ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី១៣ ខែសីហា ឆ្នាំ២០២៥ ឱ្យដឹងថា កងទ័ពថៃបានច្រានចោលព័ត៌មានឈ្លានពានកម្ពុជាជាថ្មី នៅយប់ថ្ងៃទី១៣ និងព្រឹកថ្ងៃទី១៤ ខែសីហា គឺកងទ័ពថៃគ្មានការបញ្ជាឱ្យជម្លៀសពលរដ្ឋចេញពីលំនៅឋានតាមព្រំដែន ឬបិទសាលារៀននៅឃុំដាន ស្រុកកាបឈើង ខេត្តសុរិន្ទ ដូចការចុះផ្សាយរបស់សារព័ត៌មានទេ ។ កងទ័ពថៃគោរពកិច្ចព្រមព្រៀងបទឈប់បា.ញ់យ៉ាងម៉ឺងម៉ាត់ និងសូមឱ្យពលរដ្ឋជឿជាក់លើព័ត៌មានពីប្រភពអាចទុកចិត្តបាន ។

កាលពីថ្ងៃទី១៣ ខែសីហា នៅទីបញ្ជាការកងទ័ពជើងគោក លោក រិតឆា សុខស៊ុវ៉ាន់ណុន អ្នកនាំពាក្យរងកងទ័ពជើងគោកបានលើកឡើងពីព័ត៌មានផ្សព្វផ្សាយថា កងទ័ពថៃត្រៀមបើកការឈ្លានពានវាយប្រហារកម្ពុជាជាថ្មី អាចនៅយប់ថ្ងៃទី១៣ និងព្រឹកថ្ងៃទី១៤ ខែសីហា ក្រោយពីកងទ័ពថៃបញ្ជាឱ្យបិទសាលារៀននៅឃុំដាន ស្រុកកាបឈើង ខេត្តសុរិន្ទ ។

កងទ័ពថៃបានត្រួតពិនិត្យរួចហើយ គឺគ្មានការជម្លៀស ឬបិទសាលារៀននៅឃុំដានទេ សាលារៀននៅតែបើកទ្វារបង្រៀនសិស្សតាមធម្មតា ខណៈសាលារៀនមួយចំនួនទៀតនៅឃុំនេះ គ្រាន់តែពន្យារពេលបង្រៀនសិស្សក្នុងថ្នាក់មួយរយៈសិន ។ កងទ័ពថៃសូមបញ្ជាក់ថា នៅតែគោរពតាមកិច្ចព្រមព្រៀងបទឈប់បាញ់ក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) យ៉ាងម៉ឺងម៉ាត់ និងសូមពលរដ្ឋជឿជាក់ព័ត៌មានពីប្រភពអាចទុកចិត្តបាន ។

ដោយឡែក នៅថ្ងៃ១៣ ខែសីហា អ្នកនាំពាក្យរដ្ឋាភិបាលថៃ លោក ជិរ៉ាយុ ហួងសាប់ បានលើកឡើងពីព័ត៌មានផ្សព្វផ្សាយក្នុងបណ្តាញសង្គមថា «កងទ័ពថៃប្រកាសឱ្យពលរដ្ឋជម្លៀសចេញពីលំនៅឋានជាបន្ទាន់ ដោយសារស្ថានការណ៍ព្រំដែនកម្ពុជា-ថៃតានតឹងឡើងវិញ» ដោយលោកថា ព័ត៌មាននេះក្លែងក្លាយ ពីព្រោះបច្ចុប្បន្ន ស្ថានការណ៍នៅខេត្តព្រំដែនចំនួន៧ ជាប់កម្ពុជាធូរស្រាលហើយ ។

មជ្ឈមណ្ឌលប្រឆាំងព័ត៌មានក្លែងក្លាយប្រទេសថៃបានស៊ើបអង្កេតការពិតជាមួយកងទ័ពភូមិភាគ២ ឃើញថា កងទ័ពថៃពុំបានប្រកាសឱ្យពលរដ្ឋជម្លៀសចេញពីលំនៅឋានទេ ។ នៅតាមបណ្តោយព្រំដែនកម្ពុជា-ថៃមានស្ថានការណ៍ធម្មតា គ្រាន់តែកងទ័ពថៃត្រៀមខ្លួន និងតាមដានស្ថានការណ៍យ៉ាងដិតដល់ គឺគ្មានការប៉ះទង្គិច ឬធ្វើសង្គ្រាមឡើយ ។

