ថៃ ៖ លោកស្រី Paethongtarn Shinawatra នាយករដ្ឋមន្ត្រី នៅថ្ងៃព្រហស្បត្តិ៍ ទី១៩ ខែមិថុនា បានបង្ហាញខ្លួនចំពោះមុខសន្និសីតសារព័ត៌មានដើម្បីសម្ដែងការសូមអភ័យទោសជាសាធារណៈពីពលរដ្ឋថៃទាំងអស់ និងប្ដេជ្ញារដោះស្រាយបញ្ហាព្រំដែនជាមួយកម្ពុជាឲ្យបាន។ ក្នុងនោះ លោកស្រីពុំបានបញ្ជាក់ទេថា លោកស្រីនឹងធ្វើការលាលែងពីតំណែង។

យោងតាមសារព័ត៌មានថៃបានឲ្យដឹងថា លោកស្រី Paethongtarn បានសូមទោសពលដ្ឋគ្រប់រូបដែលមានការបែកធ្លាយកិច្ចសន្ទនារបស់លោកស្រីជាមួយសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ។ វាជារឿងពុំគួរកើតឡើងទេ ប៉ុន្តែជាតិចនិកនៃការចរចា ហើយលោកស្រីបានទូរស័ព្ទទៅសូមទោសមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង រួចហើយពីកិច្ចសន្ទនានេះ ។ វាជាការគំរាមកំហែងដល់សន្តិសុខជាតិ ពុំមែនគំរាមកំហែងពលរដ្ឋដែលគិតថា រដ្ឋាភិបាលមានគំនិតផ្ទុយពីកងទ័ព ។

លោកស្រីបន្តថា «ថ្ងៃនេះ (ថ្ងៃទី១៩ ខែមិថុនា) បើយើងចង់ធ្វើអ្វី ឬសម្រេចចិត្តអ្វី ត្រូវតែគិតដល់សុវត្ថិភាពពលរដ្ឋថៃរស់នៅប្រទេសកម្ពុជា និងគិតពីពលរដ្ឋនៅព្រំដែន ។ រដ្ឋាភិបាល និងកងទ័ព គឺជាក្រុមតែមួយ សូមទទួលខុសត្រូវក្នុងការការពារអធិបតេយ្យ ហើយសូមឱ្យពលរដ្ឋគាំទ្ររដ្ឋាភិបាល និងកងទ័ពផងដែរ ។ ពេលនេះ ពុំមែនជាពេលដែលមកឈ្លោះគ្នាឯងទេ ខ្ញុំសូមអភ័យទោសនូវរឿងដែលកើតឡើង ខ្ញុំពុំដឹងថា មានការថតសំឡេង ។ ចាប់ពីពេលនេះ ត្រូវតែប្រុងប្រយ័ត្នរឿងការជជែកគ្នាឱ្យខ្លាំង កងទ័ពរបស់យើងមានទំនុកចិត្តថា បើសាមគ្គីគ្នា យើងនឹងឆ្លងកាត់វិបត្តិនេះ ។»
លោកស្រី ផេថងថាន បានបកស្រាយពីហេតុផលថា នេះជាការជជែកដើម្បីឱ្យបញ្ចប់ការប៉ះទង្គិច ដោយសារអ្នកស្រីតាំងចិត្តចង់ឱ្យស្ថានការណ៍ស្ងប់ស្ងាត់ ដោយពុំដឹងថាមានការថតសំឡេង និងផ្សព្វផ្សាយបែបនេះ ពីព្រោះវាជាការជជែកផ្ទាល់ខ្លួន ។ ក្រៅពីនេះ លោកស្រីក៏បានបញ្ជាឱ្យក្រសួងការបរទេសដាក់លិខិតតវ៉ាតាមរយៈឯកអគ្គរាជទូតកម្ពុជា ករណីថតសំឡេងសន្ទនាតាមទូរស័ព្ទដៃយកទៅផ្សព្វផ្សាយ ដោយលោកស្រីថា ពិភពលោកពុំទទួលស្គាល់ ។

