តារាចម្រៀង នរិទ្ធ និង វណ្ណដា បានសហការចេញបទចម្រៀងដ៏មានអត្ថន័យកំពុងធ្វើឱ្យបរទេសមានការចាប់អារម្មណ៍ស្នាដៃអ្នកទាំងពីរបន្ទាប់ពីលើកយកចំណុចជាច្រើនបានត្របាញ់ចូលគ្នាជាពិសេសគឺបានបង្ហាញថាការឈ្លានពានរបស់ថៃគឺជាការយកលេសធ្វើសង្គ្រាមដើម្បីតែអំណាចខណៈប្រទេសមួយនេះមានសង្គ្រាមផ្ទៃក្នុង។

កាលពីល្ងាចថ្ងៃទី២២ សីហា តារាចម្រៀង នរិទ្ធ និង វណ្ណដា បានទម្លាក់បទថ្មីមានចំណងជើងថា «Cigarettes After War» ដែល inspire ពីកងទ័ពម្នាក់ត្រូវបានគេបង្ហោះបន្ទាប់ពីកិច្ចព្រមព្រៀងបទឈប់បាញ់បានចូលជាធរមាន ជាពិសេសបង្ហាញពីតថភាពពិត ក៏ដូចជាអារម្មណ៍ដែលកងទ័ព និងប្រជាជនខ្មែរយើងកំពុងជួបប្រទះ។

ផ្តើមពី នរិទ្ធ បទចម្រៀងនេះបានលើកឡើងពីចំណុចជាច្រើនជាមួយនឹងសត្រូវដែលចាំតែទាមនិងបង្កប់អត្ថន័យពីកងទ័ពខ្មែរដែលពុំទាន់អាចត្រឡប់មកជួបគ្រួសារវិញ ហើយពាក្យថាសង្គ្រាមគ្មានអ្វីចំណេញទេចំណែកឯសន្តិភាពគឺសំខាន់។ ក្នុងបទនេះក៏បានលើកពីចំណុចផ្សេងទៀតដូចជារឿងខ្មៅធ្វើឱ្យទៅជាស ប្រឹងបំភ្លៃបំលែងព័ត៌មានទាំងប្រទេសខ្មែររងគ្រោះព្រោះតែការបំពានរបស់ថៃ ផ្តាច់ចំណងការទូត ហើយតិះដៀលខ្មែរទាំងមិនមើលខ្លួនឯង។

«Cigarettes After War» ក៏បានលើកពីទុក្ខលំបាករបស់កងទ័ពជួរមុខដែលប្រថុយនឹងគ្រោះថ្នាក់គ្រប់វិនាទី។

វណ្ណដា ក៏បានបន្តពីឃ្លាចម្រៀងរបស់ នរិទ្ធ ដែលបង្ហាញថាភាគីម្ខាងទៀតយកលេសធ្វើសង្គ្រាមដើម្បីតែអំណាច បង្ហូរឈាមដូចជារឿងលេងសើច ហើយសកម្មភាពទាំងនេះបង្ហាញឱ្យឃើញច្បាស់ដូចជាក្រដាស់មិនអាចខ្ចប់ភ្លើងបាននោះទេ។ វណ្ណដា ក៏បានក្តោមអត្ថន័យទៀតថាខ្មែរមិនត្រូវការសង្គ្រាម ត្រូវការសន្តិភាព ត្រូវតែការពារទឹកដី រើសបម្រាស់មិនអាចឱ្យអ្នកណាមកបំពាននោះទេព្រោះខ្មែរបានរងទុក្ខវេទនាអស់ជាច្រើនឆ្នាំមកហើយ។

ជាមួយនឹងបទថ្មីដែលយកប្រធានបទខាងលើជាមួយនឹងការជក់បារីនេះ នរិទ្ធ និង វណ្ណដា ក៏បានបញ្ជាក់បន្ថែមថានេះមិនមែនជាការគាំទ្រ ឬការលើកកម្ពស់ការជក់បារីទេដោយ ទទួលស្គាល់ពីហានិភ័យសុខភាពប៉ុន្តែចេតនាច្នៃប្រឌិតដើម្បីផលិតតន្ត្រីដែលលើកកំពស់សីលធម៌របស់កងទ័ពជួរមុខខ្មែរ៕

