ប្រទេសថៃ ៖ កាលពីថ្ងៃទី២៥ ខែមិថុនា ឆ្នាំ២០២៥ សារព័ត៌មាន Thairath រាយការណ៍ថា មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានសំណូមពរឱ្យពលរដ្ឋថៃគួរបញ្ឈប់ការនិយាយញុះញង់ និងបំភ្លៃព័ត៌មានក្នុងបណ្តាញសង្គមដើម្បីកាត់បន្ថយភាពតានតឹង កុំឱ្យពលរដ្ឋទាំងពីរប្រទេស (ខ្មែរ-ថៃ) តទល់គ្នាទៅវិញទៅមកក្នុងបណ្តាញសង្គម ។

កាលពីថ្ងៃទី២៥ ខែមិថុនា នៅវិមានរដ្ឋាភិបាល អ្នកស្រី ម៉ារ៉ាទី ណាលិតា អាន់ដាម៉ូ អគ្គនាយករងនៃនាយកដ្ឋានព័ត៌មាន និងអ្នកនាំពាក្យរងក្រសួងការបរទេស បានសំណូមពរឱ្យពលរដ្ឋថៃឈប់និយាយញុះញង់ និងបំភ្លៃព័ត៌មានក្នុងបណ្តាញសង្គម កុំបង្កើនភាពតានតឹង និងធ្វើឱ្យពលរដ្ឋខ្មែរ-ថៃតទល់គ្នាទៅវិញទៅមកក្នុងបណ្តាញសង្គម ។ ព័ត៌មានមួយចំនួនមានគោលបំណងញុះញង់ បំភ្លៃខុសពីការពិត ក្នុងចេតនាធ្វើឱ្យស្ថានការណ៍ព្រំដែនកាន់តែតានតឹង រហូតឈានដល់ការបិទព្រំដែនជាមួយកម្ពុជា ។

រដ្ឋាភិបាលថៃចង់ឃើញពលរដ្ឋបញ្ចេញមតិស្ថាបនាក្នុងបណ្តាញសង្គម ពុំជ្រៀតជ្រែកកិច្ចការផ្ទៃក្នុងរបស់ប្រទេសជិតខាង ដើម្បីឱ្យស្ថានការណ៍ធូរស្រាល និងបង្កើតបរិយាកាសជជែកគ្នារកដំណោះស្រាយសម្រាប់ភាគីទាំងពីរ ជាពិសេស រដ្ឋាភិបាលត្រូវឆ្លើយតបជាមួយពលរដ្ឋ ។ គោលដៅសំខាន់របស់ថៃ ជាពិសេស ក្រសួងការបរទេស នៅតែចង់ឃើញការត្រឡប់មកកាន់តុចរចា ហើយសង្ឃឹមថា កម្ពុជានឹងឆ្លើយតបតាមការអញ្ជើញចូលរួមកិច្ចប្រជុំគណៈកម្មការព្រំដែនតំបន់ (RBC) ។

ក្រៅពីនេះ លោកស្រីក៏បាននិយាយពីលទ្ធផលកិច្ចប្រជុំមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ថា មានការរឹតបន្តឹងការចេញ-ចូលព្រំដែនកម្ពុជា-ថៃ ប៉ុន្តែថៃអនុញ្ញាតឱ្យឆ្លងដែនសម្រាប់បុគ្គលមានការចាំបាច់តាមគោលការណ៍មនុស្សធម៌ ចូលរួមកិច្ចប្រជុំ អ្នកជំងឺ និងសិស្ស និស្សិត ។ ជាក់ស្តែង នៅខេត្តសុរិន្ទ ខេត្តស្រះកែវ និងខេត្តចាន់បុរី បានបើកព្រំដែនបញ្ជូនអ្នកជំងឺខ្មែរចំនួន៧នាក់ ទៅសង្គ្រោះបន្ទាន់នៅមន្ទីរពេទ្យ ។

