ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath ឱ្យដឹងថា នៅថ្ងៃទី១២ ខែសីហា ឆ្នាំ២០២៥នេះ ទាហានឈុតខ្មៅថៃបានដើរជាន់មីនដាច់ជើងម្នាក់ពេលកំពុងល្បាតនៅបរិវេណប្រាសាទតាមាន់ធំ ហើយទាហានឈុតខ្មៅរូបនេះត្រូវបានបញ្ជូនទៅសង្គ្រោះនៅមន្ទីរពេទ្យ ។ ជំហ៊ានដំបូង កងទ័ពថៃចោទប្រកាន់ដូចមុនថា កងទ័ពកម្ពុជាបង្កប់មីនថ្មីក្នុងទឹកដីខ្លួន ទើបបណ្តាលឱ្យកងទ័ពថៃរងរបួស និងដាច់ជើងជាបន្តបន្ទាប់ ។

នាវេលាម៉ោង៩និង១០នាទី ថ្ងៃទី១២ ខែសីហា កងទ័ពជើងគោកថៃបានទទួលសេចក្តីរាយការណ៍ថា ទាហានឈុតខ្មៅមកពីកងវរសេនាតូចថ្មើរជើង លេខ២៦១០ បានដើរយាមល្បាតនៅបរិវេណប្រាសាទតាមាន់ធំ ត្រង់ចំណុចរបងលួស ស្រាប់តែដើរជាន់មីនផ្ទុះបណ្តាលឱ្យទាហានឈុតខ្មៅម្នាក់ដាច់ជើងម្ខាង ។ ក្រោយកើតហេតុ ក៏មានការបញ្ជូនទាហានឈុតខ្មៅទៅសង្គ្រោះនៅមន្ទីរពេទ្យ រីឯព័ត៌មានលម្អិតផ្សេងៗពុំទាន់ជ្រាបនៅឡើយទេ ។

ដោយឡែក សារព័ត៌មានថៃ Khaosod រាយការណ៍ថា ទាហានឈុតខ្មៅថៃដែលដើរជាន់មីននេះ ឈ្មោះ ធីរៈផុន ផៀខាន់ធី រងរបួសធ្ងន់ធ្ងរ រហូតដល់ដាច់ជើងខាងឆ្វេង ។ ភាគីថៃចោទប្រកាន់ថា ក្រោយពីការប៉ះទង្គិចគ្នានៅព្រំដែនកន្លងមក កងទ័ពកម្ពុជាបានដកថយកម្លាំង និងបង្កប់មីនថ្មីក្នុងទឹកដីថៃ ។

គួរបញ្ជាក់ថា មុនកងទ័ពថៃបង្កសង្គ្រាមឈ្លានពាន និងបាញ់ប្រហារមុនមកលើកម្ពុជា គឺសារព័ត៌មាននានារបស់ថៃផ្សាយបំភ្លៃ និងចោទប្រកាន់ថា កងទ័ពថៃបានដើរជាន់មីនជាបន្តបន្ទាប់ ដោយសារកងទ័ពកម្ពុជាបង្កប់មីនថ្មីលើទឹកដីខ្លួន ។ ពេលកម្ពុជា-ថៃបញ្ចប់សង្គ្រាម ដោយប្រទេសទាំងពីរបានចរចាធ្វើកិច្ចព្រមព្រៀងបទឈប់បាញ់ ហើយកម្ពុជាអនុវត្តកិច្ចព្រមព្រៀងនេះយ៉ាងម៉ឺងម៉ាត់ ស្រាប់តែថៃស្រែកថា កងទ័ពខ្លួនជាន់មីនទៀតហើយ ។ សួរថា តើកងទ័ពថៃដើរល្បាតក្នុងទឹកដីខ្លួន ឬក៏ល្បាតក្នុងទឹកដីកម្ពុជា ពីព្រោះពេលកងទ័ពថៃជាន់មីន ពួកគេតែងតែទម្លាក់កំហុស និងចោទប្រកាន់កម្ពុជាម្តងហើយម្តងទៀត ។

