ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon ឱ្យដឹងថា កាលពីថ្ងៃទី៨ ខែសីហា ឆ្នាំ២០២៥ បុរសលក់ផ្លែឈើជនជាតិថៃម្នាក់នៅឃុំប៉ាតង ស្រុកកាធូ ខេត្តភូកេត បានឈ្លោះប្រកែកជាមួយភ្ញៀវទេសចរបរទេស និងចោទប្រកាន់ភ្ញៀវទេសចរទិញផ្លែឈើខ្លួនហើយពុំឱ្យប្រាក់ចំនួន៦០បាត (ឬស្មើ៦ពាន់រៀល) ក៏យកកាំបិតចា.ក់ពោះភ្ញៀវទេសចរបណ្តាលឱ្យរងរបួសធ្ងន់ធ្លាយពោះវៀន ។

សមត្ថកិច្ចខេត្តភូកេត បានទទួលសេចក្តីរាយការណ៍ថា នាវេលាម៉ោង២និង២០នាទី ថ្ងៃទី៨ ខែសីហា បុរសលក់ផ្លែឈើជនជាតិថៃបានឈ្លោះប្រកែកជាមួយភ្ញៀវទេសចរបរទេស ហើយបុរសថៃក៏យកកាំបិទចាក់ពោះភ្ញៀវទេសចរបណ្តាលឱ្យរងរបួសធ្ងន់ធ្លាយពោះវៀន នៅមុខគ្លីនិកមួយកន្លែងតាមផ្លូវរ៉ាជអ៊ុថីត ២០០ ឃុំប៉ាតង ស្រុកកាធូ ខេត្តភូកេត ។ បន្ទាប់មក សមត្ថកិច្ចក៏បានប្រមូលកម្លាំងពាក់ព័ន្ធចុះទៅត្រួតពិនិត្យនៅកន្លែងកើតហេតុ ។

ជនបរទេសដែលត្រូវបុរសថៃលក់ផ្លែឈើយកកាំបិតចាក់នេះ ឈ្មោះ Orsan Hidayet Oglu Orkan អាយុ៣៤ឆ្នាំ សញ្ជាតិអាស៊ែបៃហ្សង់ (Azerbaijani) រងរបួសនៅបរិវេណពោះ និងធ្លាយពោះវៀន ។ សមត្ថកិច្ចក៏បានបញ្ជូនជនរងគ្រោះទៅសង្គ្រោះបន្ទាន់មន្ទីរពេទ្យប៉ាតង ។

ក្រោយពីធ្វើសកម្មភាព ជនល្មើសឈ្មោះ ប៉ាន់ អាយុ២៥ឆ្នាំ បានអង្គុយនៅខាងមុខគ្លីនិក និងសារភាពប្រាប់សមត្ថកិច្ចថា ខ្លួន និងសង្សារជាអ្នកលក់ផ្លែឈើតាមម៉ូតូកង់៣ ។ រីឯភ្ញៀវទេសចរបានដើរមកទិញផ្លែឈើខ្លួន បរិភោគរួចហើយពុំព្រមឱ្យលុយចំនួន៦០បាត (ឬស្មើ៦ពាន់រៀល) ទើបមានការប្រកែកគ្នាខ្លាំងៗ ហើយខ្លួនក៏យកកាំបិតចាក់ពោះរបស់ភ្ញៀវទេសចរតែម្តង ។

បន្ទាប់ពីសួរនាំជនល្មើសរួច សមត្ថកិច្ចក៏បានចាប់ខ្លួនជនល្មើសបញ្ជូនទៅសួរចម្លើយនៅស្ថានីយប៉ូលិសប៉ាតង ដើម្បីចាត់វិធានការតាមផ្លូវច្បាប់បន្តទៀតដើម្បីកុំឱ្យខូចកេរ្តិ៍ឈ្មោះប្រទេសថៃ ថាជាប្រទេសគ្មានសុវត្ថិភាពសម្រាប់ភ្ញៀវទេសចរ ។

យើងសង្កេតឃើញថា តាំងពីកងទ័ពថៃបើកការឈ្លានពានទឹកដីកម្ពុជា គឺភ្ញៀវទេសចរមកលេងថៃធ្លាក់ចុះយ៉ាងខ្លាំង ដោយសារគ្មានទំនុកចិត្ត បញ្ហាអសន្តិសុខកើនឡើង និងពលរដ្ឋថៃពុំគោរពច្បាប់ ។

ហេតុការណ៍ជនជាតិថៃយកកាំបិតចាក់ភ្ញៀវទេសចរសញ្ជាតិអាស៊ែបៃហ្សង់នៅខេត្តភូកេត គឺកើតឡើងក្រោយហេតុការណ៍ជនជាតិថៃដុតភ្លើងភ្ញៀវទេសចរម៉ាឡេស៊ីនៅទីក្រុងបាងកក កាលពីថ្ងៃទី៧ ខែសីហា ។ តាមការផ្សព្វផ្សាយរបស់សារព័ត៌មាន Khaosod ឱ្យដឹងថា ជនជាតិថៃម្នាក់ជាអតីតកីឡាករប្រដាល់បានយកធាតុរាវម្យ៉ាងដែលគេប្រើសម្រាប់រំលាយទឹកថ្នាំ និងងាយឆាបឆេះ ទៅចាក់ស្រោចលើភ្ញៀវទេសចរម៉ាឡេស៊ី២នាក់ រួចយកដែកកេះមកដុតបណ្ដាលឲ្យរងរបួសធ្ងន់ធ្ងរក្នុងចំណោមហ្វូងមនុស្សនៅទីក្រុងបាងកក ៕