តារាពហុជំនាញ ខាត់ សុឃីម បានដាស់តឿនស្មារតីកូនខ្មែរកុំពហិការបានតែមាត់ ត្រូវងាកមកជួយគាំទ្រផលិតក្នុងស្រុកព្រោះវាជាការរួមចំណែកជួយជាតិ។ យ៉ាងណា អ្នកនាង ខាត់ សុឃីម ថាខ្លួនមិនអាចកំណត់ឱ្យក្មេងៗពហិការតាមគ្រប់យ៉ាងនោះទេ ប៉ុន្តែកុំបានតែមួយចម្អិនកំពឹសហើយធ្វើឱ្យជាតិសាសន៍គេដឹងពីចរិតរបស់យើងគេមើលងាយយ៉ាងណាក៏មិនចាំ។

អ្នកនាង ខាត់ សុឃីម បានចែករំលែកវីដេអូមួយនៅលើបណ្តាញសង្គមនាថ្ងៃទី២៣ សីហា ក្នុងអំឡុងពេលចូលរួមកម្មវិធីផតខាស់។ វីដេអូដែលតារាពហុជំនាញរូបនេះបានបង្ហោះគឺជាការចូលរួមដាស់ស្មារតីកូនខ្មែរ ស្របពេលមានការពហិការទំនិញរបស់ប្រទេសជិតខាង។ អ្នកនាង ខាត់ សុឃីម បាននិយាយថា កុំពហិការបានតែមាត់ ប្រសិនជាកំណត់ខ្លួនឯងបានប៉ុណ្ណឹងត្រូវតែធ្វើខ្លួនឯងឱ្យរឹងមាំដូចជាការនិយាយ។ អ្នកនាង ក៏បានលើកឧទាហរណ៍ថា ជាខ្មែរដាច់ខាតគឺត្រូវសរសេរអក្សរខ្មែរ និយាយខ្មែរ កុំយកភាសាអង់គ្លេសមកសរសេរជាស៊ីងខ្មែរហើយក្មេងជំនាន់ក្រោយគឺភ្លេចខ្លួនត្រង់ចំណុចនេះ។

តារាស្រីរូបនេះបានបន្តទៀតថា បើពលរដ្ឋខ្មែរពហិការមិនប្រើរបស់គេ ប្រើតែរបស់ក្នុងស្រុកគឺជាការជួយខ្មែរមួយចំណែក ជួយជាតិមួយចំណែក។ ក្នុងនោះដែរអ្នកនាង ខាត់ សុឃីម ថាខ្លួនមិនអាចកំណត់ឱ្យក្មេងៗត្រូវតែតាមខ្លួនគ្រប់យ៉ាង ត្រូវពហិការគ្រប់យ៉ាងនោះទេប៉ុន្តែកុំបានតែមួយចម្អិនកំពឹស នោះជាតិសាសន៍គេដឹងពីចរិតរបស់ពួកយើងបានតែមួយភ្លាតៗ។

តារាចម្រៀង ខាត់ សុឃីម បានបន្ថែមទៀតថា ការចូលរួមបានតែមួយភ្លាតហើយទៅរកគេវិញធ្វើឱ្យគេមើលងាយ គេធ្វើអ្វីដាក់ក៏ដោយក៏មិនចាំ។ ក្នុងនោះដែរអ្នកនាងចង់ឱ្យខ្មែរគិតថាយើងនៅទីតាំងមួយកុំគិតថានៅទីតាំងគេបានរស់បាន ហើយការនៅទីតាំងខ្លួនឯងគឺផ្តល់កិត្តិយស សុខសុវត្ថិភាព ជាចំណុចមួយត្រូវធ្វើឱ្យបានក្នុងពេលនេះ ខណៈមានស្មារតីជាតិនិយមតែមិនជ្រុលនិយម៕

បន្ទាប់ពី ពេជ្រ វត្តីសារ៉ាវឌ្ឍី ថតប្រម៉ូតស្បៃខ្មែរហើយទទួលបានការចាប់អារម្មណ៍ខ្លាំងពីអន្តរជាតិបន្ទាប់ពីមានផេកល្បីមានអ្នកតាមដាន៤លាននាក់ផ្សព្វផ្សាយបន្តបានធ្វើឱ្យអ្នកលេងបណ្តាញសង្គមផ្ទះលេខ២កើតទុក្ខមិនសុខចិត្ត។ មិនត្រឹមតែប៉ុណ្ណោះ ផេកថៃមួយចំនួនបានប្រើពាក្យមិនសមរម្យឌឺដងមកកាន់ ពេជ្រ វត្តីសារ៉ាវឌ្ឍី និងចោទប្រកាន់ថានេះជាសំលៀកបំពាក់របស់ថៃ។