ថ្មីៗនេះ ថៃស្រែកថា កងទ័ពថៃខ្លួនចំនួន៣នាក់ បានជាន់មីនពេលដើរល្បាតនៅស្រុកកាន់ថាឡាក ខេត្តស៊ីសាកេត បណ្តាលឱ្យរងរបួសដាច់ជើង របួសដៃ និងត្រចៀក ហើយថៃក៏ទម្លាក់កំហុសមកលើកម្ពុជាតាមទម្លាប់ ។ ពេលធ្វើសង្គ្រាមបាញ់គ្នាអត់មានជាន់មីនទេ ដល់ពេលឈប់បាញ់ ថៃបែរជាស្រែកថាជាន់មីន ម៉េចមិននៅឱ្យស្ងៀម? តើនេះជាល្បិចថ្មីឬ?

អាជ្ញាធរមីនកម្ពុជាបានបដិសេធ និងច្រានចោលទាំងស្រុងចំពោះការលើកឡើងរបស់ក្រសួងការបរទេសថៃលើករណីកងទ័ពថៃ៣នាក់រងគ្រោះថ្នាក់ដោយសារមីននៅតំបន់ព្រំដែន ដែលចោទប្រកាន់ថា កម្ពុជាដាក់មីនថ្មី ។ កម្ពុជានៅតែរក្សាជំហរម៉ឺងម៉ាត់ គឺគ្មានការប្រើប្រាស់មីនថ្មីជាដាច់ខាត កម្ពុជាមានមោទកភាពក្នុងនាមជារដ្ឋភាគីអនុសញ្ញាហាមប្រាមការប្រើប្រាស់មីនប្រឆាំងមនុស្ស ដែលកម្ពុជាបានផ្តល់សច្ចាប័នក្នុងឆ្នាំ១៩៩៩ ។ កម្ពុជាត្រូវបានទទួលស្គាល់ជាអន្តរជាតិចំពោះសមិទ្ធផលនៃការបោសសម្អាតមីន និងគ្មានការប្រើប្រាស់មីនប្រឆាំងមនុស្សឡើយ ។

មកដល់ពេលនេះ មិនទាន់មានការស៊ើបអង្កេតផ្លូវការ និងមានតម្លាភាព ដើម្បីបញ្ជាក់ការពិតនៅឡើយពាក់ព័ន្ធនឹងបញ្ហានេះ ។ ដូច្នេះ គ្រប់ភាគីពាក់ព័ន្ធគួរចៀសវាងធ្វើសេចក្តីថ្លែងការណ៍ជាសាធារណៈណាមួយ ។ ការចោទប្រកាន់ដោយគ្មានការពិតនឹងប៉ះពាល់យ៉ាងខ្លាំងចំពោះស្មារតីបទឈប់បាញ់ និងបាត់ទំនុកចិត្តរវាងគ្នានិងគ្នាក្នុងស្ថានភាពនេះ ។ កម្ពុជាសង្ឃឹមថា ភាគីថៃនឹងគោរពបាននូវចំណុចឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ជាពិសេស ចំណុចទី២ ដែលចែងថា ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការមិនដើរល្បាតហួសពីទីតាំងរបស់ខ្លួនឈរជើងឡើយ ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Thai PBS កាលពីថ្ងៃទី១១ ខែសីហា ឆ្នាំ២០០២៥ ឱ្យដឹងថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃពុំយល់ស្របនឹងពលរដ្ឋទាមទារឱ្យមេបញ្ជាការយោធភូមិភាគ២ លោក ប៊ុនស៊ីន ផាកក្លាង ពន្យារពេលចូលនិវត្តន៍ ដោយលោកថា វានឹងធ្វើឱ្យប្រព័ន្ធរាជការដំណើរការខុសប្រក្រតី ។ ម្យ៉ាងទៀត មានមនុស្សជាច្រើនដែលមានសមត្ថភាពអាចកាន់តំណែងជំនួសមេបញ្ជាការយោធភូមិភាគ២ ប្រសិនបើកងទ័ពឯកភាពពន្យារពេលចូលនិវត្តន៍ គួរតែស្នើសុំដោយខ្លួនឯង ។