ការបិទព្រំដែនកម្ពុជា-ថៃ គឺស្របតាមសេចក្តីប្រកាសរបស់នាយករដ្ឋមន្ត្រី លោកស្រី ផេថងថាន ស៊ីណាវ៉ាត់ ដែលមានបំណងសំខាន់បង្ក្រាបឧក្រិដ្ឋកម្មឆ្លងដែន និងពុំសំដៅដល់ពលរដ្ឋទូទៅ ប៉ុន្តែរដ្ឋាភិបាលអនុវត្តវិធានការដើម្បីសុវត្ថិភាពពលរដ្ឋនៅព្រំដែនប្រទេសទាំងពីរ ។ រដ្ឋាភិបាលថៃនឹងសហការជាមួយប្រទេសនានាដើម្បីទប់ស្កាត់ការឆបោកតាមអនឡាញ ។

គួរបញ្ជាក់ថា រដ្ឋាភិបាលថៃបានចោទប្រកាន់ និងទម្លាក់កំហុសមកលើកម្ពុជា គឺជាទីតាំងឧក្រិដ្ឋឆ្លងដែន និងការឆបោកតាមអនឡាញ ទើបថៃសម្រេចបិទព្រំដែនទាំងអស់ជាមួយកម្ពុជា ពុំមែនបិទព្រំដែនដោយសារជម្លោះព្រំដែនឡើយ ។ ថៃចង់បង្ហាញទៅកាន់ពិភពលោកពីមូលហេតុបិទព្រំដែន ដើម្បីកុំប្រទេសនានាចោទប្រកាន់មកលើថៃបំបិទសិទ្ធិសេរីភាពការឆ្លងដែន ៕

ប្រទេសឥណ្ឌាបានបើកទំព័រប្រវត្តិសាស្ត្រថ្មីមួយក្នុងវិស័យអវកាសរបស់ខ្លួន ក្រោយពីបានបញ្ជូនអវកាសយានិកជនម្នាក់ទៅកាន់អាកាសជាលើកដំបូងក្នុងរយៈពេលជាង ៤ ទសវត្សរ៍។ កាលពីថ្ងៃទី ២៥ ខែមិថុនា ឆ្នាំ ២០២៥ អវកាសយានិកឥណ្ឌា លោក Shubhanshu Shukla បានចូលរួមក្នុងបេសកកម្មអវកាសអន្តរជាតិ Axiom Mission 4 (Ax-4) ដែលដឹកជញ្ជូនដោយយានអវកាស Crew Dragon របស់ក្រុមហ៊ុន SpaceX។ នេះបើតាមសារព័ត៌មាន BBC។

បេសកកម្មនេះបានធ្វើដំណើរឡើងពី មជ្ឈមណ្ឌលអវកាស Kennedy នៅរដ្ឋ Florida សហរដ្ឋអាមេរិក និងគ្រោងនឹងចុះចតនៅស្ថានីយអវកាសអន្តរជាតិ (ISS) នៅក្នុងរយៈពេលប្រហែល ២៦ ម៉ោង បន្ទាប់ពីការបង្ហោះ។ នេះគឺជាលើកដំបូងដែលអវកាសយានិកជនជាតិឥណ្ឌា ធ្វើដំណើរទៅដល់ ISS ហើយក៏ជាជំហានដ៏សំខាន់សម្រាប់ ISRO ក្នុងការរៀបចំសម្រាប់បេសកកម្មអវកាសជាតិផងដែរ។

លោក Shukla កឺជាមនុស្សទីពីររបស់ឥណ្ឌាហើយ ដែលបានធ្វើដំណើរទៅកាន់អវកាស បន្ទាប់ពីអវកាសយានិកប្រវត្តិសាស្ត្រ Rakesh Sharma ដែលធ្វើដំណើរជាមួយសហភាពសូវៀតនៅឆ្នាំ ១៩៨៤។ នៅពេលនោះ គាត់ជាអវកាសយានិក ISRO ដំបូងម្នាក់ ដែលធ្វើដំណើរទៅកាន់ ISS ហើយត្រូវបានមនុស្សជាច្រើនចាត់ទុកថាជាជំហានបើកផ្លូវដំបូង សម្រាប់ការបំពេញបេសកកម្មបញ្ជូនមនុស្សទៅអវកាស (Human Spaceflight) ដោយខ្លួនឯងរបស់ឥណ្ឌា។

