ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី១៨ ខែមិថុនា ឆ្នាំ២០២៥ ឱ្យដឹងថា ប្រាក់ចំណូលរបស់អាជីវករថៃលក់ទំនិញនៅព្រំដែនកម្ពុជា-ថៃបានធ្លាក់ចុះយ៉ាងខ្លាំង កន្លងមក អាជីវករថៃធ្លាប់ទទួលបានចំណូល១ម៉ឺនបាតក្នុង១ថ្ងៃ ពេលនេះ ចំណូលធ្លាក់ចុះមកនៅត្រឹម១០០បាតប៉ុណ្ណោះក្នុង១ថ្ងៃ តាំងពីមានបញ្ហាព្រំដែន ។ អាជីវកទាំងនេះបារម្ភពីបញ្ហាព្រំដែនអូសបន្លាយប៉ះពាល់ដល់ចំណូល និងសំណូមពរឱ្យរដ្ឋាភិបាលពន្លឿនដោះស្រាយបញ្ហាដើម្បីកាត់បន្ថយការលំបាករបស់ពលរដ្ឋ ។

ភាគីកម្ពុជា និងថៃបានបើកច្រកព្រំដែនជប់គគី-សាយតាគូ (ខេត្តឧត្តរមានជ័យ-ខេត្តបុរីរាំ) ដើម្បីឱ្យពលរដ្ឋទាំងពីរប្រទេសឆ្លងដែនទិញទំនិញទៅវិញទៅមក ដោយអនុវត្តតាមគោលការណ៍កាត់បន្ថយថ្ងៃបើក-បិទព្រំដែន គឺពី៧ថ្ងៃក្នុង១សប្តាហ៍ មកនៅត្រឹម៣ថ្ងៃក្នុង១សប្តាហ៍ (ថ្ងៃអង្គារ ថ្ងៃពុធ និងថ្ងៃព្រហស្បតិ៍) ។ ភាគីថៃបើកព្រំដែននៅម៉ោង៩ព្រឹក រីឯកម្ពុជាបើកព្រំដែនម៉ោង១០ព្រឹក និងបិទពេលវេលាដូចគ្នា គឺម៉ោង១២ថ្ងៃត្រង់ ។

ការផ្លាស់ប្តូរម៉ោងបើក-បិទព្រំដែននេះធ្វើឱ្យពលរដ្ឋកម្ពុជា និងថៃ នៅសល់ពេលតែ២ម៉ោងប៉ុណ្ណោះក្នុង១ថ្ងៃ ហើយធ្វើឱ្យការលក់ដូរនៅច្រកព្រំដែនជប់គគី-សាយតាគូ ស្ងាត់ជ្រងំ ។ ពលរដ្ឋកម្ពុជា-ថៃបានឆ្លងដែនទិញទំនិញទៅវិញទៅមកមិនដល់១០០នាក់ទេក្នុង១ថ្ងៃ ដែលធ្វើឱ្យប៉ះពាល់ដល់ការលក់ដូររបស់អាជីវករថៃ តូបខ្លះបិទទ្វារដោយសារគ្មានចំណូល តូបខ្លះនៅតែបើកលក់ ប៉ុន្តែទទួលចំណូលតិចតួច ។

បើតាមស្ត្រីអាជីវករថៃម្នាក់លក់ជីកសិកម្ម និងផលិតផលកសិកម្មនៅច្រកព្រំដែនជប់គគី-សាយតាគូ គឺតាំងពីការប៉ះទង្គិចគ្នារវាងកងទ័ពទាំងពីរប្រទេស និងមានវិធានការគ្រប់គ្រងពេលវេលាបើក-បិទព្រំច្រកដែន ធ្វើឱ្យប៉ះពាល់ដល់ការលក់ដូរជាបន្តបន្ទាប់ ។ កាលពីមិនទាន់មានបញ្ហាព្រំដែន អាជីករថៃអាចលក់ដូររាល់ថ្ងៃ និងទទួលចំណូលចំនួន១ម៉ឺនបាតក្នុង១ថ្ងៃ ប៉ុន្តែពេលនេះ ទទួលចំណូលត្រឹមតែ១០០បាតប៉ុណ្ណោះ ហើយស្ទើរតែគ្មានពលរដ្ឋខ្មែរឆ្លងដែនមកទិញជីកសិកម្ម ឬផលិតផលកសិកម្ម ។