កាលពីថ្ងៃទី១១ ខែសីហា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយពីពលរដ្ឋទាមទារឱ្យពន្យារពេលចូលនិវត្តន៍របស់មេបញ្ជាការយោធភូមិភាគ២ លោក ប៊ុនស៊ីន ផាកក្លាង ថា ពលរដ្ឋត្រូវតែយល់ជាមុនសិន គឺការតស៊ូ និងការពារអធិបតេយ្យនៅមានកងទ័ពជាច្រើននាក់ទៀតអាចបំពេញភារកិច្ចនេះ ។ ដូច្នេះ ការពន្យារពេលចូលនិវត្តន៍របស់មេបញ្ជាការយោធភូមិភាគ២ ត្រូវតែពិនិត្យមើលបទប្បញ្ញត្តិ ពីព្រោះនៅមានមេបញ្ជាការរងជាច្រើននាក់ត្រៀមកាន់តំណែងនេះ វាជាច្បាប់របស់មន្ត្រីរាជការ ។

លោកនិយាយថា ៖ «កន្លងមក យើងពុំធ្លាប់ពន្យារពេលចូលនិវត្តន៍របស់មន្ត្រីរាជការឱ្យកាន់តំណែងបន្តទេ ប៉ុន្តែការពន្យារពេលចូលនិវត្តន៍មន្ត្រីណាម្នាក់ដែលកំពុងបម្រើការរាជការអាចធ្វើទៅបាន ។ កងទ័ពអាចពិនិត្យមើល ប្រសិនបើចាំបាច់ត្រូវពន្យារពេលចូលនិវត្តន៍របស់មេបញ្ជាការយោធភូមិភាគ២ គឺកងទ័ពត្រូវស្នើសុំដោយខ្លួនឯង ។ យើងជឿថា លោក ប៊ុនស៊ីន ផាកក្លាង មានសមត្ថភាព លុះត្រាតែឱ្យកងទ័ពពិចារណារឿងនេះ» ។

លោកបន្តថា កងទ័ពអាចគ្មានច្បាប់ពន្យារពេលចូលនិវត្តន៍ទេ សូមឱ្យវាជារឿងរបស់កងទ័ព ប៉ុន្តែពុំមែនមានន័យថា យើងមើលមិនឃើញតម្លៃរបស់លោក ប៊ុនស៊ីន ផាកក្លាងទេ តម្លៃរបស់លោកបានបង្ហាញទៅកាន់មនុស្សគ្រប់គ្នារួចហើយ ។ ការអនុញ្ញាតឱ្យលោកបំពេញតួនាទីបន្តទៀតត្រូវតែមើលច្បាប់មន្ត្រីរាជការ បើមានផ្លូវ គឺកងទ័ពអាចស្នើសុំរឿងនេះ ។

នៅឆ្នាំ២០២៥ មានមេបញ្ជាការកងទ័ពជាច្រើននាក់ដល់ពេលចូលនិវត្តន៍ ហើយគ្រប់គ្នាសុទ្ធតែបានជ្រាបអស់ហើយ គឺការចូលនិវត្តន៍ធ្វើឡើងតាមច្បាប់កងទ័ព ។ លោក ភូមិថាំ គិតថា ប្រព័ន្ធមន្ត្រីរាជការដំណើរការយ៉ាងល្អ ទើបលោកទុកឱ្យប្រព័ន្ធនេះដំណើរការ ។ ពេលមេបញ្ជាការយោធភូមិភាគ២ លោក ប៊ុនស៊ីន ផាកក្លាង ចូលនិវត្តន៍រួចហើយ លោកនឹងបំពេញតួនាទីផ្នែកណាខ្លះអាចពិចារណាបាន ។ ចូរកុំធ្វើឱ្យប្រព័ន្ធរាជការដំណើរការខុសប្រក្រតី ពីព្រោះវានឹងធ្វើឱ្យការគ្រប់គ្រងប្រព័ន្ធរាជការផ្សេងទៀតមានបញ្ហា ។