គួរបញ្ជាក់ថាបេសកកម្ម Ax-4 នេះ មានអាវកាសិកជនចំនួន ៤ រូបបានចូលរួម រួមមាន Peggy Whitson មកពីសហរដ្ឋអាមេរិក ជាអ្នកគ្រប់គ្រងបេសកកម្ម និងជាស្ត្រីដែលមានរយៈពេលស្ថិតនៅអវកាសយូរបំផុតក្នុងប្រវត្តិសាស្ត្រ ព្រមទាំង Slawosz Uznański មកពីប្រទេសប៉ូឡូញ, Tibor Kapu ប្រទេសហុងគ្រី និងចុងក្រោយមកពីឥណ្ឌា លោក Shubhanshu Shukla។

ជាមួយ បេសកកម្មដែលបានរៀបចំដោយក្រុមហ៊ុនឯកជន Axiom Space ដែលជាការសហការរវាង NASA, ESA, SpaceX, និង ISRO លោក Shukla ត្រូវបានជ្រើសរើសពីកងអាកាសឥណ្ឌា បន្ទាប់ពីធ្វើការប្រកួតប្រជែងតាមលក្ខណៈវិជ្ជាជីវៈ។ លោកបានទទួលការបណ្ដុះបណ្ដាលយ៉ាងតឹងរឹងនៅអាមេរិក និងមូលដ្ឋានអវកាសផ្សេងទៀតក្នុងរយៈពេលជាច្រើនខែ ដើម្បីរៀបចំសម្រាប់ការធ្វើដំណើរមួយនេះ។ រដ្ឋភិបាលឥណ្ឌា បានចំណាយទឹកប្រាក់សរុបប្រមាណ ៥៩ លានដុល្លារ (ស្មើនឹងជាង ៥០០ កោដិរ៊ូពី) សម្រាប់ការចូលរួមនៅក្នុង Ax-4 រួមទាំងចំណាយសម្រាប់ការបណ្តុះបណ្តាល សុវត្ថិភាព និងផ្នែកបច្ចេកទេសផ្សេងៗ។

បន្ទាប់ពីឈានចូលទីអវកាស លោក Shukla បានផ្ញើសារមួយចេញពី Crew Dragon មកកាន់ប្រជាជនឥណ្ឌាថា “យើងបានត្រឡប់ទៅអវកាសវិញបន្ទាប់ពី ៤១ ឆ្នាំ។ ពេលនេះយើងកំពុងវិលជុំវិញភពផែនដីក្នុងល្បឿន ៧.៥ គីឡូម៉ែត្រក្នុងមួយវិនាទី។ ខ្ញុំកំពុងកាន់ទង់ជាតិឥណ្ឌា ដើម្បីបញ្ជាក់ពីកេរ្តិ៍ឈ្មោះរបស់យើង។ នេះគ្រាន់តែជាការចាប់ផ្តើមប៉ុណ្ណោះសម្រាប់កម្មវិធីអវកាសរបស់ឥណ្ឌា។”

ព្រឹត្តិការណ៍នេះបានធ្វើឲ្យប្រជាជនឥណ្ឌាជាច្រើនមានអារម្មណ៍រីករាយ និងមោទនភាពជាខ្លាំង។ អ្នកជំនាញបានថ្លែងថា ភាពជោគជ័យនេះអាចជួយជម្រុញឱ្យយុវជនឥណ្ឌាមានចំណាប់អារម្មណ៍ក្នុងវិស័យវិទ្យាសាស្ត្រនិងបច្ចេកវិទ្យា (STEM) កាន់តែខ្លាំងថែមទៀត។ នៅក្នុងអនាគតគេរំពឹងថា ឥណ្ឌានឹងស្ថាបនាស្ថានីយអវកាសជាតិមួយ នៅមុនឆ្នាំ ២០២៥ ហើយធ្វើដំណើរទៅឋានព្រះច័ន្ទ ក្នុងសតវត្សរ៍នេះ៕