ដូចប្រិយមិត្តមួយចំនួនជ្រាបមកហើយថាវីដេអូរបស់ ពេជ្រ វត្តីសារ៉ាវឌ្ឍី បេក្ខភាពបវរកញ្ញាចក្រវាលកម្ពុជាឆ្នាំ២០២៥ បានគ្រងឈុតប្រពៃណីខ្មែរយ៉ាងស្រស់ស្អាតថតនៅឯប្រាសាទបាពួន ជាឈុតស្បៃដែលទទួលបានការបំផុសគំនិតពីសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរទទួលបានការចាប់អារម្មណ៍យ៉ាងខ្លាំង។ ជាមួយនឹងភាពល្បីល្បាញរបស់ ពេជ្រ វត្តីសារ៉ាវឌ្ឍី រួមជាមួយនឹងការផ្សព្វផ្សាយវប្បធម៌ខ្មែរលើកនេះផេកល្បីមួយដែលមានឈ្មោះថា missosology ដែលមានអ្នកតាមដានរហូតដល់៤លាននាក់យកទៅផ្សព្វផ្សាយបន្ត។

ទទួលបាននូវការចាប់អារម្មណ៍ខ្លាំងដូចនេះបានធ្វើឱ្យផ្ទះលេខ២កើតទុក្ខមិនសុខចិត្តចូលទៅខម្មិនជាច្រើននៅក្នុងផេករបស់ missosology សូម្បីតែនៅលើគណនី Instagram របស់ ពេជ្រ វត្តីសារ៉ាវឌ្ឍី ក៏ត្រូវបានពួកសៀមចូលទៅខម្មិនវាយប្រហារ ហើយបញ្ចេញមតិក្បត់ការពិតថា ស្បៃ និងសំលៀកបំពាក់ដែល ពេជ្រ វត្តីសារ៉ាវឌ្ឍី ប្រម៉ូតនេះគឺជារបស់ថៃ។

មិនទាន់អស់នោះទេ បណ្តាផេកមួយចំនួនទៀតដែលកាន់កាប់ដោយថៃគឺច្រាលឈាមយ៉ាងខ្លាំងបានបង្ហោះពី ពេជ្រ វត្តីសារ៉ាវឌ្ឍី ព្រមទាំងបញ្ចេញពាក្យមិនសមរម្យមកកាន់នាង។

គួរបញ្ជាក់ផងដែរថានៅក្នុងប្រទេសថៃ ពេជ្រ វត្តីសារ៉ាវឌ្ឍី គឺមានឈ្មោះបោះសំឡេងខ្លាំងដូច្នេះចំពេលមានជម្លោះខ្មែរនិងថៃគឺនាងទទួលបានពាក្យសម្តីវាយប្រហារយ៉ាងខ្លាំង ប៉ុន្តែនាងមិនខ្វល់នោះទេ។ ពេជ្រ វត្តីសារ៉ាវឌ្ឍី ក៏បាននិយាយដែរថានាងថតប្រម៉ូតវប្បធម៌ខ្មែរឱ្យបានច្រើនទុកជាប្រវត្តិសាស្រ្តព្រោះមានប្រទេសខ្លះចូលចិត្តក្លែងបន្លំយកទៅធ្វើរបស់ខ្លួនឯងណាស់៕

បន្ទាប់ពីតារាសម្តែង វ៉ាង ស្រីណូ បង្ហាញឈ្មោះចំៗទៅកាន់ហាងពេជ្រមួយកន្លែងនៅម្តុំផ្សារថ្មីមានឈ្មោះថា គួង ហុង បានបង្កឱ្យមានការចាប់អារម្មណ៍យ៉ាងខ្លាំងពេញបណ្តាញសង្គម។ ចំណែកឯតារាសម្តែង ប៉ូគឹមថេង សុតធីតា វិញក៏បង្ហាញថានាងបានទិញគ្រឿងពេជ្រនៅទីនេះដូចគ្នាអស់ជិត២០០០ដុល្លារប៉ុន្តែនាងថាតិចឬច្រើនមិនសំខាន់ សំខាន់គេបោកនៅនឹងភ្នែកស្រស់ៗ។