លោកស្រី បានបញ្ជាក់ថា «ចាប់ពីពេលនេះតទៅ ខ្ញុំនឹងមានការប្រុងប្រយ័ត្នបន្ថែមទៀតក្នុងការនិយាយ។ នេះមិនត្រឹមជាការគំរាមកំហែងតូចតាចនោះទេ ប៉ុន្តែជាការគំរាមកំហែងដល់សន្តិសុខជាតិ រវាងរដ្ឋាភិបាល និងយោធាដែលអាចនាំឲ្យមានការប្រយុទ្ធគ្នា។»

លោកស្រី Paethongtarn បានអំពាវនាវឲ្យឲ្យមានការរួបរួមគ្នាជាធ្លុងមួយ ជាមួយការនិយាយថា «នេះមិនមែនជាពេលដែលយើងឈ្លោះគ្នាទេ។ វាជាពេលដែលយើងត្រូវសហការ និងរួមកម្លាំងគ្នាឲ្យបានរឹងមាំ ដើម្បីការពារអធិបតេយ្យភាពរបស់យើង»។

ជាមួយគ្នានេះ បើទោះជាមានសមាជិកសភា គណបក្សនយោបាយ និងប្រជាពលរដ្ឋថៃនាំគ្នាធ្វើបាតុ.ក.ម្មទាមទារឲ្យលោកស្រីចុះហត្ថលេខាលាលែងពីតំណែងជានាយករដ្ឋមន្រ្តីក៏ពិតមែន ប៉ុន្តែលោកស្រីពុំទាន់ឆ្លើយតបទៅនឹងសំណើរណាមួយនៅឡើយទេ។ ជាងនេះទៅទៀត ដូចបានរៀបរាប់នៅចំពោះមុខសន្និសីតសារព័ត៌មាន គឺលោកស្រី Paethongtarn បានបញ្ជាក់ថា នឹងព្យាយាមស្ដារស្ថានការណ៍ឡើងវិញ ព្រមទាំងអះអាងពីទំនាក់ទំនងរវាងរដ្ឋាភិបាល និងយោធា ថាគ្មានភាពរង្គោះរង្គើរណាមួយឡើយ ថែមទាំងប្ដេជ្ញានឹងសហការគ្នាដើម្បីផលប្រយោជន៍ជាតិទៅថ្ងៃខាងមុខផងដែរ៕

ថៃ ៖ នាយករដ្ឋមន្ត្រីថៃ លោកស្រី ផែថង់ថាន ស៊ីណាវ៉ាត្រ បានបង្ហោះសំណេរមួយនៅលើបណ្ដាញទំនាក់ទំនងសង្គម Instagram ដែលមានអត្ថន័យចង់បង្ហាញអំពីសម្ពាធផ្លូវចិត្ត ប៉ុន្តែសំណេរនោះត្រូវបានលុបចេញវិញ ក្រោយបង្ហោះបានតែបន្តិចប៉ុណ្ណោះ។

ក្រោយប្រទេសថៃមានភាពរកាំរកូសជាមួយកម្ពុជាលើបញ្ហាព្រំដែន បញ្ហាច្រកទ្វារអន្តរជាតិ និងបញ្ហាក្នុងប្រទេសជាច្រើនដែលត្រូវដោះស្រាយ ក្នុងនាមជានាយករដ្ឋមន្រ្តីគេសង្កេតឃើញថា លោកស្រី ផែថង់ថាន ស៊ីណាវ៉ាត្រ ហាក់ទទួលរងសម្ពាធយ៉ាងធ្ងន់ធ្ងរពីសំណាក់ភាគីជម្លោះ ប្រជាជនថៃ និងសមាជិកសភាដែលមកពីបក្សប្រឆាំង។

នៅលើប្រព័ន្ធ Instagram លោកស្រីបានបង្ហោះសំណេរជាភាសាអង់គ្លេសប៉ុន្មានឃ្លាដែលមានអត្ថន័យថា «មនុស្សមិនសម្ដែងធ្វើជាបាក់ទឹកចិត្តនោះទេ។ ប៉ុន្តែពួកគេសម្ដែងធ្វើជាមិនអី។ សូមចងចាំចំណុចនេះ ត្រូវមានចិត្តទូលាយ។» បន្ទាប់ពីបង្ហោះសារនេះទៅក្នុង Story របស់ខ្លួនបានបន្តិច ស្រាប់តែលោកស្រី ផែថងថាន បានលុបវាវិញ។

