វៀតណាម៖ ក្រសួងសុខាភិបាលវៀតណាមកំពុងពិចារណាលើគម្រោងផ្តល់ជំនួយជាសាច់ប្រាក់ និងសម្ភារៈដល់គ្រួសារដែលមានកូនស្រីពីរនាក់ ដើម្បីដោះស្រាយអតុល្យភាពយេនឌ័រដែលពេញចិត្តចំពោះការមានកូនប្រុសច្រើនជាងកូនស្រី ព្រមទាំងត្រៀមបង្កើតច្បាប់ថ្មីសម្រាប់ដាក់ពិន័យ លើការជ្រើសរើសភេទកូនតាមបែបវិទ្យាសាស្រ្ត។

យោងតាមការចុះផ្សាយរបស់សាព័តឥមាន VN Express នាថ្ងៃអង្គារ ទី១៥ ខែកក្កដា បានឱ្យដឹងថា រដ្ឋមន្ត្រីក្រសួងសុខាភិបាល លោកស្រី Dao Hong Lan បាននិយាយនៅក្នុងព្រឹត្តិការណ៍ទិវាប្រជាជនពិភពលោកថា វៀតណាមកំពុងប្រឈមមុខនឹងការថយចុះនៃចំនួនប្រជាជន និងមានប្រជាជនភេទប្រុសច្រើសលើស។ ដូចនេះលោកស្រីបានសង្កត់ធ្ងន់លើការលើកទឹកចិត្តគ្រួសារឱ្យមានកូនពីរនាក់ ជាពិសេសកូនស្រី ដើម្បីស្ដារតុល្យភាពប្រជាសាស្រ្តរយៈពេលវែង។ ក្រសួងគ្រោងនឹងដាក់ច្បាប់នេះទៅរដ្ឋាភិបាលនៅខែធ្នូនេះ និងដាក់ជូនរដ្ឋសភានៅឆ្នាំ២០២៦ខាងមុខ។

ទិន្នន័យថ្មីៗបានបង្ហាញថា នៅក្នុងតំបន់ភាគខាងជើង ជាពិសេស Bac Ninh និង Vinh Phuc ហាណូយ និង Hung Yen គឺមានអតុល្យភាពភេទខ្លាំងបំផុត ដោយអត្រាកំណើតទារកប្រុសមានខ្ពស់ជាងកំណើតទារកស្រី។ ប្រសិនបើនិន្នាការនេះនៅតែបន្ត វៀតណាមអាចមានអតិរេកបុរស 1.5 លាននាក់ដែលមានអាយុពី 15 ទៅ 49 ឆ្នាំនៅឆ្នាំ 2034 កើនឡើងដល់ 1.8 លាននាក់នៅឆ្នាំ 2059 នេះបើយោងតាមការព្យាករណ៍របស់ការិយាល័យស្ថិតិទូទៅ។ អ្នកជំនាញព្រមានថា កត្តានេះអាចនាំឱ្យមានអស្ថិរភាពសង្គម ការកើនឡើងនៃការជួញដូរមនុស្ស និងការបង្កើនសម្ពាធលើជីវិតអាពាហ៍ពិពាហ៍។

អតុល្យភាពនេះ បានកើតឡើងដោយសារតែផ្នត់គំនិតចង់បានតែកូនប្រុស ការយកកូនតិច និងជាពិសេសនៅពេលដែលអត្រាអ្នកចង់បានកូនធ្លាក់ចុះ។ អត្រាកំណើតជាតិវៀតណាមឥឡូនេះ ស្ថិតកម្រិតទាបជាប្រវត្តិសាស្ត្រ។ ជាមួយនឹងគ្រួសារតូចៗក្លាយជាបទដ្ឋានពេញនិយម ឪពុកម្តាយជាច្រើនប្រើបច្ចេកវិទ្យាមុនពេលសម្រាល ដើម្បីធានាថាកូនតែមួយរបស់ពួកគេគឺជាក្មេងប្រុស។ ក្រៅពីនេះ ការរំពឹងទុកតាមបែបប្រពៃណីដូចជា កូនប្រុសអាចបន្តពូជពង្សដូនតា បានបន្តពង្រឹងភាពលំអៀងផ្នែកយេនឌ័រ។