រដ្ឋាភិបាលថៃសូមឱ្យពលរដ្ឋកុំជឿព័ត៌មានគ្មានប្រភពច្បាស់លាស់ ឬចែកចាយបន្ត ពលរដ្ឋគួរតែតាមដានព័ត៌មានពីស្ថាប័នរដ្ឋាភិបាល ឬសារព័ត៌មានផ្លូវការប៉ុណ្ណោះ ។ រដ្ឋាភិបាល និងកងទ័ពផ្តោតសំខាន់បំផុតលើសន្តិសុខជាតិ និងសុវត្ថិភាពពលរដ្ឋគ្រប់រូបនៅព្រំដែន ។

ចំណែកកម្ពុជាអំពាវនាវឱ្យភាគីថៃគោរពនូវលក្ខខណ្ឌនៃកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នានៅក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅ(GBC) ដែលថា ភាគីទាំងពីរបានព្រមព្រៀងគ្នារក្សាកម្លាំងកងទ័ពរបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងក្នុងពេលកិច្ចព្រមព្រៀងបទឈប់បាញ់ចូលជាធរមាន នៅម៉ោង១២អធ្រាត្រ (ម៉ោងក្នុងតំបន់) កាលពីថ្ងៃទី២៨ ខែកក្កដា ឆ្នាំ២០២៥ ឡើយ ។ ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការដើរល្បាតទៅលើទីតាំងរបស់ភាគីម្ខាងទៀតឡើយ ។

កម្ពុជាសូមអំពាវនាវដល់ភាគីថៃប្រកាន់ខ្ជាប់នូវស្មារតីបទឈប់បាញ់ ឈានទៅរកដំណោះស្រាយជម្លោះតាមគោលការណ៍ដែលភាគីទាំងពីរបានឯកភាពគ្នា រួមទាំងការ ប្រជុំគណៈកម្មាធិការព្រំដែនថ្នាក់យោធភូមិភាគ (RBC) និងកិច្ចប្រជុំវិសាមញ្ញរបស់គណៈកម្មាធិការព្រំដែនទូទៅកម្ពុជា-ថៃ(GBC) នាពេលខាងមុខ ៕

បំបាក់មុខគ្នាឯងច្បាស់ណាស់! ក្រសួងការពារជាតិថៃរងចោ.ទប្រកាន់ពីប្រជាជនខ្លួនថា គ្មានថវិការគ្រប់គ្រាន់ក្នុងការទំនុកបម្រុងកងទ័ព ក្រោយសុខៗមេទ័ពភូមិភាគ2 ប្រកាសសុំជំនួយពីសប្បុរសជនដើម្បីទិញបន្លាលួសបន្ថែម។ ក្រោយកើតមានបញ្ហានេះ ក្រសួងការពារជាតិថៃបានស្នើឲ្យមេទ័ពភូមិភាគ2 បញ្ឈប់ការរៃអង្គាសនេះ ដោយជំរុញឲ្យមេទ័ពរូបនេះងាកមកចរចាជាមួយថ្នាក់លើជាមុនប្រសិនបើត្រូវការអ្វីមួយ។ នេះបើយោងតាមសារព័ត៌មាន The Nation។

ថៃ៖ នៅថ្ងៃទី13 ខែសីហា មេបញ្ជាការភូមិភាគ2ថៃ លោក ប៊ុនសុីន ផាតក្លាង បានបង្ហោះសារមួយនៅលើទំព័រហ្វេសប៊ុក សុំការរៃអង្គាសប្រាក់ពីសាធារណជនក្នុងការទិញបន្លាលួសយកមកពង្រាយបន្ថែម ក្រោមហេតុផលថា ដើម្បីការពារកុំឲ្យទាហានខ្មែរលូនចូលទៅដាក់គ្រាប់មីននៅក្នុងទឹកដីថៃ។ ការបង្ហោះនេះ បានជំរុញឲ្យមានមតិរិះគ.ន់រដ្ឋាភិបាលថៃជាខ្លាំង ដោយពលរដ្ឋថៃភាគច្រើនចោ.ទសួរថា ហេតុអ្វីកងទ័ពត្រូវរៃអង្គាសប្រាក់ដូច្នេះ? តើក្រសួងការពារជាតិថៃគ្មានថវិការសម្រាប់ផ្គត់ផ្គង់លើរឿងទាំងនេះទេមែនទេ? ចុះប្រាក់ដែលតែងយកពីពលរដ្ឋថ្លៃបង់ពន្ធនោះទៅណាអស់ហើយ?