គួរឲ្យដឹងថា នាព្រឹកថ្ងៃព្រហស្បត្តិ៍ ទី១៩ ខែមិថុនា នេះលោកស្រី ផែថង់ថាន មានកាលវិភាគត្រូវប្រជុំមួយជាមួយក្រុមប្រឹក្សារបស់លោកស្រីនៅវិមាន Phitsanulok ប៉ុន្តែលោកស្រីបានលុបចោលការប្រជុំនោះ ហើយប្រញាប់ធ្វើដំណើរទៅកាន់វិមានរដ្ឋាភិបាលក្នុងទីក្រុងបាងកកវិញ ដើម្បីប្រជុំបន្ទាន់ជាមួយឧបនាយករដ្ឋមន្រ្តី លោក Phumthan Wechayachhai , អនុរដ្ឋមន្រ្តី និងសមាជិកជាច្រើនទៀតលើផែនការបិទព្រំដែនជាមួយកម្ពុជាទាំងស្រុង។

យ៉ាងណាមិញ ការបង្ហាញខ្លួនរបស់លោកស្រីត្រូវគេដឹងថា គឺបានធ្វើដំណើរតាមផ្លូវវាង ព្រោះស្របពេលជាមួយគ្នានេះ មានក្រុមបាតុករជាច្រើនបានប្រមូលផ្ដុំគ្នាក្នុងទីក្រុងបាងកក ដើម្បីទាមទារឲ្យលោកស្រីលាលែងពីតំណែង៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath នៅថ្ងៃទី១៩ ខែមិថុនា ឆ្នាំ២០២៥ ឱ្យដឹងថា បណ្តាញនិស្សិត និងប្រជាជនដើម្បីកំណែទម្រង់ប្រទេសថៃ បានប្រមូលផ្តុំគ្នាតវ៉ាទាមទារឱ្យនាយករដ្ឋមន្ត្រី លោកស្រី ផេថងថាន ស៊ីណាវ៉ាត់ លាលែងពីតំណែង ក្រោយពីការបែកធ្លាយកិច្ចសន្ទនារបស់លោកស្រីតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។ សមត្ថកិច្ចបានពង្រាយកងកម្លាំងនៅតាមចំណុចតវ៉ាយ៉ាងតឹងរ៉ឹង ដើម្បីទប់ស្កាត់ការប្រើប្រាស់អំពើហិង្សាពីសំណាក់ក្រុមអ្នកតវ៉ា ។

កាលពីវេលាម៉ោង៩និង៣០នាទី ថ្ងៃទី១៩ ខែមិថុនា នៅស្ពានសាម័យមេរុឆេត បណ្តាញនិស្សិត និងប្រជាជនដើម្បីកំណែទម្រង់ប្រទេសថៃ បានប្រមូលផ្តុំគ្នាតវ៉ាទាមទារឱ្យនាយករដ្ឋមន្ត្រីថៃ លោកស្រី ផេថងថាន លាលែងពីតំណែង ។ ក្រុមអ្នកតវ៉ាបានធ្វើដំណើរមកតវ៉ាតាំងពីពេលព្រឹក ហើយពួកគេបានឡើងនិយាយលើវេទិកាម្តងម្នាក់ ដោយគោលបំណងនៃការតវ៉ានេះ គឺអំពាវនាវឱ្យលោកស្រី ផេថងថាន ទទួលខុសត្រូវនូវទង្វើរបស់ខ្លួន ។

ជាមួយគ្នានេះ សមត្ថកិច្ចថៃបានពង្រាយកងកម្លាំងយ៉ាងច្រើនការពារនៅមុខវិមានរដ្ឋាភិបាលយ៉ាងតឹងរ៉ឹង រួមទាំងមានរថយន្តសមត្ថកិច្ចចតតម្រៀបគ្នាជារបង ។ នៅព្រឹកថ្ងៃទី៩ ខែមិថុនា ក៏មានការបិទផ្លូវចាប់ពីផ្លូវបំបែកព្រះណាខន, ផ្លូវពិស្នុលោក រហូតដល់ផ្លូវបំបែកសួនមិសសាកាន់ ប៉ុន្តែក្រោយមក ផ្លូវទាំងនេះត្រូវបានបើកឱ្យពលរដ្ឋធ្វើដំណើរឡើងវិញ ។

