ខេត្តត្រាត៖ នៅថ្ងៃអង្គារ ទី១៧ ខែមិថុនានេះ កម្ពុជាបានហាមឃាត់ការនាំចូលផ្លែឈើ និងបន្លែរបស់ថៃទាំងអស់ ដើម្បីឆ្លើយតបទៅនឹងការបដិសេធរបស់ប្រទេសថៃក្នុងការបើកច្រកព្រំដែនឲ្យវិលមករកសភាពប្រក្រតីវិញ។ នេះបើយោងតាមការចុះផ្សាយរបស់សារព័ត៌មានថៃ Bangkok Post។

នៅច្រក Ban Hat Lek ក្នុងស្រុក Khong Yai នៃខេត្តភាគខាងកើតវិញ រថយន្តដឹកទំនិញថៃប្រមាណ៣០គ្រឿងកំពុងរង់ចាំនៅច្រកទ្វារព្រំដែនទាំងព្រឹក ព្រោះមានការរារាំងមិនឲ្យឆ្លងកាត់ដោយភាគីកម្ពុជា។ ទំនិញទាំងនោះរួមមានបន្លែស្រស់ ផ្លែឈើ និងគ្រឿងសមុទ្រ រួមទាំងអាហារក្លាសេមួយចំនួនផងដែរ។

លោក Cherdsak Chumnasiaw អធិការស្រុកខុងយ៉ៃ មានប្រសាសន៍ថា ការិយាល័យគយខេត្តកោះកុង បានបញ្ជាឱ្យហាមឃាត់ផលិតផលផ្លែឈើ និងកសិកម្មរបស់ថៃ ប៉ុន្តែបានអនុញ្ញាតឱ្យនាំចូលផលិតផលផ្សេងទៀត រួមទាំងសម្ភារៈសំណង់ផងដែរ។ លុះដល់ម៉ោង ៨ ព្រឹកកម្ពុជាក៏បានបើកទ្វារព្រំដែន ដោយអនុញ្ញាតឱ្យតែរថយន្តដឹកអាហារសមុទ្រស្រស់ និងបង្កកឆ្លងកាត់ប៉ុណ្ណោះ។ ចំណែករថយន្តផ្ទុកបន្លែ និងផ្លែឈើត្រូវបានរារាំងដដែល។

ទោះជាយ៉ាងណា កម្ពុជាក៏នៅតែអនុញ្ញាតឱ្យមានការដឹកជញ្ជូនទំនិញរបស់ថៃផ្សេងទៀតចូលផងដែរ ហើយប្រទេសទាំងពីរនៅតែអនុញ្ញាតឱ្យប្រជាជនទាំងសងខាងអាចដើរឆ្លងកាត់ព្រំដែនទៅមកបានធម្មតា ។ ចំណែកសិស្សានុសិស្សខ្មែរអាចឆ្លងព្រំដែនទៅរៀននៅសាលាថៃក្នុងខេត្តត្រាតដូចធម្មតា។

ការអនុម័តបែបនេះរបស់កម្ពុជា គឺជាការអនុវត្តតាមប្រសាសន៍របស់សម្ដេចតេជោ ហ៊ុន សែន ប្រធានព្រឹទ្ធសភា ដែលបានលើកឡើងកាលពីថ្ងៃចន្ទនេះ ទាមទារឲ្យប្រទេសថៃបើកប៉ុស្តិ៍ត្រួតពិនិត្យទាំងស្រុងឡើងវិញ ព្រោះបើមិនដូច្នោះទេ ថៃនឹងប្រឈមជាមួយការហាមឃា.ត់ការនាំចូលបន្លែ ផ្លែឈើរបស់ខ្លួនមកកម្ពុជាទាំងស្រុង។

