអើង ៕