ដូចប្រិយមិត្តជ្រាបមកហើយថាកូនក្រុមរបស់ វីតូ បានក្លាយជាម្ចាស់ពានក្នុងកម្មវិធីប្រលងចម្រៀងរ៉េបនិងទទួលបានមតិវិជ្ជមានជាច្រើនពីសំណាកទស្សនិកជន។ យ៉ាងណាមិញសម្រាប់ វីតូ ដែលជា Captain មួយរូបបានបោះសម្តីយ៉ាងចាក់ដោតទៅកាន់មនុស្សមួយចំនួនដែលអង្គុយចាំតែរិះគន់អ្នកដទៃ។

កាលពីរាត្រីថ្ងៃផ្តាច់ព្រ័ត្រ(១ ឧសភា ) ក្នុងកម្មវិធីប្រលងចម្រៀងរ៉េបមួយទស្សនិកជនមានការរំភើបចិត្តយ៉ាងខ្លាំងបន្ទាប់ពីឃើញទិដ្ឋភាព Jay X, Finn និង Vansak បានរួបរួមគ្នាទិញខ្សែកពេជ្រដែលមានឈ្មោះ វីតូ ជូនទៅដល់ Captain របស់ខ្លួនដែលធ្វើឱ្យ វីតូ រំភើបចិត្តរលីងរលោងទឹកភ្នែកចំពោះការដឹងគុណរបស់សិល្បករជំនាន់ក្រោយនេះ។ មែនទែនទៅ វីតូ គឺជាសិល្បករជើងខ្លាំងមួយរូបដែលនៅពីក្រោយបទល្បីៗរបស់សិល្បករជាច្រើនរួមទាំងតារាចម្រៀង វណ្ណដា ផងមិនមែនលោកគ្មានសមត្ថភាពហើយបានធ្វើជា Captain នៅក្នុងកម្មវិធីនោះទេ។

យ៉ាងណាក៏ដោយនៅពេលមនុស្សមួយចំនួនបានបញ្ចេញមតិថា វីតូ ជានរណា ឬល្បីតែមួយបទឡើងធ្វើជា Captain នោះ វីតូ មិនឱ្យចាញ់ចិត្តពាក្យសម្តីទាំងនេះនោះទេ ហើយលោកក៏បានបង្ហោះវីដេអូផ្លែផ្កាទៅកាន់អ្នកទាំងនោះដូចគ្នា។ ជាក់ស្តែងមិនត្រឹមតែឆ្លើយតបដោយកំប្លែងប៉ុណ្ណោះទេ ប៉ុន្តែ វីតូ ថែមទាំងបង្ហោះសំណេរមួយទៀតថា «អ្នកដែលចាំដើរថាឱ្យគេហ្នឹងរកស៊ីអី??ម៉េចទំនេរម្ល៉េះ ?»។

ប្រយោគខ្លីនេះបានធ្វើឱ្យអ្នកលេងបណ្តាញសង្គមមានការចាប់អារម្មណ៍ជាច្រើននិងចាត់ទុកថាការឆ្លើយតបរបស់ វីតូ គឺធ្វើឱ្យអ្នកដែលអង្គុយរិះគន់នោះចុកចាប់មិនខាន។

គួរឱ្យដឹងថាថ្មីៗកន្លងមកនេះនេះ វីតូ ទើបបញ្ចេញស្នាដៃបទថ្មីមានចំណងជើងថា «ត្រែះ» ដែលធ្វើឱ្យទស្សនិកជនមានការចាប់អារម្មណ៍ជាច្រើនរហូតមកទល់ពេលនេះមានការស្តាប់ជាង១លានដងនៅលើយូធូប។ លោកគឺជាមនុស្សម្នាក់ដែលខ្លាំងខាងភ្លេងនិងបានចូលរួមក្នុងចម្រៀងល្បីៗរបស់ វណ្ណដា មានដូចជា « U KNOW U KNOW» «J+O ZERO III » «BUSINESS CLASS» «NEW LIFE» និងស្នាដៃជាច្រើនទៀត៕

