សម្រាប់អ្នកស្នេហាវិស័យកីឡាជ្រាបមកហើយថាកីឡករបាល់ទាត់ Nick Taylor ដែលជាស្វាមីរបស់តារាចម្រៀង រ៉ាប៊ី សម្រេចចិត្តមិនបន្តដំណើរ ជាមួយក្លិបព្រះខ័នរាជស្វាយរៀងនោះទេ។ អ្នកគាំទ្របានចង្អុលបង្ហាញថាកីឡកររូបនេះគឺកំពុងលេងឱ្យលីគនៅប្រទេសថៃរហូតអ្នកគាំទ្រស្នើសុំកុំឱ្យ Nick លេងឱ្យក្លិបប្រទេសនេះ។

ស្របពេលស្ថានភាពរកាំរកូសរវាងប្រទេសកម្ពុជានិងថៃ បានធ្វើឱ្យអ្នកគាំទ្របានស្នើសុំទៅកាន់តារាចម្រៀងរ៉ាប៊ី កុំឱ្យស្វាមីរបស់ខ្លួនទៅលេងលីគថៃ។ នៅក្នុងការបង្ហោះមួយរបស់តារាចម្រៀង រ៉ាប៊ី មានអ្នកគាំទ្រម្នាក់បានចូលខម្មិនថា «ចែកុំឱ្យបងនីកទៅលេងនៅលីកថៃអី»។ ការខម្មិនក្នុងការស្នើសុំនេះ ម្ចាស់បទ «មាន់ស្រែ» បានឆ្លើយតបវិញថាស្វាមីរបស់ខ្លួនទៅលេងគឺដើម្បីយកបទពិសោធន៍បន្ថែម។
រ៉ាប៊ី បានបញ្ជាក់ដូច្នេះថា «គាត់យកបទពិសោធន៍នៅស្រុកក្រៅ២ ៣កន្លែងសិន ហើយចុងក្រោយគាត់មកកម្ពុជាវិញ»។

នៅថ្ងៃទី១០ មិថុនា កីឡករខ្មែរកាត់អាម៉េរិក Nick Taylor បានប្រកាសលាអ្នកគាំទ្រនិងក្លិបរបស់ខ្លួនដោយបានរៀបរាប់ពីបទពិសោធន៍ក្នុងរយៈពេល២រដូវកាលជាមួយនឹងក្លិបព្រះខ័នរាជស្វាយរៀង។ ក្នុងរយៈពេល២ឆ្នាំមកនេះក្លិបទទួលបានពានរង្វាន់ចំនួន៤។ ក្នុងនោះ Nick Taylor ក៏បានបញ្ជាក់ដែរថាក្នុងនាមជាកីឡាករម្នាក់រូបគេមានមហិច្ឆតា ដេញតាមក្តីសុបិនដើម្បីជំរុញឱ្យក្លាយជាកីឡាករល្អម្នាក់។ Nick ក៏បានរៀបរាប់អារម្មណ៍របស់ខ្លួនជាច្រើនទៀតប៉ុន្តែលោកបានបញ្ជាក់ដែរថាមិនមែនជាការលា ប៉ុន្តែនឹងជួបគ្នាពេលក្រោយ។

គួរបញ្ជាក់ផងដែរថា Nick Taylor មិនត្រឹមតែជាកីឡាករដែលមានប្រជាប្រិយភាពក្នុងប្រទេសកម្ពុជាទេតែលោកថែមទាំងត្រូវប៉ាន់ថតផ្សាយពាណិជ្ជកម្ម, ថត MV ថែមទៀតក្រៅពីអាជីពរបស់ខ្លួន។ លើសពីនេះចាប់តាំងពីរៀបការជាមួយនឹងតារាចម្រៀង រ៉ាប៊ី រូបលោកកាន់តែមានទីផ្សារជាមួយភរិយាខ្លួនដោយបានក្លាយជាទូតសុឆ្ឆន្ទៈផលិតមួយចំនួនទៀតផង។

