ប្រទេសថៃ ៖ នៅថ្ងៃទី១៣ ខែសីហា ឆ្នាំ២០២៥ សារព័ត៌មានថៃ Top News រាយការណ៍ថា នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បានសុំភាពយុត្តិធម៌ក្រោយពីត្រូវពលរដ្ឋថៃរិះគ.ន់ខ្លាំងៗថា កាន់ជើងកម្ពុជា គ្រាន់តែលោកនិយាយពាក់ព័ន្ធនឹងកងទ័ពកម្ពុជាប្រើប្រាស់គ្រាប់រ៉ុក្កែត BM-21 បា.ញ់ធ្លាក់លើមន្ទីរពេទ្យថៃនៅព្រំដែន ។ លោកសំណូមពរទៅពលរដ្ឋកុំបំភ្លៃរឿងនេះដើម្បីបំផ្លា.ញរដ្ឋាភិបាល និងបង្កើតការមិនទុកចិត្តលើរដ្ឋាភិបាលនាំឱ្យបែកបាក់ក្នុងសង្គមក្លាយជាបញ្ហា ។

នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បាននិយាយនៅវិមានរដ្ឋាភិបាល នាថ្ងៃទី១៣ ខែសីហា ករណីពលរដ្ឋថៃរិះគន់ពីដំណោះស្រាយបញ្ហាជម្លោះព្រំដែនកម្ពុជា-ថៃថា សូមពលរដ្ឋជួយគ្នាដោះស្រាយបញ្ហា ពីព្រោះខ្លួនលោកក៏ពុំទទួលភាពយុត្តិធម៌ដែរ ប៉ុន្តែក្នុងឋានៈជានាយករដ្ឋមន្ត្រីស្តីទី លោកនឹងព្យាយាមរក្សាភាពស្ងប់ស្ងាត់ឱ្យខ្លាំងបំផុត ។

ការលើកឡើងថា លោកកាន់ជើងកម្ពុជា និងមានការរិះគន់រឿងគ្រាប់រ៉ុក្កែត BM-21 បា.ញ់ធ្លាក់លើមន្ទីរពេទ្យថៃនៅព្រំដែន លោកសូមបញ្ជាក់ថា ពុំមែនជាការពិតទេ ។ សូមពលរដ្ឋស្តាប់សំឡេងពេញដែលលោកនិយាយថា ហេតុអ្វីគ្រាប់រ៉ុក្កែតធ្លាក់លើមន្ទីរពេទ្យ? ការបាញ់របស់កងទ័ពកម្ពុជា គឺប្រើប្រាស់គ្រាប់រ៉ុក្កែត BM-21 ដែលរ៉ុក្កែតនេះបាញ់ម្តងធ្លាក់លើគោលដៅច្រើនកន្លែង ដែលពុំមែនជាគោលដៅកងទ័ព ។ ដូច្នេះ លោកសំណូមពរពលរដ្ឋកុំបំភ្លៃរឿងនេះដើម្បីបំផ្លាញរដ្ឋាភិបាល និងបង្កើតការមិនទុកចិត្តលើរដ្ឋាភិបាលនាំឱ្យបែកបាក់ក្លាយជាបញ្ហា ។

ទន្ទឹមនឹងនេះ នៅមានមនុស្សមួយចំនួនទៀតប្រាប់ឱ្យខ្ញុំសាកល្បងកាត់ជើងខ្លួនឯង ដើម្បីឱ្យដឹងពីការឈឺចាប់របស់កងទ័ពថៃរងរបួសដោយសារជាន់មីន បើទោះជាខ្ញុំមិនពុំចង់ប្តឹងអ្នកណាក៏ដោយ ប៉ុន្តែត្រូវតែបញ្ជាក់បញ្ហានេះឱ្យច្បាស់លាស់ ។ វាដូចគ្នានឹងករណីខ្ញុំរងការវាយប្រហារពីលោក ស៊ុននិធិ លីមថងគុល និយាយថា ខ្ញុំ (ភូមិថាំ វីឆាយ៉ាឆៃ) គឺជាសមាជិកគណបក្សកុម្មុយនិស្ត រហូតដល់លោក ស៊ុននិធិ ចាញ់ក្តីនៅតុលាការ ក្រោយមក លោក ស៊ុននិធិ ក៏សូមទោសខ្ញុំ ។