នៅយប់ថ្ងៃទី២២ សីហា បវរកញ្ញា និងជាតារាសម្តែង ប៉ូគឹមថេង សុតធីតា បានចេញវីដេអូខ្លីមួយទាំងយប់បន្ទាប់ពីទើបបញ្ចប់ការងារបញ្ជូលសំឡេងភាពយន្តរបស់ខ្លួន។ តារាស្រីរូបនេះបាននិយាយថាពេលបើកហ្វេកប៊ុកទៅឃើញគេផ្អើលរឿងហាងពេជ្រលក់ចេញតែមិនទិញចូល។ សុតធីតា ក៏បានបង្ហាញថង់ក្រហមដែលមានឈ្មោះហាងពេជ្រ គួង ហុង ដែលកំពុងល្បី ខណៈនាងបានបញ្ជាក់ថាខ្សែកដែលនាងបានទិញនៅហាងនេះមានតម្លៃជិត២០០០ដុល្លារ។ បន្ទាប់ពីបង្ហាញហើយ ប៉ូគឹមថេង សុតធីតា គ្មានពាក្យអ្វីនិយាយតក្រៅពីការដកដង្ហើបធំឡើយ។

ភ្ជាប់ជាមួយនឹងការចេញវីដេអូខ្លីខាងលើនេះ ប៉ូគឹមថេង សុតធីតា បានបញ្ចេញអារម្មណ៍បន្ថែមទៀតនៅក្នុងផ្នែកបញ្ចេញមតិយោបល់ថាទឹកប្រាក់តិចឬច្រើនមិនសំខាន់ សំខាន់គឺត្រូវបានម្ចាស់ហាងបោកនៅនឹងភ្នែកស្រស់ៗ។ សុតធីតា សរសេរថា «ខ្ញុំទិញជាង១ឆ្នាំហើយ ឥឡូវឮថាម្ចាស់ហាងរត់ទៅស្រុកគេបាត់ហើយ តិចច្រើនមិនសំខាន់ទេ តែសំខាន់គេបោកស្រស់ៗឈឺចិត្ត»។

គួរបញ្ជាក់ផងដែរថា កាលពីថ្ងៃទី២២ ខែសីហា វ៉ាង ស្រីណូ បានចេញវីដេអូអំពីហាងពេជ្រគួង ហុង បោកប្រាស់អតិថិជនគ្មានទទួលខុសត្រូវ ខណៈនាងបានទិញគ្រឿងអលង្ការនៅក្នុងហាងនេះអស់រាប់សែនដុល្លារ ដោយអីវ៉ាន់ដែលទិញនៅហាងនេះហើយមិនទទួលទិញចូលវិញ។ ក្រៅពី វ៉ាង ស្រីណូ នៅមានពលរដ្ឋផ្សេងទៀតបានបង្ហាញថាក៏បានត្អូញត្អែរឈឺចិត្តស្អិតទ្រូងត្រូវហាងនេះបោកប្រាស់ដូចគ្នា៕

ក្រោយពីជីវិតឯកជនរួមរិតដោយមតិសាធារណៈអ្នកនាង មាស សុខសោភា បានចេញមកលាតត្រដាងបន្តទៀតពីអតីតស្វាមីដោយតារាចម្រៀងរូបនេះថាខ្លួននាងរកស៊ីចិញ្ចឹមប្តីជាង១០ឆ្នាំ អតីតស្វាមីលួចផិតក្បត់មានស្រី ស្ទើរតែសម្លាប់ខ្លួន ចោទប្រកាន់នាងគ្រប់សព្វ ខណៈនាងខំដើរច្រៀងរហូតដល់រលូតកូន។

ទោះបីជាពេលនេះតារាចម្រៀង មាស សុខសោភា និង លោក រ៉ាដា បញ្ចប់សម្ព័ន្ធភាពជាប្តីប្រពន្ធហើយ ប៉ុន្តែរឿងរកាំរកូសរបស់អ្នកទាំងពីរនិងគូស្នេហ៍ថ្មីរបស់តារាចម្រៀងរូបនេះនៅតែប្រធានបទដ៏ក្តៅគគុកពីអ្នកនិយមលេងអ៊ីនធឺណិត។ នៅថ្ងៃទី២៣ សីហា នេះតារាចម្រៀង មាស សុខសោភា ក៏បានលាតត្រដាងពីទំនាក់ទំនងរបស់អតីតស្វាមីនិងបានចោទថាលួចផិតក្បត់លួចមានស្រីរហូតស្ទើរតែចង់សម្លាប់ខ្លួន។ រកស៊ីចញ្ចឹមប្តីជាង១០ឆ្នាំ មាស សុខសោភា បានចោទសួរថាស្រ្តីម្នាក់ណាដែលមានរឿងនេះដូចជាខ្លួនមិនទទួលបានលុយប្តីសូម្បីតែ១០ដុល្លារ។ លុយដែលរកបានពីអាជីពសិល្បៈ មាស សុខសោភា ថាប្តីយកទៅទិញរបស់ដាក់ឈ្មោះរួមគ្នា លុយបានប៉ុន្មានប្តីជាអ្នកកាន់តែទាំងអស់។