បន្ទាប់ពីការបង្ហោះនោះ នាយប់ថ្ងៃដដែល ក្រសួងការពារជាតិថៃបានចេញមកច្រានចោលទាំងស្រុងចំពោះការអះអាងថាខ្វះខាតថវិកា ដោយលោក ភូមថាំ វេឆាយ៉ាឆៃ នាយករដ្ឋមន្រ្តីស្ដីទី សូមអង្វរលោក ប៊ុនស៊ីង ផាតក្លាង ដែលជាមេភូមិភាគ2 កុំបន្តសុំជំនួយពីពលរដ្ឋបន្តទៀតអី និងជំរុញឲ្យលោក ប៊ុនសុី ដាក់សំណើរមកកាន់ថ្នាក់លើបាន។ លោកថារដ្ឋាភិបាលមិនខ្វះថវិការសម្រាប់ទ័ពនោះទេ ប្រសិនបើតំបន់កងទ័ពភាគ2 ត្រូវការឧបករណ៍ផ្សេងៗ គួរតែជូនដំណឹងទៅទីបញ្ជាការកងទ័ពភូមិន្ទថៃ (RTA) និងអគ្គមេបញ្ជាការកងទ័ព ដូច្នេះរដ្ឋាភិបាលអាចបែងចែកថវិកាបាន។

ដោយខ្លាចថាប្រជាជននឹងធ្វើការរិះគន់សារជាថ្មីជុំវិញការប្រតិបត្តិការងារមិនសុីចង្វាក់គ្នារវាងកងទ័ព និងក្រសួងការពារជាតិ អ្នកនាំពាក្យក្រសួងការពារជាតិថៃ លោក Surasant Kongsiri បានបកស្រាយថា៖ ការអំពាវនាវរបស់កងទ័ពភូមិភាគ2 គ្រាន់តែជាវិធានការបណ្តោះអាសន្ន ដើម្បីដោះស្រាយតម្រូវការការបន្ទាន់ប៉ុណ្ណោះ។ លោកបញ្ជាក់ថា៖ រដ្ឋាភិបាលមានថវិកាគ្រប់គ្រាន់ ប៉ុន្តែដំណើរការស្នើដកយកមកប្រើប្រាស់គឺអាចនឹងត្រូវការពេលវេលាមួយចំនួន ដូច្នេះទើបខាងកងទ័ពប្រកាសស្នើសុំជំនួយពីប្រជាជនបែបនេះដើម្បីភាពឆាប់រហ័ស។

ជាមួយនឹងបញ្ហាខាងលើនេះ វាបានបង្ហាញថា រវាងកងទ័ពនិងរដ្ឋាភិបាលថៃគឺតែងមានការខ្វែងគំនិតគ្នាជានិច្ច។ តួយ៉ាងដូចជាការប្រកាសរបស់មេទ័ពភូមិភាគ2 ក្នុងការស្នើសុំជំនួយពីពលរដ្ឋដោយផ្ទាល់ ដោយមិនបានដាក់សំណើរនេះមកខាងថ្នាក់លើជាមុនសិននោះ បានបញ្ជាក់យ៉ាងច្បាស់ថា មេទ័ពរូបនេះមានគំនិតមិនចង់ពាក់ព័ន្ធជាមួយរដ្ឋាភិបាលរបស់ខ្លួន ដែលជាងនេះទៅទៀត វាហាក់ជាចេតនាចង់បានមុខមាត់តែឯង ដូចការប្រកាសកាលពីថ្មីៗនេះថា នឹងវា.យយកប្រាសាទតាក្របីឲ្យបានមុនពេលចូលនិវត្តន៍ដូច្នេះដែរ៕