កូនខ្មែរកាត់អាម៉េរិក រូបនេះ និងតារាចម្រៀង រ៉ាប៊ី បានសម្រេចចិត្តដឹកដៃគ្នាចូលរោងការកាលពីថ្ងៃទី៩ ខែឧសភា ឆ្នាំ២០២៥៕

ប៊ី សុធារី លំដាប់រងកម្មវិធី Miss Cosmo Cambodia 2025 បាននិយាយពាក្យជូនពរទៅកាន់ ឈុំ ចាន់ដារ៉ា Miss Supranational Cambodia 2025 ដែលកំពុងប្រកួតនៅលើឆាកអន្តរជាតិនាទឹកដីប៉ូឡូយ។ ក្នុងនោះ សុធារី ក៏សង្ឃឹមថា ដារ៉ា នឹងអាចធ្វើឱ្យកម្ពុជាចូលកន្លែងណាមួយនៅក្នុងការប្រកួតនេះព្រោះកម្មវិធីនេះកម្ពុជាពុំទាន់ទទួលបានកំណត់ត្រា TOP នៅឡើយទេ។
នាពេលថ្មីៗនេះគេបានឃើញ ផន ស្រីពី និង ប៊ី សុធារី មានការងារជាមួយគ្នាហើយបាន Live ជជែកកម្សាន្តជាមួយនឹងអ្នកគាំទ្ររបស់ខ្លួនប្រកបដោយក្តីស្រលាញ់។ ក្នុងការ live នោះដ្បិតតែមាន Title ជាលំដាប់រង Miss Cosmo Cambodia 2025 មានស្ថាប័ន ផ្សេងគ្នាក្តី ប៊ី សុធារី ក្តីក៏បានជូនពរ ឈុំ ចាន់ដារ៉ា ដែលកំពុងមានភារៈកិច្ចតំណាងជាតិ ខ្មែរ។

ប៊ី សុធារី បាននិយាយថានាងសង្ឃឹមថា ដារ៉ា អាចនាំកម្ពុជាមានកន្លែងណាមួយនៅក្នុងការប្រកួតពីព្រោះកម្ពុជាពុំទាន់បានចូល TOP ឬទទួលបានផ្លែផ្កាអ្វីពីការប្រកួត Miss Supranational នៅឡើយទេ។ សុធារី ក៏ជូនពរឱ្យ ឈុំ ចាន់ដារ៉ា ទទួលបានកន្លែងមួយនៅក្នុងការប្រកួតនេះ។ ពាក្យសម្តីរបស់ ប៊ី សុធារី ជូនពរ ឈុំ ចាន់ដារ៉ា នៅក្នុងការប្រកួត Miss Supranational 2025 បានធ្វើឱ្យអ្នកគាំទ្រវិស័យបវរកញ្ញាមានការចាប់អារម្មណ៍និងសរសើរពីទឹកចិត្តរបស់ ប៊ី សុធារី ផងដែរទោះបីជាស្ថិតក្រោមស្ថាប័នផ្សេងគ្នាប៉ុន្តែបានជូនពរ ដារ៉ា ក្នុងនាមជាខ្មែរតែមួយ។

គួរបញ្ជាក់ផងដែរថា ការប្រកួត Miss Supranational 2025 នៅប្រទេសប៉ូឡូញបានប្រកួតនៅក្នុងវគ្គបឋមហើយខណៈការបង្ហាញខ្លួនរបស់ ឈុំ ចាន់ដារ៉ា គឺទទួលបានការចាប់អារម្មណ៍ច្រើនផងដែរ។ លើសពីនេះកាលពីមុនអ្នកគ្រប់គ្រងកម្មវិធីថ្នាក់ជាតិក៏បានបង្ហើបដែរថា ឈុំ ចាន់ដារ៉ា គឺទទួលបានការពេញចិត្តច្រើនពីម្ចាស់ Sponsor ៕

