ប្រទេសថៃ ៖ សារព័ត៌មាន Thairath រាយការណ៍កាលពីថ្ងៃទី២៣ ខែសីហា ឆ្នាំ២០២៥ ថា លោក ផៃ លិក ប្រធានសមាគមកីឡាប្រដាល់ថៃបានជំរុញឱ្យប្រើប្រាស់ឈ្មោះ Muay Thai ក្នុងកីឡាស៊ីហ្គេមលើកទី៣៣ ប្រចាំឆ្នាំ២០២៥ ពុំចាំបាច់ខ្លាចចិត្តកម្ពុជា ។ លោកថែមទាំងចោទប្រកាន់កម្ពុជាយកកីឡាប្រដាល់ថៃធ្វើជារបស់ខ្លួន ហើយលោកណែនាំឱ្យថៃប្រកាន់ខ្ជាប់នូវអត្តសញ្ញាណជាតិ ។

កាលពីថ្ងៃទី២៣ ខែសីហា លោក ផៃ លិក ប្រធានសមាគមកីឡាប្រដាល់ថៃ និងជាសមាជិកសភាខេត្តកំផែងពេជ្រ មកពីគណបក្សក្លាថាំ បាននិយាយពីការស្នើដាក់ឈ្មោះថា «Muay» ជំនួសពាក្យ «Muay Thai» ក្នុងការប្រកួតកីឡាស៊ីហ្គេម លើកទី៣៣ ដែលប្រទេសថៃនឹងធ្វើជាម្ចាស់ផ្ទះនៅចុងឆ្នាំនេះថា លោកសូមអំពាវនាវទៅអ្នករៀបចំការប្រកួតកីឡាស៊ីហ្គេមគួរដាក់ឈ្មោះ «Muay Thai»ពុំចាំបាច់ខ្លាចចិត្តកម្ពុជា ពីព្រោះថៃធ្លាប់ប្រើប្រាស់ឈ្មោះនេះក្នុងការប្រកួតកីឡាស៊ីហ្គេម លើកទី២៧-៣១ ចាប់ពីឆ្នាំ២០១៣ ដល់ឆ្នាំ២០២២ ។

លោកថា ប្រទេសថៃធ្លាប់ដាក់ឈ្មោះ Muay Thai ក្នុងការប្រកួតកីឡាស៊ីហ្គេមរហូតមក ប៉ុន្តែកាលពីឆ្នាំ២០២៣ កម្ពុជាបានធ្វើជាម្ចាស់ផ្ទះប្រកួតកីឡាស៊ីហ្គេម លើកទី៣២ កម្ពុជាក៏ប្តូរឈ្មោះពី Muay Thai ទៅជាគុនខ្មែរ និងអះអាងថា គុនខ្មែរជាដើមកំណើតរបស់ Muay Thai ។

លោកបន្តថា ការប្រកួតកីឡាស៊ីហ្គេមកន្លងមក ថៃត្រូវបានកម្ពុជាប្តូរឈ្មោះការប្រកួតកីឡាស៊ីហ្គេមពី Muay Thai ទៅជាគុនខ្មែរ ដែលថៃចាត់ទុកថា នេះជាការបំភ្លៃកីឡាថៃយកទៅធ្វើជាកម្មសិទ្ធិរបស់ខ្លួន ។ Muay Thai គឺជាអត្តសញ្ញាណជាតិថៃ ខណៈគណៈកម្មការអូឡាំពិកអន្តរជាតិ (IOC) ក៏ទទួលស្គាល់កីឡាដែលមានឈ្មោះ Muay Thai រួមទាំងសហព័ន្ធ Muay Thai អន្តរជាតិ (IFMA) ក៏ទទួលស្គាល់ឈ្មោះនេះដែរ ។