ចំណែកបញ្ហានេះក៏ដូចគ្នាដែរ កុំនិយាយអ្វីគ្មានហេតុផល កុំនិយាយអ្វីធ្វើឱ្យបែកបាក់គ្នា ឬបំផ្លាញអ្នកដទៃ ។ ខ្ញុំចង់ឱ្យសារព័ត៌មានជួយផ្សព្វផ្សាយអ្វីដែលខ្ញុំបាននិយាយ ហើយខ្ញុំគិតថា គ្រប់គ្នាគួរតែនិយាយនូវអ្វីដែលគួរនិយាយប៉ុណ្ណោះ ។ ខ្ញុំនឹងពុំនិយាយអ្វីច្រើនជាងនេះ ពីព្រោះបើនិយាយទៅអាចយកសំឡេងខ្ញុំទៅចោទប្រកាន់ បង្ខូចកេរ្តិ៍ឈ្មោះ ដោយការកាត់តសំឡេង ។

ចូរផ្តល់ភាពយុត្តិធម៌ឱ្យខ្ញុំផង បើមិនដូច្នោះទេ វានឹងពុំសមរម្យ ។ ខ្ញុំនឹងឱ្យមេធាវីចាត់វិធានការតាមផ្លូវច្បាប់ចំពោះអ្នកណាដែលនិយាយបំភ្លៃការពិត ពីព្រោះខ្ញុំបានរក្សាទុកសំឡេងសម្ភាសន៍ទាំងអស់រួចហើយ ។ នេះបើតាមការលើកឡើងរបស់លោក ភូមិថាំ ។

គួរបញ្ជាក់ថា រដ្ឋាភិបាលរបស់គណបក្សភឿថៃបានបាត់បង់ប្រជាប្រិយភាពពីពលរដ្ឋ ពីព្រោះពលរដ្ឋជឿជាក់លើកងទ័ពខ្លាំងជាងរដ្ឋាភិបាល ។ ពលរដ្ឋថៃដែលមានគំនិតជ្រុលនិយមកាន់តែជឿជាក់លើកងទ័ពក្រោយពីកងទ័ពរបស់ពួកគេឈ្លានពាន បើកការវាយប្រហារមកលើកម្ពុជា និងទាមទារឱ្យបន្តតំណែងមេបញ្ជាការយោធភូមិភាគ២ លោក ប៊ុនស៊ីន ផាកក្លាង រហូតបញ្ចប់ជម្លោះព្រំដែនជាមួយកម្ពុជា ។

ពលរដ្ឋថៃចោទប្រកាន់ថា កងទ័ពកម្ពុជាបាញ់សំដៅលើមន្ទីរពេទ្យនៅព្រំដែន និងទាមទារឱ្យមន្ទីរពេទ្យថៃឈប់ព្យាបាលអ្នកជំងឺកម្ពុជា ប៉ុន្តែពួកគេមើលរំលងអំពើឈ្លានពានរបស់កងទ័ពថៃមកលើកម្ពុជា ។ កាលពីផ្ទុះអាវុធនៅព្រំដែនកម្ពុជា-ថៃកន្លងមក កងទ័ពថៃបានប្រើប្រាស់យន្តហោះចម្បាំង F-16, Gripen រថក្រោះ កាំភ្លើងធំ គ្រាប់បែកចង្កោម ដ្រូនទម្លាក់គ្រាប់បែក និងផ្សែងពុល ជាដើម ៕

បន្ទាយមានជ័យ៖ កាលពីល្ងាចថ្ងៃទី១២ ខែសីហា ឆ្នាំ២០២៥ ទាហានសៀមពាក់ឯកសណ្ឋានប៉ារ៉ាចំនួនប្រហែលពី ២០ ទៅ ៣០ នាក់ បានយកលួសបន្លាមកហំព័ទ្ធបិតផ្លូវចូលផ្ទៈប្រជាពលរដ្ឋ៣ទៅ៤ខ្នងនិងផ្លូវចូលច្រកណង់ចាន់ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ។ នេះបើយោងតាមការរាយការណ៍របស់ប្រជាពលរដ្ឋនៅក្នុងតំបន់។