ថានៅក្នុងសាច់រឿងថៃសម្បូរល្បិចកិច្ចកលមួយរយជំពូកទៅហើយ នៅខាងក្រៅសាច់រឿង ក៏មិនខុសគ្នាប៉ុន្មានទេសូម្បីតែតារាសម្តែងថៃមួយចំនួនក៏អាក្រក់ទាំងក្នុងរឿងនិងក្រៅរឿង។ សូម្បីតែទាហានក៏មិនលើកលែងពោលគឺបើក-បិទច្រកព្រំដែន ជាឯកតោភាគីហើយប្រែ ក្រឡាស់សម្តីយកខ្លួនឯងល្អ។ ទប់ចិត្តមិនជាប់អំពីពាក្យសម្តីក្រឡេកក្រឡុករបស់ថៃពេក តារាចម្រៀង ណុប បាយ៉ារិទ្ធ និងពិធីករល្បីឈ្មោះ ជា វណ្ណារិទ្ធ ចេញមកនិយាយផាំងៗតែ ម្តងថា «បើកបិទៗតាមតែក្បាលវ៉ាល់»។

នៅថ្ងៃទី២៥ មិថុនា តារាចម្រៀងក្នុងទ្រនំរស្មីហង្សមាសលោក ណុប បាយ៉ារិទ្ធ បានចែករំលែកអំពីស្ថានភាពច្រកព្រំដែនហើយបានបញ្ចេញប្រតិកម្មរបស់ខ្លួនថា
«ហត់អត់? បើកបិទៗតាមតែក្បាលវ៉ាល់ចឹង? តិចខូចរបងអស់លុយធ្វើថ្មីទៀត»។
នៅក្នុងការបង្ហោះមួយទៀតតារាចម្រៀងជើងចាស់រូបនេះបានដាក់ចំៗថា « ច្រែះចាប់កង់អស់ហើយ រុញអត់ smooth សោះ ដាក់ប្រេងផង មិនចង់អស់លុយធ្វើថ្មីទៀតហើយ។ ហេតុតែបេះដូងជាអ្នកឈ្លានពាន សូម្បីតែទាហានយាមច្រកព្រំដែនក៏ចេះសម្តែងដូចតារាដែរ»។

មិនខុសគ្នានោះទេដោយសារតែផ្ទះលេង២ ធ្វើអ្វីស្រេចតែចិត្តពេកពិធីករ ជា វណ្ណារិទ្ធ បានលើកឡើងថា «គេកំពុងសម្តែងធ្វើបើកច្រក បើកបិទ ស្រេចតែក្បាលវ៉ាល់វាចឹង ល្បិចJM ម៉ាអាចោរ…»។

គួរបញ្ជាក់ផងដែរថា កាលពីថ្ងៃទី២៤ ខែមិថុនា អ្នកនាំពាក្យមជ្ឈមណ្ឌលគ្រប់គ្រង ស្ថានការណ៍ព្រំដែនកម្ពុជា-ថៃ បានប្រកាសថាថៃពុំបានបិទព្រំដែនជាប់កម្ពុជាទេ គឺច្រក ព្រំដែនទាំងអស់នៅតែបើកដំណើរការធម្មតាគ្រាន់តែថៃរឹតបន្តឹងការឆ្លងដែនដើម្បី សុវត្ថិភាព។

នៅព្រឹកថ្ងៃទី២៥ ខែមិថុនា យោងតាមរបាយការណ៍របស់ប្រធានទីស្នាក់ការត្រួតពិនិត្យ ច្រកទ្វារព្រំដែនអន្តរជាតិអូរស្មាច់ភាគីថៃបានអនុវត្តការបើកទ្វារព្រំដែនឡើងវិញជារៀងរាល់ថ្ងៃគឺ ចាប់ពីម៉ោង ០៦:០០នាទី ដល់ម៉ោង ២២:០០នាទី ដោយកម្រិតនៃការបើកគឺ អនុញ្ញាតឱ្យចេញចូលចំពោះតែអ្នកជំងឺសង្គ្រោះបន្ទាន់និងសិស្សតែប៉ុណ្ណោះ៕