អ្នកស្រីបារម្ភថា បើបញ្ហាព្រំដែនអូសបន្លាយយូរទៀតនឹងប៉ះពាល់ដល់ការលក់ដូរកាន់តែខ្លាំង ។ ការពិត អាជីវករថៃ និងពលរដ្ឋទាំងពីរប្រទេសគ្មានបញ្ហាអ្វីជាមួយគ្នាទេ អ្នកស្រីសំណូមពរទៅរដ្ឋាភិបាលពន្លឿនការចរចារកដំណោះស្រាយបញ្ឈប់ជម្លោះយ៉ាងឆាប់រហ័សបំផុត ដើម្បីកាត់បន្ថយផលប៉ះពាល់អាជីវករ និងពលរដ្ឋ ។

ចំណែកស្ត្រីម្នាក់ទៀតលក់សាច់ក្រក ប្រាប់ថា ប្រាក់ចំណូលធ្លាក់ចុះតាំងពីមានបញ្ហាព្រំដែនកើតឡើង ដោយសារពលរដ្ឋកម្ពុជា-ថៃពុំអាចឆ្លងដែនដើម្បីលក់ដូរ-ទិញទំនិញដូចមុន ។ អ្នកស្រីចង់ឱ្យរដ្ឋាភិបាលប្រញាប់ចរចាបញ្ចប់បញ្ហាជម្លោះឱ្យលឿនបំផុត ដើម្បីឱ្យពលរដ្ឋអាចលក់ដូរទំនិញដូចធម្មតា ៕

ប្រទេសអូស្ត្រាលី ៖ កាលពីថ្ងៃទី១៧ ខែមិថុនា ឆ្នាំ២០២៥ ក្រសួងសុខាភិបាលនៅរដ្ឋ New South Wales របស់អូស្ត្រាលី បានដាស់តឿនពលរដ្ឋពីគ្រោះថ្នា.ក់ ដូចជា ៖ ក្អួតចង្អោរ ខូចថ្លើម និងតម្រងនោម និងឈានទៅបាត់បង់អា.យុជីវិត ដោយសារការបរិភោគផ្សិតមរ.ណៈពុលខ្លាំង ។ ផ្សិតនេះត្រូវបានប្រទះឃើញដុះនៅតាមព្រៃធម្មជាតិក្នុងទីក្រុងស៊ីដនី និងដុះក្នុងតំបន់ក្បែរទីក្រុងនាពេលថ្មីៗនេះ ។

Genevieve Adamo ជាអ្នកជំនាញជាន់ខ្ពស់នៅមជ្ឈមណ្ឌលព័ត៌មានសារធាតុពុលនៅរដ្ឋ New South Wales និយាយថា អាការៈពុលរបស់ផ្សិតនេះ រួមមាន ៖ ក្អួតចង្អោរ ខូចថ្លើម និងតម្រងនោម រួមទាំងឈានដល់ស្លាប់ ។ ដូច្នេះ សូមឱ្យពលរដ្ឋកម្ចាត់ផ្សិតនេះដែលដុះក្នុងសួនដំណាំ ឬសួនច្បារសាធារណៈ ព្រមទាំងថែទាំកុមារដែលលេងនៅក្រៅផ្ទះយ៉ាងដិតដល់ ជាពិសេស ពេលកុមារលេងក្បែរដើមឈើធំៗអាចមានផ្សិតដុះ ។

ពលរដ្ឋអូស្ត្រាលីនៅរដ្ឋ New South Wales ចំនួន២៣នាក់ ត្រូវបានបញ្ជូនទៅមន្ទីរពេទ្យដោយសារមានអាការៈធ្វើទុក្ខក្នុងខ្លួនខ្លាំង ក្រោយបរិភោគផ្សិតមរណៈកាលពីឆ្នាំ២០២៤ ក្នុងនោះមានកុមារអាយុក្រោម៥ឆ្នាំ ចំនួន២នាក់ ។ មជ្ឈមណ្ឌលព័ត៌មានសារធាតុពុលទទួលបានសេចក្តីរាយការណ៍ពីការប្រទះឃើញផ្សិតមរណៈ ចំនួន៣៦៣លើក ក្នុងឆ្នាំ២០២៤ និងចំនួន១៩០លើក ក្នុងឆ្នាំ២០២៥ ។

