ប្រទេសថៃ ៖ កាលពីថ្ងៃទី១៥ ខែកក្កដា ឆ្នាំ២០២៥ សារព័ត៌មានថៃរាយការណ៍ថា រដ្ឋមន្ត្រីក្រសួងការបរទេសថៃ លោក ម៉ារីស សាងៀមផុង ត្រៀមផ្ញើលិខិតអញ្ជើញកម្ពុជាចូលរួមកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ នៅខែកញ្ញានេះ ។ លោកបានបញ្ជាក់ពីក្រសួងការបរទេសថៃពុំតទល់ជាមួយកម្ពុជាក្នុងបណ្តាញសង្គម និងផ្តោតលើការទំនាក់ទំនងផ្លូវការប៉ុណ្ណោះ ។

នៅវិមានរដ្ឋាភិបាល រដ្ឋមន្ត្រីក្រសួងការបរទេសថៃ លោក ម៉ារីស សាងៀមផុង បានផ្តល់បទសម្ភាសន៍នៅថ្ងៃទី១៥ ខែកក្កដា ពីស្ថានការណ៍ព្រំដែនកម្ពុជា-ថៃបច្ចុប្បន្នថា គឺនៅតែដូចមុន គ្មានអ្វីផ្លាស់ប្តូរទេ ហើយលោកត្រៀមផ្ញើលិខិតអញ្ជើញកម្ពុជាចូលរួមកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ នៅខែកញ្ញានេះ ពីព្រោះត្រូវបញ្ជាក់នូវអ្វីដែលបានជជែកគ្នារួចហើយ ។

ក្រសួងការបរទេសថៃនឹងជូនដំណឹងតាមរយៈបណ្តាញផ្លូវការប៉ុណ្ណោះ និងពុំតទល់ជាមួយកម្ពុជាក្នុងបណ្តាញសង្គម ពីព្រោះវាពុំមែនជាការទូត ។ ក្រសួងការបរទេសថៃនឹងប្រកាន់យកនូវការជជែកផ្លូវការ ខណៈការតទល់ គឺជាសិទ្ធិរបស់បុគ្គលម្នាក់ៗ ប៉ុន្តែយើងពុំប្រើប្រាស់បណ្តាញទំនាក់ទំនងមិនផ្លូវការ ។

គួរបញ្ជាក់ថា ប្រទេសថៃនៅតែប្រកាន់គោលជំហរចរចាព្រំដែនជាមួយកម្ពុជាតាមរយៈយន្តការទ្វេភាគី និងពុំចង់ដោះស្រាយបញ្ហានៅតុលាការយុត្តិធម៌អន្តរជាតិ (ICJ) ពីព្រោះថៃបារម្ភពីការចាញ់ក្តីដូចករណីប្រាសាទព្រះវិហារកន្លងមក ។ ប៉ុន្តែកម្ពុជាបានដាក់បញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ ទៅកាន់តុលាការយុត្តិធម៌អន្តរជាតិ ដើម្បីកុំឱ្យបញ្ហាអូសបន្លាយរហូតដល់កូនចៅជំនាន់ក្រោយ ។

ដោយឡែក ព័ត៌មានអាមេរិកស្នើសុំប្រើប្រាស់មូលដ្ឋានកងទ័ពជើងទឹកនៅខេត្តផាំងង៉ា ប្រទេសថៃ លោក ម៉ារីស សាងៀមផុង និយាយថា ពេលនេះ ពុំទាន់មានការប្រើប្រាស់នៅឡើយទេ និងត្រូវជជែកគ្នា ពីព្រោះលោកពុំទាន់ឃើញឯកសារ ។ វាអាចជាការប៉ាន់ស្មាន លោកពុំដឹងថា រឿងវាដូចម្តេច ប៉ុន្តែបើអាមេរិកប្រើប្រាស់មូលដ្ឋានកងទ័ពជើងទឹកនៅថៃ គឺត្រូវជជែកគ្នាសិន ៕

ថៃ៖ ក្រោយពីមានការប្រកាសចាប់ខ្លួន និងកាត់ទោសចំពោះលោក Sommai Srisukranan អតីតអនុរក្សយោធាថៃកំសាកញី ដែលធ្វើការលួចវា.យទាហានខ្មែរនៅប្រាសាទតាមាន់ធំ និងរត់គេចខ្លួន ពេលនេះស្រាប់តែមានមេធាវីចិត្តធម៌ម្នាក់ ប្រកាសជួយគាត់ពេញទំហឹងក្នុងដោះស្រាយជាមួយផ្លូវច្បាប់លើបញ្ហានេះ។