តាមការផ្សព្វផ្សាយរបស់សារព័ត៌មានថៃ Daily News និង Khaosod កាលពីថ្ងៃទី១០ ខែសីហា ឆ្នាំ២០២៥ ឱ្យដឹងថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានប្រកាសដណ្តើមកាន់កាប់ប្រាសាទតាក្របី និងបិទប្រាសាទតាមាន់ធំ ដែលស្ថិតក្នុងដែនអធិបតេយ្យ និងបូរណភាពទឹកដីកម្ពុជា ព្រមទាំងនិយាយបំភ្លៃការពិតថា ប្រាសាទតាក្របីជារបស់ថៃ ថៃត្រូវតែយកមកវិញឱ្យបាន ។

កាលពីថ្ងៃទី១០ ខែសីហា នៅជំរំសុណារី ខេត្តនគរាជសីម៉ា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានធ្វើដំណើរមកទទួលស្បៀងអាហាររបស់ពលរដ្ឋថៃដែលបរិច្ចាគឱ្យកងទ័ពនៅព្រំដែន ហើយលោកក៏បានប្រគល់ដ្រូនឱ្យកងទ័ពដើម្បីបង្កើនសមត្ថភាពការពារសន្តិសុខជាតិ ។ ការផ្តល់ស្បៀងអាហារនេះរួមដំណើរដោយលោក វ៉ាន់មូហាម៉ាត់ ណរម៉ាថា ប្រធានរដ្ឋសភា ព្រមទាំងមន្ត្រីជាច្រើននាក់ ។

មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានអរគុណដល់ពលរដ្ឋថៃដែលបានបរិច្ចាគស្បៀងឱ្យកងទ័ពនៅព្រំដែនកម្ពុជា-ថៃ ហើយលោកចោទប្រកាន់ថា កងទ័ពកម្ពុជាបានបង្កប់មីនថ្មីចូលដីថៃ ចាប់ពី១០០ម៉ែត្រ ទៅ១៥០ម៉ែត្រ រហូតធ្វើឱ្យកងទ័ពថៃជាន់មីនរងរបួស ។ លោកថែមទាំងចោទប្រកាន់កម្ពុជាពុំគោរពអនុសញ្ញាអូតាវ៉ា និងបង្កភាពរញ៉េរញ៉ៃនៅប្រាសាទតាមាន់ធំ ។

លោកនិយាយបំភ្លៃការពិតថា ៖ «ប្រាសាទតាក្របីជារបស់ថៃ ថៃត្រូវតែយកប្រាសាទនេះមកវិញឱ្យបាន ខ្ញុំនៅសល់ពេលតែ៥១ថ្ងៃនឹងចូលនិវត្តន៍ពីការងារ ដូច្នេះ ខ្ញុំនឹងបំពេញតួនាទីជាមេទ័ពឱ្យល្អបំផុត ។ ខ្ញុំពុំទាន់គិតអ្វីទេក្រោយចូលនិវត្តន៍ ខ្ញុំទុកចិត្តមេទ័ពថ្មី និងកងទ័ពទាំងអស់ ខ្ញុំត្រៀមខ្លួនសម្រាប់អ្វីដែលកើតឡើង ទោះជាមានសង្គ្រាម ឬគ្មាន ។ ខ្ញុំជឿថា អ្នកមកធ្វើជាមេទ័ពថ្មីនឹងមានបទពិសោធន៍ ហើយខ្ញ។នឹងធ្វើជាពលរដ្ឋល្អបន្ទាប់ពីចូលនិវត្តន៍» ។

ដោយឡែក ប្រាសាទតាមាន់ធំ ថៃអនុញ្ញាតឱ្យពលរដ្ឋខ្មែរ-ថៃឡើងមកប្រាសាទតាមាន់ធំ ទើបថៃពុំអាចបិទប្រាសាទតាមាន់ធំបាននាពេលកន្លងមក ហើយលោកត្រូវបានពលរដ្ឋថៃទូទាំងប្រទេសជេរស្តីរឿងពុំព្រមបិទប្រាសាទតាមាន់ធំរបស់កម្ពុជា ។ ប៉ុន្តែពេលនេះ ថៃនឹងបិទប្រាសាទតាមាន់ធំ ដោយសារមានការប៉ះទង្គិចគ្នាលើប្រាសាទរវាងពលរដ្ឋខ្មែរ-ថៃ ខណៈការធ្វើសង្គ្រាមកន្លងមក ថៃដណ្តើមកាន់កាប់បាន១១តំបន់ ក្នុងនោះថៃបានកាន់កាប់ភ្នំទ្រព្យផងដែរ ។ នេះបើតាមការលើកឡើងរបស់លោក ប៊ុនស៊ីន ផាកក្លាង ។