Jennie Vee ដែលជាអ្នកបង្កើតមាតិកានិងធ្លាប់ធ្វើជាអ្នកបម្រើការងារនៅលើយន្តហោះ បានប្រកាសថារូបនាងនឹងយកតារាប្រុស ដេវិដ អ៊ឹងហាវ មកធ្វើជាប្តីឱ្យបាន។ ពាក្យសម្តីនេះមិនបានធ្វើឱ្យអ្នកគាំទ្រប្រតិកម្មនោះទេផ្ទុយទៅវិញពួកគេមានតែពេញចិត្តចំពោះគូស្នេហ៍នេះ។

ប្រិយមិត្តមួយចំនួនអាចដឹងហើយថាសម្ព័ន្ធភាពរវាង Jennie និង ដេវិដ អ៊ឹងហាវ លើសពីមិត្តភាពធម្មតាបើទោះបីជាអ្នកទាំងពីរមិនបង្ហាញភាពផ្អែមល្ហែមឬនិយាយដោយបើកចំហរចំពោះគ្នាយ៉ាងណាក៏ដោយ។ យូរៗបញ្ចេញភាពផ្អែមល្ហែមម្តង Jennie បានធ្វើឱ្យអ្នកគាំទ្រស្រឡាំងកាំងដោយសារសម្តីក្លាហានរបស់នាង។

នៅយប់ថ្ងៃទី៣ ខែឧសភា Jennie Vee បានបង្ហោះរូបស្និទ្ធស្នាលជាមួយនឹង ដេវិដ អ៊ឹងហាវ ប៉ុន្មានសន្លឹកអមដោយហាសថេកសម្តីម៉ាត់ៗថា «ហេវ ស្រលាញ់ខ្លាំងបានឈ្លោះ យកបងធ្វើប្តីឱ្យបាន បណ្តាសាអ៊ឹងហាវ»។ សម្តីក្លាហាន លះៗរបស់ Jennie បានធ្វើឱ្យទស្សនិកជនគាំទ្រយ៉ាងខ្លាំង។ អ្នកគាំទ្របានបញ្ចេញមតិថា អ្នកទាំងពីរគឺជាគូស្នេហ៍ដ៏គួរឱ្យស្រលាញ់ និងគាំទ្រយ៉ាងពេញទំហឹងឱ្យ Jennie យក ដេវិដ អ៊ឹងហាវ មកធ្វើប្តីឱ្យបាន។

កន្លងមក Jennie និង ដេវិដ អ៊ឹងហាវ បានឃ្លាតឆ្ងាយពីគ្នាមួយរយៈដោយមិនបញ្ចេញសកម្មភាពស្និទ្ធស្នាលគ្នាឡើយ ប៉ុន្តែក្រោយមកពួកគេចាប់ផ្តើមមានទំនាក់ទំនងស្និទ្ធស្នាលគ្នាឡើងវិញ។ រាល់ពេលអ្នកទាំងពីរបញ្ចេញភាពផ្អែមល្ហែមតែងតែទទួលបានការគាំទ្រពីទស្សនិកជន។
Jennie បានសាងប្រជាប្រិយភាពតាមរយៈការចូលរួមជាមួយនឹង Team Veesa ដោយបង្កើតមាតិកាជាច្រើននិងបានក្លាយជា Influencer ដ៏មានប្រជាប្រិយមួយរូបផងដែរ។ ក្រៅពីមានរូបសម្បត្តិស្រស់ស្អាតកន្លងមក Jennie ក៏បានបំពេញក្តីស្រលាញ់របស់ខ្លួនដោយធ្លាប់ធ្វើការនៅលើយន្តហោះផងដែរ។