ប្រភពពលរដ្ឋបានឲ្យដឹងថា ទាហានពាក់ឯកសណ្ឋានប៉ារ៉ារបស់សៀម បានលើកគ្នាប្រមាណជា២០ទៅ៣០នាក់ ដោយអ្នកខ្លៈមានកាន់អាវុធ ខ្លៈទៀតកាន់លួសបន្លាបាននាំគ្នាចូលមកហំព័ទ្ធផ្ទះរបស់ប្រជាពលរដ្ឋខ្មែរ ចំនួន៣ទៅ៤ខ្នងផ្ទះ ព្រមទាំងបិតផ្លូវចេញ.ចូលមិនអោយប្រជាពលរដ្ឋធ្វើដំណើរឆ្លងកាត់បាន ធ្វើឲ្យពួកគាត់ជួបការលំបាកជាខ្លាំង។

បើតាមការអះអាងរបស់ពលរដ្ឋក្នុងតំបន់ខាងលើនេះបានឲ្យដឹងទៀតថា កន្លងមកកាលពីថ្ងៃទី២៦ ខែកក្តដា ឆ្នាំ២០២៥ ដែលកម្ពុជានិងថៃកំពុងមានការប្រយុទ្ធគ្នាយ៉ាងក្ដៅគគុកនៅតាមតំបន់ព្រំដែនមួយចំនួន ទាហានសៀមបានឆ្លៀតឱកាសដឹកនាំគ្នាជាច្រើននាក់ រួមជាមួយគ្រឿងចក្រប្រភេទអ៊ែស្កាទ័រ១គ្រឿង បានចូលមកវាយកំទិចចោលរោងប៉ុស្តិ៍ត្រួតពិនិត្យច្រករបៀងណង់ចាន់ ឲ្យខ្ទេចអស់ចំនួន២កន្លែង ត្រង់ចំណុចច្រកតំបន់៥ និងច្រកណង់ចាន់។

ដោយឡែក នៅល្ងាចថ្ងៃទី១២ ខែសីហា ឆ្នាំ២០២៥នេះ ក៏មានទាហានសៀមប្រមាណ២០ទៅ៣០នាក់បានមកម្ដងទៀត ប្រដាប់ដោយអាវុធនិងលួសបន្លាបានចូលមកហំព័ទ្ធផ្ទះរបស់ប្រជាពលរដ្ឋប្រមាណ៣ទៅ៤ខ្នង ដែលគិតជាប្រវែងប្រហែល ២០០ម៉ែត្រ និងមានចម្ងាយប្រមាណ១៦០ម៉ែត្រពីកន្លែងប៉ុស្តិ៍ដែលពួកគេបានវាយកំទិចចោលនោះ ព្រមទាំងបិតផ្លូវជិតឈឹងមិនអោយប្រជាពលរដ្ឋចេញ.ចូលផ្ទះបាននោះទេ។

បើតាមអាជ្ញាធរស្រុកអូរជ្រៅបានរាយការណ៍ថា៖ ទាហានសៀមពិតជាបានយកលួសបន្លាមកហ៊ុមព័ទ្ធផ្ទះប្រជាពលរដ្ឋពិតមែន ខណៈពេលពលរដ្ឋដែលជាម្ចាស់ផ្ទះទាំងនោះបាននាំគ្នាភៀសសឹកចេញ ។ ប្រភពដដែលនេះបានបញ្ជាក់ថា ដោយសារមានការព្រួយបារម្ភ ទើបប្រជាពលរដ្ឋនៅតំបន់នេះរើអីវ៉ានជម្លៀសខ្លួនចេញអស់ដើម្បីសុវត្ថិភាពព្រោះទាហានសៀមឈ្លានពាន ពិតជារំលោភបំពានមកលើអធិបតេយ្យភាពកម្ពុជាពិតមែនម្ដងហើយម្ដងទៀតមែន។