Brett Summerell ជាប្រធានក្រុមវិទ្យាសាស្ត្រនៃសួនរុក្ខសាស្ត្រស៊ីដនី ឱ្យដឹងថា គ្មានវិធីណាងាយស្រួល និងគួរឱ្យជឿជាក់ដើម្បីបែងចែកថា តើផ្សិតព្រៃណាមួយអាចបរិភោគបាន ឬមានជាតិពុលនោះទេ ។ ហេតុនេះ សូមពលករកុំដកផ្សិតព្រៃ ឬបរិភោគផ្សិតព្រៃជាដាច់ខាត ។

ចំណែកក្រសួងសុខាភិបាលនៅរដ្ឋ Victoria ដែលស្ថិតនៅក្បែររដ្ឋ New South Wales ក៏បានហាមពលរដ្ឋផងដែរមិនឱ្យបរិភោគផ្សិតមរណៈ កាលពីដើមខែឧសភា ឆ្នាំ២០២៥ ៕

ប្រទេសថៃ ៖ ក្រោយការបែកធ្លាយកិច្ចសន្ទនាតាមទូរស័ព្ទរវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃនិយាយថា លោកស្រី ផេថងថាន បានទូរស័ព្ទបកស្រាយជាមួយមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង រួចហើយ ។ រីឯការអំពាវនាវឱ្យរំលាយសភា គឺលោកស្រីនឹងសិក្សាច្បាប់ពីការរំលាយសភា ប៉ុន្តែគ្មានរដ្ឋប្រហារកើតឡើងទេ ។

កាលពីថ្ងៃទី១៨ ខែមិថុនា លោក Phumtham ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ បាននិយាយពីការបែកធ្លាយកិច្ចសន្ទនាតាមទូរស័ព្ទរវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ ថា លោកស្រី ផេថងថាន បានទូរស័ព្ទជជែកជាមួយមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង រួចហើយ លោកមេបញ្ជាការកងទ័ពភូមិភាគទី២ យល់ពីបញ្ហាដែលនាយករដ្ឋមន្ត្រីថៃលើកឡើង ។

លោក Phumtham និយាយថា ៖ «លោក ប៊ុនស៊ីន យល់ពីអ្វីដែលលោកស្រី ផេថងថាន បាននិយាយ ហើយលោកប្រាប់ថា បើអ្នកសារព័ត៌មានងឿងឆ្ងល់អាចទូរស័ព្ទមកសួរលោកបាន ។ លោក ប៊ុនស៊ីន ពុំខឹងសម្បារទេ ទោះជារឿងនេះកើតឡើងមកលើលោកផ្ទាល់ ដូច្នេះ ខាងសារព័ត៌មានអាចសាកសួរផ្ទាល់មកលោកថា តើការជជែកជាមួយនាយករដ្ឋមន្ត្រីថៃយល់ពីគ្នាដែរឬទេ» ។

លោក Phumtham ក៏បាននិយាយពីលោក ភីយ៉ាប៊ុត ស៊ែងកាណុកគុន អគ្គលេខាធិការនៃគណៈកម្មាធិការវឌ្ឍនភាព អំពាវនាវឱ្យនាយករដ្ឋមន្ត្រីថៃរំលាយសភា ព្រោះបារម្ភអាចមានរដ្ឋប្រហារកើតឡើង ដោយលោក Phumtham និយាយថា គ្មានរដ្ឋប្រហារទេ ។ វាមិនមែនជាតួនាទីរបស់នាយករដ្ឋមន្ត្រីត្រូវរំលាយសភា ខណៈពុំទាន់មានហេតុការណ៍អ្វីកើតឡើង ។

លោកពុំបារម្ភពីការបែកធ្លាយកិច្ចសន្ទនាតាមទូរស័ព្ទនេះទេ ដោយសារមេបញ្ជាការកងទ័ពភូមិភាគទី២ លោក ប៊ុនស៊ីន ក៏បានបញ្ជាក់រួចហើយថា គ្មានអ្វីត្រូវបារម្ភ ។ រីឯករណីដែលមតិជាច្រើនសុំឱ្យរំលាយសភានោះ គឺត្រូវតែសិក្សាពីច្បាប់ជាមុនថា តើការរំលាយសភាធ្វើឡើងដោយសារមូលហេតុអ្វី ។

