ប្រទេសថៃ ៖ មេបញ្ជាការកងទ័ពថៃចង់ឃើញការប្រឈមមុខនៅព្រំដែនកម្ពុជា-ថៃកាត់បន្ថយ និងដកអាវុ.ធបា.ញ់ចម្ងាយឆ្ងាយចេញពីព្រំដែនទៅកាន់ទីតាំងដើមក្នុងកម្រិតឆ្នាំ២០២៤វិញ ដោយមេបញ្ជាការកងទ័ពថៃបញ្ជាក់ថា ថៃពុំធ្លាប់បិទព្រំដែនទេ គ្រាន់តែគ្រប់គ្រងពេលវេលាបើក-បិទប៉ុណ្ណោះ ។ ប្រទេសទាំងពីរគួរតែបើកព្រំដែនឡើងវិញស្របពេលគ្នា ចាប់ពីម៉ោង៨ព្រឹក ដល់ម៉ោង៦ល្ងាច ដើម្បីផ្តល់ភាពងាយស្រួលដល់ពលរដ្ឋប្រទេសទាំងពីរ ។ នេះបើតាមការផ្សព្វផ្សាយរបស់សារព័ត៌មានថៃ MGR Online កាលពីថ្ងៃទី១៣ ខែកក្កដា ឆ្នាំ២០២៥ ។

កាលពីថ្ងៃទី១២ ខែកក្កដា នៅទីតាំងប្រតិបត្តិការដយឆាងមូប ស្រុកម៉េហ្វាហ្លួង ខេត្តឈៀងរ៉ៃ មេបញ្ជាការកងទ័ពថៃ លោកឧត្តមសេនីយ៍ ស៊ុងីដ ណុនភក្តី និងប្រធានមជ្ឈមណ្ឌលបង្ការ និងដោះស្រាយការគំរាមកំហែងប៉ះពាល់សន្តិសុខតំបន់ព្រំដែនជាមួយប្រទេសជិតខាង បានផ្តល់បទសម្ភាសន៍ពីស្ថានការណ៍ព្រំដែនកម្ពុជា-ថៃថា នៅថ្ងៃទី១១ ខែកក្កដា លោក ប៊ុនស៊ីន ផាកក្លាង មេបញ្ជាការយោធភូមិភាគ២ ប្រាប់លោកថា បច្ចុប្បន្ន ខ្លួនកំពុងចរចាជាមួយកម្ពុជាច្រើនជាងមុនក្នុងកម្រិតកងទ័ពឱ្យមានការល្បាតរួមគ្នា ចំនួប៣ដងក្នុង១សប្តាហ៍ ។

មេបញ្ជាការកងទ័ពថៃ លោកឧត្តមសេនីយ៍ ស៊ុងីដ ណុនភក្តី យល់ស្របជាមួយលោក ប៊ុនស៊ីន ផាកក្លាង មេបញ្ជាការយោធភូមិភាគ២ ដែលបានចរចាជាមួយកម្ពុជា ហើយលោកបញ្ជាក់ថា ប្រទេសថៃនៅតែប្រកាន់គោលជំហរដដែល រួមមាន ៖

១-រក្សាអធិបតេយ្យភាពជាតិដែលមានជាយូរមកហើយតាមផែនការប្រតិបត្តិរបស់ថៃ
២-ចង់ឱ្យមានការចរចាទ្វេភាគីបន្តទៀតនាថ្ងៃអនាគត រួមមាន ៖ កិច្ចប្រជុំគណៈកម្មការព្រំដែនតំបន់ (RBC) ដែលមានមេបញ្ជាការយោធភូមិភាគ២ ធ្វើជាប្រធាន, កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ ដែលក្រសួងការបរទេសធ្វើជាប្រធាន និងកិច្ចប្រជុំគណៈកម្មការព្រំដែនទូទៅ (GBC) ដែលរដ្ឋមន្ត្រីក្រសួងការពារជាតិធ្វើជាប្រធាន ។