ជាមួយគ្នានេះ កម្ពុជាបានស្នើឱ្យតុលាការយុត្តិធម៌អន្តរជាតិ ICJ ដែលមានទីស្នាក់ការនៅទីក្រុងឡាអេ ក្នុងការដោះស្រាយបញ្ហាលើតំបន់ជម្លោះព្រំដែនចំនួនបួន។ ផ្ទុយទៅវិញ ភាគីថៃបានច្រានចោលអាជ្ញាធររបស់តុលាការក្នុងរឿងនេះ ដោយអះអាងថាខ្លួនពេញចិត្តក្នុងការជ្រើសរើសដោះស្រាយតាមរយៈការចរចាទ្វេភាគីផ្អែកលើយន្តការដែលមានស្រាប់វិញ៕

ប្រទេសថៃ ៖ កាលពីថ្ងៃទី១៧ ខែមិថុនា ឆ្នាំ២០២៥ សារព័ត៌មានថៃ Workpoint News រាយការណ៍ថា ម្ចាស់ចម្ការថៃនៅខេត្តជាប់ព្រំដែនកម្ពុជា បានបង្ហាញក្តីបារម្ភប្រសិនបើពលករខ្មែរចាកចេញពីប្រទេសថៃមែននោះ នឹងធ្វើឱ្យម្ចាស់ចម្ការថៃជួបបញ្ហាសេដ្ឋកិច្ចធ្ងន់ធ្ងរមិនខាន ជាពិសេស នៅខេត្តចន្ទបុរី ពីព្រោះពលរដ្ឋថៃពុំធ្វើការលំបាកក្នុងចម្ការទេ ប៉ុន្តែពលករប្រទេសជិតខាងឧស្សាហ៍ព្យាយាម ។

ស្ត្រីជាម្ចាស់ចម្ការម្នាក់នៅជាប់ព្រំដែនកម្ពុជា-ថៃនិយាយថា ប្រសិនបើមានការអំពាវនាវឱ្យពលករខ្មែរត្រឡប់ទៅប្រទេសវិញនោះ ម្ចាស់ចម្ការនៅខេត្តចន្ទបុរី នឹងរងផលប៉ះពាល់យ៉ាងខ្លាំង ពីព្រោះពលរដ្ឋថៃពុំធ្វើការក្នុងចម្ការទេ ដោយសារវាជាការងារធ្ងន់ ខុសពីពលករប្រទេសជិតខាងដែលឧស្សាហ៍ព្យាយាម ។

នៅខេត្តចន្ទបុរី ដាំដុះផ្លែឈើជាច្រើនប្រភេទ ដូចជា ៖ ផ្លែមៀន ទុរេន សាវម៉ាវ និងមង្ឃុត ហើយក្នុងចម្ការភាគច្រើនបានប្រើប្រាស់ពលករខ្មែរ ពីព្រោះពុំសូវមានពលរដ្ឋថៃធ្វើការផ្នែកបេះផ្លែឈើ ។ បើខ្វះខាតកម្លាំងពលករខ្មែរ វានឹងធ្វើឱ្យសេដ្ឋកិច្ចនៅទីនេះធ្លាក់ចុះ ផ្លែឈើថៃមុខជាស្អុយរលួយអស់ ពីព្រោះគ្មានកម្លាំងពលកម្មបេះផ្លែឈើ ។ នេះបើតាមការលើកឡើងរបស់ស្ត្រីជាម្ចាស់ចម្ការនៅថៃ ។

បើតាមការផ្សព្វផ្សាយរបស់សារព័ត៌មានថៃ គឺពលករខ្មែរមកធ្វើការដោយស្របច្បាប់នៅប្រទេសថៃ ស្មើជាង៥សែននាក់ ប្រសិនបើពលករខ្មែរត្រឡប់ទៅប្រទេសវិញនឹងធ្វើឱ្យប៉ះពាល់ដល់វិស័យសំណង់ និងនេសាទរបស់ថៃ ។

លោក ថានីត សូរ៉ាត់ អនុប្រធានសមាគមនិយោជកពាណិជ្ជកម្ម និងឧស្សាហកម្មថៃនិយាយថា ចំនួនពលករខ្មែរមកធ្វើការនៅថៃ ស្មើនឹង៥១៥.៣៥០នាក់ ស្មើ១៣.៥៨% នៃចំនួនពលករ៣ប្រទេស រីឯពលករខ្មែរធ្វើការក្រៅប្រព័ន្ធ គឺស្មើជិត៣សែននាក់ ។ បើរួមបញ្ចូលចំនួនពលករខ្មែរធ្វើការក្នុងប្រព័ន្ធ និងក្រៅប្រព័ន្ធ គឺស្មើប្រមាណ៨សែននាក់ ។