ថ្មីៗនេះ លោក Kritsada Lohitdee ហៅ “មេធាវី Nobita” ដែលជាមេធាវីដ៏ល្បីនៅខេត្ត Udon Thani បានបង្ហោះសារនៅលើទំព័រ Facebook ផ្ទាល់ខ្លួនថា “ខ្ញុំមិនគាំទ្រអំពើហឹង្សាទេ ប៉ុន្តែប្រសិនបើបងប្រុសដែលដាល់ទាហានកម្ពុជានោះត្រូវគេដាក់ទោស ខ្ញុំរីករាយផ្តល់ជំនួយផ្នែកផ្លូវច្បាប់”។

ក្រោយពីបានបង្ហោះសារបែបនេះរួចមក លោកក៏បានបង្ហោះជាវីដេអូបន្ថែមទៀតដោយនិយាយថា «ករណីអតីតទាហានឈុតខ្មៅដែលដាល់ទាហានខ្មែរ បើគាត់ត្រូវកាត់ទោស ហើយមិនមានមេធាវីទេនោះ សូមបង ឬបងប្អូនអ្នកស្តាប់ ជួយទាក់ទងមកខ្ញុំ ខ្ញុំជាមេធាវី “ណូប៊ី” ខ្ញុំនឹងរីករាយក្នុងការធ្វើជាមេធាវីរបស់បង»។

បន្ថែមពីលើនេះ មេធាវីម្នាក់ទៀតឈ្មោះ Kerdphol Kaewkerd បានបញ្ចេញមតិបែបលេងសើច ទំនងចង់ឌឺដងមកកាន់កម្ពុជាថា «ករណីនេះត្រូវទៅតុលាការយុត្តិធម៌អន្តរជាតិ (ICJ) តើលោកមានអាជ្ញាប័ណ្ណសម្រាប់ធ្វើមេធាវីអន្តរជាតិទេ?” និងមតិជាច្រើនទៀតដែលគាំទ្រក្នុងការជួយ និងលើកទឹកចិត្តលោក Sommai Srisukranan ដែលជាជនដៃដល់។ ប្រជាជនថៃភាគច្រើនបានអះអាងថា ពួកគេមិនគាំទ្រការប្រើអំពើហិង្សានោះទេ ប៉ុន្តែសម្រាប់អ្វីដែលលោក Sommai បានធ្វើ ពួកគេយល់ថាគឺជាទង្វើក្លាហានរបស់អ្នកស្នេហាជាតិ។

គួររម្លឹកថា កាលពីថ្ងៃទី១៣ ខែកក្កដា ឆ្នាំ២០២៥ បានកើតមាននូវឧបត្តិហេតុមួយបានកើតឡើង ដោយភ្ញៀវទេសចរថៃ ដែលស្លៀកពាក់ឯកសណ្ឋានជាទាហានឈុតខ្មៅបានទៅសុំចាប់ដៃជាមួយទាហានកម្ពុជា ដែលល្បាតនៅទីតាំងប្រាសាទតាមាន់ធំ។ បើតាមឃ្លីបវីដេអូដែលគេថតបាន ខណៈពេលដែលចាប់ដៃបានបន្តិចនោះ ស្រាប់តែភ្ញៀវទេសចរថៃនោះលួ.ចបន្លុះដាល់មុខទាហានកម្ពុជាពីក្រោយ និងរត់គេចខ្លួនពីកន្លែងកើតហេតុបាត់ទៅ។

បន្ទាប់ពីការស៊ើបអង្កេត ខាងកងទ័ពថៃបានរកឃើញថាជនល្មើសដែលមានឈ្មោះថា Sommai Srisukranan អតីតអនុរក្សស្ម័គ្រចិត្ត និងជាប្រធានបណ្តាញអតីតយុទ្ធជនខេត្ត Samut Sakhon ។ ក្រោយពេលកើតហេតុ លោក Sommai បានភៀសខ្លួនត្រឡប់ទៅប្រទេសថៃវិញមុនពេលត្រូវបានមន្ត្រីចាប់ខ្លួន។

ជាមួយគ្នានេះ ខណៈដែលក្រសួងការពារជាតិថៃ បានប្រកាសថានឹងអនុវត្តវិធានការផ្លូវច្បាប់ឲ្យស័ក្តិសមទៅនឹងទង្វើរបស់លោក Sommai មហាជនជាច្រើនបានចេញមកកាន់ជើង ព្រមទាំងធ្វើការតវ៉ាថាវាជារឿងអយុត្តិធម៌ និងមិនគួរដាក់ទោសដល់គាត់បែបនេះនោះទេ ព្រោះកាលដែលគាត់ធ្វើបែបនេះគឺដោយសារតែអារម្មណ៍ស្នេហាជាតិប៉ុណ្ណោះ៕