ងាកមកកាន់ ដេវិដ អ៊ឹងហាវ វិញកេរ្តិ៍ឈ្មោះរបស់លោកកាន់តែល្បីល្បាញដោយបង្ហាញខ្លួនក្នុងកម្មវិធីប្រ៊េនៗជាច្រើនទាំងក្នុងប្រទេសនិងក្រៅប្រទេស។ មិនត្រឹមតែមានរូបរាងសង្ហាប៉ុណ្ណោះទេប៉ុន្តែលោកក៏ចេញផ្សាយបទចម្រៀងផ្ទាល់ខ្លួនរួមទាំងគ្រងតំណែងជាតួឯកក្នុងខ្សែភាពយន្តខ្នាតធំទៀតផង៕

គណនីបណ្តាញសង្គមមួយបានបង្ហោះចោទប្រកាន់មកកាន់តារាចម្រៀង ញឹមសួន សោភាទេពី ដែលព្យាយាមបបួលប្តីរបស់ខ្លួនមកថតនៅក្នុងរោងកុនឯកជនដែលមានតែពីរនាក់ឆ្លៀតឱកាសពេលដែលនាងកំពុងតែទម្ងន់កូនក្នុងផ្ទៃ៦ខែ។ ការបង្ហោះយ៉ាងក្តៅគគុកនេះ សោភាទេពី បានព្រមានចាត់វិធានការផ្លូវច្បាប់ ខណៈនាងអះអាងថានាងត្រូវបានគេរៀបគម្រោងធ្វើស៊ី។

នៅថ្ងៃទី៣ ខែឧសភា គណនីមួយឈ្មោះថា «Ti sava» បានបង្ហោះរូបភាពរបស់តារាចម្រៀង សោភាទេពី អមដោយគណនីឈ្មោះផ្សេងៗគ្នាតែជារូបរបស់តារាចម្រៀងរូបនេះ។ អ្នកបង្ហោះបានធ្វើការចោទប្រកាន់មកកាន់ សោភាទេពី ថា «ពោះធំ៨ខែ អ្នកចម្រៀងម្នាក់ចូលចិត្តយកបទគេច្រៀងតាម វាឆាតមកហៅប្តីយើងថត តែថតនៅ Movie Private(កន្លែងមើលកុន)ទើបដឹងថាកន្លែងហ្នឹងតែមានតែ២នាក់មានពូកមានខ្នើយ មានស្រា ហើយយកថ្នាំសម្រើបដាក់ក្នុងស្រាឱ្យប្តីយើងផឹក វាថាផឹកបាននិយាយការងារចេញ»។

គណនីខាងលើនេះបានរៀបរាប់ទៀតថា «មកដល់ផ្ទះគាត់ប្រាប់ខ្ញុំទាំងអស់ ខ្ញុំគិតថាកន្លែងមើលកុនវាទៅមានគ្នាបានឲ្យប្តីទៅ មានអីវាទៅតែឯង ប្តីយើងក៏តែឯង ប្តីខ្ញុំផឹក២កំប៉ុងក៏ចេញមកវិញថាប្រញាប់ តែខ្ញុំមិនជឿថាអត់បានធ្វើទេ…មុខអាក្រក់ប៉ុណ្ណាតែត្រូវថ្នាំសម្រើបហើយអាចទេថាអត់? វាផុសថេកឈ្មោះប្តីយើងទឹកមុខដូចអត់ឃ្លានមកពីណាចឹង វាថាបើផុសពីវាវានិងសម្លាប់ខ្លួន វាថាវាមិនដឹងអីទាំងរូបភស្តុតាងវាចេញវីដេអូនិយាយពីប្តីយើងថាប្តីយើងស្អាតចេះចុះ រូបវាជាមួយប្តីយើងមានទាំងអស់ អីក៏អត់ឃ្លានប្តីខ្ញុំមែសបើវាយកនាងឯងខ្ញុំឱ្យ បើសិនវាជ្រុលធើធ្វើនាងហើយខ្ញុំអត់ប្រឡាក់ទេ នាងមិនខ្ពើមខ្ញុំបាននាងចង់ស៊ីប្តីខ្ញុំ តែខ្ញុំខ្ពើមនាងហើយក៏មិនចេះប្រើរបស់រួម មើលមុខឃ្លានប្តីគេឆ្លៀតឱកាសប្រពន្ធគេពោះធំឱ្យហើយទៅ ញឹមសួន សោភាទេពី»។