ចំណែកពលករមីយ៉ាន់ម៉ាមានចំនួនច្រើនជាងគេដែលបានមកធ្វើការនៅថៃ គឺរហូតដល់២.៩៩៤.០០០នាក់ (ជិត៣លាននាក់) ឬស្មើ៧៨.៩% ខណៈពលករនៅសល់សល់ គឺពលករឡាវ ស្មើប្រមាណ២៨១.៩៣៥នាក់ ។ បើរាជរដ្ឋាភិបាលកម្ពុជាអំពាវនាវឱ្យពលករត្រឡប់ទៅប្រទេសវិញ ថៃនឹងរងផលប៉ះពាល់ក្នុងវិស័យសំណង់ និងនេសាទ ដោយសារពិបាកស្វែងរកពលករមកធ្វើការជំនួស ៕

Google ប្រឈមនឹងបាត់បង់ចំនួនអ្នកប្រើប្រាស់ និងខាតប្រាក់ចំណូលយ៉ាងច្រើនមហាសាល ក្រោយពីអ្នកប្រើប្រាស់ជាច្រើននាក់លើពិភពលោកចាប់ផ្តើមស្រាវជ្រាវរកចម្លើយក្នុងកម្មវិធី ChatGPT ជំនួស Google ។ បច្ចុប្បន្ន បរិមាណអ្នកប្រើប្រាស់ដែលស្វែងរកទិន្នន័យក្នុង Google Search បានធ្លាក់ចុះជាបន្តបន្ទាប់ ប៉ុន្តែកម្មវិធី ChatGPT បានក្លាយជាជម្រើសដ៏ពេញនិយមក្នុងការរកទិន្នន័យ ។

កាលពីថ្ងៃទី១៦ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា ការពេញនិយមប្រើប្រាស់កម្មវិធី ChatGPT កាន់តែខ្លាំងធ្វើឱ្យគេហទំព័រជាច្រើននៅលើពិភពលោកបាត់បង់ចំនួនអ្នកប្រើប្រាស់ បាត់បង់ប្រាក់ចំណូល ហើយការផ្សព្វផ្សាយពាណិជ្ជកម្មផ្សេងៗបានធ្លាក់ចុះខ្លាំង រហូតដល់គេហទំព័រមួយចំនួនរងផលប៉ះពាល់ត្រូវកាត់បន្ថយបុគ្គលិក ។

យោងតាមរបាយការណ៍របស់ Wccftech បង្ហាញថា នៅខែមិថុនា ឆ្នាំ២០២៥នេះ កម្មវិធី AI បានជួយឱ្យអ្នកប្រើប្រាស់អាចស្វែងរកចម្លើយសង្ខេបយ៉ាងឆាប់រហ័ស ដោយពុំចាំបាច់ចុចមើលគេហទំព័រផ្សេងៗដូចពេលមុនទេ ។ កម្មវិធី AI ទាំងនេះបានបង្ហាញចម្លើយភ្លាមទៅអ្នកប្រើប្រាស់ ហើយវាកាន់តែធ្វើឱ្យការចូលមើលគេហទំព័រផ្សេងៗធ្លាក់ចុះខ្លាំងឡើង ។

គេហទំព័ររងផលប៉ះពាល់ខ្លាំងបំផុតរួមមាន ៖ គេហទំព័រទេសចរណ៍, គេហទំព័រព័ត៌មាន និងផ្តល់ចំណេះដឹង ដែលគេហទំព័រទាំងនេះបានពឹងផ្អែកលើក្រាហ្វិករបស់ Google ជាច្រើនឆ្នាំមកហើយ ។ ពេលអ្នកប្រើប្រាស់ងាកមកស្វែងរកចម្លើយក្នុងកម្មវិធី ChatGPT វាធ្វើឱ្យប្រាក់ចំណូលពីការផ្សព្វផ្សាយពាណិជ្ជកម្មធ្លាក់ចុះផងដែរ ។