ប្រទេសថៃ ៖ កាលពីថ្ងៃទី១៣ ខែកក្កដា ឆ្នាំ២០២៥ សារព័ត៌មានថៃរាយការណ៍ថា ពេលឃើញប្រទេសថៃមានជម្លោះជាមួយកម្ពុជា ស្រាប់តែកងទ័ពវ៉ាឌែងនៅមីយ៉ាន់ម៉ាបានចល័តកម្លាំងនៅព្រំដែនថៃ-មីយ៉ាន់ម៉ា ជាហេតុធ្វើឱ្យកងទ័ពថៃប្រមូលកម្លាំងការពារអធិបតេយ្យ និងប្រកាសតទល់ភ្លាមៗជាមួយកងទ័ពវ៉ាឌែង ។ ក្រៅពីនេះ កងទ័ពថៃនឹងទប់ស្កាត់ការជួញដូរគ្រឿងញៀនរបស់កងទ័ពវ៉ាឌែងចូលមកថៃ ដោយបង្កើនកម្លាំងយាមល្បាត អភិវឌ្ឍន៍បច្ចេកវិទ្យាដ្រូន និងឧបករណ៍ត្រួតពិនិត្យតាមព្រំដែន ។

សារព័ត៌មានថៃរាយការណ៍ថា បច្ចុប្បន្ន ប្រទេសថៃកំពុងចាប់អារម្មណ៍ និងប្រមូលកម្លាំងទ័ពទៅកាន់ខេត្តភាគឦសាននៅតំបន់ព្រំដែនកម្ពុជា-ថៃ ហើយសារព័ត៌មានថៃនានាក៏ផ្តោតការផ្សព្វផ្សាយតែជម្លោះព្រំដែនជាមួយកម្ពុជា ។ ប៉ុន្តែនៅព្រំដែនភាគខាងជើងថៃឯណោះវិញ ជាពិសេស នៅបរិវេណជាប់ជាមួយកងទ័ពវ៉ាឌែង ដែលជាក្រុមជួញដូរគ្រឿងញៀនដ៏ធំលំដាប់ពិភពលោក បានចល័តកម្លាំងនៅតាមព្រំដែន ។

បើតាមសេចក្តីរាយការណ៍ គឺកាលពីខែមិថុនា ឆ្នាំ២០២៥ កងទ័ពវ៉ាឌែងនៅប្រទេសមីយ៉ាន់ម៉ា បានព្យាយាមបញ្ជូនថ្នាំញៀនរាប់លានគ្រាប់តាមព្រំដែនចូលមកទឹកដីថៃ ដោយសារគិតថា កងទ័ពថៃផ្តោតការចាប់អារម្មណ៍តែរឿងជម្លោះព្រំដែនជាមួយកម្ពុជា ។

នៅថ្ងៃទី១៣ ខែកក្កដា មេបញ្ជាការកងទ័ពថៃ លោកឧត្តមសេនីយ៍ ស៊ុងីដ ណុនភក្តី និងជាប្រធានមជ្ឈមណ្ឌលបង្ការ ដោះស្រាយការគំរាមកំហែងប៉ះពាល់សន្តិសុខតំបន់ព្រំដែនជាមួយប្រទេសជិតខាង បានចុះពិនិត្យមើលទីតាំងប្រតិបត្តិការដយឆាងមូប ស្រុកម៉េហ្វាហ្លួង ខេត្តឈៀងរ៉ៃ និងតាមដានការអនុវត្តការងាររបស់កងកម្លាំងពិសេសទប់ស្កាត់ថ្នាំញៀនតាមបណ្តោយព្រំដែនភាគខាងជើង ។ លោកថា ថៃចាំបាច់ត្រូវតែបង្កើនកម្លាំងឱ្យច្រើន ដោយសារបទល្មើសតាមព្រំដែនកើនឡើងនាពេលបច្ចុប្បន្ន ។

លោកបានបញ្ជាឱ្យមជ្ឈមណ្ឌលប្រតិបត្តិការកងទ័ពជើងគោកបង្កើនកម្លាំងកងទ័ពនៅតាមព្រំដែនថៃ-មីយ៉ាន់ម៉ា ទោះជាថៃមានចំនួនកងទ័ពច្រើនក្តី ប៉ុន្តែចំនួនកងទ័ពថៃនៅព្រំដែនជាប់មីយ៉ាន់ម៉ាមានកំណត់ ។ ហេតុនេះ ថៃត្រូវតែបង្កើនកម្លាំងយាមល្បាត អភិវឌ្ឍន៍បច្ចេកវិទ្យាដ្រូន និងឧបករណ៍ត្រួតពិនិត្យ ស្របពេលស្ថានការណ៍គ្រឿងញៀនជារួមល្អប្រសើរ ប៉ុន្តែបទល្មើសគ្រឿងញៀននៅព្រំដែនថៃ និងមីយ៉ាន់ម៉ា នៅតែមានចំនួនខ្ពស់ ដែលថៃត្រូវសហការទប់ស្កាត់ជាមួយប្រទេសជិតខាង ។