អ្នកបង្កើតមាតិកាដ៏ល្បីឈ្មោះ Q Win បានលាតត្រដាងរឿងកាលពីអតីតកាលធ្លាប់ត្រូវ បានគ្រូទាយទាយថាលោកជាកូនចង្រៃធ្វើឱ្យទំនាក់ទំនងលោកនិងម្តាយលែងដូចមុន។ ទោះយ៉ាងណាបច្ចុប្បន្ន Q Win បានបញ្ជាក់ឱ្យដឹងថាលោកមិនមែនជាកូនចង្រៃនោះទេថែមទាំងជាកូនកតញ្ញូ។

ជឿជាក់ថាអ្នកលេងបណ្តាញសង្គមអាចនឹងពើបប្រទះវីដេអូបែបកំប្លែងៗរបស់អ្នកបង្កើតមាតិកា Q Win ដែលលោកមានស្រុកកំណើតនៅខេត្តបាត់ដំបង។ ជាមួយនឹងប្រជាប្រិយភាពរបស់ខ្លួន Q Win គឺបានសាងភាពល្បីល្បាញសម្រាប់ខ្លួនក្នុងវិស័យ Content Creator លេចមុខតាមកម្មវិធីជាច្រើន។

ទោះយ៉ាងណាទស្សនិកជនធ្លាប់តែឃើញវីដេអូកំប្លែងៗរបស់ Q Win ប៉ុន្តែខ្សែជីវិតរបស់ អ្នកបង្កើតមាតិការូបនេះអ្នកគាំទ្រអាចនឹងមិនទាន់បានដឹងទេថា Q Win ធ្លាប់ត្រូវបានគ្រូទាយទាយថាលោកជាកូនចង្រៃ។

Q Win បានបញ្ចេញអារម្មណ៍របស់ខ្លួននៅលើបណ្តាញសង្គមហ្វេកប៊ុកកាលពីពេលថ្មីៗនេះដោយបានរៀបរាប់ថា «សូមទោសម៉ាក់ កូនពិតជាសូមទោសមែន កូន share ឱ្យម៉ាក់ឃើញ កូនចាំមិនភ្លេចទេ។ បន្ទាប់ពីនឹងម៉ាក់ពិបាកចិត្ត ហើយទៅរកគ្រូទាយ គ្រូទាយ ទាយថាកូនធំឡើងគឺកូនចង្រៃ បំផ្លាញគ្រួសារ កូនខឹងគ្រូទាយនឹងណាស់ ដែលធ្វើឱ្យទំនាក់ទំនងយើង លែងដូចមុន ព្រោះកូនលួចស្ដាប់ឮកូនដឹងថាម៉ាក់មិនជឿទាំងស្រុងទេ តែក៏មានការសង្ស័យដែរ ព្រោះកូនខូចមែនកាលហ្នឹង»។

Q Win បានបន្តទៀតថា តែឥឡូវនេះលោកមិនមែនកូនចង្រៃទេ ជាកូនដែលមើលថែម៉ាក់ ហើយនឹងលោកយាយ បានល្អណាស់។ Q Win ថា «កូនតស៊ូកាត់ទៅរកម៉ាក់ រឹងមាំ ដូចម៉ាក់ វាសានាកូនខុសពីការទាយរបស់គ្រូទាយនោះ ១០០% រយះពេល ៦ ឆ្នាំនេះកូនខំម្នាក់ឯង ដើម្បីឱ្យម៉ាក់ និងលោកយាយ រស់នៅស្រួលមិនបាច់ហត់ ធ្វើការលក់ដូរទៀត កូនធានាចិញ្ចឹមម៉ាក់ ហើយនិងលោកយាយអស់មួយជីវិត…»។

ជាមួយនឹងការលើកឡើងរបស់ Q Win បានធ្វើឱ្យអ្នកគាំទ្រជាច្រើនបញ្ចេញមតិយោបល់របស់ខ្លួនដោយអ្នកខ្លះក៏បាននិយាយថាកុំសូវជឿគ្រូទាយពេក អ្នកខ្លះក៏រំជួលចិត្តចំពោះសំណេររបស់ Q Win ផងដែរ៕