នៅថ្ងៃទី១០ ខែសីហា ក្រសួងការពារជាតិកម្ពុជាបានចេញសេចក្តីប្រកាសព័ត៌មានដល់សាធារណជន និងសហគមន៍អន្តរជាតិឱ្យបានជ្រាបថា នៅថ្ងៃទី១០ ខែសីហា មេបញ្ជាការយោធភូមិភាគ២ ប៊ុនស៊ីន ផាកក្លាង បានប្រកាសផែនការមុនចូលនិវត្តន៍របស់ខ្លួនដែលនៅសល់តែ៥១ថ្ងៃទៀត គឺ ៖ ១- ដណ្តើមកាន់កាប់ប្រាសាទតាក្របីពីការគ្រប់គ្រងស្របច្បាប់របស់កម្ពុជា និង២-ប្រកាសបិទប្រាសាទតាមាន់ធំដែលស្ថិតក្នុងដែនអធិបតេយ្យ និងបូរណភាពទឹកដីកម្ពុជា ។ ការប្រកាសនេះជាភស្តុតាង មិនអាចប្រកែកបានបញ្ជាក់ពីការបង្កហេតុ និងប៉ុនប៉ងឈ្លានពានទឹកដីកម្ពុជាដោយចេតនា និងគិតទុកជាមុន ។

ទង្វើរបស់មេបញ្ជាការភូមិភាគ២ ថៃខាងលើ ក៏ជាការរំលោភបំពានលើកិច្ចព្រមព្រៀងបទឈប់បាញ់ សម្រេចនៅក្នុងកិច្ចប្រជុំពិសេស នាថ្ងៃទី២៨ ខែកក្កដា ឆ្នាំ២០២៥ និងស្មារតីនៃកិច្ចប្រជុំវិសាមញ្ញរបស់គណៈកម្មាធិការព្រំដែនទូទៅ GBC កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី ។ ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ GBC, ភាគីកម្ពុជា-ថៃបានឯកភាពគ្នា ជាពិសេស ចំណុចទី២ ដែលបានចែងថា ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការមិនដើរល្បាតហួសពីទីតាំងរបស់ខ្លួនដែលឈរជើងឡើយ ។

កម្ពុជាសូមគូសបញ្ជាក់ពីគោលជំហរដ៏ម៉ឺងម៉ាត់របស់ខ្លួនក្នុងការរកដំណោះស្រាយដោយសន្តិវិធី និងប្រកាន់គោលការណ៍សន្តិភាពជាធំ និងអនុវត្តយ៉ាងខ្ជាប់ខ្ជួននូវបទឈប់បាញ់ ហើយកម្ពុជាសង្ឃឹមថា ភាគីថៃនឹងប្រកាន់គោលជំហរដូចគ្នាប្រកបដោយភាពស្មោះត្រង់ដើម្បីឈានទៅបញ្ចប់ការប្រឈមមុខដាក់គ្នាទាំងស្រុងដើម្បីស្តារមកវិញនូវសន្តិភាព ប្រក្រតីភាព និងប្រជាពលរដ្ឋនៃប្រទេសទាំងពីររស់នៅក្នុងសុខសន្តិភាព ៕

រាឈុប៖ រថភ្លើងល្បឿនលឿនពិសេសដែលធ្វើដំណើរពី Sungai Kolok និង Padang Besar ទៅ Krung Thep Aphiwat បានបើកធ្លាក់ផ្លូវត្រង់ចំណុចតំបន់ Kui Buri ទីក្រុង Prachuap នាព្រឹកព្រលឹមថ្ងៃសៅរ៍ ទី9 សីហានេះ បានបណ្តាលឲ្យមនុស្សយ៉ាងហោចណាស់ 10 នាក់រងរបួស។ នេះបើយោងតាមសារព័ត៌មាន Khoasod។

នៅវេលាម៉ោង5និង20នាទីព្រឹក ថ្ងៃទី9 ខែសីហា ឆ្នាំ2025 រថភ្លើងល្បឿនលឿនពិសេសលេខ38 និងលេខ46 ធ្វើដំណើរពីក្រុងស៊ុងកៃកូឡុក+ប៉ាដាងបេសា ទៅកាន់ក្រុងថេបអភិវ៉ាត់ បានជួបគ្រោះថ្នាក់ចរាចរណ៍នៅលើផ្លូវកោងចូលស្ថានីយ គុយបុរី ក្នុងស្រុកគុយបុរី ខេត្តប្រាជ្ញគិរីខាន់។

បើតាមការពិនិត្យជាបឋមរបស់អាជ្ញាធរថៃរកឃើញថា មានអ្នកដំណើរមួយចំនួនរងរបួស ប៉ុន្តែមិនទាន់អាចកំណត់តួលេខជាក់លាក់នៅឡើយទេ ហើយក៏មិនទាន់ច្បាស់ថា មានមនុស្សសរុបប៉ុន្មាននាក់ ដែលធ្វើដំណើរលើរថភ្លើងនោះ ខណៈអ្នកស្លា.ប់ក៏មិនទាន់ត្រូវបានបញ្ជាក់ផងដែរគិតតាមរបាយការណ៍ត្រឹមរសៀលថ្ងៃសៅរ៍នេះ។

លោក Sitthichai Sawat-saen អភិបាលខេត្ត Prachuap Khiri Khan និងលោក Aram Yankaeo ចៅហ្វាយស្រុក Kui Buri រួមជាមួយនឹងមន្ត្រីមកពីមជ្ឈមណ្ឌលបង្ការ និងសម្រួលភូមិភាគទី៤ បានធ្វើដំណើរទៅកន្លែងកើតហេតុដើម្បីសម្របសម្រួលជាមួយមន្ត្រីផ្លូវដែក។ ពួកគេកំពុងធ្វើការស្ទួចលើករថយន្តរថភ្លើងដែលបានធ្លាក់ផ្លូវនោះ ដើម្បីសម្រួលការដឹកជញ្ជូនសម្រាប់អ្នកដំណើរដែលជាប់គាំង។