ថៃ៖ នាយកប្រតិបត្តិជាន់ខ្ពស់មកពីក្រុមហ៊ុន ខារ៉ាវាវ គ្រុប បាននិយាយថា បើទោះជាបច្ចុប្បន្នម៉ាកយីហោថៃ និងផលិតថៃនៅកម្ពុជាកំពុងត្រូវបានពហិការឈប់ប្រើប្រាស់ដោយពលរដ្ឋកម្ពុជាក៏ដោយ ប៉ុន្តែស្ថានភាពនេះមិនគួរឲ្យបារម្ភពេកទេ ព្រោះនៅរយៈពេលខ្លីខាងមុខប្រជាជនកម្ពុជានឹងបានរំសាយចិត្តចឹងស្អប់ហើយងាកមកប្រើប្រាស់ផលិតផលថៃដូចមុនវិញហើយ ព្រោះកម្ពុជាមានមនោសញ្ចេតនាជាមួយសម្ភារៈប្រើប្រាស់ថៃណាស់។

យោងតាមការចុះផ្សាយរបស់សារព័ត៌មាន The Nation នាថ្ងៃទី12 ខែសីហា បានឲ្យដឹងថា ផលប៉ះពាល់លើអាជីវកម្មថៃកាន់តែទូលំទូលាយ ដោយម៉ាកយីហោថៃដែលកំពុងប្រតិបត្តិការក្នុងប្រទេសកម្ពុជាបានផ្អាកទំនាក់ទំនងទីផ្សារ ហើយក្រុមហ៊ុនខ្លះ គ្រោងនឹងពន្យារពេលការបើកដំណើរការរបស់ពួកគេរហូតដល់លក្ខខណ្ឌមានស្ថេរភាពឡើងវិញ។

លោក Romtham Sathientham នាយកគ្រប់គ្រងក្រុមហ៊ុន Carabao Group Plc បាននិយាយថា ការបិទព្រំដែនកម្ពុជា-ថៃ កាលពីខែមិថុនាកន្លងទៅ បានប៉ះពាល់ដោយផ្ទាល់ដល់ការនាំចេញភេសជ្ជៈប៉ូវកម្លាំងរបស់ក្រុមហ៊ុន។ លោកថា “យើងមិនអាចដឹកជញ្ជូនទំនិញតាមផ្លូវគោកក្នុងរយៈពេលពីប្រាំពីរទៅប្រាំបីថ្ងៃ ដូច្នេះយើងត្រូវប្តូរទៅការដឹកជញ្ជូនតាមសមុទ្រ ដែលពន្យារពេលការដឹកជញ្ជូន និងប៉ះពាល់ដល់ការលក់នៅត្រីមាសទីពីរ”។

លោក Romtham បានបន្តទៀតថា៖ ការកើនឡើងនៃជម្លោះកម្ពុជា-ថៃ បានបង្ខំឱ្យយីហោថៃដែលកំពុងប្រតិបត្តិការនៅកម្ពុជា បានអនុវត្តវិធានការបណ្តោះអាសន្នមួយ ដោយផ្អាកសកម្មភាពធ្វើទីផ្សារ និងការផ្សាយពាណិជ្ជកម្ម ដើម្បីកាត់បន្ថយកំហឹង និងការស្អ.ប់មកលើផលិតផលរបស់ពួកគេ។ ប៉ុន្តែ លោក Romtham បានគូសបញ្ជាក់ថា៖ យ៉ាងណាផលិតផលភេសជ្ជៈរបស់ក្រុម ខារ៉ាបាវ នៅតែមានទីផ្សារខ្លាំង ហើយការផ្គត់ផ្គង់នៅតែមិនគ្រប់គ្រាន់ ព្រោះផលិតផលថៃតែងរក្សាបាននូវភាពទាក់ទាញ និង គុណភាព សម្រាប់អ្នកប្រើប្រាស់កម្ពុជា។