ហេតុនេះ ថៃពុំចាំបាច់ខ្លាចចិត្តកម្ពុជាទេ ពីព្រោះ Muay Thai គឺជាកីឡាប្រដាល់អត្តសញ្ញាណជាតិថៃ និងស្ថិតក្នុងគម្រោង Soft Power ដែលរដ្ឋាភិបាលថៃកំពុងតែជំរុញដើម្បីផ្សព្វផ្សាយវប្បធម៌ថៃទៅកាន់ពិភពលោក ។ យើងគួរតែប្រកាន់ខ្ជាប់នូវអត្តសញ្ញាណជាតិ កុំឱ្យអ្នកណាមកបំភ្លៃ ឬយកអត្តសញ្ញាណវប្បធម៌ថែបន្តទៀត។ នេះបើតាមការលើកឡើងរបស់លោក ផៃ លិក ប្រធានសមាគមកីឡាប្រដាល់ថៃ ។

គួរបញ្ជាក់ថា ថៃនឹងធ្វើជាម្ចាស់ផ្ទះការប្រកួតកីឡាស៊ីហ្គេម លើកទី៣៣ ចាប់ពីថ្ងៃទី៩ ដល់ថ្ងៃទី២០ ខែធ្នូ ឆ្នាំ២០២៥ នៅទីក្រុងបាងកក ខេត្តឈុនបុរី និងខេត្តសុងក្លា ។ ថ្មីៗនេះ ថៃបានស្នើឱ្យគណៈកម្មការអូឡាំពិកជាតិកម្ពុជាកាត់បន្ថយចំនួនអត្តពលិកចូលរួមការប្រកួតកីឡាស៊ីហ្គេម លើកទី៣៣ មិនលើស២០០នាក់ ដើម្បីសុវត្ថិភាព ដោយសារបារម្ភពីស្ថានការណ៍នយោបាយរវាងប្រទេសទាំងពីរ ៕

ហាណូយ៖ ព្យុះ Kajiki ដែលជាព្យុះទី ៥ ដែលវាយប្រហារប្រទេសវៀតណាមក្នុងឆ្នាំនេះ ត្រូវបានព្យាករណ៍ថានឹងបន្តបោកបក់តំបន់ឆ្នេរនៃខេត្ត Thanh Hoa និង Quang Tri នៅរសៀលថ្ងៃចន្ទនេះ។ វាមានកម្លាំងខ្យល់ខ្លាំងរហូតដល់ទៅ ១៦៦km/h និងភ្លៀងធ្លាក់ជាច្រើនពេញតំបន់។ នេះបើតាមសារព័ត៌មានក្នុងស្រុក VnExpess ។

យោងតាមមជ្ឈមណ្ឌលអាកាសធាតុជាតិវៀតណាម ព្យុះនេះស្ថិតនៅចម្ងាយប្រហែល ១៤៥km ភាគខាងកើតខេត្ត Ha Tinh ហើយនឹងផ្លាស់ទីទៅទិសពាយ័ព្យល្បឿនជាមធ្យម ២០km/h។ ប្រជាជនជាច្រើនគ្រួសារត្រូវបានជម្លៀសពីតំបន់ទាប។ រីឯនៅទីក្រុង Vinh និងទីក្រុង Cua Lo ក៏មានភ្លៀងធ្លាក់មធ្យម និងខ្យល់បក់ផងដែរ ដែលធ្វើឲ្យផ្លូវធំៗមួយចំនួនត្រូវបិទ មិនអាចធ្វើចរាចរណ៍បាន។

ព្យុះ Kajiki ត្រូវបានគេព្យាករណ៍ថានឹងរក្សាកម្លាំងរហូតដល់ពេលចូលដីគោគ រួចចុះខ្សោយទៅជាខ្យល់ត្រូពិច និងសម្ពាធទាបនៅប្រទេសឡាវ។ អាជ្ញាធរបានព្យាករណ៍ថានឹងមានភ្លៀងធ្លាក់ច្រើននៅទូទាំងតំបន់ទន្លេក្រហម រួមទាំងហាណូយ ដោយមានបរិមាណទឹកភ្លៀង ១០០–១៥០mm ក្នុងរយៈពេល ២ ថ្ងៃ ខណៈតំបន់ខ្លះចាប់ពីខេត្ត Thanh Hoa ដល់ Quang Tri អាចលើសពី ៧០០mm ដែលនេះនឹងបង្កហានិភ័យទឹកជំនន់ភ្លាមៗ។