បណ្តាញនិស្សិត និងប្រជាជនដើម្បីកំណែទម្រង់ប្រទេសថៃ ក៏បានអំពាវនាវឱ្យគណបក្សនយោបាយទាំងអស់ដកខ្លួនចេញពីការចូលរួមជាមួយរដ្ឋាភិបាលដើម្បីបង្ហាញពីគោលជំហរពុំទទួលយកទង្វើរបស់នាយករដ្ឋមន្ត្រីថៃ និងគាំទ្រកងទ័ព ។ ក្រុមអ្នកតវ៉ាលើកឡើងថា ការលាលែងពីតំណែង គឺជាដំណោះស្រាយតែមួយគត់ដែលនាយករដ្ឋមន្ត្រីគួរជ្រើសរើស ប្រសិនបើនៅតែគោរពពលរដ្ឋ ។

គួរបញ្ជាក់ថា កាលពីថ្ងៃទី១៨ ខែមិថុនា ក្រោយពីមានការបែកធ្លាយកិច្ចសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ បានធ្វើឱ្យពលរដ្ឋថៃបង្ហាញការមិនពេញចិត្តយ៉ាងខ្លាំង ។ មតិខ្លះថា លោកស្រីគ្មានចំណេះដឹងផ្នែកនយោបាយ គ្មានភាពជាអ្នកដឹកនាំ និងធ្វើឱ្យប៉ះពាល់ដល់កិត្តិយស មុខមាត់ប្រទេសជាតិ និងប៉ះពាល់កងទ័ពថៃដែលខំបម្រើជាតិ ។

លោកស្រី ផេថងថាន ស៊ីណាវ៉ាត់ កាន់តែបាត់បង់ទំនុកចិត្តពីពលរដ្ឋថៃ ក្រោយពីលោកស្រីនិយាយតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ថា ជំហររបស់លោកស្រី គឺមិនដូចនឹងជំហរកងទ័ពថៃទេ ៕

ប្រទេសហ្វីលីពីន៖ មន្ត្រីប៉ូលីសនៅក្នុងប្រទេសហ្វីលីពីន ថ្មីៗនេះ ត្រូវបានគេផ្តល់សារដ៏តឹងរឹងមួយថា ត្រូវសម្រក់ទម្ងន់តាមស្ដង់ដារក្នុងរយៈពេលមួយឆ្នាំ បើមិនដូច្នោះទេនឹងត្រូវដកចេញពីតួនាទី។ អគ្គស្នងការនគរបាលជាតិហ្វីលីពីន (PNP) លោក Nicolas Torre III បានប្រកាសថា មន្ត្រីដែលលើសទម្ងន់ត្រូវតែសម្រកទម្ងន់ ដើម្បីរក្សាកម្លាំង។ លោកបាននិយាយថា ច្បាប់នេះអនុវត្តចំពោះមន្ត្រីប៉ូលិសគ្រប់គ្នា រាប់ចាប់ពីមន្ត្រីជាន់ខ្ពស់រហូតដល់អ្នកល្បាត ទាំងស្ត្រីនិងបុរស។ នេះបើតាមប្រភបសារព័ត៌មានក្នុងស្រុក The Philippine Star ចុះផ្សាយកាលពីថ្ងៃទី ១៧ ខែមិថុនា ឆ្នាំ ២០២៥។

ឧត្តមសេនីយទោ Jean Fajardo អ្នកនាំពាក្យ PNP បាននិយាយថា “វាមានសារៈសំខាន់ខ្លាំងណាស់សម្រាប់មន្រ្តីប៉ូលីសដើម្បីឱ្យមើលទៅសមរម្យ និងមានសុខភាពល្អ” ។ “វាបង្ហាញថាមានវិន័យនៅក្នុងអង្គភាពរបស់យើង។”