ការចរចាគ្នា គឺប្រទេសថៃចង់ឃើញការកាត់បន្ថយកងកម្លាំងដែលប្រឈមមុខនៅតំបន់ព្រំដែន ជាពិសេស កងកម្លាំងអាវុធចម្ងាយឆ្ងាយ ។ ថៃចង់ឱ្យប្រទេសទាំងពីរដកកម្លាំងទ័ពចេញពីព្រំដែនទៅកាន់ទីតាំងចាស់ក្នុងកម្រិតឆ្នាំ២០២៤វិញ គឺប្រទេសណាមានកម្លាំងទ័ពប៉ុន្មាន គឺត្រូវកាត់បន្ថយកម្លាំងទៅចំនួនដើមវិញដើម្បីសុវត្ថិភាពពលរដ្ឋប្រទេសទាំងពីរ ។

លោកឧត្តមសេនីយ៍ ស៊ុងីដ ណុនភក្តី មេបញ្ជាការកងទ័ពថៃចង់ឃើញការបើកព្រំដែនកម្ពុជា-ថៃ ដើម្បីឱ្យការធ្វើពាណិជ្ជកម្ម និងការឆ្លងដែនកាន់តែងាយស្រួល ។ កន្លងមក ប្រទេសថៃពុំធ្លាប់បិទព្រំដែន គឺថៃបានបើកព្រំដែនចាប់ពីម៉ោង៨ព្រឹក ដល់ម៉ោង៤ល្ងាច ប៉ុន្តែកម្ពុជាបិទព្រំដែនទាំងអស់ ។ ហេតុនេះ ប្រទេសទាំងពីរគួរចរចាបើកព្រំដែនស្របពេលគ្នា ចាប់ពីម៉ោង៨ព្រឹក ដល់ម៉ោង៦ល្ងាច ដើម្បីឱ្យពលរដ្ឋអាចធ្វើដំណើរទៅមក ។

ប្រទេសថៃបានអនុវត្តគោលការណ៍មនុស្សធម៌អនុញ្ញាតឱ្យអ្នកជំងឺឆ្លងដែនចូលថៃ និងអនុញ្ញាតឱ្យកូនសិស្សមករៀននៅថៃ យើងនៅតែអនុញ្ញាតឱ្យឆ្លងដែនដូចមុន ពីព្រោះជឿជាក់ថា ការសិក្សាជាផ្នែកមួយជួយឱ្យពលរដ្ឋប្រទេសទាំងពីរមានទំនាក់ទំនងគ្នា ។ យើងមានគោលបំណងក្លាយជាប្រទេសជិតខាងល្អជាមួយកម្ពុជា និងមានសន្តិសុខនៅតាមព្រំដែន ។

គួរបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងថា ការអនុវត្តវិធានការបិទព្រំដែន មិនមែនចាប់ផ្តើមដោយកម្ពុជាឡើយ គឺថៃជាអ្នកចាប់ផ្តើម ថៃជាអ្នកបិទដោយឯកតោគី ។ ដូច្នេះ ថៃបើកព្រំដែនដោយខ្លួនឯងទៅ បើថៃបើកវិញ កម្ពុជានឹងបើកវិញដែរក្នុងរយៈពេល៥ម៉ោងក្រោយ ៕

ប្រទេសថៃ ៖ កាលពីថ្ងៃទី១៤ ខែកក្កដា ឆ្នាំ២០២៥ សារព័ត៌មានថៃ Khaosod រាយការណ៍ថា រដ្ឋាភិបាលថៃនឹងពន្លឿនការចរចាទិញឧស្ម័ន និងប្រេងឥន្ធនៈអាមេរិកដើម្បីឱ្យប្រធានាធិបតីអាមេរិក លោក Donald Trump កាត់បន្ថយពន្ធទំនិញថៃ ពីអត្រា៣៦% មកនៅត្រឹម០% ។ ថៃនឹងចាត់ទុកនេះជាការបង្កើតស្ថិរភាពថាមពល និងការស្វែងរកប្រភពថាមពលថ្មី ដោយកាត់បន្ថយការពឹងផ្អែកលើមជ្ឈិមបូព៌ា ។