យ៉ាងណាមិញ ខាងអាជ្ញាធរនៅតំបន់បានបញ្ជូនមន្រ្តីជំនាញផ្លូវដែក ដើម្បីបើកការស៊ើបអង្កេតស្វែងរកមូលហេតុពិតប្រាកដ ចំពោះការបើកក្រឡាច់ធ្លាក់ចេញពីផ្លូវរបស់រថភ្លើងនេះ៕

ថ្ងៃ៩ ខែសីហា ឆ្នាំ២០២៥នេះ ជាគំរប់ខួប៨០ឆ្នាំ ដែលអាមេរិកបានទម្លាក់គ្រាប់បែកបរមាណូទី២ នៅលើទឹកដីជប៉ុន ចំទីក្រុង ណាហ្គាសាគី (Nagasaki) ដោយផ្ដាច់ជីវិតមនុស្សជាង៨មុឺននាក់។

គ្រាប់បែកនេះ មានឈ្មោះថា Fat Man ដែលត្រូវបានទម្លាក់ពីយន្តហោះ B2 ក្រោមការសម្រេចចិត្តផ្ទាល់របស់ប្រធានាធិបតីអាមេរិក Harry S. Truman ក្រោយខឹងជប៉ុនមិនព្រមចុះចាញ់សង្គ្រាមលោកលើកទី២។

៦ថ្ងៃក្រោយរងការទម្លាក់គ្រាប់បែកបរមាណូ ពោលនៅថ្ងៃទី១៥ ខែសីហា ឆ្នាំ១៩៤៥ ជប៉ុនបានប្រកាសចុះចាញ់ នាំទៅរកការបិទបញ្ចប់សង្រ្គាមលើកលើកទី២។

គួរបញ្ជាក់ថា គ្រាប់បែកបរមាណូ ធ្លាប់បានប្រើតែ២លើកប៉ុណ្ណោះក្នុងប្រវត្តិសាស្ត្រមនុស្សជាតិ ដោយត្រូវបានទម្លាក់នៅលើប្រទេសជប៉ុនទាំង២ គឺនៅទីក្រុងហ៊ីរ៉ូស៊ីម៉ា ថ្ងៃទី៦ ខែសីហា ឆ្នាំ១៩៤៥ (Hiroshima) និង នៅណាហ្គាសាគី (Nagasaki)ថ្ងៃទី៩ ខែសីហា ឆ្នាំ១៩៤៥។

បរមាណូ ២គ្រាប់នេះ បានឆក់យកជីវិតប្រជាជនជប៉ុនប្រមាណជា១៥មុឺននាក់ ហើយបានបន្សល់ទុកស្លាកស្នាមដ៏អាក្រក់ប្រចាំប្រវត្តិសាស្រ្ត៕

ប្រទេសថៃ ៖ នៅថ្ងៃទី៩ ខែសីហា ឆ្នាំ២០២៥ សារព័ត៌មានថៃ Top News រាយការណ៍ថា លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិថៃសោកស្តាយដែលកងទ័ពថៃចំនួន៣នាក់ បានជាន់មីនបណ្តាលឱ្យរងរបួសនៅថ្ងៃនេះ (ថ្ងៃទី៩ ខែសីហា) ។ លោកនឹងស្នើឱ្យកម្ពុជាដោះមីន PMN-2 ក្នុងអំឡុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ នាខែកញ្ញា ខាងមុខ ។

លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ បាននិយាយនៅថ្ងៃទី៩ ខែសីហា ពីកងទ័ពថៃចំនួន៣នាក់រងរបួសដោយសារដើរជាន់មីន ក្នុងនោះកងទ័ពថៃម្នាក់ដាច់កជើងឆ្វេង ក្នុងពេលពង្រាយកម្លាំងល្បាតតាមផ្លូវដើម្បីដាក់លួសបន្លាការពារនៅឃុំគ្រុង ស្រុកកាន់ថៈរៈឡាក ខេត្តស៊ីសាកេត (បរិវេណភ្នំទ្រព្យ) ហើយលោករង់ចាំសេចក្តីរាយការណ៍បន្ថែមថា តើមីនដែលកងទ័ពថៃដើរជាន់នោះជាមីនប្រភេទអ្វី ។

វិធានការដំបូងរបស់ថៃក្រោយពីកងទ័ពខ្លួនជាន់មីន គឺថៃនឹងតវ៉ា ពីព្រោះថៃបានស្នើឱ្យកម្ពុជាដោះមីនក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) នៅម៉ាឡេស៊ីកន្លងមក ប៉ុន្តែកម្ពុជាពុំទទួលយកការស្នើសុំនេះ ។ ដូច្នេះ កិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ នៅខែកញ្ញា ខាងមុខ ថៃនឹងស្នើឱ្យកម្ពុជាដោះមីនម្តងទៀត ពីព្រោះបើពុំដោះមីនទេ កងទ័ពថៃនឹងដើរជាន់រងរបួសទៀត ។ នេះបើតាមការលើកឡើងរបស់លោក ណាត់ថាផុង ។