ថៃ ៖ ថៃបានជម្លៀសពលរដ្ឋខ្លួន និងពលរដ្ឋមីយ៉ាន់ម៉ាសរុបចំនួន ១៥,០០០នាក់ចេញពីតំបន់ព្រំដែនភាគខាងត្បូង បន្ទាប់ពីមានការទង្គិចគ្នារវាងយោធាមីយ៉ាន់ម៉ា ជាមួយកងកម្លាំងប្រឆាំងរដ្ឋាភិបាលបានកើតឡើង ដោយយន្តហោះមីយ៉ាន់ម៉ាបានទម្លាក់គ្រាប់បែ.កលើផ្ទះ និងប្រាសាទនានាក្នុងទីក្រុង Muang Phakhong បានបណ្តាលឲ្យភូមិ និងផ្ទះសម្បែងជាច្រើនខូចខាតយ៉ាងធ្ងន់ធ្ងរ។

យោងតាមសារព័ត៌មានថៃ Amrin News បានឲ្យដឹងថានៅថ្ងៃទី ២៥ ខែមិថុនា ឆ្នាំ ២០២៥ មេដឹកនាំជាន់ខ្ពស់នៃកងទ័ព Karenni (KA) បានរាយការណ៍ពីស្ថានភាពប្រយុទ្ធនៅតំបន់ Pae Khong Fai Khun ស្រុក Si Saeng រដ្ឋ Shan ជាប់ព្រំដែនរដ្ឋ Karenni និងរដ្ឋ Kayah ។ នៅថ្ងៃទី២៤ ខែមិថុនា ឆ្នាំ២០២៥ វេលាម៉ោង៥ល្ងាច កងវរសេនាតូចជាច្រើននៃទាហានភូមាបានពង្រឹងកម្លាំងរបស់ខ្លួន រួមជាមួយនឹងអ្នកស្ម័គ្រចិត្ត PNO សរុបប្រមាណជាង១០០០នាក់ ដើម្បីលុកលុយតំបន់ខាងលើ ដែលមានកងកម្លាំងមកពីកងកម្លាំងការពារជាតិការ៉ែន (Karen) ចូលរួមជាមួយក្រុម PNO ដឹកនាំដោយលោកវរសេនីយ៍ទោ Tu Reng ដែលផ្លាស់ទៅតំបន់នោះ។

របាយការណ៍ខាងលើនេះបានបង្ហាញថា ក្នុងអំឡុងពេលនៃការប្រយុទ្ធគ្នា កងទ័ពអាកាសមីយ៉ាន់ម៉ាបានបញ្ជូនយន្តហោះចម្បាំងទៅទម្លាក់គ្រាប់បែ.កពីលើផ្ទះប្រជាជន និងប្រាសាទនានា ដែលបណ្តាលឱ្យមានការបំផ្លិចបំផ្លាញភូមិដ្ឋានរបស់ជនស៊ីវិលយ៉ាងដំណម។ ការប៉ះទង្គិចគ្នានេះបានកើតឡើងនៅភូមិមួយនៅត្រើយខាងកើតនៃទន្លេ Phae Khong ឬ Fai Khun ជាប់ជាមួយព្រំប្រទល់ប្រទេសថៃភាគខាងត្បូង។