ចំណែកមេបញ្ជាការកងទ័ពភូមិភាគទី២ លោក ប៊ុនស៊ីន បានផ្តល់សម្ភាសន៍ជាមួយសារព័ត៌មានថា នាយករដ្ឋមន្ត្រីថៃបានទូរស័ព្ទមកបកស្រាយជាមួយលោក និងពន្យល់ពីខ្លឹមសារក្នុងកិច្ចសន្ទនាជាមួយសម្តេច ហ៊ុន សែន ប្រធានព្រឹទ្ធសភាកម្ពុជា ដោយសារលោកស្រី ផេថងថាន ចង់ឱ្យស្ថានការណ៍ព្រំដែនកម្ពុជា-ថៃធូរស្រាល ដែលនេះជាការសន្ទានាផ្ទាល់ខ្លួន ។

លោក ប៊ុនស៊ីន បានឆ្លើយតបទៅលោកស្រី ផេថងថាន ថា ៖ «ខ្ញុំគ្មានបញ្ហាអ្វីទេ ខ្ញុំយល់ ។ បន្ទាប់មក លោកស្រី ផេថងថាន ក៏បានអរគុណខ្ញុំដែលយល់ ខ្ញុំគ្មានការខឹងសម្បារឡើយ ។ខ្ញុំធ្វើដើម្បីប្រទេសជាតិ និងផលប្រយោជន៍រួមរបស់ពលរដ្ឋថៃ ។ នៅថ្ងៃទី១៨ ខែមិថុនា នេះ ខ្ញុំធ្វើដំណើរទៅសួរសុខទុក្ខកងទ័ពនៅព្រំដែន ហើយខ្ញុំនៅតែធ្វើការធម្មតា» ៕

Zhao Liying កំពុងក្លាយជាប្រធានបទពិភាក្សាក្នុងចំណោមទស្សនិកជនចិនទៅលើ ភាពយន្ត «What a Wonderful World» ហើយត្រូវបានចាត់ទុកថាជាគម្រោងដែល មិនអាចបំភ្លេចបានក្នុងអាជីពរបស់តារាស្រីរូបនេះ។ទស្សនិកជនចិនបានបញ្ចេញមតិចម្រុះខណៈអ្នកមួយចំនួនបានសើចចំអកតារាស្រីរូបនេះដោយសារចំនួនអ្នកទស្សនាទាប។

យោងតាមប្រព័ន្ធផ្សព្វផ្សាយរបស់ចិន នៅក្នុងតារាងស្ថិតិរបស់តារាស្រីដែលមានចំនួនមើល ជាមធ្យមទាបបំផុតពីឆ្នាំ ២០២៣ ដល់ឆ្នាំ ២០២៥ រាប់ត្រឹមភាគទីមួយប៉ុណ្ណោះ ពោលគឺ តួឯកស្រី Zhao Liying បានបើកសករាជនៃការធ្លាក់ចុះដែលមិនធ្លាប់មានពីមុនមក សម្រាប់តារាកំពូលរបស់ចិន។

ជាមួយនឹងការទស្សនាជាមធ្យម ៨.៨៦ លាននៃ «What a Wonderful World» Zhao Liying កំពុងបាត់បង់កេរ្តិ៍ឈ្មោះយ៉ាងច្រើន។មុននោះនាងធ្លាប់បដិសេធមិនព្រមសម្តែងក្នុងរឿង «Princess Agents 2» ចំនួន៥ដងដែរ ព្រោះនាងចង់ប្តូរទៅសម្តែងរឿងផ្សេង។ នៅពេលនោះ កេរ្តិ៍ឈ្មោះរបស់នាងគឺស្ថិតនៅកំពូលនៃអាជីពរបស់នាង។ ផលិតករ ភាពយន្តជាច្រើនដែលចង់បានតារាស្រីរូបនេះត្រូវចំណាយប្រាក់សន្ធឹកសន្ធាប់ ជាងតារាដទៃទៀតក៏ដោយ។ទោះជាយ៉ាងណាក៏ដោយជាមួយនឹងអ្វីដែលនាងបានបង្ហាញ Zhao Liying កំពុងតែ «ធ្លាក់ពីលើសេះ» នៅក្នុងអាជីពរបស់នាង។

