ឆ្នាំ២០២៥នេះ វៀតណាមវ៉ាដាច់ប្រទេសផ្សេងៗក្នុងតំបន់ទាំងមូល ដោយបានឈរក្នុងលេខរៀងទី១៨ ក្នុងចំណោម៣០ប្រទេសនៅលើពិភពលោក ដែលនាំចេញទំនិញលក់ទៅបរទេសបានច្រើនបំផុត ។ នេះបើយោងតាមទិន្នន័យចុងក្រោយបំផុតរបស់អង្គការពាណិជ្ជកម្មពិភពលោក (WTO) ។

តាមទិន្នន័យចុងក្រោយរបស់អង្គការពាណិជ្ជកម្មពិភពលោក (WTO) វៀតណាមបានឡើងមកឈរនៅចំណាត់ថ្នាក់ទី១៨ ក្នុងចំណោមប្រទេសនាំចេញទំនិញច្រើនបំផុតទាំង៣០ប្រទេសនៅលើពិភពលោកសម្រាប់ឆ្នាំ២០២៥ ដោយសារកត្តាចម្បងៗជាច្រើន ។ រីឯចិននៅតែជាប់ចំណាត់ថ្នាក់ទី១ គឺជាប្រទេសនាំចេញទំនិញច្រើនបំផុតលើពិភពលោក, សហរដ្ឋអាមេរិក ជាប់ចំណាត់ថ្នាក់ទី២ និងអាល្លឺម៉ង់ ជាប់ចំណាត់ថ្នាក់ទី៣ ។

យោងតាមទិន្នន័យរបស់គេហទំព័រ Statista វៀតណាមបានជាប់ចំណាត់ថ្នាក់ទី១៨ គឺជាប្រទេសនាំចេញទំនិញច្រើនបំផុតនៅលើពិភពលោកក្នុងឆ្នាំ២០២៥ ដោយការនាំចេញទំនិញរបស់វៀតណាមក្នុងឆ្នាំ២០២៥ ស្មើទឹកប្រាក់រហូតដល់ជិត៤សែន ៧ម៉ឺន ៣ពាន់លានដុល្លារ ។ នេះបើតាមការចុះផ្សាយរបស់សារព័ត៌មានបរទេសកាលពីខែមេសា ឆ្នាំ២០២៦ ។

ការចាត់ចំណាត់ថ្នាក់របស់គេហទំព័រ Statista ដែលបានពីការប្រមូលទិន្នន័យចុងក្រោយពីអង្គការពាណិជ្ជកម្មពិភពលោក (WTO) បង្ហាញថា ក្នុងចំណោមប្រទេសនាំចេញទំនិញច្រើនលើពិភពលោកទាំង៣០ប្រទេស ក្នុងនោះមានប្រទេសនៅតំបន់អាស៊ីចំនួន១១ប្រទេសបានជាប់ចំណាត់ថ្នាក់នេះ រួមទាំងប្រទេសសិង្ហបុរីផងដែរបានជាប់ចំណាត់ថ្នាក់ទី១៤ ។

ចំណែកចិនជាប់ជាប់ចំណាត់ថ្នាក់ទី១ ជាប្រទេសនាំចេញទំនិញច្រើនបំផុតលើពិភពលោក ដោយការនាំចេញទំនិញរបស់ចិនកាលពីឆ្នាំ២០២៥ ស្មើទឹកប្រាក់ប្រមាណ ៣លាន ៨សែនលានដុល្លារ ដោយសារចិនមានកិច្ចព្រមព្រៀងពាណិជ្ជកម្មសេរីជាមួយប្រទេសជាច្រើន ។

សហរដ្ឋអាមេរិកស្ថិតជាប់ចំណាត់ថ្នាក់ទី២ ដែលការនាំចេញទំនិញរបស់អាមេរិកទៅកាន់ពិភពលោក ស្មើទឹកប្រាក់ជាង២លាន ២សែនលានដុល្លារ ក្នុងនោះការនាំចេញភាគច្រើនរួមមាន ៖ រថយន្ត ប្រេងឥន្ធនៈ សណ្តែកសៀង និងឱសថ ។