ជាមួយគ្នានេះ បើតាមប្រព័ន្ធផ្សព្វផ្សាយរបស់ថៃ គេនៅមិនទាន់អាចកំណត់ចំនួនអ្នកស្លា.ប់ និងរងរបួសក្បែរព្រំដែនដោយសារការប៉ះទង្គិចខាងលើបាននៅឡើយទេ។ ប៉ុន្តែភ្លាមៗក្រោយការទម្លាក់គ្រាប់បែ.កនោះ មានទិន្នន័យមួយបានបង្ហាញថា ពលរដ្ឋថៃ និង មីយ៉ានម៉ាសរុបប្រមាណ ១៥,០០០នាក់ត្រូវបានជម្លៀសទៅកាន់ទីសុវត្ថិភាព នៅក្នុងទឹកដីថៃ៕

ថៃ ៖ អតីតតារាសម្ដែងថៃ Bird Wanchana Sawasdee ដែលបច្ចុប្បន្នគឺជាប្រធានការិយាល័យលេខាធិការអចិន្ត្រៃយ៍នៃកងទ័ពភូមិន្ទថៃ បានថ្កោលទោ.សរដ្ឋាភិបាលកម្ពុជាថាបង្កបញ្ហាដល់ប្រជាពលរដ្ឋខ្លួនឯង។ ព្រមទាំងបញ្ជាក់ថា «ថៃគិតធម្មតាៗទេ តែមេដឹកនាំខ្មែរប្រតិកម្មខ្លាំងពេក»។ នេះបើយោងតាមការចុះផ្សាយរបស់សារព័ត៌មាន Amrin News របស់ប្រទេសថៃ។

នៅថ្ងៃទី 25 ខែមិថុនា ឆ្នាំ 2025 ឧត្តមសេនីយ៍ឯក Wanchana Sawasdee បានបង្ហោះសារនៅបណ្ដាញសង្កមរបស់ខ្លួនថា ៖ ជូនចំពោះប្រជាជនកម្ពុជា សេចក្តីទុក្ខដែលកម្ពុជាកំពុងជួបប្រទះនាពេលនេះគឺដោយសារតែរដ្ឋាភិបាលកម្ពុជាខ្លួនឯង បានចាប់ផ្តើមវាទាំងអស់ តាំងពីបង្កើតស្ថានការណ៍ ដោយដុតព្រះពន្លាដែលជាទីសក្ការៈរបស់ថៃ និងទន្ទ្រានចូលទឹកដីថៃ។

លោកបន្តថា ៖ ថៃមិនដែលចាត់វិធានការណាមួយជាមុនទេ គ្រាន់តែគិតស្រាលពេក ហើយកម្ពុជាក៏ចាប់ផ្តើមសងសឹកជាមួយនឹងវិធានការដែលបង្កបញ្ហាដល់ប្រជាពលរដ្ឋខ្មែរខ្លួនឯង។ ដំបូងចោ.ទថៃថានឹងកាត់ផ្តាច់ចរន្តអគ្គិសនី ដូច្នេះកម្ពុជាក៏កាត់ផ្តាច់អគ្គិសនីឲ្យបានមុន ហើយត្រឡប់ទៅប្រើអគ្គិសនីដែលផលិតក្នុងប្រទេសវិញ។ ទាក់ទងនឹងរឿងអគ្គិសនីនេះ កម្ពុជាបានផ្អាកការប្រើប្រាស់អគ្គិសនីពីប្រទេសថៃ ប៉ុន្តែថៃនៅតែគោរពតាមកិច្ចព្រមព្រៀងផ្គត់ផ្គង់អគ្គិសនីរវាងគ្នានឹងគ្នាដូចធម្មតា មិនកាត់ផ្តាច់ចរន្តអគ្គិសនីដូចកម្ពុជាបានប្រកាសនោះទេ។

ជាមួយគ្នានេះ លោក Wanchana បានអះអាងថា ៖ ចំពោះសំណួរដែលថា តើថៃមានវិធានការកាត់ផ្តាច់ចរន្តអគ្គិសនីកម្ពុជាដែរឬអត់នោះ ចម្លើយគឺបាទ នឹងធ្វើមែន ដែលវាជាវិធានការរួមនឹងវិធានការផ្សេងទៀត ដែលនឹងត្រូវដាក់ចេញតាមស្ថានភាពជាក់ស្ដែង។ ប៉ុន្តែការអនុម័តកាត់ផ្តាច់ចរន្តអគ្គិសនីត្រូវតែមានការយល់ព្រមដោយសភាជាមុនសិន។