ក្នុងរឿង «What a Wonderful World» ការសម្ដែងរបស់ Zhao Liying ត្រូវបានគេសរសើរក្នុងឈុតជាច្រើន។ ទោះជាយ៉ាងណា ភាពយន្តទាំងមូលមិនបានទទួលលទ្ធផលល្អដោយហេតុផលជាច្រើន។ ដូច្នោះហើយខ្សែភាពយន្តនេះ បានបើកដំណើរការនៅថ្ងៃដំបូង ដែលមានអ្នកចូលមើលត្រឹមតែ ៤ លានដង និងមានចំណែកទីផ្សារ ២%។ សន្ទស្សន៍ ប្រព័ន្ធផ្សព្វផ្សាយរបស់ខ្សែភាពយន្តនេះក៏មិនខ្ពស់ដែរ។

ហេតុផលមួយផ្នែកគឺថាគម្រោង «What a Wonderful World» មិនមែនជាប្រធានបទ ដែលអាចចូលបានយ៉ាងងាយស្រួលសម្រាប់ទស្សនិកជនភាគច្រើននោះទេ។ ខ្សែភាពយន្ត នេះស្វែងយល់ពីរឿងរ៉ាវរបស់មនុស្សដែលមានជំងឺវិកលចរិតដោយបង្កើតបុគ្គលិកលក្ខណៈ៧ ផ្សេងគ្នានៅក្នុងខ្លួន។ នេះជាប្រធានបទគួរឱ្យចាប់អារម្មណ៍ ប៉ុន្តែពិបាកក្នុងការអភិវឌ្ឍ ហើយមិនទាក់ទាញអ្នកទស្សនា។ ទន្ទឹមនឹងនោះ ការអភិវឌ្ឍន៍ស្គ្រីបរបស់ភាពយន្ត មិនស្ថិតស្ថេរ ឈុតជាច្រើនមិនត្រូវបានពន្យល់ច្បាស់លាស់បង្កើតអារម្មណ៍មិនសប្បាយ ចិត្តសម្រាប់អ្នកទស្សនា។ ក្នុងនោះរឿងអាស្រូវរបស់ Zhao Liying បានធ្វើឱ្យនាងបាត់បង់ពិន្ទុហើយទស្សនិកជនងាកចេញ៕

ប្រទេសឥណ្ឌូណេស៊ី ៖ សារព័ត៌មានបរទេសរាយការណ៍ថា អាជ្ញាធរឥណ្ឌូណេស៊ីបានប្រកាសអាសន្នទៅកាន់ពលរដ្ឋ និងភ្ញៀវទេសចរពីគ្រោះថ្នា.ក់ ក្រោយពីភ្នំភ្លើង Lewotobi ស្ថិតនៅប្រជុំកោះស៊ុនដាណយ បានផ្ទុះយ៉ាងខ្លាំងកាលពីថ្ងៃទី១៧ ខែមិថុនា ឆ្នាំ២០២៥ ដោយបញ្ចេញផ្សែងផេះឡើងលើអាកាសរហូតដល់១១គីឡូម៉ែត្រ ។

ការិយាល័យស្រាវជ្រាវភូមិសាស្ត្រឥណ្ឌូណេស៊ីបានប្រកាសអាសន្នកម្រិតខ្ពស់បំផុតពីការផ្ទុះរបស់ភ្នំភ្លើង Lewotobi រួមទាំងដាស់តឿនពលរដ្ឋកុំឱ្យចូលក្បែរបរិវេណភ្នំភ្លើងនេះដាច់ខាត ក្នុងចម្ងាយយ៉ាងហោចណាស់៧គីឡូម៉ែត្រ ។