អ្នកនិពន្ធបទចម្រៀងនិងប្រលោមលោកដ៏ល្បីល្បាញលោក សុខ ចាន់ផល បានបង្ហោះសំណេរមួយលើកឡើងអំពីវិស័យភាពយន្តខ្មែរនាពេលបច្ចុប្បន្ននិយាយឆ្គងខ្លាចតែគេមិនដឹងថាសម្តែង។ មតិរបស់លោកត្រូវបានទស្សនិកជនជាច្រើនបង្ហាញការគាំទ្រខណៈមានអ្នកមួយចំនួនថាមិនមែនពេលខ្លះមិនចង់គាំទ្រភាពយន្តខ្មែរនោះទេប៉ុន្តែវាពិបាកក្នុងការគាំទ្រ។

នៅថ្ងៃទី២៤ មិថុនា អតីតអ្នកនិពន្ធចម្រៀងក្នុងផលិតកម្មរស្មីហង្សមាសបានបង្ហោះសំណេរនៅលើបណ្តាញសង្គមថា «ភាពយន្តខ្មែរនាពេលបច្ចុប្បន្ន គេដឹកនាំឱ្យតួសម្ដែងនិយាយស្ទីលល្ខោន ស្ដាប់ទៅឆ្គងណាស់! បើនិយាយធម្មតា ធម្មជាតិៗទៅថី? សម្ដែងឱ្យដូចមែនទែន បានល្អមើល —ខ្លាចតែគេមិនដឹងថា កំពុងសម្ដែង!»។

សំណេររបស់កវីនិពន្ធ សុខ ចាន់ផល ដ្បិតថាមិនច្រើនបន្ទាត់ក្តីប៉ុន្តែមានអ្នកគាំទ្រជាច្រើនបង្ហាញការយល់ស្របនូវអ្វីដែលលោកបានលើកឡើងព្រោះវិស័យភាពយន្តខ្មែរមួយចំនួនវាពិបាកក្នុងការឱ្យទស្សនិកជនគាំទ្រព្រោះតែការសម្តែងនៅមិនទាន់បានល្អនៅឡើយ។

អ្នកលេងបណ្តាញសង្គមបានបញ្ចេញមតិថា «នេះជាពាក្យដែលខ្ញុំចង់និយាយ ដូចមិនទាន់ចែកដាច់ អ្វីទៅហៅថាភាសានិយាយ អ្វីទៅហៅថាភាសាសរសេរ ( សូមធ្វើការស្វែងយល់ឱ្យច្បាស់ ការនិយាយមិនដូចការសរសេរទេ ) សូមអ្នកដឹកនាំរឿងសម័យថ្មី មេត្តាយល់ពីបញ្ហានេះផង»។ «រឿងកុនខ្មែរបច្ចុប្បន្នផ្តោតសំខាន់លើតួអង្គសា្អតៗច្រើនពេកមើលទៅបាត់រូបារម្មណ៍(បាត់រសជាតិខ្មែរ)»។

អ្នកផ្សេងទៀតបានបញ្ចេញមតិថា «ការសំដែង ខ្វះភាពប្រទាក់ក្រឡាគ្នា និយាយទៅអ្នកដឹកនាំរឿងខ្សែភាពយន្តខ្សោយអក្សរសាស្ត្រ អក្សរសិល្បិ៍ខ្មែរ។ នាំគ្នាមើលរឿងថៃនិងរឿងឥណ្ឌូណេស៊ីច្រើនពេក ដឹកនាំរឿងលំនាំតាមគេ ទាំងតួអង្គនិងបរិយាកាស», «តួច្រើនស្អាត! តែស្អាតហើយរវល់ គ្មានពេលទន្ទេញប៉ារ៉ូលទេ»។ «ពិតៗបង ចឹងមែនតាសតាសសាច់រឿងល្អមើលតែគេ ឱ្យតួនិយាយបែបដូចល្ខោន អ្នកមើលរាងចង់តឹងទ្រូង»…៕