នាថ្ងៃអនាគត កម្មវិធីអ៊ីនធើរណេតដែលមនុស្សទូទាំងពិភពលោកធ្លាប់ប្រើប្រាស់អស់រយៈពេលជាង១០ឆ្នាំ ដូចជា Google អាចនឹងបាត់បង់ក៏ថាបាន ដោយសារការចូលមកនូវបច្ចេកវិទ្យាថ្មីៗកាន់តែទំនើប និងឆាប់រហ័ស ។

គួរបញ្ជាក់ថា ChatGPT គឺជា Chatbot ដ៏ឆ្លាតវៃ និងជាកម្មវិធីកុំព្យូទ័រដំណើរការដោយការប្រើប្រាស់បច្ចេកវិទ្យា AI ។ រីឯពាក្យថា ChatGPT គឺជាពាក្យកាត់របស់ពាក្យ Chat Generative Pre-trained Transformer ដែលបង្ហាញពីសមត្ថភាពក្នុងការបង្កើតខ្លឹមសារថ្មីពីការរៀនសូត្រ និងវិភាគទិន្នន័យ ។

ChatGPT ត្រូវបានបង្កើតឡើងដោយ OpenAI គឺជាក្រុមហ៊ុនស្រាវជ្រាវបច្ចេកវិទ្យា AI ឈានមុខលើពិភពលោក ។ OpenAI បានដាក់ឱ្យប្រើប្រាស់កម្មវិធីនេះលើកដំបូងកាលពីខែវិច្ឆិកា ឆ្នាំ២០២២ បច្ចុប្បន្ន កម្មវិធីនេះត្រូវបានប្រើប្រាស់យ៉ាងទូលំទូលាយលើពិភពលោកយ៉ាងឆាប់រហ័សក្នុងរយៈពេលមិនដល់២ឆ្នាំ ៕

ប្រទេសថៃ ៖ កាលពីថ្ងៃទី១៧ ខែមិថុនា ឆ្នាំ២០២៥ សារព័ត៌មានថៃរាយការណ៍ថា កសិករថៃបានសំណូមពរទៅកាន់រដ្ឋាភិបាលរបស់លោកស្រី ផេថងថាន ស៊ីណាវ៉ាត់ ជួយដោះស្រាយបញ្ហាផ្សេងៗ និងកុំផ្តោតតែលើបញ្ហាព្រំដែនកម្ពុជា-ថៃ រហូតទម្លាក់បញ្ហាផ្សេងៗចោលធ្វើឱ្យកសិករជួបទុក្ខលំបាក ។ កសិករថៃថា បញ្ហាព្រំដែនកម្ពុជា-ថៃ គឺមានក្រសួងសន្តិសុខ ក្រសួងការពារជាតិ និងកងទ័ពទទួលខុសត្រូវ រីឯក្រសួងកសិកម្ម និងពាណិជ្ជកម្ម គួរងាកមកដោះស្រាយបញ្ហាតម្លៃស្រូវកសិករធ្លាក់ចុះ ។

កាលពីថ្ងៃទី១៧ ខែមិថុនា លោក សាណាម មឿងនីល កសិកររស់នៅខេត្តឆ័យណាត បាននិយាយមកកាន់សារព័ត៌មានថា កសិករខេត្តឆ័យណាត សូមផ្តាំផ្ញើទៅកាន់រដ្ឋាភិបាលលោកស្រី ផេថងថាន ស៊ីណាវ៉ាត ដែលកំពុងប្រឈមនឹងបញ្ហាជាច្រើននៅថៃ ដូចជា ៖ សេដ្ឋកិច្ច សង្គម និងថ្នាំញៀន ជាពិសេស បញ្ហាតានតឹងនៅតំបន់ព្រំដែនជាមួយប្រទេសជិតខាង ដែលកំពុងទទួលបានការចាប់អារម្មណ៍ ។