រីឯចំណាត់ថ្នាក់ទី៣ បានទៅប្រទេសអាល្លឺម៉ង់ ដោយការនាំចេញទំនិញអាល្លឺម៉ង់ទៅកាន់ពិភពលោក ស្មើប្រមាណ ១លាន ៨សែនដុល្លារ ។ ចំណាត់ថ្នាក់ជាបន្តបន្ទាប់ គឺប្រទេសហូឡង់ បាននាំចេញទំនិញស្មើ៩សែន ៨ម៉ឺន ៩ពាន់លានដុល្លារ, ហុងកុង ស្មើ៧សែន ៥ម៉ឺន ៤ពាន់លានដុល្លារ, ជប៉ុនស្មើ៧សែន ៣ម៉ឺន ៨ពាន់លានដុល្លារ, អ៊ីតាលី ស្មើ៧សែន ២ម៉ឺន ៦ពាន់លានដុល្លារ និងកូរ៉េខាងត្បូង ស្មើ៧០ម៉ឺន ៩ពាន់លានដុល្លារ ។

ការនាំចេញទំនិញវៀតណាមបានកើនឡើងស្មើទឹកប្រាក់ជិត៤សែន ៧ម៉ឺន ៣ពាន់លានដុល្លារ ជាលើកដំបូងកាលពីឆ្នាំ២០២៥ បន្ទាប់ពីការនាំចេញកើនឡើងជាង១៦% កាលពីឆ្នាំ២០២៤ ហើយវៀតណាមមានអតិរេកពាណិជ្ជកម្ម (នាំចេញច្រើនជាងនាំចូល) ស្មើរហូតដល់ជាង២ម៉ឺនលានដុល្លារកាលពីឆ្នាំ២០២៥ ដែលបានជួយជំរុញដល់ស្ថិរភាពសេដ្ឋកិច្ច ។ ការនាំចេញសំខាន់ៗរបស់វៀតណាម រួមមាន ៖ ឧបករណ៍អេឡិចត្រូនិក, កុំព្យូទ័រ, ទូរស័ព្ទនិងគ្រឿងបន្លាស់, គ្រឿងចក្រ, ផលិតផលកសិកម្ម, ឈើ និងសម្ភារៈនេសាទ ។

ប្រាក់ចំណូលពាណិជ្ជកម្មសរុបរបស់វៀតណាមបានកើនឡើងយ៉ាងឆាប់រហ័សក្នុងរយៈពេល១០ឆ្នាំមកនេះ គឺកើនឡើងពីចំនួន១សែនលានដុល្លារក្នុងឆ្នាំ២០០៩ មកស្មើរហូតដល់៩សែន ៣ម៉ឺនលានដុល្លារក្នុងឆ្នាំ២០២៥ ។ វៀតណាមរំពឹងថា ប្រាក់ចំណូលពាណិជ្ជកម្មសរុបរបស់ខ្លួននឹងកើនឡើងដល់ជិត១លានលានដុល្លារនាពេលឆាប់ៗ បន្ទាប់ពីប្រាក់ចំណូលពាណិជ្ជកម្មចាប់ពីដើមខែមករា រហូតដល់ថ្ងៃទី១៥ ខែមេសា ឆ្នាំ២០២៦នេះ ស្មើជិត៣សែនលានដុល្លារ ។

សូមរំឭកថា មូលហេតុចម្បងៗធ្វើឱ្យវៀតណាមសម្រេចបាននូវសមិទ្ធផលដ៏ត្រចះត្រចង់ ដោយឈរនៅចំណាត់ថ្នាក់ទី១៨ ក្នុងចំណោមប្រទេសនាំចេញទំនិញច្រើនបំផុតលើពិភពលោកក្នុងឆ្នាំ២០២៥ មានដូចជា ៖ ការផ្លាស់ប្តូរហេដ្ឋារចនាសម្ព័ន្ធផលិតកម្មទៅកាន់បច្ចេកវិទ្យាខ្ពស់, ការទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរី (FTAs), ការហូរចូលការវិនិយោគផ្ទាល់ពីបរទេស (FDI), តម្រូវការទីផ្សារសំខាន់ៗ រួមទាំងភាពរឹងមាំនៃវិស័យកសិកម្ម និងគ្រឿងចក្រ ៕