ចំណែកហ្វេសប៊ុកផេកកងទ័ពជើងគោកថៃ «กองทัพบก ทันกระแส» បានសរសេរថា កងទ័ពភូមិភាគ៣ បានសហការជាមួយកងទ័ពភូមិភាគ២ ក្នុងការបោសសម្អាតនៅសមរភូមិបរិវេណភ្នំទ្រព្យ ហើយកងទ័ពថៃចោទប្រកាន់ថា ពេលពួកគេកំពុងតែសម្អាតសមភូមិនេះ ស្រាប់តែឃើញអាវុធមួយចំនួនធំរបស់កម្ពុជា ជាពិសេស មីនប្រភេទ PMN-2 ។

គួរបញ្ជាក់ថា ថៃតែងតែចោទប្រកាន់កម្ពុជាបង្កប់មីនក្នុងទឹកដីរបស់ខ្លួនបណ្តាលឱ្យកងទ័ពខ្លួនរងរបួសជាបន្តបន្ទាប់ និងថា កម្ពុជាល្មើសអនុសញ្ញាអូតាវ៉ា ។ ការចោទប្រកាន់ពីសំណាក់ភាគីថៃគ្មានមូលដ្ឋានច្បាស់លាស់ ពីព្រោះកងទ័ពកម្ពុជាពុំធ្លាប់ដាក់មីនថ្មីក្នុងទឹកដីថៃដែលមានការយាមល្បាតយ៉ាងតឹងរ៉ឹងនោះទេ ការបង្កប់មីននេះមានតែថៃខ្លួនឯងប៉ុណ្ណោះដែលដឹងច្បាស់ ។

កម្ពុជាបានអនុវត្តកិច្ចព្រមព្រៀងបទឈប់បាញ់ កម្ពុជាចង់បានសុខសន្តិភាពនៅតាមបណ្តោយព្រំដែនកម្ពុជា-ថៃ និងស្នើឱ្យថៃឈប់ចោទប្រកាន់ ទម្លាក់កំហុស និងលាបពណ៌កម្ពុជាបន្តទៀត ។ បច្ចុប្បន្ន ប្រទេសនានាលើពិភពលោក កំពុងផ្តោតការចាប់អារម្មណ៍ថា តើថៃអាចអនុវត្តកិច្ចព្រមព្រៀងឈប់បាញ់បានឬអត់?

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon នៅថ្ងៃទី៩ ខែសីហា ឆ្នាំ២០២៥ ឱ្យដឹងថា នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ ពុំជ្រាបរឿងកងទ័ពខ្លួនប្រើប្រាស់ជំពាមកៅស៊ូបា.ញ់ដោយគ្រាប់ឃ្លី និងកូនដុំដែកចូលទឹកដីកម្ពុជាទេ ប៉ុន្តែលោកជឿជាក់ថា កងទ័ពខ្លួនមានវិន័យ ហើយការចេញសេចក្តីថ្លែងការណ៍ឆ្លើយតបទៅកម្ពុជា គឺត្រូវតែពិនិត្យមើលតាមស្ថានការណ៍ ។

នាយករដ្ឋមន្ត្រីស្តីទីថៃបាននិយាយបែបនេះក្រោយពីសម្តេចតេជោ ហ៊ុន សែន ប្រធានព្រឹទ្ធសភាកម្ពុជាថ្លែងក្នុងហ្វេសប៊ុកថា សង្គ្រាមព្រំដែនកម្ពុជា-ថៃ បានផ្ទេរពីសង្គ្រាមប្រើប្រាស់អាវុ.ធ មកជាសង្រ្គាមប្រើប្រាស់ជំពាមកៅស៊ូបាញ់ដោយគ្រាប់ឃ្លី និងកូនដុំដែក ។ រឿងនេះបើមើលមួយភ្លែតដូចជារឿងកំប្លែង ឬរឿងតូចតាច តែបើពិនិត្យឱ្យស៊ីជម្រៅវាជារឿងធំ ប្រសិនបើយើងមិនទប់ស្កាត់នោះទេ ។ វានឹងប្រែក្លាយពីការប្រើជំពាមកៅស៊ូ ទៅជាការប្រើអាវុធគ្រប់ប្រភេទ ដែលនឹងបំផ្លាញចោលនូវកិច្ចព្រមព្រៀងឈប់បាញ់ដែលថ្នាក់ដឹកនាំកម្ពុជា-ថៃ ដោយមានការជួយយ៉ាងសកម្មពីនាយករដ្ឋមន្ត្រីម៉ាឡេស៊ី និងការចូលរួមពីចិន អាមេរិក ស្វែងរកបានយ៉ាងលំបាក ។

នាវេលាម៉ោង៨ព្រឹក ថ្ងៃទី៩ ខែសីហា នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បាននិយាយមកកាន់សារព័ត៌មានពីករណីសម្តេចតេជោ ហ៊ុន សែន ប្រធានព្រឹទ្ធសភាកម្ពុជាបង្ហោះក្នុងហ្វេសប៊ុករឿងកងទ័ពថៃប្រើប្រាស់ជំពាមកៅស៊ូបាញ់ចូលទឹកដីកម្ពុជា ថា លោកពុំជ្រាបព័ត៌មាននេះទេ លោកនឹងពិនិត្យមើលស្ថានការណ៍លម្អិតសិន ។ យើងសូមឱ្យមានភាពច្បាស់លាស់ និងស្មោះត្រង់ក្នុងការដោះស្រាយបញ្ហា ។