ចំណែកកសិករថៃវិញនៅមានបញ្ហាជាច្រើនដែលរដ្ឋាភិបាលពុំអាចដោះស្រាយឱ្យល្អប្រសើរឡើង គឺបញ្ហាតម្លៃអង្ករធ្លាក់ចុះធ្វើឱ្យកសិករថៃនៅទូទាំងប្រទេសជួបទុក្ខលំបាក ពីព្រោះតម្លៃស្រូវធ្លាក់ចុះទាប ជាពិសេស នៅខេត្តឆ័យណាត តម្លៃស្រូវដែលប្រកាសទិញពីកសិករ គឺចាប់ពី៥,៨០០បាត ទៅ៦,៣០០បាតក្នុង១តោន (ឬពី១៧៥ដុល្លារ ទៅ១៩០ដុល្លារក្នុង១តោន) ។ ប៉ុន្តែពេលកសិករយកស្រូវទៅលក់ជាក់ស្តែង គឺតម្លៃចាប់ពី៥,៨០០បាត ទៅ៥,៩០០បាតក្នុង១តោនប៉ុណ្ណោះ ដោយខាងរោងម៉ាស៊ីនកិនស្រូវប្រាប់ថា មកពីស្រូវរបស់កសិករមានសំណើម ទើបលក់បានតម្លៃថោក ។

លោក សាណាម មឿងនីល កសិករខេត្តឆ័យណាត ពុំចង់ឱ្យរដ្ឋាភិបាលថៃយកបញ្ហាព្រំដែនមកបិទបាំងទុក្ខលំបាករបស់កសិករនៅទូទាំងប្រទេសទេ ដោយលោកថា បញ្ហាព្រំដែនជាមួយប្រទេសជិតខាង គឺមានក្រសួងសន្តិសុខ, ក្រសួងការពារជាតិ និងកងទ័ពទទួលខុសត្រូវហើយ ។ ដូច្នេះ ក្រសួងពាណិជ្ជកម្មគួរដោះស្រាយបញ្ហារបស់កសិករ មិនមែនទុកចោលបញ្ហាទាំងអស់ក្នុងប្រទេសថៃពុំដោះស្រាយ ដោយសារស្ថានការណ៍ព្រំដែនតានតឹង ។

លោកយល់ឃើញថា បញ្ហាព្រំដែនជារឿងនយោបាយដែលត្រូវដោះស្រាយតាមរយៈនយោបាយ ហើយការប្រយុទ្ធគ្នារឿងព្រំដែនប្រហែលជាមិនកើតឡើងទេ វាគ្រាន់តែជាការបង្កើតស្ថានការណ៍ដើម្បីផលប្រយោជន៍នយោបាយរបស់បុគ្គលមួយក្រុមនៅថៃ ។ ហេតុនេះ លោកសូមផ្តាំផ្ញើទៅរដ្ឋាភិបាលថៃកុំឱ្យបញ្ហាព្រំដែនមកបិទបាំងទុក្ខលំបាករបស់កសិករនៅទូទាំងប្រទេស ៕

ថ្មីៗនេះ នៅសារមន្ទីរសិល្បៈមួយឈ្មោះ Palazzo Maffei ដែលស្ថិតនៅទីក្រុង Verona ប្រទេសអ៊ីតាលី មានហេតុការណ៍មួយកើតឡើងក្នុងខែមេសា ដែលធ្វើឱ្យមនុស្សជាច្រើនភ្ញាក់ផ្អើល។ ក្នុងថ្ងៃនោះ គូស្នេហ៍ភ្ញៀវទេសចរមួយគូ បានចូលទៅក្នុងបន្ទប់តាំងសិល្បៈមួយ ដោយពេលនោះគ្មានបុគ្គលិកកំពុងបម្រើការ។ ពួកគេព្យាយាមថតរូបជាមួយកៅអីសិល្បៈដ៏ស្រស់ស្អាតមានតម្លៃជាង ៥ ម៉ឺនដុល្លារ ហើយក្រោយមកបានធ្វើឱ្យកៅអីនោះបាក់។