ដើម្បីប្រឆាំងនឹងបញ្ហានេះ ក្រសួងសុខាភិបាលវៀតណាមកំពុងស្នើការលើកទឹកចិត្តផ្ទាល់ដល់គ្រួសារដែលមានកូនស្រីពីរនាក់។ ជំនួយអាចមានក្នុងទម្រង់ជាសាច់ប្រាក់ ឬទំនិញប្រើប្រាស់ក្នុងផ្ទះ ស្របតាមលក្ខខណ្ឌក្នុងតំបន់។ ទន្ទឹមនឹងនេះ ក្រសួងក៏កំពុងជំរុញឱ្យមានការពិន័យកាន់តែតឹងរ៉ឹងលើការជ្រើស ភេទទារកដោយខុសច្បាប់ផ្អែកលើវិទ្យាសាស្រ្ត ជាមួយប្រាក់ពិន័យជាអតិបរមាពី 30 លានដុង ទៅ 100 លានដុង (4,000 ដុល្លារ) ។

គួរជម្រាបថា ក្រសួងវៀតណាមអាចនឹងចាប់ផ្តើមបង្ហាញពីបញ្ជីនៃតំបន់ដែលមានអតុល្យភាពយេនឌ័រខ្ពស់បំផុត។ ពួកគេក៏មានគម្រោងក្នុងការបង្កើនយុទ្ធនាការអប់រំសាធារណៈ ក្នុងគោលបំណងបញ្ចប់ការរើសអើងយេនឌ័រ លើកកំពស់សិទ្ធិក្មេងស្រី និងលើកទឹកចិត្តដល់ការមានកូនដោយធម្មជាតិ មិនលំអៀង និងមិនកំណត់ភេទកូន៕

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយថា លោកនឹងដាក់ “ពន្ធដ៏ធ្ងន់ធ្ងរ” លើរុស្ស៊ី ប្រសិនបើមិនមានកិច្ចព្រមព្រៀងសន្តិភាពជាមួយអ៊ុយក្រែន ក្នុងរយៈពេល ៥០ថ្ងៃខាងមុខ រួមជាមួយនឹង “ពន្ធបន្ទាប់បន្សំ” ប្រហែល 100% ទៀតទៅលើប្រទេសផ្សេងៗដែលធ្វើពាណិជ្ជកម្មជាមួយរុស្ស៊ី ដើម្បីជាការដាក់ទណ្ឌកម្មប្រឆាំងនឹងរុស្ស៊ីដែលនៅបន្តឈ្លានពានអ៊ុយក្រែន។

យោងតាមការចុះផ្សាយរបស់សារព័ត៌មាន NBC នាថ្ងៃអង្គារ ទី១៥ កក្កដានេះបានឱ្យដឹងថា ប្រធានាធិបតីអាមេរិកលោកដូណាល់ ត្រាំបានប្រកាសថា សហរដ្ឋអាមេរិកនឹងបញ្ជូនសព្វាវុធធនធ្ងន់ ទៅកាន់ប្រទេសអ៊ុយក្រែន តាមរយៈបណ្តាប្រទេសដែលជាសមាជិកអង្គការ NATO ។ ជាមួយគ្នានេះលោកត្រាំ បានព្រមា.នរុស្ស៊ី ថាអាមេរិកនឹងចាត់វិធានការពន្ធគយដ៏ធ្ងន់ ប្រសិនបើគ្មានកិច្ចព្រមព្រៀងបញ្ចប់សង្គ្រាម នៅក្នុងរយៈពេល ៥០ ថ្ងៃទៀត។

ជាមួយនឹងការកំណត់ពន្ធគយនេះ លោកត្រាំបាននិយាយថា សហរដ្ឋអាមេរិកនឹងដាក់ពន្ធ១០០ភាគរយ សំដៅលើដៃគូពាណិជ្ជកម្មរបស់រុស្ស៊ីសហការជាមួយ ។ គោលបំណងនៃការតម្លើងពន្ធនេះ គឺដោយសារអាមេរិក និងអង្គការ NATO ចង់ឱ្យប្រទេសណាដែលធ្វើពាណិជ្ជកម្មជាមួយរុស្ស៊ីប្រឈមនឹងពន្ធបដិការខ្ពស់នៅពេលនាំចូលមកលក់នៅក្នុងទីផ្សារអាមេរិក។ វានឹងធ្វើឱ្យទំនិញរបស់ពួកគេឡើងថ្លៃខ្លាំង ហើយជំរុញឱ្យអ្នកជំនួញអាមរិកងាកមករកទំនិញដូចគ្នាតែនៅកន្លែងផ្សេងដែលមានតម្លៃថោកជាង ហើយប្រទេសទាំងនោះនឹងបាត់បង់ចំណូល។ ប្រេង និងឧស្ម័នមានចំនួនជិតមួយភាគបី នៃប្រាក់ចំណូលរដ្ឋរបស់ទីក្រុងមូស្គូ និងច្រើនជាង៦០ភាគរយ នៃការនាំចេញរបស់ខ្លួន ដូច្នេះ ពន្ធ ១០០ភាគរយ អាចធ្វើឱ្យខូចផ្នែកហិរញ្ញវត្ថុរបស់រុស្ស៊ី។

ចំណែកលោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន បានបង្ហោះនៅលើបណ្តាញសង្គម X ថា លោកបានពិភាក្សាអំពីមធ្យោបាយ និងដំណោះស្រាយចាំបាច់ជាមួយប្រធានាធិបតីអាមេរិក ដើម្បីផ្តល់ការការពារកាន់តែប្រសើរឡើងសម្រាប់ប្រជាជនអ៊ុយក្រែន ពីការវា.យប្រហាររបស់រុស្ស៊ីនិងត្រៀមខ្លួនរួចរាល់ ក្នុងការអនុវត្តតាមលទ្ធភាពដែលអាចធ្វើទៅបានដើម្បីគាំទ្រដល់កិច្ចព្រមព្រៀងសន្តិភាព។ ឆ្លៀតក្នុងឱកាសនោះ លោកបានអរគុណចំពោះឆន្ទៈរបស់លោកត្រាំ ក្នុងការគាំទ្រអ៊ុយក្រែននិងបន្តធ្វើការរួមគ្នា ដើម្បីបញ្ឈប់ការសម្លា.ប់ ព្រមទាំងបង្កើតសន្តិភាពយូរអង្វែងនិងយុត្តិធម៌៕

ប្រទេសថៃ ៖ កាលពីថ្ងៃទី១៤ ខែកក្កដា ឆ្នាំ២០២៥ សារព័ត៌មានថៃ Nation រាយការណ៍ថា ស្ត្រីម្នាក់ឈ្មោះ ស៊ីកាកូស កំពុងល្បីល្បាញរឿងអាស្រូ.វយ៉ាងខ្លាំងនៅប្រទេសថៃ ដោយសារនាងមានទំនាក់ទំនងស្នេហាជាមួយព្រះសង្ឃជាច្រើនអង្គ ពុំលើកលែងសូម្បីព្រះចៅអធិការវត្ត សុទ្ធតែក្លាយជាប្តីនាងទាំងអស់ ។ បើតាមការសាកសួរពីប្រវត្តិ គឺនាងចូលចិត្តមកធ្វើបុណ្យនៅវត្ត និងសេពគប់ជាមួយព្រះសង្ឃតាំងពីអាយុ១៦ឆ្នាំមកម៉្លេះ ។

ស្ត្រីឈ្មោះ ស៊ីកាកូស តែងតែបើករថយន្តទំនើបទៅធ្វើបុណ្យនៅវត្ត ស្លៀកពាក់ហ៊ឺហារ មានប្រាក់ចាយវាយពេញដៃ និងស្និទ្ធស្នាលជាមួយព្រះចៅអធិការវត្តជាច្រើនអង្គនៅទីក្រុងបាងកក និងតាមបណ្តាខេត្ត ។ ក្រោយពីនាងមានទំនាក់ទំនងជាមួយព្រះចៅអធិការវត្តមិនយូរប៉ុន្មាន ព្រះចៅអធិការវត្តគ្រប់អង្គក៏បានក្លាយជាប្តីនាងទាំងអស់ ហើយព្រះសង្ឃខ្លះថែមទាំងផ្តល់ប្រាក់ឱ្យនាងខ្លះចាយវាយរាប់លានបាតទៀតផង ។