លោក ភូមិថាំ និយាយថា យើងពុំជ្រាបព័ត៌មានកងទ័ពថៃបាញ់ជំពាមកៅស៊ូចូលទឹកដីកម្ពុជាទេ ភាគីទាំងពីរគួរតែទៅពិនិត្យមើលកងទ័ពរបស់ខ្លួនថា កត្តាអ្វីធ្វើឱ្យភាគីទាំងពីរពុំសប្បាយចិត្តជាមួយគ្នា ឬមានលក្ខខណ្ឌពុំគួរធ្វើ ។ យើងកំពុងតែរឹតបន្តឹងកងទ័ពថៃ ហើយលោកជឿជាក់ថា កងទ័ពថៃមានវិន័យ ។

មេបញ្ជាការកងទ័ពថៃនឹងចុះពិនិត្យមើលកការពិតក្នុងតំបន់ថា តើកងទ័ពថៃពិតជាបានប្រើប្រាស់ជំពាមកៅស៊ូបាញ់ចូលទឹកដីកម្ពុជាដែរឬទេ? យើងនឹងអាចជជែកគ្នាបាន វាពុំគួរមានបញ្ហាទេ ។ ការសេចក្តីថ្លែងការណ៍របស់ថៃដើម្បីឆ្លើយតបនឹងការលើកឡើងថា កងទ័ពថៃប្រើប្រាស់ជំពាមកៅស៊ូ ពីព្រោះបារម្ភពីព័ត៌មាននេះធ្វើឱ្យខូចកេរ្តិ៍ឈ្មោះប្រទេសថៃ លោក ភូមិថាំ និយាយថា ត្រូវពិនិត្យមើលស្ថានការណ៍ តើព័ត៌មាននេះផ្សព្វផ្សាយចេញកម្រិតណា ផ្សាយទៅដល់ណា ពុំមែនថៃត្រូវតែចេញសេចក្តីថ្លែងការណ៍គ្រប់រឿងទេ ពីព្រោះនឹងពុំអាចចរចាគ្នា ។

គួរបញ្ជាក់ថា កាលពីថ្ងៃទី៨ ខែសីហា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានស្នើឱ្យមេដឹកនាំថៃចេញបញ្ជាទៅកងទ័ពឱ្យបញ្ឈប់ការប្រើប្រាស់ជំពាមកៅស៊ូ ដោយសម្តេចថ្លែងថា ៖ «ខ្ញុំមិនចង់និយាយរឿងនេះទេ តែបើមិននិយាយខ្លាចមេដឹកនាំថៃមិនបានដឹង និងសហគមន៍អន្តរជាតិមិនបានយល់ ។ សង្គ្រាមព្រំដែនកម្ពុជា-ថៃ បានផ្ទេរពីសង្គ្រាមប្រើប្រាស់អាវុធ មកជាសង្រ្គាមប្រើប្រាស់ជំពាមកៅស៊ូបាញ់ដោយគ្រាប់ឃ្លី និងកូនដុំដែក ។ សម្រាប់កម្ពុជាប្រសិនមានប្រើ ខ្ញុំសូមឱ្យរាជរដ្ឋាភិបាលចេញបទបញ្ជាទៅកងទ័ពឱ្យបញ្ឈប់ការប្រើប្រាស់ជាបន្ទាន់ ។ សង្ឃឹមថា មេដឹកនាំថៃនឹងចេញបញ្ជាទៅកងទ័ពឱ្យបញ្ឈប់ការប្រើអាវុធ ដូចដែលមានក្នុងរូបភាពដែលខ្ញុំភ្ជាប់ទៅជាមួយនេះ» ។

គួររំលឹកផងដែរថា កន្លងមក មេដឹកនាំថៃ ក៏ដូចជាក្រុមយោធាថៃ តែងតែផ្សាយបំភ្លៃដល់ប្រជាជនខ្លួន និងពិភពលោកថា ខ្លួនជាជនរងគ្រោះ ប៉ុន្តែពេលនេះ ការពិតត្រូវបានលាតត្រដាង ស័ក្តិសមបំផុតនឹងពាក្យដែលពិភពលោកគេនិយាយតៗគ្នាថា «Don’t Thai To Me» មានន័យថា កុំចង់មកបោកប្រាស់ កុហក ភូតភរ និយាយមិនពិត គឺមិនខុសមែន ៕

បាងកក៖ បុរសម្នាក់ ដែលគេស្គាល់ថាជាអតីតកីឡាករប្រដាល់ថៃ កើតការស្រ្តេពិបាកចិត្តព្រោះគ្មានការងារធ្វើ គិតអ្វីមិនចេញស្រាប់តែបែ.កគំនិតយកសារធាតុរាវម្យ៉ាងដែលគេប្រើសម្រាប់រំលាយទឹកថ្នាំ និងងាយឆាបឆេះ ទៅចាក់ស្រោចលើភ្ញៀវទេសចរម៉ាឡេសុីពីរនាក់ រួចយកដែកកេះមកដុ.ត បណ្ដាលឲ្យរងរបួសធ្ងន់ធ្ងរនៅកណ្ដាលចំណោមមនុស្សក្នុងក្រុងបាងកក។