សកម្មភាពនេះ បានបង្ហាញពីចរិតឈ្លានពាន ចង់បានទឹកដីកម្ពុជាយ៉ាងគ្មានកេរ្តិ៍ខ្មាសរបស់ទាហានសៀម ដែលបានរំលោភដែនអធិបតេយ្យកម្ពុជា បំពានបទឈប់បា.ញ់ បើទោះជាបានឯកភាពគ្នាដើម្បីស្វែងរកសន្តិភាពហើយក៏ដោយ។ ទង្វើនេះ អាចជាចេតនាចង់ញុះញង់ឲ្យមានការផ្ទុះអាវុ.ធសារជាថ្មី ដើម្បីយកលេសប្រាប់អន្តរជាតិថាកម្ពុជាគឺជាអ្នកបង្កមុនទៀត ចំណែកឯថៃគ្រាន់តែធ្វើការតបតដើម្បីការពារខ្លួន៕

ណារាធីវ៉ាត់៖ មេបញ្ជាការភូមិភាគ៤ថៃ បានជិះឧទ្ធម្ភាគចក្រពិនិត្យមើលស្ថានការណ៍នៅខេត្ត ណារ៉ាធីវ៉ាត់ ភាគខាងត្បូង ក្រោយទទួលបានការរាយការណ៍ថា ក្រុមបះបោរផ្តាច់ខ្លួនសាសនាមូស្លីមកំពុងជួញដូរអាវុធចល័តចូលដីថៃ និងបើកការប្រជុំបន្ទាន់មួយនៅទីនោះ ដើម្បីពិភាក្សាពីការត្រៀមកម្លាំងទប់ទល់ការវា.យប្រហារដែលអាចកើតឡើង។ នេះបើយោងតាមការចុះផ្សាយរបស់សារព័ត៌មាន The Nation។

នាថ្ងៃអង្គារ ទី12 ខែសីហា ឆ្នាំ2025 ឧត្តមសេនីយឯក Paisal Nusang បានដឹកនាំកម្លាំងល្បាតតាមផ្លូវអាកាសមើលពីលើតំបន់ព្រៃឈើ បន្ទាប់ពីទទួលបានភ័ស្តុតាងជារូបថតដែលបង្ហាញថា មានអាវុធ និងគ្រាប់រំសេវជាច្រើន ត្រូវបានដឹកជញ្ជូនចូលប្រទេសថៃពីប្រទេសជិតខាងដោយក្រុមបះបោរ។

សភាពការណ៍មិនស្រួលនេះ បានជំរុញឲ្យថៃចាប់ផ្ដើមបែងចែកកម្លាំងមកល្បាតតាមព្រំដែនភាគខាងត្បូងជាប់ប្រទេសម៉ាឡេសុីកាន់តែតឹងរឹង ខណៈក្ដីព្រួយបារម្ភផ្នែកសន្តិសុខនៅតំបន់នេះកាន់កើនឡើងខ្ពស។ រដ្ឋាភិបាលថៃ បានព្យាយាមដោះស្រាយបញ្ហានេះតាមរយៈកិច្ចចរចាសន្តិភាពជាមួយក្រុមបះបោរធំៗ ដូចជា Barisan Revolusi Nasional ដោយមានការជួយសម្របសម្រួលពីម៉ាឡេស៊ី។

យ៉ាងណាមិញ បើទោះបីជាមានការចរចាក៏ដោយ ក៏អំពើហិង្សានៅតែបន្តកើតមានឡើងម្ដងម្កាលរហូតមកដល់បច្ចុប្បន្ន។ បើយោងតាមតួលេខចុងក្រោយពីក្រុមស្រាវជ្រាវ Deep South Watch, គិតចាប់តាំងពីឆ្នាំ២០០៤មក មនុស្សស្លាប់នៅក្នុងអំពើហិង្សានោះ មានជាង ៧ ៥០០នាក់ ខណៈជាង ១៣ ៥០០នាក់ រងរបួស។ ក្នុងចំណោមមនុស្សស្លា.ប់ក៏រួមមានមន្ត្រីយោធានិងប៉ូលិសថៃជាច្រើនផងដែរ។