យោងតាមច្បាប់ដែលមានស្រាប់ (ច្បាប់សាធារណៈលេខ 6975) មន្ត្រីនគរបាលគួរថ្លឹងទម្ងន់មិនលើស ឬតិចជាងប្រាំគីឡូក្រាមពីទម្ងន់ស្តង់ដារសម្រាប់កម្ពស់ អាយុ និងភេទរបស់ពួកគេ។ មន្ត្រីដែលមានទម្ងន់ធ្ងន់ពេកនឹងមានពេលមួយឆ្នាំដើម្បីឈានទៅរកទម្ងន់ដែលមានសុខភាពល្អ។ ប្រសិនបើពួកគេបរាជ័យ ពួកគេនឹងត្រូវដកចេញពីក្របខណ្ឌប៉ូលិស។ សម្រាប់មន្ត្រីដែលឈឺ ឬមានស្ថានភាពសុខភាពមិនល្អ PNPកំពុងសម្លឹងមើលជម្រើសពីរ៖ គឺពួកគេអាចត្រូវបានផ្តល់ការងារនៅក្នុងការិយាល័យ ឬត្រូវចូលនិវត្តន៍ជាផ្លូវការក្រោមហេតុផលពិការភាព។ លោក Fajardo បានពន្យល់ថា មន្រ្តីប៉ូលីសអាចជ្រើសរើសវិធីផ្ទាល់ខ្លួន ដើម្បីបញ្ចុះទម្ងន់បាន។ គាត់បានបន្ថែមថា៖ «យើងនឹងមិនប្រាប់ពួកគេពីរបៀបហាត់ប្រាណ ឬរបបអាហារទេ ប៉ុន្តែយើងនឹងពិចារណាពីបញ្ហាវេជ្ជសាស្ត្រ»។

ក្រៅពីច្បាប់ស្ដីពីកាយសម្បទា ប្រធាន PNP ក៏កំពុងជំរុញឲ្យពេលវេលានៃឆ្លើយតបរបស់ប៉ូលិសកាន់តែលឿនផងដែរ។ លោក Torre ចង់ឱ្យមន្ត្រីប៉ូលីសទាំងអស់ឆ្លើយតបទៅនឹងការហៅទូរស័ព្ទបន្ទាន់ក្នុងរយៈពេលប្រាំនាទី ឬតិចជាងនេះ។ មេបញ្ជាការមួយចំនួននៅក្រុង Metro Manila និងខេត្តផ្សេងទៀតត្រូវបានដកចេញរួចហើយ ដោយសារតែការខកខានមិនបានបំពេញតាមគោលដៅ។

លោកប្រធានាធិបតី Ferdinand Marcos Jr. ថ្មីៗនេះបានឃើញការបង្ហាញពីរបៀបដែលប៉ូលីសឆ្លើយតបទៅនឹងការហៅទូរស័ព្ទ 911 ។ គាត់សប្បាយចិត្តដែលឃើញក្រុមប៉ូលីសមួយចំនួនអាចមកដល់កន្លែងក្នុងរយៈពេលត្រឹមតែបីនាទីប៉ុណ្ណោះ។ លោកបាននិយាយថានេះបង្ហាញថាកិច្ចខិតខំប្រឹងប្រែងដើម្បីកែលម្អសុវត្ថិភាពសាធារណៈកំពុងដំណើរការល្អហើយ។
ជាមួយគ្នានេះដែរ PNP សង្ឃឹមថាការអនុវត្តច្បាប់ដែលមានស្រាប់ទាំងនេះនឹងកសាងកម្លាំងនគរបាលអោយកាន់តែរឹងមាំ លឿន និងប្រកបដោយវិជ្ជាជីវៈបន្ថែមទៀត៕

រាជធានីភ្នំពេញ ៖ បន្ទាប់ពីការសន្ទនាជាលក្ខណៈឯកជនរបស់លោកស្រី ផែថងថាន ស៊ីណាវ៉ាត្រ ដែលបាននិយាយដល់«មេទ័ពភូមិភាគទីពីរ» លោក ប៊ុនស៊ីន ផាត់ខ្លាំង ថាជាក្រុមប្រឆាំងនឹងរដ្ឋាភិបាល ពេលនេះកងទ័ពភូមិន្ទថៃបានសម្តែងការគាំទ្ររបស់ខ្លួនចំពោះមេទ័ពរូបនេះ ថាជាបុគ្គលដ៏អង់អាចក្លាហាន ហ៊ានលះបង់គ្រប់យ៉ាងដើម្បីការពារទឹកដី។