នាយកគ្រប់គ្រងក្រុមហ៊ុនមួយនេះ បាននិយាយដោយភាពជឿជាក់ថា៖ «សរុបមក ទំនិញ និងម៉ាកយីហោផលិតផលថៃអាចប្រឈមមុខនឹងបញ្ហាមួយចំនួនពិតមែននៅពេលនេះ ប៉ុន្តែយើងជឿជាក់ថា វានឹងមានត្រឹមតែរយៈពេលខ្លីប៉ុណ្ណោះ។ មនោសញ្ចេតនារបស់ពលរដ្ឋកម្ពុជានៅតែមាន ហើយវានឹងឃើញលទ្ធផលក្នុងរយៈពេលពី 6 ទៅ 12 ខែខាងមុខ យើងសង្ឃឹមថាស្ថានភាពនឹងវិលមករកភាពប្រក្រតីវិញ ដោយសារប្រជាជនកម្ពុជាចូលចិត្តផលិតផលថៃណាស់។» ទាំងនេះគឺជាការអះអាងរបស់នាយកគ្រប់គ្រងក្រុមហ៊ុន ខារ៉ាបាវ នៅក្នុងបទសម្ភាសន៍ជាមួយសារព័ត៌មានថៃ ជុំវិញការពិភាក្សាផ្នែកសេដ្ឋកិច្ចទីផ្សារពាណិជ្ជកម្មរបស់ថៃនៅកម្ពុជា។

យ៉ាងណាងាកមកខាងកម្ពុជាវិញ ចាប់តាំងពីការឈ្លានពានរបស់ថៃមកលើកម្ពុជាបានលេចឡើងម្ដងទៀតនៅក្នុងឆ្នាំ2025នេះ យុវជនខ្មែរ រួមទាំងបុគ្គលមានឥទ្ធិពលនៅក្នុងសង្គមជាច្រើន បាននាំគ្នាបង្ហាញពីការប្ដេជ្ញាចិត្ត ពហិការឈប់ប្រើប្រាស់ផលិតផលថៃ រួមទាំងការឈប់គាំទ្រសិល្បៈថៃផងដែរ។

គួរបញ្ជាក់ថា កន្លងមកមានការចុះផ្សាយព្រោងព្រាត ពីក្រុមហ៊ុនធំៗមួយចំនួនដែលទទួលបានប្រាក់ចំណេញរាប់សិបលានដុល្លារក្នុងមួយឆ្នាំៗពីប្រទេសកម្ពុជា ប៉ុន្តែបានផ្ដល់ប្រាក់ឧបត្ថមគាំទ្រដល់យោធាថៃ ក្នុងការទិញសព្វាវុ.ធទំនើបៗមកវា.យប្រហារធ្វើបាប សម្លាប់ទាហាន និងជីវិតជនសុីវិលខ្មែរយ៉ាងព្រៃផ្សៃបំផុត។ ដូច្នេះកូនខ្មែរគ្រប់រូបគួរចងចាំនូវភាពឈឺចាប់នេះ កុំឆាប់ភ្លេចនូវអ្វីដែលថៃធ្លាប់បានធ្វើកន្លងមក ហើយងាកទៅគាំទ្រពួកគេដូចមុនទៀតឲ្យសោះ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ The States Times នៅថ្ងៃទី១៣ ខែសីហា ឆ្នាំ២០២៥ ឱ្យដឹងថា នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បាននិយាយពីមេបញ្ជាការយោធភូមិភាគ២ លោក ប៊ុនស៊ីន ផាកក្លាង បង្ហោះហ្វេសប៊ុកសុំប្រាក់ពលរដ្ឋជួយបរិច្ចាគទិញបន្លាលួសឱ្យកងទ័ពជាបន្ទាន់សម្រាប់បំពេញភារកិច្ចនៅព្រំដែនកម្ពុជា-ថៃ ។ លោកថា បើកងទ័ពខ្វះខាតឧបករណ៍ចាំបាច់ផ្សេងៗ សូមប្រាប់មេបញ្ជាការកងទ័ពតាមត្រង់ ពុំចាំបាច់បង្ហោះហ្វេសប៊ុកសុំប្រាក់ពីពលរដ្ឋទេ ពីព្រោះរដ្ឋាភិបាលមានប្រាក់គ្រប់គ្រាន់សម្រាប់ផ្តល់ឱ្យ ។