បច្ចុប្បន្ននេះ មន្ត្រីពាក់ព័ន្ធក្នុងតំបន់បានសម្រេចចិត្តពង្រឹងវិធានការសន្តិសុខ រួមទាំងការពង្រីកប្រតិបត្តិការល្បាតតាមមូលដ្ឋានទាំងយប់ទាំងថ្ងៃ ជំរុញការត្រួតពិនិត្យប៉ុស្តិ៍ និងសម្របសម្រួលកិច្ចខិតខំប្រឹងប្រែងស៊ើបការណ៍ជាមួយភ្នាក់ងារសន្តិសុខព្រំដែននៅម្ខាងទៀត៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath ឱ្យដឹងថា ពលរដ្ឋថៃនៅតាមព្រំដែនជាប់កម្ពុជា ពុំទុកចិត្តស្ថានការណ៍ក្រោយពីកងទ័ពថៃចោទប្រកាន់កម្ពុជាបង្កប់មីនថ្មី ក៏នាំគ្នាជម្លៀសចេញពីលំនៅឋាននៅស្រុកកាន់ថាឡាក ខេត្តស៊ីសាកេត ទៅកាន់កន្លែងសុវត្ថិភាពកាលពីយប់ថ្ងៃទី១២ ខែសីហា ឆ្នាំ២០២៥ បើទោះជាអាជ្ញាធរពុំប្រាប់ឱ្យជម្លៀសចេញក្តី ។

តាំងពីល្ងាចថ្ងៃទី១២ ខែសីហា នៅបរិវេណផ្លូវលេខ២២១ ស្រុកកាន់ថាឡាក ខេត្តស៊ីសាកេត មានរថយន្តពលរដ្ឋថៃធ្វើដំណើរជម្លៀសចេញពីលំនៅឋានខុសធម្មតា ដោយសារពួកគេទទួលបានដំណឹងថា នឹងមានការប៉ះទង្គិចគ្នាម្តងទៀតនៅព្រំដែនកម្ពុជា-ថៃ ។ ដំណឹងនេះធ្វើឱ្យពលរដ្ឋថៃបារម្ភ និងសម្រេចចិត្តជម្លៀសចេញពីលំនៅឋានជាបន្តបន្ទាប់ ដោយដឹកជញ្ជូនសម្ភារៈរបស់របរប្រើប្រាស់ចាំបាច់ ជាពិសេស ពលរដ្ឋនៅឃុំសៅធុងឆ័យជម្លៀសច្រើនជាងគេ ពីព្រោះឃុំនេះធ្លាប់រងផលប៉ះពាល់ ។

ពលរដ្ឋថៃនៅខេត្តស៊ីសាកេត និយាយថា ពួកគេសម្រេចចិត្តនាំក្រុមគ្រួសារ និងដឹកជញ្ជូនសម្ភារៈជម្លៀសចេញពីលំនៅឋានដោយសារពុំទុកចិត្តស្ថានការណ៍ បើទោះជាអាជ្ញាធរពុំទាន់ចេញសេចក្តីប្រកាសឱ្យពលរដ្ឋជម្លៀសក្តី ។ ពួកគេចង់ឱ្យស្ថានការណ៍នៅព្រំដែនកម្ពុជា-ថៃមានសុវត្ថិភាព និងស្ងប់ស្ងាត់ ពុំចង់ជម្លៀសចេញបន្តទៀតទេ ។

បើតាមមេភូមិ និងមេឃុំសៅធុងឆ័យ គឺពុំទាន់ទទួលបានសេចក្តីប្រកាសឱ្យជម្លៀសពលរដ្ឋចេញពីលំនៅឋានទេកាលពីថ្ងៃទី១២ ខែសីហា ប៉ុន្តែអាជ្ញាធរតាមដានស្ថានការណ៍យ៉ាងដិតដល់ ។ ពលរដ្ឋសម្រេចចិត្តដឹកសម្ភារៈជម្លៀសចេញពីលំនៅឋាននោះ ដោយសារពួកគេចង់ទៅកន្លែងមានសុវត្ថិភាព ពុំចង់រស់នៅតំបន់ប្រឈម ពួកគេធ្លាប់មានបទពិសោធន៍ជម្លៀសជាច្រើនលើក ។