ភាពតានតឹងពាណិជ្ជកម្មបានកើតឡើងជាថ្មីរវាងអាមេរិក និងសហភាពអឺរ៉ុប (EU) បន្ទាប់ពីប្រធានាធិបតីអាមេរិក លោក Donald Trump នាដើមខែឧសភា ឆ្នាំ២០២៦នេះ បានប្រកាសជាផ្លូវការនូវផែនការដំឡើងពន្ធរហូតដល់២៥% លើការនាំចូលរថយន្ត រួមទាំងរថយន្តដឹកទំនិញពីសហភាពអឺរ៉ុប ដោយអនុវត្តចាប់ពីខែឧសភា តទៅ ដោយលោកចោទប្រកាន់សហភាពអឺរ៉ុបមិនគោរពតាមកិច្ចព្រមព្រៀងពាណិជ្ជកម្មកាលពីខែកក្កដា ឆ្នាំ២០២៥ ដែលកាលនោះអាមេរិកកំណត់ពន្ធត្រឹមតែ១៥% ។ រីឯសហភាពអឺរ៉ុបច្រានចោលការចោទប្រកាន់ និងថា កំពុងអនុវត្តតាមច្បាប់ពាណិជ្ជកម្ម ប៉ុន្តែពួកគេក៏បានត្រៀមខ្លួនជាស្រេចក្នុងការចាត់វិធានការតបតវិញដើម្បីការពារផលប្រយោជន៍សេដ្ឋកិច្ច ។

កាលពីថ្ងៃទី១ ខែឧសភា លោកប្រធានាធិបតី Trump បានប្រកាសតាមបណ្តាញសង្គម Truth Social ថា អាមេរិកនឹងដំឡើងពន្ធរថយន្តទាំងអស់ រួមទាំងរថយន្តដឹកទំនិញដែលនាំចូលពីអឺរ៉ុប ស្មើនឹងអត្រា២៥% អនុវត្តចាប់ពីខែឧសភាតទៅ ដោយលោកចោទប្រកាន់សហភាពអឺរ៉ុប (EU) មិនគោរពតាមកិច្ចព្រមព្រៀងពាណិជ្ជកម្មជាមួយអាមេរិក ប៉ុន្តែមិនបញ្ជាក់លម្អិតតើសហភាពអឺរ៉ុបល្មើសកិច្ចព្រមព្រៀងត្រង់ចំណុចណាទេ ។

នៅថ្ងៃដដែល លោកប្រធានាធិបតី Trump បាននិយាយក្នុងកម្មវិធីមួយនៅរដ្ឋផ្លរីដា ថា រដ្ឋាភិបាលក្រុងវ៉ាស៊ីនតោនបានជូនដំណឹងទៅអាល្លឺម៉ង់រួចហើយអំពីការដំឡើងពន្ធរថយន្ត ដោយសារអាល្លឺម៉ង់ និងប្រទេសផ្សេងទៀតនៅអឺរ៉ុប មិនអនុវត្តតាមកិច្ចព្រមព្រៀងជាមួយអាមេរិក ដូចជា ៖ ក្រុមហ៊ុនផលិតរថយន្តរបស់អាល្លឺម៉ង់ គឺក្រុមហ៊ុន Mercedes-Benz និង BMW បានទាញយកប្រយោជន៍ពីពលរដ្ឋអាមេរិក ។

ចំណែកគណៈកម្មការអឺរ៉ុបបានច្រានចោលការចោទប្រកាន់នេះ និងបញ្ជាក់ពីសហភាពអឺរ៉ុបនៅតែគោរពតាមកិច្ចព្រមព្រៀងជាមួយអាមេរិក ព្រមទាំងជ្រើសយកជម្រើសរបស់ខ្លួនដើម្បីការពារផលប្រយោជន៍តំបន់អឺរ៉ុប ។ តាមការលើកឡើងរបស់អ្នកនាំពាក្យគណៈកម្មការអឺរ៉ុប ប្រសិនបើអាមេរិកធ្វើអ្វីផ្ទុយនឹងកិច្ចព្រមព្រៀង ពួកគេនឹងពិចារណាចាត់វិធានការតបតវិញដើម្បីការពារផលប្រយោជន៍សហភាពអឺរ៉ុប ។