ការបង្ហោះនេះបានធ្វើឱ្យអ្នកលេងបណ្តាញសង្គមជជែកវែកញែកយ៉ាងច្រើននិងចង់ដឹងការពិតថាអ្វីដែលគណនី «Ti sava» បង្ហោះនេះជាការពិតឬមានអ្នកក្លែងបន្លំអាខោន សោភាពី មកប្រព្រឹត្តរឿងខុសឆ្គង។ យ៉ាងណាមិញ បន្ទាប់ពីមានការចោទប្រកាន់ សោភាទេពី បានបង្ហោះសំណេរនៅលើ Story Facebook ព្រមទាំងព្រមានចាត់វិធានការតាមផ្លូវច្បាប់ផងដែរ។

សោភាទេពី បានបង្ហោះថា «សុំខ្លាចហើយមនុស្សសម័យនេះរៀបគម្រោងការធ្វើសុំព្រោះតែការស្អប់»។ អ្នកចម្រៀងរូបនេះបានបង្ហោះសំណេរមួយទៀតថា «ប្រយ័ត្នខ្ញុំលេងផ្លូវច្បាប់ប្តឹងពីបទបរិហាកេរ្តិ៍ខ្ញុំនិងជេរប្រមាថឪពុកម្តាយខ្ញុំជាច្រើនដងទាំងដែលខ្លួនឯងបង្កើតសាច់រឿងដើម្បីបានជាន់ខ្ញុំ»។

នៅរសៀលថ្ងៃទី៤ ខែឧសភា ញឹមសួន សោភាទេពី បានចេញវីដេអូឆ្លើយតបទៅនឹងការចោទប្រកាន់ដោយបញ្ជាក់ជាមួយនឹងសំណេរថា «យករឿងមានផ្ទៃពោះឥឡូវមកបង្កើតសាច់រឿងថ្មីធ្វើស៊ីខ្ញុំ បំផ្លើសកុហក់ថាខ្ញុំស៊ីប្តីគាត់ និងចេះតែedit videoចាស់តាំងពីមួយឆ្នាំមុនដែលខ្ញុំធ្លាប់ស្រលាញ់គ្នាទាំងដែលពួកគាត់បែកគ្នាដាច់ស្រាច់អស់៣ខែទើបខ្ញុំនឹងម្នាក់នឹងទាក់ទងគ្នា។ ប៉ុន្តែឥឡូវនេះម្នាក់ប្រុសនឹងម្នាក់នឹងគំរាមខ្ញុំជិត១ឆ្នាំហើយពេលគេត្រូវគ្នាចូលដៃជើងគ្នា ដើម្បីជាន់ខ្ញុំ អ្នកណាដែលចូលដៃជើងប្រយត្ន័ផងខ្ញុំចាត់វិធានការតាមផ្លូវច្បាប់។ត្រូវចងចាំមាសសុទ្ធមិនខ្លាចភ្លើងទេខ្ញុំអះអាង10000% ហើយយករឿងការងារខ្ញុំមកផុសបានន័យថាមានបំណងចង់បំផ្លាញការងារខ្ញុំ គំរាមថាបំផ្លាញការងារនឹងកេរិ៍ឈ្មោះខ្ញុំអ្នកផ្ទះខ្ញុំក៏ដឹងឮគ្រប់គ្នា តែខ្ញុំប្លុកចោលរហូត…»៕