លោក ប៊ុនស៊ីន ផាកក្លាង នឹងចូលនិវត្តន៍ពីការងារនៅចុងខែកញ្ញា ឆ្នាំ២០២៥ ប៉ុន្តែពលរដ្ឋថៃភាគច្រើនពុំចង់ឱ្យលោកសម្រាកពីការងារទេ និងសំណូមពរឱ្យលោកបំពេញការងារជាមេទ័ពបន្តទៀត រហូតដល់បញ្ចប់ស្ថានការណ៍ជម្លោះព្រំដែនកម្ពុជា-ថៃ ។ ការបញ្ជាកងទ័ពឱ្យឈ្លានពានទឹកដីកម្ពុជាធ្វើឱ្យលោកទទួលបានការពេញនិយមយ៉ាងខ្លាំងពីសំណាក់ពលរដ្ឋថៃជ្រុលនិយមដែលចង់បានទឹកដីប្រទេសជិតខាង ។ ការទាមទាររបស់ពលរដ្ឋឱ្យបន្តតំណែងមេបញ្ជាការភូមិភាគ២ ត្រូវបានលោក ភូមិថាំ បដិសេធ ពីព្រោះមានមេបញ្ជាការកងទ័ពមានសមត្ថភាពជាច្រើនទៀត ពុំមែនមានតែលោក ប៊ុនស៊ីន ម្នាក់ទេដែលអាចកាន់តំណែងនេះ ។

ពលរដ្ឋថៃគាំទ្រលោក ប៊ុនស៊ីន ដោយសារលោកនិយាយបំភ្លៃការពិតនាពេលថ្មីៗនេះថា ៖ «ប្រាសាទតាក្របីជារបស់ថៃ ថៃត្រូវតែយកប្រាសាទនេះមកវិញឱ្យបាន នៅសល់ពេលតែ៥១ថ្ងៃនឹងចូលនិវត្តន៍ពីការងារ ដូច្នេះ ខ្ញុំនឹងបំពេញតួនាទីជាមេទ័ពឱ្យល្អបំផុត ។ ខ្ញុំពុំទាន់គិតអ្វីទេក្រោយចូលនិវត្តន៍ ខ្ញុំទុកចិត្តមេទ័ពថ្មី និងកងទ័ពទាំងអស់ ខ្ញុំត្រៀមខ្លួនសម្រាប់អ្វីដែលកើតឡើង ទោះជាមានសង្គ្រាម ឬគ្មាន ។ ខ្ញុំជឿថា អ្នកមកធ្វើជាមេទ័ពថ្មីនឹងមានបទពិសោធន៍ ហើយខ្ញុំនឹងធ្វើជាពលរដ្ឋល្អបន្ទាប់ពីសម្រាកពីការងារ» ៕

ប្រទេសថៃ ៖ សារព័ត៌មានថៃ The Structure រាយការណ៍កាលពីថ្ងៃទី១១ ខែសីហា ឆ្នាំ២០២៥ ថា នៅថ្ងៃទី១៣-១៤ ខែសីហា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃ នឹងប្រជុំក្រុមប្រឹក្សាសន្តិសុខជាតិពិចារណាបិទមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដោយសារមើលឃើញស្ថានការណ៍បច្ចុប្បន្នស្ងប់ស្ងាត់ អ្វីៗគ្រប់យ៉ាងត្រឡប់មកសភាពប្រក្រតីឡើងវិញ ។ លោកថា ពេលនេះ មានតែការផ្សព្វផ្សាយព័ត៌មានក្លែងក្លាយនៅប្រទេសថៃ ក្នុងគោលបំណងបង្កើតភាពវឹកវរពាក់ព័ន្ធនឹងស្ថានការណ៍ព្រំដែនកម្ពុជា-ថៃ ។

កាលពីថ្ងៃទី១១ ខែសីហា សារព័ត៌មានថៃបានសាកសួរទៅលោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃ អំពីស្ថានការណ៍ព្រំដែនកម្ពុជា-ថៃថា តើពេលនេះ ស្ថានការណ៍ត្រឡប់ទៅរកភាពប្រក្រតីឡើងវិញហើយឬនៅ ដោយសារ២ថ្ងៃកន្លងមក មានពាក្យចចាមអារ៉ាមថា មានការបាញ់គ្នាម្តងទៀត?