ត្រឹមម៉ោង ៤ រសៀល កាលពីថ្ងៃអាទិត្យ អាជ្ញាធរបានទាក់ទងនាវាជាង ៦០,០០០ ជាមួយកម្មករជិត ២៥០,០០០ នាក់ ដើម្បីត្រៀមជៀសវាងព្យុះ និងហាមឃាត់សកម្មភាពនៅផ្ទៃសមុទ្រទាំងអស់នៅខេត្ត ៨ រួមមាន Ninh Binh, Thanh Hoa, Nghe An, Ha Tinh, Quang Tri, Hue, Da Nang និង Quang Ngai។ ក្រៅពីនេះ ផែនការជម្លៀសពលរដ្ឋជាង ៣២៥,០០០ នាក់ ក៏កំពុងអនុវត្តផងដែរ ជាពិសេសនៅខេត្ត Thanh Hoa, Quang Tri និងខេត្ត Hue៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod នៅថ្ងៃទី២៥ ខែសីហា ឆ្នាំ២០២៥ ឱ្យដឹងថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយពីការចរចាព្រំដែនជាមួយកម្ពុជាពុំបញ្ចប់ដោយងាយទេ និងចោទប្រកាន់កម្ពុជានិយាយផ្សេងខុសពីលទ្ធផលចរចា ។ ថៃចង់បានសុខសន្តិភាពជាប្រទេសជិតខាងល្អ ប៉ុន្តែលោកតានតឹងផ្លូវចិត្ត ពីព្រោះពេលភាគីទាំងពីរចរចាអ្វី កម្ពុជាយកទៅនិយាយផ្សេង ហើយលោកថា ប្រទេសខ្លះចរចាព្រំដែនរហូតដល់រាប់រយឆ្នាំ ខណៈកម្ពុជា-ថៃទើបចាប់ផ្តើមចរចាជាថ្មី ។

នាវេលាម៉ោង៩និង១០នាទី ថ្ងៃទី២៥ ខែសីហា នៅវិមានរដ្ឋាភិបាល លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានផ្តល់សម្ភាសន៍ជាមួយសារព័ត៌មានពីកិច្ចប្រជុំវិសាមញ្ញ របស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នៅថ្ងៃទី២៥ ខែសីហា រវាងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនខេត្តចាន់បុរី និងខេត្តត្រាតរបស់ថៃ ដោយកម្ពុជាធ្វើជាម្ចាស់ផ្ទះ ថា គ្មានអ្វីផ្លាស់ប្តូរទេ ពីព្រោះកិច្ចប្រជុំនេះបន្តពីកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កន្លងមក ។

កិច្ចប្រជុំអាចពិភាក្សាខុសគ្នាខ្លះអាស្រ័យលើទីកន្លែង និងបញ្ហា ប៉ុន្តែការពិភាក្សាផ្អែកលើខ្លឹមសារបន្តពីកិច្ចប្រជុំគណៈកម្មាធិការកិច្ចការព្រំដែនទូទៅ (GBC) លើកមុន ។ វាជាជជែកគ្នារវាងមេបញ្ជាការកងទ័ព ហើយការជជែកភាគច្រើនស្តីពីបញ្ហាព្រំដែន និងធ្វើដូចម្តេចដើម្បីទទួលបានលទ្ធផលសរុបដូចគ្នាបំផុត ។ ភាគីថៃពុំបានជជែករឿងបន្លាលួសជាមួយកម្ពុជាទេ ហើយបញ្ហាដែលថៃតានតានផ្លូវចិត្ត គឺពេលថៃចរចាអ្វីជាមួយកម្ពុជា ខាងកម្ពុជាយកទៅនិយាយផ្សេងខុសពីលទ្ធផលចរចា ។

