គួរឱ្យស្រលាញ់ណាស់! ក្រុមចម្រៀង K-Pop Nchive រាំចង្វាក់ប្រពៃណីខ្មែរបានយ៉ាងល្អ

ដ្បិតថាមិនមែនជាចង្វាក់ប្រពៃណីជាតិខ្មែរប៉ុន្តែក្រុមចម្រៀង Nchive (អិនខាយ) បានធ្វើឱ្យទស្សនិកជនកោតសរសើរនៅពេលតារា K-Pop ទាំង៦នាក់នៃក្រុមចម្រៀងនេះរាំចង្វាក់ប្រពៃណីខ្មែរបានយ៉ាងល្អ។ Nchive បានមកផ្សព្វផ្សាយសកម្មភាពរបស់ខ្លួននៅលើទឹកដីប្រទេសកម្ពុជាជាលើកដំបូងនិងបានបង្ហាញសកម្មភាពជាច្រើន។

កាលពីយប់ថ្ងៃទី១០ សីហា ក្រុមចម្រៀង Nchive បានបង្ហាញខ្លួននៅឯផ្លូវថ្មើរជើងចតុមុខ ប្រកបដោយភាពសប្បាយរីករាយជាមួយនឹងទឹកមុខញញឹមពព្រាយទោះបីជាថមថយថាមពលដោយសារតែចូលរួមសកម្មភាពនានាជាច្រើន។ ក្រុមចម្រៀង Kpop នេះបានធ្វើខ្លួនយ៉ាងសាមញ្ញងាយសម្របខ្លួន ហើយបានភ្លក្សអាហារតាមដងផ្លូវនិងរីករាយជាមួយនឹងសកម្មភាពនានា។

អ្វីដែលកាន់តែធ្វើឱ្យទស្សនិកជនមានការចាប់អារម្មណ៍បន្ថែមនោះក្រុមចម្រៀង Nchive បានរាំវង់ដែលជាចង្វាក់ប្រពៃណីជាតិខ្មែរជាមួយនឹងបងប្អូនប្រជាពលរដ្ឋខ្មែរនៅផ្លូវថ្មើរជើងចតុមុខ។ ទោះបីជាមានការពិបាកព្រោះខុសប្លែកពីចង្វាក់ Kpop ប៉ុន្តែគេសង្កេតឃើញថា Nchive គឺបានព្យាយាមរាំចង្វាក់ប្រពៃណីខ្មែរនេះ។ ក្រុមចម្រៀង Nchive ទើបតែត្រឡប់មកពីខេត្តព្រះសីហនុផងដែរ ដោយបានចូលរួមផ្សព្វផ្សាយបទរបស់ខ្លួននៅក្នុងការប្រកួតបាល់ទាត់។

គួរបញ្ជាក់ផងដែរថា ក្រុមចម្រៀង NCHIVE មានសមាជិកចំនួន៦រូបគឺ HA.L, E.aN, Kangsan, Yuchan, Juyoung, និង Minjun ដែលស្ថិតក្រោម AUBEMOON STUDIO។ ពួកគេបានបង្ហាញខ្លួនដំបូងនៅខែមេសា ឆ្នាំ២០២៤ ជាមួយនឹងអាល់ប៊ុមទោលទី ១ របស់ពួកគេមានឈ្មោះថា «DRIVE»។ ក្រុមអ្នកគាំទ្ររបស់ NCHIVE មានឈ្មោះថា «Save»៕