នាវេលាម៉ោង១០និង៣២នាទី ថ្ងៃទី១២ ខែសីហា ហ្វេសប៊ុកផេកកងទ័ពភូមិភាគ២ថៃបានសរសេរថា ៖ «ស្ថានការណ៍នៅតាមបណ្តោយព្រំដែនមានសភាពធម្មតា គ្មានការតានតឹងដូចការផ្សព្វផ្សាយក្នុងបណ្តាញសង្គមទេ សូមពលរដ្ឋកុំភ័យស្លន់ស្លោ» ។

ដោយឡែក អ្នកនាំពាក្យរដ្ឋាភិបាលថៃ លោក ជិរ៉ាយុ ហួងសាប់ ព្រមទាំងមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានបញ្ជាក់ពីស្ថានការណ៍ក្នុងខេត្តចំនួន៧ នៅព្រំដែនកម្ពុជា-ថៃ ចាប់ពីល្ងាចថ្ងៃទី១២ រហូតដល់ព្រឹកថ្ងៃទី១៣ ខែសីហា គឺគ្មានការប៉ះទង្គិចគ្នាទេ ។ ប៉ុន្តែកងទ័ពថៃបានពង្រាយកម្លាំងឈរជើងនៅតាមព្រំដែនយ៉ាងតឹងរ៉ឹងក្នុង១១តំបន់ និងត្រៀមខ្លួនបើមានការល្មើសអធិបតេយ្យ ។

លោក ជិរ៉ាយុ និយាយថា ភាគីថៃនៅតែប្រកាន់ខ្ជាប់តាមកិច្ចព្រមព្រៀងក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) ហើយលោកចោទប្រកាន់ថា កម្ពុជាបំពានកិច្ចព្រមព្រៀងបទឈប់បាញ់ និងសន្ធិសញ្ញាអូតាវ៉ា ។

គួរបញ្ជាក់ថា ការជម្លៀសចេញពីលំនៅឋានរបស់ពលរដ្ឋថៃ គឺបណ្តាលមកពីកងទ័ពថៃខ្លួនឯងគំរាមចង់ប្រើប្រាស់កម្លាំងទ័ពប្រឆាំងកម្ពុជា ក្រោមហេតុផលកងទ័ពថៃដើរជាន់មីនដើម្បីយកលេសឈ្លានពានកម្ពុជាម្តងហើយម្តងទៀត ។ នេះជាការយកល្បិចចាស់ដដែលៗមកចោទប្រកាន់កម្ពុជា ពីព្រោះកងទ័ពថៃធ្លាប់ប្រើប្រាស់ល្បិចនេះនាពេលកន្លងមក ។

កម្ពុជាគោរពយ៉ាងម៉ឺងម៉ាត់តាមកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ហើយកម្ពុជាសង្ឃឹមថា ភាគីថៃនឹងគោរពបាននូវចំណុចឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ជាពិសេស ចំណុចទី២ ដែលចែងថា ភាគីទាំងពីរមិនត្រូវចល័តកងទ័ព រាប់បញ្ចូលទាំងការមិនដើរល្បាតហួសពីទីតាំងរបស់ខ្លួនឈរជើងឡើយ ៕

ប្រទេសថៃ ៖ កាលពីថ្ងៃទី១២ ខែសីហា ឆ្នាំ២០២៥ សារព័ត៌មានថៃ Matichon រាយការណ៍ថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានចោទប្រកាន់កម្ពុជាបង្កប់មីនដែលបំពានកិច្ចព្រមព្រៀងបទឈប់បា.ញ់ ព្រមទាំងប្រកាសប្រើប្រាស់សិទ្ធិការពារកងទ័ពថៃដោយពុំពាក់ព័ន្ធនឹងការចរចា ។ លោកថា កម្ពុជាពុំព្រមទទួលយកលក្ខខណ្ឌដែលថៃបានស្នើទេ ប៉ុន្តែថៃនឹងប្រើប្រាស់កាមេរ៉ាសម្រាប់ការល្បាតនៅតាមព្រំដែន និងគ្រឿងចក្រឈូសឆាយការពារកុំឱ្យកងទ័ពថៃជាន់មីនបន្តទៀត ។