ក្រៅពីនេះ ថ្នាក់ដឹកនាំកម្ពុជាក៏ប្រតិកម្មខ្លាំងពេលថៃថាចង់កាត់អ៊ីនធឺណិត កម្ពុជាក៏ឈប់ប្រើអ៊ីនធឺណេតថៃដោយខ្លួនឯងតែម្ដង ថែមទាំងបិទមិនឲ្យមើលរឿងថៃ ឬមិនប្រើផលិតផលថៃជាដើម។ កម្ពុជាបានប្រាប់ពលរដ្ឋខ្លួន ឲ្យឈប់មកទទួលសេវាព្យាបាលនៅខាងថៃ (ប៉ុន្តែថៃនៅតែត្រៀមខ្លួនជួយ បើមានអាសន្ន ថៃអាចទទួលបានគ្រប់ពេល ដូចដែលបានកើតឡើងកន្លងមក)។ ចំណែករឿងទាក់ទងនឹងសិស្សសាលាឆ្លងកាត់ទៅរៀន ថៃតែងតែសប្បាយចិត្តក្នុងការផ្តល់ការអប់រំដល់ពួកគេជានិច្ច។

អ្វីដែលកាន់តែលើស គឺនៅពេលដែលកងទ័ពអាកាសថៃ បានធ្វើពិនិត្យក្នុងការត្រៀមលក្ខណៈសាកល្បងដ្រូននោះ មេដឹកនាំកម្ពុជាបានប្រកាសថានឹងផ្តល់រង្វាន់ដល់ទាហានកម្ពុជារូបណា ដែលអាចបា.ញ់ទម្លាក់ដ្រូនរបស់ថៃទៅវិញ។ រីឯរឿងថៃគិតចង់កាត់ប្រេងឥន្ធនៈ កម្ពុជាស្រាប់តែឈប់នាំចូលពីប្រទេសថៃឲ្យបានមុនដែរ និងថាទៅថ្ងៃខាងមុខនឹងប្រើប្រេងនាំចូលដោយក្រុមហ៊ុនផ្តាច់មុខនៅកម្ពុជាវិញ។

ចុងក្រោយនេះ នៅពេលដែលថៃកំណត់ពេលវេលាច្រកព្រំដែន កម្ពុជាក៏បានកំណត់ពេលវេលាឲ្យត្រួតស៊ីគ្នា បង្ករភាពររអាក់រអួលដល់ប្រជាពលរដ្ឋដែលធ្វើដំណើរតាមព្រំដែន។ ដោយគ្រាន់តែគិតស្រាលៗបែបនេះ ក៏អាចយល់បានថាមេដឹកនាំកម្ពុជាបានដើរហួសផ្លូវហើយជៀសមិនរួចពីការបង្កបញ្ហាដល់ប្រជាជនកម្ពុជានោះទេ៕

មេធាវីរបស់អ្នកស្រី Truong My Lan បាននិយាយកាលពីថ្ងៃទី ២៥ ខែមិថុនា ថា មហាសេដ្ឋីអចលនទ្រព្យវៀតណាមដែលត្រូវបានកាត់ទោសប្រហារជីវិតពីបទក្លែងបន្លំជាមួយនឹងការខូចខាតសរុបចំនួន ២៧ ពាន់លានដុល្លារអាមេរិក (៣៥ ពាន់លានដុល្លារសិង្ហបុរី) នឹងលែងប្រឈមមុខនឹងការប្រហារ.ជីវិតទៀតហើយ ខណៈដែលប្រទេសនេះបានលុបចោលការដាក់ទណ្ឌកម្មលើឧក្រិដ្ឋកម្មចំនួន ៨ រួមទាំងការកេងបន្លំទ្រព្យសម្បត្តិផងដែរ។