យោងសារព័ត៌មាន Khaosod បានឲ្យដឹងថា កាលពីយប់ថ្ងៃទី7 ខែសីហា ហេតុការណ៍ដ៏រន្ធ.ត់មួយបានកើតឡើងបណ្ដាលឲ្យមនុស្សម្នាឆោឡោរ នៅពេលឃើញមនុស្ស2នាក់ត្រូវបានឆាបឆេះ ត្រង់ចំណុចមុខផ្សាទំនើបមួយនៅផ្លូវបំបែក Ratchaprasong ក្នុងទីក្រុងបាងកក។ ភ្លាមៗគេបានដឹងថា វាគឺជាស្នាដៃរបស់បុរសម្នាក់ ដែលបានយកទឹករំលាយថ្នាំទៅជះលើជនរងគ្រោះ2នាក់នោះ រួចក៏យកកេះដែកកេះបញ្ឆេះដាក់ពួកគេតែម្ដង។

ជនដៃដល់ត្រូវបានគេស្គាល់ថាមានឈ្មោះ Warakorn Pabtaisong អាយុ30ឆ្នាំ មកពីខេត្តស្រះកែវ ដែលជាអតីតកីឡាករប្រដាល់ម្នាក់កាលពីមុន ប៉ុន្តែបច្ចុប្បន្នគ្មានការងារធ្វើនោះទេ។ ចំណែកជនរងគ្រោះទាំងពីរនាក់ គឺជាប្តីប្រពន្ធជនជាតិម៉ាឡេស៊ី អាយុ26ឆ្នាំ និង27ឆ្នាំ បានរងរបួសរលាកពេញខ្លួន និងមុខ ហើយត្រូវបានគេបញ្ជូនទៅសង្រ្គោះនៅមន្ទីរពេទ្យដើម្បីព្យាបាល។

បើតាមសាក្សីដែលបានឃើញហេតុការណ៍ខាងលើបានឲ្យដឹងថា ជនដៃដល់ Warakorn ត្រូវបានគេឃើញនិយាយជាមួយជនរងគ្រោះទាំងពីរនាក់មុនពេលពួកគេបែកផ្លូវគ្នា។ ក្រោយមក នៅពេលអ្នកទេសចរជនជាតិម៉ាឡេស៊ីទាំងពីរបានអង្គុយនៅលើជណ្តើរមុខផ្សារទំនើប ជាកន្លែងដែល Warakorn ចូលទៅជិតពួកគេម្ដងទៀត ហើយចាក់សារធាតុរាវនោះទៅលើពួកគេ រួចក៏ធ្វើសកម្មភាពដុតតែម្ដង។

ក្នុងកំឡុងពេលសាកសួរនៅប៉ុស្តិ៍នគរបាល Lumpini លោក Warakorn បានសារភាពចំពោះទង្វើរបស់ខ្លួន ប៉ុន្តែបញ្ជាក់ថាមិនមានការសោកស្ដាយចំពោះជនរងគ្រោះនោះឡើយ។ គេបានចាត់ទុកអ្វីដែលខ្លួនធ្វើ ថាជាសកម្មភាពកម្សាន្តកែអផ្សុក និងភាពតប់ប្រមល់ព្រោះស្រ្តេសនឹងរឿងគ្មានការងារធ្វើខ្លាំងពេក។

គួរបញ្ជាក់ថា ប៉ូលីសបានធ្វើតេស្តទឹកទឹកនោមរបស់ជនដៃដល់ ប៉ុន្តែមិនបានរកឃើញមានសារធាតុញៀននោះទេ ដូច្នេះអាចបញ្ជាក់បានថា នៅពេលប្រព្រឹត្តសកម្មភាព គេនៅមានស្មារតីធម្មតា មិនមែនជាការស្រវឹង ឬប្រតិកម្មថ្នាំនោះទេ។ យ៉ាងណាសមត្ថកិច្ចថៃនៅខណៈនេះ កំពុងចោ.ទប្រកាន់ លោក Warakorn ពីបទធ្វើបាបលើរាងកាយអ្នកដទៃដោយចេតនា និងត្រូវបានគេរំពឹងថាបុរសរូបនេះអាចនឹងត្រូវពិន័យ ក៏ដូចជាជាប់ទោសធ្ងន់ធ្ងរនៅពេលតុលាការកាត់ក្ដីរួច។

ទាំងនេះគឺជាស្ថានភាពបប្ចុប្បន្ននៅក្នុងប្រទេសថៃ ដែលបង្ហាញពីទង្វើអមនុស្សធម៌របស់ពលរដ្ឋថៃមួយចំនួន តែងតែបង្ហហិ.ង្សាដាក់ជាតិសាសន៍ដទៃ។ តួយ៉ាងការវា.យធ្វើបាបពលករខ្មែរដែលមិនដឹងអី និងធ្វើការនៅប្រទេសខ្លួនដោយសារទំនាស់ព្រំដែន បានបង្ហាញឲ្យពិភពលោកបានឃើញយ៉ាងច្បាស់ថាពួកគេមិនគ្មានច្បាប់វិន័យ មិនគោរពសិទ្ធិមនុស្ស ជាពិសេសគឺចូលចិត្តអនុវត្តច្បាប់ព្រៃដែលយកហិង្សាមកដោះស្រាយបញ្ហា៕

