មិនត្រឹមតែមានសម្រស់ស្រស់ស្អាត ចិត្តល្អ មិនឱបដៃមើលប្រជារាស្រ្តជួបទុក្ខលំបាកកប៉ុណ្ណោះទេប៉ុន្តែ ព្រះនាង នរោត្តម ចេណ្ណា ក៏បានកសាងកេរ្តិ៍ឈ្មោះយ៉ាងថ្លៃថ្នូរនិងក្រអូបសាយនៅលើឆាកអន្តរជាតិដើម្បីមុខមាត់ជូនប្រទេសកម្ពុជា។
ដូចប្រិយមិត្តជ្រាបមកហើយថា ព្រះនាង ចេណ្ណា ជារឿយៗគឺបានលេចព្រះភ័ក្រ្តនៅឯប្រទេសចិនក្នុងការតំណាងប្រទេសកម្ពុជាផ្សព្វផ្សាយពីវប្បធម៌ខ្មែរដោយចូលរួមកម្មវិធីជាច្រើននៅឯប្រទេសចិន។ មិនត្រឹមតែលេចព្រះភ័ក្រ្តលើកញ្ចក់ទូរទស្សន៍ធំៗនៅក្នុងប្រទេសចិនប៉ុណ្ណោះទេពេលនេះទ្រង់ក៏បានលេចព្រះភ័ក្រ្តនៅលើទស្សនាវដ្តីដ៏ល្បីល្បាញមួយរបស់ចិនផងដែរ។
នៅថ្ងៃទី១១ សីហា ព្រះនាង ចេណ្ណា បានបង្ហោះរូបជាច្រើនសន្លឹកធ្វើឱ្យអ្នកគាំទ្រសរសើរមិនដាច់ពីមាត់អំពីសម្រស់របស់ទ្រង់។ ព្រះនាងបានបញ្ជាក់ថា «ក្នុងឱកាសគម្រប់ខួបអនុស្សាវរីយ៍ ៦៧ ឆ្នាំ នៃទំនាក់ទំនងការទូតកម្ពុជា-ចិន ខ្ញុំមានសេចក្ដីរីករាយ ដែលបានចូលរួម ក្នុងការជំរុញការអភិរក្ស និងការផ្លាស់ប្តូរវប្បធម៌គ្នារវាងមិត្តភាពប្រទេសទាំងទ្វេ តាមរយៈការបង្ហាញទិដ្ឋភាព សិល្បៈ ប្រពៃណីចិន ប្រកបដោយភាពច្នៃប្រឌិត ផ្អែកលើប្រពៃណីបែប «guófēng» ដែលជាអរិយធម៌ដ៏ចំណាស់មួយ មានអាយុកាលរាប់ពាន់ឆ្នាំ ក្រោមការផលិតដោយ Trendmo China Magazine ទស្សនាវដ្ដីដ៏ល្បីល្បាញក្នុងប្រទេសចិន»។
មិនត្រឹមតែចូលរួមលើកស្ទួយមុខមាត់ប្រទេសកម្ពុជាតាមរយៈសកម្មភាពនានានៅឯប្រទេសចិនប្រកបដោយសេចក្តីថ្លៃថ្នូរ មានកេរ្តិ៍ឈ្មោះក្រអូបសាយប៉ុណ្ណោះទេ ព្រះនាង ចេណ្ណា ក៏ជួយប្រជារាស្រ្តប្រើប្រាស់សំឡេងរបស់ខ្លួនក្នុងបញ្ហាដែលថៃឈ្លានពានកម្ពុជាផងដែរ។
កាលពីកន្លងមកនេះព្រះនាង ចេណ្ណា បានចេញវីដេអូដោយប្រើប្រាស់ចំនួន៤ភាសានិយាយទៅកាន់អន្តរជាតិ។ ទ្រង់ក៏បានចុះសួរសុខទុក្ខដោយផ្ទាល់ទៅដល់ជនភៀសសឹកនៅខេត្តព្រះវិហារដែលនាំយកអំណោយជាច្រើនទៅជូនបងប្អូននៅទីនោះ៕