លោកជឿជាក់ថា នឹងអាចដោះស្រាយបញ្ហាថ្នាំញៀន ប៉ុន្តែបើថៃពុំទប់ស្កាត់ការផលិតថ្នាំញៀនទេ ចំនួនថ្នាំញៀននឹងកើនឡើងខ្ពស់មិនខាន ។ ថៃចាំបាច់ត្រូវជជែកពីបញ្ហាថ្នាំញៀនជាមួយប្រទេសជិតខាង និងពិភពលោកដើម្បីជួយដោះស្រាយបញ្ហានេះ ៕

ថៃ៖ ប៉ូលិសស៊ើបអង្កេតផ្នែកឧក្រិដ្ឋកម្មតាមអ៊ីនធឺណិតបានបញ្ជូនសំណុំរឿងដែលទាក់ទងនឹងការលេចធ្លាយនូវការហៅទូរស័ព្ទរវាងនាយករដ្ឋមន្ត្រី Paetongtarn Shinawatra និង សម្ដេចតេជោ ហ៊ុន សែន ទៅកាន់ព្រះរាជអាជ្ញាសាធារណៈដើម្បីស្នើសុំដីកាចាប់ខ្លួនពីប៉ូលីស Interpol ។

យោងតាមការចុះផ្សាយរបស់សារព័ត៌មាន បាងកកប៉ុស្តិ៍ នាថ្ងៃចន្ទ ទី១៤ ខែកក្កដា បានឲ្យដឹងថា៖ ឧត្តមសេនីយ៍ទោ Siriwat Deepor មេបញ្ជាការផ្នែកស៊ើបអង្កេតឧក្រិដ្ឋកម្មតាមអ៊ីនធឺណិតទី 1 បានដាក់ឯកសារចំនួន 50 ទំព័រនៃសំណុំរឿងនេះនៅការិយាល័យអគ្គមេធាវី ( OAG) ក្នុងទីក្រុងបាងកកកាលពីព្រឹកថ្ងៃចន្ទនេះ។ ឯកសារទាំងនេះ ត្រូវបានរៀបចំឡើងតាមពាក្យបណ្តឹងរបស់លោក Somkid Chueakong អគ្គលេខាធិការរង ទៅកាន់លោកនាយករដ្ឋមន្ត្រី ដែលបានស្វែងរកវិធានការផ្លូវច្បាប់ចំពោះអ្នកប្រើប្រាស់គណនី Facebook ឈ្មោះសម្តេច ហ៊ុន សែន នៃប្រទេសកម្ពុជា។

ប្រភពដដែលបានឲ្យដឹងទៀតថា ដើមបណ្តឹងបានចោ.ទប្រកាន់អ្នកប្រើប្រាស់គណនីខាងលើនេះ ថាបានគំរាមកំហែងសន្តិសុខជាតិ និងបទល្មើសព្រហ្មទណ្ឌផ្សេងទៀត ចំពោះការចេញផ្សាយខ្សែអាត់សំឡេងរយៈពេល 17នាទីនៃការហៅទូរស័ព្ទរវាងលោកស្រី Paetongtarn និងសម្ដេច ហ៊ុន សែន។

ឧត្តមសេនីយ៍ទោ Siriwat បាននិយាយថា ករណីនេះពាក់ព័ន្ធនឹងបទល្មើសនៅក្រៅប្រទេសថៃ ដូច្នេះវាស្ថិតនៅក្រោមការទទួលខុសត្រូវផ្ទាល់របស់អគ្គមេធាវី។ លោកថា ជនជាប់ចោ.ទប្រព្រឹត្តខុសគឺសំដៅដល់អ្នកគ្រប់គ្រងគណនីហ្វេសប៊ុកនោះ។ លោកបដិសេធមិននិយាយថា តើសម្ដេច ហ៊ុន សែន ស្ថិតក្នុងចំណោមជនជាប់ចោ.ទទាំងនោះដែរឬអត់។

បន្ទាប់ពីបានទទួលសំណុំរឿងនេះ អ្នកនាំពាក្យការិយាល័យអគ្គមេធាវី (OAG) លោក Sakkasem Nisaiyok បាននិយាយថា ខាងអគ្គមេធាវីនឹងសម្រេចថាតើសំណុំរឿងនេះមានភស្តុតាងគ្រប់គ្រាន់ដើម្បីបញ្ជូនទៅតុលាការដែរឬទេ។ បើមានភស្តុតាងគ្រប់គ្រាន់ សំណុំរឿងនឹងបញ្ជូនទៅដល់តុលាការព្រហ្មទណ្ឌ ហើយប្រសិនបើចុងចោ.ទមិនបង្ហាញខ្លួន មន្ត្រីថៃនឹងស្វែងរកដីកាចាប់ខ្លួនពីប៉ូលីស Interpol ៕