សូមរំឭកថា ភាពតានតឹងពាណិជ្ជកម្មជាថ្មីនេះបានកើតឡើងក្នុងពេលវេលាមិនដល់១ឆ្នាំ បន្ទាប់ពីអាមេរិក និងសហភាពអឺរ៉ុប បានធ្វើពាណិជ្ជកម្មព្រមព្រៀងពាណិជ្ជកម្មជាមួយគ្នានៅប្រទេសស្កុតឡេន ដោយកិច្ចព្រមព្រៀងនេះបានកំណត់យកពន្ធលើរថយន្តនិងគ្រឿងបន្លាស់នាំចូលពីអឺរ៉ុប ស្មើត្រឹមតែ១៥% ប៉ុណ្ណោះ ។ កាលពីខែកក្កដា ឆ្នាំ២០២៥ សហភាពអឺរ៉ុបបានត្រៀមវិធានការឆ្លើយតបដោយកំណត់ទំនិញអាមេរិកមួយចំនួន ក្នុងករណីការចរចាជាមួយរដ្ឋាភិបាលក្រុងវ៉ាស៊ីនតោនបរាជ័យ ។

បើតាមការព្រមានរបស់អ្នកជំនាញសេដ្ឋកិច្ច វានឹងធ្វើឱ្យតម្លៃរថយន្តថ្មីនៅអាមេរិកកើនឡើងរាប់ពាន់ដុល្លារ ហើយបង្កឱ្យមានសង្គ្រាមពាណិជ្ជកម្មសារជាថ្មីជាមួយសហភាពអឺរ៉ុប ។ បើតាមរបាយការណ៍ពី Reuters គឺការសម្រេចចិត្តនេះធ្វើឡើងស្របពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំងរវាងអាមេរិក និងសហភាពអឺរ៉ុប លើបញ្ហាផ្សេងៗផងដែរ ៕

កាលពីថ្ងៃទី២ ខែឧសភា ឆ្នាំ២០២៦ ភ្នំភ្លើង Mayon នៅខេត្ត Albay ប្រទេសហ្វីលីពីន បានផ្ទុះបញ្ចេញផ្សែងផេះខ្មួលខ្មាញ់ឡើងលើអាកាសស្មើកម្ពស់ជាង១គីឡូម៉ែត្រ បង្ខំឱ្យពលរដ្ឋជាង៣០០គ្រួសារជម្លៀសចេញពីផ្ទះសម្បែងភ្លាមៗ ហើយចំនួនពលរដ្ឋជម្លៀសចេញនឹងកើនឡើងថែមទៀត បន្ទាប់ពីផ្សែងផេះគ្របដណ្តប់រហូតដល់៨៧ភូមិ ។ ទោះជាពុំបណ្តាលឱ្យមនុស្សរងរបួស ឬស្លា.ប់ ប៉ុន្តែវាធ្វើឱ្យអ្នកបើកបររថយន្ត មើលមិនឃើញផ្លូវ និងប៉ះពាល់ដល់ការដកដង្ហើម ។

បើតាមនាយកវិទ្យាស្ថានភ្នំភ្លើង និងគ្រោះរញ្ជួយដីហ្វីលីពីន គឺភ្នំភ្លើង Mayon បានផ្ទុះតិចៗជាបន្តបន្ទាប់តាំងពីខែមករា មកម៉្លេះ ប៉ុន្តែកំអែភ្នំភ្លើងយ៉ាងច្រើនដែលប្រមូលផ្តុំលើជម្រាលភ្នំនៅភាគនិរតីបានហូរចុះមកភ្លាមៗ ព្រមជាមួយផ្ទាំងថ្មដ៏ក្តៅ ផេះ និងឧស្ម័ន កាលពីថ្ងៃទី២ ខែឧសភា ។ ហេតុការណ៍នេះពុំបណ្តាលឱ្យមនុស្សរងរបួស ឬស្លាប់ទេ ប៉ុន្តែភ្នំភ្លើងបានបញ្ចេញផ្សែងផេះយ៉ាងច្រើនគ្របដណ្តប់រហូតដល់៨៧ភូមិ ដែលធ្វើឱ្យមនុស្សម្នាភ្ញាក់ផ្អើល ពិបាកបើកបររថយន្តដោយសារមើលផ្លូវមិនឃើញ និងពិបាកដកដង្ហើម ។