លោក Giang Hong Thanh មេធាវីរបស់ក្រុមហ៊ុនអភិវឌ្ឍន៍អចលនទ្រព្យ Truong My Lan បានប្រាប់សារព័ត៌មាន AFP ថា ទោសប្រ.ហារជីវិតរបស់នាងនឹងត្រូវប្តូរទៅជាការជាប់ពន្ធនាគារអស់មួយជីវិតវិញ។ លោកបាននិយាយថា “ខ្ញុំបានជូនដំណឹងដល់អ្នកស្រី Lan នៅព្រឹកនេះ(ថ្ងៃទី២៥ ខែ មិថុនា) នាងសប្បាយចិត្តខ្លាំងណាស់”។

យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា ប្រទេសវៀតណាមកាលពីថ្ងៃទី ២៥ ខែមិថុនា បានលុបចោលទោសប្រហារជីវិតសម្រាប់ឧក្រិដ្ឋកម្មចំនួន ៨ រួមមានចារកម្ម អំពើពុករលួយ និងការប៉ុនប៉ងផ្តួលរំលំរដ្ឋាភិបាលផងដែ។

អ្នកស្រី Lan ដែលមានអាយុ ៦៨ ឆ្នាំត្រូវបានកាត់ទោសក្នុងឆ្នាំ ២០២៤ ពីបទឆបោកប្រាក់ពីធនាគារ Saigon Commercial Bank (SCB) ដែលព្រះរាជអាជ្ញាបាននិយាយថានាងគ្រប់គ្រង និងកាត់ទោសប្រហារជីវិតពីបទឆបោកទឹកប្រាក់សរុបចំនួន ២៧ ពាន់លានដុល្លារអាមេរិក ដែលស្មើនឹង ៦ ភាគរយនៃផលិតផលក្នុងស្រុកសរុបរបស់ប្រទេស។

អ្នកស្រីក៏បានប្តឹងឧទ្ធរណ៍ផងដែរ ចំពោះសាលក្រមក្នុងការកាត់ទោសរយៈពេលមួយខែ ប៉ុន្តែនៅខែធ្នូ ឆ្នាំ ២០២៤ តុលាការក្នុងទីក្រុងហូជីមិញបានកំណត់ថាគ្មានមូលដ្ឋានអ្វីដើម្បីកាត់បន្ថយទោសរបស់នាងឡើយ។

ប៉ុន្តែបន្ទាប់មក តុលាការបាននិយាយថា ទោសរបស់ Lan អាចនឹងត្រូវកាត់បន្ថយមកនៅត្រឹមការជាប់ពន្ធនាគារអស់មួយជីវិតវិញ ប្រសិនបើនាងព្រមប្រគល់ទ្រព្យសម្បត្តិដែលលួចបន្លំ ៣ ភាគ ៤ មកវិញ។

លោក Thanh បាននិយាយថា ប្រសិនបើលោកស្រី Lan ផ្តល់សំណងសម្រាប់ការខាតបង់ចំនួន ៣ ភាគ ៤ រួមជាមួយនឹងលក្ខខណ្ឌមួយចំនួនទៀត លោកស្រីនឹងត្រូវបានបន្តពិចារណាសម្រាប់ការកាត់បន្ថយការកាត់ទោសបន្ថែមទៀត។ លោកបានបន្ថែមថា “អ្នកស្រី Lan នៅតែសហការយ៉ាងសកម្មជាមួយភ្នាក់ងាររដ្ឋនៃប្រទេសវៀតណាម និងដៃគូរបស់នាង ដើម្បីស្វែងរកមធ្យោបាយដោះស្រាយជាមួយទ្រព្យសម្បត្តិ និងការរៀបចំរចនាសម្ព័ន្ធ SCB ដើម្បីឈានទៅដល់ដំណោះស្រាយចុងក្រោយចំពោះករណីនេះ”។ នេះបើតាមប្រភពសារព័ត៌មាន The straight times៕