កងទ័ពភូមិភាគ២ថៃ បានបង្ហោះហ្វេសប៊ុកសុំប្រាក់ពីពលរដ្ឋជួយបរិច្ចាគទិញបន្លាលួសឱ្យកងទ័ពជាបន្ទាន់ដើម្បីកាត់បន្ថយហានិភ័យដល់អាយុជីវិត ផ្តល់សុវត្ថិភាពដល់កងទ័ពពេលបំពេញភារកិច្ច និងការពារអធិបតេយ្យនៅព្រំដែនកម្ពុជា-ថៃ ។ កងទ័ពភូមិភាគ២ សូមការសហការពីពលរដ្ឋជួយគាំទ្រ និងបង្ហាញកម្លាំងសាមគ្គី ដោយពលរដ្ឋអាចផ្ញើប្រាក់សម្រាប់ទិញបន្លាលួសមកកាន់ផ្នែកកិច្ចការស៊ីវិល និងកងកម្លាំងស៊ុណារីដោយផ្ទាល់ ។

កងទ័ពភូមិភាគ២បញ្ជាក់ថា បន្លាលួសមានអង្កត់ផ្ចិតទំហំ១០០សង់ទីម៉ែត្រ គឺកងទ័ពពិបាកស្វែងរកណាស់នៅក្នុងតំបន់ ហើយកងទ័ពក៏ប្រើប្រាស់បន្លាលួសមានអង្កត់ផ្ចិតទំហំ៩០សង់ទីម៉ែត្រជំនួស ។ កងទ័ពភូមិភាគ២ សូមអរគុណការគាំទ្រពីពលរដ្ឋ និងសន្យាបំពេញតួនាទីអស់ពីសមត្ថភាពដើម្បីសុវត្ថិភាពប្រទេសជាតិ និងសន្តិសុខពលរដ្ឋគ្រប់រូប ។

បន្ទាប់មក លោក ភូមិថាំ នាយករដ្ឋមន្ត្រីស្តីទីបានស្នើទៅមេបញ្ជាការយោធភូមិភាគ២ លោក ប៊ុនស៊ីន ផាកក្លាង ឈប់សុំប្រាក់ពីពលរដ្ឋជួយទិញបន្លាលួស និងឱ្យកងទ័ពមកសុំប្រាក់ទិញបន្លាលួសពីរដ្ឋាភិបាលវិញ ពីព្រោះរដ្ឋាភិបាលមានប្រាក់គ្រប់គ្រាន់ ។

ដោយឡែក ករណីកងទ័ព និងទាហានឈុតខ្មៅថៃជាន់មីននៅព្រំដែនកម្ពុជា-ថៃ លោក ភូមិថាំ និយាយថា ក្រសួងការបរទេសត្រៀមដាក់ពាក្យបណ្តឹងទៅអង្គការសហប្រជាជាតិ (UN) ហើយលោកចោទប្រកាន់ថា ពាក្យបណ្តឹងនេះជាការដោះស្រាយបញ្ហាកម្ពុជាល្មើសអនុសញ្ញាអូតាវ៉ា ។ លោកចោទទៀតថា កម្ពុជាមានចេតនាពុំចង់បានសន្តិភាពក្នុងតំបន់ ហេតុនេះ កងទ័ព និងរដ្ឋាភិបាលថៃនឹងធ្វើការជាមួយគ្នាយ៉ាងជិតស្និទ្ធដើម្បីដោះស្រាយស្ថានការណ៍ និងជូនដំណឹងទៅពលរដ្ឋជាបន្តបន្ទាប់ ។

ក្រៅពីនេះ នាយករដ្ឋមន្ត្រីស្តីទីក៏បាននិយាយពីពលរដ្ឋថៃរស់នៅព្រំដែនព្រួយបារម្ភពីស្ថានការណ៍ និងជម្លៀសចេញពីលំនៅឋានជាបន្តបន្ទាប់ ដោយលោកសុំឱ្យពលរដ្ឋមានទំនុកចិត្តលើរដ្ឋាភិបាលអាចផ្តល់ការថែទាំសុវត្ថិភាព ។ ក្រៅពីនេះ លោកអំពាវនាវឱ្យសារព័ត៌មានថៃផ្សព្វផ្សាយតែព័ត៌មានពិតប្រាកដ កុំផ្សព្វផ្សាយព័ត៌មានក្លែងក្លាយ ដើម្បីកុំឱ្យពលរដ្ឋភ័យស្លន់ស្លោហួសហេតុ ៕