ការបញ្ចេញផ្សែងផេះយ៉ាងច្រើនពីមាត់ភ្នំភ្លើងនេះ បណ្តាលមកពីការបាក់ស្រុតនៃស្រទាប់កំអែលភ្នំភ្លើងនៅតាមជម្រាលភ្នំ ដែលបង្កើតជាឧស្ម័នក្តៅហូរចុះមកក្រោម ។ អាជ្ញាធរបានហាមឃាត់ដាច់ខាតមិនឱ្យពលរដ្ឋចូលក្បែរតំបន់គ្រោះថ្នាក់នៅជុំវិញមាត់ភ្នំភ្លើង ។

ទោះជាហេតុការណ៍នេះមិនបណ្តាលឱ្យមនុស្សស្លាប់ ប៉ុន្តែបានបំផ្លាញកសិដ្ឋានដាំបន្លែ និងធ្វើឱ្យក្របីងាប់៤ក្បាល, គោងាប់១ក្បាល ។ រហូតមកដល់ថ្ងៃទី៤ ខែឧសភា នេះ ស្ថានការណ៍ភ្នំភ្លើង Mayon ស្ងប់ស្ងាត់ហើយ ប៉ុន្តែគ្រោះថ្នាក់នៅតែអាចកើតឡើងជានិច្ច ។

អាជ្ញាធរបានប្រកាសអាសន្នពីគ្រោះថ្នាក់នៅតំបន់ជុំវិញភ្នំភ្លើងរហូតដល់កម្រិតទី៣ ក្នុងចំណោម៥កម្រិត បន្ទាប់ពីវាផ្ទុះតិចៗជាច្រើនលើកបណ្តាលឱ្យបាក់ផ្ទាំងថ្មធ្លាក់ចុះពីមាត់ភ្នំភ្លើង ក្នុងនោះផ្ទាំងថ្មខ្លះមានទំហំធំៗប៉ុនរថយន្ត ដែលធ្លាក់មកជាមួយកំអែភ្នំភ្លើងអាចគ្រោះថ្នាក់ដល់ជីវិតមនុស្ស ។ ការប្រកាសអាសន្នកម្រិត៣ មានន័យថា ភ្នំភ្លើងអាចនឹងផ្ទុះឡើងបង្កគ្រោះថ្នាក់នាពេលឆាប់ៗ រីឯការប្រកាសអាសន្នកម្រិតទី៥ គឺជាកម្រិតគ្រោះថ្នាក់ខ្លាំងបំផុតដែលកើតឡើងដោយសារកំអែភ្នំភ្លើង ព្រមទាំងការបញ្ចេញផេះយ៉ាងខ្លាំង ។

គួរបញ្ជាក់ថា ភ្នំភ្លើង Mayon មានកម្ពស់២,៤៦២ម៉ែត្រ គឺជាតំបន់ទេសចរណ៍ដ៏ពេញនិយមមួយនៅប្រទេសហ្វីលីពីន ដោយសារតែរូបរាងស្រស់ស្អាតរបស់វា ប៉ុន្តែក៏ជាភ្នំភ្លើងដែលអាចគ្រោះថ្នាក់បំផុតក្នុងចំណោមភ្នំភ្លើងគ្រោះថ្នាក់របស់ហ្វីលីពី ចំនួន២៤កន្លែង ៕