រហូតមកដល់ថ្ងៃទី១៨ ខែមិថុនា នៅពុំទាន់មានសេចក្តីរាយការណ៍ពីការខូចខាត ឬពលរដ្ឋរងរបួសទេ ប៉ុន្តែអាជ្ញាធរបានជម្លៀសពលរដ្ឋចេញពីភូមិមួយដោយសារមានកម្លាំងរំញ័រកើតឡើងជាបន្តបន្ទាប់ ។ រដ្ឋាភិបាលឥណ្ឌូណេស៊ីសំណូមពរឱ្យពលរដ្ឋពាក់ម៉ាស់ដើម្បីការពារសុខភាពក្រោយពីកំទេចភ្នំភ្លើងបានធ្លាក់មកលើភូមិផ្សេងៗផងដែរ ។

ភ្នំភ្លើង Lewotobi គឺជាភ្នំភ្លើងភ្លោះស្ថិតនៅទិសអាគ្នេយ៍នៃកោះហ្វ័រេជាផ្នែកមួយនៃប្រជុំកោះស៊ុនដាណយ និងជាផ្នែកមួយរបស់ខេត្តនូសាតឺងការ៉ា ។ ភ្នំភ្លើងនេះបានផ្ទុះយ៉ាងខ្លាំងម្តងទៀតកាលពីល្ងាចថ្ងៃទី១៧ ខែមិថុនា កន្លងមក បណ្តាលឱ្យមានផ្សែងផេះហុយឡើងលើរហូតដល់១១គីឡូម៉ែត្រ ។ ភ្នំភ្លើងនេះមានកម្ពស់១,៥៨៤ម៉ែត្រ ធ្លាប់ផ្ទុះខ្លាំងកាលពីខែវិច្ឆិកា ឆ្នាំ២០២៤ ដែលធ្វើឱ្យពលរដ្ឋឥណ្ឌូណេស៊ីស្លាប់ចំនួន៩នាក់ ក្រោយមក វាក៏ផ្ទុះជាបន្តបន្ទាប់ ។

បច្ចុប្បន្ន ឥណ្ឌូណេស៊ីមានភ្នំភ្លើងប្រមាណ១៣០ ហើយភ្នំភ្លើងភាគច្រើនជាភ្នំភ្លើងសកម្ម រួមទាំងភ្នំភ្លើងម៉ារ៉ាពី ។ ឥណ្ឌូណេស៊ីមានទីតាំងស្ថិតនៅលើចិញ្ចៀនភ្លើងប៉ាស៊ីហ្វិក ទើបប្រទេសនេះប្រឈមនឹងការបន្ទុះភ្នំភ្លើង និងគ្រោះរញ្ជួយដីជាញឹកញាប់ ៕

វ៉ាស៊ីនតោន៖ កាលពីថ្ងៃទី ១៧ ខែមិថុនា ប្រធានាធិបតីអាមេរិក លោក ដូណាល់ ត្រាំ នឹងទុកពេលឱ្យក្រុមហ៊ុន ByteDance ដែលមានមូលដ្ឋាននៅប្រទេសចិនរយៈពេល 90 ថ្ងៃទៀត ដើម្បីលក់TikTok ឱ្យសហរដ្ឋអាមេរិក ដោយលើកថ្ងៃផុតកំណត់ពីថ្ងៃទី ១៩​ ខែមិថុនា ទៅពាក់កណ្ដាលខែ កញ្ញា ឆ្នាំ ២០២៥ វិញ នេះបើយោងតាមសេតវិមាន។

យ៉ាងណាមិញ លោក Trump បានពន្យារពេលកំណត់ពីរដងរួចមកហើយ។​ការហាមឃាត់ដើមត្រូវបានគេសន្មត់ថានឹងចាប់ផ្តើមនៅក្នុងខែមករាដោយផ្អែកលើច្បាប់ដែលបានអនុម័តដោយសភា។ កាលពីថ្ងៃអង្គារ អ្នកនាំពាក្យសេតវិមានលោកស្រី Karoline Leavitt បាននិយាយថា “ប្រធានាធិបតី Trump នឹងចុះហត្ថលេខាលើបទបញ្ជាប្រតិបត្តិមួយផ្សេងទៀតនៅសប្តាហ៍នេះ ដើម្បីរក្សា TikTok ឱ្យដំណើរការ។ លោកស្រី Leavitt បន្តថា “ប្រធានាធិបតី Trump មិនចង់ឱ្យ TikTok បិទនោះទេ” ដោយបន្ថែមថារដ្ឋាភិបាលនឹងទុករយៈពេល 3 ខែទៀតដើម្បីប្រាកដថាការលក់ដំណើរការដោយរលូន ដូច្នេះជនជាតិអាមេរិកនៅអាចបន្តប្រើប្រាស់ TikTok ដោយមានទំនុកចិត្តថាទិន្នន័យផ្ទាល់ខ្លួនរបស់ពួកគេមានសុវត្ថិភាព។