បើស្ត្រីម្នាក់ម្នាក់នៅខេត្តពិជិត រៀបរាប់ថា នាងបានស្គាល់ស្ត្រីឈ្មោះ ស៊ីកាកូស យ៉ាងច្បាស់តាំងពីអាយុ១៦ឆ្នាំ ស្ត្រីរូបនេះចូលចិត្តមកទិញនំយកទៅធ្វើបុណ្យនៅវត្តជាញឹកញាប់ ។ កាលពីមុន នាងឈ្មោះ ប៊ីវ ហើយបានមកជួលបន្ទប់ស្នាក់នៅក្បែរនាង បន្ទាប់មក ស៊ីកាកូស ក៏ធ្វើជាប្រពន្ធបុរសចំណាស់អាយុ៦០ឆ្នាំ ដែលទើបលែងលះជាមួយប្រពន្ធ ។ មិនយូរប៉ុន្មាន អ្នកទាំង២ក៏បានចែកផ្លូវគ្នា ហើយពេលនោះ ស៊ីកាកូស អាយុ១៦ឆ្នាំ គឺនាងមានកូនម្នាក់ ប៉ុន្តែមិនមែននាងមានកូនជាមួយអតីតស្វាមីអាយុ៦០ឆ្នាំទេ គឺនាងមានកូនជាមួយប្អូនប្រុសរបស់ស្វាមី (ប្អូនថ្លៃ) ។

ពេលស្ត្រីឈ្មោះ ស៊ីកាកូស ល្បីល្បាញពេញប្រទេសថៃរឿងអាស្រូវទំនាក់ទំនងផ្លូវភេទជាមួយព្រះសង្ឃជាច្រើនអង្គ អតីតស្វាមី (អាយុ៦០ឆ្នាំ) របស់នាងប្រាប់ថា ធ្លាប់សង្ស័យភរិយាយូរមកហើយ កាលពីពេលពុំទាន់ចែកផ្លូវគ្នា ភរិយាចូលចិត្តទៅវត្តជាញឹកញាប់ ខ្លួនគិតថា តើភរិយាលួចមានអីៗជាមួយព្រះសង្ឃទេដឹង?

ចំណែកអ្នកស្រុករស់នៅខេត្តពិជិត ហួសចិត្តនឹងហេតុការណ៍កើតឡើងពេលនេះ ពីព្រោះកន្លងមក ធ្លាប់មានព័ត៌មានថា ព្រះចៅអធិការវត្ត១អង្គដែលស្ត្រីរូបនេះទៅធ្វើបុណ្យ មានកូនជាមួយនាង ។ កាលពីនាងរស់នៅខេត្តពិជិត ជីវិតនាងលំបាក ប៉ុន្តែក្រោយពេលទៅរស់នៅទីក្រុងបាងកក ស្រាប់តែនាងបើករថយន្តទំនើប មានមាសប្រាក់ពាក់ពេញខ្លួន ។

បច្ចុប្បន្ន ស្ត្រីឈ្មោះ ស៊ីកាកូស មានកូន៣នាក់ ប៉ុន្តែពុំដឹងថា តើកូនទាំង៣នាក់នេះ គឺជាកូនរបស់ព្រះសង្ឃអង្គណាឱ្យប្រាកដ ឬជាកូនរបស់ស្វាមីរូបណា ពីព្រោះគ្មានព័ត៌មានច្បាស់លាស់ថា ក្រោយពីនាងលែងលះជាមួយស្វាមីអាយុ៦០ឆ្នាំ តើនាងទៅសេពគប់ជាមួយបុរសណាទៀតក្រៅពីព្រះសង្ឃ ។

តាមពាក្យចចាមអារ៉ាម គឺព្រះចៅអធិការវត្តដ៏ល្បីនៅខេត្តពិជិត ព្រះនាម ព្រះថេបវ៉ាត់ឆារ៉ាក់ សិទ្ធិមេធី អាចជាឪពុករបស់កូនម្នាក់ក្នុងចំណោម៣នាក់ របស់ស្ត្រីឈ្មោះ ស៊ីកាកូស ។ ប៉ុន្តែព្រះចៅអធិការវត្តរូបនេះថា ពុំពិតទេ អត្មាពុំចង់សឹក ខណៈលោក គីតឆៃប៊ុនពូ ជាមេធាវីវត្តប្រាប់ថា ព្រះចៅអធិការស្អាតស្អំ ពុំពាក់ព័ន្ធរឿងអាស្រូវ ។ រីឯពាក្យចចាមអារ៉ាមថា ព្រះចៅអធិការវត្តមានកូនជាមួយស្ត្រីឈ្មោះ ស៊ីកាកូស គឺព្រះអធិការវត្តបដិសេធ និងត្រៀមខ្លួនពិនិត្យ DNA ។