នៅថ្ងៃទី៤ ខែឧសភា ឆ្នាំ២០២៦ មន្ត្រីជំនាញថៃបានរកឃើញទុរេនខ្ចីទម្ងន់ជាង១តោន (ឬជាង៥០០ផ្លែ) ត្រូវបានក្រុមឈ្មួញវេចខ្ចប់ច្រកឡាំងរួចរាល់ ស្ថិតនៅទីតាំងចំនួន៣កន្លែង ក្នុងខេត្តចន្ទបុរី ដើម្បីត្រៀមបញ្ជូនតាមរថយន្តនាំចេញទៅក្រៅប្រទេស ។ តាមការត្រួតពិនិត្យសាច់ទុរេនម៉នថង គឺមិនស្របតាមស្តង់ដារកំណត់ ដែលក្រុមឈ្មួញបានប្រមូលទិញពីចម្ការទុរេនខូចខាតដោយសារខ្យល់ព្យុះ ហើយមន្ត្រីជំនាញក៏ដាស់តឿនឱ្យក្រុមឈ្មួញនាំចេញទុរេនមានគុណភាពល្អ ប្រសិនបើរកឃើញការលួ.ចនាំចេញទុរេនខ្ចីជាលើកទី២ នឹងដកហូតអាជ្ញាប័ណ្ណ មិនអនុញ្ញាតឱ្យនាំចេញ ចាប់ពី៣០ថ្ងៃ ទៅ៩០ថ្ងៃ និងដកហូតអាជ្ញាប័ណ្ណជារៀងរហូត ។

តាមការចុះផ្សាយរបស់សារព័ត៌មានថៃនៅថ្ងៃទី៤ ខែឧសភា ឆ្នាំ២០២៦ មន្ត្រីជំនាញបានចុះឆែកឆេរទីតាំងវេចខ្ចប់ទុរេន ចំនួន៣កន្លែង នៅខេត្តចន្ទបុរី ដែលមានចំនួនសរុបស្មើ៣៥០ឡាំង (ទម្ងន់ជាង៧តោន) ដែលក្រុមឈ្មួញកំពុងត្រៀមបញ្ជូនតាមរថយន្តដើម្បីនាំចេញទៅក្រៅប្រទេស ប៉ុន្តែក្នុងចំណោមទុរេនទាំងនេះ មន្ត្រីជំនាញរកឃើញទុរេនខ្ចីរហូតដល់ជាង១តោន (ឬជាង៥០០ផ្លែ) ។ បន្ទាប់មក មន្ត្រីជំនាញក៏បញ្ជាឱ្យឈ្មួញរើទុរេនទាំងអស់ចេញពីឡាំង និងហាមមិនឱ្យនាំចេញទៅក្រៅប្រទេស នាំឱ្យខូចកេរ្តិ៍ឈ្មោះទុរេនថៃ ។

មន្ត្រីជំនាញដែលបានចុះត្រួតពិនិត្យទីតាំងវេចខ្ចប់ទុរេននៅខេត្តចន្ទបុរី ឱ្យដឹងថា ទុរេនខ្ចី ទុរេនគ្មានគុណភាព និងទុរេនខូចខាតដោយសារខ្យល់ព្យុះ មានទម្ងន់ជាង១តោន ត្រូវបានក្រុមឈ្មួញត្រៀមនាំចេញទៅលក់នៅក្រៅប្រទេសដែលធ្វើឱ្យខូចកេរ្តិ៍ឈ្មោះទុរេនថៃ ស្របពេលបច្ចុប្បន្ន ចិនបដិសេធការនាំចូលទុរេនថៃ ដោយសារផ្ទុកសារធាតុគីមីច្រើនប៉ះពាល់សុខភាពអ្នកបរិភោគ ។