លោក ប៊ុនស៊ីន ផាកក្លាង មេបញ្ជាការយោធភូមិភាគ២ បាននិយាយកាលពីថ្ងៃទី១២ ខែសីហា ថា ហេតុការណ៍ទាហានឈុតខ្មៅថៃជាន់មីនពេលកំពុងល្បាតនៅបរិវេណប្រាសាទតាមាន់ធំ ស្ថិតនៅស្រុកបន្ទាយអំពិល ខេត្តឧត្តរមានជ័យ ប្រទេសកម្ពុជា ដែលបណ្តាលឱ្យដាច់ជើងឆ្វេង គឺពេលនេះ មានសុវត្ថិភាពហើយ ។ ហេតុការណ៍នេះកើតឡើងនៅចំណុចរបងលួសខាងលិច និងឆ្ងាយពីប្រាសាទតាមាន់ធំ ប្រមាណ១គីឡូម៉ែត្រ ។

ប្រសិនបើស្ថានការណ៍ស្ងប់ស្ងាត់ ថៃនឹងបញ្ជូនភ្នាក់ងារដោះមីនមកពីមជ្ឈមណ្ឌលដោះមីនមនុស្សធម៌ ចូលមកដោះមីននៅបរិវេណកើតហេតុនេះ ។ បើស្ថានការណ៍ពុំស្ងប់ស្ងាត់ ថៃនឹងប្រឆាំងជាមួយកម្ពុជាដោយប្រើប្រាស់កម្លាំងកងទ័ព ពីព្រោះថៃមានសិទ្ធិការពារខ្លួន និងការពារកងទ័ព ។

ថៃកែសម្រួលផែនការល្បាតដើម្បីកុំឱ្យកងទ័ពប្រថុយនឹងគ្រាប់មីននៅព្រំដែន ដោយបង្កើនការប្រើប្រាស់កាមេរ៉ា និងគ្រឿងចក្រធំៗឈូសឆាយក្នុងតំបន់ល្បាត ជំនួសការល្បាតដោយកងទ័ពក្នុងតំបន់នីមួយៗ ។ ក្រៅពីនេះ ការប្រើប្រាស់កាមេរ៉ានឹងអាចបង្កើនការត្រួតពិនិត្យក្នុងចម្ងាយកាន់តែឆ្ងាយ ។ នេះបើតាមការលើកឡើងរបស់លោក ប៊ុនស៊ីន ។

ដោយឡែក លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃ និងជាគណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ និយាយថា រដ្ឋាភិបាលថៃសោកស្តាយចំពោះហេតុការណ៍កងទ័ពរបួសដោយសារជាន់មីនពេលល្បាតនៅតំបន់ព្រំដែន ។ រដ្ឋាភិបាលថៃចាត់ទុកនេះជាហេតុការណ៍ល្មើសអធិបតេយ្យភាព ល្មើសអនុសញ្ញាអូតាវ៉ា និងជាទង្វើអមនុស្សធម៌ ។

លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ និងជាប្រធានមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានបញ្ជាក់ពីការផ្តល់ប្រាក់ឧបត្ថម្ភដល់កងទ័ពរបួសដោយសារជាន់មីន ។ ក្រសួងការពារជាតិនឹងពុំព្រងើយកន្តើយចំពោះហេតុការណ៍នេះ ហើយនឹងចាត់វិធានការដើម្បីការពារអធិបតេយ្យ និងសន្តិសុខជាតិ ។

ក្រៅពីនេះ រដ្ឋាភិបាលថៃបានអំពាវនាវដល់សហគមន៍អន្តរជាតិរួមគ្នាដាក់សម្ពាធលើកម្ពុជា ដើម្បីពន្លឿនកិច្ចសហការបោសសម្អាតមីនជាបន្ទាន់ ។ ក្រៅពីនេះ រដ្ឋាភិបាលថៃស្នើឱ្យរដ្ឋភាគីនៃអនុសញ្ញាអូតាវ៉ាពិនិត្យមើលជំនួយឡើងវិញសម្រាប់កំណត់វិធានការចាំបាច់ផ្សេងទៀតក្នុងគោលបំណងបញ្ឈប់គ្រោះថ្នាក់ដោយសារមីន ។ នេះបើតាមការលើកឡើងរបស់លោក ជិរ៉ាយុ ៕