កៅអីនោះមានឈ្មោះថា “Van Gogh Chair” ជាកៅអីដែលត្រូវបានបង្កើតឡើងដោយសិល្បករជនជាតិអ៊ីតាលីឈ្មោះ Nicola Bolla។ គាត់បានយកគំនិតចេញពីគំនូរពិសេសរបស់វិចិត្រករជនហូឡង់ Vincent van Gogh ដែលមានចំណងជើងថា “Bedroom” ដើម្បីបង្កើតកៅអីនេះ។ កៅអីនេះបានប្រើត្បូងគ្រីស្តាល់ Swarovski ជាង ១,០០០ គ្រាប់តុបតែងយ៉ាងល្អិតល្អន់ ហើយមានតម្លៃដល់ទៅ ៥០,០០០ ដុល្លារ អាមេរិក។

នៅក្នុងវីដេអូកាមេរ៉ាសុវត្ថិភាព (CCTV) ដែលទើបតែបានបញ្ចេញនៅថ្ងៃទី ១២ ខែមិថុនា ឆ្នាំ ២០២៥ កន្លងមក សារមន្ទីរបានបង្ហាញឱ្យឃើញថាមាន ស្ត្រីម្នាក់បានព្យាយាមថតរូបធ្វើដូចជាអង្គុយលើកៅអី ប៉ុន្តែមិនបានប៉ះឬអង្គុយពេញលើវាឡើយ។ បន្ទាប់មក មិត្តប្រុសរបស់នាងក៏ព្យាយាមធ្វើដូចគ្នា ប៉ុន្តែគាត់បានអង្គុយពេញលើកៅអីដោយមិនប្រុងប្រយ័ត្ន។ ដោយសារគាត់មានទម្ងន់ធ្ងន់ និងលំនឹងមិនគ្រប់គ្រាន់ ទើធ្វើឱ្យកៅអីបានបាក់។

ពេលដែលពួកគេដឹងថាកៅអីបាក់ខូចខាត ស្ត្រីនោះបានទាញមិត្តប្រុសឲ្យរត់ចេញពីបន្ទប់តាំងពិពណ៌យ៉ាងលឿន។ ពួកគេមិនបានរាយការណ៍ ឬសុំទោសបុគ្គលិកសារមន្ទីរនោះឡើយ។ ពួកគេបានទុកកៅអីដែលខូចនៅទីនោះ ហើយគេចខ្លួនទៅបន្តទស្សនាអ្វីផ្សេង ដូចជាអ្វីមិនកើតឡើង។ យ៉ាងណាមិញ ក្រោយពីកៅអី Van Gogh ត្រូវបានបាក់ សារមន្ទីរ Palazzo Maffei បានធ្វើរបាយការណ៍ទៅប៉ូលីសក្នុងតំបន់ផងដែរ។ ប៉ុន្តែ ភ្ញៀវទេសចរទាំងពីរនាក់នោះនៅមិនទាន់ត្រូវបានស្គាល់អត្តសញ្ញាណ ហើយមិនទាន់មានការចាប់ខ្លួន ឬការចោទប្រកាន់ផ្លូវការណាមួយឡើយ។

សារមន្ទីរបាននិយាយថា ការប្រព្រឹត្តិរបស់គូស្នេហ៍នេះ គឺជាការប្រមាថដ៏ធ្ងន់ធ្ងរទៅលើសិល្បៈ និងសម្បត្តិដ៏មានតម្លៃ។ ពួកគេបានបង្ហាញការមិនគោរព មិនយកចិត្តទុកដាក់ ហើយមិនទទួលខុសត្រូវចំពោះវត្ថុសិល្បៈដ៏មានតម្លៃផងដែរ។

បច្ចុប្បន្ននេះ កៅអី “Van Gogh Chair” កំពុងត្រូវបានជួសជុលវិញដោយជោគជ័យ ដោយក្រុមជួសជុលមានជំនាញ និងក្រុមសន្តិសុខ ហើយវាត្រូវបានដាក់តាំងឡើងវិញនៅក្នុងសារមន្ទីរ ដូចដើម។ ប៉ុន្តែជនល្មើសនៅតែមិនទាន់ចូលមកទទួលកំហុស៕