ប្រទេសឥណ្ឌា ៖ តាមប្រភពច្បាស់ការណ៍ពីមន្ត្រីឥណ្ឌា៣រូបឱ្យដឹងថា រដ្ឋាភិបាលឥណ្ឌាបានផ្អាកគម្រោងទិញយន្តហោះ និងអាវុ.ធបន្ថែមពីអាមេរិក ដែលនេះជាការបង្ហាញសញ្ញាយ៉ាងច្បាស់ថា ឥណ្ឌាមិនពេញចិត្តយ៉ាងខ្លាំងដែលប្រធានាធិបតីអាមេរិក លោក Donald Trump ដំឡើងពន្ធទំនិញឥណ្ឌារហូតដល់៥០% ។ ការប្រកាសផ្អាកគម្រោងនេះធ្វើឱ្យសម្ព័ន្ធភាពរវាងប្រទេសទាំងពីរធ្លាក់ចុះក្នុងរយៈពេលជាច្រើនឆ្នាំ ប៉ុន្តែរដ្ឋាភិបាលឥណ្ឌាបានច្រានចោលព័ត៌មាននេះ និងថាជាព័ត៌មានក្លែងក្លាយ ។

កន្លងមក ឥណ្ឌាមានគម្រោងបញ្ជូនរដ្ឋមន្ត្រីក្រសួងការពារជាតិ លោក Rajnath Singh ទៅទីក្រុងវ៉ាស៊ីនតោននាពេលឆាប់ៗដើម្បីទិញអាវុធ ប៉ុន្តែការធ្វើដំណើរនេះត្រូវបានផ្អាក ។ លើសពីនេះ គម្រោងទិញយន្តហោះស៊ើបការណ៍ P8I ពីក្រុមហ៊ុន Boeing ចំនួន៨គ្រឿង និងប្រព័ន្ធប្រើប្រាស់ក្នុងការងារកងទ័ពជើងទឹកឥណ្ឌាក៏ផ្អាកដែរ ។ នេះបើតាមការផ្សព្វផ្សាយរបស់សារព័ត៌មានរ៉យទ័រ នៅថ្ងៃទី៩ ខែសីហា ឆ្នាំ២០២៥ ដោយផ្អែកតាមប្រភពច្បាស់ការណ៍ពីមន្ត្រីឥណ្ឌា ។

ការចរចាទិញរថក្រោះ Stryker ដែលផលិតដោយក្រុមហ៊ុន General Dynamics Land Systems និងមីស៊ីលប្រឆាំងរថក្រោះ Javelin ផលិតដោយក្រុមហ៊ុន Raytheon និងក្រុមហ៊ុន Lockheed Martin ក៏ផ្អាកដែរ ដោយសារអាមេរិកដំឡើងពន្ធទំនិញខ្ពស់ ។ ឥណ្ឌានឹងអនុវត្តគម្រោងទិញអាវុធផ្នែកកងទ័ពភ្លាម បើឥណ្ឌាទទួលបានភាពច្បាស់លាស់លើអត្រាពន្ធ និងទិសដៅនៃទំនាក់ទំនងទ្វេភាគីជាមួយអាមេរិក ។ ទោះយ៉ាងណា គម្រោងផ្អាកទិញយន្តហោះ និងអាវុធពីអាមេរិក គឺឥណ្ឌាពុំទាន់ចេញសេចក្តីប្រកាសច្បាស់លាស់ទេ ។

កាលពីថ្ងៃទី៦ ខែសីហា ប្រធានាធិបតីអាមេរិក លោក Trump បានប្រកាសដំឡើងពន្ធទំនិញឥណ្ឌារហូតដល់៥០% ដោយសារឥណ្ឌានៅតែទិញប្រេងឥន្ធនៈពីរុស្ស៊ី ហើយអាមេរិកសង្ស័យថា ឥណ្ឌាបានផ្តល់ប្រាក់ទៅឱ្យរុស្ស៊ីធ្វើសង្គ្រាមជាមួយអ៊ុយក្រែន ។

ក្រោយការផ្សព្វផ្សាយព័ត៌មានឥណ្ឌាផ្អាកគម្រោងទិញយន្តហោះ និងសម្ភារៈកងទ័ព រដ្ឋាភិបាលឥណ្ឌាបានច្រានចោលព័ត៌មាននេះ និងចេញសេចក្តីថ្លែងការណ៍ថា ព័ត៌មានឥណ្ឌាផ្អាកទិញអាវុធជាព័ត៌មានក្លែងក្លាយ រដ្ឋាភិបាលឥណ្ឌានឹងទិញអាវុធអាមេរិកតាមគម្រោង ។ ឥណ្ឌាបានបង្កើនភាពជាដៃគូជាមួយអាមេរិកនាប៉ុន្មានឆ្នាំនេះ ប៉ុន្តែអាមេរិកខ្វះភាពយុត្តិធម៌ អាមេរិក និងបណ្តាប្រទេសជាមិត្តនៅតែធ្វើពាណិជ្ជកម្មជាមួយរុស្ស៊ីសម្រាប់ផលប្រយោជន៍ជាតិ ប៉ុន្តែអាមេរិកហាមឥណ្ឌាទិញប្រេងឥន្ធនៈរុស្ស៊ី ។

ចំណែកក្រុមហ៊ុន Boeing ក្រុមហ៊ុន Lockheed Martin និងក្រុមហ៊ុន General Dynamics ពុំឆ្លើយតបនឹងព័ត៌មានឥណ្ឌាផ្អាកទិញយន្តហោះ និងអាវុធទេ ដោយក្រុមហ៊ុនទាំងនេះប្រាប់សារព័ត៌មានរ៉យទ័រឱ្យសួររដ្ឋាភិបាលឥណ្ឌា និងរដ្ឋាភិបាលអាមេរិក ខណៈក្រុមហ៊ុន Raytheon ពុំនិយាយអ្វីទាំងអស់៕