លោក ភូមិថាំ បន្តថា ពេលនេះ រដ្ឋមន្ត្រីក្រសួងការបរទេសថៃបានធ្វើដំណើរទៅទីក្រុងហ្សឺណែវ ប្រទេសស្វីស ជួបជាមួយគណៈកម្មការពាក់ព័ន្ធនឹងអនុសញ្ញាអូតាវ៉ាដើម្បីបង្ហាញភស្តុតាងទាំងអស់ ។ ថៃចង់បានសន្តិភាពជាប្រទេសជិតខាងល្អ ប៉ុន្តែថៃពុំឱ្យអ្នកណាល្មើសអធិបតេយ្យ ខណៈកម្ពុជានិយាយអ្វីស្រេចតែកម្ពុជា ពីព្រោះការពិតនៅតែជាការពិត អន្តរជាតិបានឃើញរួចហើយ ។

បច្ចុប្បន្ន កម្ពុជា និងថៃកំពុងដំណើរការចរចា បើមើលពីប្រវត្តិសាស្ត្រពិភពលោក គឺការចរចារឿងព្រំដែនពុំមែនបញ្ចប់ងាយៗទេ ប្រទេសខ្លះចរចារាប់សិបឆ្នាំ ប្រទេសខ្លះទៀតចរចារហូតដល់រាប់រយឆ្នាំ ខណៈកម្ពុជា-ថៃទើបចាប់ផ្តើមចរចាជាថ្មី ។ ថៃមានបញ្ហាព្រំដែនជាមួយកម្ពុជារហូតមក ប៉ុន្តែបញ្ចប់ជាដំណាក់កាល អាស្រ័យលើស្ថានការណ៍នីមួយៗដូចម្តេច ។ នេះបើតាមការលើកឡើងរបស់នាយករដ្ឋមន្ត្រីស្តីទីថៃ ។

គួរបញ្ជាក់ថា នៅថ្ងៃទី២៥ ខែសីហា ឆ្នាំ២០២៥នេះ កម្ពុជាបានធ្វើជាម្ចាស់ផ្ទះកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនខេត្តចាន់បុរី និងខេត្តត្រាតរបស់ថៃ ។ កិច្ចប្រជុំវិសាមញ្ញនេះ ភាគីកម្ពុជា និងថៃ បានឯកភាពគ្នារក្សាទំនាក់ទំនងជាប្រចាំរវាងបណ្តាយោធភូមិភាគ និងតំបន់យោធា ព្រមទាំងបណ្តាអង្គភាពនៅតាមបណ្តោយព្រំដែនកម្ពុជា-ថៃ និងខិតខំដោះស្រាយរាល់បញ្ហាដោយសន្តិវិធី និងជៀសវាងការប៉ះទង្គិច ។

ភាគីទាំងពីរក៏បានបញ្ជាក់ពីសារៈសំខាន់នៃការពង្រឹងទំនាក់ទំនងបន្ថែមទៀតនៅគ្រប់កម្រិត ដើម្បីកសាងជំនឿទុកចិត្ត និងលើកកម្ពស់ភាពជាអ្នកជិតខាងល្អ ។ តាមរយៈ ការប្រាស្រ័យទាក់ទងគ្នានេះ ភាគីទាំងពីរបានសង្កត់ធ្ងន់ពីការវិវឌ្ឍជាវិជ្ជមាន និងវឌ្ឍនភាពដែលសម្រេចបានកន្លងមក សំដៅជំរុញកិច្ចសហប្រតិបត្តិការលើគ្រប់វិស័យ និងការវិលត្រឡប់ទៅរកប្រក្រតីភាពឡើងវិញ ៕

ខេត្តស្រះកែវ៖ កាលពីថ្មីៗនេះ ប្រជាជនថៃបាននាំគ្នាខឹ.ងសម្បារនឹងអភិបាលខេត្តស្រះកែវជាខ្លាំង បន្ទាប់ពីលោកបានធ្លោយមាត់ទទួលស្គាល់ថាភូមិណងចាន់ ដែលទាហានថៃកំពុងព័ទ្ធបន្លាលួសឈ្លានពាននោះជាដីទំនាស់ដែលស្ថិតក្នុងអធិបតេយ្យរបស់កម្ពុជា។ ក្រោយទទួលបានមតិរិះគ.ន់ខ្លាំងពេក អភិបាលខេត្តរូបនេះបានចេញមកស្រាយ និងសូមអភ័យទោសពលរដ្ឋជាសាធារៈ។នេះបើតាមសារព័ត៌មាន The Nation។