ទស្សនិកជនមិនអាចបដិសេធបានទេថាកេរ្តិ៍ឈ្មោះរបស់តារារ៉េប ម៉ាន់ វណ្ណដា បានល្បីសុះសាយទាំងនៅក្នុងស្រុកនិងក្រៅស្រុកមានអ្នកគាំទ្ររាប់លាននាក់។ អ្វីដែលធ្វើឱ្យទស្សនិកជនកំពុងកោតសរសើរទៅកាន់ វណ្ណដា គឺពាក្យពេចន៍ដាក់ខ្លួនរបស់លោកទៅកាន់អ្នកជំនាន់ក្រោយនៅក្នុងវិស័យនេះ។

ថ្លែងនៅក្នុងកម្មវិធីដែលទើបបញ្ចប់ថ្មីៗនេះ វណ្ណដា បាននិយាយថារូបលោកពិតជាមានមោទនភាពណាស់ក្នុងនាមជាគណៈកម្មការមួយរូបដែលដឹកនាំអ្នករ៉េបជំនាន់ក្រោយទៅកាន់ជំនាន់ថ្មីមួយទៀត។ ក្នុងពេលជាមួយគ្នានេះ វណ្ណដា បាននិយាយថាវិស័យដ៏ទូលាយនេះមិនអាចជាប់គាំងត្រឹមលោកឬ ឌីជេក្តិប ឬនរណាម្នាក់នោះទេគឺត្រូវតែទៅមុខទាំងអស់គ្នា។

វណ្ណដា បានអះអាងថានេះគឺជាផ្នត់គំនិតរបស់លោកហើយប្រសិនបើជាលោកអាចធ្វើជាគណៈកម្មការណាបន្ទាប់ទៀតលោកពិតជាសប្បាយចិត្តក្នុងការធ្វើវា។ លោកក៏សប្បាយចិត្តដែលប៉ាម៉ាក់លោកបង្កើតលោកមកសម្រាប់លើកទឹកចិត្តមនុស្សគ្រប់គ្នាដែលមានក្តីស្រមៃនៅក្នុងវិស័យតន្រ្តីមួយនេះ។

ពាក្យសម្តីរបស់ វណ្ណដា ទទួលបាននូវមតិកោតសរសើរជាច្រើននៅតាមបណ្តាញសង្គមដែលអាចបញ្ជាក់ថាការរីកចម្រើនក្នុងវិស័យតន្រ្តីហ៊ីបហបនៅក្នុងប្រទេសកម្ពុជាមិនអាចបញ្ឈប់ត្រឹមនេះនោះទេត្រូវតែមានអ្នកខ្លាំងឱ្យច្រើន។ ជាពិសេសគឺបានផ្តល់ក្តីសង្ឃឹមនិងលើកទឹកចិត្តអ្នកជំនាន់ក្រោយក្នុងការកសាងស្នាដៃឱ្យល្បីល្បាញមានការទទួលស្គាល់ទាំងជាតិនិងអន្តរជាតិ។

គេចាំបានថា នៅក្នុងការប្រកួតប្រជែងកន្លងមក វណ្ណដា បានពោលពាក្យមិនចង់ឱ្យអ្នកជំនាន់ក្រោយល្បីដូចជាលោកនោះទេ ប៉ុន្តែចង់ឱ្យអ្នកជំនាន់ក្រោយល្បីខ្លាំងជាងលោកទៅទៀត។ នេះអាចបញ្ជាក់ពីផ្នត់គំនិតរបស់តារារ៉េបរូបនេះមិនចង់ល្បីល្បាញតែខ្លួនឯងប៉ុណ្ណោះទេ ផ្ទុយទៅវិញគឺចង់ឱ្យមានធនធានល្អៗកាន់តែខ្លាំងឡើយថែមទៀតដើម្បីប្រទេសកម្ពុជារីកចម្រើនក្នុងវិស័យតន្រ្តីឈរនៅលើឆាកអន្តរជាតិប្រកបដោយមោទនភាពក្នុងនាមជាកូនខ្មែរ៕