កាលពីព្រឹកថ្ងៃអង្គារ ខណៈពេលកំពុងនិយាយជាមួយអ្នកសារព័ត៌មាននៅលើយន្តហោះ Air Force One នៅពេលគេសួរដោយផ្ទាល់ថាតើគាត់នឹងពន្យាពេលទិញយក TikTok ទេ គាត់បានឆ្លើយថា “ប្រហែលហើយ”។ គាត់ក៏បានកត់សម្គាល់ផងដែរថា “ប្រហែលជាត្រូវទទួលបានការយល់ព្រមពីប្រទេសចិនសិន ប៉ុន្តែខ្ញុំគិតថាយើងនឹងទទួលបានវា។ ខ្ញុំគិតថាទីបំផុតលោកប្រធានាធិបតី Xi នឹងយល់ព្រម” ។

គួររំលឹកថា ច្បាប់ដែលអនុម័តដោយសភាគឺតម្រូវឱ្យ TikTok បញ្ឈប់ប្រតិបត្តិការនៅសហរដ្ឋអាមេរិកត្រឹមថ្ងៃទី ១៩ ខែមករា លុះត្រាតែ ByteDance ព្រមលក់ TikTok អោយសហរដ្ឋអាមេរិក ឬធ្វើឱ្យមានវឌ្ឍនភាពធំ។ លោក Trump បានចាប់ផ្តើមអាណត្តិទីពីររបស់គាត់នៅថ្ងៃទី ២០ ខែមករា ហើយបានជ្រើសរើសមិនអនុវត្តការហាមឃាត់នេះទេ។ ដំបូងគាត់បានពន្យារពេលវាដល់ដើមខែមេសា បន្ទាប់មកម្តងទៀតដល់ថ្ងៃទី ១៩ ខែមិថុនា។

កាលពីខែមីនា លោក Trump ក៏បាននិយាយថា លោកនឹងពិចារណាកាត់បន្ថយពន្ធលើទំនិញចិន ប្រសិនបើចិនអាចជួយបញ្ចប់កិច្ចព្រមព្រៀងសម្រាប់ ByteDance ដើម្បីលក់ TikTok ។ កិច្ចព្រមព្រៀងនោះនឹងបង្កើតក្រុមហ៊ុនដែលមានមូលដ្ឋាននៅសហរដ្ឋអាមេរិកថ្មីមួយដើម្បីកាន់កាប់ប្រតិបត្តិការរបស់ TikTok នៅសហរដ្ឋអាមេរិក។ ផែនការនេះគឺថាក្រុមហ៊ុននេះនឹងត្រូវបានគ្រប់គ្រងភាគច្រើន និងដំណើរការដោយវិនិយោគិនអាមេរិក។

ទោះជាយ៉ាងណាក៏ដោយ កិច្ចព្រមព្រៀងនោះត្រូវបានផ្អាក បន្ទាប់ពីប្រទេសចិនបាននិយាយថា ខ្លួននឹងមិនយល់ព្រមទេ ជាពិសេសបន្ទាប់ពីលោក Trump បានប្រកាសពន្ធថ្មីដ៏ច្រើនលើសលប់លើផលិតផលចិន។ ទន្ទឹមនឹងនេះដែរ សមាជិកព្រឹទ្ធសភាគណបក្សប្រជាធិបតេយ្យបានប្រកែកថា លោក Trump មិនមានសិទ្ធិអំណាចផ្លូវច្បាប់ក្នុងការបន្តពន្យាពេលកំណត់នោះទេ។ ពួកគេក៏អះអាងដែរថាកិច្ចព្រមព្រៀងដែលបានស្នើឡើងអាចនឹងមិនបំពេញតាមលក្ខខណ្ឌផ្លូវច្បាប់ទេ។ នេះបើតាមប្រភពសារព័ត៌មាន រ៉យទ័រ៕