ទីតាំងវេចខ្ចប់ទុរេនគ្មានគុណភាព គឺស្ថិតនៅឃុំថុងបេនចា ស្រុកថាម៉ៃ ចំនួន២កន្លែង និងទីតាំង១កន្លែងទៀត ស្ថិតនៅឃុំស៊ែលុង ស្រុកមឿងចន្ទបុរី ខេត្តចន្ទបុរី ។ សាច់ទុរេនម៉ុនថងភាគច្រើនគ្មានស្តង់ដារ ទើបមន្ត្រីជំនាញបញ្ជាឱ្យក្រុមឈ្មួញរើទុរេនចេញពីឡាំងទាំង៣៥០ឡាំង ។ ក្នុងចំណោមទុរេនទាំងនេះ ក្នុងនោះទុរេនគ្មានគុណភាព គឺស្មើរហូតដល់ជាង១តោន (ឬជាង៥០០ផ្លែ) ទើបមន្ត្រីជំនាញឱ្យឈ្មួញបាញ់ថ្នាំពណ៌សម្គាល់ថា «ជាទុរេនគ្មានគុណភាព» ដើម្បីកុំឱ្យលាយឡំជាមួយទុរេនផ្សេងទៀត ។

មន្ត្រីជំនាញបានដាស់តឿនឱ្យក្រុមឈ្មួញនាំចេញទុរេនមានគុណភាពល្អទៅក្រៅប្រទេស ប្រសិនបើរកឃើញថា ក្រុមឈ្មួញលួចនាំចេញទុរេនខ្ចីគ្មានគុណភាពជាលើកទី២ គឺនឹងដកហូតអាជ្ញាប័ណ្ណនាំចេញ (ដោយមិនអនុញ្ញាតឱ្យនាំចេញទុរេន ចាប់ពី៣០ថ្ងៃ ទៅ៩០ថ្ងៃ) និងពិចារណាដកហូតអាជ្ញាប័ណ្ណជារៀងរហូត ។

គួរបញ្ជាក់ថា កាលពីខែមេសា ឆ្នាំ២០២៥ មន្ត្រីជំនាញថៃក៏ធ្លាប់រកឃើញទីតាំងលួចលាក់នាំចេញទុរេនខ្ចីពីខេត្តចន្ទបុរីទៅក្រៅប្រទេសដែរ ប៉ុន្តែសកម្មភាពនេះនៅតែកើតមានឡើងរហូតមក ។ បច្ចុប្បន្ន ទុរេនគ្មានគុណភាពនៅប្រទេសថៃត្រូវបានដាក់លក់ក្នុងតម្លៃថោកៗដើម្បីបញ្ចេញពីស្តុក ថៃកំពុងមានបញ្ហាទុរេនលើសតម្រូវការយ៉ាងខ្លាំងដោយសារចិនដែលជាទីផ្សារនាំចេញដ៏ធំ រឹតបន្តឹងការនាំចូល ទើបក្រសួងពាណិជ្ជកម្មថៃហៅ Influencer ល្បីមកជួយលក់ទុរេនតាមអនឡាញក្នុងតម្លៃឡៃឡុង ។

ទុរេនលើសតម្រូវការនៅថៃកើតឡើងស្របពេលគយចិនបានរាយការណ៍ពីការរកឃើញសារធាតុ Basic Yellow 2 (BY2) ដែលអង្គការសុខភាពពិភពលោក ចាត់ទុកជាសារធាតុបង្កជំងឺមហារីកក្នុងទុរេនថៃ ហើយចិនកំណត់ឱ្យការនាំចេញទុរេនទាំងអស់របស់ថៃ ត្រូវតែមានឯកសារបញ្ជាក់ច្បាស់លាស់ថា គ្មានសារធាតុ BY2 និងសារធាតុ Cadmium ៕

ប្រធានាធិបតីសហរដ្ឋអាមេរិក លោក ដូណាល់ត្រាំ បាននិយាយកាលពីថ្ងៃអាទិត្យថា សហរដ្ឋអាមេរិកនឹងចាត់ឲ្យកងកម្លាំងអាមេរិកអមដំណើរកប៉ាល់ពាណិជ្ជកម្មរបស់ប្រទេសនានា ដែលមិនបានជាប់ពាក់ព័ន្ធនៅក្នុងជម្លោះឲ្យអាចឆ្លងកាត់ច្រកសមុទ្រ Hormuz ចាប់ពីព្រឹកថ្ងៃច័ន្ទតទៅ (ម៉ោងនៅមជ្ឈិមបូព៌ា) ដោយពណ៌នាអំពីកិច្ចខិតខំប្រឹងប្រែងនេះថាជា “កាយវិការមនុស្សធម៌” ។