យោងតាមការចុះផ្សាយរបស់ The Nation Thailand នៅថ្ងៃទី១៨ ខែមិថុនា ឆ្នាំ២០២៥ បានឲ្យដឹងថា កងទ័ពភូមិន្ទថៃ និងអង្គភាពយោធាផ្សេងៗ ដូចជានាយកដ្ឋានកិច្ចការស៊ីវិល បានបង្ហោះសារនៅលើទំព័រ Facebook របស់ពួកគេ ដោយដកស្រង់ព្រះរាជសាររបស់ព្រះបាទ ចូឡាឡុងកន (រាមាទី ៥) អំពីសេចក្តីថ្លៃថ្នូររបស់ទាហាន។ សេចក្តីប្រកាសបានគូសបញ្ជាក់ថា៖
ទាហានគឺជាបុគ្គលដែលទទួលបានការគោរពខ្ពស់បំផុតពីប្រទេសជាតិ ជាសុភាពបុរស និងកាន់អាវុធដើម្បីការពារប្រទេស។ ទាហានលះបង់ប្រយោជន៍ផ្ទាល់ខ្លួន ដើម្បីសុខុមាលភាពប្រជាជន និងការរស់រានមានជីវិតរបស់ប្រទេសជាតិ។ ទាហានឲ្យតម្លៃខ្ពស់ជាងទ្រព្យសម្បត្តិ។ ដូចនេះ មិនគួរមាននរណាម្នាក់មកប្រមា.ថមើលងាយបុគ្គលដែលជាទាហានបានឡើយ។

សារលិខិតក៏បានលើកទឹកចិត្តដល់ឧត្តមសេនីយ៍ឯក ប៊ុនស៊ីន និងទាហានទាំងអស់ ដោយគេបានសង្កត់ធ្ងន់ថា «ទឹកដីថៃមិនមែនបានមកដោយពាក្យសម្ដីទេ តែតាមរយៈដង្ហើម និងជីវិតរបស់ដូនតាយើង ដែលបានលះបង់ពេលវេលាចុងក្រោយដើម្បីការពារវា។»

ក្រៅពីនេះ ក៏មានការតាំងបង្ហាញរូបថតរបស់លោក ប៊ុនស៊ីន នៅលើផ្ទាំងLED ធំៗតាមអគារប៉ុស្តិ៍នគរបាល និងទីស្នាក់ការកងទ័ពថៃមួយចំនួន នៅលើផ្លូវ Vibhavadi Rangsit ក្នុងទីក្រុងបាងកក ដើម្បីជាចូលរួមជាការលើកទឹកចិត្តចំពោះមេទ័ពរូបនេះ។

ជាមួយគ្នានេះ ទំព័រហ្វេសប៊ុកកងទ័ពភូមិន្ទថៃ បានបង្ហោះសារដោយបញ្ជាក់ថា ទោះស្ថិតក្នុងកាលៈទេសៈណាក៏ដោយ កងទ័ពបានត្រៀមខ្លួនរួចជាស្រេច ដើម្បីឈរជើងយ៉ាងរឹងមាំក្នុងការការពារអធិបតេយ្យភាពជាតិ រួមនឹងសញ្ញា #Save2ndArmyRegionChief ដែលមានន័យថា «ការពារលោកមេទ័ពតំបន់ភូមិភាគទីពីរ»។

គួរជម្រាបថា បច្ចុប្បន្នស្ថានភាពនយោបាយនៅក្នុងប្រទេសថៃកំពុងមានភាពតានតឹងខ្លាំង ដោយអ្នកនយោបាយ និងគណបក្សជាច្រើនបានដាក់សម្ពាធឲ្យលោកស្រី ផែថងថាន ធ្វើការលាលែងពីតំណែងដោយខ្លួនឯង។ ចំណែកប្រជាជនក៏បានបង្ហាញការមិនពេញចិត្តយ៉ាងខ្លាំងរបស់ពួកគេផងដែរ ដែលមេទ័ពគំរូរបស់ពួកគេ ត្រូវបានចោ.ទប្រកាន់ថាជាជនប្រឆាំងនឹងរដ្ឋាភិបាលដោយនាយករដ្ឋមន្រ្តីបែបនេះ៕