បើតាមលោក ភូមិថាំ គឺបច្ចុប្បន្ន មានការផ្សព្វផ្សាយព័ត៌មានក្លែងក្លាយច្រើនណាស់នៅថៃ រហូតធ្វើឱ្យពលរដ្ឋយល់ច្រឡំទាំងអស់ និងជឿជាក់ព័ត៌មានក្លែងក្លាយ ហើយប្រព័ន្ធផ្សព្វផ្សាយក៏ដូចគ្នាដែរ ។ នៅថ្ងៃទី១៣-១៤ ខែសីហា លោកនឹងប្រជុំក្រុមប្រឹក្សាសន្តិសុខជាតិ ដោយសារស្ថានការណ៍គ្រប់យ៉ាងបានត្រឡប់មកភាពល្អប្រសើរ ហើយមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ នឹងត្រូវបិទដំណើរការ ។ ពេលនេះ មានតែការផ្សព្វផ្សាយព័ត៌មានក្លែងក្លាយដើម្បីបង្កើតភាពវឹកវរធ្វើឱ្យអារម្មណ៍ច្របូកច្របល់ និងបង្កបញ្ហា ។

កិច្ចប្រជុំក្រុមប្រឹក្សាសន្តិសុខជាតិនឹងពិចារណាបិទដំណើរការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ប្រសិនបើអ្វីៗទាំងអស់ត្រូវបានដោះស្រាយ ហើយស្ថានការណ៍ត្រឡប់មករភាពប្រក្រតី ។ ហេតុនេះ សូមពលរដ្ឋរង់ចាំតាមដានព័ត៌មានពិតប្រាកដប្រាកដពីរដ្ឋាភិបាលល្អជាង ពលរដ្ឋកុំជឿព័ត៌មានញុះញង់ក្នុងបណ្តាញសង្គមដែលផ្សព្វផ្សាយបំប៉ោងស្ថានការណ៍ ចូរពលរដ្ឋគ្រប់គ្នាស្តាប់ និងអានព័ត៌មានដោយការពិចារណា ។ នេះបើតាមការលើកឡើងរបស់លោក ភូមិថាំ ។

ឆ្លើយតបនឹងសារព័ត៌មានដែលសួរថា តើការបិទដំណើរការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បង្ហាញថា ថៃមានទំនុកចិត្តលើស្ថានការណ៍ព្រំដែននឹងស្ងប់ស្ងាត់ជារៀងរហូត មែនទេ? លោក ភូមិថាំ ប្រាប់ថា ការបិទមជ្ឈមណ្ឌលនេះ គឺត្រូវមានការសម្រេចចិត្តពីកងទ័ព និងនាយកដ្ឋានព័ត៌មាន ព្រមទាំងការវាយតម្លៃស្ថានការណ៍របស់ស្ថាប័នពាក់ព័ន្ធ ។

ចំណែកមេបញ្ជាការយោធភូមិភាគ២ លោក ប៊ុនស៊ីន ផាកក្លាង ប្រកាសដណ្តើមប្រាសាទតាក្របីរបស់កម្ពុជា ដែលជាការល្មើសកិច្ចព្រមព្រៀងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ គឺលោក ភូមិថាំ ពុំជ្រាបរឿងនេះទេ ហើយលោកជឿថា គ្រប់យ៉ាងត្រូវអនុវត្តតាមកិច្ចព្រមព្រៀង ។

គួរបញ្ជាក់ថា ថៃបានបង្កើតមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដើម្បីផ្សព្វផ្សាយព័ត៌មានពីជម្លោះព្រំដែនកម្ពុជា-ថៃទៅកាន់ពលរដ្ឋ ដែលមជ្ឈមណ្ឌលនេះស្ថិតក្រោមការគ្រប់គ្រងរបស់លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ ។ ការងាររបស់មជ្ឈមណ្ឌលផ្តោតសំខាន់លើផលប្រយោជន៍ខ្ពស់បំផុតរបស់ពលរដ្ឋថៃ និងប្រទេសជាតិ ៕