លោក ភឺម ថងស៊ី សមាជិកព្រឹទ្ធសភា និងជាប្រធានគណៈកម្មការថាមពលព្រឹទ្ធសភាបានផ្តល់សម្ភាសន៍ជាមួយសារព័ត៌មានករណីរដ្ឋាភិបាលថៃត្រៀមចរចាទិញថាមពលពីអាមេរិក ដើម្បីឱ្យអាមេរិកកាត់បន្ថយពន្ធនាំចូលទំនិញថៃ ពីអត្រា៣៦% មកនៅត្រឹម០% ។

លោកនិយាយថា គណៈកម្មការថាមពលបានជំរុញឱ្យរដ្ឋាភិបាលស្វែងរកប្រភពថាមពលឱ្យបានច្រើនកន្លែង ជាពិសេស ស្វែងរកឧស្ម័នធម្មជាតិ និងប្រេងឥន្ធនៈពីប្រទេសថ្មីៗ ដូចជា ៖ រដ្ឋអាឡាស្កា របស់អាមេរិក និងកាណាដា ដើម្បីចៀសវាងការដឹកជញ្ជូនថាមពលតាមច្រកសមុទ្រ Hormuz ដែលតែងតែរងផលប៉ះពាល់ដោយសារជម្លោះអន្តរជាតិ ។

ការមានប្រភពថាមពលស្ថិរភាពនឹងធ្វើឱ្យប្រទេសថៃអាចរៀបចំផែនការថាមពល និងពុំចាំបាច់បារម្ភពីការប្រែប្រួលដោយសារជម្លោះអន្តរជាតិ ។ ក្រៅពីនេះ ក៏មានសំណើបន្ទាន់ដែលត្រូវផ្លាស់ប្តូរផែនការថាមពលរបស់ថៃ ជាពិសេស ជំរុញការអភិវឌ្ឍថាមពលនុយក្លេអ៊ែរទំហំតូច ហើយរំពឹងថា ការអភិវឌ្ឍថាមពលនុយក្លេអ៊ែរនឹងកើតឡើងរយៈពេល៥ឆ្នាំខាងមុខ ដោយពុំចាំបាច់រង់ចាំគម្រោង SMR អាចចំណាយពេលរហូតដល់២០ឆ្នាំ ។

វាបង្ហាញពីការខិតខំប្រឹងប្រែងរបស់រដ្ឋាភិបាលថៃទប់ទល់នឹងបញ្ហាប្រឈមផ្នែកថាមពលនាថ្ងៃអនាគត ជាពិសេស ក្នុងអំឡុងពេលតម្លៃថាមពលពិភពលោកប្រែប្រួល និងសន្តិសុខថាមពលក្លាយជាចំណុចសំខាន់នៃការជំរុញសេដ្ឋកិច្ចប្រទេស ។ ការជំរុញថាមពលនុយក្លេអ៊ែរទំហំតូច ការពង្រីកប្រភពឧស្ម័ន និងប្រេងឥន្ធនៈ គឺជាជំហ៊ានសំខាន់ដើម្បីកំណត់ទិសដៅថាមពលរបស់ថៃនាថ្ងៃអនាគត ៕

ប្រទេសថៃ ៖ កាលពីថ្ងៃទី១៣ ខែកក្កដា ឆ្នាំ២០២៥ វិទ្យាស្ថាន NIDA Poll បានបង្ហាញលទ្ធផលស្ទង់មតិស្តីពី «នយោបាយថៃ តើគួរដើរទៅផ្លូវណាល្អ» ដែលស្ទង់មតិពលរដ្ឋថៃអាយុពី១៨ឆ្នាំឡើង ចាប់ពីថ្ងៃទី៤ ដល់ថ្ងៃទី៧ ខែកក្កដា ឆ្នាំ២០២៥ ។ ការស្ទង់មតិធ្វើឡើងគ្រប់តំបន់ អាជីព កម្រិតសិក្សា និងប្រាក់ចំណូលពលរដ្ឋនៅទូទាំងប្រទេសថៃ ពាក់ព័ន្ធនឹងស្ថានការណ៍នយោបាយថៃបច្ចុប្បន្ន ហើយលទ្ធផលការស្ទង់មតិបង្ហាញថា ពលរដ្ឋថៃគាំទ្រលោក ប្រាយុទ្ធ ចាន់អូចា ធ្វើជានាយករដ្ឋមន្ត្រី និងឱ្យលោកស្រី ផេថងថាន លាលែងពីតំណែង ។