កាលពីថ្ងៃសៅរិ៍ ទី23 ខែសីហា ឆ្នាំ2025 លោក Parinya Phothisat អភិបាលខេត្តស្រះកែវ បានចេញមុខសុំទោសជាសាធារណៈ បន្ទាប់ពីលោកបានលើកឡើងអំពីដីមានជម្លោះនៅក្នុងភូមិណងចាន់ ដែលថៃកំពុងព័ទ្ធលួសនោះថាជា ដីទំនាស់គ្មានឯកសារកម្មសិទ្ធិតច្បាស់លាស់ បង្កឲ្យមានការរិះគន់ពីប្រជាសំណាក់ពលរដ្ឋថៃដាក់ចំៗមកកាន់លោកដូចទឹកបាក់ទំបន់។

ដោយឃើញពលរដ្ឋប្រតិកម្មនឹងការលើកឡើងរបស់លោកច្រើនពេក លោក Parinya បានក្រឡាស់ពាក្យសំដីដើម្បីកែស្ថានការណ៍យ៉ាងដូច្នេះថា៖ “ខ្ញុំសូមអភ័យទោសដោយស្មោះចំពោះប្រជាពលរដ្ឋទាំងអស់ ដែលខ្ញុំយល់ខុសទាក់ទងនឹងដីនៅភូមិណងចាន់។ ខ្ញុំសូមបញ្ជាក់ម្តងទៀតថាតំបន់នេះស្ថិតនៅក្នុងស្រុកខកស៊ុង ខេត្តស្រះកែវនៃព្រះរាជាណាចក្រថៃ”។

ជាមួយនឹងការបកស្រាយនេះ អាជ្ញាធរថៃបានធ្វើការបញ្ជាក់ជាថ្មីថា ដើមឡើយ តំបន់ណងចាន់ ត្រូវបានប្រើជាជម្រកបណ្ដោះអាសន្នសម្រាប់ជនភៀសខ្លួនកម្ពុជាដែលភៀសខ្លួនពីសង្រ្គា.មប៉ុណ្ណោះ។ ប៉ុន្តែក្រោយសង្គ្រាមបានបញ្ចប់ ប្រជាជនកម្ពុជាមួយចំនួនមិនបានត្រឡប់មកស្រុកវិញទេ ហើយថែមទាំងបង្កើតសហគមន៍របស់ពួកគេនៅទីនេះជាបន្តបន្ទាប់ ដោយពួកគេបានអះអាងថា តំបន់នេះគឺជាកម្មសិទ្ធិរបស់កម្ពុជាទៀតផង។

ជុំវិញបញ្ហាព័ទ្ធបន្លាលួសនេះដែរ អ្នកនាំពាក្យក្រសួងការបរទេសកម្ពុជា ចាត់ទុកវាថាជាសកម្មភាព ដែលធ្វើឲ្យប៉ះពាល់ធ្ងន់ធ្ងរដល់ការកសាងទំនុកចិត្តរវាងគ្នា។ ហើយកម្ពុជាបានអំពាវនាវឲ្យថៃគោរពឲ្យបានពេញលេញចំពោះកិច្ចព្រមព្រៀងទ្វេភាគី និងកាតព្វកិច្ចអន្តរជាតិ ។ លើសពីនេះ គណៈកម្មការព្រំដែន JBC របស់កម្ពុជា បានដាក់លិខិតជំទាស់ផ្លូវការរួចហើយ ចំពោះសកម្មភាពរាយលួសបន្លា បំពាក់សំណាញ់ខ្មៅ និងដាក់កង់ឡានដោយយោធាថៃមកលើទឹកដីកម្ពុជា៕