ដោយឡែក មានសេចក្តីរាយការណ៍ ព្រះសង្ឃ១អង្គទៀតព្រះនាម ផាវ៉ាណា វីធីយៈគុន ឬព្រះអាចារ្យសាវ៉ៃ ប្រធានវត្តឆ័យមង្គល នៅស្រុកវាំងថង ខេត្តពិស្នុលោក បានផ្ទេរប្រាក់ឱ្យស្ត្រី ស៊ីកាកូស ជិត២សែនបាត ។ ព្រះអង្គមានសង្ឃដីកាថា បានស្គាល់ ស៊ីកាកូស កាលពីឆ្នាំ២០២៣ ដោយ ស៊ីកាកូស បានទំនាក់ទំនងតាម Chat ដើម្បីសុំប្រឹក្សាបញ្ហាជីវិត ។ នាងថា ពុំចង់មានជីវិតរស់នៅទៀតទេ ដោយសារគណនីធនាគារត្រូវបានគេហែកចូលធ្វើឱ្យនាងពុំអាចទូទាត់ថ្លៃគ្រឿងម៉ាស៊ីនកុម្ម៉ង់ពីក្រៅប្រទេស ធ្វើឱ្យអាជីវកម្មនាងដួលរលំ ស្មើទឹកប្រាក់៥លានបាត ។

ហេតុនេះ ព្រះអង្គក៏ផ្តល់លេខទូរស័ព្ទឱ្យនាងទំនាក់ទំនង និងផ្តល់កម្លាំងចិត្តឱ្យស្តាប់ធម៌ដើម្បីកុំឱ្យនាងធ្វើអត្តឃាត ។ ក្រោយមក នាងក៏ខ្ចីប្រាក់ព្រះអង្គ ចំនួន១សែនបាត ដើម្បីស្តារអាជីវកម្មកុំឱ្យរលំ ទើបព្រះអង្គសម្រេចចិត្តផ្ទេរប្រាក់ឱ្យនាង ។ ក្រោយពីបានទទួលប្រាក់ នាងក៏បាត់មុខអស់១ឆ្នាំ រហូតដល់ឆ្នាំ២០២៥ នាងប្រាប់ថា ត្រូវប្តីបោះបង់ ហើយនាងគ្មានប្រាក់ទិញទឹកដោះគោឱ្យកូន នាងថែមទាំងផ្ញើរូបកូនឈឺនៅមន្ទីរពេទ្យឱ្យមើល ទើបព្រះអង្គអាណិតក៏ផ្ទេរប្រាក់ឱ្យនាងជាបន្តបន្ទាប់ សរុបជិត២សែនបាត ។

ព្រះអង្គពុំធ្លាប់ឃើញមុខនាងទេ និងពុំធ្លាប់ទៅរកនាង រីឯនាងក៏ពុំបានមករកព្រះអង្គនៅវត្តដែរ ដូច្នេះ ព្រះអង្គគ្មានទំនាក់ទំនងស៊ីជម្រៅជាមួយនាងទេ ។ ព្រះអង្គទើបតែដឹងព័ត៌មានពេលក្រោយថា រូបស្ត្រីមើលក្មេងឈឺនៅមន្ទីរពេទ្យដែល ស៊ីកាកូស ផ្ញើមកឱ្យព្រះអង្គ គឺពុំពាក់ព័ន្ធជាមួយនាងទេ សមត្ថកិច្ចអាចពិនិត្យមើលរូបភាពព្រះសង្ឃជាច្រើនអង្គមានទំនាក់ទំនងស្នេហាជាមួយនាង គឺគ្មានរូបព្រះអង្គទេ ព្រះអង្គគ្រាន់តែផ្ទេរប្រាក់ឱ្យនាងព្រោះអាណិតមនុស្សដូចគ្នា ។

សមត្ថកិច្ចឱ្យដឹងថា ស្ត្រីដែលចាប់ព្រះសង្ឃជាច្រើនអង្គធ្វើប្តី បានទទួលប្រាក់យ៉ាងច្រើនពីព្រះសង្ឍ ហើយនាងយកទៅលេងល្បែង ។ សមត្ថកិច្ចរកឃើញភស្តុតាងព្រះចៅអធិការវត្តជាច្រើនអង្គមានទំនាក់ទំនងស្នេហាជាមួយនាង ពេលនេះ មានព្រះសង្ឃ៨អង្គសឹក ក្នុងនោះមានទាំងព្រះចៅអធិការវត្តនៅទីក្រុងបាងកក និងតាមបណ្តាខេត្ត ។ ក្រៅពីនេះ ព្រះសង្ឃ៣អង្គផ្សេងទៀតក៏មានទំនាក់ទនងជាមួយនាងដែរ ប៉ុន្តែព្រះសង្ឃបដិសេធពុំពាក់ព័ន្ធ ៕