យោងតាមការចុះផ្សាយរបស់ Anadolu ដោយបានដកស្រង់សម្តីមេដឹកនាំអាមេរិកកាលពីថ្ងៃអាទិត្យ ទី៣ ឧសភា បានឲ្យដឹងថា ប្រតិបត្តិការអមកប៉ាល់ធ្វើដំណើរឆ្លងកាត់ច្រកសមុទ្រ Hormuz ដែលមានឈ្មោះថា Project Freedom នឹងចាប់ផ្ដើមធ្វើឡើងនៅថ្ងៃចន្ទដើមសប្ដាហ៍នេះ និងជាកាយវិការមនុស្សធម៌មួយចំពោះក្រុមនាវិកស្ថិតនៅលើកប៉ាល់រងផលប៉ះពាល់ដោយសារការបិទខ្ទប់ និងអាចកំពុងប្រឈមនឹងការខ្វះខាតស្បៀង រួមទាំងសម្ភារៈផ្គត់ផ្គង់ ចាំបាច់ផ្សេងទៀត។

ជាមួយគ្នានេះ នៅក្នុងសារមួយបង្ហោះលើបណ្ដាញទំនាក់ទំនងសង្គម Truth Social លោក ត្រាំ បានគូសបញ្ជាក់យ៉ាងដូច្នេះថា «យើងនឹងប្រឹងប្រែងដើម្បីជួយកប៉ាល់ និងនាវិក របស់ពួកគេចាកចេញពីច្រកសមុទ្រ (Hormuz) ដោយសុវត្ថិភាព។ ពួកគេនិយាយថាពួកគេនឹងមិនត្រឡប់មកវិញនោះទេ រហូតទាល់តែតំបន់មានសុវត្ថិភាពសម្រាប់ការធ្វើនាវាចរ។

សូមជម្រាបថា កងបញ្ជាការកណ្តាលអាមេរិក (CENTCOM) បានប្រកាសថា ខ្លួននឹងចាប់អនុវត្តបទបញ្ជារបស់លោកត្រាំ ពីថ្ងៃចន្ទនេះទៅ ដើម្បីស្តារសេរីភាព នៃការធ្វើនាវាចរណ៍នៅច្រក Hormuz ឡើងវិញ។ តាមការបញ្ជាក់ ប្រតិបត្តិការនេះ នឹងមានការចូលរួម ពីសំណាក់នាវាចម្បាំង បំពាក់មីស៊ីលនាំផ្លូវ, យន្តហោះចម្បាំងជាង ១០០គ្រឿង (ទាំងឈរជើងលើដីគោក និងលើនាវា) និងកងកម្លាំងសរុប ១៥ ០០០ នាក់។

ឆ្លើយតបនឹងការប្រកាសខាងលើ ទីក្រុងតេហេរ៉ង់ បានបង្ហាញប្រតិកម្មយ៉ាងខ្លាំង ចំពោះគម្រោងរបស់លោក ត្រាំ ដោយប្រធានគណៈកម្មការធិការសន្តិសុខជាតិ នៃសភាអ៊ីរ៉ង់ លោក Ebrahim Azizi ព្រមានថា បើអាមេរិក ហ៊ានធ្វើបែបនេះមែន នោះគឺស្មើនឹងការរំលោភបទឈប់បា.ញ់។

បើតាមអ្នកវិភាគ ផែនការនេះអាចជួយឱ្យមានស្ថេរភាពនៃការដឹកជញ្ជូនក្នុងរយៈពេលខ្លី ប៉ុន្តែក៏អាចបង្កើនហានិភ័យនៃការប្រឈមមុខដាក់គ្នាផងដែរ ប្រសិនបើកងកម្លាំងយោធាមកពីប្រទេសផ្សេងៗគ្នាធ្វើប្រតិបត្តិការយ៉ាងជិតស្និទ្ធនៅក្នុងដែនទឹកដូចគ្នា ដែលធ្វើឲ្យស្ថានភាពសម្របសម្រួលបញ្ចប់សង្រ្គាមដើម្បីសន្តិភាពនៅតែមានអស្ថិរភាព៕