តារាចម្រៀង ឆាយ វីរៈយុទ្ធ អំពាវនាវកុំឱ្យអ្នកលក់ទំនិញឡើងថ្លៃ ខណៈលោកចូលរួមផ្តល់ស្បៀងអង្ករជាច្រើនតោន

ដ្បិតការបង្ហោះសាររបស់ខ្លួនធ្វើឱ្យមានការអក់អន់ចិត្តពីអ្នកក្នុងចង្កោមសិល្បៈនិងអ្នកគាំទ្រពិតមែន ប៉ុន្តែតារាចម្រៀង ឆាយ វីរៈយុទ្ធ ក៏បានចូលរួមផ្តល់អង្ករជាច្រើនតោនទៅដល់កងទ័ពជួរមុខនិងជនភៀសសឹកដែលរងគ្រោះពីអំពើឈ្លានពានរបស់សៀម។ មិនត្រឹមតែប៉ុណ្ណោះតារាចម្រៀងក្នុងទ្រនំសាន់ដេរូបនេះបានអំពាវនាវដល់អ្នកលក់ដូរទាំងឡាយកុំឆ្លៀតឡើងថ្លៃក្នុងពេលប្រទេសជាតិកំពុងជួបការលំបាក។

កាលពីព្រឹកថ្ងៃទី២៥ កក្កដា តារាចម្រៀង ឆាយ វីរៈយុទ្ធ និងភរិយា បានប្រកាសចូលរួមស្បៀងអង្ករដល់ ប្រជាពលរដ្ឋ ភាសសឹក នៅស្រុកសំរោង ខេត្តឧត្តរមានជ័យ ចំនួន ២០០បេ។ នៅថ្ងៃបន្ទាប់(២៦ កក្កដា) តារាចម្រៀងរូបនេះបានប្រកាសចូលរួមចំនួន២០០បេបន្ថែមទៀតដល់ជនភៀសសឹក ស្រុកគូលែន ខេត្តព្រះវិហារ ហើយការជួយរបស់លោកទាំងពីរលើកនេះគឺតាមរយៈលោក Sean Chandara ។

ស្របពេលសប្បុរសជនជាច្រើនចូលរួមយ៉ាងសកម្មជួយទៅដល់ជនភៀសសឹក និងកងទ័ពជួរមុខដែលកំពុងឈរជើងយ៉ាងរឹងមាំបូជាឈាមស្រស់ សាច់ស្រស់ ស្រាប់តែលោក តាំង គីមឡេង បានត្អូញត្អែថាអ្នកលក់មួយចំនួនគឺឆ្លៀតឱកាសឡើងថ្លៃ។ ឃើញអ្នកលក់ដូរឡើងថ្លៃបែបនេះ តារាចម្រៀង ឆាយ វីរៈយុទ្ធ បានអំពាវនាវកុំឱ្យអាជីវករឡើងថ្លៃស្របពេលប្រទេសជាតិកំពុងជួបទុក្ខលំបាក។

លោក ឆាយ វីរៈយុទ្ធ បានសរសេរយ៉ាងដូច្នេះថា «កម្លាំងសាមគ្គីជាតិខ្មែរ សូមបងប្អូនលក់ទំនិញមេត្តាកុំឡើងថ្លៃអី ក្នុងគ្រាដ៏លំបាកនេះដើម្បីជាតិនិងប្រជាជនយើងទាំងអស់គ្នា សូមអរគុណបងប្អូនដោយក្តីអនុគ្រោះពីខ្ញុំបាទ ឆាយ វីរៈយុទ្ធ»។

មិនត្រឹមតែចូលរួមផ្តល់ស្បៀងចំនួន៤០០បេដល់ជនភៀសសឹកខាងលើនេះប៉ុណ្ណោះទេ នៅថ្ងៃទី២៧ កក្កដា តារាចម្រៀង ឆាយ វីរៈយុទ្ធ គឺបានប្រកាសចូលរួមអង្ករចំនួន១តោនដល់មូលនិធិដើម្បីទ្រទ្រង់កងទ័ពកម្ពុជាការពារព្រំដែន។ នៅថ្ងៃទី២៨ ខែកក្កដា តារាចម្រៀង ឆាយ វីរៈយុទ្ធ និងភរិយា គឺបានចូលរួមអង្គរដល់ទៅ២តោនបន្ថែមទៀតផងដែរ៕