លទ្ធផលការស្ទង់មតិពលរដ្ឋពីស្ថានការណ៍នយោបាយថៃបច្ចុប្បន្នបង្ហាញថា ពលរដ្ឋឆ្លើយតបការស្ទង់មតិ ៤២.៣៧% និយាយថា លោកស្រី ផេថងថាន ស៊ីណាវ៉ាត់ គួរលាលែងពីតំណែងដើម្បីប្រទេសថៃស្វែងរកនាយករដ្ឋមន្ត្រីថ្មី ខណៈ ៣៩.៩២% ថា លោកស្រី ផេថងថាន គួររំលាយសភាតំណាងរាស្ត្ររៀបចំការបោះឆ្នោតទូទៅ ។ រីឯ ១៥.០៤% គាំទ្រឱ្យលោកស្រី ផេថងថាន ដឹកនាំប្រទេសបន្តទៀត ខណៈមតិ ១.៣៧% អំពាវនាវឱ្យធ្វើរដ្ឋប្រហារ, មតិ ០.៩៩% ថា ធ្វើបែបណាក៏បាន និង ០.៣១% ពុំឆ្លើយតប ។

ចំណែកបុគ្គលដែលពលរដ្ឋថៃគាំទ្រឱ្យធ្វើជានាយករដ្ឋមន្ត្រីថ្មីស្របតាមរដ្ឋធម្មនុញ្ញ ករណីនាយករដ្ឋមន្ត្រី លោកស្រី ផេថងថាន ធ្លាក់ពីតំណែងដោយសារប្រឈមនឹងបញ្ហានយោបាយ គឺមតិ ៣២.៨២% គាំទ្រលោក ប្រាយុទ្ធ ចាន់អូចា មកពីគណបក្សរួមថៃសាងឆាត ធ្វើជានាយករដ្ឋមន្ត្រី ខណៈមតិ ២៧.៩៤% ពុំគាំទ្របុគ្គលណាម្នាក់ធ្វើនាយករដ្ឋមន្ត្រីតាមរដ្ឋធម្មនុញ្ញ, ១១.៥៣% គាំទ្រលោក អនុថីន ឆាន់វីរៈគូន មកពីគណបក្សភូមិចៃថៃ ។

មតិ១០.៩២% គាំទ្រលោក ឆ័យកាសេម នីទិស៊ិរិ មកពីគណបក្សភឿថៃ ខណៈ៩.៧៧% ថា អ្នកណាធ្វើនាយករដ្ឋមន្ត្រីក៏បានតាមរដ្ឋធម្មនុញ្ញ ។ មតិ ៣.៨២% គាំទ្រលោក ផីរ៉ាក់ផាន់ សាលីរ៉ាត់វិផាក មកពីគណបក្សថៃសាងឆាត, ១.៨៣% គាំទ្រលោក ជុរិន ឡាក់សាណាក់វីត មកពីគណបក្សប្រឆាធិប៉ាត់, ០.៨៤% គាំទ្រលោក ប្រាវីដ វង្សសាវ៉ាន់ មកពីគណបក្សផ្លាំងប្រាឆារ៉ាត់ និង ០.៥៣% ពុំឆ្លើយតប និងពុំចាប់អារម្មណ៍តំណែងនាយករដ្ឋមន្ត្រី ។

គួរបញ្ជាក់ថា លោក ប្រាយុទ្ធ ចាន់អូចា ទទួលបានការគាំទ្រពីពលរដ្ឋឱ្យឡើងកាន់តំណែងជានាយករដ្ឋមន្ត្រីថៃ ក្រោយពីលោកស្រី ផេថងថាន ធ្លាក់ប្រជាប្រិយភាពនៅប្រទេសថៃ ។ ពលរដ្ឋជឿថា លោក ប្រាយុទ្ធ នឹងអាចស្តារសេដ្ឋកិច្ចឡើងវិញ ដោះស្រាយវិបត្តិនយោបាយបច្ចុប្បន្ន ហើយលោកមានទំនាក់ទំនងល្អជាមួយប្រទេសជិតខាង ៕