តារាចម្រៀងដែលមានទឹកដមសំឡេងក្រអួនក្រអៅរូបនេះបានលាតត្រដាងទៀតថា អតីតស្វាមីរបស់ខ្លួនរករឿងប្រចណ្ឌទំលាក់កំហុស ដេញម្តាយបងប្អូនចេញពីផ្ទះ ចោទប្រកាន់នាងផិតក្បត់ជាមួយកូនអ្នកធំនេះ អ្នកធំនោះ ពេលឈឺគ្មានអ្នកមើលថែមានប្តីដូចអត់ប្តី មិនដែលឱ្យតម្លៃនាងជាប្រពន្ធ ខំដើរច្រៀងរហូតដល់រលូតកូន។

មាស សុខសោភា ថាក្រោយពេលលែងលះគ្នាត្រូវប្រគល់ទ្រព្យសម្បត្តិដែលខ្លួនរកបានពីការច្រៀងទៅឱ្យគេ ហើយព្រោះតែចង់មានសុភមង្គលទោះប្តីមានស្រី ប្តីចោទប្រកាន់ផិតក្បត់ក៏ស៊ូខាំមាត់សង្កត់ចិត្តមិនតបត ស៊ូខុសជាមួយគ្រួសារខំសើចបន្លំភ្នែកមហាជនទាំងក្នុងទ្រូងស្ទើរប្រេះធ្លាយ។ តារាចម្រៀងរូបនេះថាមូលហេតុមកពីមិនយល់ធម៌ មិនស្គាល់ខ្លួនឯង ប៊ិះនឹងសម្លាប់ខ្លួនដោយសារប្តីហេងស៊យ បើគ្មានអ្នកព្រះធម៌ចេញមកពន្យល់បានទាន់ពេលទេនោះជីវិតត្រូវលាចាកលោកយូរមកហើយ។

ម្ចាស់បទ «ដើមឈើស្នេហ៍» បានបង្ហាញការខកចិត្តរបស់ខ្លួនដែលមនុស្សគ្មានគុណធម៌មួយចំនួននាំគ្នាទៅកាន់ជើងមនុស្សពាលទាំងកន្លងមកនាំនាងសាងតែអំពើបាប នាំដើរផឹកស៊ីកំដរពួកម៉ាករាល់យប់និយាយតែរឿងកាប់ចាក់ទើបនាងមិនអាចទ្រាំតទៅទៀតបាន។ មាស សុខសោភា ថាកុំមកវាយប្រហារ ប្រមាថមកលើនាងទៀតព្រោះកន្លងមកនាងល្បីដោយសារសម្លេងចេញពីធម្មជាតិ ហើយក៏មិនបានជួលអ្នកណាឱ្យមកស្តាប់សម្លេងរបស់នាងដែរ។ តារាចម្រៀងរូបនេះថាមានទុក្ខសោក ធុញថប់ក្នុងអារម្មណ៍មកស្តាប់ចម្រៀងនាងសោះកុំមកតាំងខ្លួនថាបើគ្មានពួកអ្នកមិនមានភាពល្បីដល់ថ្ងៃនេះទៅវិញ។ ត្រូវចាំថា សម្លេងរបស់នាងខ្ញុំទេ ដែលធ្វើឱ្យនាងខ្ញុំល្បីនេះជាសច្ចធម៌ពិត។

មាស សុខសោភា ថាកុំយករឿងឯកជនរបស់នាងទៅធ្វើជាប្រធានបទបំពុលសង្គម ទាំងស្រុកទេសកំពុងជួបបញ្ហាជួយយកពេលទៅជួយគិតគូរដល់ថ្នាក់ដឹកនាំ ប្រទេស និងរួមគ្នាជួយគិតគូរប្រយោជន៍រួមវិញ៕