Zhao Lusi ចេញមុខ Live ក្រោយមានសង្គ្រា.មពាក្យសម្តីរឿងកុងត្រាជាមួយក្រុមហ៊ុនគ្រប់គ្រង

កាលពីល្ងាចថ្ងៃទី២ ខែសីហា Zhao Lusi ស្រាប់តែបង្ហោះអត្ថបទមួយបរិហារក្រុមហ៊ុនគ្រប់គ្រងរបស់នាង ចំពោះការជិះជាន់នាង ធ្វើឱ្យនាងរងនូវភាពអយុត្តិធម៌ និងខាតបង់ផ្លូវចិត្ត និងហិរញ្ញវត្ថុជាច្រើននាពេលថ្មីៗនេះ។ Zhao Lusi បានសង្កត់ធ្ងន់ថា នាងត្រូវតែសងការខូចខាតដែលបណ្តាលមកពីការលុបចោលកិច្ចសន្យាផ្សាយពាណិជ្ជកម្ម និងការរំសាយក្រុមការងារភាពយន្ត «Almost Lover» អំឡុងពេលដែលនាងធ្លាក់ខ្លួនឈឺភ្លាមៗ (តាំងពីខែធ្នូ ឆ្នាំ២០២៤)។ ក្រុមហ៊ុនគ្រប់គ្រងបានសន្យាថានឹងទទួលខុសត្រូវ ប៉ុន្តែនៅទីបំផុតមិនមានដំណោះស្រាយដែលពេញចិត្តឡើយ។ Zhao Lusi ទាមទារឱ្យបញ្ចប់កិច្ចសន្យា។

ជាការឆ្លើយតប Galaxy Cool Entertainment បានបង្ហោះការពន្យល់ជាលាយលក្ខណ៍អក្សរដោយប្រកាសថា ក្រុមហ៊ុនតែងតែខិតខំប្រឹងប្រែងបំពេញកាតព្វកិច្ចជាក្រុមហ៊ុនគ្រប់គ្រង និងគាំទ្រយ៉ាងពេញទំហឹងចំពោះអាជីពរបស់ Zhao Lusi ក៏ដូចជាដោះស្រាយការងាររបស់តារាសម្តែងផងដែរ។ ក្រុមហ៊ុនកត់សម្គាល់ជាពិសេសថា តារាស្រីគឺជាបុគ្គលសាធារណៈ ហើយរាល់ពាក្យសម្ដី និងសកម្មភាពត្រូវតែមានការប្រុងប្រយ័ត្ន ដើម្បីកុំឱ្យប៉ះពាល់ដល់មុខមាត់របស់នាង និងដៃគូរបស់នាង។ Galaxy Cool សង្ឃឹមថា Zhao Lusi នឹងមិនបង្ហោះខ្លឹមសារមិនច្បាស់លាស់លើអ៊ីនធឺណិតទៀតទេ ដែលអាចនាំឱ្យមានការប៉ាន់ស្មានមិនពិតបានយ៉ាងងាយ។

ទោះជាយ៉ាងណាក៏ដោយ Zhao Lusi បានបដិសេធភ្លាមៗដោយចោទប្រកាន់ក្រុមហ៊ុនថាមិនបានទាក់ទងនាងយ៉ាងសកម្មដើម្បីដោះស្រាយជម្លោះនោះទេ។ តារាស្រីរូបនេះបានប្រកាសថា នាងសុខចិត្តរង់ចាំពាក្យបណ្ដឹងជាមួយក្រុមហ៊ុន បើទោះបីជានាងដឹងថា វាអាចជាដំណើរការដ៏យូរ និងនឿយហត់ក៏ដោយ។ បន្ទាប់ពីសង្គ្រាមពាក្យសម្តីរវាង Zhao Lusi និង Galaxy Cool តាមរយៈការបង្ហោះតាមអនឡាញ មហាជនក៏មានមតិចម្រុះផងដែរ។ ទស្សនិកជនមួយផ្នែកបានគាំទ្រការតស៊ូរបស់តារាស្រីរូបនេះដើម្បីបញ្ចប់កុងត្រា។ ផ្ទុយទៅវិញ អ្នកមើលជាច្រើនជឿថា Zhao Lusi ស្ថិតក្នុងស្ថានភាពធ្ងន់ធ្ងរ និងមានស្មារតីមិនស្ងប់។ នាងមិនមានព័ស្តុតាងផ្លូវច្បាប់ច្បាស់លាស់ទេ ហើយចេះតែនិយាយៗដើម្បីស្វែងរកការអាណិតជាសាធារណៈ។

ឆ្លើយតបនឹងប្រតិកម្មអវិជ្ជមាន នៅរសៀលថ្ងៃទី៣ ខែសីហា ភ្លាមៗនោះ Zhao Lusi បានចាប់ផ្តើមការផ្សាយបន្តផ្ទាល់នៅលើ Douyin។ ពាក្យគន្លឹះ «Zhao Lusi livestream» បានឡើងយ៉ាងលឿនទៅពាក្យគន្លឹះពេញនិយមលេខ១ នៅលើ Weibo ។ Zhao Lusi បាននិយាយថានាងបានបើកការផ្សាយបន្តផ្ទាល់ដើម្បីបញ្ជាក់ថានាង ស្ងប់ស្ងាត់និងមិនដូចដែលពាក្យចចាមអារ៉ាមជាច្រើនបានផ្សព្វផ្សាយ។ នាងសុខចិត្តទទួលយកតម្លៃដើម្បីចរចាជាមួយក្រុមហ៊ុន ទោះមានបញ្ហាយ៉ាងណានោះ តារាស្រីរូបនេះនឹងធ្វើតាមរហូតដល់ទីបញ្ចប់។ Zhao Lusi សង្ឃឹមថាគ្រប់គ្នានឹងមិនត្រូវបានគេដឹកនាំដោយព័ត៌មានអវិជ្ជមាន។

ការផ្សាយបន្តផ្ទាល់របស់ Zhao Lusi ទទួលបានការចាប់អារម្មណ៍យ៉ាងខ្លាំង នៅចំណុចមួយមានមនុស្សប្រហែល ១.៤ លាននាក់កំពុងមើលក្នុងពេលតែមួយ។ ការផ្សាយបន្តផ្ទាល់មានរយៈពេលតិចជាង ១ម៉ោង និងមានអ្នកមើលជាង ៣០ លាននាក់។ គណនី Douyin របស់តារាស្រីរូបនេះបានកើនឡើង ២៨០K ក្រោយការផ្សាយផ្ទាល់។

នៅរសៀលថ្ងៃដដែល ការបង្ហោះមួយបានអះអាងថា Zhao Lusi «ចង់ទាញយកប្រយោជន៍ពីមតិសាធារណៈ និងសហគមន៍អនឡាញ ដើម្បីសម្រេចបាននូវគោលដៅនៃការលុបចោលកិច្ចសន្យា» ដោយណែនាំនាងឱ្យដោះស្រាយបញ្ហាតាមរយៈច្បាប់។តារាស្រីរូបនេះបានឆ្លើយតបនឹងការអធិប្បាយថា«ពាក្យសម្ដី និងការប្រព្រឹត្តនឹងមានផលវិបាក»៕